🗡🥀#رِيْبَة_جُورِي🥀🗡

حلقة 11

حلقة 11
#جوري_تحكي

حليت عينيا شوية ورجعت سكرتهم.. حسيت بوجيعة راسي غلبتني مانجمتش نتحمل الضو الي كان يشعل ف البيت.. ماعرفتش كيفاه عديت نهار كامل راقدة هكاا..كيما للحظة هاذي مش مستوعبه الي صار لبارح.. تمنيت كان الي عشتو كان كابوس وفقت منو وقتها كنت بش نتاكد انو وفى.. اما الي صار كان حقيقة وممكن بش تبقى مرافقتني حياتي الكل.. كبست بيديا عالملحفة اول ماتفكرت تصويرتي الي ريتها لبارح حسيت بالخوف غم على قلبي وين لقيت روحي فتحت عينيا بسرعة بش نهرب منهاا.. اول ماهزيت راسي شوي غزيتلو كيف كان راقد بجنبي معنقني.. تبسمت من غير ما نشعر اول ماحسيت بكبسة يديه الي كانت وراياا.. عضيت على شفايفي وحاولت نهز روحي شوي.. ريتو كيف حل عينيه مفجوع طبس راسو معاياا فيسع يحكي
جاد :" جوري وقتاه فقت؟"
انا :" تو مازلت كيف حليت عينيا  "
جاد :"قلي كيفاه تحس ف روحك؟ "
انا :" مليحة..راسي يوجع وزيد حاسة بوجهي يحرق فيا شوي "
جاد :" طبيعي الجروح الي فيه مازلو جدد على هذاكا يحرق.. اما مفما شي يخوف "
هزيت يدي بالسيف طلعتهاا على وجهي وعديت بصوابعي على الجروح نحكي
انا :" ف.. فما برشة جروح ؟"
جاد :" لا لا مش برشة.. نحي يدك بش مايحرقوكش اكثر "
انا :" باهي "
جاد :" خليني نقوم ناديلك لطبيب يفحصك و نطلبلك عشاك"
انا :" لا لا امان خليك.. ماتخرجش وتخليني "
هزلي براسو باهي ومد يدو شوي عدا بصوابعو على خدي يحكي
جاد :" باهي هاني معاك ماتخافش "
انا :" جاد ميسالش تساعدني نحب نتقعد ؟"
جاد :" اي بالطبيعة "
ريتو كيف وقف من حذاياا.. دور بيديه عليا وهزني شوي حطلي لمخدة وراء ظهري يحكي
جاد :" مرتاحة هكاا ؟"
انا :" اي عيشك.. و سامحني تعبتك معاياا "
قعد مقابلني شدني من يدي وتبسملي يحكي
جاد :" مفما حتى تعب.. المهم انت تكون لباس "
انا :" اي لباس "
جاد :" جوري.. احكيلي شنوة الي صار لبارح؟ "
عديت بعينيا عليه من غير حتى كلمة.. حسيت بغصة مكنتني ووحلت في حلقي خنقتني اول ما استرجعت الي صار معاياا من جديد.. عديت بلساني على شفايفي نحكي
انا :" ل.. لبارح خرجت من الفيلا و.... "
قص علياا كيف هز بيديه ف وجهي يحكي
جاد :" استنى ساعة.. نحكيو بالحاجة بالحاجة.. فهمني علاش خرجت ؟؟ كيفاه تخرج ف وقت متأخر هكاكا ؟"
دقات قلبي قوات من وراء سوالو الي خلاني نتفكر سبب خروجي.. حسيت روحي تخنقت و انفاسي ضاعو مني من وراء التصويرة الي هدت علياا فجأة.. تصويرة من وراهاا هي انا ماخممت ف شي غير اني نهرب و نبعد حتى وصلت روحي للحالة هاذي.. رمشت عينيا برشة مرات نمنع في دموعي عالنزول نحكي
انا :" خرجت خاطرني فديت من الفيلا حبيت ندور شوي ف الحي ياخي سرحت و ماحسيتش على روحي كيف بعدت "
جاد :" فديت؟ هذا مبرر عندك انت؟ انا شنوة وصيتك؟ شنوة حكيت معاك ؟"
انا :" امان جاد راني تاعبة.. نعرف روحي غلطت ما تزيدش عليا امان يكفي الي صار "
هز يديه و مسحلي دمعتي الي نزلت على خدي يحكي
جاد :" باهي علاش الدموع تو؟ انا حكيت هكاكا من خوفي عليك جوري "
انا :" والله نعرف.. اصلا عندك حق مهما تقوول "
جاد :" باهي كمل احكي شصار بعد ؟"
انا :" بقيت نمشي حتى وصلت للغابة وقتها.. وقتها وين استوعبت انا شنوة عملت.. اول ما كنت بش نرجع سمعت صوت وراياا.. صوت حثلة متاع ساقين.. كيف تلفتت ريت لخيال الي هف وراياا اما ف لحظة غاب علياا.. من خوفي تخبيت تحت شجرة.. هكاكا ريت ضوء مقابلني شعل وطفى ثلاثة مرات كاني إشارة.. وقتها قلت ممكن تكون سارة تلوج علياا.. وليت قمت وقدمت ناحية الضوء.. ياخي .. "
طلعت يدي وكبست على شعري بالقوي غمضت عينيا ورجعت نحكي
انا :" ياخي الضوء شعل اكثر ماعرفتش شنوة مصدرو ماركزتش.. ركزت كانت ف المراياا الي.. الي كانت قدامي.. انا.. انا شفتهااا.. هو خلاني نشوفهااا.. خلااااني نرجع نغزرررلهاااا.. انااا شفتهااااا مررة اخرررى.. انا رجعت شفتهاااا هييييي "
حسيت بدني رعش من الخوف الي تملكني اللحظة هاذي.. صوت جاد الي بقى ينادي باسمي حسيتو بعيد علياا.. لقيت روحي رجعت ضعت من جديد ف الي صار و كل شي يجبد فياا للقاع.. كنت كل مانخاف كل مانكبس على شعري اكثر و مع هذا ماحسيتش بالوجيعة حسيت روحي كاني تخدرت.. حليت عينيا على صوتو كيف صاح بجنبي يحكي
جاد :" جوووووري فيييق "
هزيت راسي معاه وين دموعي نزلو اكثر من الاول.. شهقت بالقوي كاني خرجت من الغريق وخذيت اول نفس ليااا.. حط يديه فوق يدي يحكي
جاد :" ارخف يدك وسيب شعرك.. قتلك سيب شعرك "
بقيت نطاوع فيه من غير حتى كلمة اصلا حسيت روحي تهديت من وراء الشي الي عشتو الدقيقتين هاذم.. قعد بجنبي وحط يديه على خدي يحكي
جاد:" وفااات.. معادش تحكي شي تو.. حاول انك تنسى"
ميلت راسي نحكي
انا :" مانجمش ننسى..الي صار صعيب ننساه..هو خلاني نواجه اكثر حاجة نخاف منهاا.. خلاني نشوف اكثر انسانة نكرهاا..خلاني نشوفهاا ..ف لحظة وحدة خلاني نتفكر كلشي جاد.. خ..خلاني نحس انو ه..هي رجعت مرة اخرى "
عقد بحواجبو مستغرب يحكي
جاد :" هي شكون ؟"
عديت بعينيا عليه من غير حتى كلمة حسيت لكلام وحل ف حلقي مانجمتش نتكلم.. حط يديه على يدي ورجع يحكي
جاد :" باهي قلي انت شفت الي عمل هكاا ؟؟"
هزيتلو براسي لا برشة مرات نحكي
انا :" لااا لااا لاا.. هو كان متخبي وراء لمرايااا حتى.. حتى يديه الي كانت شادة لمراياا مش ظاهرة كان لابس قفازات.. اي اي لابس قفازات نتفكر مليح.. و بعد فجاة قدم مني يجري ضربني بالقوي.. طحت ف القاعة بالوقت و ماحسيت بشي"
جاد :" باهي اهدى كل شي وفااا.. خلي لحكاية علياا انا تو نتصرف و نعرف شكون وراء الحاجات هاذم الكل "
عقدت بحواجبي مستغربة نحكي
انا :" شتقصد بحاجات ؟؟ صارت حاجة اخرى ؟؟؟"
جاد :" مانقصد شي.. انت ارتاح و كهوو "
هزيتلو براسي لا برشة مرات نحكي
انا :" لا لا انت تقصد حاجة.. شفمااا جاد.. انت مخبي عليااا حاجة ؟؟"
عدا بيديه على وجهو وغزرلي يحكي
جاد :" شوف انا بش نحكيلك اما مانحبكش تخاف "
انا :" باهي نسمع فيك "
جاد :" انا شفت تسجيلات الكاميرا متاع المصحة.. ف اليلة الي وصلك فيها الجواب "
هزيت روحي فيسع استويت قعدتي وغزرتلو نحكي
انا :" عرفتو شكووون ؟؟؟"
جاد :" لا مانجمتش نعرفو "
انا :" علاش ؟؟"
جاد :" كان لابس قناع و قفازات كيف ماتحكي انت تو "
انا :" يعني.. يعني هو نفس الشخص؟"
جاد :" احتمال كبير "
انا :" يعني فما شكون يتبع فياا.. فما شكون مستقصدني مش هكاا.. بقى وراياا من المصحة للفيلا "
حطيت يدي عالملحفة بعدتهاا من فوقي وقمت فيسع من بلاصتي.. حسيت بساقياا رخت بياا وترهوجت استندت بيديا بسرعة عالتابل الي كانت بجنبي قبل مانوقع وبقيت نرد فالنفس وراء بعضو.. حسيت قلبي بقى يضرب بالقوي من وراء الي سمعتوو.. فكرة انو فما شكون وراياا يراقب فياا خلاتني نترعب خصوصا لو كان يطلع من الماضي و يكون يعرف كل شي.. اصلا واضح انو يعرف ف كل مرة لمراياا تكون حاضرة.. حسيت روحي بش نهبل من الاحتمالات الي حاصروني و الشكوك الي راودتني ف اللحظة هاذي.. اصلا عجزت بش نفكر اكثر حسيت مخي تحرق واعصابي تعبت.. شفتو كيف وقف ودار ناحيتي.. حط يديه على مرفقي يحكي
جاد :" جوري ارجع تسطح.. لازمك تبقى مرتاحة "
هزيت راسي معاه ونطرت يدي منو نحكي
انا :" ماتلمسنيش.. سيبني "
جاد :" جوري شبيك ؟"
انا :" ما بيااا شي اخرج.. نحب نبقى وحدي..خليني وحدي"
جاد :"لا مانيش خارج..حتى تقلي شفما؟ شبيك تتصرف هكاا؟"
انا :" انت علاش ماقتليش الي ريتو؟علاش ماخبرتنيش؟؟"
جاد :" ماخبرتكش خاطر ماحبيتكش تخاف.. قلت تو نتصرف وحدي و بعد نحكيلك..خفت عليك لا تتعب اكثر كيف تعرف "
قعدت على طرف السرير و هزيت راسي معاه.. تبسمت على جنب نحكي
انا :" تكذب.. انت تكذب جاد.. انت خبيت عليااا بش ماتلقاش روحك مجبور انك تساعدني اكثر.. حتى انك آخر فترة بعدت عليااا ومارجعتش كلمتني و لا سالت عليااا.. عندك حق ف هذاا.. انت مش ملزم بشي هذااا..اما كنت ملزم انك تخبرني.. كان لازمك تقلي الي شفتو "
جاد :" شقاعدة تخرف انت ؟؟"
حليت عينيا على وسعهم فيه وعليت ف صوتي شوي نحكي
انا :" ماااانيش نخرف هااااذي لحقيقة..كان حكيتلي ممكن رااااني ماوصلتش لهنااا "
قعد بجنبي وحط يديه على دقنونتي دورلي وجهي ناحيتو وحط عينيه ف عينيا يحكي
جاد:" جوري اهدا... بعد كل شي صار انت كيفاه تفكر فيا هكاا؟؟.. انا بلحق خفت عليك جوري.. ماعرفتش كيفاه نحكيلك.. حبيت نتصرف وحدي قلت ممكن نعرف شكون.. اما لبارح عرفت انو قراري هذا كان غالط و جيتك للفيلا كنت بش نحكي معاك و نطمن عليك.. اما لقيت روحي تأخرت..و عندك حق ف كلامك لكل.. كان وصيتك وحذرتك من قبل ممكن ماكنتش بش تخرج.. انا لمسؤول على الي صار لبارح.. غلطتي اناا.. وفوق هذا الكل عمري لا حسيت روحي مجبور عليك و على مساعدتك.. انا كيف وعدتك خاطر انا نحب نساعدك كيما نحبك تصدقني و معادش تخمم هكاا تفاهمناا"
حط يديه على خدي ولقفلي دمعتي الي نزلت بصبعو يحكي
جاد :" يزي من لبكاا نوعدك الي صار مستحيل يتكرر.. كان لازم نعملك حراسة معاك هكاكا نكون مطمن عليك ف غيابي"
انا :" جاد انا مانحبش حراسة.. نحب حاجة اخرى "
جاد :" قلي شنوة ؟"
خذيت نفس و بلعت ريقي نحكي
انا :" رجعني للمصحة.. امان خليني نرجع غادي..المصحة ارحملي والله.. خروجي زاد تعبني..مهما يكون لخطر الي ف المصحة مستحيل يكون كيف لبرا.. غير هكا انا نسيت كيفاه نتعايش مع الناس.. حاولت نلقى سبب يستاهل خروجي مالقيتش.. م..معاد عندي حد لبرا.. كلهم مشاو "
جاد:" مستحيييل.. مستحيل نقبل و نرجعك غادي.. ماتطلبش مني هكاا "
انا :" اما انا خايفة جاد.. حاسة روحي بش نجن.. فما شكون وراياا و بش يبقى وراياا انا متأكدة "
جاد :" انت من اليوم بش تسمع كلامي واضح و انا نضمنلك حد ما يقربلك و لا يمسك.. غير اسمع لكلام جوري "
انا :" باهي الي تقول عليه انت انا موافقة عليه "
طلع يديه و مسحلي على شعري يحكي
جاد:" هكا نحببك.. تو بش ترجع تتسطح حتى نمشي ناديلك الطبيب يشوفك "
انا :" نحب نخرج من هنا جاد.. امان حاول معاه مانحبش نبقى ف المشفى "
جاد:" باهي تو نشوف معاه.. هيا ارجع اتكا حتى نجي "
انا :" جاد نحب ندخل لتوالات اما...."
جاد:" تحب نساعدك ؟"
فركت يديا في بعضهم نحكي
انا :" اي اما قبل نحبك..."
جاد :" فهمتك استناني هناا "
ريتو كيف هز الملحفة من فوق الفرش ودخل لتوالات فيسع.. شوي وقت ورجعلي.. مد يديه ناحيتي يحكي
جاد :" هياا شد فياا و ادخل "
حطيت يدي فوق يديو وكبست عليه.. وقفت معاه بقيت نمشي بالشوي بالشوي نتبع فيه حتى دخلت لتوالات.. سمعتو يحكي
جاد:" انت ريقل امورك ف عقلك شوي و سايس روحك.. تو نرجعلك "
انا :" باهي "
دخلت لبيت البانو سكرت الباب وراياا وقدمت ناحية الرخامة استندت بيديا علاهاا وهزيت راسي بقيت نغزر للمرايا لمغطية.. معادش عارفة لوقتاه بش نبقى عايشة بالطريقة هاذي.. حاسة بالتعب ينهش فيا من داخل سنين و انا ندور ف نفس الدايرة و مفماش مخرج من الي انا فيه مهما نحاول نقوم و نتعدا نلقى الماضي يجر فياا ليه من جديد.. حليت السبالة غسلت وجهي برشة مرات ورقبتي.. سكرتها وطلعت يديا شوي عديت بصوابعي عالجروح الي كانو مليانين وجهي والضمادة الي كانت مغطية راسي.. للحظة تمنيت كان جات عندي قدرة نهرب ونتخبا بعيد ف بلاصة ننسى فيها الخوف من الماضي و نبدأ حاضر جديد.. حسيت روحي رجعت ضيعت طريقي.. معادش حاسة لا بالأمان و لا الثقة من وراء الي صار مش عارفة كيفاه بش نعيش و انا حتى روحي مش واثقة فيها كان بش تتحمل وتكون قوية و لا لا.. خذيت نفس طويل و قدمت بخطواتي ناحية الباب حليتو وخرجت للبيت.. اول ما هزيت راسي قلبي خظ بالقوي وانا نشوف فيه قدامي.. بقيت واقفة نغزرلو لا عرفت نقدم و لا نوخر حتى صوتي حسيتو خانني وهرب علياا.. اخر انسان تصورت نراه ف الوقت هاذي..
لحظتهاا ماخممت ف شي.. كان هو شيعمل هنا ؟؟ و شنوة شبب زيارتو لياا ؟......
#جوري_تحكي