1980

Part 39

يامساء الخير اعذروني لو صار شوية تاخير،
البارت طويل 17,000 كلمة استمتعوا بيه،
الشروط 750 ڤوت + 4,500 كومنت،
اي علسة غلسوا عليها حبابين 🤣،
هذا البارت هدية لعروستنا الغالية ليفة 💙.

........

حرت مدري شوصفك نعم الله كلهن بيك..
امان الدنيا كلها ملتم بحضن چفك..
شلي بعيوني.. يابعد عيوني
اذا مو بيها اضمك؟..،
خليني اصير صريح وياك،
انة اخاف من الامان الماهو يمك!.

........

الوكت الحالي - بغداد : وزارة الدفاع / ساعة بالسبعة.

چان ستار گاعد بغرفة الاحتجاز تعبان لا ماكل ولا نايم ولا شارب گطرة مي وجهه مصفر اساساً وديقاوم حتى يبقى صاحي وواعي، مكلبچين ايديه الاثنين سوية وصارله ساعات من وصل لبغداد ودخلوه الجنود لهنا، طبعاً تحققوا من هويته لانه عنده معارف بالوزارة اولهم مصطفى صديقه هو وعقاب، وسجلاته موجودة بس بعد لازم يحطونه تحت التحقيق بعد اكثر حتى يعرفون شون هرب واذا چان خاينهم لولا، بس ستار ماقبل يخضع للتحقيق غير لما يجي ولي الله وطلب من مصطفى يستدعيه عموده.

يغمض ستار عيونه راسه يوجعه وماگادر يبقى صاحي يريد بس ينام شوية لوما فتحة الباب يلي جفلته من غفوته الي ماطولت حتى ثواني، يرفع راسه لولي الله الدخل باستعجال للغرفة واول ماشافه ستار لفظ اسمه بنبرة ثخينة مبحوحة • عمي ولي الله..• ماجاوبه ولي الله يدنى ناحيته بسرعة وتفاجئ ستار فاتح عيونه علكبرها لما شبگه ولي الله بقوة وهو گاعد على الكرسي، يرمش مامستوعب هالشي لان هاي چانت المرة الاولى يشبگه ولي الله لدرجة انه خربط دگات گلبه بهالتصرف المامتوقعه ابد.

• نعلعلا يومك لك حيوان تدري شگد خفت عليك؟!!، شسويت بروحك يالاثول؟!!.• سبه ولي الله مرزله بنبرة چانت مليانة قلق رغم حدتها وقشعر جسم ستار يلي رفع راسه سأله بحيرة مامستوعب الوضع • عمي شنو احد ضاربك على راسك؟!..لو اني داهلوس چيف نعسان؟..• گز ولي على سنونه دامغ راسه لستار يرزله • شتوقع من مطي مثلك همداك وامدة شكولك ياسرسري فوگ ماخفت عليك وعايف كل الهوسة بالبصرة عمودك!!.•

• اي مو انتة ماتخاف علية..ماتحبني اساساً؟..• سأل ستار مصدوم بهالتغير هذا لانه ولي الله مافديوم گال كلمة حلوة بوجهه وچان الوحيد يلي يخاف منه ستار، يتنهد ولي الله بثگل مجاوبه • منو گال اني اكرهك يالاثول؟.. انتة كبران گبال عيوني ووية جهالي احسبك بحساب ابني الثالث الماخلفته وانتة ابن كلش غثيث للصدگ علة على گلبي!.• بلع ستار مرارة ريگه لهالكلام يلي چان غريب هواية على گلبه بس دافي حيل لدرجة انه خلى عيونه تحمر اكثر متأثر بيه يشكره بنبرة ثخينة • مشكور عمي..•