جذاذ الارواح (ما بين حب وحب)

بارت16

جذاذ الاراواح (ما بين حب وحب)
لتنسون تسوون فوت للروايه وتعلقون بين فقره وفقره حتى تصعد الروايه

اتمنالكم قراءه ممتعه

بين طيات حياتي اقف في المنتصف

اجزاء مبعثره تقودني للجنون

اصبحت آلامي لاتحتمل

باتت كالسم تنهش بي

اقف بين مفترق الطريق اسال نفسي

الم يحن وقت عوتي الى سابق عهدي

الم يحن الوقت الذي انفض فيه الغبار من ذكرياتي......

فرح:احجيلي كل شي ليش انقطعت علاقتك بابوبه ..يعني بس اريد افهم ما حنيت ،ما اشتاقيتله على الاقل...هسه اني مو ام ما اكدر بدون بناتي ولا لحظه اموت من ما اشوفهن ولا تكلي ظروف اني هل هاي كدامك سويت المستحيل حتى ما اتخلى عن بناتي اجيتكم رغم اني قاطعه عهد على نفسي ما ادخللكم بيت

الجد: انطينه عطوه بويه ادري احنه قصرنه وياج وويه ابوج بس اسمعيني وادور احجي

قبل سنين ابوج جان توهه شواربه خطن وجان وكح وما يكعد يوميه اله سالفه وانه عايف شغلي وعملي ومحتار احل بمصايبه شكد ردته يتوب من سوالفه صاحبله جم واحد مشكلجيه ودومه جايني متعارك انه وامه طاحت وصله من السانه حتى يبطل سوالفه ما بطل ليش ما بيوم اجانه متعارك وهدومه مشككه ووجهه مزورك ومن اهدهه اتغير صار احسن شكد فرحنه انه وامه بوكتهه بس كل هذا ما طول

فرح:ليش شصار؟؟

الجد: الدنيا جانت نص الليل وكلنه نايمين انك الباب بوكتهه كلش قوي كمت مخروع فتحت الباب اثاري اهل صحبانه جايين ويتهمون ابني ببوكة بيتهم مو بيت لو بيتين لا خمس بيوت وكل بيت بايك منه شغله غاليه

فرح: وصدكتهم

الجد: بالاول لا ما صدكت لان ادري بابني وكح بس مال يسوي شغله حرام ويبوك ما صدكت بس من كالو ندور بغرفته ودورو ولكو الغراض ساعتهه صدكت ردت اطمطم السالفه بكل صوره ولان انه جبيرهم والي هيبتي بينهم قبلو بس بشرط يطلع من المحافظه كلهه وما يشوفونه ابد

فرح:وانته قبلت اكيد

الجد:جا شترديني اسوي لو ينسجن لو اعوفه يشرد وانه بوكتهه جنت كارهه لان ابني الضليت طول عمري اربيه واعلمه على الحرام والحلال هيج يسوي

فرح:وشصار بعدين

الجد:ناس كبرت وناس عرست وخلفت والدنيا دارت ليش ما بيوم صارت عركه كلش جبيره على اثرهه راحو ولد واحد بيناتهم ...تخبل بوكتهه صار يركض بالشوارع ويصرخ ويصيح انه الي كتلتهم ووره فتره اجاني وطاح على رجليه يتعذر وحجالي كل شي بوكتهه شكد اتحسفت ولجمني كلبي عليه ....شكد دورت عليه فريت الدنيا انه وولدي والعشيره كلهه لحد ما لكيت اسمه بس من لكيته طلع ميت الدنيا ظلمت بعيني بوكتهه والندم والحسره والملامه من امه واخوانه ذبحتني وما طولت امه شوي ورحت بيهه جناز