🗡🥀#رِيْبَة_جُورِي🥀🗡

حلقة 6

حلقة السادسة
#جوري_تحكي

كملت فطوري فيسع وقمت.. قربت اكثر لشباك قعدت عالحرف نستنى ف جاد حتى يرجع.. بقيت ندور بعينيا عالجنينة والناس الي فيهاا.. قلبي ضرب بقوة اول ماريتو لبرا.. غمضت عينيا بالقوي و رجعت حليتهم للحظة حسيت روحي نتخيل ووجودو قدامي ماهو إلا مجرد خيال ووهم انا عايشتو.. ماعرفتش كيفاه قمت من بلاصتي فيسع وخرجت نجري لجنينة.. اول ماخرجت جمدت في بلاصتي و ساقياا معادش قادرة تزيد تقدم خطوة اخرى لقدام.. بقيت نغزر لبابا و مش مصدقة الي هو قدامي تو.. شوفتو الي ماتوقعتهاش خلاتني نتفكر كل شي صار ف لحظة وحدة.. خلاتني نعيش الف شعور خلال ثانية.. رغم خوفي لا يكون كشفني وكشف حكاياتي لجاد الا انو خوفي تلغى قدام وحشي ليه.. تمنيت كان غزرلي هو زادة.. تمنيت كان جات عندي الشجاعة الكافية بش نجري و نعنقو على قوة جهدي.. مع اني متاكدة انو بش يصدني.. اما مايهمش المهم انا نشبع بقربو و بريحتو الي فقدتهااا و خلاتني نعيش النقص طول الخمسة السنين هاذم.. اول ماتحركت الكرهبة وبعدت حسيت روحي مشات و بعدت معاهااا..
حسيت بجاد كيف قرب مني وين وجيعة قلبي و دقاتو زادو.. خفت لا يكون عرف كل شي و يتخلى عليا هو زادة.. خفت لا يراني مجرمة كيفهم و سري يكون تكشف قدام الانسان الي مدلي يدو.. بقيت جامدة ف بلاصتي مش منجمة لا نتحرك و لا نحكي.. فقت من سرحتي على يديه الي دارت عليا وهزني ف حضنوو.. و مع هذا مانجمتش نرد الفعل حتى اني مانجمتش نغزر لوجهو.. خفت لا نشوف غزرة منو توجعني.. غزرة كنت هاربة منهاا وراء سكوتي طول السنين هاذم.. دورت وجهي لناحية لاخري اول ماحطني عالفرش وين دموعي نزلو و خلاوني نتنفس بعد الخنقة الي كنت حاستهاا.. تكيت براسي لتالي وغمضت عينيا على صوتو يحكي
جاد :" جوري.... "
حليت عينيا فيسع تقويت على روحي و قصيت عليه نحكي
انا :" ب.. بابا.. بابا علاش جاء ؟"
جاد :" اغزرلي ساعة.. جوري قتلك اغزرلي فما حاجات لازم نحكيو فيهم"
بدني رجف اول ما سمعت جملتو.. دورت راسي فيسع وغزرتلو مستغربة نحكي
انا :" ش.. شنوة الحاجات ؟ هو .. هو قلك حاجة؟"
جاد :" شنوة الي مخبيتو جوري ؟"
سوالو كان كيف الصاعقه الي هبطت عليااا.. حسيت ريقي وحل ف حلقي.. بقيت نغزرلو ساكتة نستنى فيه ينطق كلمة اخرى تخرجني من دوامة الاسئلة و الاحتمالات الي بقيت ندور فيهاا.. شفتو كيف قرب مني و قعد بجنبي يحكي
جاد :" انا متأكد انك مخبية علياا حاجة و ممكن حتى انك كاذبة عليااا زادة.. و مع هذاا انا بش نساعدك خاطر مهما تطوال المدة انت بش تجي لعندي و تصارحني.. صدقني نتمنى هذا جوري.. خاطر احتمال اخر غيرو بش يخليني نندم على كل خطوة قدمتهاا ف اتجاهك لغاية تو "
حسيت بوخزة في قلبي مع كل كلمة سمعتهاا منو.. خاطر حتى انا متأكدة انو بش يجي نهار و نتكشف قدامو.. و لحظتهااا خسارتي لجاد محتومة.. و ممكن تكون على قريب زادة.. غمضت عينيا بالقوي و رجعت حليتهم على دموعي الي رجعو هبطو..نحكي
انا :" نفهم من كلامك انو بابا ما حكالك شي "
جاد :" لا بوك ماحكى شي.. هو جاء هنا خاطر وافق على خروجك.. حكينا عالتصريح "
بقيت نغزر لجاد ساكتة كان جملتو بقات تتعاود ف وذنياا.. جملة مانجمتش نصدقهاا.. و لا يمكن ماحبيتش نصدقهاا خاطرهااا ممكن تكون كذبة منو كيف ماكذب عليااا قبل و خلاني نصدقو.. هزيت يدي و مسحت دموعي.. خذيت نفس نحكي
انا :" بابا وافق اني نخرج من هنااا ؟؟ متاكد من كلامك؟"
جاد:"اى متاكد..نهارين هاذم بش ترجع حرة من جديد "
انا :" و شنوة مقابل حريتي ؟"
عقد بحواجبو مستغرب يحكي
جاد :" شتقصد؟؟ "
تبسمت على جنب نحكي
انا :" بابا وافق اما اكيد فما شرط مش هكا.. مستحيل هو يقبل هكاكا "
جاد :" ماكنتش نتصور انك حافظة بوك لدرجة هاذي "
انا :" المشاهد قاعدة تتعاود قدامي دكتور.. موافقة بابا هاذي عشتهاا قبل.. لكلام الي سمعتو منك تو سمعتو زادة قبل.. قاعدة نلف ف نفس الدايرة سنين لدرجة اني صرت نتكهن اي تصرف و اي كلام "
جاد :" علاش قاعدة تحكي بالالغاز.. علاش قاعدة تحكي ف جمل ناقصة ومش مفهمومة.. صارحني جوري.. احكيلي شنوة صار بالضبط قبل.. شنوة لكلام الي سمعتو.. علاش مخليتني هكا معاك "
انا :" علاش تحبني نصارحك.. انت حكمت عليااا سايي.. قلت الي انا مخبية عليك و ممكن كاذبة.. يعني سكوتي و كلامي واحد.. يوصلو لنفس النتيجة .. يكفي انك خممت انك ممكن تندم على مساعدتي.. صدقني حتى الشي هذا انا مريت بيه قبل و صرت حاضرتلو حتى منك انك"
حسيت بيه كيف شدني من يدي وكبس علاهاا يحكي
جاد :" صدقني هذا بيدك انت.. انت الي قادرة تخليني نندم و قادرة لا .. مهما يكون ماضيك انا مستعد ننسى يكفي انك تصارحني "
جبدت يدي منو نحكي
انا :" و انا مانحبش نحكي.. و انت بش تحترم رغبتي دكتور.. تحب تساعدني هكا مرحباا.. ماتحبش ميسالش.. تعودت "
جاد :" باهي خليك هكا جوري.. و تو نشوفو لوين بش توصل بصحة راسك هاذي"
انا :" ماقتليش شنوة المقابل؟ "
ريتو كيف حك على جبينو وغزرلي درا كيفاه يحكي
جاد:" المقابل.. المقابل هو انك تبقى عاقلة "
هزيت بحاجبي نحكي
انا :" عاقلة ؟ شمعناها نبقى عاقلة ؟"
جاد :" يعني ماترجعش للماضي.. قال انو مايحبش دفاتر الماضي ترجع تتفتح من جديد "
هزيت حواجبي و طرشقت بالضحك على طلبو هذاا.. خاطر انا الوحيدة الي نعرف شنوة غايتو من هذاا..انا الوحيدة الي نعرفو شيقصد.. عمرو لا فكر فياا و لا بش يفكر..هو سكتني قبل و باقي يحب يسكتني تو.. سمعتو كيف يحكي
جاد :" علاش تضحك ؟"
عديت بيديا الزوز على وجهي وغزرتلو نحكي
انا :" خاطر الي صاير لكل يضحك..حياتي تضحك لدرجة لبكا.. هو قلك هكاا؟ يحب دفاتر الماضي تبقى مسكرة؟ مع الاسف القرار هذاا مش ملكو هووو"
حليت عينيا و هزيت صبعي ناشر على روحي نحكي
انا :" القرار هذا ملكي انااا .. سكوتي بش يكون برغبة مني انااا.. مهما بش يكون الثمن حتى على حساب حريتي هو مش بش يرجع يتحكم فيااا.. النهار الي نحب نحكي فيه صدقني بش نحكي من غير لا خوف و لا تردد.. و بخصوص مانبحثش ف الماضي.. قلو تحلم.. خمسة سنين و انا نستنى ف نهار خروجي.. بش نبحث و نلقى الي كان سبب ف موتهااا و موتي بالحياة معاهاا ونخليه يتحاسب على كل شي "
جاد :" ماتنجمش "
انا :" صدقني انجم "
جاد :" و انا مش بش نسمحلك تعمل هذا "
انا :" السبب؟"
جاد :" خاطر انا وعدتو إلي انت بش تخرج و تريض "
انا :" و كان مانوفيش بوعدك ؟ شنوة بش يصير ؟"
جاد :" هو بش يرجعك وين كنت "
تبسمت على جنب نحكي
انا :" بش يرجعني هنا؟ مايقلقنيش تعودت بالبلاصة.. هوما خمسة سنين هوما عشرة هوما عشرين عادي "
جاد :" لا هو مايقصدش هناا "
عقدت بحواجبي وعديت بعينيا عليه نحكي
انا :" مالا شيقصد ؟"
جاد :" هو يقصد السجن "
حسيت بدمعة سخونة هبطت على خدي.. ماتصورتش كرهو لياا كبير لدرجة هاذي.. هو اكثر حد يعرف انا شنووة عشت غادي.. بشنوة انا تعديت و حجم لعذاب الي ريتو و بقى مرافقني للوقت هذا.. كيما عرفتو شنوة يقصد اخر بالكلمة هاذي.. مفهوم اخر يجمع بيني انا و بابا كهوو.. هزيت يدي و مسحت دمعتي فيسع نحكي
انا :" باهي "
جاد :" باهي شنوة ؟"
انا :" باهي بش نسكت.. قلو انت ربحت.. كيف كل مرة سي سليم بنور.. و جوري خسرت كيف كل مرة زادة "
جاد :" شنوة سبب خوفك من السجن لدرجة هاذي ؟"
دورت وجهي لناحية لاخري هاربة من سوالو ومن عينيه إلي كانت مركزة معاياا نحكي
انا :" نحب نرتاح.. خليني وحدي "
جاد:" جوري ..  "
انا :" امان جاد.. نحب نبقى وحدي "
جاد :" باهي .. شوي وسارة تكون عندك.. ارقد وغدوة نكملو حديثناا فهمت ؟"
انا :" باهي "
غمضت عينيا على صوت الباب الي تسكر.. تسطحت عالفرش و تغطيت.. حليت عينيا على صوت الرعد و الريح لقوية الي هبت فجأة..  بقيت نغزر لشباك و سارحة ف صوت لمطر وقطراتهاا الي نازلين عالبلار.. العاصفة الي كانت البرا كنت عايشتها ف داخلي زادة.. و ماتخمد كان بخروجي من هناا.. وقتهاا بش نعمل المستحيل و نكشف كل شي و نرتاح مهما يكلفني الأمر.. غمضت عينيا على تصويرتهاا الي هدت علياا.. اول مرة من سنين طويلة مانخافش منهاا خاطر سايي نظن جاء الوقت الي لازمني نتقبل فيه كل مخاوفي ونواجهم زادة...