🗡🥀#رِيْبَة_جُورِي🥀🗡

حلقة 21

حلقة 21
#جاد_يحكي

كبست على يديه الي كانت شادتني بالقوي وبقيت نغزر للدار لكبيرة الي وقفنا قدامها غير الصغار الي كانو مقابليني يلعبو.. هزيت راسي شوي نحكي
انا :" بابا احنا وين ؟؟ علاش جينا هناا ؟؟"
طبس راسو وغزرلي.. فلتلي يدي وطبس إلى ركبتو قدامي.. حط يديه الزوز على زنودي وتبسملي يحكي
كمال :" مش قتلي الي انت قلقت خاطر ماعندكش صحاب و تحب تلعب ؟ "
انا :" اي قلت "
كمال :" انا جبتك هناا بش تلعب.. شوف فما برشة صغار كيفك.. شوف كيفاه يلعبو بالكورة.. برا العب معاهم "
انا :" اما انا مانعرفهمش بابا.. خليني نلعب معاك انت"
كمال :" انا.. انا لازمني نمشي و انت بش تبقى هناا معاهم.. تو بالوقت تعرفهم "
حطيت يدي على خدو نحكي
انا :" وين بش تمشي بابا ؟ مانحبش نبقى هناا مانحبش نلعب بطلت.. نحب نمشي معاك "
كمال :" جاد عيش ولدي اسمع لكلام.. انت بش تبقى هناا.. ماتخافش ف الدار هاذي انت بش تقراا و بش تلعب.. بش تاكل ماكلة بنينة و تلبس دبش باهي.. مش هذا الي انت تحبو ؟"
هزيتلو براسي لا برشة مرات وين دمعتي نزلت بالوقت نحكي
انا :" لا لا بابا انا مانحبش.. امان ماتخلينيش.. راني نخاف وحدي "
كمال :" ماتخافش انت راجل رد بالك تخاف و لا تبكي.. تعلم كيفاه تعيش بعيد علياا خاطر انا مانيش بش ندوملك.. انت بش تبقى هناا جاد وبش تعيش هناا "
انا :" علاش ؟ مش قتلي الي انا البطل متاعك والي انت تحبني بابا.. علاش بش تخليني كيف ماما ؟"
كمال :"جاااد امك ماتت انساهاا.. و انا نحبك وراس ولدي نحبك على هذاكا جبتك هناا خاطرني نحبك و نخمم ف مصلحتك "
ترميت عليه وعنقتنو بالقوي.. طرشقت بالبكا نحكي
انا :" امان بابا هزني معاك.. امان مانحبش نبقى هناا "
دور بيديه علياا وكبس علياا..هزني ف حملتو وقدم بياا ناحية الباب.. بقيت نبكي بالصوت و نفرفت بساقياا بين يديه.. حسيت بيه كيف فلتني و شدتني يد اخرى كبست علياا بالقوي.. هزيت راسي وغزرت لبابا كيف عطاني بظهرو ومشى.. بقيت نبكي و نصيح باسمو.. ضربت لمرا الي كانت شادتني بش تفلتني اما مانجمتش .. غمضت عينيا بالقوي وصحت اكثر نحكي
انا :" بااااباااااا "

رجعت حليت عينيا على صوت صياحي الي ضرب ف راسي.. هزيت روحي شوي وتقعدت.. حطيت راسي بين يديا الزوز وكبست عليه من وراء الصداع الي تمكن فياا.. مانعرفش كيفاه سقت لبارح و روحت.. كيما مانعرفش قداه شربت بالضبط و لا وقتاه خذاتني عيني ورقدت.. كل الي نعرفو انو ليلة لبارح كانت أطول ليلة ف حياتي وين لقيت روحي نواجه ف ذكريات و لحظات مريت بيهم كانو كيف السم بالنسبة لياا.. مشاهد على قد ماحبيت نمحيهم من بالي مانجمتش بقاو راسخين فياا هوما ووجيعتهم.. كيما حسيت بالنار لهبت فياا خاطر ماتصورتش بش يصير الي صار لبارح ماتوقعتش انو بش يشدني من اليد الي توجع كيما ماتوقعتش انو بش يفوت حدودو معاياا لدرجة انو يبحث وراياا حتى يوصل للماضي تعدا عليه اكثر من ثلاثين سنة.. مانيش عارف هو ف شنوة يخمم و لا لشنوة يحب يوصل.. اما كل الي نعرفو اني بش نلعب معاه بالنفس طريقة لعبو هو..تنهدت بالقوي و قمت من بلاصتي.. نحيت مريولي ورميتو ف القاعة.. دخلت لسال دوبان ودخلت تحت الدوش حليت الماء فوقي وين حسيت روحي هديت وترخيت شوي.. غمضت عينيا وبقيت مستحلي لدفاء الماء.. اول ماكملت سكرت السبالة وخرجت لفيت المنشفة على وسطي ورجعت للبيت.. قدمت ناحية الفوتاي وين كانت الفاست متاعي.. هزيتهاا وجبدت التاليفون.. استغربت كيف ريت الارقام الي اتصلو بياا.. نفخت بالقوي وترميت عالفوتاي حطيت اول رقم وطلبتو.. شوي وقت ورد علياا يحكي
مؤمن :" صباح الخير سي جاد "
انا :" صباح الخير.. نلقاك طالبني فما حاجة؟؟"
مؤمن :" اي حبيت نقلك الدواء قريب يوفى.. ماتنساش تجيب معاك "
انا :" باهي تو نبعثلك مع حد.. تحب حاجة اخرى؟؟"
مؤمن :" لا.. ساعة انت شبيك ؟ شبيه صوتك هكاا ؟"
عديت بيدي على وجهي نحكي
انا :" تاعب شوي "
مؤمن :" شبيك مريض ؟؟"
انا :" لا مؤمن لباس عليا.. جيست شوي تعب من السهر "
مؤمن :" باهي حاول أنك ترقد و ترتاح شوي "
انا:" باهي.. المهم انت رد بالك علاهاا وكلمني كان صارت حاجة  "
مؤمن :" باهي.. نخليك مالا "
انا  :" استنى مؤمن "
مؤمن :" احكي "
انا :" شعملت ف الحكاية ؟؟"
مؤمن :" على قريب بش تتفض ماتخافش "
انا :" مؤمن نحبك ترد بالك.. عالظاهر العينين بدأت تتحل علياا اكثر.. الي خفت منو قاعد يصير.. رد بالك واعرف ف شكون تاثق وانا بش نغيب الفترة هاذي حتى الأمور تهدى "
مؤمن :" علاش شنوة صار جاد ؟"
انا :" تو كيف نراك نحكيلك كل شي "
مؤمن :" باهي المهم سايس روحك "
انا :" تهنى علياا.. هياا برا تو.. تو نكلمك بعد "
مؤمن :" باهي "
علقت عليه ورميت التاليفون على جنب.. قمت من بلاصتي وقدمت ناحية الدريسينغ خذيت حوايجي و بقيت نغير.. هكاكا وسمعت التاليفون نوقز قدمت فيسع وهزيتو.. رسيت على سنيا بالقوي اول ماريت اسمها قدامي.. رديت عليهاا وين سمعتهاا تحكي
سارة :" صباح الخير دكتور "
كبست عالبونية متاعي نحكي
انا :" ياخي وينك انت ؟؟ نطلب فيك من البارح ؟؟"
سارة :"سامحني دكتور مافقتش بالتليفون..صارت حاجة؟ "
انا :" قداه عندك ماطلبتش جوري ؟؟؟"
عقدت بحواجبي مستغرب سكوتهاا كان صوت نفسها بقى مسموع.. عليت ف صوتي نحكي
انا :" نسااال فيك تكلم.. وقتاه آخر مرة كلمت جووري ؟"
سارة :" مانعرفش.. يمكن قبل بأسبوع و لا أكثر شوي "
انا :" و لا أكثر شوي؟؟ انا علاش سمحتلك تخرج من المصحة؟؟؟ مش قتلك بش تبقى معاهاا و ماتفارقهاش لحظة ؟؟؟"
سارة :" دكتور انا.. انا كنت مجبورة والله "
انا :" مانفهم شي.. ليوم ترجع "
سارة :" اما.... "
انا :" كلمتين مانزيدش بعدهم.. اليوم ترجع.. وبعدها فما كلام آخر بيناتناا "
علقت عليها التاليفون ورميتو على جنب.. كملت حضرت روحي وريقلت اموري خذيت لمفاتح و التاليفون وخرجت فيسع.. طلعت ف الكرهبة وشديت الثنية للمصحة الفترة الي تعدات الكل سلمت ف الخدمة كان لازمني نرجع اليوم ونشوف شصار ف غيابي.. كبست عالفيتاس أكثر وين لقيت روحي رجعت نخمم فيها من جديد.. للحظة هاذي مش منجم ننسى كلامهاا لياا الي كان يعبر على لومهاا و وجيعتهاا مني الشي الي خلاني نفد من روحي اكثر.. كيما بقيت نفكر ف شنوة لازمني نعمل كيفاه بش نتصرف و نخليهاا ترجع تاثق فياا و تسمع كلامي بش ترجع معاياا خاطر بلحق قعدتها غادي حسيتهاا لعبلتي على عصابي مش فاهم علاش مش منجم نتقبل وجودها معاه غير لهوتو بيهاا الي حسيتها وترتني.. وفرد وقت مانجمش نضغط عليها و لا نرجع نعاملها بطريقة لبارح خاطر مستحيل كان انجم نتحمل غزرتهاا هاكي لياا من جديد.. يكفي الي صار فيهاا طول فترة غيابي غير التفاصيل اكيد الي مازلت ماسمعتش بيهم اما حاجة اقوى مني مخليتني نحب نتصرف مش منجم نستنى و نبقى مربع يدي هكاا على هذاكا بش نعمل المستحيل ونخليهاا ترجع وبعدها انا نعرف كيفاه نرضيهاا ونخليها تسامحني و حتى كان بقات مغششة ميسالش المهم تكون قدامي وبين عينيا خاطر بالرسمي انجم نضيع كل شي تو و مانضيعش جوري خاطر وقتها برشة حاجات انا وصلتلهم ممكن يضيعو معاهاا....