🗡🥀#رِيْبَة_جُورِي🥀🗡

حلقة7

حلقة السابعة
#جوري_تحكي
غمضت عينيا بالقوي و رجعت حليتهم مع النسمة الي هبت و لعبت بشعراتي.. كبست بيديا عالكاب الي كان فوقي و بقيت نغزر قدامي و سارحة.. تو نهارين تعداو على آخر مرة ريت بابا فيهاا.. نهارين و انا عايشة ف الكوابيس.. ماتوقعتش شوفتو و كلامي مع جاد بش يوصلوني للحالة هاذي.. تعبت من وراهم لدرجة اني مانطقتش كلمة وحدة سوى مع جاد و لا مع سارة من يومها.. خاطر تأكدت انو سكوتي و كلامي يوصلو لنتيجة وحدة.. انا تحكم عليااا نعيش هكااا و مانظنش كان حياتي بش تتغير.. طلب بابا خلاني نسترخص روحي وطرف الأمل الي كنت عايشة بيه هو خلاه يطفى.. خذيت نفس من ريحتو الي هبت مع النسمة وتغلغت في خشمي حسيت بيه كيف قعد بجنبي ساكت.. مانعرفش قداه تعدات من دقيقة واحنا قاعدين من غير حتى كلمة حتى نطق هو يحكي
جاد :" لوقتاه بش تبقى ساكتة؟ احكي الي تحس فيه جوري.. ماتخلي شي ف داخلك.. تحب ترجع تتعب من جديد.. علاش كل ما تقدم خطوة نلقاك رجعت عشرة ؟"
غمضت عينيا وين دموعي نزلو لحظتهاا حسيت بغصة شدتني ف حلقي خنقتني و حبست عليا النفس.. رجعت حليتهم على صوتو يحكي
جاد :" جوري.. اغزرلي هنااا "
حسيت بيديه كيف تحطت على دقنونتي.. دورلي وجهي ناحيتو وين لقيت روحي مركزة مع عينيه إلي كانت تدور على وجهي.. عدا بيديه على خدي مسحلي دمعتي الي نزلت يحكي
جاد:" لبكا مش حل.. ضعفك هذاا بش يدمرك اكثر.. وقتاه بش تفيق علي روحك و تعرف انو لازمك تسمع مني.. لازمك تقاوم كل حاجة تواجهها.. جاتك فرصة انك تخرج و تبدا من جديد ف عوض تفرح شوف حالتك كيفاه رجعت بالتوالي اكثر.. احكي وقلي ف شنوة تحس ممكن نساعدك "
بعدت وجهي عليه وغزرت للشجرة الي كانت قدامي .. ميلت راسي و دورت بعينيا علاها من الفوق للوطة..  بلعت ريقي بالسيف و حليت شفايفي نحكي
انا :" تحب تعرف انا ف شنوة نحس.. نحس في روحي كبرت.. حتى اني صرت اكبر من الشجرة هاذي.. خمسة سنين تسرقو من عمري كانو بمثابة خمسين سنة "
دورت راسي ورجعت نغزرلو.. حطيت يدي على صدري نحكي
انا :" نحس ف روحي بش تخرج مني مع كل نفس ناخذو.. تخنقت من كل شي.. ضعفي هذا هوما خلقوه فيااا.. انا عمري لا كنت هكااا.. كنت وحدي نواجه ف كل شي.. انت ماتعرفش انا ب شنوة تعديت حتى قبل حكاية ياسمين.. انا متت الف مرة يا جاد و حييت روحي بروحي.. نعرف اني شديت ثنية غالطة.. نعرف اني غلطت و انا مستعرفة بهذا والله.. مرتين تهموني مرتين يا جاد و ف المرتين كانو نفس الناس.. ناس قرابلي.. و اولهم بابا.. بابا قبل طلب مني نفس الطلب .. خرجني من السجن اما بشروطو هو.. و تو كيفكيف بش نخرج بشروطو.. علاش مارضاش يسمعني و يحس بيا .. علاش مارحمنيش.. انا شنوة عملت.. خروجي انت ترا فيه فرصة؟ فرصة لشنوة سامحني.. شكون بقالي لبرا ؟ شنوة بش نعمل و كيفاه بش نعيش ؟ صرت وحدي انا وحدي.. كلهم سلمو فياا.. امي اول وحدة.. عمرها لا حنت عليا و لا حبتني.. تخلات عليناا و خلاتني انا نحمل المسؤولية.. بعدها بابا و بعدها ماهر.. غير بالطبيعة الناس الي جبرتني الدنيا بش انا نسلم فيهم.. و انت.. انت زادة بش تسلم فياا جاد.. انا متأكدة انو بش يجي نهار و تخليني.. اول ما تعرفني بلحق انت بش تمشي.. و ممكن زادة كيف ما قلت انك بش تندم انك عرفتني اصلا و ساعدتني "
جاد :"انت احكيلي وبعد انا نقرر كان بس نسلم فيك و لالا"
خذيت نفس طويل و هزتلو براسي لا برشة مرات نحكي
انا :" لا لا.. لا جاد امان مانحبش نحكي.. ك نحكي نخاف من روحي و نعيفهاا.. ك نحكي نحس بنار تلهب فياا "
جاد :" باهي لحكاية هاذي تخص ياسمين؟"
طبست راسي وطرشقت بالبكاء.. هزيتلو براسي لا مرة اخرى و نحكي بالشهقة
انا :" لا لا.. ل.. لحكاية بدات قبل موت ياسمين ب ثلاثة سنين.. انا قت-لتهااا و انا متأكدة من لحقيقة هاذي..هي ماتت من ورايااا انا.. ريحة دمها لتو نشم فيهااا.. صوتهااا و خيالها لتو ورايااا..عكس موت ياسمين الي مش منجمة نتفكرو لتو "
مسحت دموعي و هزيت راسي نغزرلو نحكي
انا :" و رغم اني مش متفكرة الا انهم خلاوني نصدق اني قت-لتهاا.. خلاوني نعيش على اني مجرمة مرة اخرى.. و المرة هاذي تحكمت.. عكس المرة الأولى "
جاد :" و الي قتل-تها الأولى شكون ؟ و كيفاه قتل-تهاا ؟ مدامك متفكرة احكيلي "
غمضت عينيا بالقوي و كبست بيديا على ركبتي كيف تفكرت اجوبت الأسئلة الي طرحها جاد ف اللحظة هاذي.. رغم تصويرتهاا الي هدت علياا و خلاتني نحس بالخوف الا اني مانجمتش نحل عينيا ونهرب منهاا.. ريحتهاا لمخلطة بالدم تغلغلت ف خشمي الشي الي حسسني بالخنقة.. حسيت بيديه كيف تحطت فوق يدي يحكي
جاد :" جوري ارخف يدك.. جوري اهدي و حل عينيك "
حسيت صوتو صار بعيد عليااا و تلغى قدام صوتهاا و آخر كلمات سمعتهم منهااا.. بقيت نرد ف النفس وراء بعضو كاني نجري على بلاصتي.. حليت عينيا فيسع على صوتو الي علا بجنبي يحكي
جاد :" جووووري "
لحظتها ما عرفتش كيفاه حليت عينيا.. و اول ما ريتو ترميت ف حضنو من غير ما نفكر ثانية وحدة.. دورت بيديا وراء ظهرو و كبست عليه على قوة جهدي.. ف اللحظة هاذي ماخممت ف شي غير اني نحس بالأمان و نمحي الخوف الي تملكني دقيقة لتالي.. اني نحس معايا شكون و نترمى عندو و نرمي حملي عليه بالك نرتاح حتى شوي.. غمضت عينيا كيف حسيت بيديه دارت عليا زادة وبقات تمسح على شعري وظهري.. سمعتو يحكي
جاد:" يزي من لبكا و اهدى.. معادش بش نسالك و معادش بش نلح عليك.. بس نستناك حتى تكون حاضرة و تجي تحكيلي بارادتك.. مانحبش نشوفك هكا "
بعدت راسي شوي وغزرتلو ف عينيه نحكي
انا :" و توعدني انو مهما الشي الي بش نحكيه و تسمعو مني انت تبقى معاياا.. ماتحكمش عليا كيفهم "
بعد يديه من وراء ظهري و حطها على وجهي بعدلي خصلات شعري الي تحركو مع النسمة ورجعهم لتالي.. دور بعينيه عليا يحكي
جاد :" مايهمنيش انت شنوة عملت قبل خاطرك خلصت.. و انا مش بش نزيد عليك بالعكس بش نعاونك و الي يهمني هو جوري متاع تو.. على هذاكا نحبك كيف تخرج تكون عاقلة.. مانحبش نندم جوري "
بعدت عليه و تبسمت على جنب نحكي
انا :" حتى نخرج ساعة "
جاد:" بش تخرج.. بوك بعث التصريح.. غدوة بش تكون حرة "
حليت عينيا على وسعهم اول ما سمعت الجملة منو.. دقات قلبي قوات فجأة لدرجة اني سمعت صوتهم يضرب ف وذنيااا.. تبسمت بين دموعي الي رجعو نزلو.. ف اللحظة هاذي حسيت بمشاعر متناقضة تملكوني.. عشت الفرحة كيما عشت الخوف.. اما اقوى شعور عشتو هو النقمة.. خاطر يمكن سايي لحق الوقت الي بش نحاسب فيه الناس الكل.. ووجه جوري الحقيقي على قريب بش يرجع يظهر.. و ما يهمنيش انا شنوة و لا شكون بش نخسر الي يهمني انو نوصل لرغبتي و الي هي معرفة الحقيقة و الانتقام من الي خباهاا عليااا سنين.....

#رَيْبَة_جُورِي🥀
#سمر_عياري 🍓