1980

Part 36

اعتذر للتأخير جنت اعاني فقدان شغف،
وصار صعب كلش اكمل كتابة هالبارت،
طول البارت 15,000 كلمة،
الشروط 750 فوت + 4,500 كومنت،
اي غلطة عبروها.

........

احس الروح ماتسوة اذا ماوياها روحك،
احس الدنيا كلها ماتسوة عگب عيونك،
لاتهدني عمري كله مايسوة بدونك!..

........

سليمانية - شمال العراق / الساعة بالخمسة العصر.

تسطر رتل المصفحات التابعة للجيش العراقي گدام المقر، مخلصين اخيراً قتالاتهم وية القوات الايرانية محرزين تقدم چبير وايجابي بتحرير حلبچة، ينزلون بتعب من المصفحات يريدون بس يرتاحون بس وگفهم مسؤل المقر مرتجى لما مد ايده گدامهم متصنمين بمكانهم بصدمة لما شافوا جثث الجنود الاثنين بباب المقر.

• حضروا سلاحكم وانتبهوا يمكن المقر مقتحم!.• بانفعال امرهم مرتجى رافع رشاشته والكل شحن ذخيرته رافعين اسلحتهم متقدمين ناحية باب المقر بحذر ومن ضمنهم ناڤيد، يلي انقبض گلبه ومچان فاهم شصاير هنا لان لو اكو هجوم ايراني چان عرف وهو يلي يدبر خطة تنفيذه بحكم كونه جاسوسهم، يدفر ناڤيد وجندي ثاني باب المقر برجليهم فاتحيها على وسعها ومحد بيهم شاف اللغم بالگاع توگع عيونهم بس على منظر جثث الجنود المكتولين والطاقم الطبي المطشرة بالممر.

وسع ناڤيد عيونه علكبرها واول شي اجى بباله يسويه هو انه يشوف عدنان وينه، رايد يطب باندفاع ليجوة لوما مرتجى لزم زنده بحدة هو والجندي الثاني مانعهم • اوگفوا اكو لغم!.• حچى بنبرة يابسة ينبه على اللغم لايدوسون فوگاه وينفجر عليهم وناڤيد مانطى ردة فعل كل تفكيره هسة بعدنان وينه يطب ليجوة بسرعة عابر اللغم يصيح بصوت قلقان • عدنان!!.• طب ناڤيد قبلهم وهمة لحگوه يفتشون بالجثث بس هو سبقهم رأساً لجثث الدكاترة والممرضين مدام سهل عليه يميزهم من ملابسهم

يگنبس بالگاع محرك جثثهم وتجمد جسمه بشوفته الكل ميت حتى أياز بس عدنان ومؤيد ماكو بيناتهم، يباوع ناحية الدرج وباستعجال راح صعده عايف بقية الجنود وكل كلامهم وية مرتجى او حتى نداءه باسمه • عدنان!!!.• صاح ناڤيد بالطابق الثاني متسارعة دگات گلبه وراح يقتحهم كل الغرف والمكاتب بالطابق الثاني يركض للعيادة فاتح الباب بحدة • عدنان وينك!.• حچى بقلق سيطر على گلبه وخلى دگات گلبه تتسارع راجع يصعد للطابق الثالث والرابع وين غرف النوم .

فتش ناڤيد بغرفته وبباقي الغرف كلهن لحدما يائس من انه يلگاه چان متأمل يكون خاتل بس حتى يحمي نفسه بس هسة مدام جثته ماكو معناها انخطف بهالاقتحام • لا لا عدنان ماتگدر تختفي هيچ خرابيكم خرابيومكم ولد الگحاب!!.• سب ناڤيد بعصبية يضرب الحايط بقوة بچفوفه قبل مايرجع يجر شعره يلهث بعصبية وانفعال الف فكرة وفكرة تمر بباله عن حاله ووضعه تلخوف ياكل بگلبه من فكرة انه يصيرله شي لو احد يأذيه • لازم الگاه بسرعة لازم اخلصه..• تحلف بحرگة اعصاب يطلع من الغرفة راجع ينزل باستعجال للطابق الاول.