🗡🥀#رِيْبَة_جُورِي🥀🗡

حلقة 18

حلقة 18
#بدر_يحكي

حليت عينيا عالضو الي ضرب فياا.. كبست على جبيني بالقوي وفرد وقت هزيت روحي شوي وتقعدت.. مانعرفش كيفاه خذاتني عيني و غفيت للوقت هذا.. للحظة هاذي مازلت مش مصدق الي صار لبارح و انها معاياا تو تحت سقف واحد.. بعدت لغطاء من فوقي وقمت دخلت لسال دوبان عملت دوش خفيف بش نصحصح وريقلت اموري ورجعت للبيت بدلت حوايجي و نزلت.. قدمت بخطواتي ناحية الصالة وحليت الباب شوي.. ريتها كيف كانت راقدة و مش حاسة بشي.. قربتلها اكثر ووقفت قدامهاا.. عديت بعينيا عليها وين لقيت روحي سرحت وضعت ف كامل تفاصيلها.. خذيت نفس طويل وقربت ناحيتها اكثر طبست عليها شوي بش نفيقهااا و نخليها تمشي.. عقدت بحواجبي مستغرب كمية لعرق الي كانت فوق جبينهاا و خدودها كيفاه كانو حمر.. حطيت يدي على كتفها و طبطبت عليها نحكي
انا :" جوري ؟"
يا دوب حلت عيناها شوي غزرتلي ورجعت سكرتهم.. طلعت يدي وحطيتها فوق جبينهاا.. قلبي ضرب بقوة اول ما حسيت بالسخانة الي كانت ماكنتهاا.. طبست على ركايبي ناحيتها نحكي
انا :" جوري ؟ جوري حل عينيك و اغزرلي "
حلت عينها شوية وتكلمت بصوت واطي يادوب يتسمع تحكي
جوري :" ب.. بدر "
انا :" هاني حذاك.. قلي كيفاه تحس ف روحك عندك حاجة توجع فيك؟؟"
غمضت عيناها و ضمت شفايفهاا بالقوي.. تلملمت شوي تحكي
جوري :" ر.. راسي يوجع "
انا :" باهي ابقى مرتاحة.. و حاول تبقى فايقة ما ترقدش "
قمت من حذاها فيسع بش نتصرف اما وقفت على يداها الي تحطت على يدي وشدتني.. قلبي خظ بالقوي على كبست يداهاا لياا لدرجة اني حسيت بسخانتهاا سرات فيا.. غزرتلها كيف كحت شوي تحكي
جوري :" ب.. بدر ماتمشيش..ماتخلينيش مرة اخرى"
بقيت واقف ف بلاصتي نغزرلها كيفاه تهتري من قوة السخانة.. رخفت يداها مني و غمضت عيناهاا.. عديت بيديا على شعري وكبست على رقبتي بالقوي.. وخرت بخطواتي لتالي وعطيتها بظهري.. مشيت فيسع للكوجينة حضرتلها فطورها و حطيتو ف طبق مع دواء السخانة و الكحة هزيتهم و حطيتهم ف صالة حذاهاا ورجعت خرجت مشيت لبيت البانو الي تحت خذيت زوز مناشف بليت وحدة وخليت وحدة ورجعت حذاهاا.. قعدت بجنبهاا وحطيت كل شي عالطاولة بجنبي.. مديت يدي واستويتلها مخدتهاا.. هزيتلهاا راسها شوي و بعدتلها خصلات شعرها الي كانو فوق وجهها.. كل حركة كنت نعمل فيها كانت تخليني نحس بوخزة ف قلبي.. قربي منها لهدرجة حسيتو زعزعني من داخل.. انا وياها تو كيف "النار و البارود" بالضبط.. قاعد نتجاوز ف حدود انا حطيتهم عندي قداه.. اما رغم هذاا مانجمتش نتخلى علاهاا و هي ف الحالة هاذي.. مانجمش نسلم فيها و هي مطيشة قدامي مريضة هكاا.. خذيت المنشفة المبلولة وحطيتها فوق جبينهاا و باقي هي مش فايقة بشي.. نزلت يدي شوي متردد وحليتلها فلس البيجاما من فوق وين حسيت روحي ترهوجت وانا نشوف ف بدنهاا.. عديت بلساني على شفايفي وخذيت المنشفة الشايحة بقيت نمسحلها ف لعرق الي بقي يتسرسب فوقهاا.. رجعتها فوق الطاولة وقربتلها اكثر نحكي
انا :" جوري.. جوري فيق و حاول تهز روحك شوي "
حلت عيناها وغزرتلي تحكي
جوري :" ت..تاعبة.. تاعبة ب..برشة "
انا :" طبيعي بش تتعب.. قاعدة تحت لمطر و البرد ياكل فيك باللبسة هاكي شنوة تستنى مالا.. اكيد بش تمرض بعد هذا الكل "
جوري :" ر..راسي يوجع فياا "
انا :" هاني جبتلك الدواء.. قوم تاكل حاجة قبل "
جوري :" ماعينيش "
انا :" مش على كيفك.. هز روحك "
كبست بيداهاا عالملحفة وهزت راسها شوي.. فيسع مارجعت نزلتو تحكي
جوري :" مش.. مش منجمة امان.. دايخة "
تنهدت بالقوي وقربتلها اكثر قعدت بجنبها وهزيتلهاا راسهاا.. تكيتها فوق صدري وين حسيت برعشة بدنهاا.. نزلت راسي شوي وخذيت نفس طويييل من ريحة شعرها..فرد وقت نزلت بعينيا نغزر لرقبتهاا و الشامات الي كانو موزعين عليهاا.. نزلتهم اكثر وغزرت لصدرها الي كان باين شوي بعد ما فتحتلها فلس الشوميز.. للحظة حسيت روحي مش منجم نقاوم تفاصيلها هاذم.. كانو كل شي عمل عليا بلعاني.. هربت عينيا من عليها فيسع وخذيت كاسة لحليب نحكي
انا :" اياا فيق و اشرب هذا "
قربتلها الكاسة لشفايفهاا و بقات تشرب بالشوي بالشوي.. بقيت نتبع فيها بعينيا كيفاه تتصرف.. المشهد هذا بالظبط عشتو معاهاا قبل.. لقيت نفس الشي قاعد يتكرر مرة اخرى حتي انها ماتغيرتش نفس تعابير الوجه و التصرفات كاني ماكبرتش و بقات الطفلة الصغيرة الي عرفتها و كبرت قدامي وبين يدياا.. فقت من سرحتي فيها على صوتها تحكي
جوري :" يزيني.. معادش عيني "
انا :" باهي "
كبست علاها بيدي و حطيت الكاسة عالطاولة خذيت الدواء نحكي
انا :" اياا اشرب من هذا تو تقوم لباس "
حلت فمها و شربتو من غير حتى كلمة.. رجعت نزلتها و حطيتهاا عالمخدة نحكي
انا :" حاول ترقد شوي "
غمضت عيناها و حضنت روحها تحكي
جوري :" ب..بردانة "
قمت من بلاصتي وهزيت الملحفة غطيتهاا بلقداا وقربت لشميني زدتلها لحطب بش الصالة تتدفي اكثر.. رجعتلها حطيت المنشفة فوق جبينها وبعدت عليهاا.. لميت الطاولة وخرجت من الصالة للكوجينة.. حطيت كل شي عالرخامة و ترميت عالكرسي مقابل الشباك.. خذيت سيقارو شعلتو وبقيت نتكيف ونخمم ف الوضع الي انا فيه تو وفاش قاعد نعمل..طفيت السيقارو وقمت من بلاصتي.. رجعت حذاهاا قدمت بخطواتي ناحيتها و طبست علاهاا.. نحيت المنشفة من فوقها و مسيتهاا.. طمنت شوي كيف حسيت بحرارتها نزلت.. قعدت بجنبها و تكيت بظهري لتالي و عينيا مازالت تدور عليها.. عقدت بحواجبي مستغرب كلامهاا الي مش مفهوم.. قربتلها اكثر محاولة مني بش نسمعهاا و نستوعب هي ف شنوة تقول.. دقات قلبي تسارعت اول ما رجعت سمعت اسمي من شفايفها.. تحكي
جوري :" ب.. بدر "
قربتلهاا شوي و غزرتلها نحكي
انا :" هاني حذااك.. تحب حاجة "
حلت عيناها شوي غزرتلي تحكي
جوري :" انا وين ؟؟"
انا :"انت حذايا ماتخافش.. ارجع ارتاح ماتعبش روحك "
جوري :" انت.. انت بلحق هناا ؟ يعني انا مانيش نحلم بيك كالعادة "
بقيت نغزرلها مش فاهم شتقصد بكلمتها الأخيرة اصلا ماحاولتش نركز معاهاا خاطرني عارفها تهتري.. نحكي
انا :" اي هاني بحذااك.. ارجع ارقد ارتاح "
رمشت عيناها شوي و كبست على شفايفها وين دمعتهاا نزلت على خدها و تغلغلت ف شعرها تحكي
جوري :" انا.. انا ماقصدتش.. والله لا قصدت.. س..سامحني اما.. والله م..مش مني.. ه..هو.. هو السبب... "
عقدت بحواجبي مستغرب نحكي
انا :" شكون هو ؟ شنوة الي انت ماقصدتوش ؟؟"
جوري :" كل.. كل شي وقتها كا..كان صعيب.. ك..كان لازمني نتصرف.. ب.. بدر انت ماتعرف شي.... "
بقيت نسمع فيها و نحاول نجمع حديثهاا و نفهمو اما مانجمتش.. مافهمتش شتقصد بالضبط.. عديت بعينيا عليها نحكي
انا :" شنوة الي انا مانعرفوش ؟؟؟ "
حلت عيناها فيا وغزرتلي شوي.. دموعها كانو مالين جفونهاا و محبوسين ف عيناها.. لمعتهم كانت واضحة لدرجة انهم حجبو لون عيناها.. عدات بلسانها على شفايفها و غمضت عيناهاا تحكي
جوري :" يا.. ياريتني لا عرفتك.. يا ريتك لا حبيتني.. ياريتك بعدت علياا وخرجت من حياتي من قبل.. ا..انت السبب الي خلاني نوصل لهناا.. منك انت هو خلاني..... "
قصت على كلامها ودورت راسها لناحية لخرى..رغم اني عارف انها تهتري من السخانة حاولت نستجمع كلامها ونفهمو.. فقت من سرحتي كيف ريتها رجعت غزرتلي ويداها شدتني من يدي كبست علياا و غزرتلي ف عينيا تحكي
جوري:"انا..انا نحلم مش هكاا؟ ياريتك تطلع حلمة تو..يا ريتني ك..كيف نقوم ما..مانلقاكش ح..حذاياا "
بلعت ريقها و رجعت تحكي
جوري :" امشي من هناا.. ابعد علياا..ابعدني امااان "
غمضت عيناها و غفات فيسع.. بقيت جامد ف بلاصتي مش قادر نتحرك.. بقيت نغزرلها محاولة مني نستوعب كلمة وحدة من الي قالتو.. اما الي نعرفو انو اخر جملة قالتها هي الصحيحة.. لازمني نرجع نبعد علاهاا و ننساها.. قمت من بلاصتي فيسع وخرجت من حذاهاا.. خرجت للجنينة حبيت نتنفس شوي و نرتاح.. اما مانجمتش كلامها بقى يتعاود مرة و اثنين ف وذنياا.. الشي الي خلاني نحسم قراري.. انها اول ما تسترجع صحتهاا بش تخرج من هناا و مستحيل كان ترجع تعفس الدار هاذي مهما يصير و مهما يكون وضعها....