🗡🥀#رِيْبَة_جُورِي🥀🗡

حلقة 17

حلقة 17
#جوري_تحكي

حليت عينيا على صوت لمطر لقوية.. تلملمت بين الغطاء وهزيت روحي شوي وتقعدت.. طلعت يديا لميت شعري لتالي و تكيت براسي عالفرش.. غزرت لساعة نشوف ف الوقت.. استغربت كيف لقيتها قريب المغرب.. مش عارفة شنوة صايرلي الفترة هاذي.. مانيش منجمة نهز راسي من لمخدة.. وجيعة و نوم غير الفشلة الي ماكنتني.. تو نهارين عديتهم هكاا من وقت الي مشات علياا سارة.. نحكيو ساعات ف التاليفون اما بعدها حسيت بفراغ ووحدة ماعرفتش شنعمل و لا كيفاه نعدي نهاري.. حتى جاد من يوم الحفلة ماكلمنيش ماخسر علياا شي غير انو يتجنبني و يبعد.. خذيت نفس طويل وبعدت لغطاء من فوقي وقمت طول دخلت لسال دوبان.. حليت السبالة وخليت البانو يتملى وفرد وقت بقيت انحي في حوايجي.. سكرت السبالة ودخلت ف البانو تكيت راسي لتالي وغمضت عينياا بقيت نستحلى في الماء الدافي الي يلعب فوقي.. وين لقيت روحي سرحت ف برشة حكايات.. وجودي النهارين هاذم وحدي خلاني نحكي مع روحي اكثر و نسترجع برشة حاجات فاتو.. استرجعت ذكريات و تصاور وين خلاوني نزيد نضيع اكثر خصوصا ف الليلة هذيكاا و تفاصيلهاا الي مازالو غايبين علياا لغاية ليوم.. كل ما نحاول نتفكر شنوة صار وقتها نلقى روحي مش قادرة.. التصويرة مازالت ضبابة و الأصوات بعيدة و مشوشة.. حليت عينيا على وجيعة راسي الي هدت علياا من جديد.. طلعت يدي وكبست على رقبتي بالقوي.. خذيت نفس طويل وقمت خرجت من البانو.. لبست الكاب دوبان وقربت ناحية الرخامة هزيت المنشفة الصغيرة ورجعت للبيت.. قدمت ناحية الفرش قعدت وبقيت انشف ف شعري.. هزيت راسي شوي وغزرت للالبوم الي كان عالتابل دونوي.. نهارين كاملين  عديتهم و انا نتفرج ف التصاور.. تصورت اني منهم هوما انجم نتفكر حاجة تنجم تفيدني.. حطيت المنشفة على جنب ومديت يدي هزيت الالبوم.. طلعت عالفرش اكثر و حطيتو قدامي.. حليتو وبقيت نقلب ف التصاور نتفرج.. هذا اكبر ألبوم عندي يحمل كل ذكرياتي و كل إنسان مر ف حياتي.. قلبي ضرب بقوة اول ما لمحت التصويرة الي كانت على براا.. بقيت نغزرلها من بعيد حسيت روحي عاجزة بش نمد يدي و نهزهاا.. غمضت عينيا بالقوي و رجعت حليتهم.. ضميت على شفايفي بالقوي ومديت يدي ناحية التصويرة.. هزيتهاا وطلعتها قدامي اكثر.. بقيت نغزرلهاا كانت هاذي آخر تصويرة لياا ف ليلة هذيكاا.. غمضت عينيا بالقوي ورجعت حليتهم وين لقيت روحي غصت ف اليلة هذيكاا من جديد.....

#فلاش_باك
#قبل_خمسة_سنين
#ليلة_الحادثة
هزيت راسي شوي وغزرت لروحي ف المراياا عديت بقلم الروج ف شفايفي ورجعتو على كوافوز.. وخرت شوي وعديت بعينيا على وجهي و بدني الي كان مفصل ف الروبة الحمراء لقصيرة.. تبسمت على جنب وانا نشوف ف انعكاسي ف لمراياا.. فقت من شرودي على صوتها وراياا تحكي
فرح :" هيااا يا بنتي حضرتش؟ معادش وقت السهرية قريب تبدأ رااو "
غزرتلها من لمرايااا شفتها كيف كانت مسطحة على فرشي و تغزرلي.. هزيت بحاجبي نحكي
انا :" السهرية تبدأ وقت الي انا نحضر يا للا.. كانك نسيت الشي هذاا.. مفما شي يبدا و لا يكمل من غير جوري "
فرح :" انا مانسيتش.. اما انت ماتنساش لازمنا نمشيو بكري.. خاطر اكيد بوك بش يحكم علينا نرجعو بكري مدام للا اختك ماشية معاناا "
نفخت بالقوي و قلبت شفايفي نحكي
انا :" اففف بالله لا تفكرني.. نعرف من وراهاا بش ترصيلناا نروحو على بكري الليلة "
فرح :" جوري والله لا فهمتك.. ياخي مش انت صاحبة الفكرة.. انت اصريت تهزها معاناا قال شنوة نحتفلو بنجاحهاا ف الباك "
انا :" تي نعرف انا صاحبة الفكرة.. لمشكلة اني وعدتها و مانجمتش نخلف بوعدي.. هي عندها قداه تحاول فياا تحب تخرج معاناا و لقيت اليلة هاذي مناسبة "
فرح :" ميسالش جاتنا ف ليلة نحاولو نرجعو بكري وكهو"
هزيتلها براسي باهي نحكي
انا :" فرح امان ايجا اقفلي سلسلة الروبة من تالي "
فرح :" باهي "
هزيت شعري لفوق وين هي قامت ووقفت ورايااا وبقات تقفل فيهاا.. فرد وقت غزرتلي من لمراياا تحكي
فرح :" جوري بش نسالك حاجة "
انا :" اي قلي "
فرح :" تو بلحق ياسمين بش تسافر.. يعني بوك وافق ؟"
هزيتلها براسي لا نحكي
انا :" هآه.. مفماش منها لحكاية هاذي "
فرح :" كيفاه مفماااش ؟ انا قبيلا برك كنت حذا ياسمين ف بيتها وهي قتلي انها بش تسافر.. عم سليم وافق و بش يحضرلها وراقهاا و قاللها اختار الجامعة الي تحب علاهاا "
فردت شعري لتالي وتلفتت لفرح.. حطيت يدي على خدهاا وعديت بعينيا عليها نحكي
انا :" فروحتي ياروحي اغزرلي هناا.. كان انت تعرفني مليح.. و اذا انا نعرف روحي مليح.. ما اسميش جوري كان السفرة هاذي تتم.. ك نعرف شنعمل.. ياسمين مستحييل تسافر مستحيل.. على هذاكا مفماش منهااا "
فرح :" اما بوك قرر سايي ووافق "
تبسمت على جنب نحكي
انا :" ماتخافش انا نعرف كيفاه نمنعهم الزوز.. مستحيل كان نسمحلهم يبنبو سعادتهم على حسابي انا.. ك نعرف نطيح روح وحدة أخرى هناا "
غزرتلي درا كيفاش وهزتلي براسها باهي من غير حتى كلمة.. ضحكت نحكي
انا :" هياا خليناا ناخذو تصويرة قبل ما نخرجو "
خليتها واقفة وقربت ناحية التابل دونوي.. حليت الدرج و جبدت الكاميرا الفورية.. قربت ناحية فرح مرة اخرى.. ضحكت و قربتلي هي زادة عنقنا بعضنااا وغزرنا للكاميرا.. ضغظت على الزر و خذينا تصويرة.. تبسمت اول ما ريت التصويرة خرجت.. شديتها و حطيتها قدامهاا نحكي
انا :" شقولك تراه.. مش محلاناا ؟"
ضيقت عيناها فيا وضحكت تحكي
فرح :" عندك شك ف هذااا ؟"
ضحكتلهاا و بقيت نغزر لتصويرة.. قدمت فيسع حطيتها ف وسط الالبوم و خرجنا......
#باك_اند