كُن بقربي فإن الروح هائمة

1

ملاحظه :صارت مشكلة بالواتباد وحذفت جميع البارتات والحين رح أرجع أنزلها من أول وجديد ،أن شاء الله ما تتكرر ذيك المشكله لكن لو تكررت هذا حسابي إنستا رح أبلغكم فيه لو صار شي (7hid1)💗

لمحةٌ من الماضي ...
يدور في ممر المستشفى بذعر وينتظر خبر حياته ،سيذوق الأبوة أخيرًا ويذوق بعض زينة الحياة الدنيا، خرجت الطبيبه متجهمة الوجه لكنه لم ينتبه لذلك وقال:بشري؟
الطبيبه :الحمدلله الطفله بأتم صحه ...
قاطعها بسعاده :بنت ؟
الطبيبه :اي
عبدالعزيز :الحمدلله
الطبيبه :لكن ...
انتبه لملامحها :وش؟
الطبيبه :الام ...
بلع ريقه :شفيها ؟
الطبيبه : قدر الله انها تعطي عمرها لبنتها
عبدالعزيز :كيف وش جاها ؟
الطبيبه :نزيف حاد وما قدرنا نوقفه
عبدالعزيز :وما قدرتوا توقفوا النزيف وتهتمون فيها ؟
الطبيبه :كان المفروض نختار بين الام وبنتها ،وهي اختارت انه نعطي جهودنا لبنتها
عبدالعزيز بحده:اهمال من ذا المستشفى ،ما عندكم تعقيم ولا نظافه ولا حتى سمحتوا لي ادخل معاها واهتم فيها
بلع ريقه واكمل بغصه :واشوفها لأخر مره
الطبيبه :لو سمحت لا تربط قضاء الله وقدره بذي المواضيع ،زوجتك هي اختارت ذا الشي وقالت بالحرف الواحد عطوا عمري لبنتي
لم تحمله قدماه من الحزن فجلس ارضًا يقاوم دموعه :يا الله يارب
الطبيبه :لو تبي تشوف بنت...
قاطعها:ابي اشوف زوجتي
الطبيبه :طيب قوم معاي اول شي نشوف البنت بعدين زوجتك
قام خلفها ودخل الغرفه حيث طفلته تنام ببراءه دون أن تعلم أنها وليدة حزن،حملها بين يديه وشم رائحتها :امك عطتك عمرها ...وانا بعطيك حبي لها
امسكت اصبعه بيدها الصغيره فنظر لها وابتسم رغم حزنه:بسميك هيام ،من هيامي فيها
...
الأحد٢٧ نوفمبر ٢٠٢٢
خرجت من المكتب بوقت متأخر ،هي غاضبه لكن ليس بسبب ذلك فهي تحب العمل /تفرغ حزنها فيه ،تلك الجميله تغضب بسبب قطرات المطر ليست كافرةً ولا ملحده ،لكنها تكره المطر ولها قصه معه . وقفت عند الاشاره تضغط زر العبور بسرعه وكأنه سينقذها من ماء السماء والذكرايات الهاطله معه .أخضّرت الاشاره فتنهدت ،قريبًا سينتهي ذلك العذاب وسترتاح من اكبر مخاوفها ،نزلت للعبور فرأت سياره تقترب منها ...تلك الذكرايات ...رائحه المطر ...صوت ابواق السيارات ومكابحها ...والاعلى منه صوت الصراخ ،جلست بالارض تصرخ:لالالا لا
توقف باللحظه الاخيره ونزل يحادثها بلهجه المانيه بحته :هل انتِ بخير ؟
رغم سنينها الطوال بميونخ الا أنها نسيت اللغه :ايش؟
أعاد جملته بالانجليزيه لعلها تفهمه :اقول هل انتِ بخير ؟
اقترب رجلٌ ذو معطف أسود طويل ،امسك كتفها وساعدها على النهوض وهو يطمئن السائق بالالمانيه :لا تقلق إنها معي ،ستكون بخير
سندت رأسها على كتفه وأغمضت عينيها ،لا أحد يلومها ففي لحظات الخوف نسند روؤسنا على أي شيء ،ولو كان شخصًا يكون أفضل
أجلسها على الكرسي ومد لها علبه الماء فشربت :شكرًا
وقف بجانبها كأنه حارس لها ونظره معلق بتلك الشوارع المبتله،رد عليها بالالمانيه:العفو
أمسكت رأسها :كيف فهمتني وانا اتكلم عربي ؟
:فهمت وبس
نظرت لعلبه الماء :فيها شي صح ؟
:مويا عاديه وانتِ فتحتيها بيدك
نظرت لوجهه :انتم الي تلاحقوني لكم ايام؟
قامت بغضب ودفعته :خلاص اتركوني خلاص
امسكها من كتفها ونظر لوجهها :اششش
همست ببكاء :تعبت من كل شي أبعد خلاص
تركها:مستحيل اضرك بشي
هيام :وكيف اوثق فيك ؟ وش دراني انك مو حاط شي بالمويا وبطيح هنا ولا هناك ؟
:لا توثقين فيني بس اوثقي ببندر آل محسن
تصلبت من ذكر ذلك الاسم ،كل تفاصيل الحادثه تعاد حتى الاسماء المذكوره بها
لف ظهره :الحقيني
دون صواب منها لحقته ،لا شيء أمام عينها سوى هذا الاسم (بندر آل محسن) ...
...
صباح ذلك اليوم في عاصمتنا الجميله ،وفي مكتب ذلك الرجل الصارم دارت أول الأحداث
دق الباب :تفضل
دخل :السلام عليكم
صقر:وعليكم السلام ،اتمنى ان اخبارك مو زي دايم
غيث :لا ابشرك ذي المره لقيناها ،عايشه بميونخ وتشتغل بشركه توصيل براتب الفين يورو ما يعادل تقريبًا سبعه الاف وثمان ميه ريال سعودي
صقر:اعتقد ما طلبتك تحول لي العملات،راقبوها اكثر
غيث:ابشر
صقر:تقدر تتفضل
غيث :بس...
تنهد :تعرف اني ما أحب بس وش فيه ؟
غيث:انت قلت اذا لقيتوها احجزوا لي على المكان الي هي فيه اقرب رحله
تنهد :الساعه كم حجزت ؟
غيث :اثنين الظهر ،بعد الدوام
فتح حاسوبه بعدم مبالاه :الغوا الحجز وخلوه سبعه المغرب
غيث :ابشر
صقر :غيث
عاد خطواته :هلا
صقر :احجز تذكره على حفل ذاك المغني الي تحبه جوانا نسيت اسمه ...
غيث :عبدالعزيز المعنى؟
صقر :غيث بفهم شي واحد بس ليش تحب تتدخل بأشياء مو شغلك ؟ ليه تحب تستبق الاحداث ؟ يمكن كنت بقول محمد عبده ولا طلال المداح
غيث :طلال المداح متوفي
صقر بغضب :اطلع واحجز على عبدالعزيز المعنى
غيث :ابشر
خرج اخيرًا من المكتب /غرفه العذاب النفسي ،وتنهد براحه
ابتسم أوس بسخريه:واضح كنت عند صقر
غيث :خلها على الله بس
أوس :الحين معصب ؟
غيث:ولو كان معصب معاملتك عنده غير
أوس :تراه طيب بس اعصابه شوي مشدوده
غيث:أعرفه زين أنا معليك ،شعرك بس اربطه وامورك بالسليم
ربط شعره :لو ما ذكرتني كان الحين حلقه لي
فتح باب المكتب ودخل :غيث كم مره قلت لك...
أوس :ما تحس نفسك شادها شوي معاه ؟
صقر :لازم الحزم مع الموظفين
أوس :الحزم والاحترام وبعدين غيث مو أي موظف
صقر:طيب اخلص علي وش تبي؟
أوس :بغيت أقول لك أن جوانا زعلانه مره
صقر :تزعل ولا تطق راسها بالجدار اصرف فلوسي بحفل اغاني لا
أوس :ترا أبوي موصيك عليها خصيصًا تروح تزعلها بأبسط سبب؟
صقر :وترا أبوي مدلعها خلها شوي تتعلم الحياه
أوس :بس أنت زعلتها يعني خالفت وصيه ابوك
صقر :تزعل منا ولا تزعل من غيرنا
أوس وهو خارج:ولله ما يفيد معاك الكلام
صقر :لقيتها
أوس :مين ؟
صقر :البنت
عاد اليه وجلس :هيام ؟
صقر :اجل ؟
أوس :طيب ليه ما تجيبها ؟
صقر :عندي شغل الحين الساعه سبعه عندي رحله بروح لها
أوس :ترا ذي وصيه أبوي العظمى مات وهو ينادي أسمها لو عاملتها بأسلوب الزفت ذا ما يعتبر أنك طبقت ولا حرف من وصيه ابوي
صقر :طيب خلاص أبشر ،بس أمي وجدتي أياني وياك يدرون ولا حتى عمتي ولا احد بس انا وياك وثنيان وغيث
أوس :الحين وش مشكلتهم معاها ؟
صقر :دلع حريم
أوس :لو تسمعك ملاذ شنقتك
صقر :فكني منها ذا النسويه بعد
أوس :صقر ابي افهم ليش أنت رسمي بزياده حتى مع أمك وخواتك
صقر :ذي شخصيتي وش عليك فيها ؟
أوس :ما علي فيها شي بس خلك حنون معاهم خواتك ذولي اذا ما لقيوا منك الحنان من وين ياخذونه ؟
صقر :أنت وأخوك ما تقصرون بالحنان
أوس :طيب انت يرضيك كونك دائمًا خارج أطار العائله الا بالمناسبات الرسميه ؟
صقر :على طاري المناسبات الرسميه اجتماع اليوم لازم تحضر
أوس :صقر قلت لك مليون مره الشركه مابي منها شي خذها كلها لك
صقر :أبوي وصى انا وياك و ثنيان فيها مارح تهرب من مسؤوليتك وتروح لذيك الشخابيط الي ما توكلك عيش
تنهد بغضب :خلاص الشركه معلينا فيها انا معاك بس اهتماماتي خلها معد باقي الا هي تكفى لا تتدخل فيها
صرخ من خلفه :بتدخل فيها لو كانت تلهيك عن شغلك
...
ثنيان :انا طالع تبين شي؟
رتيل :تعال
ثنيان :وش؟
البسته خاتمه :ست سنوات لنا متزوجين وكل يوم تنساه لازم اذكرك فيه يعني؟
جلس وقبل يدها:مو لازم البسه وانا أعرف انك زوجتي واحبك صح؟
رتيل:الا لأنك معرض للشهره والصحافه والكميرات بأي وقت ما اظن تبيهم يطلعون اشاعات ان بيننا مشاكل
حضنها :ما يهمني الي يقولونه وانا اعرف أن كل الي بيننا موده وحب
رتيل بحزن :بس لو بيننا طفل
ابتعد عنها وأمسك يديها :تكلمنا من قبل اذا كان مكتوب لنا فهو خير وبركه واذا كان مو مكتوب خلاص تقدير من الله ونعيش عشان بعض
رتيل :بس لازم نحاول
مسح على خدها :اكيد بنحاول ونجرب كل مستشفيات العالم لو تطلب الامر بس زعلك ما ابيه
اخذت نفسًا عميقًا :يمكن فكره جدتك احسن
ثنيان :اي فكره ؟
رتيل :تتز...
قاطعها وهو يحضنها :انا مالي الا زوجه وهي انتِ ،وتونا بأول العمر
بكت في حضنه دون مقدمات :اخاف
شد عليها :انا معاك من ايش تخافين وانا معاك؟
ابتعدت عنه ومسحت دموعها :خلاص بس روح الدوام لا تتأخر
اخرج هاتفه وهو ينظر لعينيها : صقر ،مارح اداوم اليوم
صقر :ليه؟
مسح دموعها :مشغول
صقر :اهم من شغلنا ؟ لا
ثنيان :بالنسبه لي اهم وانت تعرف وش اقصد
صقر بغضب :انتوا مهملين ،مدري ليش انت الاخو الكبير وانت بذا الاهمال اقول لكم لازم تداو...
اغلق بوجهه :انا اليوم معاك مارح اروح مكان
رتيل :عصبت اخوك عشاني؟
ثنيان :يعصب لين ينفجر بالأخير هو الي بينرفع ضغطه اذا شيب وبياكل رز بدون ملح مو انا
رتيل:ما ابي اصير سبب مشاكل بينكم
ثنيان :اي مشاكل ياروحي ؟ هذا صقر تعرفينه من ست سنوات وانا اعرفه من يوم ولد عصبي ومغرور محد يتحمله الا امي وجدتي،الحين معليك منه قولي لي من ايش تخافين
بدأت تلعب بيديها كنايةً عن التوتر :اخاف اني ما اعطيك الي تبيه
ثنيان :وش ابي منك غير الحب ؟
مسحت دموعها :ما تبي ثمره حب؟
ثنيان :ابي بس مو شي ضروري
رتيل :كيف مو ضروري ثنيان ؟
ثنيان :رتيل ركزي معاي الحين وش اولوياتي؟
رتيل :وش
ثنيان :واحد رتيل تكون بخير وهذا يشمل الناحيه النفسيه اثنين امي وخواتي ثلاثه الشغل واربعه واخر شي صقر وجدتي هم اخر ناس اهتم لكلامهم
رتيل :يعني ما تبي عيال ؟
ضحك ثنيان :وش مفطره اليوم ؟
رتيل :فطرنا مع بعض انا وياك
ثنيان :متأكد انه من المربى
رتيل :الحين قول لي تبي عيال ؟
اتكئ على يده وقرب رأسه من كتفها فأصبح كأنه يسنده عليه:ابي بس مو ضروري يعني اذا جو ابيهم واذا ما جو ما ابيهم خلاص
رتيل :طيب انا ابي اذا انت ما تبي انا ابي اصير ام
ثنيان :طيب بنحاول تبين نطلع للخارج نشوف؟
رتيل :مدري
امسك شعرها:الا نطلع تراجعين وانا اخذ اجازه من صراخ صقر وازعاج جدتي
رتيل :الحين ليه رغم ان الله مغنينا عايشين بنفس البيت ؟ يعني ليت احنا وامك واخوانك بس حتى عمك وعياله بنفس البيت مو طبيعي
ابتسم ثنيان :ذي رتيلي الي اعرفها
رتيل :صدق جاوب على سؤالي صار لي سنوات افكر
قلد صوت جدته:ابي عيالي عندي اتطمن عليهم من قريب
تنحنحت رتيل وابعدته عن كتفها
ثنيان :وش؟
رتيل :شلونك يا جده ؟
اتسعت عيناه واستعدل بجلسته :جدتي
الجده وضحه :قم شغلك لا تنساه
ثنيان :ما بداوم اليوم
الجده وضحه :وراه؟
تحسس جبين رتيل :رتيل تعبانه بجلس عندها
الجده وضحه :ولله ما ظنتي تعبانه يوم انك تنام بحضنها ماهي تعبانه
ثنيان :قاعدين نتناقش بموضوع مهم
الجده وضحه :المواضيع المهمه تتناقشونها معاي ولا ؟
ثنيان :الا معاك يا جده بس كنت اقول لها وش رايك نروح نكلم جدتي اننا بنروح الخارج نجرب المستشفيات هناك يمكن احسن قالت اي عادي بس يمكن جدتي حبيبتي نايمه الحين تزعجها قلت لها رتيل عيوني وقلبي وحياتي جدتي تصحى من الفجر مع الاذان حياتها صحيه
الجده وضحه :اعتقد ما طلبتك تعبير عربي
كتمت رتيل ضحكتها
ثنيان :طيب وش رايك بالموضوع ؟
الجده وضحه :حلو ،جربوا بالخارج وان ما نفع خذوا بشوري العمر قصير
ثنيان :شورك اخر ما ناخذ به
نظرت له بحده
توتر ثنيان :يعني بذا الموضوع انا انسان ما اقدر اعدل بين زوجتين قلبي كله عند رتيلي ولا باقي المواضيع رأي جدتي اول شي قبل رأيي حتى صح رتيل؟
رتيل :اي اي
الجده وضحه وهي خارجه :اختك اليوم عندها موعد تقويم ودها
ثنيان :ان شاء الله
خرجت فتنهد براحه وفتح ازرار ثوبه :انا مدري وش حظي الزفت ذا كل ما اقلدها تطلع وراي
ضحكت رتيل :تسوي لها استدعاء
ضحك ثنيان :عشان كذا تزوجتك تضحكيني
رتيل :انت كذاب كل ما سويت شي قلت عشان كذا تزوجتك
ثنيان :لأني احبك تزوجتك
رتيل :بعد كذاب زواجنا تقليدي
ثنيان :بس حبيتك يوم شفتك بالخطوبه
رتيل :الحين قلت لجدتك اننا بنسافر لازم صدق نسافر
ثنيان :واحنا كنا صدق نتكلم ما نمزح
رتيل بسخريه :نشوف رأي صقر بالموضوع يشوفه مزح ولا حقيقه
ثنيان :يعصب يومين وبعدين نرجع ونزوجه وينسى شي اسمه عصبيه
رتيل :عشان تشنق بنت الناس نفسها
ثنيان :لو فيه منك ثنتين كان خذتك لي وهو اخذ الثانيه تهجده
رتيل :ليه كنت زيه قبل الزواج؟
ثنيان :لا
رتيل :خلاص هو غير طول عمره عصبي مستحيل تأثر فيه بنت
ثنيان :الا ولله الجنس الاخر له تأثير بالشخصيه
رتيل :دليل
ثنيان :انا قدامك دليل كنت غبي وتزوجتك صرت ذكي
ابتسمت رتيل وامسكت وجهه :للأسف انت باقي غبي بس لما تكون معاي ما ابين لك ذا الشي
ثنيان :لا صدق مستواي بالتفكير تحسن
رتيل بضحك:يلا ورانا عمر طويل بيتحسن ان شاء الله
ثنيان :بيتحسن وبتشوفين بصير اذكى منك
في جناح اخر من ذلك القصر
صقر :يمه عيالك ذولي امسكيني عنهم لأني بيوم بذبح واحد فيهم
ام ثنيان :بسم الله عليكم بسم الله وش بلاك؟
صقر :الاول اقول له احضر الاجتماع بس اجتماع بيجلس فيه ساكت كذا زياده عدد وش يقول ؟ صقر ما ابي اشتغل معاك ويروح يعتكف على شخابيطه ذيك والثاني كذا دق علي وقال ما بداوم اليوم ليه ما بتداوم ؟ عندي شغل واخرتها نايم عند زوجته
تنهدت ام ثنيان :أوس تعرفه ماله بالاداره ولا يحب ذا الشغل وثنيان اعذره بعد زوجته عندها مراجعات يمكن عندهم مراجعه اليوم
صقر :اجل ليه ما تبوني اجيب البنت وتدير معاي اقل شي مطبخ الشركه
ام ثنيان بحده :البنت ذيك مارح تدخل بيتي
صقر :بتدخله لأن ابوي كان يبيها تدخله
ام ثنيان :تعصي كلمتي؟
صقر :واعصي وصيه ابوي؟
ام ثنيان :ماهي موجوده يمكن ماتت يمكن راحت وش تبون فيها تجي تطمع باللي عندكم
صقر :الي عندنا نصيب ابوها من الورث
ام ثنيان :ماهي اختكم هي عشان تقاسمونها بالورث
صقر وهو خارج :اسمها بالوصيه
...
نهى :ماما سيف جا؟
اشواق :اي جا شكله نايم
ذهبت لغرفته ودقت الباب :سيف
سيف :ادخلي
نهى :وش رايك نطلع اليوم
سيف :لا
نهى برجاء:سيف خالي صقر زعل جوانا ناخذها ونطلع تغير جو شوي ارجوك
سيف :ليه ما قالت لي؟
نهى :امس تهاوشوا وقفلت الجوال ونامت وهي زعلانه
سيف :شاطره تبي قلبها يوقف
نهى :طيب نطلع ؟
سيف :اي بس بعد المغرب الحين برتاح
نهى :انا معاكم مو تسحبون علي
سيف :اي بس اطلعي وقفلي النور
نهى :طيب
في ذات المساء
سيف :يمه انا طالع
اشواق :وين ؟
سيف :بمر لجوانا ونطلع
اشواق :خالتك اسمها خالتك جوانا بعدين ذي الايام قربت اختباراتهم خلها تدرس
سيف :زعلها خالي صقر بطلعها شوي بس ونرجع
نهى :انا معاه
اشواق :استأذني من ابوك
نهى :ماما !
اشواق :استأذني من ابوك وبس
نهى :وش معنى سيف؟
اشواق :ولد
نهى :هو ولد وانتِ بنت الكلمه الي اذا سمعتها اتمنى اذني تنصم
اشواق :بقعد اعلم فيك الفرق بين البنت والولد؟
نهى :لا لأنه اساسًا مافيه فرق انا وسيف زي بعض بكل شي ولا سيف؟
سيف :اخلصي معانا ولا لا ؟
سعود :وين معاكم
قبلت والدها :بابا حبيبي وحبيب روحي عادي اطلع مع سيف وخالتي جوانا ؟
سعود :لا
همست بأذنه:انت تشك بسيف انه يدخن صح ؟ بطلع معاهم واراقبه اوعدك اجيب لك معلومات
اخرج محفظته ومد لها خمس مئه ريال :اطلعي
همس بأذنها :اذا جبتي لي علمٍ زين لك عندي مثلها
ابتسمت :ما بيحصل الا الطيب
سعود :انتبه لأختك
سيف :ان شاء الله
خرجت السياره وهي تردد:انا اقوى شي انا انا اقوى شي
سيف :ودي اعرف كيف تقنعين ابوي يعطيك فلوس ؟
نهى :كل مره اقول له شي يجذبه ،قولك وش قلت له ذي المره ؟
سيف :وش
نهى :قلت له انت تشك بسيف انه يدخن براقبه اليوم وخلاني اطلع معاكم ولو جبت له علم زين رح يزيدني
سيف :يعني لو جبتي له خبر اني ادخن ؟
نهى :انت تدخن ؟ لا خلاص تكفيني خمس ميه
اخذ المال من يدها :خلاص نعشيكم فيها الليله
نهى :سيف عطني ،انت تنزل لك مكافئه كل شهر الف ريال
سيف :مو الف يا روحي
نهى :كيف مو الف خالتي وسن ينزل لها الف
سيف :الف مكافئه تفوق ،انا تنزل لي ثمان ميه
نهى :طيب شد حيلك عشان تصير الف
سيف :يا شيخه انا بس ادرس كذا مصيري اتوظف بشركه من شركات جدي
نهى :امانه سيف ما عندك حلم غير شركات جدي؟
سيف :مابي احلم لأنه ما وفر اصلًا دخل بكل مجال
نهى :انا لو قفلت بوجهي مره مره بروح مزرعه الخيل حقت جدي
سيف :انزلي بس
نهى :ليه انزل ؟
سيف :نادي جوانا
نهى :دق عليها ما عندك جوال ؟
سيف :ما عندي رصيد انتِ...بسم الله
نهى :الله غيث
فتح الزجاج :هلا غيث هلا
نهى :شلونك؟
غيث :تمام،خالكم صقر شافكم بالكميرات ويبيكم
نهى :ولله انه اسم على مسمى تونا وقفنا وشافنا
ضحك سيف وكتم ضحكته
نهى :ما تنقل الكلام صح؟
غيث :لا معليك
سيف :انزلي بس
نزلت نهى :ولله انه عسل غيث
سيف :صدق دمه ثقيل كأنه خالي بس نسخه مخففه
نهى :لا ولله احس اني احبه
نظر لها بصمت وهي مبتسمه فالتفتت له :بسم الله
سيف :نهى اتمنى انها مشاعر مراهقه
فهمت مقصده :لا سيف لا ما احبه بالمعنى اني احبه احبه زي عمي احنا اعمامنا غثنين خلاص غيث عمي ولا اصلًا عمره ٣٠ مدري اكبر وانا كم عمري ١٥ نص عمره
سيف :اشوا
نهى :سيف بالله عليك انا اخر وحده تحب رجال بذي الحياه توقعها من جوانا ولا ابتهاج بس انا لا
سيف :طيب خلاص نهى لا تشدينها
نهى :صدق انت تحسب عشانك تحب ابتهاج كل الناس يحب...
غطى فمها :ما لقيتي الا ببيتهم تتكلمين اسكتي ،بعدين ماهو حب اعجاب بس اعجاب
نهى :محد بالحوش يسمعنا
سيف :حبيبتي حوش تقل ملعب قولف ما تدرين من قاعد فيه ويسمعك
نهى:طيب خلاص
فتح الباب :ادخلي
دخلت نهى :اعرف ،سلام جده شلونك؟
الجده وضحه :وعليكم السلام ورحمه الله وبركاته بخير انتم شلونكم؟
سيف :بخير دامك بخير ،جينا بناخذ جوانا وبنطلع
صقر:ليه ؟
سيف :شسمه ...بنروح ن...
ثنيان :انا قلت له ياخذها عندها موعد تقويم وماني فاضي الحين هو بياخذها
سيف :اي باخذها انا
نهى :سلام خالو
صقر :قولي السلام كامل ولا اسكتي
وكزته الجده بعصاها :وانت جاي تحقق حتى سلام ما قلته
صقر :هم يقولون دامهم جايين ببيتنا
ثنيان :ولله الي المفروض ينطردون من بيتنا عمامي وعيالهم
وكزته الجده ايضًا :عيالي ابيهم عندي اتطمن عليهم من قريب
نهى :ابنوا لهم بيت بحوش التنس ذا وخلاص
ضحك صقر :حوش ايش؟
انصدمت نهى:خالي صقر يضحك؟
سيف بهمس:للأسف ضحكته يعني جبتي العيد
صقر :قولف مو تنس التنس هذيك الي على طاوله
نهى :فرقت ؟
صقر :كم عمرك انتِ ؟
نهى :١٥ وبدخل ١٦ قريب
صقر:مراهقه ضايعه انا يوم كنت زيك كنت منغمس بمكتبه ابوي لكن انتِ هل قريتي كتاب واحد ؟
نهى:اي كتاب خوف
ثنيان :وشو ذا ؟
سيف :روايه عن الجن
صقر :شف بالله قاريه روايه فاضيه وجايه تناقشني
جوانا :انا جيت
فتح ثنيان ذراعيه :هلا بحبيبة اخوها
حضنته :اشتقت لك ثنيان
صقر :كان رحتي عنده طول اليوم هنا ما داوم الله اعلم وش شغله المهم
جوانا :بس انا داومت
صقر :وبعدين لا تاكلين علك وانتِ مركبه تقويم كم مره قلت لك؟
جوانا :كثير والمرعب بذا مو العدد المرعب انه ما صار لي شي
نهى :جوانا امشي بسرعه
ثنيان :يلا بسرعه بتتأخرين على موعدك
جوانا :اي موعد؟
نهى :جوانا موعد التقويم كان ثنيان بيوديك
صقر :مين بيوديها ؟
نهى :خالي ثنيان كان بيوديك بس عنده شغل واحنا بنوديك
جوانا :الله صدق؟
صقر :الموضوع فيه إن كيف طالعه بعبايه وتقولين يلا نطلع بعدين تقولين صدق؟
ثنيان :نسيت نسيت العلك أثر على عقلها
قبلت ثنيان وهي تنظر لصقر :مع السلامه يلا افضل اخ بالدنيا
صقر :غطي وجهك بالكمامه ولا تنقبي
جوانا :طيب بحط الكمامه بس باقي بالبيت اتنفس شوي
خرجت جوانا مع سيف ونهى بينما ثنيان وصقر يقفون
صقر :هي افضل اخ بالدنيا
التفت ثنيان :هلا
صقر :امسح خدك لا تزعل زوجتك
مسح خده :مسكين تغار مني
صقر :ولله انا مسكين من الحال الي انت وأخوك مخليني فيه
أوس :انت هنا ؟ الساعه سته رحلتك قربت
صقر :بغيت انساها
ثنيان :اي رحله
صقر وهو ذاهب:شغل ،لو انك داومت كان عرفت
ثنيان :أوس؟
أوس :لقينا البنت
ثنيان :هيام؟
أوس :اي
ثنيان :هي نفسها هيام عبدالعزيز ؟
أوس :اي هي بيروح لها صقر
ثنيان :كان رحت انت صقر بيروح يكرهها بعيشتها ويجيبها غصب عنها
أوس :رفض هو يبي يروح
ثنيان :هي وين؟
أوس :بميونخ
ثنيان :كانت بلندن وش وداها ميونخ؟
أوس :ولله علمي علمك
ثنيان :يا رب تمرمطه بميونخ ثلاثه اربع ايام
صقر :عشان ما تداوم ،اقسم بالله أني ما اوثق لا فيك ولا ف أوس أحط غيث مدير ولا انتم
ثنيان :كيف سمعتني؟
صقر :مالك دخل
...
لنكمل ما تبقى من احداث...
دون صواب منها لحقته ،لا شيء أمام عينها سوى ذلك الاسم(بندر آل محسن)،عادت لعقلها عندما دخل المقهى وضرب الباب بوجهها :وقح
دخلت خلفه :وش بينقص منك لو مسكت الباب لي؟
جلس على احدى الطاولات:ووش بيزيد فيني لو مسكته لك
جلست مقابله وفتحت قائمه الطعام :احترام و رقي
قال بسخريه:تتكلمين عن الاحترام والرقي وانتِ حتى حجاب مو لابسه
رمت القائمه على الطاوله :مين انت عشان تحاسبني وتقيس احترامي؟
استعدل بجلسته :صقر آل محسن
بلعت ريقها :تقرب لبندر آل محسن ؟
صقر :ولده
هيام :كيف لقيتوني؟
صقر :لقيناك وبس
هيام :ما اذكرك
صقر :ما تذكريني شكليًا صح ،بس ما قد سمعتي اسمي بالبيت مره او صوتي مكالمه او شي؟
هيام :بس اذكر بندر آل محسن
صقر :الله يرحمه
بلعت ريقها :كيف؟
صقر :توفى له سنتين
نزلت دموعها فمسحتها :طيب ليه تبوني؟
صقر :نبيك ترجعين السعوديه
هيام :حياتي كلها هنا ،ما اوثق فيك
اخرج ورقه من جيبه ومدها لها :بترجعين غصب عنك
هيام :وش ذي؟
صقر :وصيه ابوي
قرأتها فأمتلأت عيناها بالدموع :ما فهمت
تنهد :بالمختصر لك نصيب معانا بالورث لأن ابوك الله يرحمه كان شريك ابوي
هيام :بأيش؟
صقر :كل شي ،لا تقولين انك قطعتينا وقطعتي حتى اخبارنا
هيام :اتابع بس من بعيد لبعيد
صقر :الحين عندك مكتب ...
قاطعته :ابي مزرعه الخيل
صقر :وش دراك انه فيه مزرعه خيل؟
هيام :اعرفها من زمان
صقر :ما تقدرين تديرينها صعبه
هيام :ما تصعب علي
صقر :خلاص هي لك بس لازم تجين السعوديه ،الحين بحجز رحله الفجر ونطلع
هيام :بفكر
صقر بحده:مافيه وقت للتفكير سنتين ندور لك وضيعنا وقت كثير عشانك واهملنا شغل اكثر
هيام بنفس الحده :احتاج افكر مارح اترك حياتي لست سنوات هنا بذي السهوله
صقر :مو كانت ثمان سنوات ؟
هيام :سنتين بلندن ...
قاطعها صقر :بعدها قطعتي اهلي الي اعتبروك جزء منهم
هيام :لو برجع عندي شروط
صقر :تفضلي ...لحظه بس برد على ذا الاتصال
خرج قليلًا فبقيت هي تجابه افكارها
عاد بعد قليل :شروطك قوليها لأوس انا برجع عندي شغل
همست :روحه بلا رجعه
صقر :ايش؟
هيام :مالك دخل
صقر :عطيني عنوان شقتك بكره بيجيك أوس علميه بشروطك وتناقشوا
هيام :وش الي يخليني اوثق فيك وانا معرفك ؟
صقر :افتحي تويتر وابحثي صقر آل محسن
بحثت ثم بلعت ريقها
صقر :هاه صدقتي؟
هيام :طيب
مد لها هاتفه :اكتبي عنوانك
كتبت العنوان وضربت الهاتف بصدره وجمعت اشياءها
صقر بسخريه خلفها :وش بينقصك لو عطيتيني بيدي؟
هيام وهي خارجه :وش بيزيد فيني لو عطيتك بيدك ؟
خرج من المقهى واتصل على أوس :الو
أوس :تدري ان الوقت عندكم متقدم ساعتين علينا ؟ مصحيني من عز نومي تدق
صقر :حياه الشغل تتطلب كذا
أوس :وانا ما ابيها
صقر :قوم بس احجز لك طياره قبل الفجر وتعال على ميونخ وانا برجع الحين عندي بكره شغل
أوس :طيب يمدي الصباح
صقر :شوف ترا قابلتها ماهي موثوقه ذا البنت ممكن تهرب
أوس :ليه وش فيها ؟
صقر :اول شي ماهي محجبه عاشت ثمان سنوات بالخارج وتحسب نفسها زيهم
أوس :لا تسوي نفسك مجنون حتى عندنا فيه بنات ماهم محجبين الله يهديهم بس
صقر :خلاص أوس بلا كلام زايد تعال بأسرع وقت
أوس :طيب هذاني قمت
صقر :البس نظارتك عشان تصحصح
أوس وهو يرتدي نظارته:طيب صقر طيب جرب مره وحده بحياتك تروق ما بتخسر شي
صقر :بخسر وقتي لو جلست تبربر
أوس :خلاص انت احجز لي
صقر :اسمعني أوس هي بتحاول تقنعك انها ما تبي تجي بس أصحك تصدقها أصحك سامع ؟
أوس:طيب صقر...
اغلق بوجهه
أوس :ولله ما الومها ما تبي تجي
...
في فجر اليوم التالي ،تضع مكياجها وهاتفها مفتوح بمكالمه مع صديقتها الوحيده والأعز
نجد :تصدقين كأنك اميره من أميرات ديزني كذا فجأه جا أنقذك وقال ارجعي معاي هيام تزو...
هيام :لا نجد لا تفكرين بذي الطريقه ارجوك ، هذاك الحيوان المتكلم مستحيل اقبل فيه وبعدين انا strong independent woman مو أميره ديزني اعتمد على رجال يطلع من العدم
نجد :اجل ليه وافقتي تروحين رغم انه حيوان متكلم على قولك وأنتِ مو أميره ديزني ؟
هيام :لأنه ابوه له معزه عندي وذي وصيته
نجد :وش قصتك معاهم هيام ؟
تنهدت :هم الي ربوني يوم توفى ابوي
نجد :يعني تتذكرينهم ؟
هيام :اذكر بس العم بندر وبناته وز...
نجد :اقصد ولده الي جاك امس
هيام :لا عياله بس اذكر واحد الباقين مطلعهم الخارج
نجد :اف لو تقابلتوا كذا طيحتي الكتب وبعدي...
هيام :نجد الباب يدق بروح اشوفه اكيد اخوه الجحش الثاني
تنهدت نجد :الحين صدق بتروحين وتخليني ؟
هيام :بشتاق لك ولله ،بس يمكن ارجع بشوف الوضع هناك وبرجع اوعدك
نجد :لا مارح ترجعين ذاك حق ابوك خذيه
هيام :بس بدق عليك كل شوي بزعجك مالي دخل
نجد :اي اي بس روحي افتحي الباب
اغلقت الهاتف وفتحت الباب :نعم ؟
نظر لوجهها قليلًا :انتِ هيام ؟
هيام :اي انا
أوس :تمام ،تفضلي
هيام :ما جهزت اغراضي لأني قلت ما بجي الا بشروطي
أبتسم :تمام براحتك بس خلينا نطلع ابي افطر ما فطرت جيت من المطار هنا على طول
انتبهت هيام لسماحه وجهه واختلاف اسلوبه عن صقر:لو أعرف كنت سويت شي هنا ضيفتك فيه اعذرني
اتسعت ابتسامته اكثر :لا معليك ،انا اصلًا ابي ازور مطعم احبه هنا
ارتدت معطفها واغلقت الباب وخرجت :وينه ؟
أوس :الي بنهايه الشارع من عند الاشاره احسدك لأنه قريب منك
هيام :حتى انا احبه ذا المطعم بس اليوم ما يفتح
أوس :صدق ؟
هيام :اي اليوم الاثنين ما يفتح
أوس :لو كان يوم الاحد كان ممكن بس اليوم غريبه
تنهدت :لأنه صاحبه زوجته توفت مثل يوم الاثنين فيقفل كل اثنين كناية عن حزنه عليها
امسكها من كتفيها وأوقفها
هيام :شفيك ؟
أوس :المويا بغيتي تمشين فيه
ابتسمت :ما انتبهت
أوس :عاد انا معرف مطعم غيره
هيام :خلاص انا بوديك اليوم ،مو نفسه بس حلو
أوس :براحتك ،بس ان شاء الله انه قريب
هيام :لا بنفس الحي
ضحك أوس :اخترتي سكنك عند اغلب المطاعم ،اختيار موفق
ابتسمت هيام بحرج :وصلنا
فتح لها الباب :تفضلي
دخلت قبله وهمست :سبحان الله فرق الاسلوب
أوس :كأنه زحمه
هيام :لا فيه طاوله دايم فاضيه لي
أوس :حاجزتها يعني ؟
هيام بالالمانيه :والتر هل طاولتي فارغه؟
والتر بالالمانيه :سيده هيام نعم ،إنها دائمًا فارغه من أجلك ،لكن اليوم أرى أنك احضرتِ صديقًا
هيام :نعم ،يبدو كذلك هل يمكنك احضار كرسي إضافي؟
والتر :نعم تفضلي
أوس :اتمنى أنكم ما سبيتوني ما أعرف المانيه
هيام :لا تطمن
أوس :كيف حجزتيها وراتبك الفين يورو؟
هيام :حتى راتبي تحريتم عنه؟
أنحرج أوس:أعتذر ،بس ذولي صقر ومساعده غيث لازم يعرفون كل شي حاولت أقنعه بس يعرفون موقعك لكنهم تحروا عن كل شي
هيام :طيب يعرفون اني مساهمه بذا المطعم؟
أوس :لا
هيام :كذا أخذت الطاوله ذي واضافةً عليها ارباح لي ،مستحيل أعيش على الفين يورو بس
أوس :كم نسبه أسهمك فيه ؟
هيام :حوالي ٢٣٪؜
أوس :حلو ولله تقريبًا الربع
هيام :اي
وضع الصحون امامهم :طلبكم
أوس :ما طلبنا أحنا
هيام :مو لازم تطلب
أوس :ليه؟
هيام :ذي الوجبه الوحيده عندهم كيك الزنجبيل
أوس :والمشروب ؟
هيام :قهوه ، تحبها ؟
أوس :اي ،معقوله للحين ما عرفتيني؟
هيام :بس اذكرك لحظات بسيطه مدري وين كنت تختفي طول الثمان سنوات ذيك
أوس وهو يحرك قهوته:كنت احب العزله
نظر لوجهها :ولازلت احبها
بلعت ريقها ونظرت للجهه الاخرى
بعد وقت أنقضى بالأكل
هيام :تعرف أُعتبر مديره هنا ،عشان كذا بروح اشيك العمال تبي تجي معاي؟
أوس :لا بنتظرك هنا
هيام :تمام ،مارح أتأخر
دخلت للمطبخ وهو استغل ذهابها واتصل على صقر :الو
صقر :بتجي؟
أوس :متأكد من الموقع ؟
صقر :اي هو ليش؟
أوس :طلعت لي انسانه ثانيه غير الي وصفتها
صقر :كيف ثانيه؟
أوس :لطيفه ومحترمه ،انت قلت انها وقحه وقليلة ادب
صقر :يمكن أم وجهين
اكمل بسخريه :ولا معجبه فيك
أوس :ولا أنت بديت وقليت ادبك معاها قامت هي عطتك بوجهك
صقر :مستحيل ما تتجرأ ،هي أم وجهين متأكد
أوس :نشوف عاد اذا جت
صقر :الحين بتجون؟
أوس :باقي بكلمها
صقر :وش ذا الكلام الي ما خلص من الفجر ؟
أوس :لأني اناقشها بأحترام
صقر :وش تبي تحترمها ماهي محجب...
اغلق بوجهه وقام :خلصتي؟
هيام :اي نطلع ؟
أوس :تمام
هيام :وين نروح؟
أوس :نتمشى وبكلمك بالموضوع الي تكلمتي مع صقر فيه
هيام :يمكن اجي اليوم معاك بس بشوف الوضع واذا عجبني بكمل بس عندي شروط
أوس :تمام وش هي؟
هيام :اول شي أدير المزرعه
أوس :اي قال لي صقر تبين المزرعه
هيام :ثاني شي محد يتدخل بأدارتي ولا بشخصيتي ولا بحياتي ولا خصوصياتي ومن ذلك أني مو لابسه للحجاب ونبه على اخوك بالنقطه ذي
أوس :لك ذلك
هيام :ثالث شي ما أبي منكم ولا يورو فوق حقي من الورث
أبتسم أوس :بالسعوديه ريال
هيام :الي هو بس مارح أخذ منكم شي عشان نتجنب المن
أوس :براحتك
هيام :أربعه رح نكتب كل ذي الشروط بعقد ونوقع عليه ،طبعًا كل ذا اذا عجبني الوضع يمكن اجي وما يعجبني وقتها تبرعوا بنصيبي صدقه
أوس :ان شاء الله ،احجز رحله ؟
هيام :تمام
...
ابتهاج :بابا ،وش رايكم تشترون لي سياره
ابو جهاد :عمرك ١٧
ابتهاج :اعرف بس كذا خبها عني لين اصير ١٨ وعطني
ابو جهاد بسخريه :وين احطها بجيبي؟
ضحكت :بابا صدق ما امزح زي نرجس
نرجس :توه ذي السنه جابها لي
ابتهاج :بس انك خسيسه ما تعطيني اجرب
نرجس :لأنك مبتدئه وش دراني انك ما بتخشين فيها بالرصيف وتخربينها
ابتهاج :ولله اعرف صح بابا؟
ابو جهاد :ما ودكم تطلعون اليوم؟
غاده بسخريه :حتى ابوي طفش منكم يبيكم تطلعون شوي
ابتهاج :ولله لو عندي سياره ما خليت مكان ما رحته
ابو جهاد :اقصد تطلعون عند خالاتكم
نرجس :بنات خالاتي كثيرات كلام ما يسكتون
غاده :على اساس انتم اقل منهم يا المراهقات
نرجس :هاه جتك مواليد التسعينات بعقل مواليد ٢٠١٥
ابتهاج :لو نقارن بين بنات خالاتي وبنات عمي خصوصًا وسن يعتبرون اقل منهم بالكلام بنسبه ٣٤٪؜
ابو جهاد :حلو يا بابا شطوره شكرًا على الدراسه البحثيه الجميله ممكن تروحون لهم شوي؟
غاده :صدق ابتهاج لو تروحين عند جوانا وتدرسون مع بعض انا وملاذ يوم كنا زيكم كنا ندرس سوا
ابتهاج :عيوني غاده ترا انا بثالث ثانوي وهي بأول مو بعمر بعض احنا
ام جهاد :هاه مين معاي عند خالتكم؟
نرجس :بصلح سيارتي
ابتهاج :بذاكر مع جوانا
غاده :مو كنتِ بثالث وهي بأول؟
ابتهاج :عادي كلنا ندرس منهج ثاني انا اراجع وهي تحضر
ام جهاد :غاده معاي؟
غاده :لا ولله اليوم اخذت اخر محاضره بحياتي الجامعيه وابي استرخي
ام جهاد :تعالي عند خالتك تونسي
ابتهاج :بطنها يوجعها
ام جهاد وهي خارجه:البسي شرابات
غاده :ان شاء الله
ام جهاد :مساعد قوم
ابو جهاد :طيب
قامت ابتهاج :واجحديها يا غاده
غاده :ماني جاحده زيك وزي اخوك
مر سهيل :انا وش دخلي تراني اخوكم كلكم
غاده :لا مو انت يا عيوني اخوك الثاني جهاد
نرجس بضحك:طيب شغله اكيد بيعطيك مخالفه مارح يغطي عليك
غاده :انا اخته من قبل ما يتوظف
ابتهاج :وش السالفه ؟
غاده :العصر امس طلعت ويوم جيت مريت بالنقطه رخصتي ما كانت معاي لأنها سياره ابوي قام جهاد عطاني مخالفه وانا اول امس مغطيه عليه يوم جا متأخر بالليل
ابتهاج :فرق بين نُظم الدوله وبين نُظم جدتي
دخلت الجده على كلامها :وش فيها نُظمي؟
قامت نرجس واقتربت من جدتها وهمست :قاعدين يقولون ان نظامك مشدد كأنه نظام دوله قلت لهم لا جدتي مره كويس نظامها وقاعد يرتبنا ويرتب حياتنا عشان نصير ناس منظمين وواعين مثل صقر ولد عمي بندر
نظرت لغاده وابتهاج نظره حاده واعطت نرجس منديلًا :ارميه بالزباله
ابتسمت نرجس :ابشري
ذهبت للمطبخ وفتحته وكان كما توقعت به نقود :احب الجدات احبهم
جهاد :شفيهم الجدات؟
نرجس بفزع:أعوذ بالله من همزات الشياطين وأعوذ بك ربي أن يحضرون
جهاد :من وين لك ذي الفلوس؟
نرجس :جدتي عطتني ولا ليش احبها ؟
جهاد :استغفر الله عجوز كبيره رجل عالقبر ورجل بالحياه وانتِ تحبينها عشان فلوسها بس
نرجس :لا جهاد ترا احبها وفيه ذكرايات حلوه معاها مثل ...لما تسوي شاهي العصر وتنادينا
جهاد :ما كانت تنادينا كانت تطردنا وتجلس مع اعمامي
نرجس :اعطيك فلوس وتسكت؟
جهاد :كم معك؟
نرجس :الي عطتني جدتي الف
جهاد :النص بالنص
نرجس :لا خير انت موظف وانا طالبه جامعيه وعلي مصاريف الكتب وسيارتي وطلبياتي وكل شي
جهاد :الحمدلله الدوله يعطون مكافأه
نرجس :ثمان ميه ما توكل عيش
جهاد :طيب كم بتعطيني؟
نرجس :اعطيك ميتين؟
جهاد :ويصير عندك ثمان ميه زيها زي المكافأه
نرجس :بعطيك ميتين وبكره اصلًا تنزل المكافأه يعني يصير معاي ١٦٠٠ ريال
جهاد بسخريه :تتكلمين كنك من الطبقه الكادحه ما كأن ابوك معاه ملايين
نرجس :الحمدلله على النعمه بس احب اعتمد على نفسي واجمع فلوسي بنفسي
ابتهاج:تجمعينها بالتفتين والكذب والافتراء
ضحكت نرجس :اشوف سيقانكم اشوفها
غاده :حسبي الله عليك عرس صديقتي بعد اسبوع الحين ساقي تخضر وانا فستاني قصير
جهاد :كيف قصير ؟
غاده :تحت الركبه لا تشدها انت بعد
جهاد :خلاص براضيكم ،وين تبون نروح؟
ابتهاج:استلم طلبيتي وعلى حسابك
جهاد :الحين طلبيتك تطلع بثلاث الآف وكلها خواتم ،الله يجيب لك خاتم زواج يفكنا منك
ابتهاج :لا بسم الله علي
جهاد :وش تبين اجل ؟
ابتهاج :جيب لي آيس تي بس
جهاد :جبت لك امس بالثلاجه
ابتهاج :أما
نرجس :كان
ابتهاج :شربته ذي الزفته بعد
نرجس :ما شربته بس استخدمته برشوه
غاده :رشوه مين؟
نرجس :رشيت سهيل عشان يعطيني شاحنه
ابتهاج :جهاد انت كنت كبير يوم امي حامل بنرجس ،هل أمي توحمت على عصابات مكسيكيه؟
جهاد :لا
نرجس :لحظه ما فهمت
ضحكت غاده :يعني انك زي العصابات
ابتهاج وهي خارجه بغضب:كل شي عندك مو قانوني رشوه وكذب مارح استغرب لو قتلتي احد بالجامعه
نرجس :ابتهاج تعالي ،زعلتي على آيس تي ولله اجيب لك عشره غيره
جهاد :زعلتيها
نرجس :صدق؟
غاده :اي مره زعلت
نرجس :خليها بعدين اراضيها
جهاد :مره مره زعلت
نرجس :منجد؟
غاده :نرجس بنقعد نشرح لك قد ايش زعلت ولا نزعلك نفسها عشان تحسين ؟
نرجس :طيب خلاص بروح اجيب لها كرتون آيس تي
جهاد :بعد تحب الآيس كوفي
نرجس :ما توفر ما شاء الله
غاده :مالك حق تتكلمين وانتِ مزعلتها
نرجس :طيب شفيكم شادينها ولا عشانها اخر العنقود ترا سهيل اصغر منها ومحد طاق له خبر يمكن معاه اكتئاب وحنا ما ندري
جهاد :كذاب ذاك مسوي نفسه مكتئب عشان نجيب له بي سي
سهيل :سمعتك
غاده :سهيل انت تسمع كلامنا واذا جا طاريك تطلع ولا شسالفتك؟
سهيل :لا اتمشى بالبيت واذا سمعت اسمي رديت
جهاد :نفس الشي
سهيل :شريت تذاكرللمباراه؟
جهاد :اي مباراه؟
سهيل :مو منجدك جهاد صار لي شهر اقول لك بتحجز وتقول اي ،مباراه الهلال
جهاد :امزح معاك شريت وvipبعد
نرجس :سهيل وابتهاج وش مرضعتهم امي لأنهم زعولين
غاده :يؤسفني اخبارك انك سرقتي ذبه ابتهاج
جهاد :لا مو نفسها ابتهاج قالت وحام ذي قالت رضاعه
امسكت غاده كتفه :وش دراك ؟
نظر لوجهها :اعرفها ذي النظره ،مراحل عاديه بحياه الانسان مو شرط اذا احب وحده اعرفها مدري ليه متشفقه تزوجينا مع اننا بنعيش بذا البيت ومستحيل نطلع منه
غاده :اعرف كل ذا بس ودي اشوف رومنسيتك
جهاد :رومنسيتي ؟ هذا معنى الرومنسيه عندي
امسك يدها :اختي العزيزه اتمنى تنقلعين عن وجهي لا اصفقك هنا
غاده وهي خارجه بسخريه :رح يحصل بيوم من الايام وبتجي عندي وبتشوف بتجي وتقول يا غاده ولله حبيت وحده مدري وش اسوي بيننا الايام يا جهاد
جهاد بسخريه :اي مره بموت من العشق واجيك
في الاسفل
ابتهاج :جوانا
صقر :قصري صوتك جدتي نايمه
بلعت ريقها :طيب
صقر :شفيك بتتفالخ عظامك كلمتك بشويش اجل كيف لو صارخت
جوانا :ممكن تروح صقر البنت ما ترتاح بوجودك
صقر :إني رايح بس يا ويلكم تزعجون جدتي
جوانا :طيب يا حبيب جدتك طيب
دخلت جوانا وخلفها ابتهاج :اكره اننا نعيش بنفس البيت
ابتهاج :يعني تكرهين جيتي؟
جوانا :لا يا شيخه اقصد عيال عمي راجح وجهاد وسهيل مو طبيعي اتمشى بالبيت بطرحه
ابتهاج :ولله قوانين جدتي
جلست على السرير :اتمنى كذا نعيش ببيت احنا بس البنات
ابتهاج :بدون نرجس طبعًا
جوانا :تهاوشتوا مره ثانيه؟
ابتهاج :اي قلت لجهاد يجيب لي آيس تي راحت هي اخذته وانا مدري وين كنت وعطت سهيل كرشوه مقابل الشاحن
ضحكت جوانا :ولله ابتهاج...
ابتهاج :لا تضحكين ما يضحك شي
جوانا :ذكرتيني بروايه اقراها
ابتهاج :وش رايك نروح عند وسن احس ودي اشوف طقوسها الغريبه بالكتابه
جوانا :امس دخلت عليها كانت مقفله النور وتكتب بضوء الشمعه قلت لها من باب المزح تكتبين رساله لحبيبك قالت لا اكتب عن الظلام وجلست تتفلسف بشكل يخوف
ابتهاج بسخريه :خلصت المواضيع راحت تكتب عن الظلام
جوانا :قلت له...
ملاذ :سلام كيزلار
جوانا :طيب الباب بغيتي تخلعينه احسبك صقر المجنون
ملاذ :اوه ابتهاج هنا
جوانا :عايشين بنفس البيت طبيعي هنا
ملاذ :كويس طيب وش رايكم نروح محل الكيك حقي؟
ابتهاج :اكيد
جوانا :صبر نرسل لنهى معانا
ملاذ :خليها يا شيخه مو لازم
جوانا : she's my best friend
ابتهاج :وانا
جوانا :عادي عندي بستين وحده انتِ ووحده نهى
ملاذ :بالله عليكم ما ابي اروح عند بيت اشواق ولله بصفق زوجها
ابتهاج :ملاذ حرام
ملاذ :مو حرام غثيث طماع وذكوري
جوانا :يا ويلك تسمعك اشواق ولا واحد من عيالها ولله تزعل
جلست على الكرسي:مو منجدكم انتم
ابتهاج :واضح ودك تدخلين نقاش تفضلي عطينا وجهه نظرك بكل احترام سمعتي؟
ملاذ :طبعًا بكل احترام سعد زوج اشوا...
جوانا :اسمه سعيد
ملاذ : whatever ،بس الشخص الي يقال له زوج اشواق أول شي حرمها تكمل دراسه من بعد الثانوي
جوانا :هي برضاها لأنها كانت حامل بسيف
ملاذ :لا تدافعين عنه ياخي ولله لو انه صقر
جوانا :صقر اخر انسان ادافع عنه بذا الشكل
ابتهاج :كلنا نعرف انك تحبينه بس تكابرين
جوانا :كيف اكابر وهو اخوي صدق ما احبه ذاك الزود
ملاذ :طيب خليني اكمل كلامي ،كان يمديها تاخذ موانع حمل وتكمل دراسه درجاتها احسن مني ومنك وحتى لو كملت كان ابوي الله يرحمه خلاها هي رئيسه مجلس الاداره بس صقر وسعيد خربوا كل شي ،ما يعطيك ذا فكره ؟ انه الرجال اخذوا كل شي من يد المرأه ويلومونها بعدين ،ثاني شي كل شوي تجي لثنيان وتطلب منه فلوس عشان عيون ذا السعيد ،وين يودي فلوسه يا ترى ؟
جوانا :على عياله
ملاذ :حبيبتي يستلم تقريبًا ١٠ الاف
ابتهاج :١٠ الاف ما تسوي شي
ملاذ :عنده بس بنت وولد والولد بالجامعه حتى يعني نص مصاريفه من مكافئته
جوانا :ملاذ بالله عليك لا تستغبين توك تقولين ما خلاها تكمل دراسه اكيد يصرف عليها الحين يعني العشره الاف لها هي وعيالها
ملاذ :طيب ليه دايم يطلب فلو...تصدقين
ابتهاج :وشو ؟
ملاذ :شكله متعاطي ياخذ فلوس منا ويروح يشتري فيها ذيك البلاوي
جوانا :مستحيل شفته امس كان دب وريحته عطر عوده ثقيل اثقل من عطر جدتي اذكر المتعاطين ينفرون من ريحه العطر ويصيرون نحاف من قله الاكل والنوم ولا ؟
ابتهاج :وش دراك ؟
جوانا :شفتها بتيك توك
ملاذ :صح صح ...يلا بس قوموا نروح
جوانا :الحين ناخذ نهى معانا ولالا ؟
ملاذ :مدري بكيفكم
ابتهاج :العصر ارسلت ستريك انه توها تنام اكيد للحين نايمه
جوانا :اي صح تذكرت
ملاذ:اجل امشوا يلا قدامي
ابتهاج :جوانا استأذني من صقر
ملاذ :لا لا تستأذن دام معاكم شخص بالغ مو لازم تستأذن انا بطلعكم
صقر :ماشاء الله لقينا الي تحرض علي
جوانا :لا ما تحرض انا اكرهك من نفسي
صقر :وين طالعين ان شاء الله ؟
ملاذ :محلي
صقر :استأذنتوا من مين ؟
ملاذ :من أمي يعني مالك رأي بعد رأيها
صقر:لا لي رأ...
الشغاله :ماما وضحه يبغاك
صقر:طيب جاي
ابتهاج :احسه صار كذا بسببكم يعني ما تعطونه حنان
ملاذ :ماهو وجه حنان
ابتهاج :لا ملاذ جربوا
جوانا :مستحيل ابتهاج هو كذا من يوم ولدت وانا اعرفه انه كذا حتى امي تعودت عليه
...
راجح:شوف لو يفوزون المناوبه الجايه عليك
يزيد :يا شيخ اخرتها يجي بلاغ وكلنا نركب من الخرشه
راجح :صدق ليه كل مره انخرش وانا صار لي ثلاث سنوات مسعف يعني طبيعي الوضع
أيمن :الطبيعي انك تنخرش
ضحك يزيد :تكفى لا تتكلم بكلمات نجديه لأنه يبان انك مصري مهما قلت
أيمن :دا أحنا تونا قلنا بسم الله وانتهت المشكله أيه الي يخليك ترجعها تاني؟
راجح بسخريه :أيمن لك ثلاث سنوات تعرف يزيد وتعرفنا وتعرف انه يمزح بكل وقت
يزيد :شفيك معلق على ثلاث سنوات ؟
أيمن :لأن أحنا صار لنا ثلاث سنوات مع بعض
يزيد :راجح اعرفه من زمان
راجح :كذاب
يزيد :مو أعرفك مباشره مباشره أكتشفت أن ابوي يعرف ابوك وكذا معارف عائليه
راجح :اها معارف عائليه لو قلت كدا من البدايه كُنت وافقتك الرأي ،دا ...أيمن كيف اقول أبوي بالمصري؟
أيمن :ولله علمي علمك مواليد السعوديه أنا بس يطق العرق
راجح :ابوي واعمامي بأختصار معارفهم كثير
يزيد :احس اغلبهم مصلحه
أيمن بسخريه :مثلك
ضحك راجح :بالله تهاوشوا مره ثانيه كانت أيام مضحكه بالنسبه لي
أيمن :كذاب كنت تترجاني بالواتس اني اسامحه عشان تخف عليك قطه العشا بالمناوبه
راجح :طيب كنت اتعشى مرتين مره معاك ومره معاه والمشكله كلها على حسابي يعني مطفرين أهلي
يزيد :ما ظنتي أهلك مطفرين
راجح :تعبير مجازي
:سمعتوا الانذار صح؟ بسرعه واحد منكم يتحرك على السياره لازم ثمان دقايق نوصل لموقع الحادثه بسرعه يا شباب بسرعه
يزيد :أيمن قوم بسرعه احنا بنتابع المباراه
قام أيمن بتذمر :دا استهتار بجد لو يعرفوا وزاره الصحه عن دا الاستهتار هتنفصلوا
راجح :اي اي بس روح
يزيد :احسها عنصريه شوي
راجح لا معليك ذيك المره انا رحت،عطني الشطه
يزيد :خلصت ابوها
راجح :بدون طعم
يزيد :يمكن معاك كورونا افحص
راجح :للأسف اعراض كورونا الي جاني للحين علي حاسه التذوق والشم عندي شبه معدومه
يزيد:على كبر خشمك شبه معدومه
راجح :يا شيخ انت شف خشمك كأنه دوده مفلطحه
ضحك يزيد :مافيه خشم بشكل الدوده المفلطحه
راجح :اصلًا تعرف شكل الدوده المفلطحه؟
يزيد:لا
راجح :حتى انا بس قلتها كذا
أخرج يزيد هاتفه :شوف الطيار يدق
راجح يقلد خلف :اكلمكم من لوندون
يزيد :بيطلبني حفايظ لولده عمره اربع سنوات وللحين يلبس
راجح بسخريه :اكيد طالع لعمه يوم يخاف يسويها على نفسه
يزيد :اقسم لك بالله يا راجح انه مويا ولله ورب ذي النعمه الي جالسين ناكلها مويا حتى القاروره كانت وراي ودعست عليها وطحت ما تذكر ؟
ضحك راجح :الا اذكر كيف انساها واحنا بغيناك مسعف الا انت تحتاج اسعاف
يزيد:خلاص اسكت ،نعم ...إنا لله وإنا اليه راجعون ،طيب طيب
نظر لساعته :نص ساعه ويخلص دوامي وبروح
راجح :شصار ؟
يزيد :جيران نسباء خلف امهم توفت
بلع راجح ريقه :الله يرحمها ويصبرهم
يزيد:آمين
في دوله اخرى ...
هيفاء :مين تكلم؟
خلف :يزيد ،قلت له يروح العزا عني
هيفاء :بسم الله عزا مين؟
خلف :جيرانكم
هيفاء :اي جيران؟
خلف :الي يمين بيتكم
هيفاء :اي ،مين توفى عندهم؟
خلف :امهم
هيفاء :يوه كانت تعبانه الله يرحمها
خلف :الله يرحمها
تنهدت واخذت هاتفها :خلني اتطمن على فهد
اخذ الهاتف من يدها :خلاص ما تحسين نفسك مهووسه فيه ؟
هيفاء :اكيد بنهوس فيه ولدي
امسك يدها:هيفاء ارتاحي انتِ بإجازه أخيرًا احنا مع بعض اسبوع كامل
أستنشقت نفسًا عميقًا واطلقته :صح ريلاكس ريلاكس
خلف :بالضبط ريلاكس
...
أوس :حياك بعاصمتنا الجميله
هيام :ما تغير شي بالمطار
أوس :بس المطار ،خلينا نطلع برا وتشوفين
غطت وجهها :يا الله وش جابه
صقر :ما قلت لك تحجبي اذا جيتي؟
هيام :مالك دخل انا لابسه لبس ساتر وذا اهم شي
ابتسم صقر بسخريه:ولله مدري وش دينك ذا
أوس :صقر !
صقر :السواق برا امشوا
مرت هيام من امامه وحركت شعرها لتقهره
صقر :يا عطرك ذا
توقفت :وش فيه ؟
صقر :خايس
هيام :طبعًا ما تعرف بالعطور ريحتك اوراق وشغل
صقر :افضل ريحه بالحياه
أوس :الحين وين بنروح؟
هيام :قلت لك عن السكن
أوس :اي معليك ان شاء الله ما بنقصر
ابتسمت :شكرًا
نظر لها صقر بأستغراب وفي نفس اللحظه توقف أوس :وقفوا بربط جزمتي
هيام :اربطها عقدتين عشان ما تنفك
اقترب صقر منها وهمس :اكتشفت صفه جديده فيك
هيام وهي تلعب بشعرها :وش ؟
صقر :منافقه بوجهين
هيام :صفات وهميه يخلقها عقلك الباطن أنا اعامل الناس بمثل ما يستحقون
أوس :المعامله بالمثل ؟
هيام :بالضبط
أوس :انا مو معاك بذي النقطه ديننا سمِح ويأمرنا نعامل الناس بمثل ما احنا نبيهم يعاملونا
ابتسمت :صح
ثم نظرت لصقر بحده :يا ليت بعض الناس يتعلمون
صقر :شوف بالله، انتِ تعلمي عن الحجا...
قاطعه أوس :صقر شكلك عطشان اجيب لك مويا ؟
صقر :امش المويا مع السواق بالسياره
خرجوا من المطار فأشار صقر على السياره :ذيك
تنهدت هيام :نفس السياره الي كان يحبها العم بندر ...الله يرحمه
أوس :هي نفسها
هيام :صدق ؟
صقر :اي بس أنك غبي...
أوس :صقر !
صقر :ما لاحظتي رقم اللوحه
ركبت هيام السياره
صقر :اركب قدام
أوس :وانت ؟
صقر :سيارتي هناك بالمواقف
أوس :طيب
ركب أوس بالامام وعم الصمت لفتره
هيام :ماقلت لي عن السكن
أوس :فيه بيت عند المزرعه صغير بس بيناسبك
هيام :ما كان موجود
أوس :بنيناه بعدك
تنهدت ونظرت للنافذه :فيه أشياء كثير تغيرت بعدي
أنتبهت لسياره بها مجموعه فتيات وسائقتهم أيضًا فتاه فأبتسمت :مثلًا البنات يسوقون
أوس :تعرفين تسوقين ؟
هيام :أكيد وعندي رخصه ألمانيه بس اتوقع لازم أطلع سعوديه صح ؟
أوس :ولله علمي قليل بذا الموضوع شوفي صقر أكيد يعرف
تأففت :ما فيه الا هو يعرف ؟
ابتسم أوس :تراه طيب بس أنه يبان قاسي لأنه تعود على الشخصيه الاداريه
هيام :ترا ما اخذت عنه نظره سيئه لذي الدرجه لا تخاف
أوس بتردد :على طاري صقر ،أنا متفق معاه بموضوع الحجاب لأنه أبوي الله يرحمه مثل ما تعرفين كان يحبك مثل بناته وهو إنسان ملتزم بتعاليم الدين ولا كان رح يرضى عليك ذا الحال ...عالعموم نتناقش بعدين لا أكراه بالدين
تنهدت هيام :تعرف كنت متوتره من الموضوع وضغط صقر فيه بس بعد ما تكلمت حسيت اني ارتحت
أوس :واجبنا ،وحتى لو تبين وحده تناقشك بنت يكون أفضل لأنها رح تتفاهم معاك أحسن مني ،ما أعرف كثير بذا الموضوع
ابتسمت هيام بسخريه :انت ما تعرف شي بالحياه؟
أوس :أعرف الرسم والفن
هيام :منجد؟
أوس :اي ،حتى درست كليه فنون
تنهدت بسعاده :احلى شعور لما تدرس شغفك ويصير وظيفتك
أوس :واضح من التنهيده أنه شغفك وظيفتك
هيام :معرف هو شغفي ولا أقتداء بالعم بندر بس كنت احب اداره الاعمال ودرسته
ابتسم :لقيت وين راح عني عرق أداره الاعمال
هيام :ما تحبها ؟
أوس :ولا أطيقها ،أحس نفسي تميل لهدوء الرسم على ازعاج الاجتماعات والازمات وتحب عشوائيه الالوان على التنظيم المفرط بالمكاتب والشغل
هيام :دامك رسام أكيد صبرك عالي ،تقدر لو صار غلط بلوحه تعيدها ؟
أوس :الصبر أني أخذ على لوحه متحمس لها شهور كثيره ،لكن أني أعيد اللوحه من الصفر مستحيل
هيام :ليه؟
أوس :الالهام يجي مره وحده ،مثلًا لو جيت وبعيد رسمه توني خلصتها مستحيل تكون مثلها
هيام:رح تكون أفضل لأنك رح تركز على الاغلاط وتتجنبها
أوس :أحب أغلاط لوحاتي وأبرزها أكثر لأنها تذكرني إن الحياه مو مثاليه دايم
هيام :هذا الي اخذته من العم بندر
أوس :ايش؟
هيام :الحكمه
ضحك أوس وعدل نظارته بحرج:لا مستحيل ما وصلت لمستواه ولا رح أوصل
توقفت السياره :وصلنا
نزل أوس وفتح الباب لهيام فخرجت ووقفت مقابله ريثما يحضر السائق حقيبتها ونظرت لوجهه بحزن :لما قال لي صقر إن العم بندر توفى حزنت كثير لأني ما ودعته بالشكل المطلوب ولأني كنت متأكده مارح يكون شخص مثله بالحياه ،لكن لما شفتك وتكلمت معاك حسيت فيه كثير منه ،شكرًا
أوس :العفو
دخلت المنزل وكان كما وصفه صغير لكنه جميل ،وضعت حقيبتها واخرجت هاتفها ،فرّن في يدها وابتسمت :نجد توني كنت بدق عليك
نجد :من قوه الصداقه مسوين تخاطر
هيام :شكله
نجد :شلونك ؟ بترجعين ولا لا؟
هيام :لا باقي ما شفت شي بحتاج ثلاثه ايام الى اسبوع عشان اخلص كل شي
نجد :اجي عندك؟
هيام :لا اخرتها بنرجع كلنا مغير تكاليف زياده
نجد :نتمشى بالسعوديه مافيها شي
هيام :بشوف ،الحين بنام عظامي تكسرت من الصباح طالعه
نجد :فتشي البيت يمكن فيه سماعات تنصت
هيام :وش ذي الفكره الغريبه ؟
نجد :يمكن استخبارات ويبغونك بمهمه سريه اكيد يتنصتون عليك
هيام:شفتي فلم جديد صح؟
نجد :اي
هيام :ارتاحي مافيه وحتى لو فيه ما عندي اسرار انا
نجد :صدقيني يمكن فيه
هيام :نجد بقفل الجوال بيطفى
نجد :طيب ،كلميني الصباح بدري
هيام :ان شاء الله
اغلقت الهاتف ودخلت الحمام لتغسل وجهها ،وقفت امام المرآه ثم تذكرت كلام نجد :لا مستحيل ...
سارت خطوتين ثم عادت ونقرت على على المرآه :الو؟
بحثت في أرجاء الحمام ثم خرجت :هلوسات نجد لا اكثر مستحيل يراقبوني مستحيل
انتبهت للوحه معلقه فأخرجتها ونظرت لها من الخلف ثم علقتها مره اخرى :هيام ركزي خلاص
...
سعيد :اشواق
اشواق :هلا
سعيد:وش رايك دام العيال نايمين نسوي قهوه ونجلس
اشواق :قهوه بذا الوقت
سعيد :عادي نسهر الليله
اشواق :وتداوم مواصل بكره
سعيد :ما عندي شغل كثير بخلص على عشره واطلع
اشواق :طيب تبي قهوه تركيه ولا عربيه ؟
جلس على الكنبه :بذوقك الحلو
ابتسمت اشواق: تمدحني ولا تمدح نفسك
سعيد :كيف امدح نفسي؟
اشواق :قصدك ذوقي حلو اني اخترتك
سعيد :لا امدحك امدحك ذوقك حلو دايم تلبسين أحسن لبس وتكشخين احسن كشخه ياحظي فيك
عادت بعد قليل ووضعت الصينيه على الطاوله :ما حطيت سكر ما تحبه انت صح؟
اخذ الفنجان:ما يحتاج انتِ سكري
اشواق :انتبه باقي حار
سعيد :فيه ذيك الحلاو الي جبتها
اشواق :اي وحده؟
سعيد :الي علبتها حمراء
اشواق :اي عرفتها
سعيد :ولا عليك امر جيبيها
اشواق :ابشر
عادت بعد قليل :ما لقيتها شكلهم اكلوها
سعيد :خلاص فداهم اجلسي بكلمك
جلست بجانبه واخذت فنجانها وارتشفت منه:هلا
تنهد :ولله مدري كيف اقول لك
اشواق :عادي سعيد قول
سعيد :صارت مشكله بالشغل
اشواق :مشكله كيف؟
سعيد :واحد سرق المشروع الي انا مسويه وقدمه ويوم جيت قدمته اتهموني اني سرقته ،معد صاروا يوثقون فيني عشان كذا شغلي قليل ذي الفتره وحتى راتبي...
اشواق :طيب خلني اكلم واحد من اعمامي يوظفك عندهم احسن من ذي الوظيفه يذلونك فيها
سعيد :لالا اشواق ابي كل شي بجهدي
اشواق :طيب كيف اساعدك؟
سعيد :تعرفين الحياه الزوجيه مشاركه امس نزل الراتب واليوم ضاع نصه ماني قادر اشيل مصاريف البيت لحالي
حك خلف رأسه :لو تقدرين يعني تسلفيني وبردها بعدين،ما كان ودي اقول لك وتحسين اني ...
قاطعته وامسكت يده :اكيد بسلفك وحتى لا تردها دامك بتصرفها ببيتنا وعلى عيالنا عادي خلها
حضنته :انا معاك بكل وقت مستحيل احبك اقل بسبب تافه كذا
سعيد:شكرًا
ابتعد عنها وقام:انا بنام
أنصدمت من ذهابه وتنهدت خلفه :تمام
خرجت نهى :ماما
اشواق :هلا
نهى :شفيك؟
اشواق :لا مافيني شي
نهى :بابا زعلك صح؟
اشواق :لا ما ازعل منه بس تعبانه شوي
نهى :بتشربين قهوتك ؟
قامت اشواق :لا
نهى :تمام انا بشربها
اشواق :اغسلي الفناجين ونامي لا تشربينها
نهى :طيب
في صباح اليوم التالي
سيف :اوصلكم المدرسه اليوم ؟
نهى:لا عادي جهاد بيوصلنا اليوم
سيف :طيب
نهى:اقول لك سر ؟
سيف :وشو ؟
نهى :ابتهاج اخذت سياره جهاد وبنداوم فيها
سيف :بتداومون فيها يا سلام وهو مارح يلاحظ شي
نهى :نايم توه جا من الدوام الفجر وحط مفتاحه بالصاله ونام وهي سرقته
سيف :واخوها معاها صح؟
نهى بسخريه:اي محرم
سيف :بتجننوني صراحه
نهى :ماهو معاها اكيد مدرسته قريبه يروح مشي
سيف :احسن خل ينحف ذا الدب
نهى :امم هذي هي تدق انا بطلع وانت طف المكينه لا تخرب
سيف :نهى اي مكينه؟
نهى وهي خارجه :مكينه القهوه ايش يعني ؟
خرجت وصعدت السياره :بنات اشتقت لكم
ابتهاج :ليه اشتقتي لجوانا وانتِ امس معاها ؟
نهى :ابتهاج كنتِ نايمه يوم ارسلنا لك وبعدين خالي صقر وجدتي لقيناهم مسنترين عند الباب ما خلونا حتى نتنفس
جوانا :صدق ابتهاج انتِ معاي بنفس البيت وتعرفين صقر الحيوان كيف
نهى :هاه انتِ كل يوم معاها بالبيت بس انا عايشه لحالي
جوانا :يا الله احس اني شخصيه مهمه جوانا آل محسن ياحظي بس يا حظي
ابتهاج :طبعًا جوانا ما ترتاح لين تقول اسمها كامل
نهى :جبت لكم قهوه حلواتي ،حركي ابتهاج بسرعه بابا الحين بيطلع
جوانا :قهوه ايش ؟
نهى :صبر لخبطت هي واحد امريكانو وواحد v60 وواحد اسبريسو بس وينهم مدري
جوانا :اعرف من الطعم عطيني اذوق
ابتهاج :اششش ،جهاد يدق جهاد يدق يا بنات
نهى :ردي بسرعه وحطي التهمه على سهيل
فتحت الهاتف وهي تنظر للطريق:الو
جهاد :ابتهاج شفتي بدلتي؟
بلعت ريقها :لا ليش؟
جهاد :بغيت اغسلها
ابتهاج :بالمغسله تغسلها ولا بالبيت ؟
جهاد :بالبيت اكيد بعطي الشغاله
ابتهاج :مدري اسأل ماما
جهاد :قومي انتِ دوري لها
ابتهاج :انا رايحه للدوام
جهاد:نسيت ،مع مين بتداومين
ابتهاج بتوتر:مع سيف اخو نهى ولد اشواق بنت عمنا بندر
جهاد :طيب ماله داعي شجره العائله
ابتهاج :انت بترجع تنام صح ؟
جهاد :احتاج قرن كامل اشبع نوم
ابتهاج :نوم العوافي حبيبي
جهاد :الله يعافيك
اغلقت الهاتف وتنهدت :كنت بنقفط باللحظه الاخيره
انفجرت جوانا ضاحكه :اخ ابتهاج وشو ذا الهبد
ابتهاج :لا تلوميني جوانا نفس شعورك لما سرقتي نظاره صقر
نهى :مستحيل اي شي يخص خالي صقر مشاعره غير رعب رعب كأنك تهربين من سفاح
جوانا :عاد اخر شي خبيتها بشرشف جدتي ويوم لقيها ما قال شي لأن جدتي مهجدته
ابتهاج :جدتي هجدتنا كلنا مره دخلت علي ارقص مصري وضربتني بعصاتها رجلي زرقا للحين
نهى بتباهي:انا تحبني
جوانا :اي صح على طاري الحب امسكي
نهى :ايش؟
جوانا :روجك يوم امس فتشوا خبيته لك وانتِ بالحمام
نهى :انفداك خالتو جوج
ابتهاج :اكثر جمله فيها تضارب ثقافات
جوانا :وعلى طاري المضاربه ودي نطلع احنا وملاذ ووسن ونرجس ابي اشوف هوشه نرجس وملاذ
نهى :ياخي عندك ربط مواضيع عجيب جدًا
ابتهاج:ااء ...بنات
جوانا :وش فيك؟
ابتهاج :يبدو اني مسكت خط القصيم...