1980

Part 33

شونكم غيومي الحلوة؟، طبعا تعويض
الكم خليته بارت طويل 12,000 كلمة،
الشروط نفسها 500 فوت + 3,000 كومنت،
غلسوا على علساتي واستمتعوا.

شباب ترة مبديهياً ان الابطال يكونون غاسلين خوش؟،
مادري ليش متخيلين ان كاتلهم الوصخ ترة يسبحون
حتى لو بالنهر حتى لو حرب، واني هالشي ماذكره
او اسرده بشكل واضح لان هو مو مهم وكت الحاجة
اكتب هيج مشاهد خوما كل بارت اكتبلكم همة
سبحوا لو لا؟، يعني هاي شغلات مبديهية
اخليها لعقلكم انتوا تتخيلوها مو معناها
الشخصيات كاتلها الوصخ 😂.

........

الحب مثل الحرب..
سهل تبدي بيه..
بس صعب تنهيه..
ونسيانه مُستحيل..
الحب مثل الحرب..
ينفني عمرك بيه..
وترجع منه بلاية روح!..

........

قبل تلث ايام.

فتح ولي الله عيونه علكبرها وفلت المسدس من ايده يوگع بالگاع لافظ اسمه • عقاب!..• عگد عقاب حواجبه بقوة يگز على سنونه حيل يلزم بطنه بچفه مغطي مكان الطلقتين بادي الدم يتسرب منه ويلطخ ايده بشكل غزير كلش تنصب منه قطرات بالگاع بين رجليهم وبدت تتزايد يغمض عيونه وهد ثگل جسمه على ولي الله يلي سنده رأساً بثنين ايديه يضبهن على جسمه وظهره شابگه بكل قوته يحچي بصوت مبحوح ونبرة مهزوزة • ابني عقاب!..•

انقبض گلب ولي الله مامستوعب انه تصاوب بالمسدس يحاول يبقى سانده يبلع عقاب ريگه متنفس بثگل وزاد نزيفه من بطنه يحس بدم داخل حلگه يدير وجهه عن ولي الله تافله بالگاع سامع صوت علي يلفظ اسمه بنبرة مبحوحة ملتهبة عيونه مثل الجمر عليه • عقاب!..• حاول يتقرب عليه برجفة سيطرت على جسمه يهمس لولي الله بتگطع • طلـ..عه مـ..منا لا..تخلـ..يه يشو..فني هِـ..هيـ..چ..•

رمش عقاب بخمول سيطر على جفونه تخدر رجليه واگع بالگاع وحتى ولي الله ماگدر يسند ثگل جسمه، ينهد حيله وياه وكل قوته تبخرت وهو يشوفه بهالحالة من وراه يگح بوجع وأذية تافل بعد دم، يگعد علي يمه بخوف يضغط بسرعة على مكان الطلق متلطخ ايديه بالدم يحاچيه بهلع • عقاب لاتموت..ارجوك تحمل..ابقى وياية عقاب ابقى مستيقظاً ارجوك!..• دمعت عيونه وهو يتوسل بيه يخربط بالكلام بين العراقي والفارسي من خوفه هسة متسارعة انفاسه يباوع لكمية الدم المتسرب من بين ايديه ماديوگف ابد وتشوش سمع عقاب مايوصله صوت علي مفميض عيونه.