🗡🥀#رِيْبَة_جُورِي🥀🗡

حلقة 14

حلقة 14
#بدر_يحكي
حليت عينيا على الضو الي ضرب فياا.. هزيت روحي شوي وتقعدت تكيت براسي لتالي وكبست على جبيني من وراء لوجيعة الي تمكنت مني.. دورت عينيا شوي وغزرت للوقت.. مش عارف كيفاه رقدت للوقت هذا كيما مانعرفش وقتاه روحت لبارح و لاقداه شربت بالضبط.. مانجمت نخمم ف شي كان اني ننسى الي صار و نبعد على جو الخدمة و اي حاجة تنجم تفكرني بيها.. اصلا للحظة هاذي مش مصدق مواجهتناا كيما ماتوقعتش جرئتهاا الي هي شي مش غريب عليااا.. تنهدت بالقوي وهزيت روحي وقمت.. نحيت مريولي ودخلت لبيت البانو.. حليت الماء البارد ودخلت تحت الدوش حبيت نفيق شوي.. اول ماكملت لفيت روحي بالمنشفة وخرجت.. عديت بيديا على شعري وقربت للفاست متاعي هزيتها وجبدت تاليفوني.. قعدت على طرف السرير وفتحتو.. عقدت بحواجبي مستغرب المكالمات الي لقيتهم من الخدمة خاصة من كريم.. فتحت اول ميساج منو وحليت نسمع فيه
كريم :" *** وينك نهار كامل.. ف شنوة غاطس.. فما مصيبة و انت مفماش ريحتك.. نحب نقلك انو حكاية التسجيلات انساهااا فما شكون سبقك حضرة المحقق "
رجعت سمعتو مرة اخرى و باقي حاسس روحي مش فاهم شيقصد بكلمة شكون سبقني.. حطيت رقمو وطلبتو.. مانعرفش قداه بقى ينوقز من غير ما يجاوب.. نفخت بالقوي رميت التاليفون وقمت فيسع.. قربت لدريسينغ حليتها وخذيت حوايجي لبستهم.. هزيت مفاتحي وتليفوني ونزلت لتحت وخرجت نجري.. طلعت ف الكرهبة وشديت ثنية البيرو.. بقيت ثنية كاملة نسوق ونطلب فيه.. للحظة حسيت لعصب مكني.. اكثر حاجة نفد منها كيف نحس روحي مش فاهم شنوة صاير كيما غزلت منو خاطر مافسرليش لحكاية رمى كلمتين وسكت من غير مايذكر التفاصيل.. رميت التاليفون ونزلت عالفيتاس.. مسافة الطريق ووصلت راكيت الكرهبة على جنب ونزلت.. دخلت فيسع لبيروياا نحيت الفازت متاعي وترميت عالكرسي.. هزيت سماعة تاليفون و طلبت العون نحكي
انا :" كريم جاء ؟ "
هو :" مازال سي بدر "
انا:"باهي جيبلي قهوة للبيرو واول مايجي كريم ناديهولي "
هو :" حاضر "
نزلت السماعة وجبدت ملف اخر قضية عندي.. بقيت نقرا فيه هكاكا وهزيت راسي على صوت الباب كيف تفتح ريت العون كيف قدملي حط القهوة قدامي وغزرلي يحكي
هو :" اي أوامر اخرى ؟"
انا :" لاا تنجم تخرج "
هزلي براسو باهي و خرج.. جبدت سيقارو شعلتو وهزيت الفنجان خذيت رشفة ورجعت نزلت راسي.. خذيت القلم وبقيت ندور على كل حاجة تنجم تفيدني.. اما اهم حاجة ركزت فيهاا هي الاسم الي كان مكتوب بالعريض قدامي.. عديت كل شي وحطيت تحتو قداه من خط.. خاطرني عارف و متأكد الي هو مفتاح لقضية هاذي و اجوبة أسئلتي لكل عندو هو.. رجعت هزيت راسي على صوت الباب كيف تفتح.. طفيت السيقارو وحطيت القلم على جنب..تكيت بظهري لتالي نحكي
انا :" وينك سي كريم ؟ تو مشرف ؟؟"
سكر الباب وراه وقدم ناحيتي.. قعد مقابلني وقحرلي يحكي
كريم :" والله سوال وينك.. انا الي لازمني نسالو ؟؟ وينك انت من البارح ؟ تعرف قداه طلبتك من مرة ؟"
حكيت على جبيني وغزرتلو نحكي
انا :" كانت عندي خدمة "
كريم :" خدمة شنوة ؟؟ شبيني مافيباليش بيها؟"
استويت قعدتي واستندت بيديا عالبيرو غزرتلو نحكي
انا :" كريم نقص من اسئلتك و احكيلي شنوة تقصد بالفوكال الي بعثتو "
تكا بظهرو عالكرسي وهز بحاجبو يحكي
كريم :" والله الي سمعتو سي بدر.. فما شكون سبقك و خذا كل التسجيلات "
رسيت على سنيا وقحرتلو نحكي
انا :" بش تحل فمك و تحكي بالتفصيل و لا لا ؟ قاعد ترميلي ف نفس لكلام من لبارح ؟ شكون الي سبقني تكلم "
كريم :" هاني بش نحكيلك الي صار بالضبط.. لبارح وصلني خبر انو العيلة رجعت من السفر.. مشيت ف بالي بش نحكي معاهم و ناخذ التسجيلات.. اول ما وصلت حكيت مع صاحبة الفيلا وهنا كانت الصدمة.. قتلي زميلك سبقك.. فما شكون مشى قبلنا قاللها الي هو من الشرطة و حكالها عالحادثة بالتفصيل كيما خذا التسجيلات ف فلاشة و محى كل شي "
عقدت بحواجبي مستغرب نحكي
انا :" شكون زميلنااا ؟؟ ماقاللهاش على اسمو ؟؟"
هزلي براسو لا يكون
كريم :" لااا خاطر ممكن ياسر مايكونش زميل اصلا "
انا :" تقصد حد انتحل صفة شرطي؟؟"
كريم :" اكييد.. خاطر حتى شارة ماورهاش.. كيما شكون هالزميل الي ف علمو بالحكاية غيرناا "
انا :" كان بلحق كلامك صحيح وقتها بالرسمي لحكاية بش تكون أصعب مالي توقعت "
كريم :" استنى ساعة مازلت ماكملتلكش اناا.. فما خبر اضرب من هذاا "
انا :" تكلم نسمع فيك "
كريم :" هو لف على كل الفيلات الي غادي و قاللهم نفس لكلام و فسخ كل شي "
عديت بيديا الزوز على وجهي حاولت نهدي روحي شوي بش انجم نفهم الي صاير هناا.. خذيت نفس طويل نحكي
انا :" شكون من الي بيناتناا عندو غاية بش يعمل هكاا ؟؟ "
كريم :" فما سؤال ما اهم.. الي هو كيفاه عرف انو العيلة رجعت من السفر.. هذا يدل انو كان مراقب كل شي وقاعد يتبع ف الحكاية خطوة بخطوة و للأسف كان سابقناا "
انا :" مانيش منجم نستوعب الي صار.. حاسس مخي بش يتحرق.. هذا الكل صار لبارح ؟؟"
كريم :" بدر فما حاجة اخرى صارت ماقتلكش علاهاا "
دورت بعينيا عليه نحكي
انا :" فما مصيبة اخرى؟؟"
كريم :" تنجم تقول "
انا :" الي هي !!"
كريم:" كيف شفت التسجيلات الي تمحاو.. لقيتو محى تسجيلات الي قبل الحادثة بشهر "
انا :" شهر ؟؟ "
غمضت عينيا بالقوي حاولت نسترجع التاريخ الي ريتها فيه.. رجعت حليتهم فيسع نحكي
انا :" يعني من وقت خروج جوري من المصحة.. عندها شهر و لا اكثر شوي هكاكا من وقتلي ريتها "
كريم :" اي.. الله اعلم شنوة صار ف الفترة هاكي و هو محاه.. غير هكا هو محى التواريخ الي بعد الحادثة زادة.. و مش هذا كهوو.. كيف حليت البيسي لقيتو لاعب في الاعدادات وموقف الكاميرا على التسجيل "
انا :" وقف الكاميرا بش ماتسجلش خروجو مش هكاا "
ضرب بيديه عالطاولة بالشوي وغزرلي يحكي
كريم :" بالضبببط.. غير هكاا السيد هذا باين خبرة ف المجال هذا.. وفرد وقت عرف كيفاه يتصرف كيما مشى بكل اريحية و لف على كل الفيلات ف عقلو.. كانو متأكد انو عندو الوقت الكافي"
انا :" شتحب تقول ؟؟ "
كريم :" نحب نقول اذا هو عارف انو احنا حاجتنا بالتسجيلات على هذاكا هو محاهم.. يعني احتمال يكون عارف تحركاتنا.. يعني ف الوقت الي هو غادي كان عارف انو احنا مش ف طريقنا ليه.. على هذاكا تصرف براحتو "
انا :" استنى استنى.. تقصد انو ينجم يكون واحد بيناتنا وقريب منا ؟"
كريم :" والله احتمال كبير.. يعني اذا مش هو اكيد فما شكون يوصلو ف معلومات "
انا :" هاذم الكل افتراضيات.. و انا تعرفني كلمة احتمال توترني.. على هذاكا لازمنا دليل على كلامك هذاا.. كيما لازمنا نخممو ف طريقة بش نعرفو شكون السيد هذا.. مع اني مش عارف منين نبدأ و لا كيفاه "
كريم :" نظن الي فما معلومة تنجم تفيدنا "
انا :" شنوة هي ؟؟"
كريم :" كيف حكيت مع لمرا.. قتلي على سيارتو.. نتصور منها هي انجم نوصلولو "
انا :" عطاتك الماتريكول ؟؟"
كريم :" لاا.. قتلي على نوع السيارة "
انا :" و كيفاه بش نطلعوه من نوع السيارة ؟؟مش ساهلة لحكاية "
كريم :" ساعة كيف تسمع نوعها بش تبدل رايك "
انا :" شنوعهااا ؟؟"
كريم :" porsche panamera "
حليت عينيا على وسعهم نحكي
انا :" porsche panamera ؟؟؟"
هزلي براسو اي من غير حتى كلمة..عديت بعينيا عليه نحكي
انا :" تعرف الكرهبة هاذي قداش تعمل؟؟؟ قريب 800 مليون ؟"
كريم :" نعرف و ممكن اكثر زادة "
حكيت على جبيني نحكي
انا :" شكون الي نعرفوه غني لهدرجة بش يوصل يملك كرهبة كيف هاذي "
كريم :" علمي علمك.. اما تو نعرفوه شكون ماتخافش "
عديت بعينيا عليه نحكي
انا :" مانعرفش علاش حاسس انو لحكاية وراهاا إنّا.. يعني الي عندو كرهبة كيف هاذي.. كانو قدملنا فرصة من ذهب بش نطلعوه "
عقد بحواجبو مستغرب يحكي
كريم :" شقصدك ؟"
انا :" قصدي الي عمل هكا يا ذكي برشة وعارف كيفاه بش يضيعنا.. يا بوهالي برشة حتى يوصل يطلع ف كرهبة كيف هاذي.. خاطر عندك حق ف انو المعلومة هاذي تنجم تفيدناا "
كريم :" اي وشنوة بش نعملو تو ؟"
انا :" نحب قائمة بكل واحد يملك نوع السيارة هاذي.. اصلا مانتصورش القائمة بش تكون طويلة.. وبعدها تو نتصرف "
كريم :" هذا بالضبط الي خممت فيه.. و سايي كلفت شكون بش يحلها "
انا :" باهي "
عدا بعينيه عليا وهز بحاجبو يحكي
كريم :" اي تو بش تقلي وين مشيت لبارح؟ شنوة الخدمة الي كانت عندك "
خذيت رشفة من الفنجان وغزرتلو نحكي
انا :" مشيت قابلت عم صالح.. ارتحت تو "
ضيق عينيه فيا يحكي
كريم :" يعني انا نلوج عليك و سيادتك تبحر مع عم صالح "
انا :" بالضبط "
غزر للملف الي كان قدامي ورجع غزرلي يحكي
كريم :" وصلت لحاجة ؟؟"
انا :" على قريب بش نوصل.. خليها عليااا "
ضيق عينيه فيا يحكي
كريم :" كانك قاعد تخطط لحاجة؟؟"
هزيت بحاجبي وتبسمت على جنب نحكي
انا :" والله انا خططت وكملت و على قريب بش نبدا أنفذ "
كريم :" هياا طمنتني.. عالاقل تو تاكدت انك مازالت تخمم ف الخدمة.. انا قلت هذا نسى كل شي "
انا :" كملت تضوميرك ؟؟ هياا قوم شد بيروك عندي خدمة وراياا "
كريم :" حاضر عرفي "
انا :" حكاية الكرهبة و السيد هذاا بش نخليها عليك.. كيما نحبك ترد بالك مانحب حد يعرف و كون متأكد من الناس الي تعطيهم أوامر بخصوص لحكاية يعني تكون واثق فيهم.. مانوصيكش "
كريم :" ماتخافش هكاكا.. نعرف خدمتي  "
انا :"باهي سي كريم "
ضحك وقام من بلاصتو.. غزرلي يحكي
كريم :" نخليك تو.. نتقابلو بعد "
هزيتلو براسي باهي من غير حتى كلمة.. ريتو كيف خرج وسكر الباب وراه.. خذيت سيقارو اخر شعلتو ورجعت نغزر للملف.. حسيت تركيزي تشتت من وراء لحكاية الي سمعتها من كريم.. سكرتو وقمت من بلاصتي وقفت قدام الشباك.. نفثت دخان السيقارو وبقيت نخمم ف الي صار.. حاولت نربط لخيوط باني نسترجع الي صار قبل اما لقيت روحي مش عارف منين نبدا و لا لشكون انجم نوجه أصابع الاتهام بالضبط.. غير هكاا الي قاعد يلعب مش قاعد يلعب معاياا وحدي.. هو زادة يعرف جوري و يلعب معاهااا.. يعني فما شخص مشترك بيناتنااا الي انا مش قادر نحدد هو شكون.. نفخت بالقوي ورجعت ترميت عالكرسي.. حسيت راسي وجعني من التفكير.. للحظة حبيت ناخذ هدنة و نصفى بالي بش انجم نبدأ من الاول بالكل ونعرف شنوة لازمني نعمل.....