1980

Part 22

بارت طويل ودسم 10000 كلمة،
اعوف حقه وحقي بذمتكم وضميركم 😂.

وشسمة اكو بنات اثنين سالوني مو حسين مكتوب
عراقي بالمقدمة وضيعت تعليقهن بيا بارت، شسمة
ترة هاي تمويه عمود اقشمركم بيه وتنصدمون بانه
جاسوس وايراني يعني لا تأمنون بكلامي اني🥸😂.

المهم استمتعوا عيوني،
وحبابين مثل ماوصيتكم
لحد يحرق بالمنصة وشكراً💙.

.......

واني شمضيعني..
غير عيونك الكاتلتني؟،
واني شمتعبني؟..
غير ظنوني اذا باچر عفتني!،
يمي انتة وماتهنيت بوجودك..
خفت لاتنباگ مني!.

.......

وزارة الداخلية - بغداد.

بس طلع عقاب من بيت اهله راح بطريقه مباشرةً لوزارة الداخلية طابگ المصفحة گدام رصيفها، ينطي باجه للحراس حتى يدخلونه واستعجل بخطواته وهو يعرف شون يلگى علي بيا سجن محبوس بطريقته، لأن هالكلمة يلي حچاها ولي الله بسهوة منه چانت كافية لحتى يفتهم هو وين محتجزه كأسير، وبدل مايتعب نفسه ويتعارك وياه ويضيع وكت اختصر المشوار على روحه، لان يعرف ابوه مراح يحچي علي بيا سجن.

وبس دخل للوزارة كمل طريقه بطبيعية يسلم على الموظفين المرو بيه، يمشي لحدما وصل لدگمة انذار الطوارئ المتعلگة بالحايط يسحب سلاحه وقبل مايجي موظفين ثانين يشوفونه، هو كسر الگزاز الحامي الها يدوسها مخلي جرس الانذار يدگ بكل مبنى الوزارة، يضم سلاحه بلحظة طلعة موظفين من مكاتبهم يسأله واحد منهم بقلق • هاي شكو شصاير! علشنو الانذار دگ؟!.•

• المبنى ديتحرگ!، بسرعة فرغوا المكان اطلعوا يلة بساع!، ولاتخلون احد يبقى نبهوا الكل يطلع!.• بانفعال حچى عقاب مچذب عليهم يوهمهم بسالفة الحريق ولأن هالحوادث ورادة وشاهديها سابقاً، الكل تحرك بسرعة منسحب لحتى يطلع وسحب عقاب نفسه رأساً من بين هوستهم، داير جسمه يكمل طريقه بممرات الوزارة ووجهته هي وحدة قاصد المخزن بطريقه، لان يعرف بكل وزارة يضمون كل الاوراق والبيانات المهمة بغرفة المخزن، وهو جاي حتى يدور قائمة اسامي الاسرى الايرانيين بسجون بغداد تحديداً.

يوگف عقاب گدام غرفة المخزن لازم اليدة محاول يفتحها بس چان مقفولة، ومايگدر هسة يرجع يدور مفتاحها يجر نفس ثگيل بادي يضربها بصفحة جسمه بقوة اكثر من مرة، ورجع دفر يدتها برجله تلث مرات لحدما گدر يفتحها دافع الباب يدخل، وسدها وراه جار وحدة من المكتبات عليها حتى لحد يدخل، يندار وراه يروح لباقي المكتبات المترتبة بالغرفة يدور بين الصناديگ الكارتون المحطوطة واسماءها.