🗡🥀#رِيْبَة_جُورِي🥀🗡

حلقة 3

الحلقة الثالثة
#جوري_تحكي

دخلت للبيت و ترميت عالفرش.. اول مرة من مدة طويلة نرجع نحكي ونفرغ قلبي شوي هكاا.. كلامي مع جاد حسيتو ريحني شوي كيما كل مرة.. اما رغم هذا لقيت روحي رجعت نخمم ف الي صار ليلتهاا من جديد.. مانعرفش علاش من بين الاحداث لكل لقيت روحي كالعادة نخمم فيه هو بالذات..ممكن خاطرها كانت بداية كل حاجة انا فيها تو..غمضت عينياا و سرحت مع تصويرتو وصوتو الي اقتحمو ذاكرتي فجأة...

#فلاش_باك

دخلت نكركر ف ساقياا بالسيف للبيت الي كانت ظلمة و باردة.. نورها ياااسر خافت.. فيها كان طاولة وزوز كرسي.. لحيط الي كان مقابلني كان كلو بلار اما مانجمت نرا شي من وراه.. ترميت عالكرسي من قوة الدوخة الي كانت ماكنتني.. حطيت مرفقي عالطاولة و كبست بيديا على جبيني.. حاسة راسي بش يتقسم من الوجيعة.. هزيت راسي مع الباب الي تحل.. ريتو كيف دخل ووقف قدامي.. هزني وحطني بعينيه وجبد الكرسي قعد مقابلني.. خذا قلم من جيبو و بقى يضرب فيه عالطاولة.. كنت كل مانسمع صوت لقلم.. كل ما نحس بعروق راسي تضرب معاه.. رسيت على سنيا نحكي
انا :"انجم نعرف اناا علاااش مازلت هنااا ؟"
تبسم على جنب يحكي
بدر :" جوري بنوور..انت بش تبقى ضيفتنا الليلة..بش تبقى مشرفتناا شوي كان مايقلقكش وترجع تحكيلنا على عملتك "
انا :" افهمم انا ما عملت شي.. ماعملت شييي.. نحب نخرج و نشوف اختي.. نحب نمشي نراهااا لاخر مرة "
هز بحاجبو يحكي
بدر :"اما انت ريتها.. اصلا احنا لقيناك حذاها و لا نسيت "
ضيق عينيه فيا و رجع يحكي
بدر :" علاش عملت هكا جوري ؟"
عليت ف صوتي شوي نحكي
جوري :" فااااش تحكي انت ؟؟ انااا ماعملت شي.. ماعملت شيييي.. كيفاه تخمم اني انجم نكون قت••لت اختي "
هز بصبعو ف وجهي يحكي
بدر :" اسسس نقص حسك.. وضعك مايسمحلكش تحكي بالطريقة والثقة هاذي.. شوف روحك.. شوف حالتك.. عينيك كيفاه طايحه من الشرب.. و ريحتك سابقتك.. كيفاش تحبنا نصدقو كلامك و انت بالحالة هاذي.. مش واعية بشي "
جوري :" نظن ماهيش اول مرة نشرب..شربت اكثر من هكااا قبل وانت تعرف هذااا.. ماوصلت عملت شي وعمري ما غبت على وعيي "
هزني وحطني بعينيه يحكي
بدر :" امم نعرف.. المهم صحباتك وسي صاحبك شهدو انك غبت عالسهرية مدة طويلة وين مشيت ؟"
انا :" مشيت لتوالات حبيت نرتاح شوي.. اصلا كيف مشيت ياسمين بقات مع لبنات وقتها ان.... "
قص علياا كيف رجع هز بصبعو قدامي يحكي
بدر :" لا لا لا.. صاحبتها ميليسا قالت إنها خلطت علييك.. و بعد انت ك رجعت كنت وحدك هي مكانتش معاك "
انا :" انا كيف مشيت لتوالات بقيت وحدي.. هي ماخلطتش عليااا.. تنجمو ترجعو للكاميرات المراقبة تو تعرفو كلامي صحيح "
بدر :" لسوء حظك كاميرات المراقبة كانو معطلين..و بصراحة انا حسب خبرتي مانتصورش انو هذا الكل صدفة"
عقدت بحواجبي مستغربة نحكي
انا :" شتقصد انت ؟ يعني انا عطلتهمم؟ اصلا منين بش تكون عندي صلاحية نعمل الشي هذاا ؟؟"
عضيت على شفايفي كيف سمعت صوت لقلم مرة اخرى يضرب عالطاولة و صوتو هو يحكي
بدر :" انت اكثر وحدة عندك الصلاحية غادي.. والله حسب الي نعرفو وحسب شهادة الكل انو اسم جوري بالنور غادي معروف و بقيمتو.. صوتك يتسمع اكثر حتى من مولا لمحل.. و انت كل ليلة غادي و تعرف الي يخدمو الكل "
انا :" مش صحيح.. هذا اكييد فخ "
بدر :" فخ من شكون؟؟ "
انا :" مانعرفش "
بدر :" باهي شكون من مصلحتو بش يعمل هكا ؟؟"
ضربت بيدي عالطاولة نصيح
انا :" قتللللللك ماااا نعرررفش"
شفتو كيف وقف من قدامي و قعد عالطاولة بجنبي يحكي
بدر :" جوري شوف..انا وانت معرفة قديمة..قلي لحقيقة بالك نقدر نعاونك "
هزيت راسي معاه وعديت بعينيا عليه نحكي
انا :"يا ريتك كنت تعرفني بلحق يا بدر.. ياريتك كان عرفتني حتى شوي.. راك مش قدامي هكااا تو..راك صدقتني "
وقف قدامي وشدني من مرفقي ووقفني معاه بالقوي.. دزني عالحيط وطبس ناحيتي قرب وجهو لوجهي وين حليت عينيا على وسعهم وانا نغزر لعينيه لحمر و عروق رقبتو الظاهرة.. عدا بعينيه عليا يحكي
بدر :" بالعكس انا عرفتك.. اما تغشيت فييك قبل.. ونخاف كان نصدقك تو نرجع نتغش مرة اخرى "
حطيت يدي على صدرو وين دموعي هبطو يجريو على خدي .. شهقت بالقوي نحكي
انا :"مش كيف..الي تحكي فيه تو تعدااا وقتو.. انا..انا في مصيبة ما أكبر.. ك..كان تحب عاوني.. وكان تحب امشي.. انا مانيش بش نطلب منك شي "
تبسم باستهزاء و هز بحاجبو يحكي
بدر :" اصلا ماعندكش الحق بش تطلب مني حتى حاجة "
ريتو كيف بعد فجأة علياا و خرج يجري نطر الباب وراه على قوة يديوو.. بقيت واقفة ف بلاصتي نغزر مانجمتش نتحرك كان دموعي بقاو نازلين من خوفي من شنوة يستنى فياا غير حسرتي على اختي الي ماتت ومش عارفة كان انا بلحق السبب ولا غيري....
#باك_اند