كُن بقربي فإن الروح هائمة

5

لمحةٌ من الماضي...
دخلت اشواق المنزل فنادتها والدتها :تعالي
اشواق :هلا يمه
ام ثنيان :ابوك يبي يكلمك
اشواق :الحين بجي
وضعت حقيبتها بغرفتها وذهبت اليه :سم يبه
بندر:ابكلمك بموضوع
اشواق :وش ؟
بندر:فيه واحد اعرفه من القصيم كان بيننا شغل زمان واليوم جاني يبيك لولده
اشواق :مين؟
ضحك بندر :ما تعرفينه واحد
اشواق :مدري الي انت تشوفه
بندر :ترا عادي لو تبين تركزين بدراستك افضل
الجده وضحه :ترا عادي تقدر الوحده تدرس وتتزوج مابه ضرر
بندر :بس انا معطي بنتي الحريه تدرس وتتزوج ولا تدرس وما تتزوج
الجده وضحه :ولله انا شوري انه واحد لقطه ما يتفوت بعدين عمرك ١٧ القطار بيفوتك
بندر :ما يفوت ان شاء الله
الجده وضحه :واذا رفضت بتقطع رزق الرجال بيقولون وش فيه ذا ورفضته اكيد به بلا
بندر :يا يمه لا تضغطين عليها انا ابي رايها هي هاه اشواق وش رايك ؟ مستعده للمسؤوليه والحياه الجديده ولا باقي
اشواق :اذا انه كويس عادي
بندر :خلاص اجل الله يكتب لنا التوفيق
اشواق :اذا ما تبون شي بروح غرفتي
بندر :لا روحي ريحي ونامي وان شاء الله المغرب بيجون يشوفونك
قامت اشواق :ان شاء الله
دخلت غرفتها وابتسمت بأتساع لأقترابها من حلمها ،ذلك الفستان الابيض الذي سيكون بوابة عبور لحياة جديده بظنها انها أفضل
دخلت عمتها المقاربه لعمرها :وش قالوا لك ؟
اشواق :فيه واحد بيخطبني
ساره :وافقتي ؟
اشواق :اي وافقت بصير متزوجه زيك
عانقتها ساره :الله يوفقك
اشواق :لازم تساعديني بالتدبيش معرف من وين ابدا
ساره :بساعدك بكل شي معليك
...
نهى :سيف ! ترا بس عشرين دقيقه الا انت عندي تكفى
قام سيف وتنهد :طيب
نهى :ترا بقيت لك كيك وحلا
سيف :كويس
اغلق هاتفه وخرج من الغرفه فسمع صوت والده يتحدث بالهاتف :زوجتي نايمه بجيك الحين
توقف قليلًا ليسمع أكثر وكان والده يقول :انا اعرف اني زعلتك يا حياتي بس ذي البقره الي عندي بدت تحس اني ابعد عنها
مشاعل :طيب طلقها مو عاجبني الي يصير
سعيد :ما يصير ما يصير اطلقها بدون سبب وهي مو مقصره بشي
مشاعل :كيف مو مقصره ؟ مو دايم تقول لي انا زوجتي مقصره معاي ولقيت عندك الي ناقص كيف مو مقصره وتتركها ؟
سعيد :مو مقصره بس صارت ما تعجبني غبيه وما عندها حياه ووجهها مستف...
قاطعه سيف :يبه
سعيد :الملفات برسلها بالايميل
سيف :ابي مفتاح السياره
سعيد :ماهو معاك ؟
سيف :لا كان معاك اخر مره
سعيد :هاك ،وثاني مره لا تقاطعني وانا اكلم مكالمه عمل مهمه
سيف :معليش ما كنت ادري انها مكالمة عمل مهمه ،بس الحين عرفت
سعيد :وبعدين وش تبي بالمفتاح بذا الوقت؟
سيف :بجيب نهى
سعيد :وينها نهى ؟
سيف :مع خالاتي بالشاليه
سعيد :جيبها على طول للبيت
سيف :طيب
خرج وركب السياره ليحاول استيعاب ما سمعه بالداخل ،مستحيل ! الخيانه تتراقص في بيتهم على ألحان الهدوء وفي ضوء الغفله و عذرها أقبح من ذنبها .كيف لم يستطع قمعها ،صرخ موبخًا لنفسه :انا ليه ما علمت عليه ؟
خطر بباله ضحكة امه وخاف كسرها :بس امي بتزعل ...طيب مصلحتها ذي مستحيل تقبل
تنهد ووضع رأسه على المقود بقلة حيله :يارب ،ليتني ما طلعت من الغرفه
رن هاتفه ونظر له وكان اسم نهى يضيء الشاشه :وانتِ بعد ليتك ما دقيتي ولا طلعتي حتى
رد عليها وصرخ بها :نعم ؟ قلت لك بجيك وش ذا الازعاج ؟
نهى :طيب بس بتأكد منك ،شفيك معصب ؟
سيف :مافيني شي
نهى :طيب
اغلقت هاتفها :بيجي
ساره:قلتي له اننا معاه ؟
نهى :ما قدرت مدري ليه كان معصب
ملاذ :ذي السياره الملعونه كل شوي تخرب ببيعها واشتري غيرها خلاص
نهى :وسيارة نرجس؟
وسن :راحت تودي شروق وسهام ومعاها خواتها ما تكفينا سوا
جوانا :الحين بروح اقول لثنيان السالفه عشان يشتري لي سياره
ملاذ :ليت الحياه كذا سهالات ليتها
ساره:طيب وسن ليه ما تسوق ؟
ملاذ :دلوعه وخوافه
وسن :كيفي حريه شخصيه
ساره :المشكله السواق مسافر له شهرين
ملاذ :حياتنا بدونه ولا شي طلع هو اهم واحد بالبيت اهم حتى من وسن
وسن :وش دخلني انا
ملاذ :مدري منرفزتني بدون سبب
وسن :حرام انا اختك الصغيره الوحيده
جوانا :فقدتي ذي الميزه من ١٦ سنه
نهى :ياخي وش ذا الخالات النفسيه خلاص روقوا عادي مشكله وتعدي سيف بالطريق
وسن :قاعدين بشاليه مدري وين موقعه الساعه ١٢ الليل وسيارتنا خربانه وتقولين روقوا ؟
نهى :الله يحفظنا ان شاء الله
ملاذ :احنا اربع كل وحده معاها فردتين حذيان ما بنقصر لو دخل احد علينا نقنص راسه
رجفت جوانا :وش ذي الفكره المخيفه جتني قشعريره ان شاء الله ما يدخل احد
ملاذ :فكري بكل الاحتمالات
جوانا :حسبي الله عليك يا غاده حسبي الله عليك ونعم الوكيل الحين هي راقده واحنا هنا مقيلين
وسن :مصطلح خاطئ مقيلين تُستخدم الظهر بالليل قولي سهرانين
جوانا :كلي زق ذكرتيني بواجب الكفايات اكتب مذكرات
ساره :اذا رجعنا البيت بالسلامه اكتبي عن ذا اليوم
نهى :عطشانه
جوانا :كرتون المويا شالته نرجس ملاذ البقره قالت لها لأنها ما تبي تأذي سيارتها الكلاسيكيه الحساسه الي ما قد مشت اكثر من عشره كيلو الا وخربت
ملاذ :انا كم مره بقول قطعها نادره وما اقدر اصلحها بسرعه؟ كم مره خلاص ياخي تلوموني كذا !
ساره:نطي اشربي من المسبح
نهى :صدق عادي ؟
ملاذ :لا فيه كلور محنا فاضين نطلع قصه خالات يقتلون بنت اختهم اخر الليل
نهى :يمه صدق كلكم خالاتي يعني وش دراني منتم مخططين علي تذبحوني
جوانا :يقولك الخاله جزء من الأم اخرتها تقولين عنا كذا يا حسافه بس
نهى :اذا صرت عند امي قولوا كذا
ساره :لحظه انا ماني خالتك انا عمه امك
نهى :اجل وش تطلعين لي ؟
ساره :مدري بكيفك
نهى :جده
ساره :اقسم بالله ادفك بذا المسبح على وشو جده ؟
ملاذ :غاده ذي خلونا نرجع البيت اقسم بالله لأوريها نجوم الليل بعز الظهر
نهى :سيف يدق سيف يدق
جوانا :ردي
نهى :ايوه سيف ،انت برا ؟
سيف :اي اطلعي
نهى :طيب بقول لك شي
تنهد :قولي
نهى :خالاتي معاي خالتي ملاذ سيارتها خربت
سيف :طيب
ساره :وش يدرينا انه عند الشاليه نفسه ؟
نهى :انا اعرف كيف ،سيف دق باب الشاليه على لحن النشيد الوطني عشان اتأكد انك عندنا
سيف :ماني اوركسترا عشان الحن اطلعوا
نهى :سيف ولله خايفين تعال دق وقول يا نهى اذا عرفت صوتك بطلع
سيف :لا حول ولا قوه الا بالله طيب جيت جيت
دق الباب وصرخ :يا نهى
نهى :هذا هو
فتحت الباب وعانقته :الحمدلله جيت
سيف :اخلصي علي
خرجت ساره وذهبت للباب الامامي فأنتبهت لها نهى :خير تركبين قدام !
ساره :انا اكبر وحده
نهى :بس انا اخته يعني ذي سيارتنا
سيف :خايفين اجل ؟ ولله الخايف اذا لقي سياره يعرفها لو يتعلق بالتنده عادي
نهى :سيف !
سيف :اطلعي بس بلا مبزره
ساره :بس عشان ما تبكين عند امك بروح ورا
اوصل سيف خالاته لمنزلهم ثم توقف عنده منزله فنظرت له نهى :بسألك
سيف :هاه ؟
نهى :يوم جيت لنا كنت قد بكيت ؟
سيف :ايش ؟
نهى :يعني قبل ما تجي بكيت
سيف :لا ليه ابكي
نهى :مدري وجهك كان مورم شوي
سيف :كنت نايم وصحيتيني
نهى :اكيد
تنهد :اكيد
نهى :شكله كان حلم حلو عن ابتهاج بس قاطعته
سيف :انزلي ولا اخليك تشوفين احلام العصر بالحقيقه
نهى :اوكي،اوكي،اوكي...
نزلت وهي تكرر الكلمه حتى ضربت بالباب
سيف :ذا الي ناقص بعد!
...
خرجت وسن من غرفتها وذهبت للمطبخ المشترك ،سمعت صوتًا خلفها فغطت رأسها بالهودي
راجح :حركات بنت اشواق عندنا
عقدت حاجبيها وهي لا تزال تعطيه ظهرها
راجح :تعالي سلمي انا زي عمك
التفتت وسن لعله يكتشف الحقيقه ويذهب لكنه ما زال مصرًا :نسيتيني ؟ انا راجح انقذتك يوم سرقتوا سياره جهاد وهربتوا
وسن :انا مو نهى
راجح :اجل اسمك دانه صح ؟ معليش غلطت
وسن :انا وسن
راجح :ماشاء الله طلعوا مسمينك على خالتك
وسن :انا خالتها انا خالتها يالغبي وخر!
راجح :كيف خالتها كنك بزر على ذا الطول
وسن :وخر عن طريقي ولا ادخل ذا القلم بعينك
ابتعد راجح :يلا تفضلي
وسن :الحقني وادخل القلم بعينك
راجح :طيب
لحقها خطوتين فالتفتت :يعني لا تلحقني يالغبي !
راجح :طيب
صعدت لغرفتها واغلقت الباب :يارب يارب ابي معجزه تقنع جدتي ان عيال عمي يهجون عنا
في صباح اليوم الثاني استيقظت على طرق جدتها :يا وسن ،قومي
ارتعبت من أن تكون عرفت ما حصل بالامس :حسبي الله عليك يا راجح
الجده وضحه :قومي بنات عمك يبونك
استجمعت قوتها وفتحت الباب :هلا
الجده وضحه :لا تحسبين انك عاطله وانتِ سحبتي من الدراسه انزلي وروحي مع بنات عمك تحت حقين المشغل جو بيزينونكم اليوم عندنا عزيمه
وسن :ما سحبت من الدراسه ذي ملاذ
الجده وضحه :الي هو روحي تحت جو حقين المشغل
وسن :وشو عزيمته ؟
الجده وضحه :على تخرج غاده
وسن :غاده ؟
الجده وضحه :يا كثر اسألتك كثراه خلاص روحي
وسن :طيب بصلي ونزل
الجده وضحه :يا ويلي ويلاه يا ويلي ويلاه تنامين عن صلاة الفجر ؟
وسن :المنبه ما دق امس
الجده وضحه :انا بصحيك بلا منبه بلا هالخرابيط
وسن :ان شاء الله
صلت فرضها ثم نزلت اليهم :وش السالفه
غاده بسعاده :جدتي قررت تظهر حبها لي بذي الطريقه وحجزت لي كل خدمات الصالون وانتوا بس اظافر واحس اني ملكه
ملاذ :وي ما علموها
غاده :ايش يعلموني ؟
ساره :عزيمه على تخرجك يا ان خدودك بتنكرف كرف ركبي دروع
جوانا :ليه ؟
ساره :معارف امي كثير بتحط غاده بوسط المجلس ويلا كل ما يدخل يسلم عليها واقل احتمال اقل شي يخطبونها خمسه اثنين منهم سيئين وواحد مجهول المصدر وواحد كويس بس متزوج
غاده :الله لا يقولها لو يخطبني أمير من آل سعود ما تركت هادي 
ملاذ:ارسل لك على التخرج؟
غاده :لا باقي ،لا تذكريني الحين وخليني استرخي ينرفزني بس احبه
دخلت اشواق :السلام عليكم
وسن :حيها اختي العزيزه وينك مختفيه
اشواق :ولله مشغوله بالبيت
نهى :ماما ابي زيهم !
ابتهاج :هاه بتصيح البزره تعالي اجلسي هنا الحين بخلص ويجي دورك
ساره :اشواق دورك بعدي
في جناح اخر
جهاد :يمه
ام جهاد :تعال انا هنا
جهاد :وش تسوين
ام جهاد :اخذ العقد اللولو الي شريته بشهر العسل ولا الالماس الي شراه ابوك بنفاسي بسهيل؟
جهاد :مدري
ام جهاد :انت وش رايك مناسبه تناسبها ذكرايات شهر العسل ولا مناسبه تناسبها ذكرايات نفاس
جهاد :خذي العقد الي شراه ابوي بنفاسك بغاده
ام جهاد :اختك حظها اقشر يوم ولدت فيها كنا متهاوشين انا وابوك وما شرا لي شي
ضحك جهاد :الله يسعدك يمه
ام جهاد :وش اختار
جهاد :الماس
ام جهاد :اي حلو حلو
جهاد :طيب قبل ما انسى بكلمك بشي مهم
ام جهاد :هلا
جهاد :انا قررت قرار مصيري
ام جهاد :وشو ؟
جهاد :قرار مبني على مشكله
ام جهاد :هاو تحكى
جهاد وهو يدور :قلبي يحترق ودواه بنت
تركت العقد من يدها :وشو ؟
توقف ونظر لها :بنت ابي اتزوجها
ام جهاد :انت تبي تتزوج ؟
عاد لدورانه:اي
ام جهاد بسعاده :هذي ولله الساعه المباركه واليوم الوقت المناسب بدور لك بنت اليوم عاد بنات خالده يا زينهم بشوف لك منهم ولا بنات منيره احسن يمكن ...
جهاد :لالا لا
ام جهاد :هاه ؟
جهاد :شسمه ...
ام جهاد :وش ؟
جهاد :شسمه فيه وحده
ام جهاد :كنت تكلمها ؟ ليه ياوليدي تلعب ببنت الناس وتدخل علاقه اساسها حرام
جهاد :لا يمه الله يهداك ما دخلت علاقه ،هي صديقه غاده شفتها امس وأمسيت وأصبحت اذكر الله وافكر فيها
ام جهاد :كيف شكلها خلني اسأل غاده عنها
جهاد :لا غاده لا تعرف ولا ابي احد يعرف خليه سر لين تشوفين حال البنت ،اصلًا...
تنهد :يا خوفي تطلع متزوجه ولا مخطوبه
ام جهاد :الله لا يقولها بس اوصفها لي بشوفها اليوم بدور لها
جهاد :كانها ماء
ام جهاد :بلا وصف وجداني ابي اوصافها صدق
جهاد :صدق يمه كذا احس كأنها ماء ما اشوف فيها شي يجيني نوم عندها واذا بعدت ياهي نار توشّى بصدري
ام جهاد :يا كثر البنات بذا الوصف من وين اجيب لك ذي بالخصوص؟
جهاد :لا ذي غير اول ما تشوفينها بتعرفينها
ام جهاد :طيب عين خشم اي شي شفته حتى لو اصبع رجلها
جهاد :ولله عيونها ناعسه ،آه يالعيون الناعسه
ام جهاد :اي
جهاد :عطيني ماي بشرب احس الماي الي بجسمي تبخر
مدت له علبه ماء :اشرب اشرب
شرب من الماء ثم تنهد :بس يعني اذكر عيونها ناعسه ، توني أدري ليه الشعار يتغزلون فيها
ام جهاد :عيونها ناعسه وكنها ماء يلا الله يعين نبحث عنها بس عساها تستاهل
جهاد :ولله تستاهل شوفيني انا جهاد تعرفيني انا ولدك شوفي الحين كيف ارجف
ام جهاد :بسم الله عليك يا يمه بجيبها لك لا تخاف !
تنهد جهاد :يمه ترا قد قابلتها قبل يعني شفتها مرتين قبل والثالثه يوم عرفت انها صديقه غاده
ام جهاد :يعني تعرف وجهها اكثر
جهاد :لا ما اذكر
ام جهاد :متى شفتها ؟
جهاد :مره ولد اختها مدري اخوها ...يمكن ولدها
ام جهاد :الله لا يقولها
جهاد :كان بالشارع بغى ينصدم ومسكته وهي طلعت للشارع بلا ستر ولا غطى ،احسب انها هي كذا كاشفه بس دخلت وطلعت شوي محجبه والمره الثانيه كنت مرابط عند افتتاح محل طلعت هي صاحبته ومره امس جت بالشاليه
ام جهاد :يعني ما يحتاج نظره شرعيه
جهاد بتفاعل :لا وشو يمه مقدر ابي اشوفها
ام جهاد :امزح
ام جهاد :ما تعرف اسمها ؟
جهاد :اسمها ...اسمها سهام اي سهام
ام جهاد :سهام بدورها لك انت بس ارقد وارتاح ما تجي من الدوام الفجر إلا وخبرها عندك
جهاد :يعني تقولين وافقت ولا لا ؟
ام جهاد :لا وش توافق وهي ما درت عنك كذا بس بتعرف على اهلها واقول لهم انك تبي بنتهم
جهاد :اي اي ابيها
ام جهاد :يلا بس ارقد ولا سو اي شي دوامك الليل
جهاد وهو خارج :مش هعمل حاجه غير اني بفكر فيه
ضحكت ام جهاد :الله يحفظك ،ان شاء الله نشوف هالرومنسيه لاتزوجتها
عاد جهاد :شدعوه يعني ما جتني الرومنسيه إلا الحين
قبل خدها :هاه هذي رومنسيتي مع امي
ام جهاد :خلاص بس روح ابا اخلص اشغالي قبل العصر واتحرى للبنت مثل ما يتحرون لهلال رمضان
جهاد :ولله انها اجمل من الهلال والبدر ،شوفي اذا تزوجتها بروح فيها عند نالد الفيصل واقول له يلا عطني شعر بذي التحفه
ام جهاد :الله يهديك خيالك واسع رح ارقد بس
جهاد :ابشري بس يمه لا تورينهم صوري تكفين تكفين تصويرك ...
ام جهاد :شفيه تصويري ؟
جهاد :حلو بس الاوقات غلط يعني عادي وريهم صورة العسكريه ،ولا لا لا تورينهم اي صور قولي لهم شوفوه بالنظره الشرعيه
ام جهاد :طيب طيب بس ترا لازم جدتك توافق عليها
جهاد وهو خارج:معليك بتوافق على ضمانتي
ام جهاد وهي تحدث نفسها :ايام الخير جايه يا بختك يامزنه يا بختك
...
هيام :الو مين معاي؟
الجده وضحه :انا
هيام :ما عرفتك مين انتِ
الجده وضحه :ام بندر وضحه
هيام :هاه وش بغيتوا ؟
الجده وضحه :واخزياه بس ما تعرفين تقولين هلا ولا مرحبا ماعندك ادب
هيام :اخلصي علي
الجده وضحه :ادعيك لعزيمه تخرج بنت ولدي تعلمي الكلام وتعالي
هيام :متى
الجده وضحه :الليله بعد المغرب
هيام :بشوف ان خلصت اشغالي لي خلق جيت
الجده وضحه :لازم تجين
هيام :ليه انا ضيفة شرفكم ؟
الجده وضحه :ولله ولا حتى ضيفة ...خلني ساكته بس
هيام :صحيح يقول لك الرد ممكن ينقصك وانت في زود
الجده وضحه :ماني فاضيه لحكيك الفاضي إن جيتي جيتي وإن ما جيتي بالطقاق
هيام :okay
نجد :مين كلمتي؟
هيام تقلد نبرة الجده وضحه :وضحه ام بندر
نجد :وش فيها ؟
هيام :تدعيني لعزيمه تخرج حفيدتها ،طبعًا ما تدعيني من طيبه قلبها اعرفها انا وراها بلوه
نجد :طيب روحي عشان البنات
هيام :لو هم دعوني بروح بس على دعوتها ولله ما اعتمد
نجد :غبيه انتِ ولا غبيه ما عندهم رقمك الجديد يدعونك
هيام :وكيف ذي طلعته
نجد :روحي هيام يمكن تغيروا
هيام :ما ودي
نجد :تكفين روحي
هيام :ليه وش بتسوين اذا جلستي لحالك ؟
نجد :انا بروح ارافق مع امي وانتِ وش بتسوين لحالك ؟ روحي واصلًا لو انتِ عارفه من قلبك انه وراهم بلوه روحي وخربيها فشليهم
هيام :تقولينها ؟
نجد :اي
هيام :طيب وش البس؟
نجد :مدري ندبر لك اي فستان
هيام :ابي اسود
نجد :ليه الاكتئاب؟
هيام :كذا ابي اقهر هذيك العجوز
نجد :طيب قومي نروح السوق
هيام :صبر عندي معاملات واوراق بخلصها لاحقين نروح الساعه خمسه العصر
نجد :طيب ...وش ذا يدق
هيام :اتوقع شجره ،وانتِ وش تتوقعين ؟اكيد انسان
نجد :اي بس قصدي مين
هيام :وضحه
نجد :ذا رقمها ؟
هيام :اشوف ،لا مو هو
نجد :برد ،الو
غيث :انا مطر ،قصدي غيث
ابتسمت نجد واستعدلت بجلستها :اي هلا ؟
غيث :لقيت مشتل يبيع بسعر ارخص وجوده احسن تبينه ؟
نظرت لهيام :مدري ،ترانا مو مره مستعجلين فيه خلاص
غيث :اي بس الرجال يقول لازم تقعد عشره شهور ...اسابيع عشان تكبر
نجد :بشوف بشوف خله عندك باللسته
غيث :برشمي ...قصدي ابشري
ضحكت نجد :طيب يصير خير
غيث :مع السلامه
نجد :مع السلامه
هيام بنظره غريبه :مين ؟
نجد :مين ؟
هيام :ولله مدري تجلسين وتضحكين مين ؟
نجد :غيث
هيام :يا سلام ،نجد ما ابي اشياء غلط بينكم
نجد :وش اشياء غلط ؟ مافيه شي انتِ تتوهمين بعدين تركت الدكاتره الي معاي بالعياده بحلاتهم وعقولهم واجي لذا ؟ بس يضحكني شطحاته تضحكني
هيام :شوفي انا لو ما كان فيه شي يخبونه عني كان قلت عادي بس ما تدرين يمكن يكون يمثل عليك عشان ترتاحين له وتقولين كل شي
ابتسمت نجد:هيام ترا ما اتكلم عن اسرارك عند احد ارتاحي من القلق الدايم
هيام :تراني اوثق فيك بس ما اوثق فيهم
نجد :اعرف
هيام :ما ابيك بس تعرفين ابيك تصدقين
نجد :ومصدقه بعد
تنهدت هيام :اقول بس الشغل لاحقين عليه خلينا نطلع السوق
نجد:بس اي سوق نروح ؟
هيام :كلمي غيث
نجد :هيام !
هيام وهي خارجه:لا صدق اتكلم خليه يساعدنا
نجد :طيب
اتصلت عليه :الو
غيث :الو
نجد :غيث
غيث :هلا
نجد :عطني اسماء اسواق تبيع فساتين تصلح للعزايم
غيث :فساتين ؟
نجد :اي يعني مو مره اوفر كذا فساتين بسيطه ناعمه
غيث :بشوف وبرسل لك مواقعهم
نجد :ابيها الحين لو سمحت
غيث :عشر سنوات بالكثير وهي عندك
ضحكت نجد :عشر سنوات تبني فيها عشر مولات
ابتسم غيث :قصدي عشر دقايق
نجد :تمام
غيث :مع السلامه
نجد :مع السلامه
وضع هاتفه جانبًا ونظر لحاسوبه فورًا
صقر :ماشاء الله متى صرت تشتغل لشخصين بنفس الوقت ؟
غيث :هاه
صقر :مو كنت باليالله تلحق اشغالي؟
غيث :لا ما اشتغل لأحد بس اساعد
صقر :تساعد مين؟
غيث بتردد :نجد ...وهيام
صقر :بأيش تساعدهم من وراي ؟ تغتالوني ؟ تسرقون كل املاكي ؟
غيث :لا اعرفهم على الرياض يعني مثلًا الحين يبغون محلات فساتين بس ما يعرفون اعلمهم
صقر :صدق؟
غيث :اي
حك حاجبه الايسر بتفكير ثم قال :زين زين منها نعرف مشاوريهم ،بس ليه يبون فساتين ما قالوا لك ؟
غيث :لا بس اتوقع ...خلاص
صقر :قول توقعك عادي ما عندي حصر اراء انا
غيث :هم الحين بيسوون عزيمه على تخرج بنت عمك
صقر :بيحضرون؟
غيث :اظن اظن
صقر :ومن وين سمعوا طيب!
غيث :مدري
صقر :اعرف ذا الموضوع وجيبه لي
غيث :بس...
صقر :ما احب كلمه بس !
غيث :ان شاء الله
...
سعيد :سيف ،يا ولد
سيف :هاه
سعيد :ترد على ابوك كذا ؟
سيف :اي
سعيد :ما ربيتك كذا انا
سيف :بس ربيتني ما اكبر المواضيع لا تكبر ذا الموضوع
سعيد :طيب وش رايك البس غتره بيضاء ولا شماغ احمر ؟
سيف :لو فيه شماغ اسود زي قلوب بعض الناس
سعيد :ولد !
سيف :ذي الحقيقه فيه ناس حولنا ما ندري بسواد قلوبهم
سعيد :انت اليوم بك بلوى لسانك طال
تنهد سيف وكتم غضبه :طيب معليش حقك علي ،البس الغتره البيضاء
سعيد :وين الكبك حقك الي عطاك خالك هديه ؟
سيف :لا تاخذه
سعيد :ليه ؟
سيف :عيب خالي عطاني انا هديه فجأه انت تلبسه بمناسبه عندهم عيب
سعيد :ماهو انت تعلمني العيب والغلط !
سيف :صحيح انت منهجك سليم ماشاء الله الحمدلله على نعمة وجودك بالحياه وليت كل الناس نفس تفكيرك كان الدنيا بخير
سعيد :اخلص علي وجيبه
سيف :بالدولاب
سعيد :جيبه انت انا قلت لك جيبه ما قلت علمني وينه
سيف :طيب لا تنافخ بجيبه
سعيد :ولد ترا ولله اشلوطك بذا العقال لعله يرد لك عقلك
اخرج الكبك واعطى والده :لا تضيعه هديه ذا
سعيد :ما اضيعه ما اضيعه ماني زي امك كل شي تضيعه وتقول ما انتبهت
سيف :تراها زوجتك مو خدامه لك تحفظ اغراضك
سعيد :والزوجه ما تحفظ اغراض زوجها ؟
سيف :الا بس مو مره تصير مسؤوله عن كل شي بعدين تراها ام يعني اكيد عندها مشاغل ثانيه
سعيد :وين مشاغل مافيه الا انت واختك ،ما ترضع ولا تغير ولا شي كلكم كبار ما اشوف امومه ولا شي
نظر سيف لوالده طويلًا ثم قال :اطلع بغير
...
ام جهاد :غاده
غاده :هلا يمه
ام جهاد :جاهزه صح ؟
غاده :اي
ام جهاد :طيب اذا جو صديقاتك عرفيني عليهم
غاده :ليه؟
ام جهاد :اي احد لك معرفه فيه ناديني بسلم عليه طيب؟
غاده :يمه وش ناويه عليه ؟
ام جهاد :بس ابي اشوف صديقاتك وتفكيرهم هذا من حذر الام ابي اقيم علاقاتك فيهم
همست بداخلها :وعلاقات اخوك
غاده :ابشري
ام جهاد :الله يبشرك بالجنه
ام ثنيان :السلام عليكن ،وش ذا الزين يام جهاد
ام جهاد :شرايك بس؟
ام ثنيان :ولله كشخه العقد هذا الي بنفاسك بجهاد
ام جهاد :اي ،تعالي بقول لك سر
اقتربت من ثنيان :هاه
ام جهاد :تدرين ليه لبسته ؟
ام ثنيان:ليه
ظهرت دخلت ساره من بينهم :محبوبه ومبروكه
ام جهاد :ساره عساك ب... بخير ! خرعيتيني احد يدخل كذا
ساره :ولله لا شفتكم تهامسون احس فيه شي
ام جهاد :مابه شي مابه شي بس نتكلم عن رتيل ما نبي نعلي صوتنا وتسمعنا
ساره :اي شلونها؟
ام ثنيان :ولله طيبه الحمدلله المستشفى الي بالخارج قالوا لها تراجعهم قبل الدوره بأيام قليله يبون يشوفون كيف البويضات عندها بأيام التبويض
ام جهاد :الله يكتب لها الي فيه كل خير
ساره :امين امين
تنهدت ام ثنيان :اي ولله يكتب الي فيه كل خير ويريحها ويريحنا ثنيان ما يقعد من مستشفى لمستشفى
الجده وضحه :لو يتزوج الثانيه يغدي يروح المستشفى الا ولاده
ساره :لا عيب يمه لا نتدخل بينهم بعدين رتيل بندر اخوي الي خطبها لثنيان بالخصوص لا نجيب وحده فوق خياره كأننا نكسر بكلمته
الجده وضحه :بندر اخطأ كثير بعمره يمكن رتيل بعد خطأ
ام ثنيان :ماهي خطأ ولا قالها الله زي النسمه البارده على قلبي وثنيان ما يشوف غيرها
الجده وضحه :انا عطيتكم رأيي وعاد انتم بكيفكم تحملوا العواقب
ام جهاد :لا ان شاء الله مابه ولا عواقب
في جهه أخرى عادت للجناح
ثنيان :رتيلي شفيك رجعتي؟
رتيل :احس اني تعبانه شكلي معد بنزل
ثنيان :توك تقولين متحمسه وش صار؟
نزعت اقراطها :ما صار شي
ثنيان :رتيل مين مزعلك ؟ جدتي صح؟
رتيل :امزح معاك بس بغير الحلق هذا حسيته ثقيل
ثنيان :خرعتيني احسبهم زعلوك
ابتسمت رتيل:اذا زعلتني الدنيا يراضيني ثنيان
اقترب منها وهو يردد:يا بعد كبدي ولله يا ب...
قاطعته رتيل :وخر ! لا تمسك خدودي وانا تعبت على الميكب
ثنيان :رتيلي!
رتيل :ابعد بعيد هناك عضلات وجهي بتتشنج من كثر ما تقرص بخدودي
ثنيان :تراك تجرحيني
...
في الاسفل
غاده :يمه
ام جهاد :هلا
غاده :هذيك صديقتي جت
ام جهاد :شسمها ؟
غاده :اسرار
نظرت لها ام جهاد قليلًا ثم قالت :مغير ذي
غاده :شفيها ؟
ام جهاد :مافيها شي بس شفتها من بعيد على نياتها
غاده :اي مسكينه ذي اكثر وحده تستحي
انتبهت ام جهاد لدخول ملفت :وذي صديقتك ؟
غاده :ذيك الي دخلت ؟
ام جهاد :اي
غاده :اي سهام
ام جهاد :سهام ؟
غاده :اي
ام جهاد :ناديها بسلم عليها
غاده :ولله ترا حتى ذي على نياتها وتراها مصممة فساتين
ام جهاد :ناديها يمكن عجبتني وابي اتعرف عليها
غاده :طيب بروح لها
ذهبت غاده لسهام :سهام
سهام :اخيرًا شفتك ولله توترت اني جيت المكان الغلط
ابتسمت غاده :لا معليك ، ما شفتي بنات عمي؟
سهام :لا ولله باقي ما شفتهم
نظرت غاده لوالدتها التي كانت تراقبهم من بعيد :طيب ابي اعرفك على امي تعالي
سهام:اي طبعًا وينها ؟
غاده :هذيك
سهام :تشبه لك
غاده :لا شدعوه مو مره ذاك الشبه شوفيها الحين من قريب وبتفرقين بيننا ،يمه
تجاهلتها ام جهاد كي تمثل انها مشغوله
غاده :يمه
ام جهاد :هلا هلا
غاده :هذي صديقتي سهام
ابتسمت ام جهاد وصافحتها :يا هلا ومرحبا ولله زارتنا البركه ماشاء الله ماشاء الله وين امك ؟
سهام :امي بتجي باقي مع اختي الصغيره
ام جهاد وهي تتأملها من رأسها وحتى أبخس قدميها :ماشاء الله تبارك الرحمن ماشاء الله
شعرت غاده بغرابه امها :يمه احنا بنجلس اذا تبين شي ...
قاطعتها ام جهاد :سهام تبين مويا ؟ يا ساندي تعالي
وقفت ساندي بينهم :نعم ماما
ام جهاد :وين مويا ؟
ساندي :هناك ،تبغين اجيب؟
اشارت لها بعينيها :اي جيبي
ساندي:ان شاء الله
احضرت صينيه وفيها ماء فأشارت لها ام جهاد بعينيها اكثر :عطيها
اشارت ساندي بالرفض
ام جهاد :عطيها !
اوقعت الصينيه عن عمد
ام جهاد :بسم الله عليك ساندي ،غاده ساعديها
كانت ستنزل غاده لتساعدها لكن سهام سبقتها
نظرت غاده لأمها بأستغراب وحركت شفتيها :بعرف كل شي بعدين
ام جهاد :ان شاء الله
قامت سهام وأبعدت شعرها عن وجهها فقالت أم جهاد بأعجاب :لا اله الا الله
نظرت سهام خلفها :ايش؟
ام جهاد :الزلازل الي بتركيا وسوريا شفتيهم ؟
سهام :اي الله يهون عليهم ولله يحزنون
ام جهاد :الله يكون بعونهم ،تبرعتي ؟
سهام :بالي قدرت عليه
ام جهاد :كم ؟
سهام :ولله ما ودي اقول يا خاله خليه بيني وبين ربي
ام جهاد :ايه ازين ازين
نظرت سهام للباب :ذيك امي جت
ام جهاد :امك؟
سهام :اي ،انا استأذن بروح لها
سبقتها ام جهاد اليها :السلام عليكم
ام هيفاء :وعليكم السلام
ام جهاد :انتِ ام سهام ؟
ام هيفاء :اي
ام جهاد :انا ام جهاد
ام هيفاء بريبه:هلا
ام جهاد :بنتك صديقه بنتي غاده
ام هيفاء :اي وحده
ام جهاد :سهام ماشاء الله عليها تاخذ العقل ،شكلها تشبهك
ضحكت ام هيفاء :الله يسعدك
في زاويه اخرى
نرجس :شروق تشوفين الي اشوفه
شروق :اي خطتنا تمشي بالمسار الصحيح وامي تتعرف على امك
نرجس :شهر بالكثير نصير عادي ننام عند بعض
شروق :ونسافر نروح دبي يوم ميلادي
نرجس :نروح نروح بس خلينا نعدي الميد ترم بصحه وعافيه
شروق :حسبي الله عليك حتى بالعزيمه تنكدين
نرجس :اقول ما تعجبني ذي الاجواء نروح غرفتي
شروق :اي
التفتت نرجس لتذهب لغرفتها فظهرت ارين في وجهها :من هنا غرفه ضيوف
نرجس :بسم الله ارين ليه تحبين تطلعين كذا !
ارين :انتِ احترم نفسك انا اكبر منك ،انا يشتغل هنا من ٣٠ سنه
شروق :ماشاء الله ٣٠ سنه وبشرتها بذا الجمال لو انا كان عجزت
ارين :عشان انت تحطين ميكب واجد
شروق :بسم الله وش دراها
رتيل :السلام عليكم ،نرجس شفتي امي جت ؟
ارين :ايوه هناك
رتيل :تمام شكرًا
ارين :انتِ تبكي ؟
رتيل :ايش ؟
ارين :شكلك كأن تبكي
رتيل :لا ما ابكي بس شويه تعبانه
ارين :ارتاحي فوق
رتيل :اذا مره تعبت بطلع معليك
التفتت ارين لتبحث عن نرجس وشروق اللاتي هربن منها فقالت بتذمر :ياربي هذي نرجس يذبح انا تو رتبت غرفه
دخلت رتيل للمجلس وسلمت على الضيوف ثم جلست بجانب والدتها
ام حمد :كيفك؟
رتيل :تمام
ام حمد :اكيد؟
رتيل :اي تمام الحمدلله ما تشوفيني أكشخ وحده
ام حمد :ما ظنتي
نظرت لها رتيل :ليه؟
ام حمد :ست سنوات و...
قاطعتها رتيل بتنهيده عميقه :يمه اليوم يوم فرح وعزيمه والحمدلله ربي مجمعنا على خير لا تفتحين ذا الموضوع
ام حمد :بفتحه بس بعدين قبل ما ارجع البيت
رتيل :الله يحينا لوقتها
ام حمد:تغديتي اليوم ؟
رتيل :اي كل يوم نتغدا الحمدلله مو لازم تسألين
ام حمد :بنتي وبتطمن عليها
رتيل :الحمدلله بخير
في نهايه تلك السهره التفتت ام حمد لأبنتها وتنهدت :امشي جناحك نتكلم
رتيل :يعني غصب ؟
ام حمد :بنتكلم بس ما بغصبك على شي بعطيك رأيي
رتيل :طيب
سحبت يد رتيل وذهبت
رتيل :يمه ماني صغيره تسحبيني كذا
دخلت بها المصعد :شوفي الفرصه الاخيره اكلمك فيها
رتيل :وانا على نفس قولي
ام حمد :يمكن ربي يعوضك بغيره ؟ لو انك متزوجه واحد ثاني كان الحين عندك خمسه عيال
رتيل :لو اني متزوجه واحد ثاني كان عندي خمسه عيال بس ما عندي روح
ام حمد :ادخلي الغرفه
رتيل :استغفر الله
ام حمد :طاوعيني وش تبين بالضيم هنا مغير يغثونك مابهم ولا حب فيك
رتيل :وانا ما ابي منهم الا ثنيان
ام حمد :ثنيان هذا هو راس البلا
رتيل :يمه ...
ام حمد :طفشت من دفاعك عنه لو تبين معاي بعد العزيمه خذي عبايتك وتعالي البيت واغراضك بعدين نرسل السواق لها
ابتسمت رتيل بقهر :كذا الموضوع عندك سهل
ام حمد :ايه سهل ،ولا لا يكون حاطين عليك حراس ؟
رتيل :لا ماهم حاطين بس يمه ،عشره ست سنوات انا وثنيان ننام على ذا الفراش ست سنوات تبيني انسى كل شي بكلمه وحده ؟
ام حمد :اي انسي كل شي ما كأنك دخلتي ذا البيت طالعي بنفسك كيف نحفتي من الهم والغم
رتيل :مو بس انا الي تغيرت من الهم حتى ثنيان
ام حمد :يموت بهمه ان شاء الله ما ابي غير سعادتك
رتيل :ما فهمتيني انتِ
ام حمد :وش افهم ؟
رتيل :صح انا عايشه بهم اعترف بذا الشي بس ثنيان ما تركني قاعد يعيشه معاي ارد له الجميل واتركه ؟
ام حمد :خلاص بكيفك عندك خمس دقايق وانا تحت بالسياره تجين للحياه ولا تعيشين بذا الجحيم
خرجت وتركتها تشاهد نفسها بالمرآه ،كيف تغيرت كثيرًا لدرجه لم تعد تعرف نفسها ليست متأكدة من أي شي ولا تثق بأي أحد سوى ثنيان وحبها له .
جلست على الكنبه وأتصلت عليه فسمعت صوت رنة هاتفه عند الباب واغلقت
فتح الباب ودخل :انا هنا
رتيل :ممكن نتكلم ؟
ثنيان :اي طبعًا طبعًا
جلس بجانبها ونظر لوجهها :هاه مين مزعل هالزين اليوم ؟ مين الي ماهو مخلي فرحتك تكمل
رتيل :انت
تأففت ثم مسحت وجهها :ليش انت كذا ؟
ثنيان :كيف ؟
رتيل :مثالي بزياده ما استاهلك
ثنيان :وانتِ ايش ؟ إذا كان فيه مرحله اكثر من المثاليه ذي انتِ ،حتى وكحلك سايل حلوه حتى وانتِ معصبه و زعلانه كأنك مروقه وين بلقى مثلك ؟
رتيل :بس ما احمل
تنهد ثنيان :وش جاب ذا الطاري ؟
رتيل :كنت نازله تحت وسمعتهم يتكلمون أمك قالت انك ماقد ارتحت من مستشفى لمستشفى ...ثنيان أنا أحبك حيل وما ودي أذيك شبابك كله ضاع بالمستشفيات معاي
ثنيان :رتيل أكيد ما سمعتي أمي زين ولله أنها تعشقك عشق ،اقول لك شي ؟ دايم هي وجدتي يتناقرون فوق راسي امي تدافع عنك بكل شي تقدر عليه
رتيل :ترا مهما حبتني ولدها يبقى اغلى وبتتمنى له الخير
نظر لها بصمت فأكملت :وجدتك قالت انه ابوك غلط كثير ...وأنه خطبني لك من ضمن اغلاطه...وامي توها كانت هنا بغت تاخذني بالغصب وتبينا نتطلق
رتيل ببكاء :يمكن هم صادقين يمكن انا الغلط بذي القصه ولازم نتطلق الكل ضدنا ما تشوف ذا دليل على نهايتنا ؟
ثنيان :واذا هم يشوفونك غلط انا اشوفك...
قاطعته رتيل :ثنيان ...لا تمدح كل ما تكلمت كذا احس نفسي اكرهني اكثر
بلعت ريقها واكملت :خلنا نفكر بالطلا...
قاطعها وهو يمسح دموعها: رتيل أنا إنسان ذايب فيك مقدر اعيش بدونك يوم
طغى صوت الحزن على نبرته :مارح اطلقك ولا قالها الله
امسك يديها :أنا كل ما افكر بسبب وجودي بالدنيا بعد العباده يجي ببالي إنتِ أنا انخلقت عشان رتيل عشان احب رتيل وارضي رتيل واتأمل رتيل ،معنى ذا الكلام لو كنتِ غلط عادي انا اكبر محب للأغلاط انا مستعد اتخلى عن كل شي عشان غلطي الجميل
نظرت له قليلًا ثم حضنته وبكت في حضنه كما لم تبكِ من قبل :تعبت ثنيان تعبت كل ما جبت أمل الي حولي ياخذونه كل ما دخلت بفرحه يكسرونها كرهت نفسي كرهت كل شي احاول اصدق أفكارك واتمسك فيها يهدمونها بثانيه معد باقي لي شي معد باقي الا انت ،مهما حاولت اتخيل حياتي مع غيرك ما اقدر
ظل ثنيان يطبطب على ظهرها حتى هدأت قليلًا ثم قال وهو يمسح على شعرها:أوعدك ما تذوقين هالتعب مره ثانيه
ابعدها عنه ومسح دموعها :اذا ما تبين تنزلين الحين عادي حتى أنا بجلس معاك
رتيل :لا بنزل بس شوي
ثنيان وهو يبعد شعرها عن وجهها ويتأمل ملامحها الحزينه:خلاص انا معاك لين ما تبين تنزلين
امسكت رتيل يديه وقالت بحزن:ثنيان الي حولنا يحاولون يحكمون علاقتنا ،لو صار ذا الشي وبعدونا عن بعض...
قاطعها وهو يقبل رأسها ويهمس في أذنها :وأنا معاك طول العمر تطمني
...
سيف:هلا يمه آمري
قرصته اشواق :قول ماما ماني كبيره انا عشان تقول يمه
ابتسم سيف :أبشري
اشواق :ابوك ما تعشى صح ؟ يقول دقوا عليه الدوام وطلع بحط له بصحن وانت وده البيت
تأفف سيف من ذكره:لا تعشى انا شفته
اشواق :لا ما تعشى توه مرسل لي
سيف :يم...ماما والي يرحم والديك لا تنهوسين فيه بزياده
اشواق :ليه ؟ ابوكم ذا ماهو غريب اذا ما أخذ الاهتمام مني من وين بياخذه
سيف :كبير ماهو بزر عشان تهتمين فيه كذا
اشواق :ماهو شرط يكون بزر واهتم فيه
سيف :اهتمي بروحك
اشواق :يعني انا مو حلوه واحتاج اهتمام؟
سيف :لا حلوه شحلاتك وش زينك الليله صدقيني اول ما شفتك قلت بنت مين ذا القمر ماشاء الله بعدين قلت اوه ذي امي يا حظي فيها بس
ابتسمت اشواق :تدور قمر ؟ تبي نزوجك
سيف :لا توني صغير
اشواق :وشو صغير شنبك قد خط
سيف :عمري ٢٢
اشواق :ابوك تزوجني وعمره ١٨
سيف :يختلف الوضع الله يهديك
اشواق :معلينا انا الحين بحط لأبوك وانت وده
سيف :يمه تعشى ولله تعشى ما يحتاج
اشواق :وانت شحارق رزك ! تعشى ولا ولا ما تعشى هو طلب مني قال اشواق انا جيعان وابي عشى حق نفرين اذا باقي ما تعشيتوا حطي لي من الصحون الي عندكم
ابتسم سيف بضيق :حق نفرين
اشواق :اي حق نفرين جوعان مسكين
تنهد سيف وهمس :ولله ما المساكين الا احنا
اشواق :خذ وقول له الببسي خلص ،ولا لا تقول اشتر له من البقاله
سيف :ما عندي فلوس
اشواق :انتظر هنا وبجيب لك
سيف:واذا جا احد
اشواق :تنحنح لين اجي
سيف :حلقي بيتقطع
اشواق :ولله تحمل عاد هذا اقل شي تسويه بر فينا
سيف :اكيد اكيد
ذهبت اشواق وبقي سيف يتنحنح لوقت قليل ثم توقف وقال محدثًا لنفسه :محد داري عني ولاهم حولي ليه اتعب حلقي عالفاضي
فتح الثلاجه وأخذ علبه ماء وشرب منها فمسع صوت غناء وضحك من خلفه ،التفت خلفه وكانت إبتهاج ترقص مع نهى بعيدًا عن الاعين ،انتبهت نهى لوجوده وصرخت :بسم الله !
التفتت ابتهاج وصرخت :وش تسوي هنا
فزِع سيف من ردة فعلهم وبدون شعور بصق الماء عليهم
ابتهاج وهي خارجه:يالوصخ يالمقرف
نهى بغصه :ولله اعلم ماما خربت الويفي يالكلب
سيف بإستغراب :ما سويت شي
نهى :كيف تدخل كذا المطبخ وانت تدري انه فيه حريم وفوق ذا تتفل علينا مويا يع يع انا كل ما اتذكر ان المويا الي علي من فمك اتمنى اغير جلدي
سيف :ما سويت شي !
نهى :كل زق وانقلع ولا كسرت هالكعب براسك
سيف :انتظر أمي
اشواق :جيت جيت
نهى :ماما شوفي سيف الوصخ قليل الادب الي ربيتيه وكأنك ما ربيتي
اشواق :وش مسوي
نهى :ما يطلع صوت انه موجود ودخلنا انا وابتهاج نرقص وهو عاجبه يطالع فيها
نظرت له اشواق بإستفهام:سيف
سيف :ما مداني حتى استوعب شي
نهى :ما مداه يستوعب شبع نظر وبعدين تدرين وش سوا؟ تفل علينا مويا قرف قرف
اشواق :عمرك ٢٢ وذي حركاتك؟
سيف :يمه بالغلط يعني توني بس نص ثانيه وقفت اتنحنح واشرب مويا دخلوا بنفس الثانيه الي دخلوا شافوني وانا خفت وتفلت بس يعني ردة فعل
امسكته من اذنه :ولا نص ثانيه تطالع ببنات الناس انا ما ربيتك كذا يا قليل الادب
نهى :ايوه احسن وريه نتيجه وصاخته كيف بكره اروح عزيمه عند احد ويطالع ولدهم فيني بترجع فيني يالغبي يالحمار
اشواق :نهى انتِ لا تدخلين خلاص
سيف :يمه اذني بتنقطع
اشواق :قرب
سيف :وين اقرب
اشواق :انزل لمستواي شوف نفسك اطول مني استح على وجهك تسوي هالحركات
الجده وضحه :اي حركات
سيف :لا يرحم امك
نهى :شوفي يا جده ذا الوصخ يطالع بحفيدتك ابتهاج وهي ترقص
اقتربت منه الجده وضحه وشرعت تضربه بالعصا :قلة الادب ذي ماهي ببيتي
اشواق :ولاهي عند احد قلة الادب ذي ما غرستها بعيالي من وين جبتها
سيف :فطره يمه فطره الرجل بس اتركوني اعيش تكفون
تركت اذنه :خلاص يا جده يعطيك العافيه
مسحت على اذنه وهي تقول :تذكر هالالم لو طالعت ببنات الناس بتلقى اسوء منه بجهنم انا مو معاك طول الوقت امسك اذنك بس ربك معاك
سيف :ابشري ،وين الفلوس
نهى :بتعطينه فلوس فوق فعله هذا ماما؟
اشواق :صح وش تبي بالفلوس مافيه فلوس عقاب
سيف :بجيب ببسي لأبوي جعله يلقى الي لاقيته
ضربته الجده مره اخرى :ولدك هذا ما تربى يدعي على ابوه
اشواق :اضربيه اضربيه زياده قليل الادب ذا
سيف :استغفر الله عن كل دعوه سوء بحياتي استغفر الله
الجده وضحه :استغفر لين تكسر عظامك ولله ما...
نهى :خلاص جده سامحيه وش تبين تاخذين اثم على هالكلب
ابتعدت عنه الجده :اي ولله استغفر الله بس
سيف :نهى اقسم بالله...
قاطعته اشواق:منت رجال اذا رفعت صوتك على اختك !
سيف :طيب معليش
اشواق :خذ الفلوس ورح ود ابوك العشا
سيف :ابشري بس بتأخر
اشواق :ليه ؟
سيف :كسرتوا عظامي
الجده وضحه :مابك من الرجوله قطره ابوي الله يرحمه حارب مع الملك عبدالعزيز يومته بعمرك وقصوا يده بالحرب لكنه غلاها بالزيت وكمل لكن انت ضربتك مره عجوز يدها اضعف من البزر بهالعصا الي لو تمر بها هفه ريح تكسرت وقلت كسرتوا عظامي
نهى :ليه يقلي يده بالزيت بيسوي بروست ؟
الجده وضحه :عشان يبرى الجرح بسرعه شجاع الله يرحمه ما كان يبي يتركهم
سيف:الله يرحمه ويرحمنا
اشواق :تعورك عظامك يا حبيبي؟
سيف :اي تعورني
اشواق :يا جعلها بعظامي
نهى :ليه جعلها بعظامك مسرع نسيتي انه يقز ببنت عمك وهي ترقص وفستانها قصير
الجده وضحه :فستانها قصير بعد !
عرف سيف انها قادمه اليه واختبئ خلف نهى
الجده وضحه وهي تحاول الوصول اليه:انا مو قلت محد يلبس قصير بهالبيت
سيف :مدري
الجده وضحه :الا قلت
سيف :طيب انا وش دخلني ببنت الناس يوم لبست قصير
نهى :وانا وش دخلني احميك
الجده وضحه :انت تقز فسيقانها
سيف :ما شفت سيقانها شفت وجهها
الجده وضحه:ياويلي يا ويل حالي وجهها اخس من سيقانها حسبي الله عليك
اشواق :خلاص جده خلاص سامحيه عشاني
الجده وضحه وهي تحاول ضربه:ليه البنت تلبس قصير
اشواق :يا جده خلاص ولدي ذا توجعين قلبي فيه انا حفيدتك الاولى لا توجعين قلبي بولدي
تراجعت الجده للخلف وهي تأخذ انفاسها :الله يقطع شركم يا ذا الجيل ،اسقيني ما اسقيني
احضرت لها اشواق الماء :سمي
الجده وضحه :بشرب ما وارجع لك
اشواق :اي معليك معليك
بدأت بشرب الماء فالتفتت اشواق لسيف واشارت له بالخروج سريعًا
سيف بهمس :وش؟
نهى :يالحمار اطلع
...
دخلت للمجلس بكامل زينتها وسط تساؤلات الجميع ،رأتها الجده وضحه واقتربت
ملاذ :وسن
وسن :هاه؟
ملاذ :هيام جت
وسن :هيام هيام حقتنا ؟
ام ثنيان وهي تقوم:ماهي حقتكم ولا شي
ذهبت للجده وضحه :وش جابها ذي؟
الجده وضحه :انا
ام ثنيان :كذا تدعينها بدون ما تقولين لي ولا شي؟
الجده وضحه :معاي امر خير بريحك منها
ام ثنيان :ما ابيها ببيتي ثانيه
الجده وضحه :انتِ ثلاثين سنه وانتِ ما عندك صبر
ام ثنيان :اصبر بكل شي الا بوجودها
الجده وضحه وهي تذهب الى هيام:خلاص قلت لك كل شي علي بترتاحين منها
تنهدت ام ثنيان :يارب ريحني من هالبلوه
اقتربت منها :حبي راسي
تجاهلتها هيام
الجده وضحه :حبي راسي ماهو عشان خاطري عشان نظرتهم عنك
تنهدت وقبلت رأسها
الجده وضحه :تشوفين هذيك الي جالسه هناك ؟
هيام:اي
الجده وضحه :تدرين انها كانت حبيبة ابوك قبل يتزوج امك
نظرت لها هيام بصدمه :مستحيل
الجده وضحه :ولله ذا العلم
همست بأذنها ومدت لها ورقه صغيره بها رقم المرأه:تعرف كل شي عن ابوك حتى كيف مات
بلعت ريقها وطوت الورقه بيدها
الجده وضحه بسخريه :ضيفة الشرف
ذهبت وتركتها بحيرتها ،تقترب من أخر شخص يذكر والدها أم تبتعد عن من كانت تتمنى مكان أمها
قاطعت ملاذ سرحانها :هيام
هيام :هلا
ملاذ :ما كنت ادري انك بتجين
هيام :جدتك دقت علي وقالت تعالي قلت اجي عشان خاطركم
ملاذ :تبين تشوفين صاحبة ذي الحوسه كلها ؟
هيام :قصدك مين؟
ملاذ :الخريجه
هيام :وينها
ملاذ :غاده تعالي
غاده :هلا
ملاذ :غاده هيام هيام غاده
ابتسمت هيام وصافحتها :مبروك التخرج
غاده :حبيبتي الله يبارك فيك ،ليه ما تدعينها حفل الشاليه ؟
ملاذ :ما كان عندي رقمها ،هيام عطيني رقمك
غاده :اول اجلسوا مين يسولف وهو واقف
ملاذ :اي تعالي عند وسن نجلس
هيام:وينها وسن
ابتسمت ملاذ :شكل عندك ضعف نظر
هيام :ماني مركزه ،تعبانه من الشغل
ملاذ :بس شعور حلو انك مقسمه حياتك بالشكل الصحيح
هيام :اكيد
ملاذ :تبين كيك؟
هيام :لا ولله
ملاذ :تردين كيكي ؟
هيام :انتِ مسويته ؟
ملاذ :اي من الصباح قمت سويته
هيام :اجل خليني اذوقه
ملاذ :تعلمت لكل شي الا التقطيع فلا تركزين فيه
هيام بسخريه:بطنك ما بيعرف هي مقطعه صح ولا لا
ضحكت ملاذ :صح بس العين تاكل قبل الفم مدري قبل البطن وشو المثل ذاك
وسن :العين تاكل قبل الفم
ملاذ :الي هو
مرت جوانا من أمامهم ثم عادت :هذي الي بالمزرعه
وسن :اي مزرعه؟
جوانا :وش جابك يالقطوه ؟
ملاذ :لا تطولين لسانك على هيام وانقلعي
جوانا :لا ولله
وسن :اي مزرعه ومتى تقابلتوا ؟
هيام :قلت لكم انا بشتغل على مزرعه الخيل والحين جالسه بالبيت الي فيها مره جت هذي
جوانا :اسمي جوانا
هيام :الي هو جت هي معاها بنات ودخلوا علي البيت وخفت وطردتهم وزعلوا
ملاذ :لا سويتي الصح
جوانا :مو صح تطردني من مزرعتي
وسن :ترا خلاص صارت مزرعتها
جوانا ليه؟
ملاذ :ورثها من ابوها
جوانا :ما لقيتي الا مزرعه الخيل ، وش بتسوين فيها ؟
هيام :سر لين ما اعلن عنه
ملاذ :اذا تحتاجين اي مساعده كلميني
هيام :تسلمين حبيبتي
جوانا :وش علاقتكم القويه فيها كأنكم تعرفونها من سنين
وسن :طيب احنا نعرفها من سنين نعرفها من قبلك
جوانا :بعلم امي انكم تفشلوني قدام الناس
ملاذ :طيب
هيام :زعلتوها
ملاذ :خليها هي كذا زعوله
بعد ساعات
ام هيفاء :يلا ام جهاد انا استأذنك بكره وراي دوام ،الله يبارك لك ببنتك ويوفقها ان شاء الله
ام جهاد :لحظه ابكلمك بشي
ام هيفاء :هلا
نظرت ام جهاد لسهام من بعيد :سهام مخطوبه ؟
ام هيفاء :ايش؟
ام جهاد :سهام بنتك مخطوبه ؟
ام هيفاء :لا
امسكت ام جهاد يدها بفرحه :اجل على كذا يا أم هيفاء أبي أخطبها لولدي جهاد على سنه الله ورسوله إن كنتم موافقين وهي موافقه ،مستحيل القى احسن منها له
ام هيفاء بصدمه :ولله مدري وش اقول ،لكن الله يكتب الي فيه الخير ان شاء الله بكلم ابوها واكلمها وارد لك خبر بكره ان شاء الله
ام جهاد :ان شاء الله ان شاء الله
سهام :يمه شروق طلعت قبلنا ورجعت للبيت
ام هيفاء :كيف ؟
سهام :نسيت اننا معاها تحسب نفسها جايه زياره لحالها وبس زي دايم
ام هيفاء :الله يهديها ،المشكله البيت بعيد ما بيمديها ترجع
ام جهاد :جهاد يوديكم
ام هيفاء :ايش؟
رمشت لها ام جهاد كثيرًا :جهاد طريق دوامه من عند بيتكم يوديكم
ام هيفاء :اها ،اي ولا عليك امر
سهام :يمه بطلب اوبر معليك
ام هيفاء وام جهاد بنفس الوقت :لا
نظرت لهم سهام بأستغراب من اتفاقهم :ليه ؟
ام هيفاء :نطلب اوبر كم بياخذ وقت يجي ابي انام عندي دوام دام جهاد طريقه من عند بيتنا يودينا
ام جهاد :اذا ما تحسون امان ابجي معاكم ،مع انه هو عسكري يعني مصدر الأمان بذاته
ضحكت ام هيفاء:ولله انك صادقه
سهام :طيب دام تقولون كذا خلاص كذا
ام جهاد بضحك :الله يجعلك توافقين على اشياء ثانيه كذا
بادلتها ام هيفاء نفس الضحك :آمين آمين
سهام :ما فهمت
ام هيفاء :ماهو لازم تفهمين
سهام:طيب
ام جهاد :هذا هو جهاد يدق بشوف له اذا يقدر يوديكم
ام هيفاء :تمام
ردت على الهاتف :جهاد
جهاد :هلا يمه وش صار وافقت بنتزوج ؟ متى العرس؟
ام جهاد بتمثيل حزن :ودهم لبيتهم
جهاد :بوديهم بس وش فيه صوتك؟
ام جهاد :اخر مره بتشوفها تراها متزوجه وهذا الي شفته ولدها
همست :استغفر الله
جهاد بصدمه :يمه ليه؟
ام جهاد :ولله نصيب
جهاد :تكفين كيف متزوجه وأم وهي بذا الشكل
ام جهاد :امزح معاك ماهي متزوجه الحمدلله وكلمت امها قالت بتكلم ابوها ويردون لنا خبر
جهاد بسعاده:كذابه !
ام جهاد بغضب مزيف:ولد تراني امك
جهاد :معليش،بس يمه صدق ماهي متزوجه ولا مخطوبه ولا احد ينتظرها ؟
ام جهاد :فيه واحد ينتظرها
جهاد :مين ؟
ام جهاد :انت
جهاد :الحمدلله
ام جهاد :طيب الحين انت قمت للدوام صح؟
جهاد :اي بداوم احسن دوام بحياتي
ام جهاد :طيب وصل سهام وامها لبيتهم جت مع اختها وسحبت عليهم
جهاد :وش ذي الاخت البطله ولله انها كفو ،اكيد بوصلهم خليهم يطلعون انا بالسياره ،ولا لحظه بتأكد السياره نظيفه ولا لا
ام جهاد :بسرعه ،يا ويلك اذا عرفت انهم طلعوا فيها وهي فيها حبه مناديل وحده حتى
جهاد :معليك ازهليها
ام جهاد :اذا خلصت دق علي
جهاد :ابشري
اغلقت الهاتف وذهبت لأم هيفاء :استريحوا شوي لسى بيلبس للدوام اذا خلص بيدق علي
سهام :نطلب اوبر اجل لا نأخره
ام هيفاء وام جهاد بنفس الوقت :قلت لا
ام جهاد :وضحه حماتي ما تحب الاوبر خاصه للضيوف تقول جايين لين بيتنا واخرتها نطلعهم مع واحد غريب عيب هذا ماهو من إكرام الضيف
ام هيفاء :اي ولله هالاوبر دايم تصير فيه مشاكل
ام جهاد :الله يهدي شباب المسلمين بس
ام هيفاء :آمين آمين
نظرت ام جهاد لهاتفها :هذا جهاد ،هلا يا امي طيب الحين بيجون ،يقول هو برا
ام هيفاء :وش لون سيارته ؟
ام جهاد :رصاصيه،ابوصلكم له
ام هيفاء :يلا البسي عباتك يا سهام
سهام :لبست
خرجت ام جهاد وخلفها سهام وأمها حتى وصلت لجهاد الذي يجلس بسيارته :وصل ضيوفي بخير يا جهاد
جهاد :ابشري
فتحت سهام الباب :فيه اشياء هنا
التفت للخلف :ايش؟
سهام:اوراق
جهاد :عطيني
اعطته الاوراق وركبت السياره هي وأمها
جهاد :تبون ماي ؟
ام هيفاء :لا يعطيكم العافيه حتى بالسياره تكرمون الضيف
ابتسم جهاد وهو يشغل السياره :واجبنا
سهام بهمس :يمه قولي له يشغل المكيف حر
ام هيفاء :اقولك يا وليدي المكيف شغال ؟
جهاد :اي بس على اثنين
سهام :قولي له يخليه اقوى شي
ام هيفاء :خله اقوى شي لا هنت
جهاد :ابشري
...
ام جهاد :هاله يا هاله
ام ثنيان :علامك ؟
ام جهاد :تعالي ابقولك دام ساره ربي مصرفها عنا
ساره :لا ولله ما صرفني ربي عنكم ولا قالها الله وش بتقولين
ام جهاد :خلاص بس بقول لكم ،شفتوا سهام
ام ثنيان :اي وحده ؟
ساره :هذيك الي لابسه فستان رسمي ابيض
ام ثنيان :الي اقول لك واضح تحني شعرها ؟
ساره :اي
ام جهاد :خطبتها لجهاد
ساره:احلفي
ام جهاد :ولله ،كلمت امها هذيك الي جلست معاها طوال الليل يوم بتطلع قلت لها ابي بنتك لولدي
ام ثنيان بسخريه:ماشاء الله ما توفرين الفرحه بتخرج بنتك خطبتي لولدك
ضحكت ام جهاد:ما اوفر مين يوفر بالسعاده ،بس ادعوا توافق البنت
غاده :كشفتك يا يمه انا اقول شفيها امي تتلزق فيهم
ام جهاد :بس ولله احسنت الاختيار صح؟
غاده :مره وربي انها تحفه ذيك البنت ماشاء الله ماشاء الله اتمنى انها تحصنت اليوم
ام جهاد :اصبروا ما وصلت عند الجزء الحماسي
ساره بضحك :فيه احمس من كذا ؟
ام جهاد :بنتها الي جابتهم رجعت وخلتهم هنا وخليت جهاد يوديهم
صرخت غاده بسعاده :يمه ولله انك بطله
رتيل :شفيكم ؟
ام جهاد :جهزي فستانك بس عرس ولدي قريب
رتيل :ايش؟
ام ثنيان :خطبت لولدها وفرحانه
ابتسمت رتيل :الله يوفقه مين خطبتي؟
ام جهاد :صديقه غاده الي كانت لابسه فستان ابيض
ساره :الله يجعله فستان زواجها
ضحكت ام جهاد:آمين
رتيل :يمه
ام ثنيان :هلا
همست بأذنها :ثنيان يبي يكلمك
ام ثنيان :وينه ؟
رتيل :بالصاله
ذهبت ام ثنيان مع رتيل وبقيت ام جهاد وساره وغاده بالمدخل
دخل جهاد فغنت غاده :وصل وصل وصل وصل عريسنا
جهاد :لحظه ما اتفقنا كذا يمه !
ام جهاد :ولله كان لازم اعلنه
ساره :يا الخسيس جهاد تخبي على اهلك انك تدور عروس ؟
جهاد :لازم خصوصيه ياخي
غاده :مافيها خصوصيه ،ذي لو لا قدر الله اختارت لك امي وحده شينه وتركت سهام كذا تضيع
جهاد :الله لا يقولها
ضحكت ساره :الولد بس وصلها بيتها طاح بغرامها
غاده بضحك:تشوفين
ام جهاد :الحين قول لي ليه جيت وانت عندك دوام ؟
جهاد :اليوم اجازتي
ام جهاد :وليه لابس؟
ساره بسخريه :يتميلح يتميلح
ضحكت غاده :كفك
ضربت ساره كفها وهي تضحك
جهاد :يمه لو ما سكتوا ولله ما احترم لا عمه ولا اخت ولا شي
في جهه اخرى
ثنيان :يمه انا ورتيل قررنا ...
ام ثنيان :جعله خير ان شاء الله
بلع ريقه :قررنا نبي نعيش ببيت لحالنا
شهقت ام ثنيان ووبخت بهمس :يمه يا وليدي هالقرار مافيه انا اقرر كلمة جدتك هي الي تحكم ابوك حاول قبل ما رضيت
ثنيان :كلمة جدتي ؟ من دريت ان جدتي تشوف رتيل خطأ ابوي ما ابي اجلس بذا البيت دقيقه كل ما قلنا يلا ان شاء الله ذي المره يوفقنا ربي ويكتب لنا الرزق ووالذريه الصالحه تجي هي وترمي علينا كلمه تهدم كل شي ،ولله ما بها ولا حب فينا ما بها الا طمع
ام ثنيان :اشش اش لا تسمعك
ثنيان :تسمع جلسه بذا البيت مالي فيها بطلع للخارج لحد ما القى لي بيت بالرياض ارجع على طول فيه
ام ثنيان :تبي تغضب جدتك عليك بعد هالعمر يا وليدي ؟انت البكر والعاقل الفاهم لا تخرب على نفسك
ثنيان :ما بخرب شي هي اصلًا خربانه
ام ثنيان :طيب وش رايك تجرب تكلم جدتك تقنعها انها معد تفتح موضوع رتيل بسوء
ثنيان :ما اقدر
الجده وضحه من خلفه :ما تقدر تكلمني مثل الرجال لكن تقدر تكسر كلمتي من وراي مثل المنافقين
ثنيان :لا جده...
قاطعته :بكره العصر انتظرك بمجلسي تجي بشنباتك وتكلمني ولا معد اعرفك ولا تعرفني
ام ثنيان :لا يمه الموضوع ما يحتاج هالتكب...
الجده وضحه وهي ذاهبه:الخروج من هالبيت اكبر موضوع بذي العايله
مسح ثنيان وجهه بحيره فأمسكت امه يده :هاه يا وليدي لا تعزم شفتها كيف ما تحب طاري هالموضوع حتى
تنهد ثنيان وهو ذاهب:الله كريم
قابلته رتيل التي كانت تسمع حديثهم من أوله بذعر :ثنيان ! ما كنت اعرف شي
ثنيان :ما كان لازم تعرفين
رتيل :كنت تبي تكلمها بس بتقول لها اننا بنجلس بالخارج فتره نغير نفسيتنا من وين طلع موضوع البيت
ثنيان :من يوم سمعت اذني صوت أحبه يقول انه تعب من حال هالبيت
رتيل :لا ثنيان ما كنت اقصد كذا بس كنت ابيك تساندني اكثر ،تكفى لا تخرب علاقتك بأهلك عشاني
ثنيان :انا ما ابي اجيب مقصدك ابي اجيب اكثر من مقصدك
رتيل بحزن :ترا طول عمري بحس ان الذنب ذنبي
ثنيان :ماهو ذنبك كل يوم تلقين كلامهم عنك وتتحملينه
رتيل :عادي اقدر اتحمله لو عرفت انك معاي
ثنيان :لا تحسبيني ما ادري انك تبكين أخر الليل
رتيل :عادي كل وحده مثل حالتي رح تبكي حتى لو كانوا اهلها يدعمونها بس ما توصل كذا
ثنيان :لا توصل مثل ما وصلت للطلاق
رتيل :بس عشان قلت الطلاق ؟ بس طرف الفكره مر ببالي وحتى مو فكرتي فكرة امي ما ابي ولا طلاق ولا شي
ثنيان :الكلمه بروحها تزعجني ما ابي حتى طرف فكرتها تدخل بيننا
مسحت على خده برفق :خلاص اوعدك ما بجيب طاريها ولا بفكر فيها ولا بسمع لأحد يطريها ،بس لا تكبر الموضوع خلاص ثنيان
نظر لوجهها طويلًا ثم قال :دخلت بطريق ما منه رجعه
رتيل :لا فيه رجعه دام علاقتك فيهم موجوده يمديك ترجع بس لو كسرت كلمتهم وطلعت وكل صله فيهم انقطعت مافيه رجعه
امسكت يده بشده :على الاقل فكر اكثر ما يصير تقرر قرار كذا بنفس اللحظه
ثنيان :رتيل...
قاطعته رتيل :ثنيان فكر بس فكر ما طلبت كثير
ترك يدها وذهب
رتيل :وين بتروح؟
ثنيان :بنام
تنهدت وهي تمسك رأسها :تمام
ثنيان :وانتِ بعد اكيد تعبتي لا تسهرين اكثر
رتيل :شوي واطلع
...
نجد :شفيك كذا مو على بعضك
هيام :تعبت بس
نجد :ترا واضح فيك شي اذا تعبتي كل شوي تتثاوبين
هيام :اذا جيتي بقول لك
نجد :لا الحين قولي
هيام :مدري احس الموضوع غريب
نجد :واذا غريب ؟
هيام :طيب بقول ،يوم رحت جتني العجوز ذيك
نجد :وضحه
هيام :اي ،وأشرت لي على وحده وقالت تري ذي حبيبه ابوك زمان قبل يتزوج امك ومحد يعرف ابوك كثرها وعطتني رقمها
نجد :كان رميتيه بوجهها هالكذابه
هيام :مدري دخلت بقلبي شك خصوصًا يوم قالت تعرف كيف مات ابوك
نجد :الله الله كيف مات حادث
هيام :مدري بس شكيت يعني ...كيف كان يحبها وهو دايم يوصف امي بأحسن الاوصاف
نجد :لو لو قلنا ان كلامها صح يمكن كانت تجربه فاشله بالحب
هيام :كان ودي اجلس معاها واسألها عنه بس حسيت اني اخون امي
نجد :طيب اذا الرقم باقي معاك اسأليها بس بدون ما تعرفك هي يعني قولي لها انا بنت عبدالعزيز بس ما بتعرف شكلك
هيام :انا عادي كل شي عادي عندي بس يوم قالت تعرف كيف مات ابوك حسيت كل شي مخطط علي
نجد :كيف مخطط ليه مستهدفينك؟ يمكن لأنك اجمل بنت بالعالم
ابتسمت هيام بضيق :لا يعني كيف كذا الحياه مرعبه كل الي يعرفهم ابوي ماتوا إلا الي كان يحبها قبل امي
نجد :يا شيخه تكذب عليك بس تبي توترك
هيام :مدري احس...
نجد :لا تحسين بشي كلميها وشوفي
هيام :اكلمها؟
نجد :اي انا بقفل انام وانتِ ارسلي لها
هيام :طيب
نجد :يلا مع السلامه
هيام :مع السلامه
اغلقت الهاتف وبحثت عن الرقم في حقيبتها حتى وجدته ونظرت له بتردد طويلًا ثم سجلته في هاتفها وارسلت :السلام عليكم
جاءها الرد سريعًا :وعليكم السلام
بلعت ريقها وارسلت :انا هيام ،بنت عبدالعزيز آل مبارك يقولون انك تعرفين أبوي
قرأت الرساله فحظرتها فورًا ،نظرت هيام بإستغراب :بلكتني!
ارسلت لنجد الرقم مع رساله تقول :ارسلي لها واستدرجيها بالكلام انا بلكتني واضح عندها داهيه
نجد :طيب بكره اذا جيتك الحين بنام
هيام :طيب
اغلقت الهاتف وأخرجت صورك والدها من خلف الكفر وبدأت تحدثها كما اعتادت عندما تحتار :صدق انت حبيت وحده قبل امي
نظرت لها طويلًا ثم قالت :راضيه لو تحب عشره بس لو ترجع تعيش
قبلت الصوره وأعادتها للكفر وأغمضت عينيها التي كانت تفيض دموعًا
...
رغم أختلاف شخصياتهم إلا أنهم اعتادوا أنه عندما يقع أحدهم بمشكله يستشير الباقين بجلسه مخصصه سموها "جلسة اللوز" لأعتبارهم أكل اللوز ضروريًا فيها
صقر :هاه وش مخليك تصحينا اخر الليل ؟
ثنيان :دخلت بمشكله عظيمه مالها راس من ساس
أوس :قول إن شاء الله لها حل زي مشكلتي
ثنيان:انت مشكلتك ابسط شي بالحياه ،لكن انا تهاوشت مع جدتي
راجح :عادي كلنا تقريبًا نتهاوش ...مو نتهاوش يعني هي شوي شديده
صقر :مع اني أحس أن الصح هو جدتي بنسبه ٩٩٪؜ بس نسمع لك يلا
ثنيان :انتم تعرفون اني متزوج من ست سنوات
أوس :اي
ثنيان :اني ما جو لي عيال وتخطينا ذي المرحله وتعودنا على ذا الروتين بس جدتي الله يهديها ما تخلينا بحالنا كل ما زانت الجلسه قالت تزوج بنزوجك الثانيه تجيب عيال زوجتك ما منها رجا وكلام ينهك الروح ،البنت مسكينه شاكه بروحها تبي الطلاق وما تبيه عندها أمل وما عندها
جهاد :اي بنت ؟
ثنيان :مين يعني زوجتي
صقر :كمل
ثنيان :انا طفشت من ذا الوضع وهي طفشت وقالت لي بالحرف انا تعبت من تحطيمهم فكرت وقلبتها براسي قلت انقل بيت ثاني
ضحك راجح بسخريه :تسمع الي تقوله ؟
ثنيان :اي سامعه ومقتنع فيه
أوس :ولله وانا أخوك مافيه أمل ،ما تذكر يوم ابوي بغا يسويها ؟
ثنيان :اذكر بس ابوي غير وانا غير ،الحين ما ابيكم تحطموني انا ان بغيت اطلع بطلع ولو بدق خشوم ،كلمت امي عن الموضوع وقالت نفس الشي بس جدتي سمعتني وقالت ان شفت فيني مشكله تعال كلمني زي الرجال ولا معد اعرفك ولا تعرفني
جهاد :اسلم على المشاكل وشلون كبرتوها ؟
ثنيان :اصبروا الحين هي لو قالت معد اعرفك ولا تعرفني وقتها اقدر اطلع من البيت بس اذا كلمتها ممكن تقتنع وش تشوفون الصح ؟
صقر :شوف شوف انا اكثر انسان احب جدتي واقدسها
راجح :انت لو شديت حيلك عبدتها استغفر الله بس استغفر الله
نظر له صقر بحده:معليش معليش افكر بصوت عالي
صقر :المهم اني ذي المره اشوف فعل جدتي غلط
جهاد :اول مره اسمع شي كذا من صقر متأكدين انه حقنا ؟
صقر :خلني اجرب اقعد فوقك عشان تتأكد
ثنيان :ترا مو وقت طقطقتكم خلوني اسمع ارائكم صدق
صقر :هي غلطت بكلامها بس سوت صح يوم فتحت باب النقاش روح ناقشها وخل عندك حجه قويه تراها تقتنع
ثنيان بتفكير:حجه قويه ،حجه قويه وش اقول ؟
أوس :ما تعرف تقول حجه ؟
ثنيان :انا احب زوجتي
أوس :ماهو شي قوي أنا أقدر اقول أني أكره أمي وأنا عكس هذا أحبها المشاعر ما تعتبر حجه
ثنيان :أجل وش ؟
صقر :مثل تقول مافيه شي بالدين يقول اذا ما جابت زوجتك عيال تطلقها وتاخذ غيرها ،أو تقول ما ابي أظلم بنت الناس وأطلقها ولا أجيب فوقها ضره
ثنيان :حلو بس خلني أكتبه وش قلت؟
ابتسم جهاد :لا تكتب لا تكتب يالذكي
ثنيان :هاه ؟
أوس :خلك فاهم ومقتنع أنت بالكلام عشان تقنعها
ثنيان :طيب انا فاهمه بس براجعه
قام صقر :بكذا نكون حلينا المشكله يلا طفوا الضو وكل واحد يروح بيته ينخمد
ضحك راجح :ترا كلنا بنفس البيت
صقر :اقول احمدوا ربكم كل واحد له جناح كبر راسه محنا حاطينكم بجحر ضب عشان تتكلمون كذا
أوس :مستحيل تكمل معارض لجدتي دقيقه
صقر :ما قد عارضتها ثانيه
...
ابو هيفاء :بدري
ام هيفاء :ولله بنتك سحبت علينا
ابو هيفاء :شروق ؟
ام هيفاء :اي نسيتنا يوم شبعت من صديقتها راحت ولا علمتنا
ضحك ابو هيفاء :يبي لها قرصه اذن ،وكيف جيتوا ؟
التفتت عليه :وهنا القصه كلها
ابو هيفاء :اسلمي
ام هيفاء :جابنا اخو البنت الي تخرجت اسمه جهاد
ابو هيفاء :يعني ولدهم
ام هيفاء :اي وقبل نطلع امه كلمتني تبي تخطب سهام له
ابو هيفاء :وشو ؟
ام هيفاء :ولله عن تجربتي الليله معاهم يعتبرون ناس طيبين وبناتك احسنوا الصحبه
ابو هيفاء :الله يصلحك احد يتكلم بموضوع كذا قبل النوم
ام هيفاء :ولله انك كذوب لو قلت لك الصباح نفس ذا الكلام كان قلت لي وليه ساكته من البارح
ابو هيفاء :صح ،وايش موظف هالولد وكم عمره وكيف حالته معرف عنه شي
ام هيفاء :عسكري بالرياض بالنقاط
ابو هيفاء :مرور
ام هيفاء :كلهم عسكر
ابو هيفاء :ماهو متزوج ولا قد طلق صح ؟
ام هيفاء :ما ادري هذي انت المفروض تسألهم
ابو هيفاء :دامك تقولين انهم ناس زيننين خل نجربهم ،كلمي امه وقولي لها خلوا الكلام بين الرجال ،والله يجعله خير ان شاء الله
ام هيفاء :ورأي البنت !
ابو هيفاء :تروي يام هيفاء تروي اول ابا اتعرف على ابوه وعليه وإن شفت فيهم الخير سألتها عن رأيها ازين ما ودي اسألها قبل واحمسها وبعدين ارفضهم
ام هيفاء :يعني قصدك انت توافق اول
ابو هيفاء :اي
ام هيفاء :اجل يصير خير بكره لأصبحنا بأذن الله اكلمهم
خلف حائط أخر في ذلك المنزل
شروق :ولله انهم عسل
سهام :اي بس ما تلاحظين ام غاده جالسه مع امي اكثر شي
شروق :احسن تتعرف عليها
سهام :هم حيل كويسين بس امهم غريبه اطوار من يوم شافتني وهي ماشاء الله ماشاء الله
شروق :معجبه فيك ياختي ومين شافك ذا الليله وما انعجب فيك عساك تحصنتي بس
سهام :تحصنت ،وبعدين فيه كثير اجمل مني بعد لا تحسسيني سندريلا
شروق :سندريلا هذيك الي جت اخر شي
سهام :اي وحده ؟
شروق :الي شعرها كيرلي وجلست مع ملاذ ووسن
سهام :اظن اسمها هيام
شروق :ياويلي من جمالها ماشاء الله مدري هي سمراء كذا ولا مسويه تان
سهام :مو سمراء احسها حنطيه
شروق :اي حنطيه بس كذا تلمع ماشاء الله
سهام :انا جذبني شعرها اول مره اشوف كيرلي طويل
شروق :لا فيه كيرلي طويل
سهام :لا ماقد شفت الكيرلي اغلب شي يوصل لتحت الكتف بشوي بس هي ماشاء الله لنص ظهرها
شروق :مكياجها كان مرتب بعد احس احد مسويه لها
سهام :لا واضح هي يعني الوحده اذا عرفت لنفسها تطلع حلوه دايم
شروق :اي منجد
سهام بسخريه :مو زي حواجب السيف الي توصل للأذاني
ضحكت شروق :خلاص ياخي تجربه فاشله ذيك الحين غيرت ستايلي وصار طبيعي اكثر
ضحكت سهام :كنتِ مصممه انه حواجبك سيف وهي مو جهه السيف ابد
شروق :ترا حتى انتِ لو اذكرك قبل خمس سنوات كنتِ تحسبين عيونك حاده وتشدين ابو شعرك عشان تصير حاده وهي ناعسه
تحسست عينيها :بس الحين احبها
شروق :خلقه ربي هي بس شكلك يجيب النوم
سهام :بالعكس سكينه وراحه
دخل ابو هيفاء :باقي ما نمتوا
شروق :نسولف عن العزيمه
سهام :العزيمه الي نسيتينا فيها ورجعنا مع ولد الناس الغريب
ضحكت شروق :كنت مستعجله ياخي ببالي اني تأخرت على مووعد الرجعه وامي بالبيت بتهاوشني
ضحك ابو هيفاء:الله يهديك
سهام :يبه ما يضحك كيف لو خطفنا ؟
ابو هيفاء :ما بيخطفكم وامه هي الي موصيه عليه
سهام :اصلًا سيارته ريحتها خايسه
ابو هيفاء :وش ريحتها ؟ دخان؟
سهام :لا ريحتها عطر رجالي عوده ما احبها ذي العطور
شروق :افهم من كلامك ما تعجبك ريحه ابوي
سهام :ابوي يتعطر بمسك يازين ريحته مو ذي العطور الثقيله تصدع بالراس
ابتسم ابو هيفاء:طبيعي لأنك متعوده على عطري بس
سهام :متعوده عليه ومتعوده على حضن قبل النوم
فتح ذراعيه لها:تعالي
عانقته سهام وقالت :أحبك مهما صار
مسح على شعرها :وش الطاري؟
ابتسمت :مدري كذا خطر بقلبي
شروق :خير هالرومنسيه مالي نصيب منها
ضحك ابو هيفاء :تعالي
شروق :مهما صار أحبك
سهام :حتى بالكلام تقلدني
شروق :لا غير قلت
سهام :كذابه نفسه بس عكستي
ابو هيفاء :يلا بس ناموا بكره يمكن يجونا ضيوف
شروق :مين ؟
ابو هيفاء :اختك وولدها
شروق :انا مو موجوده اجل
سهام :حرام عليك
ابو هيفاء :اختك الكبيره ذي وجايه تتطمن عليكم وتسولف معكم ما بتذبحكم
شروق :مغير تجي هي وولدها يحوسون البيت ويروحون
سهام :البيت يترتب بس اختك ما تتعوض
ابو هيفاء :البيت يترتب واختك ما تتعوض
شروق :حبيبة ابوها قالت كلام يعجبه الحين تنام وهي مرتاحه
ابو هيفاء وهو خارج :كلكم حبايبي بس ناموا
سهام :يلا انقلعي غرفتك نامي
شروق :عاجبتني غرفتك من يوم غيرتيها
سهام :قولي ماشاء الله توني مغيرتها من اسبوعين
قامت شروق :مدحتها مجامله وصدقت
سهام :كلنا ندري انها مو مجامله
...
نجد :صباح الخير
هيام :اخيرًا جيتي
نجد :ما نمتي؟
هيام :انتظرك
نجد :هيام اكيد تكذب عليك
هيام :لازم اتأكد ارسلي لها
نجد :طيب تعالي ،وش اكتب؟
هيام :اسأليها عن اسمها
نجد :عشان تحسبني ساحره وتبلكني
هيام :قولي لها انك ضايفه رقمها من زمان وغيرتي رقمك وتبينها تقول لك هي مين عشان تسجلين اسمها
نجد :ما فهمت
هيام :هات الجوال
كتبت لها :السلام عليكم ،انا من اول ضايفه رقمك وغيرت رقمي مين انتِ عشان اسجله بأسمه
ردت عليها :هلا انا أم محمد مين انتِ؟
نجد :ترد بسرعه ! اقولك شكل هي الساحره مو احنا
ارسلت لها هيام :أي ام محمد يا كثر النسوان بهالاسم
ام محمد :ليلى
هيام:ليلى اخت صالحه؟
ام محمد :ليلى تركي
هيام :اها عرفتك عرفتك
ام محمد :وانتِ مين ؟
كتبت هيام :انا اخت عبدالعزيز آل مبارك
نجد :لا يالبقره امس بلكتك لأنك قلتِ لها انك بنت عبدالعزيز
هيام :طيب وش اقول
نجد :مدري
هيام :عمتي مختفيه صح ؟
نجد :أي ،مدري انتِ قلتِ ان عمتك من عزا ابوك ما قد شفتيها
هيام :خلاص شوفي وش بقول
كتبت :انا جارة ...
هيام :شسم عمتي ؟
نجد :مدري
هيام :اظن عاليه
نجد :عاليه ...اي يصلح عاليه وعبدالعزيز
هيام :مو تسمين عيالك ياختي الاولين ما يفكرون يصلح ولا ما يصلح الي يجي ببالهم يسمونه
نجد :وش دراك يمكن جدانك فكروا
هيام :طيب بلاش اسم بقول لها اخت عبدالعزيز آل مبارك
نجد :اوهو بتصير حرب بتقول منهي ذي الي تعرف عبدالعزيز ولا تعرف اخته ولو انها صدق حبيبته بتغار
هيام :تغار على ايش هي صارت ام محمد وهو ...الله يرحمه
نجد :طيب ارسلي لها ونشوف
ارسلت لها :انا جارة أخت عبدالعزيز آل مبارك تعرفينه ؟
ام محمد :ووش عرفك بعبدالعزيز آل مبارك ؟
هيام :وش اقول ؟
نجد :قولي مشهور بجماعتنا
هيام :مافيه ولا جماعه وينهم ما اشوفهم وقفوا مع ابوي ولا معاي
التفتت للهاتف :بلكتني!
نجد :وش مسوي لها ابوك كل ما شافت طاريه تبلك
اغلقت الهاتف ورمته جانبًا:ابوي ماهو مسوي شي اكيد هي مسويه شي وما تبي احد يعرف
امسكت نجد شعرها :وش دراك هيام تراه عاش ٢٤ سنه قبل يجيبك ما تدرين حب مين وكره مين ،ما اقول ان ابوك غلطان ومذنب يمكن كان بينهم شي ونسيوه وهي ما تبي تفتحه
هيام:فيه شي ماهو مريحني أحس فيه وراهم بلوه غير انهم كانوا بعلاقه ،هذا لو كان صدق
نجد :طيب الحين عندك اسمها هذا طرف خيط
هيام :وش دراني انها ما كذبت ،ولله لا اسود عيشتها بشتري ستين رقم واروح لها منه
نجد :تراها مره كبيره عيب
هيام :وش تخبي عني طيب !وش الشي الي رح يخبونه الناس عن اهل عبدالعزيز كيف مات ابوي ومين كان يحب ماني عارفه شي
نجد:طيب هيام خلينا نفكر لو مثلًا اكتشفنا ان ابوك مات بطريقه غير مثلًا مثلًا مات قتل وش بيتغير ؟ بتوجعين قلبك فوق ماهو موجعك ،خليك على فكره وحده ولو كانت وهميه ابوك مات بحادث وكان يحبك ويحب امك
هيام :كيف مات قتل نجد تعرفين شي؟
نجد :لا ما اعرف اي شي غير الي انتِ قلتيه لي
سكتت هيام قليلًا ثم قالت :نجد احس اني مريضه نفسيه
نجد :ليه بسم الله عليك
هيام :مدري اشك فيك دايم مع انك الشخص الوحيد بحياتي مدري لين وين بوصل
نجد :مو دايم من يوم جينا للسعوديه وانتِ كذا ،يعني واضح تأثير المكان والذكرايات
امسكت يديها :مهما قلت عنك وزعلت منك كوني معاي مالي غيرك بذي الدنيا
ابتسمت نجد :اكيد بكون معاك ثمان سنوات واحنا تقريبًا كل يوم مقابلين بعض او نكلم بعض تتوقعين انه بتدخل بيننا كلمه من غير قصد او زعل وهمي ؟ احنا اكبر من كذا تطمني والحين نامي ترا ذي تأثيرات السهر تخليك تفكرين بكل شي حزين
هيام :مافيني نوم بروح اشتغل
قامت نجد واغلقت الاضواء :لا نامي وشغلك اليوم خليه علي
هيام :بيخرب نومي
نجد :معليك بصحيك الظهر وبالليل ارجعي نامي
...
ام جهاد :يالله صباح خير يالله يارب انها تدق
ابو جهاد :مين يدق؟
ام جهاد :نسيت اقول لك امس خطبت وحده لجهاد يعني كلمت امها وقالت خلاص بكلم ابوها ونرد لكم خبر
ابو جهاد :يا سلام ! مو المفروض هالموضوع بين الرجال ؟ ومتى قررتم وما خذتوا رأيي ولا شي انا كنت ناوي ازوجه من بنات عمه
ام جهاد :ترا بدايته على الحريم بعدين ينتقل للرجال ،والبنت ولدك مختارها مو انا
ابو جهاد :وشلون اختارها لا يكون يكلم بنات ويلعب عليهم هالخسيس
ام جهاد :لا يابو جهاد لا الله يصلحك ما كلم احد ولدك من الدوام للمسجد للبيت بس هالبنت صديقه غاده شافها مره مدري مرتين والقلب يميل يامساعد القلب يميل
ابو جهاد :وانتِ شرايك فيهم هالناس زينيين ؟
ام جهاد :ولله عن رأيي وعن رأي امك واختك انهم زينيين شف وضحه وهي وضحه راضيه عنهم وين ابلقى احسن منهم لجهاد
ابو جهاد :دامك تقولين كذا فهو كذا ان شاء الله
انتبهت ام جهاد لهاتفها الذي بدأ يرن :هلا هلا
ردت :حي هالوحي حيه هاه بشري؟
ام هيفاء :ابشرك كلمته ويقول ان كان فيه خير يبي الموضوع بين الرجال
ام جهاد :الحمدلله الحمدلله ...
همس ابو جهاد :وش تقول؟
ام جهاد :لحظه يام هيفاء شوي وارد لك
ام هيفاء :خذي راحتك
اغلقت السماعه :تقول انه ابو البنت يبي الكلام بين الرجال ،قلت لك اول بيننا بعدين بينكم بس انت مستعجل
ابو جهاد :اجل قولي لها تعطيني رقمه
ام جهاد :الو ،اقولك ابو جهاد عندي عطيني رقم رجلك وبيسجله عنده
ام هيفاء :اي اي بس لحظه ابقفل ثواني واكتبه
ام جهاد :خذي راحتك خذيها اهل العروس هم اهل الدلال
ضحكت ام هيفاء :يا حبي لك ولمزحك
اغلقت الهاتف وذهبت تنادي بالمنزل :يا شروق ،يا شروق
سهام :شروق نايمه
ام هيفاء :والدوام ؟ متى بتقوم تجهز
سهام :باقي الساعه ثمانيه بتقوم وش بغيتي
نظرت لها ام هيفاء قليلًا :مب لازم خلاص
سهام :وش معاك يمه ؟
ام هيفاء :ماهوب لازم خلاص يا بنتي
سهام :يمه !
ام هيفاء:سجلي لي رقم ابوك بالورقه ابامليه على احد
سهام وهي تكتب الرقم :على مين ؟
ام هيفاء :ام جهاد
سهام :ليه وش تبي فيه ؟
ام هيفاء :بتعطي زوجها يبون يخطبون سهام
وضعت القلم ونظرت لأمها ثوانٍ
ام هيفاء :بسرعه سجلي المره تنتظر
سهام :يمه انا سهام
شهقت ام هيفاء :يا ويلي علمتك
سهام :متى كنتم ناوين تعلموني ؟ يوم العرس تصحوني يلا قومي اليوم عرسك حتى رأيي ما بتاخذونه
ام هيفاء :اصبري توه صار الموضوع بيكلمون ابوك وابوك بيسأل عنهم ان شاف فيهم خير جا وسألك وان فيهم شر بيرفضهم قبلك
سهام وهي تسجل الرقم:انا من الحين رافضه
ام هيفاء :لا لا معليك منت رافضه
سهام :انا رافضه لأنكم ما ناقشتوني
ام هيفاء :فكري فيه امس شفتيه يوم وصلنا للبيت وبتوافقين ان شاء الله
قطعت الورقه بقوه :ماني موافقه لو هو يجي عن رجولي ،خذي
ام هيفاء :معليك بتوافقين
سهام :ماهو بالغصب هو توني رفضت ولد عمي فيصل اقدر ارفضه
ام هيفاء :ولد عمك حتى احنا رفضناه يدخن بس ذا مافيه ولا بلوه لحد الآن
سهام :يارب يطلع يدخن ويتعاطى بعد
ام هيفاء :استغفر الله العظيم واتوب اليه وشلون تدعين على ولد الناس كذا ،واذا بكره وافقتي عليه وصار يتعاطى احنا وش نسوي؟
سهام :عشان كذا ما بوافق دعيت عليه
ام هيفاء وهي ذاهبه:يا الله لا تستجيب هالدعوه لبنتي ،انا معد بقول شي ابوك لا جا يكلمك هو يعرف لك
سهام بتذمر تحدث نفسها :وانت بعد يعني صادفت البنت مرتين ...ثلاث ...اربع مرات وخلاص تبي تتزوج حمار قسمًا بالله
وضعت رأسها على الطاوله وقالت :لا ولله ما الحمار الا انا يعني هذا اسلوب تتعامل فيه الوحده مع رجال
رفعت رأسها لتقلد نفسها عند أول لقاء لهم بسخريه:لا ولله ما تروح لين تعالجه ،ولا طالعه بشعري اقسم بالله انها نظره شرعيه وش بيفكر يعني بعدها غير الزواج
قامت ووقفت أمام المرآه تلعب بشعرها كما تفعل دائمًا كلما كانت تفكر :بس لو كان انسان وصخ كان فكر بأفكار غير الزواج ...لا شدعوه سهام ترا ذي فكره الفطره يعني ما سوا شي واو وفخم فكر فكره فطره الله عليها ...بس فكر زيه بذا الزمن نادر
شروق :صباح الخي...وش تسوين
سهام :وش اسوي افكر
شروق :بوش ؟
سهام :الفستان ذا مدري احط له اكمام ولا اخليه بدون
جلست شروق على المكتب ونظرت للتصميم :سهام التصميم كامل وش باقي بتزيدين
سهام :لا مو كامل شوفي
شروق :قد وقعتيه واخترتي القماش وكتبتي على الورقه نفسها متى التاريخ الي عطاك اياه الخياط عشان تستلمينه
سهام :مدري
شروق :وش مدري يالزفت تكلمي
دخلت هيفاء:انتوا هنا
سهام :اي يلا نطلع من غرفتي ما ابي تصاميم بريحه عصير التفاح
هيفاء :حرام عليك ولدي مؤدب
سهام :مؤدب بكل شي الا بتصاميمي يجي ياكل عليها مدري مين قال له انها سفره
هيفاء :وش فيه شعرك كذا ؟
سهام :كيف؟
شروق :كانت تفكر بس مدري بأيش
هيفاء :بأيش تفكرين ؟
سهام :مالكم دخل ياخي خلاص
شروق :لا لنا دخل خواتك حنا
هيفاء :خليها خليها بنعرف وش تحتها عاجلًا غير آجل
سهام :ما فيه شي عشان تعرفونه
هيفاء:وين ابوي
سهام :وش تبين فيه ؟
هيفاء :ابوي ابي ابوي بجلس معاه واسولف ما بنطلع سرك الي مدري وشهو
سهام :روحي
ذهبت لغرفه والدها وعندما طرقت الباب سمعته يتحدث قائلًا :يصير خير ان شاء الله ،لكن انا ابا اسأل عن الولد مع انه ظني انه فيه الخير لكن الواجب اني اسأل ...ايه ايه وبرد لك خبر ان شاء الله إن سمعت عنه طيب تجون للنظره الشرعيه
ابتسمت هيفاء وعادت اليهم :عرفت وش تعجن اختك
سهام :وش اعجن ؟ معرف للعجين اصلًا
هيفاء:قصدي وش تخبين
شروق :وش تخبي
هيفاء :فيه واحد خطبها
شهقت شروق :عشان كذا رفضتي ولد عمي فيصل
سهام بإستغراب:عشان ايش؟
شروق:الي خطبك الحين تعرفينه صح ؟ رفضتي ولد عمي عشانه
سهام :وش ذا الاتهام الباطل ! معرف احد انا ورفضت ولد عمي لأنه يدخن مو عشان احد ولاني راعية ذي الحركات
هيفاء :اجل ليه تخبين ؟
سهام:من غرابة الموضوع الولد الي الحين امس وصلني انا وامي واليوم خطبني
شروق :لحظه ! لحظه ستوب ستوب ! وش ؟ الي امس وصلك هو الي خطبك ؟ يعني اخو نرجس
سهام :مدري عنهم
شروق :الا اخوها
هيفاء :اخو صديقتك؟
شروق :اي
هيفاء :حركات ولله بتصيرون نسيبات
سهام :ترا ما وافقت للحين كل احلامكم وامالكم واقفه على كلمه مني
هيفاء :وانتِ شقولك ؟
سهام :مدري مافيه شي يجذبني عشان اوافق
هيفاء :الله الله وش تبينه يسوي عشان يجذبك ؟ يوريك عضلاته المفتوله ولا يغني ولا يكتب شعر ولا ايش؟
سهام :خلي ابوي يسأل عنه ويصير خير
شروق وهي ممسكة هاتفها :يعني موافقه
سهام :لا مو موافقه !
شروق :ليه وش ناقصه بسأل اخته عنه
سهام :شروق تكفين خليك هاجده ابوي بيسأل ويكلمني وانا بقرر على مواصفاته
شروق :فات الاوان ونرجس ارسلت صورته
سهام :ياربي ياحبك للتدخل ذا
هيفاء :اشوفه
شروق :شوفيه وربي انه مزيون
هيفاء :سهام تعالي شوفيه بتوافقين على طول
تكتفت سهام:ما ابي
شروق :يشبه لغاده بالعيون
هيفاء :غاده اي وحده ؟الي وريتيني صورتها بالسناب ؟
شروق :اي
هيفاء :منجد نفس العيون
سهام :ما يشبه لها ...
شروق :ايوه ؟
سهام :ولا شي
قربت شروق الهاتف من وجهها :شوفيه تأمليه وتعرفي عليه
اغمضت عينيها :ما ابي اشوفه
شروق :ليه ؟تستحين ؟
سهام :استحي من صوره ماني خبله انا
هيفاء :طيب شوفيه ما طلبنا شي ما قلنا تزوجيه غصب
فقدت الامل ونظرت للصوره وتنهدت
هيفاء :شروق تعرفين اسمه؟
شروق :اي جهاد
هيفاء :الله شوفي الوزن كيف سهام جهاد ،كم طوله ؟
سهام :خياطه انتِ لا سمح الله؟
هيفاء :لا بس لازم احسب التناسق من جميع الجهات الاسم ١٠٠٪؜
شروق :طيب هيفاء وخلف ؟
هيفاء :٢٠٠٪؜ كأننا أمراء أماراتيين على هالاسماء الفخمه يا زيننا ماشاء الله
سهام :وربي انكم اغرب خوات
شروق :ما الغريب الا انتِ من يرفض ذا الانسان ؟ انتِ تدرين انه مره جاب نرجس الجامعه وشافته وحده معانا اسمها منال انهبلت عليه تلاحق نرجس بكل مكان عشان تصير علاقتهم قويه وتتعرف عليه
سهام :اكيد عاد مراهقه جا على جوها
شروق :لا ماهي مراهقه هذيك عمرها ٢٦ سنه اكبر منك وكانت انتساب بالثانوي الحين تكمل جامعه
قامت سهام :ما يهمني ابد
شروق :خلاص انا برسل صورته وانتِ فكري وتأملي
سهام وهي ذاهبه:ما بفتحها حتى
شروق :نشوف نشوف