🗡🥀#رِيْبَة_جُورِي🥀🗡

حلقة 26

حلقة 26
#جوري_تحكي
حليت عينيا شوي على صوتهاا الي تسلل لوذيناا من بعيييد..للحظة حسبت روحي مازالت ف نفس الكابوس..من الليلة هاكي و انا نحلم ب نفس الحلمة وين هو يجري وراياا ويخنقني ف البيت نفسهاا الي تخنقت فيها قبل.. يكبس علياا بيديه الزوز ويسكر علياا النفس يخليني نفرفط بين يديه..خذيت نفس طويل ورخفت بدني شوي الي كان متشنج..هزيت راسي شوي على صوتها تحكي
سارة :" جوري عزيزتي اياا قوم شوي لازمك تفطر "
هزيت روحي شوي وتقعدت..رجعت شعري لتالي وبقيت نغزرلها ساكتة..شدتني من يدي تحكي
سارة :" جوري احكي معاياا عيش اختى.. لوقتاه بش تبقى ساكتة هكاا..اسبوع تعدا عليك تو و انت ف الحالة هاذي..راني خايفة عليك "
دورت وجهي لناحية لخرى وبقيت نغزر للشباك..حسيت بيهاا كيف وقفت من حذاياا تحكي
سارة :" نمشي نجيبلك فطورك ودواك ونرجع..رد بالك ترجع ترقد  "
سمعت صوت الباب الي تسكر كيف خرجت هي..اسبوع تعداا علياا و انا عالحالة هاذي..اسبوع و انا شادة البيت و الفرش راقدة..حتى خدمتي بطلتها..سارة مشات حكات معاهم وقالتلهم اني مريضة وبش نغيب فترة..اصلا يمكن هذاا انسب حل الفترة هاذي اني نبعد..خاطر بلحق ماعنديش قوة بش نعمل شي..كيما حسيت روحي عاجزة بش نحكي و لا نرجع لحياتي الي حسبتهاا رجعت طبيعية كيف الناس..اسبوع عديتو و انا بين جاد و جوهر الي بقاو يحاولو معاياا بش يفهمو شنوة صار و شكون الي نحكي عليه..اما مانجمتنش نقول.. مانجمتش ننطق ب حاجة عقلي و قلبي رافضينهاا..خاطر انا اصلا مش عارفة شكون هو فيهم..ماهر الي ممكن يحب يرجع يكمل الي بداه و لا بدر الي قاعد ينتقم لروحو..و الفكرة هاذي بالذات نحسها تخنقني..خاطر انا انجم نتحمل هذا الكل الكل المهم يكون مش منو هو..هزيت يدي ومسحت دمعتي الي نزلت وغزرت لسارة كيف دخلت وقعدت بجنبي تحكي
سارة :" اياا هز روحك لازمك تاكل "
استويت في قعدتي و مديت يدي هزيت كاسة العصير..عملت رشفة منهاا ورجعتها..غزرتلي مستغربة تحكي
سارة :" كهو ؟ زيد اشرب "
غمضت عينيا بالقوي و رجعت حليتهم وعاودت هزيت الكاسة..ماحبيتش نتعبهاا معاياا اكثر و لا نخليهاا تضغط علياا..بقيت نشرب ف العصير ساكتة..ريتهاا كيف هزت قطعة كيك تحكي
سارة :" كول هاذي "
خذيتهاا من يداها و يادوب عضيت منهاا ورجعتهاا.. هزيت بكتافي بمعني يزيني..هزتلي براسها باهي تحكي
سارة :" باهي اشرب دواك تو "
هزيتلهاا براسي باهي وتلفتت لتابل دونوي خذيت منو دواياا وشربتو..ريتهاا كيف قامت تحكي
سارة :" شرايك كان تقوم تعمل دوش ينعوشك شوي ؟"
نزلت للفرش و تسطحت من غير مانجاوبهاا..عطيتها بظهري وتغطيت بالكامل..سمعتهاا كيف تنهدت وخرجت من البيت..اول ما سمعت الباب تسكر..بعدت لغطاء من فوقي وقمت..قربت ناحية الشباك وبقيت نغزر للشارع من براا وين لقيت روحي نخمم ف الف حكاية..اما مانيش عارفة شنوة القرار الي بش ناخذو تو..حسيت روحي ضايعة ف حلقة كبيييرة و فارغة..تنهدت بالقوي ورجعت تلفتت للبيت قربت للباب سكرتو بالمفتاح وقربت ناحية الدريسينغ جبدت حوايجي ودخلت للسال دوبان..عملت دوش خفيف وخرجت لبست حوايجي وحضرت روحي فيسع..اول ما رجعت للبيت غزرت لتاليفوني الي نوقز..قربت هزيتو وين لقيت رقم جاد..علقت عليه ورجعت التاليفون خاطرني مانحبش نحكي معاه..فديت من كل شي و من طريقة علاجو الي ب لحديث..خذيت نفس طويل وقمت مشيت ناحية الشباك سكرتو و ظلمت البيت لبست كبوطي وحطيت ساكي على كتفي..هزيت سباطي ف يدي وقربت ناحية الباب..حليتو بالسياسة وخرجت..ماحبيتش نقول لسارة اني خارجة خاطر جاد موصيها..و انا ف اللحظة هاذي مانحب حد معاياا و يكلمني..خرجت من البيت و بقيت نمشي بخطوات خفيفة بش سارة ماتسمعنيش..تلفتت للصالة وين ريتهاا متسطحة تتفرج ف التلفزة..كتمت انفاسي شوي وقربت فيسع للباب..حليتو بالشوي وخرجت..اول ماخرجت حطيت سباطي وقعدت عالدروج نلبس فيه..اول ما قمت خذيت نفس طويل محاولة مني بش نتماسك..قربت ناحية الاصونصير طلعت وضغطت عالزر شوي وقت ونزلت..اول ما خرجت من العمارة وقفت و خذيت نفس طويل من النسمة الباردة الي ضربتني..اسبوع كامل عديتو و انا مخنوقة ف البيت..رجعت شعري لتالي وسكرت كبوطي اكثر..قربت لطريق ومديت يدي وقفت اول تاكسي..طلعت فيهاا نحكي
انا :" هزني ******* "
اول ما تحرك تكيت براسي عالبلار وبقيت نخمم ف الخطوة الي انا عملتهاا تو..مانعرفش كان صحيحة و لا غالطة اما مالقيت حتى حل كان هذاا..اني نمشي و نواجهو ونفهم منو كل شي صار..لازمو يسمعني المرة هاذي مش على كيفو..لازمني نعرف كان هو وراء هذا الكل و كان اي علاش يعمل هكاا.. وقتهاا مستعدة نحكيلو كل شي..و كان بش يطلع خاطيه وماهر الي رجع لازم نحذر بدر زادة..حليت الشباك و بقيت نتنفس من لهواء الي كان يضرب فياا..قلبي ضرب بقوة اول ما تاكسي وقفت قدام الوكالة الاستخبارية.. خلصتو ونزلت..بقيت واقفة نغزر للبلاصة ونخمم كان نقدم و لا لا..و إذا قدمت وقابلتو كيفاه بش نبدا حديثي معاه.. دقات قلبي قوات من فكرة اني بش نراه ف اللحظة هاذي.. لدرجة اني دخلت بعضي وبديت ننسى خوفي متاع اسبوع كامل..حاولت نهدي روحي شوي خاطرني سايي خذيت قراري انا بش نحكي كل شي صار..بش نحكيلو شصار ليلتهاا و شنوة صار بعدهاا..بش نحكي الي نعرفو ضد الكل و مايهمنيش شنوة بش يصير..خاطر مستحيل كان نرضى نكمل ف الطريق هذا وحدي..و لا نتحاسب على شي مانيش كان انا مذنبة فيه..جاء لوقت بش لكوارط لكل تتفرش وتتكشف