🗡🥀#رِيْبَة_جُورِي🥀🗡

حلقة 8

حلقة الثامنة
#جوري_تحكي

قدمت شوي ناحية الشباك ووقفت نغزر منو لجنينة.. دورت بعينيا عالبلاصة والناس الي فيها لاخر مرة.. هاذي آخر وقفة ليا هناا.. اخر غزرة مني ليهم.. ماتوقعتش الدنيا بش تقدملي فرصة مرة اخرى.. الي عشتو ف الخمسة سنين هاذم خلاني ننسى معنى كلمة فرصة و امل.. مشى ف بالي انو سايي البيت هاذي صارت سجني و خروجي منها محال.. و اني بش نبقى ف الكابوس هذا لاخر نفس فياا..تبسمت اول ما تفكرتو هو.. جاد هو السبب ف الي نحس فيه تو.. هو وسيلة خلاصي من السجن هذاا.. وجودو بجنبي طيلة السنوات هاذي خفف علياا ياسر رغم رفضي ليه اول مرة.. ماكنتش متقبلة فكرة العلاج خاطر ماكنتش نشوف فما داعي لشي هذاا.. لين هو غيرلي الفكرة هاذي كيما حررني.. كلمة حررني خلاتني نضحك من غير ما نشعر.. ناري بش تتحرر معاياا و بش نخليها تاكل الأخضر و اليابس.. مش بش نرحم حد كيما هوما مارحمونيش.. لحق الوقت الي بش ناخذ بثاري منهم بالواحد بالواحد.. بش نخليهم الكل يركعو تحت ساقياا و يطلبو العفو مني.. العفو عالخمسة سنين هاذم ومش بش يطولوه زادة..غمضت عينياا و رجعت حليتهم فيسع على صوتو ورايا يحكي
جاد :" حاضرة ؟"
دورت براسي غزرتلو و رجعت غزرت للشباك نحكي
انا :" اكثر من اي وقت.. فكرة انو مسار حياتي بش يتغير من اليوم مخليتني حاضرة لكل شي يستنى فيا "
حسيت بيه كيف قرب ناحيتي ووقف بجنبي يحكي
جاد :" كل شي بش يتغير للأحسن.. حياتك من اللحظة هاذي رجعت جوري "
انا :" ماعنديش شك.. حياتي رجعت و المرة هاذي بش نعيشها بطريقة مختلفة على قبل.. خاطر جوري الي رجعت هي زادة رجعت مختلفة.. و كل شي لبرا تو بش يختلف مع خروجي "
جاد :" المهم خلى الاختلاف هذا ما يضركش.. نحبو يكون ف صالحك "
تبسمت على جنب وغزرتلو وين هو زادة غزرلي.. دورت بعينيا على وجهو نحكي
انا :" كل شي بش يكون ف صالحي المرة هاذي.. انا معادش بش نتضر..مش بش نسمح لحد يضرني مرة اخرى"
جاد :" كيما انا زادة مش بش نسمح لحد يضرك "
هزيتلو براسي اي من غير حتى كلمة.. حط يديه على كتفي وتبسملي يحكي
جاد :" حاضرة بش نخرجو "
انا :" اي هياا "
دورت بعينيا عالبيت الاخر مرة.. كل تركينة غزرتلها خلاتني نتفكر كل لحظة عشتهاا هناا الشي الي خلاني نشعر بكمية الوجيعة الي حسيتهاا على مدار خمسة سنين.. تفكرت دموعي و سمعت صياحي.. ريت كوابسي و خوفي.. حسيت بشعور الوحدة الي كان مرافقني.. لحظتها شفقت على روحي.. البيت هاذي شهدت على موتي و تو قاعدة تشهد على حياتي من جديد.. كل حاجة تفكرتها تو بش نخليهاا قدام عينيااا و بش تكون هي دافع للانتقامي منهم الكل.. الي حسيتو انا بش نخليهم يحسوه اضعااااف..
عديت بيديا الزوز على وجهي ورجعت شعري لتالي.. هزيت ساكي وخرجت مع جاد.. سكرت باب البيت وعطيتو بظهري.. هاذي اول خطوة ليااا.. خطوة مخليتني مش فاهمة مشاعري بالضبط.. خايفة و متوترة كيما فرحانة زادة.. هزيت راسي على صوت سارة.. تبسمت كيف ريتها تجري ناحيتي و حالة يداهاا.. ترمات علياا حضنتني وكبست عليا بالقوي تحكي
سارة :" و اخيرااا يا ربي جاء النهار هذااا.. راني بش نطير من الفرحة.. مش مصدقة انك بش تخرج "
دورت بيديا علاهاا انا زادة و عنقتنهاا بالقوي نحكي
انا :" و انت بش تخرج معايااا مش هكاا ؟؟"
بعدت علياا غزرتلي وهزت يداهاا حطتهاا على خدي تحكي
سارة :" اي من غدوة بش نكون معاك.. انا مستحيل نخليك.. دكتور جاد حطني انا مرافقة معاك تو.. يعني بش نصيرو ديما مع بعضنا "
قربت بستها من خدها نحكي
انا :" نستناك مالا غدوة ماتتاخرش عليا.. تعرفني من غيرك نضيع انااا "
تبسمت تحكي
سارة :" نحبك برشة جوري تفكر هذااا ديما "
انا :" و انا زادة سارورتي "
تلفتنا الزوز على صوت جاد يحكي
جاد :" قاعد نستنى فيكم.. انشالله كملتو "
ضحكنا على كلامو ورجعنا غزرنا لبعضنا.. تبسمت نحكي
انا :" نستناك سارة "
سارة :" باهي امشي تو ورد بالك على روحك"
هزيتلها براسي باهي وكملت الثنية مع جاد.. اول ماخرجت لبرا ووصلت قدام الباب لكبير وقفت ف بلاصتي من غير ما نزيد خطوة اخرى.. هزيت راسي وغمضت عينيا.. بدني رعش وكرشي دغدتني عالنسمة لخفيفة الي ضربتني و قطرات لمطر الي نزلو وقت خروجي.. هزيت يدي و بقيت نستحلى فيهم وهوما نازلين فوقي.. حسيتهم بردوني و خلاو ناري تخمد..لحظتها ماحسيت بشي كيما ماخممت ف شي كان اني نبعد من هنااا و نستمتع بكل حاجة حرمتني منها الدنيااا.. حليت عينيا وغزرتلو كيفاه كان واقف قدامي يتبسم.. قربلي وبعدلي خصلة من شعري عدا بعينيه على وجهي يحكي
جاد :" مرتاحة ؟"
عديت بعينيا عليه انا زادة ووقفتهم ف عينيه وين لقيت روحي مركزة معاهم و مع اللمعة الي فيهم.. هزيتلو براسي اي نحكي
انا :" اي مرتاحة.. مرتاحة برشة.. حاسة روحي ك طفلة الصغيرة الي قاعدة تكتشف ف الدنيا من الاول.. توحشت نعيش التفاصيل هاذم.. المشي تحت لمطر.. و الجري ف الشارع.. شوفة الناس.. و برشة حاجات.. نحب نعيش هذا الكل من جديد جاد"
هز يديه و مسحلي قطرات لمطر الي كانو نازلين على وجهي يحكي
جاد:" نوعدك انك بش تعيش كل شي من جديد.. بش نخليك تعوض هذا الكل جوري "
تبسمت على كلامو وهزيتلو براسي باهي.. ريتو كيف بعد عليا ونحى الفازت متاعو.. رجع قرب مني ووقف قدامي.. حطها فوق أكتافي يحكي
جاد :" الطقس برد و لبسك خفيف تو تمرض "
لحظتهاا بقيت واقفة جامدة ف بلاصتي كان عينيا تدور عليه.. اشرلي بعينيه يحكي
جاد:" أيا اطلع فيسع للكرهبة المطر قوات "
هربت عينيا من عليه وهزيتلو براسي باهي.. ريتو كيف فتحلي باب الكرهبة يحكي
جاد :" اطلع "
عضيت على شفايفي و طلعت ف كرهبتو.. اول ما طلعت غمضت عينيا على ريحتو الي كانت مالية الكرهبة.. رجعت حليتهم كيف حسيت بيه طلع بجنبي وخدم الكرهبة.. لحظتهاا دورت راسي وغزرت للمصحة كاني نودع فيها و ف كل مأساة انا عشتهاا فيهاا.. كل ركن فيها ملئ ب ذكريات نحب ننساهم ونرميهم وراياا بش انجم نقدم.. مع اني نعرف هذا صعيب اما لازمني.. ف ثانية وحدة لقيت روحي استحضرت انا شنوة عشت هناا من اول نهار لغاية ليوم.. استرجعت شريط ذكرياتي بكامل تفاصيلو الشي الي خلاني نحس بخنقة انا نعرفها مليح.. خنقة تمكني كل ما نخاف.. خفت لا يكون فما نهار ف المستقبل يستنى فيااا و بش نرجع فيه لهنااا.. وقتها مستحيل كان نتحمل.. مسحت دمعتي الي نزلت فيسع و غزرتلو نحكي
انا :" امشي جاد.. هزني من هناا.. بعدني امان "
هزلي براسو باهي و خدم الكرهبة.. حليت البلار بجنبي وتكيت براسي لتالي.. بقيت نغزر للطريق  و الناس الماشية جاية ومش مصدقة الي انا عايشة اللحظة هاذي.. للحظة خفت لا نكون شاربة دواياا و راقدة نحلم.. صوت جاد الي تكلم خلاني نتبسم ك تأكدت الي هذا واقع .. تلفتتلو بالوقت يحكي
جاد :" وين تحب نمشيو ؟ تحب نهزك تاكل حاجة قبل ؟"
انا :" مش بش توصلني للفيلا ؟"
جاد:" مش تو.. مازال بكري.. خلينا نعديو نهار لبرا و ف ليل نوصلك "
هزيت حواجبي و تبسمت نحكي
انا :" بلحق تحكي؟"
جاد:" اي بلحق .. أيا قلي وين تحب تمشي ؟"
رجعت غزرت قدامي وسرحت مع لبلاصة الي خممت فيها لحظتهااا.. مانعرفش علاش هي اول حاجة جات ف بالي اما بلحق توحشتهاا و توحشت لحظاتي الي عشتهم فيهاا..
دورت راسي مرة اخرى و غزرتلو نحكي
انا :" اممم نختار اي بلاصة نحب علاهااا اناا "
حك على جبينو و ضحك على جنب يحكي
جاد:" اي اكيد الي تحب علاها انت  "
انا :" نحب نمشي للمرسى.. فما بلاصة عالية تطل عالبحر.. كنت نمشيلها قبل.. نحب ناقف ف بلاصة عالية و نشم ريحة لبحر و نحس ب النسمة متاعو "
جاد:" مانعرفهاش لبلاصة.. تتفكرها انت ؟"
انا :" اي اي نتفكرهاا مستحيل كان ننساهاا.. امشي و تو ندلك عالطريق "
جاد :" حاضر .. ساعة سكر البلار ناوية تمرض انت "
تبسمت و هزيتلو براسي باهي.. تلفتت سكرت البلار و تكيت عليه نغزر لطريق.. هكاكا ووقفنا عالاشارة الحمراء.. حليت عينيا على وسعهم اول ما غزرت للكرهبة الي كانت واقفة بجنبنااا.. حسيت بدني رعش و اطرافي نملت.. طلعت يدي عالبلار و بقيت مركزة معاه.. رمشت عينيا برشة مرات حبيت نتاكد اني مش قاعدة نتخيل.. دمعتي هبطت وانا نغزرلو.. ماتوقعتش بش يكون هو اول شخص نشوفو.. ماعرفتش علاش مع كل شي صار بيناتنا الا اني فرحت بالصدفة هاذي.. رغم انها خلاتني نتفكر حاجات مشى ف بالي نسيتهم.. حاجات كيما وجعوني انا متأكدة انهم وجعوه هو زادة.. حاجة اقوى مني خلاتني مانجمش نبعد عينيا من عليه.. رغم السنين الي تعدات هو ماتبدلش.. نفس الملامح الي بقات راسخة ف بالي.. نفس التفاصيل الي مانسيتهمش.. لحظتهاا ماعرفتش كيفاه صوتي خرج مني يهمس باسمو
انا :" ب..بدر ؟"