🗡🥀#رِيْبَة_جُورِي🥀🗡

حلقة 9

الحلقة التاسعة
#جوري_تحكي

ايامات تعداو على خروجي من المصحة.. ايامات عديتهم ف بيتي لا نجمت نخرج و لا ندور ف الفيلا.. مشى ف بالي بالوقت بش نتعود اما لقيت روحي كل مانزيد نهار هنا كل مانزيد نتخنق اكثر.. غرفهم الإثنين المغلقة الي كنت نلمحهم ف اخر الردهة خلاوني نخاف اكثر.. تمنيت كان جات عندي الشجاعة الكافية بش نفتحهم ونواجه كل شي من خلالهم هوما اما كل مرة كنت نقدم فيها نحس بخوفي يسحبني و يبعدني علاهم..
طول الايامات هاذم سارة كانت بجنبي ليل ونهار.. وجودها كان مخفف عليا شوي.. فكرة انو عندي شكون وراياا نطمن بوجودو وناثق فيه خلاتني مرتاحة و نحس انو الدنياا قادرة تعوضني اكثر بعد كل شي مريت بيه.. كيما عوضتني بجاد الي مدلي يدو وشدني وقتلي الكل تخلي علياا.. اما خوفي لا هو زادة يصير كيفهم تصرفاتو اخر فترة معايااا مافهمتهاش.. لكلام بيناتنا قلّ و حديثو صار مش مفهوم حتى كيف يزورني مايطولش و يحكي معاياا من فوق لفوق كيما كان يحاول يهرب ف غزرتو كانو مايحبش يواجهني و لا مخبي حكاية.. بقيت محتارة معاه و مش عارفة كيفاه نسالو خاطر نحس انو هذا مش من حقي.. يعني ف الاخير هو مش مجبور بش يفسرلي و يبررلي تصرفاتو معاياا يكفي الي عملو على خاطري..
حليت عينيا شوية شوية على صوتها وهي تغني ف الدوش كالعادة.. تبسمت وهزيت روحي شوي عديت بيديا على وجهي و طلعتهم لشعري رجعتو لتالي وتكيت بظهري عالفرش نسمع فيها كيفاه تغني لفيروز و عاطية ماعندها.. البيت رجعت فيها الروح اول ما سارة دخلتلهاا.. دورت بعينيا نغزرلها كيفاه زينتهاا و نظمتهاا خلاتها ترجع كيف قبل ويمكن احلى.. تلفتت على صوت باب الدوش الي تحل.. ريتها كيف خرجت لافة روحها بالمنشفة و شعرهاا مبلول يقطر مغطيلها وجهها.. هزيت روحي اكثر وتقعدت ربعت ساقياا نحكي
انا :" صحة دوش سارورتي "
بعدت شعرهاا على وجهها وغزرتلي تحكي
سارة :" هاك فقت ؟"
انا :" والله صوتك قادر يفيق حتى خالتي ناجية "
ضحكت وقدمتلي قعدت بجنبي عالسرير تحكي
سارة :" ههه هاني مدللتكم..كل صباح تسمعو فيروز بصوتي "
انا :" ساعة بلحق صوتك محلاه غير هكا مافيبالش انت مغرومة بفيروز لدرجة هاذي "
سارة :" والله انت مازلت ماتعرفش مواهبي.. نخليك تكتشفني بالشوي بالشوي"
انا :" بربي صار فما حاجات اخرى غير الغناء ؟"
سارة :" اكيييد "
تبسمت وهزيت راسي غزرت للبورتري متاعي الي كان معلق دورت بعينيا عليه وتنهدت نحكي
انا :" حتى انا كنت مغرومة بالرقص.. من الي انا صغيرة كنت نتمنى نتعلم كل أنواع الرقص اما بابا رفض وقتهاا..ورغم  هذا كنت كل ما نلقى فرصة نرقص.. وقتها وين نحس بالسعادة كيما نحس روحي حرة.. ثواني كنت ننسى فيهم كل شي..كنت نهرب من بابا و الضغط والمشاكل "
هزيت يدي فيسع ومسحت دمعتي الي هبطت تجري على خدي.. رجعت غزرتلها اول ما شدتني من يدي وكبست عليا تحكي
سارة:" صدقني انا اكثر وحدة حاسة بيك.. نتمنى كان جات عندي قدرة و نخليك تنسى هذا الكل وترجع كيف قبل.. اما صعيب خاطر الي يتوجع من اهلو صعيب كان يرتاح.. و الجروح الي تتحل من وراء اكثر ناس نحبوهم مايبراوش رغم السنين الي تتعدا اثرهم يبقى هناا "
ريتها كيف طلعت يداها واشرت ناحية قلبها..رمشت عيناها برشة مرات و رجعت تحكي بصوت مخنوق
سارة :" و رغم لوجيعة الي تبقى مرافقتك تلقى روحك مضطرة انك تنسى أو بمعنى أصح تتناسى بش تنجم تكمل ف حياتك "
قربتلهاا اكثر وهزيت يدي حطيتها على خدها مسحتلها دمعتها الي نزلت بصبعي نحكي
انا :" انت قاعدة تحكي على روحك مش هكاا ؟"
هزتلي براسها أي من غير حتى كلمة وين دموعها نزلو اكثر من الاول.. دورت بيديا عليها وجبدتها في حضني كبست علاها نحكي
انا :" تحب تحكيلي ؟؟"
سارة :" صدقني نحب نحكيلك.. كل مرة نقول بش نحكي الي ف قلبي ممكن نرتاح اما مانجمش جوري.. عشت سنين و انا نحاول ننساهم.. بعدت علاهم و شديت ثنيتي وحدي ورغم هكا بقاو وراياا.. مجرد تفكير فيهم مخليني نكره روحي خاطرني منهم ودمهم يجري ف عروقي "
بعدتها علياا و غزرتلها ف عيناها نحكي
انا :" شوف.. انا مش بش نسالك شي..بش نخليك على راحتك ووقت الي تحب تحكي و تفرغ قلبك بش تلقاني انا اول وحدة بجنبك تفاهمناا ؟"
هزت يداها ومسحت دموعها تبسمتلي تحكي
سارة :" اي نعرف.. عيشك جوري "
انا :" انت الي عيشك على كل شي عملتو و مازلت تعمل فيه معاياا "
ريتها كيف قامت من حذاياا و اشرتلي بيداهاا تحكي
سارة :" ايااا يزينا من الدراما و لبكا عالصباح.. مانحبش هكا انا راهو.. كنت نغني لباس علياا خليتني نبكي "
بقيت نغزرلها كيفاه فيسع ما تقلبت ورجعت تضحك كانو ماصار شي دقايق لتالي.. ضحكت نحكي
انا :" تعرف الي انت مجنونة و لا لا "
قربتلي و بعدت لغطاء من فوقي تحكي
سارة :" قالوهالي برشة غيرك.. و المجنونة تقلك قوم حضر روحك خاطرنا خارجين "
عقدت بحواجبي مستغربة نحكي
انا :" وين على خير ؟؟"
سارة :" بش نعزمك عالفطور لبراا "
انا :" لا انا مانحبش نخرج.. تو نفطرو هنا.. اصلا شوف الطقس كيفاه خلينا امان "
سارة :" لااا بش تخرج و بالسيف عليك زادة.. انا فديت والله.. ياخي انت مافديتش ؟؟ "
انا :" لا فديت اما .. "
سارة :" اما شنوة ؟"
انا :" اما نخاف كان نخرج و الجيران يشوفوني يعني لحق انا مش مستعدة لمقابلتهم و لا لاسالتهم "
سارة :" ماعندهم علاش بش يسالوك انا معاك ماتخافش..الي تقربلك تو نوريها..و زيد انت لازمك تتعلم تواجه الناس جوري.. قعدتك هكا مش حل "
انا :" باهي تو نخرجو اما على شرط.. مانبعدوش "
سارة :" حاضر عرفي .. المهم قوم حضر روحك مدام انا غيرت ثيابي "
هزيتلها براسي باهي وقمت فيسع دخلت لبيت البانو عملت دوش خفيف و رجعت للبيت.. ريتها كيف حضرت روحهاا و قاعدة عالفرش تستنى فياا.. هزت راسها معايا تحكي
سارة :" صحة عزيزتي "
انا :" يعطيك الصحة.. نغير ثيابي و نجيك "
سارة :" باهي نستناك "
دخلت لدريسينغ حليتو و بقيت نختار ف الحوايج.. جبدت مريول صوف ف الأزرق و سروال نوار لبستهم.. نشفت شعري و خليتو محلول على اكتافي..لحظتها تمنيت كان نجمت نغزر لروحي ف المراياا و نشوف ملامحي كيفاه صارت.. حسيت روحي نسيت تفاصيل وجهي حتي شعري مش عارفة كيفاه صار من غير ما نشعر هزيت يدي و بقيت نعدي فيها على كامل وجهي.. غمضت عينيا و بقيت نتخيل ف روحي كيفاه كنت و كيفاه انجم نكون صرت و شنوة الي تغيير فياا.. حليت عينيا على صوت سارة وهي تنادي علياا.. خذيت نفس طويل طبست لبست صباطي وهزيت كبوطي وخرجت نجري للبيت.. ريتها كيف كانت واقفة و حاطة يداها على خصرها قحرتلي تحكي
سارة :" لتووو ؟؟"
انا :" سامحني خليتك تستنى "
قربتلهاا فيسع و بستها من خدها.. تبسمتلي و هزت بحاجبهاا تحكي
سارة :" سامحتك .. هيا قدامي "
هزيت ساكي من فوق الفوتاي وخرجت معاهاا.. اول مانزلنا لتحت.. ريت خالتي ناجية مقابلتني في الكوجينة تحضر ف الفطور كالعادة.. قدمنا ناحيتها نحكي
انا :" صباح الخير خالتي "
سارة :" صباح الخير خالتي ناجية "
ناجية :" صباح النور "
دورت بعيناها علينا الزوز و غزرتلي تحكي
ناجية:" خارجين؟"
انا :" اي خالتي.. بش نفطرو لبرا اليوم.. سارة عازمتني "
ناجية :" باهي خليني نكلملكم الهادي يوصلكم "
انا :" لا لا خالتي اصلا مش ناويين نبعدو بش نشوفو مطعم هنا ف سيتي "
ناجية:" اما بنتي لبرا مطر و الطقس بارد.. تو تمرضو "
سارة :" لا خالتي هانا لابسين مليح و عنا لمظلة تو نتغطاو عالشتاء "
ناجية:" على راحتكم بنتي.. المهم ماتتاخروش "
انا :" باهي خالتي "
عطيناها بظهرناا و قدمنا ناحية الباب وقبل ما نخرج وقفت على صوتها كيف رجعت نادتلي
ناجية :" جوري استنى "
تلفتلها وقدمت ناحيتها فيسع نحكي
انا :" نعم خالتي "
ريتها كيف شدتني من يدي وحطتلي فلوس فيها تحكي
ناجية:" هاذم ليك.. ماتخرجش من غير فلوس "
هزيتلهاا براسي لا برشة مرات نحكي
انا :" لا لا خالتي مانجمش ناخذهم "
ناجية:" علاش ؟؟"
انا :" هاذم فلوس بابا انا مانلمسهمش ومانصرفش منهم "
ناجية:" هاذم فلوسي انا مش متاع بوك.. هاذم تعبي و حقي و انت بنتي و بش تاخذهم بالسيف "
انا :" اما خالتي افهمني والله... "
قصت عليا تحكي
ناجية:" مانفهم شي ومانحبش أعذار انا قلت كلامي سايي "
كبست عالفلوس ف يدي و تبسمتلها.. طبست علاهاا و بستها من جبينها نحكي
انا :" ربي يخليك لياا خالتي "
ناجية:" عيش بنتي .. أيا برا صاحبتك تستنى فيك "
هزيتلهاا براسي باهي و رجعت لسارة الي كانت واقفة قدام الباب.. شديتها من مرفقها وخرجناا..
حسيت قلبي خظ بالقوي اول ما عفست الشارع..  كبست بيديا على سارة و نزلت راسي هربت عينيا من غزرت الناس الي حسيتها ركزت معاياا.. بقيت نمشي و انا ساكتة تفكيري الكل كان ف شنوة هوما يحكيو عليااا من وراياا و كيفاه يغزرولي.. كنت كل مانبعد عالفيلا و نشوف اكثر ناس كل مانزيد ندخل بعضي اكثر لدرجة.. خذيت نفس طويل حاولت نهدي بيه روحي شوي وهزيت راسي دورت بعينيا عالشارع والمطاعم.. حسيت بغصة شدتني ف حلقي وخنقتني اول ماشفت المقهى الي كنت نقعد فيه ساعات مع ياسمين الصباح قبل مانوصلها للمعهد.. دمعتي نزلت و انا نتفكر ف اخر لحظات عشتهم معاهاا.. لو كنت نعلم انهم بش يكونو اخر لحظات كنت استغليتهم وشبعت بيها اكثر كنت بش نبقى معاهاا اكثر وقت و مانبعدش علاهاا.. مسحت دمعتي بكف يدي و غزرت لسارة اشرتلها بيدي عالمقهى نحكي
انا :" خ.. خلينا نقعدو غادي امان "
هزتلي براسها باهي و قدمنا ناحية المقهي.. حليت الباب ودخلنا.. حسيت صدري كبس عليا بالقوي وين عجزت حتى بش نتنفس قدام تصويرتهاا الي مرت قدامي ف لحظة مع صوتهاا الي همس يضحك ف وذنيااا.. رمشت عينيا برشة مرات نمنع في دموعي عالنزول وين حسيت بغصة شدتني منهم اكثر اما تقويت على روحي وقدمت مع سارة ناحية الطاولة و قعدنا.. عديت بيديا على وجهي حاولت نهدي روحي شوي وننسى كل حاجة خممت فيها تو.. هزيت راسي على صوت سارة تحكي
سارة :" انا ماشية لتوالات.. اطلب انت لفطور "
انا :" باهي "
قمت من بلاصتي نحيت كبوطي و استويت شعري ورجعت قعدت.. هزيت راسي و بقيت نلوج بعينيا عالنادلبش نطلب لفطور.. حسيت روحي ترهوجت و الدنيا دارت بياا اول مادورت عينيا عالطاولة الي كانت مقابلتني و غزرت لشخص الي كان علاهاا.. جمدت في بلاصتي و اطرافي بكلها نملت.. عينيا تحلو على وسعهم كاني حبيت نصدق انو هو قدامي من جديد و هذا مش مجرد خيال.. دقات قلبي حسيتهم بش يطلعو مني من كثر ماوجعوني.. انفاسي ضاعو مني فجاة وين لقيت روحي رجعت تخنقت من جديد.. دموعي الي ملاو عينيا حجبو علياا الرؤية و خلاو تصويرتو تصير ضبابة قدامي لحظتها رمشت عينيا برشة مرات بش نرجع نشوفو وين دموعي نزلو و لقاو طريقهم على خدي.. كرشي وجعتني اول ما ريتو هز راسو معاياا وغزرلي.. عينيه إلي تركزت فياا خلاتني نضيع فيهم رغم بعدهم عني.. هزيت يدي الي كانت ترعش وعديتها على وجهي برشة مرات.. خذيت نفس وقمت فيسع من بلاصتي هزيت كبوطي وساكي وخرجت نجري ساقيا أعلى من راسي.. اول ما خرجت حطيت يديا على صدري وبقيت نرد ف النفس الي ضاع مني وراء بعضو.. هزيت راسي وجبدت نفس طويل من النسمة الباردة الي ضربتني.. غمضت عينيا بالقوي اول ماسمعت صوتو وراياا نطق باسمي.. رجعت حليتهم على ريحتو الي هبت مع النسمة وتغلغت في خشمي وخلات بدني يرعش.. كبست على كبوطي و جمعت طرف القوة إلي كانت عندي و تلفتتلو.. ثواني عديناهم ساكتين نغزرلو لبعضناا من غير حتى كلمة.. دورت بعينيا عليه وبقيت نتأمل ف تفاصيل وجهو وركزتهم في عينيه إلي شدتني و سحبتني لبعيييد.. ثواني قليلة رجعوني للماضي وين لقيت روحي تفكرت الطفلة الصغيرة الي عشقت من اول نظرة.. الي سمحت لروحها تعيش مشاعر مش من حقها تعيشهم و الشي هذا الي خلاها تخسر و تدفع ثمن غلطتهاا لغاية تو.. فقت من سرحتي فيه كيف لغى المسافة الي كانت بيناتنا وقربلي اكثر عداا بعينيه عليا يحكي
بدر :" جوري ؟؟؟"
بلعت ريقي بالسيف نحكي
انا :" ا..اهلا بدر "
هز بحاجبو وغزرلي يحكي
بدر :" شبيك هاربة ؟ هكا تراني وماتسلمش علياا بعد المدة هاذي الكل ؟"
حليت شفايفي بسيف وجمعت الحروف الي حسيتهم تشتتو بين شفايفي نحكي
انا :" لا.. لا.. م.. ماهربتش تفكرت حاجة و كان لازمني نمشي على هذاكا قمت "
ريتو كيف تبسم على جنب يحكي
بدر :" فهمتك.. اما انا تفاجات بشوفتك.. يعني بعد كل شي صار ماتوقعتش انك بش تخرج و نرجع نراك من جديد "
انا :" نظن مش كل حاجة نتوقعوها تصير مش هكاا ؟"
هزلي براسو اي وهز بحاجبو يحكي
بدر:" ساعة قلي عندك برشة من الي سيبوك و خرجت ؟"
حسيت صوتي هرب قدام غزرتو و كلامو الي كانو باستهزاء.. عديت بلساني على شفايفي هزيتلو براسي لا نحكي
انا :"  لا ماعنديش برشة  "
بدر :" والله فرحتلك.. يعني شكون قال انت بش تخرج من غادي و سي سليم بش يتفكرك مرة اخرى.. كل مرة نتفاجأ منكم عايلة بالنور.. اما المرة هاذي كانت مفاجأة حلوة"
طريقة كلامو خلاتني عاجزة بش نجاوبو مالقيت حتى كلمة انجم نقولهاا ف اللحظة هاذي قدامو.. شفتو كيف هزني وحطني يحكي
بدر :" مالا رجعت للفيلا ؟"
بلعت ريقي بالسيف نحكي
انا :" ا..اي رجعت "
تلفت فيسع على صوت سارة وراه تحكي
سارة :" يا جوري وينك بقيت نلوج عليك "
قدمت ناحيتنا ووقفت بيناتنا دورت بعيناها علينا و غزرتلي تحكي
سارة :" فما حاجة ؟؟"
انا:" لا لا مفما شي.. خ..خليني نعرفكم..هاذي سارة صاحبتي "
غزرتلو ورجعت نحكي
انا :" و هذا بدر...."
قص عليا كيف مد يديه و صافح سارة يحكي
بدر :" بدر جارهم.. نسكن ف الفيلا الي مقابلتهم "
سارة :" نتشرفو مسيو بدر "
عقدت بحواجبي مستغربة جملتو الي رغم بساطتها اما انا مافهمتهاش و لانجمت نفهم شنوة يقصد بيهاا.. شفتو كيف رجع غزرلي و تبسم على جنب يحكي
بدر :" نخليكم تو.. مانعطلكمش "
هزيتلو براسي اي من غير حتى كلمة اصلا مالقيتش قوة بش نحكي بعد الموقف و القاء هذا الي ماكنتش قاريتلو حساب و لا ماحضرتلو روحي.. حسيت صوتي هرب علياا و انا نتبع فيه بعينيا كيفاه بعد علينا و طلع ف كرهبتو.. للحظة حسيت روحي كنت واقفة مع شخص عمري لا عرفتو ف حياتي كيما استغربت من التغيير الي صار واضح عليه غزرتو كانت باردة ماتعبر على شي.. نبرة صوتو وطريقة كلامو معاياا خلاوني نشفق على روحي الي حسيتها ذليلة قدامو.. فقت من سرحتي على صوت سارة تحكي
سارة :" هذا بدر الي مرة حكيت عليه ؟"
بقيت نغزر لكرهبتو الي عمال تبعد و هزيتلها براسي اي من غير حتى كلمة.. دمعتي هبطت تحرق على خدي اول ماغاب عليااا هزيت يدي مسحتها فيسع نحكي
انا :" نحب نروح "
سارة :" و الفطور ؟"
غزرتلها وعليت في صوتي نحكي
انا :" قتتتللك نحببب نررووح "
سارة :" باهي باهي اهدا.. خليني نجيب ساكي ونجيك "
ريتها كيف عطاتني بظهرها دخلت للمقهي.. خذيت نفس طويل و حركت ساقياا بالسيف سبقتها.. غمضت عينيا بالقوي و رجعت حليتهم على قطرات لمطر الي نزلو فوقي و تخلطو مع دموعي الي بقاو يجريو على خدي.. كبست على كبوطي بيدي و شهقت بالقوي لحظتهاا صوت بكايا صار مسموع.. كنت نبكي و مش هاممني الناس الي كانت تغزرلي ومركزة معاياا.. بقيت نشوف كان ف تصويرتو هو قدامي و نسمع ف كلامو وين حسيت بوجيعة قلبي قوات لدرجة حسيت اني بش نلفظ اخر انفاسي و نموت..
#رَيْبَة_جُورِي🥀
#سمر_عياري 🍓