1980

Part 6

شفيق هُنا 🐙، بارت 6000 كلمة كالعادة طويل،
استمتعوا غيومي ولاتبخلوا بتعليقاتكم الحلوة ☁️.

.......

رفع سجاد عيونه ناحية باب الزنزانة متلهف لجية محمد مثل ما وعده باقي ينتظره طول الساعات الراحت، فدخل محمد اخيراً شايل وياه صينية اكل يقفل الباب وراه مندار لسجاد يلي كبرت ضحكته لدرجة بينت سنونه.

تدنى محمد لسجاد بالصينية يحطها بصفه على الچرباية يسمعه يحچي بنبرة ذايبة يشعر بيه • اجى معشوگ الگلب اجى، اجى گمري وبجيته ردلي ضوة عيني.• كبرت ضحكة محمد حاط عيونه بعيون سجاد بعدما عدل وگفته يسأله بنبرة متعجبة • من وين تجيب هالحجي؟..•

• الي مايخليه الحب يشعر بحبيبه لايسمي مشاعره هاي حب.• رد سجاد يلزم چف محمد يسحبه اله موگفه بين رجليه ينزل راسه لچفوفه بايس ظهرهن وگدرت شفايفه تحس برعشة خفيفة مشت بجسم محمد من تصرفاته يحس بالخجل والفراشات بداخله.

• مغلطت من گلت عليك مغازلـ..چي!.• تلكأ محمد بكلمته شوية يحاول ينطقها صح وهربت ضحكة زغيرة من سجاد يلي رفع عيونه اله يتأمل عيون محمد بهيام مهووس • هاي اني بس وياك هيچ، لتاخذ نظرة علية وعبالك ملعب ترة فقيرون اني.•

• اي اي كليش فقير.• فلتت ملامح سجاد على حچاية محمد يحط ايده على گلبه عاقچ ملامحه يدردم من هالكلمة السمعها • لا محمد لا بربك مو هيچ گلبي گام يوجعني والله شنو كليش؟!، تلفظ كلش مو كليش، هاي الحچاية جريمة بحق اللهجة العراقية!.• بملل باوع محمد لسجاد يشوف اخرة لطمه شوكت تخلص.

• خلصت؟ معليك بكلامي واكل يلة ترة هربت الصينية بصعوبة.• محمد اشر بعيونه للصينية يلي هربها بالگوة من باقي الاكل بوجبة العشة وجابها مدام الكل هسة مشغول بانه ياكل بقاعة الاكل، لانه ماراد سجاد يبقى بدون اكل وهو بعده جسمه مارجع لقوته الكاملة ومتأذي.

• خوما هربت الاكل همين للقندرة حيدر؟.• بشك سأل سجاد يغثه مجرد التفكير بهالفكرة فتچتف محمد مريح گلبه • لا كم مرة حگول اني ما انطي وجه لهالحثلگ.• ابتسم سجاد برضى يرفع حاجبه سأل محمد مرة ثانية • على هالحچي اني مو حثلگ بنظرك.• ابتسم محمد بدون مايجاوب سجاد يلي چانت بنظره تكفي ابتسامته انها تجاوبه على سؤاله.

• وكلني!.• طلب سجاد مميل راسه لمحمد ينطيه نظرات لطيفة حتى يوافق ورفع محمد حاجب يسأله • منين طلعت بهالدرب؟.• بلل سجاد شفته يتحجج بنبرة ناصية يلعب باصابع محمد يلي بين چفوفه • ايدي توجعني من ضربت هالحيوان فوكلني انتة مو خطية اني؟.•