🗡🥀#رِيْبَة_جُورِي🥀🗡

حلقة 22

حلقة 22
#بدر_يحكي

ايامات تعداو على خروجهاا من حذاياا.. ايامات حاولت نتجاوز فيهم الي صار وننسى كل لحظة عشتهاا معاهاا و كل كلمة سمعتهاا منهاا.. كيما من ليلتهاا مارجعتش اتصلت بجوهر مانعرفش علاش اما ماحبيتش نسمع حتى شي يخصها رغم الخدمة الي بيناتناا.. غير هكاا حاولت نركز ف القضية الي بقات مفتوحة قدامي و عمالهاا تتعقد اكثر.. حسيت روحي وصلت لخانة إليك.. مش عارف كيفاه نتصرف و لا منين نبداا.. الامور عمال تتعقد أكثر الشي الي مخلي لحكاية بش تطول وتأخذ اكثر وقت...
راكيت الكرهبة قدام المستودع ودورت بعينيا عالبلاصة.. كان لازمني نرجع لمكان الجريمة رغم اني جيت لهناا قداه من مرة.. اما مانعرفش علاش حبيت نرجع و نشوفو.. كيما حبيت نحقق مع كل العمال مرة اخرى.. رجعت نزلتهم وغزرت لتابلو حليتو خذيت سلاحي.. خبيتو وراء ظهري ونزلت.. قدمت بخطواتي ناحية المستودع ووقفت قدامو.. عملت نظرة شاملة على كل أنحاء المكان مرة اخرى وبقيت ندور نشوف ف المداخل و المخارج.. لبلاصة كانت خالية بأتم بمعني الكلمة.. كان المستودع هذاا هناا و الباقي مجرد خراب.. عديت بيديا الزوز على وجهي رجعت للمستودع ودخلت.. عديت بعينيا على تفاصيلو وغزرت لزوز رجال الي كانو واقفين.. قدمت بخطواتي ناحيتهم نحكي
انا :" الله عينكم "
هو :" الله عينك.. تفضل ؟"
جبدت الشارة متاعي و هزيتهاا قدامهم نحكي
انا :" معاكم المحقق بدر السياف "
هو :" تفضل سي بدر.. انجم نعاونك ف حاجة؟؟"
انا :" شكون فيكم مراد ؟؟"
ريتو كيف هز يديه وغزرلي يحكي
مراد :" ا.. انا مراد "
انا :" سي مراد لازمناا نحكيو "
هزلي براسو باهي وقدم ناحيتي يحكي
مراد:" تفضل سي بدر.. فما حاجة؟"
انا :" خلينا نقعدو.. خاطر حديثنا مطول شوي "
اشرلي بيديه لداخل شوي وين كانت فما طاولة.. قدمت وجبدت كرسي قعدت وقعد هو مقابلني.. غزرلي يحكي
مراد :" لباس سي بدر ؟ فما حاجة؟"
هزيتلو براسي لا نحكي
انا :" لاا.. اما انا مذابيااا كان نحكيو على نهار الحادثة "
مراد :" انا حكيت كل شي ف التحقيق "
قربت شوي لطاولة حطيت يدي فوقهاا و غزرتلو ف عينيه نحكي
انا :" نعرف.. قريت انت شنوة قلت ف التحقيق.. نحب نزيد نسمع منك كان مفماش مانع "
مراد :" اي اكييد "
انا :" انت الي لقيت جثة "علي" مش هكاا ؟؟"
مراد :" اي انا.. و انا الي خبرت الشرطة زادة "
انا :" نعرف.. نحبك تحكيلي على كل شي صار نهار هذاكاا..من اول ما جيت هنا حتى بعد ما جات الشرطة "
حك على جبينو يحكي
مراد :" نهار هذاكا المفروض حد مايخدم هناا.. كلنا كنا ف المستودع لكبير نحضرو فيه خاطر البضاعة كانت على قريب بش تهبط من البورط "
انا :" و ك هكاا انت علاش جيت هناا ؟؟"
مراد :" انا جيت بش ناخذ قطعة للألة الرفع لكبيرة.. وقتهاا تعطلت فجأة و القطايع لكل موجودين هناا.. كيف ما تعرف انو المستودع هذا وين نصلحو الالات و نخبيو لقطايع "
انا :" باهي كمل "
مراد :" كيف تعطلت آلة الرفع وقتهاا انا قررت نجي هناا فيسع ونرجع "
انا :" علاش انت بذات الي جيت وقتها ؟؟؟"
مراد :" خاطر انا الميكانيكي الوحيد الي كنت موجود وقتهاا انا الي نعرف نوع القطعة اللازمة "
انا :" فهمتك.. و بعد شصار ؟"
مراد :" وقتها جيت و لقيت باب المستودع يا دوب مفتوح شوي.. كيف قدمت و دخلت ما ريت شي.. لبلاصة كانت ظلمة.. حبيت نشعل الضو اما لقيتو مقصوص.. وليت دورت بش نرفع العداد.. كيف وصلت استغربت كيف لقيت كبوط
" علي " مطيش غادي "
انا :" و انت كيفاه عرفتو كبوط علي ؟؟"
مراد :" لقيت بطاقتو ف وسطها "
انا :" و بعد ؟"
مراد :" هزيت الكبوط ف يدي و رجعت الضو فيسع و فرد وقت بقيت نادي باسمو نلوج عليه.. استغربت كيف مالقيتوش و اكثر شي استغربتو هو وجود علي خاطر علي معادش يخدم هناا عندو قداه "
انا :" علاش معادش يخدم هنا ؟"
مراد :" علي واحد من الرجال الي تمت نقلتهم للمستودع الجديد.. الي حضر تو للمشروع الجديد"
ضيقت عينيا فيه نحكي
انا :" تحكي عالمشروع الي يتضمن سي سليم مع سي خليل ؟"
مراد :" اي بالضبط "
انا :" و على اي اساس تم اختيار الرجال هاذم ؟؟ "
مراد :"  مانعرفش.. يمكن خاطر هوما اقدم رجال هناا يعني يعرفو الخدمة ملييح "
انا :" فهمتك.. كمل و بعد شصار ؟"
مراد :" بعد رجعت للمستودع.. اول مادخلت ريت المستودع كان داخل بعضو.. لكراسي مكسرة..غير الكراتين الي كانو ف القاعة.. لحظتها عرفت انو صارت حاجة هناا.. دخلت اكثر و بقيت نادي على " علي "..."
غمض عينيه بالقوي و رجع حلهم يحكي
مراد :" و.. وبعدها وصلت غادي "
اشرلي بيديه على أخر تركينة كانت ف المستودع يحكي
مراد :" غادي وين لقيت علي.. كان مطيش ف القاعة على ظهرو.. عريان من فوق لابس كان مريول خلعة و كانت مقطعة.. مشى ف بالي انو دايخ طبست عليه بش نفيقو.. اول ما دورتو ليا.. لقيت عينيه كانت محلولة و مقوص ف جبينو "
عديت بيديا على شعري وكبست على رقبتي.. خذيت نفس ورجعت نحكي
انا :" باهي مراد.. قلي ف الوقت هذاكاا.. ماسمعت شي ما لاحظت شي ؟؟"
مراد :" لا.. اصلا وقتها مانجمت نركز ف شي اخر.. قمت فيسع و اتصلت بشرطة.. و ف لحظة المكان تعبى و الدنيا دخلت بعضهاا "
انا :" باهي.. قلي مراد.. انت كنت قريب من علي ؟"
مراد :" اي نوعا ما.. يعني كنا نتقابلو بين فترة و فترة "
انا :" وقتاه آخر مرة تقابلتو فيهاا ؟"
مراد :" قبل الحادثة ب ثلاثة و لا اربع أسابيع.. حاجة هكا "
انا :" كيفاه كان يتصرف مالاحظتش عليه حاجة غريبة ؟؟"
مراد :" لاا كان فرحان خاطرة نقل للمستودع الجديد "
انا :" باهي و ماحكيتو ف شي ؟؟"
مسح على وجهو و غمض عينيه بالقوي و رجع حلهم يحكي
مراد :" لا حكيناا.. قلي انو المستودع هذاكا بش يكون وجه السعد عليه.. و قلي زادة انو على قريب بش يصير غني و يخدمنا الكل معاه.. وقتهاا ضحكنا عليه مشى ف بالنا يفدلك كالعادة "
عقدت بحواجبي مستغرب لحكاية.. حكيت تحت عيني ورجعت نحكي
انا :" باهي قلي.. حسب رايك علي كان عندو مشكل مع شي حد من العمال ؟؟"
مراد:" لا لا مستحيل.. علي كان طيب مع لكل "
انا :" و كيفاه كانت علاقتو مع سي سليم ؟"
مراد :" مانعرفش.. سي سليم مكانش يزور ديما المستودعات.. كان ف الايام الي توصل بضاعة جديدة.. غير هكاا علاقتو معانا علاقة خدمة كهو "
انا :" فهمتك.. و ماعندكش فكرة شكون عوض علي ف الخدمة؟"
مراد :" حد.. بقاو زوز عمال الي مشاو معاه كهو "
انا :" باهي.. عيشك سي مراد"
جبدت بطاقتي وحطيتها قدامو نحكي
انا :" هناا تلقى كل ارقامي.. كان تفكرت اي حاجة اخرى و لا لاحظت شي كلمني "
مراد:" باهي سي بدر "
انا :" بش نعمل دورة ف المستودع قبل مانمشي "
قام من بلاصتو ووقف يحكي
مراد:" اكيد تفضل "
هزيتلو براسي باهي و قمت من بلاصتي.. بقيت ندور ف المستودع حتى وصلت لتركينة الي تقتل فيهاا علي.. عديت بعينيا عليهاا وركزتهم ف الدم الي مازال ف القاعة وفرد وقت بقيت نخمم ف كلام مراد وين حسيت روحي واقف ف المكان الغالط.. صحيح الجريمة صارت هناا.. اما انا متأكد انو كواليسهاا و اسبابهاا و كل الاجابات الي انا نبحث عليهم موجودين ف المستودع الجديد.. المستودع الي كان " علي " فرحان بيه..