🗡🥀#رِيْبَة_جُورِي🥀🗡

حلقة 4

الحلقة الرابعة
#جوري_تحكي

حليت عينيا على يديه الي كانت كابسة علياا.. ليلة لبارح كانت أول ليلة نرقد فيها مرتاحة هكاا.. مش عارفة من وجود جاد معاياا والا من القرار الي خذيتو اني واخيرا بش نقبل العلاج.. هزيت راسي شوي نغزرلو.. يمكن هاذي اول مرة نثبت فيه و نتعمق ف تفاصيل ملامحو.. أربعة سنين و هو بجنبي..مهما صار بيناتنا اول مرة هو بقى يحاول معايا.. مرضاش يخلي طبيب اخر يشرف على حالتي.. كان ديما موجود بجنبي.. وجودو هو و سارة هناا خفف علياا لوجيعة و احساس الوحدة..رجعت شعري لتالي وهزيت روحي شوي وقمت.. اول مانزلت ساقياا وعفست عالقاعة حسيت بوجيعة الجرح مست في قلبي .. عضيت على شفايفي و قمت نمشي بالشوي بالشوي .. اول ما دخلت لتوالات بقيت واقفة نغزر للشي الي عملتو انا لبارح .. رغم تقبلي للعلاج انا متأكدة انو فما حاجات مستحيل كان نبرى منهم ونقدر نتجاوزهم.. و اولهم خوفي هذا.. تلفتت على صوتو ورايا يحكي
جاد :" صباح الخير..كيفاه تحس ف روحك ليوم ؟"
انا :" صباح النور .. مليحة الحمدلله "
جاد :" هياا اغسل حالتك و ايجا بش تشرب دواك.. سارة جابتو لبارح ف الليل "
انا :" باهي .. جاد ؟"
جاد :" نعم "
انا :" ميسالش نخرجو للمطعم و بعد لجنينة ؟ "
جاد :" اكيييد..اصلا ليوم لازمنا نحكيو شوي..انت حاضرة ؟"
انا :" امم حاضرة "
جاد :" انا بش نمشي لبيروياا شوي و نرجعلك "
انا :" باهي "
اول ما خرج سكرت بابا التوالات و بقيت نغسل ف حالتي .. لميت شعري و سكرت أزرار الروبة.. كنت حاسة بثقل كبير فوق صدري و رغم هذاا كان لازمني نتقوى على روحي .. معادش قادرة نزيد نعدي سنين من عمري هناا.. لبلاصة هاذي ماساعدتنيش بالعكس .. خلاتني نزيد نضيع اكثر .. خذيت نفس و رجعت للبيت .. شربت دوايااا و خرجت من البيت .. بقيت نمشي بالشوي بالشوي .. نسايس ف الجرح الي كان ف ساقيااا .. اول ماوصلت قدام بيروه .. بقيت نقرا ف اسمو المكتوب عالافتة الي كانت معلقة ..
" د.جاد الرايس " ..
مديت يدي ناحية الباب بش ندق .. اما لقيتو كان مفتوح شوي .. حليتو و دخلت راسي بش نشوف معاه .. شفتو كيف كان عاطيني بظهرو وواقف قدام الشباك يحكي ف التاليفون .. حليت الباب اكثر و دخلت شوي .. شبكت يديا في بعضهم وبقيت واقفة قدام الباب نستنى فيه يكمل يحكي .. عقدت بحواجبي كيف سمعت نبرة صوتو تبدلت فجأة .. علات و صار يحكي بغش
جاد :" انت ماتفهمش ياااااخي ؟؟....... *** قتلك مانجمش مانجمش....... اسمع قص عالموضوع هناا....... كيف نراااك نحكيو و معادش تطلبني.. تفهم فيااا ؟ "
وخرت بخطواتي لتالي و لصقت في الحيط.. للحظة حسيت روحي خفت و ندمت اني اقتحمت عليه بيروه من غير استئذان .. شفتو كيف تلفتلي .. حل عينيه فيا و بقى يغزرلي ساكت .. رمشت عينيا برشة مرات و هبطت راسي ف القاعة .. حسيت بيه كيف قربلي ووقف قدامي وين جهامتو غطاتني و حجبت الضو عليااا .. عضيت على شفايفي اول ماسمعت سؤالو ..يحكي
جاد :" شتعمل هنا ؟؟"
انا :" انا.. انا حبيت نقلك.. الي انا حاضرة بش نخرجو"
جاد :" و من وقتاه و انت واقفة هكااا ؟"
هزيت راسي معاه و بقيت نغزر لعينيه وين حسيت قلبي شوي و ياقف من الموقف الي تحطيت فيه .. بلعت ريقي بالسيف نحكي
انا :" مازلت كيف جيت ماعنديش برشة..سامحني مانقصدش اني ندخل عليك هكاا .. اما لقيت باب بيروك مفتوح .. من غير قصد مديت يدي حليتو ودخلت "
شفتو كيف تبسم على جنب و ضيق عينيه فيا يحكي
جاد :" شبيك قاعدة تبررلي؟ "
انا :" خاطرني غلطت و حبيت نوضحلك "
جاد :" و انا مطلبتش منك توضيح.. جيست سألتك و كهو "
انا :" باهي "
جاد :" هياا اخرج قدامي.. يستنى فينا نهار طويل ليوم "
انا :" علاش ؟؟"
جاد :" امشى و تو تعرف.. مانحبش اسئلة.. انا بش نسأل ليوم و انت بش تجاوب.. تفاهمنا ؟"
انا :" تفاهمنا دكتور "
ضحكلي و اشرلي بعينيه بش نخرج .. خرجت قدامو و بقيت نمشي .. شفتو كيف خلط عليا وبقى يمشي بجنبي ..تلفتت على جنب و بقيت نغزرلو .. كان لابس طبلية بيضاء و حاط يديه ف جيبو و يمشى .. كان يتبسم لناس الكل .. وجهو كان بشوش لدرجة انك كيف تغزرلو تحس بالراحة .. استغربت كيفاه شكلو هذاا كان العكس دقايق لتالي .. اول مرة نشوفو مغشش و يحكي هكاكا.. اما حاولت مانركزش ياسر معاه..اول ماوصلنا للمطعم .. وقف قدامي يحكي
جاد :" اسبقني عالطاولة و انا تو نجيبلك الطبق "
انا :" باهي "
بقيت نمشي وندور بعينيا عالبلاصة .. أصوات صياح و ضحك المرضى نحسو يوترني .. يوترني لدرجة اني كان نلقى نصيييح و نسكتهم الكل .. و الا نحل الباب الي قدامي و نهرب بعيييد علاهم .. هبطت راسي و كملت مشي حتى وقفت قدام طاولة بجنب الشباك تطل عالجنينة .. قعدت عالكرسي و تكيت براسي عالحيط و خليت عينيا تغزر لبرا .. للحظة تمنيت كان نخرج و نجري و نڤز .. كيفاه انا تحرمت من هذا الكل مش عارفة .. كل حاجة حلمت بيها تسلبت من قدام عينيا .. طلعت يديا و كبست على جبيني وين حاولت نتفكر شنوة صار من بعد اما شي مانجمتش..خمسة سنين و التصويرة مازالت ضبابة قدامي و الاصوات مش منظمة..فقت من سرحتي على صوت الطبق الي تحط قدامي .. هزيت راسي غزرتلو كيف قعد قدامي وعدا بعينيه عليا يحكي
جاد :" اياا افطر "
هزيتلو براسي باهي و بقيت نحرك في المغرفة و ناكل بالشوي بالشوي .. كنت كل شوي نخطف غزرة منو .. صحيح وجودو معاياا تو مخليني مرتاحة .. اما حاسة روحي خايفة من الأسئلة الي ينجم يطرحهم علياا .. عضيت على شفتي اللوطانية نحكي
انا :" جاد .. ميسالش نسالك ؟"
جاد :" تفضل "
انا :" تتصور انو علاجي يتطلب برشة وقت؟"
جاد :" مانجمش نقلك من تو.. اما قد ما انت تتجاوب معاياا قد ما نربحو وقت "
انا :" باهي.. يعني وكيف نطلع انا لباس علياا مش مريضة "
جاد :" صدقني جوري ف الدنيا هاذي كلنا مرضى.. المرض النفسي يكون درجات و على حسب الشي الي خلاك تمرض.. الناس الكل عندها عقد نفسية.. اما فما ناس تتقبل هذا و تتعايش معاه و فما ناس لا.. ترفضو و هذا الي يخليهم يزيدو يمرضو اكثر.. كيف الاكتئاب.. هو درجات زادة.. فما الي يتقبل فكرة الاكتئاب و يحاول يخرج من قوقعتهاا و فما الي يزيد يغم على راسو و يبقى عايش بيه حتى ساعات يوصلو للانتحار "
وطيت ف صوتي شوي نحكي
انا :" فكرة الانتحار كنت ديما نخمم فيهاا.. خاصة ف العام الي عديتو ف السجن.. وقتهاا انا.... "
لحظتها مانجمتش نكمل نحكي.. حسيت غصة شدتني ووحلت ف حلقي مع الدموع الي حسيتهم هدو علياا و خنقوني اكثر.. كل مانتفكر شنوة صار فياا العام هاكي نحس بالنار تشعل فيااا من داخل.. غمضت عينيا بالقوي و رجعت حليتهم على صوتو يحكي
جاد :"كمل نسمع فيك.. وقتها شنوة احكي ؟ شنوة عملو فيك ف السجن ؟"
انا :" م.. ميسالش نخليو الموضوع هذاا لمرة اخرى امان.. مانحبش نتفكر و نحكي امان جاد  "
جاد :" هو لحديث اهم جزء من علاجك.. اما ميسالش بش نخليك على راحتك و نتعداو الفترة هاذي.. نحكيو ف حاجة أخرى.. قتلي خممت ف الانتحار وقتهاا ؟ و بعد رجعت خممت فيه ؟"
انا :" لااا.. لقيت انو الموت مش مهرب .. مانحبش نموت و انا ف عينين الناس الطفلة القا••تلة المجن/ونة .. كان لازمني نكبش ف الدنياا حتى نعرف حقيقتي "
جاد :" باهي احكيلي على حقيقتك قبل الحادثة..يعني ارجع عرفني على جوري ف الوقت هذاكا "
عديت بعينيا عليه و خذيت نفس طويل..حطيت شعري لتالي نحكي
انا :" وقتها عمري 23 سنة..كيما قتلك قبل انا تخرجت من كلية التجارة.. قريت حاجة انا مانحبهاش..بابا هو الي ختارهالي..قال لازمني حاجة ف دومان خدمتو و انا قبلت.. واكيد راك تعرف الي انا بنت المستشار السابق ورجل الأعمال سليم بالنور.. اسمو هذاا كان عقدتي..المهم كنت عايشة معاه و مع ياسمين "
جاد :" و قبل الفترة هاذي حياتك كيفاه كانت ؟ يعني طفولتك؟"
انا :" طفولتي كانت عادية عاللخر.. حتى لين وصلت 19سنة.. تعرف انا عشت ثلاثة مراحل ف حياتي.. 19 سنة عديتهم فرحانة بين بابا و امي قبل ماتمشي وخواتي و الناس الي يحبوني.. بعدها هبت عاصفة كبيرة ف دارنااا.. عاصفة دمرتنا كلنا..ودمرتني انا اكثر وحدة.. كنت انا اكثر وحدة متضررة..ماكفاهمش اني متعذبة زادو هوما عذبوني وقتلي شافو انا السبب ف الي صار..ثلاثة سنين كانو كافيين بش يقت••لوني.. بدلوني لدرجة اني ماعدتش نعرف روحي..صرت نشرب ونتكيف.. نسهر..عملت لفساد لكل.. كنت مستعدة نعمل كل شي وأكثر من هذاا صدقني المهم عندي ننسى الي صار "
مسحت دمعتي الي نزلت على خدي.. تبسمت على جنب ورجعت نحكي
انا :" وقبل ما نرتاح من لحكاية هاكي..لقيت روحي واحلة ف حكاية اخري..لقيت روحي متهمة بق••تل اختي و كيف قلت لااا قالو الي انا مجنونة.. علاش حد ما سمعني.. لا قبل و لا تو.. علاش كلهم يحكمو عليااا هكاكا.. انا شنوة عملت.. علاش كلهم نساوني.. علاش بابا بعد عليااا.. انا ماكنتش سبب ف الي صار قبل و لا الي صار لياسمين.. علااااش ماتحبوووش تصدقونييي علااااش.. انا ما قت--للللت حد.. انااا خاطيينييي.. خااااطييينيييي "
لحظتها حسيت روحي دخلت ف هستيرياا.. الي تفكرتو الكل خلاني نغيب عالحاضر و نغرق ف الماضي من جديد.. لحظتهاا مانعرفش كيفاه قمت من بلاصتي.. هزيت يدي كبست على صدري نصيح
انا :" تخنققققنت يااااربييي.. علاااش حد مارحمني فيهممم.. كلهم سلمو فياااا..نساوني خمسة سنين حد ماتفكرنيي..حد ماحب يعااااوني.. لهدرجة انا خايبة .. لهدرجة انا رخيصة عندهم و ما نسواش.. لهدرجة انا بلاش قيمة عند باباا "
حسيت بيديه الي دارت عليا و جبدتني عندو.. حطيت راسي على صدرو و طرشقت بالبكا.. كل دمعة كانت تهبط مني حسيتهاا خنقتني و حرقتني من داخل.. كبس علياا يحكي
جاد :" اشش يزي من لبكااا و اهدى جوري "
طلعت راسي غزرتلو نحكي
انا :" مانجمش نهدااا.. جاد انا تعبت والله راني تاعبة.. معادش عندي قوة بش نتحمل هذا الكل.. حسو بياااا امان.. انا مانيش مهبولة.. علااش بقيت كان انا نتحاسب بيناتهم.. راني تعذبت والله تعذبت.. علاش خلاوني وحدي.. علاش حد ما رضى انو يسمعني ويصدقني "
مسحلي على شعري من تالي يحكي
جاد :" انت مش وحدك.. انا معاك و بش نسمعك حتى اني بش نعاونك..كان لزم بش نخرجك من هنااا.. صدقني شوي وقت و نوعدك انك تخرج من هنااا.. غير انت عاوني واعطي فيا الثقة "
للحظة حسيت كلامو ووعدو ليا خلاوني نهدى شوي..عديت بعينيا عليه نحكي
انا :" بلحق جاد؟ انت تنجم تساعدني بش نخرج من هناا ؟"
هزلي براسو اي يحكي
جاد :" اي انجم.. جيست انت ارتاح تو واهدى.. مانحبش نراك هكاا "
دورت بيديا عليه و عنقتو على قوة جهدي.. وعدو لياا خلاني نرتاح و الأمل الي فقدتو سنين يرجعلي ف لحظة.. غمضت عينيا وبقيت نستحلى في يديه الي كانت تطبطب على ظهري.. رجعت حليتهم على صوتو يحكي
جاد :" هياا معاياا.. اطلع لبيتك ارتاح شوي.. يزيك ليوم "
بعدت عليه و هزيتلو براسي باهي.. بقيت نمشي بجنبو ساكتة.. هزيت راسي معاه نحكي
انا :" بش نرجع لغرفتي ؟"
غزرلي يحكي
جاد :" اي.. اما كان تحس ف روحك مازلت تاعبة ميسالش تنجم ترجع للغرفة متاع البارح بحذا لبنى "
انا :" لا لا مانيش تاعبة.. خليني نرجع لغرفتي "
هزلي براسو باهي من غير حتى كلمة وخرجنا..بقينا نمشيو حتى وصلنا للغرفة.. حليت الباب ودخلت.. تلفتت على صوتو ورايا يحكي
جاد :" انا بش نخرج تو..الليلة ماعنديش مراقبة..تو نخلي سارة تجيك.. وغدوة بش نجي على بكري نتفقدك.. ماتخافش باهي وكان صارت حاجة قول لسارة تطلبني.. ساعة و نكون عندك "
هزيتلو براسي باهي من غير حتى كلمة.. تبسملي يحكي
جاد :" برا ارتاح و حاول انك ترقد.. شوي وسارة تكون عندك ومانوصيكش نحبك بعد تتعشى مليح..تفاهمناا "
تبسمت نحكي
انا :" باهي تفاهمنا "
اول ماخرج سكرت باب الغرفة وقدمت ناحية الشباك.. قعدت عالحرف وتكيت براسي عالبلار سارحة ف كل شي صار.. فجاة حسيت وجيعة راسي رجعت لحظتها استندت بيدي عالحيط و قمت وين الدنيا رجعت تدور بياا من جديد.. بقيت نمشي بالشوي خفت لا ندوخ و انا وحدي.. اول ماوصلت للفرش..تسطحت وحطيت راسي عالمخدة.. شوي وقت وعينيا تغمضت..وين لقيت روحي غفيت فيسع من غير ما نحس بشي....