ويا مرحبا ببارت طويل اخر،
8000 كلمة، لاتقصرون بحقه وبحقي گلبي💙.
جاهزون يا ابطال؟! لا اسمعكم؟!.
........
رجعت من الصفر خالي،
وحرت من ياوجع أبدي!..
ما تدري چنت انتة اخر طلقة،
يكتل روحه اذا يتحاصر الجندي!..
........
بنص الليل، وبغرفة مثنى تحديداً، چان نايم على چربايته مدخل راسه جوة المخدة يتنفس بسرعة، يحاول يكتم قهرته وضوجته مغمض عيونه بقوة لحتى مايبچي، وبكل هدوء انفتحت باب غرفته بدون حتى مايطلع صوت من فتحتها، يدخل فاقد بخطوات بطيئة ورد الباب وراه، مطلع من جوة ردان قمصلته الشتوية حبل رفيع مدني ناحية مثنى.
يسمع شهگة انهزمت منه واگف لثواني يباوع لظهره يتأكد انه مامنتبه اله، قبل مايرجع يتقربله دافع صدره بقوة وصعد فوگاه گاعد بثگل جسمه على ظهر مثنى، يشيل المخدة بحركة سريعة ومالحگ مثنى يستوعب الديصير ويقاومه، يدير وجهه ورأساً لف فاقد الحبل على رگبته عاصره عليه يخنگه، يعقچ مثنى ملامحه لازم الحبل يحاول يقاومه ينتر بيه • منو انتة..ولك گواد..وخر!!.•
گح مثنى بخنگة بس شد فاقد الحبل على رگبته اكثر يحاچيه بنبرة يابسة • عزرائيل وجاي اخذ روحك النگسة.• ضيگ مثنى عيونه يگز على سنونه ورفع ايده لفوگ راسه يلزم معصم ايد فاقد، يلويها بكل قوته يجبره يفلت الحبل عن رگبته قبل مايضربه بكوعه موگعه عن الچرباية، يگوم مثنى بسرعة راكض للباب ولحگه فاقد گايم وراه مانعه يطلع يعته من قمصلته راجع يلف الحبل على رگبته يضحك بحقارة • والله خوش تدريباتك العسكرية مو هينة بس لتحاول تنهزم اليوم انكتبلك تشوف ربك!.•
رفس مثنى برجليه يحاول يملص روحه من ايدين فاقد، يلي طبگ الباب بنوع من القوة بأيده الثانية، يبلل شفته مباوعلها رايد يقفلها بالمفتاح، ومرة ثانية استغل مثنى غفلته عنه يرجع راسه ليورة ضارب وجه فاقد براسه بكل قوته • اهخ!.• ون فاقد بنبرة خشنة يهد الحبل من رگبة مثنى مغطي وجهه وخشمه بچفه، يباوعله بنظرات حادة ومثنى بسرعة اندار ناطيه بوكسي ثاني خلى توازنه يختل.
وقبل مايضربه مرة ثالثة فاقد لزم ايد مثنى يلويها لظهره بقوة يعت شعره بچفه الثانية ضارب راسه بالحايط، واول ما وگع مثنى بالگاع فاقد اعتلاه محاول يسيطر عليه ويخگنه بس مثنى ورغم كل الدوخة والوجع براسه، كمل يقاومه يرفس برجليه بقوة لازم ايدين فاقد ينتفض جسمه محاول يحر هوة من خنگ فاقد اله، وگدر بعد ثواني من المقاومة انه يدفر فاقد عنه گايم بصعوبة لاهث بتعب لچربايته، يگوم فاقد نافخ بمغثة من مقاومته الهواية وتعطيله بكتله.
YOU ARE READING
1980
Romanceحِبني ماضل وكت هذا الوطن بي حرب . مثلية عراقية +18، عامية، تحتوي الفاظ جريئة وصريحة عامياً، مشاهد حربية ومشاهد تعنيف.
