كُن بقربي فإن الروح هائمة

13

لمحةٌ من الماضي ،وتحديدًا ذكريات الطفوله...
جهاد :أوس يالزفت شوت
أوس :ما أشوف زين خلني أركز
جهاد :استعجل
أوس :بعدوا وسن
التفت جهاد لها :ماهي حولك شوت
تنهد وركل الكره فأصابت رأس وسن ،ركض راجح لها :جاك شي ؟
أوس :قلت لك بتجي فيها!
جهاد :أنت أحول أنا مالي دخل
راجح :جيبوا ثلج
أوس برعب :شكلي فلقت راسها
راجح :سنها أنكسر جيبوا ثلج
ركض أوس ليجلب الثلج
بكت وسن فور تلقيها الخبر :سني الجديد سني
جهاد :أنتِ حماره قلنا لك ملعبنا مو للجلوس
راجح :هو غلطكم جايبين ملعبكم عند مرجيحتها
عانقت راجح وأستمرت باكيه :كسروا سني
مسح على رأسها:بيطلع لك غيره خلاص
وسن :سني جديد
خرج بندر مع أوس :عسى ما شر ؟
ذهبت لوالدها شاكيه :أوس شات الكوره علي وكسر سني الجديد
بندر :يوجعك؟
وسن :لا بس جديد !
ابتسم بندر :اشوف فمك
وسن :كله دم
بندر :لا يا بابا ماهو سنك الجديد هذا الثاني الي كان يهز أمس
وسن :الثاني ؟يعني بيطلع جديد غيره
بندر وهو يمسح دموعها:أي ،الحين روحي عند أمك غسلي وجهك وذاكري
التفت للأولاد :وانتوا وش مشكلتكم مع بنتي ؟
جهاد :ياعم بنتك دلوعه وولدك أحول شف لهم حل
بندر :أوس ؟
أوس :يبه والله مو قادر أشوف المرمى
بندر بإستغراب :ما تشوف المرمى ذا ؟
أوس :أشوف بس مشوش
راجح :يمكن عندك ضعف نظر
مسح بندر على رأس راجح :ماشاء الله عليك دكتور ،وأنت بكره ان شاء الله بوديك المستشفى تفحص
راجح :تدري حتى عرفت أنه سنها الي أنكسر لبني بس هي ما سمعتني
ضحك بندر وقال بسخريه :حيرتنا دكتور عيون ولا أسنان
راجح :مدري كل شي يعجبني
بندر :ووش ذا الدم على لبسك؟
راجح :من وسن
بندر :جيبه بكره الصبح قبل تداوم اوديه المغسله
راجح :لا عادي
جهاد :كيف عادي ! مو هذا طقم ريال مدريد الي تحبه ويوم كبيت عليه مويا عصبت علي؟
راجح :إلا بس ...مدري
ابتسم بندر وأكمل عنه :وسن غير  ولا ؟
أنحرج راجح :أي
بندر :أبشر بالعوض وأنا عمك أجيب لك طقم ريال مدريد الجديد
أوس :أنا أبي برشلونه بعد
بندر :وجهاد ؟
جهاد :الهلال
بندر :محلي يعني ،أنت يا أوس رح أسأل صقر وش أحسن فريق عنده وأنا بجيب له هديه على حفظه لنص القرآن ،لا تعلمه طيب؟
أوس :أبشر
...
قام من عندها وخرج فاقدًا الامل فقابل خالد في طريقه :وش صار عليها؟
أحمد :ماهي راضيه تتكلم تبكي وبس
خالد :فتشوا وراها مالها علاقه بالخليه بنطلعها
دخل عندها و أحدى يديه كانت تحمل حقيبتها والأخرى خاتمها :نرجس
نرجس :وش جابك ؟
خالد :بطلعش
نرجس:ليه تكذب علي؟
خالد :لمصلحتش
نرجس :مصلحتي اجلس بالتحقيق ثلاث ساعات ؟
خالد :مصلحتش انه محد يعرف معرفتي فيش
نرجس :طيب انا وش دخلني تدخلني لين بينهم بعدين تتركني ؟
خالد : كنت محتاج اتبرى منش لحظتها
نرجس :انا ما اتكلم عن لحظتها اتكلم عن قبل لحظتها ،كنا موجودين لحالنا بذاك المكان كان يمديك تقول لي أشياء كثير ومحد درا
خالد :نرجس ما تعرفين انا أيش بعالمهم لو عرفوا مقدار ذره انش من معارفي بيتعرضون لش بكل طريق ،أنا حتى زوجتي ما تدري بشغلي ذا ولا جبتها للرياض ولا اشوفها بالسنه الا مرتين او ثلاث مرات وكلها ما تتعدا شهر كله عشان أحميها عيالي يعرفون اجدادهم أكثر مني ،جت عليش بموضوع بسيط ذي المره وزعلانه ؟
نرجس :انا مدري اذا انت صادق ولا كذاب بس مستحيل وحده توافق على زوج كذا
خالد :زوجتي غير
نرجس :وانا غير ! انا ما ارضى شخص يسحبني وراه ويوعدني واذا شاف الخطر تبرى مني وتركني
خالد :وعشان تتعلمين من درسش ما توثقين بكل من قال حولي لي
قامت نرجس وأخذت حقيبتها من يده متجاهلةً الخاتم :تعلمت أنك كذاب ومنافق
خالد من خلفها :سيارتش بالمواقف الارضيه عند العمود B
ذهبت للمواقف وهي تحدث نفسها بغضب :حلوه ذي عشان مصلحتك ،طيب لا توعد كذب قول الحقيقه
صعدت السياره وبحثت عن خاتمها بالحقيبه :ذا الي ناقص تفاولت على خاتمي لين ضاع صدق
خطر ببالها أنها رأته بيده قبل أن تخرج فضحكت بغضب وسندت رأسها على المقود :والله معد أرجع له ولا عاد أطلب من ذاك المنافق شي
فتحت المرآه ونظرت لوجهها :كل شي سايح حوبة هالخالد الحيوان الله يعين زوجته المسكينه عليه
رن هاتفها فردت عليه :الو
غاده:وينك للحين ما جيتي؟
نرجس :جايه بس زحمة الويكند تعرضت لي
غاده :امي تنتظرك عشان تنامين بكره ورانا رحله
نرجس :ما جهزت اغراضي لسى
غاده :جهزيها اذا رجعتي
نرجس :خمس دقايق أو ربع ساعه بالكثير الا انا عندكم
غاده :يلا مع السلامه
اغلقت الهاتف ومسحت وجهها لتستجمع طاقتها :خلاص نرجس ما صار شي ركزي بوضعك الحالي
ربطت حزام الامان وشغلت السياره ثم نظرت للوضع حولها :وقفني بموقف طولي الحيوان ! الحين بالله كيف أطلع
انتبهت لدخوله المواقف ونظره لها فشغلت السياره ممثلة عدم المبالاة :بوريك الحين بطلع وادعسك ونرتاح منك يالغثيث
وقف مكانه وتكتف يراقب خروجها المستحيل من الموقف
اقترب منها ودق الزجاج ففتحته :ولك وجه تلحقني بعد ؟
خالد :شكلش تحتاجين مساعده
نرجس :ما أخذ المساعده من منافقين ابعد
خالد :يعني تحتاجين مساعده ؟
نرجس :لا ما احتاج اسهل شي المواقف الطوليه اعرف كيف اطلع منها بسهوله وانا مغمضه بعد
تراجع للخلف :يلا وريني
حاولت إخراج السياره لكنها احتكت بالسياره المجاوره فنزلت بذعر :ذا الي ناقص !اكتمل يومي خلاص ،كله بسببك
خالد :أحمدي ربش أنها سيارتي وانا مسامحش
صعد مكان السائق :وخري خليني اطلعش من هنا لا تعدمين سيارات الناس
عضت شفتها السفليه بغضب وصعدت في المقعد المجاور :يقال اني متشفقه على مسامحتك ،انت الي بخليك تتشفق علي وتترضاني عشان اسامحك
خالد وهو مركز بالسياره :اذا الله احيانا
أوقف السياره ونزل :يلا توكلي على الله وكملي طريقش
نزلت هي وذهبت للباب الأخر ثم مسحت مكان جلوسه متعمده :لازم أغسل السياره جات فيها نجاسة المنافقين
خالد :معليش بس حتى انتِ فيش من صفات المنافقين النقاب وينه ؟ أخذ اجازه ؟
نرجس :وش دخلش ؟
كتم خالد ضحكته :اربطي حزامش وتوكلي بس يلا
...
مها :نجد تكفين روحي وتأكدي
نجد :مها المغرب وانا عندهم شذا الهوس ترا كلها بزر !
مها :طيب بنتي هذي ما قد افترقت عنها يوم
نجد :خلاص افترقتي الحين وهي مع ابوها ارتاحي
مها :مارح تحسين بشعوري الا اذا جولك عيال ،هذا اذا تزوجتي اصلًا
نجد :اصلًا ما قلت لك ...
رن هاتفها فنظرت للأسم و ردت عليه :الو
غيث :شلونك؟
نجد :بخير الحمدلله انت شلونك ؟
غيث :بأحسن حال وجايك بأخبار 
أمسكت خصلة من شعرها :عساها خير
غيث :ابوي موافق بشكل أكيد لكن ننتظر أخوك يجي و إن شاء الله أخطبك رسمي
اتسعت ابتسامتها تحت نظرات مها المستغربه :إن شاء الله ،غيث أنا بقفل قاعده مع زوجه أخوي تعبانه
غيث :يلا استودعتك الله
نجد :مع السلامه
عبست مها وقرصت كتف نجد :ماني زوجه أخوك !
نجد :مشوار لين اقول طليقته بعدين العلاقه تفشل قاعده مع طليقة اخوي
مها :بعدين وش المكالمه الغريبه ذي مين غيث ؟ وش ذي الابتسامات ؟ عارفتها البدايات ذي
نجد :زميل بالشغل وبتتطور علاقتنا وبنتزوج بس
مها :تأكدي أنه مو أمعه زي بعض الناس
نجد :لا ماهو أمعه زي راكان معليك
مها :حرام عليك اخوك ذا
نجد :اشوفك تدافعين عنه فيه مشاعر يعني ؟
مها :وش مشاعره نجد ؟ ادافع عن الأخوه الي بينكم صح راكان فاشل بالزواج بس لا تهضمين حق الأخوه عشان واحد متعرفه عليه قبل يومين ،بعدين انا أسب راكان بس أنتِ أحترميه لأن زواجك من غيث هذا مقرون بكلمه من راكان
نجد :ليه كلمه من راكان وأبوي ؟
مها :ابوك بياخذ برأي اخوك يا حلوه
نجد :صح ، ستل احس باقي مشاعر لراكان
مها :نجد بموت منك ما احبه انا ما طلبت الطلاق الا اني ما احبه
نجد :وشفنا الدموع الي ما خلصت
مها :كانت على ميلاف
نجد :لا لا ماهي على ميلاف ولا شي على راكان
مها :من زينه هالراكان بعد مدري وش شفت فيه وحبيته
نجد :اذكرك وش شفتي فيه ؟
وقفت مقلدة أسلوب مها قبل سنوات :نجد أنتِ غبيه والحين عرفت السبب  أخوك أحسه أخذ الذكاء عليك واسلوبه محترم مره عكس اسلوبك سبحان من خلق وفرق ،والجمال الموضوع محرج شوي ان بنت تتكلم عن ملامح رجال بس ...راكان وسيم صراحه وضحكته حلوه بس ودي أتاكد عنده مشاعر لي مثل مشاعري له
مها بصدمه :أنا قلت كذا !
نجد :وبالحرف الواحد ،وترا فيه دواهي بس خليها مستوره
مها :أكيد كنت مسحوره مستحيل قلت ذا كله بكامل قواي العقليه مستحيل
نجد :أنا أشك إنك الحين مسحوره راكان من يوم جا ما عليه ولا أثار تأثير عماتي
مها :يمكن كلنا مسحورين! يمكن السحر ببيتنا بالخرج
نجد :لو طلعتوا مسحورين بترجعين لراكان ؟
مها :لا
نجد :الحين تأكدت أنكم مسحورين ،بجيب شيخ يقرا ببيتكم وعليكم يا سحر يا عين حسبي الله على الي فرق بينكم
تنهدت مها :خلاص ترا مهما طلع طاب خاطري من راكان معد أقدر أشوفه بنفس الحب مهما صار
نجد بتردد :بقول لك شي
مها :وش؟
نجد :اليوم رحت المستشفى الصبح لقيت راكان متضايق شوي حققت معاه طلع الدكتور حق ميلاف جاه ويسأل عنك وهو ما عجبه الوضع وقال له انكم رجعتوا لبعض
مها :نجد اساسًا أخر ما بقى من مشاعر راكان الغيره والغيره المبالغ فيها لدرجه حسيته يبي يتملكني مو يشاركني حياتي
نجد :الموضوع مو غيره الموضوع أنه باقي يبي الناس يشوفون أنك من نصيبه كان يقدر يتعذر بمليون عذر ليه بس أختار يقول رجعنا لبعض ؟ لأن عنده أمل
سكتت مها قليلًا ثم نظرت للساعه :الوقت تأخر بنام
تنهدت نجد وقامت :طيب
استلقت على السرير وفتحت محادثاتها القديمه مع راكان لتزور طيفه المترسب فيها ،كل مشاعرها له تلاشت إلا مشاعرها تجاه ذلك الطيف وتلك الأيام التي يقال لها البدايات نزلت دموعها بحرقه على محاولاته المتأخره كانت تتمنى منه ذلك في وقت ما لكن الآن... تأخر الوقت كثيرًا ولم يبقى بينهم سوى الفراق والذكرايات والدموع ...
...
دخل المنزل ورمى مفاتيحه على الطاوله وما زال يكره هذا البيت بكل تفاصيله
اشواق :وين كنت؟
سيف :وديت نهى المدرسه وداومت والدكتور اعتذر وجيت
اشواق :خفت عليكم صحيت ما لقيت احد
سيف :نمتي اليوم ومعد صحيناك قلنا ترتاحين ،وبعدين نسيت ارسل لك
اشواق :ابتهاج وجوانا معاها ؟
سيف :اي
اشواق :طيب تعال بكلمك على موضوع امس
سيف :صار سوء فهم
اشواق :عارفه عارفه
جلس معها واتجه نحوها ليسمع حديثها بتركيز تام:سمي
اشواق :جوالك خربان؟
سيف :اي طاح علي وانكسر
اشواق :جربت اذا دقيت بالسماعه ؟
سيف :جربت نفس الشي
مدت له سوار ذهب :طيب لو بعت ذا يجيب لك قيمة جوال ؟
نظر لها بصدمه ،مهما فكر لن يستوعب تضحيات الأمهات :يمه وش ذا ؟
اشواق :معد تجي علي ببيعها واشتر لك جوال جديد ما ودي تدخل بمصايب كذا مره ثانيه
سيف :لا تزعليني يمه مو لازم جوال جديد
اشواق :طاوعني وخذها اساسًا معد تجي علي وكان بخاطري ابيعها من زمان
سيف :ببيعها لك بس بشتري لك غيرها وتجي عليك
اشواق :سيف لا تعصيني
سيف :والله يا بعد قلبي أنه موب خاطري جوال ولا شي لو بخاطري بطلب من ابوي ولا بجمع انا ولا بدبر روحي بس ذهبك ما بقربه ولا باخذ من قيمته ريال اذا تبين تبيعينه ببيعه واشتري لك جديد أما أبيعه لأغراض ثانيه لا
اشواق :اقولك انت !
قبل رأسها وعانقها :الله يطول بعمرك ويحفظك بس فكرتك مرفوضه
اشواق :ترا بزعل ! وبروح عند أهلي معد بتشوفوني
سيف :طيب اشوف عطيني السواره
مدتها له :الفاتوره مضيعتها بس بيقبلون يبيعونها عادي انا شاريتها بألفين قبل عشر سنوات قول لهم كذا وهم بيسعرونها
امسك يدها والبسها غصبًا ثم قبل يدها :تجي عليك وش حلاتها بعد
تنهدت اشواق :ما منك رجا ،العيال يسرقون ذهب امهاتهم ويبيعونه وانا ما تسرقه
ضحك سيف بإستغراب :تبيني اسرق ذهبك ؟
اشواق :ايه اسرقه اذا تبي شي وما عطيتك
سيف :الحمدالله ما قد طلبتك شي الا ولبيتيه ،بس انا الحين خلاص رجال المفروض انا اصرف عليكم كلها كم سنه واتوظف ويجيني ذاك الراتب الزين اصرف لك منه كل شهر نصه
اشواق :وابوك ؟
سيف :ابوي الف تكفيه
اشواق :انت واختك بتجلطوني حرام تفرقون بيني وبين ابوكم يعني لاهو الي ضربكم ولاهو الي حرمكم من شي...
قاطعها سيف ليغير الموضوع :انا عندي طلب منك
اشواق :هلا يا عيوني
سيف :بكره ولد جيرانا الي بالقصيم عازمني على عرسه والكبك حقي الي عطاني خالي ثنيان ابوي ماخذه من يوم عزيمه خوالي الي قبل العيد ولا عاد شفته كلميه يطلعه لي ابيه
اشواق :وانت ليه ما تكلمه ؟
سيف :ما ابي
اشواق :بينكم شي؟
سيف :بيننا احتكاك بسيط
اشواق:ليه وش السبب
سيف :يمه كلميه بس خليه يجيب كبكي ومشكلتنا بنحلها بعدين ان شاء الله
اشواق :ان شاء الله بكلمه اذا رجع،الباب يدق صح؟
سيف :شكله
قامت اشواق :شكله ثنيان
لحقها متسائلًا :عسى ما شر ؟
اشواق :اخوي وبيزورني وين الشر ؟
سيف :يمه صح أنك أمي وأحبك بس أحيانًا أحسك نهى مكبره
ضحكت وهي تفتح الباب :بنتي اذا ما شبهتني مين بتشبه ؟ وانت من الحين أقول لك بتصير زي ابوك
فتحت لثنيان على جملتها الأخيره فهمس هو وسيف بداخلهم :الله لا يقولها
انتبه سيف لقدوم رتيل مع ثنيان فصد عنها وكاد يرحل فأوقفه ثنيان :تعال وين رايح زوجة خالك خالتك يالمؤدب
سيف :شرعيًا ما يجوز اجلس معاها
ثنيان :بوجود محرمها عادي
سيف :بروح انا مشغول
اشواق :حياكم تفضلوا
دخلوا خلف أشواق وكان ثنيان يحلل البيت بنظراته :ماشاء الله تبارك الله
اشواق :القهوه على النار بجيبها واجي تفضلوا اجلسوا
اتكى ثنيان على الأريكه :شرايك بالبيت؟
رتيل :والله حلو ماشاء الله الله يهنيهم فيه
ثنيان :مدري احس فيه شي غلط ما ارتحت له
رتيل :شدعوه ثنيان بتخليها مشكله ابديه خلاص الله هداهم وتصالحوا
ثنيان:الحمدلله
رتيل :بعدين تعال ليه تبي تجلس سيف معاي غصب ؟
ثنيان بسخريه :عشان تقيمينه اذا عجبك نزوجه اختك الصغيره ذيك
نظرت له بطرف عين ،فضحك :امزح عليك اساسًا عينه على ابتهاج
رتيل :وش دراك؟
ثنيان :اعرف كل شي بذا البيت وبالقصر
رتيل :طلع عرق فيكم التفتيش
ثنيان :مو تفتيش معرفه احوال
اشواق :توك تفكر تجي اخر الناس
ثنيان :بغيتك ترتاحين وتستقرين واجيك ،بعدين وش هالكشخه والزين الي يشوفك بيعرف انك اختي بدون شك
رتيل :الله يالي مقطعته الاناقه توك الصبح تقول لو اجي بالسروال والفنيله احسن
اشواق:شدعوه ترا عادي بيت اختك بيتك
ثنيان :اي والله عادي بس تبيني اطلع الشارع بسروال وفنيله ؟
اشواق :شكل سعيد جا بروح افتح
قام قبلها :اقعدي اقعدي انا بفتح له نسيبي الحلو بسوي له مفاجأه حلوه زيه
تنهد وفتح الباب :على وش يعطونك راتب؟
سعيد :هاه؟
ثنيان :على وش يعطونك راتب راجع الحين؟
سعيد :اشتغل بالليل
ثنيان :ادخل بس
سعيد :وش تسوي هنا ؟
ثنيان:جاي باخذ اختي
سعيد :وش فيها محنا متهاوشين ولا بينا شي
ثنيان :ما باخذها ولا شي بس جاي ابارك لكم على البيت الجديد المستعمل
بلع ريقه :وش قصدك؟
ثنيان :البيت بأسم وحده اسمها مشاعل
سعيد :مدري والله انا شريته من راعيه يقول قبلنا كانت عجوز وولدها شارينه ويوم توفت العجوز باعوه علي يمكن اوراقها باقي فيه
ثنيان :شوف ترا انا بإمكاني اعرف كل شي بذي اللحظه وانهي وجودك بطقة اصبع انهيك لدرجه أشواق ما بتذكر انسان اسمه سعيد بحياتها ما بسمح لها ولا ثانيه تحزن،بس أنا مسوي نفسي مسكين وما أدري عشان اعطيك فرصه تكفر عن اغلاطك الي انا مدري وش هي ولا ودي اعرف الا انك تبت منها
تنهد سعيد مللًا وربما خوفًا :انا انسان ما عندي شي من الي انت تفكر فيه مسخر حياتي لزوجتي وعيالي
ضحك ثنيان :نكتة القرن ذي الله يسعدك حياتك لزوجتك وعيالك بس ! والشغل الي بالليل ،الناس يطلعون مع عيالهم يتعشون يتمشون يتسوقون وأنت بالشغل،وشو شغلك ذا ؟
سعيد :الشغل شغل بس والله ما اقطع تواصلي معاهم ارسل لأشواق كل شوي واتطمن عليها واذا منت مصدق اسئلها
ثنيان :انا ما اسألها الا لما هي تجي ولما هي تجي يعني يكون الوضع زاد عن حده ،لذلك الزم حدودك يا سعيد الزمها
سعيد :إن شاء الله بسوي الي علي واغير الشغل اخليه كله الصبح
ثنيان :بكيفك انت اختار الطريقه الي تسعد فيها زوجتك ،خلنا نشوف شي من اسمك على أرض الواقع
سعيد :إن شاء الله
ثنيان :يا زينك وانت كذا ،تدري لو يرجع فينا الزمن لحظه ما خطبت اشواق...
سعيد بترقب :ايه ؟
ابتسم ثنيان :ما بزوجك ،بس احمد ربك الزمن ما يرجع واحمد ربك ان ربي ساتر عليك ومزوجك بنت حلال غيرك ما لهم قدره يتزوجون وغيرك ربي مبتليه بالحرام انت بنعمه فاقدها غيرك
سعيد بإغاضة لثنيان:والعيال نعمه بعد الحمدلله
ثنيان :والرضا نعمه تدري ؟ أنا راضي بحالي لأن ربي مختاره لي
...
دخل المطبخ بهدوء وكانت تجلس مستندة على ركبتيها فوق طاولة المطبخ لتصل للرفوف العُليا وتغني :
ضاعت حياتي معاكم ويش اللي عاد أرتجي
لو كان هوايا سواكم في ربعنا نِلتقي
أقترب منها حتى شعرت به والتفتت ببطء بينما صوتها يتلاشى بالتدريج : لكن نصيبي وحظي حكم بأيد خالقي...
انعقد لسانها من قربه الغير معتاد وبلعت ريقها
حاصرها بيديه :صوتك طلع حلو
مهيار :متى جيت؟
يزيد :بس ما كملتي الباقي
مهيار :وش؟
أكمل البيتين اللاحقه وهو ينظر لعينيها :
ياعذبة الحُسنِ بالله بالنار لاتحرقي
قلبي وكفي دلالك ياحلوتي وأرفقي
مهيار وصوتها أختفى من الحرج :يزيد أبعد
اقترب أكثر ليسمعها وهو ينظر لعينيها :أيش ؟
كل جزء بجسمها تصلب لم يرف لها طرف حتى:قلت أبعد
وأخيرًا قدرت على الحراك فابعدته ثم نزلت :حركاتك صايره غريبه مدري من المرض ولا ايش
يزيد :فيه اسباب ثانيه لكن ...وش تسوين الحين؟
مهيار :مالك دخل
يزيد :شايفتني مريض وبتروحين تاخذين الحلا صح؟
مهيار :مالك دخل
يزيد:متضايقه صح؟
مهيار :للمره المليون مالك دخل
يزيد :ترا عشت معاك شهرين كلها بصمت بس اسمع مالك دخل وعرفتك زين ،اذا تضايقتي تاكلين حلا ويضرب السكر وتحوسين الدنيا جيبيه
مهيار بحده :حرام عليك انا عايشه بسجن هنا ! كل شي تتدخل فيه وحتى قطعة حلاو ممنوع مين انت اساسًا مين؟
يزيد :وش ذي النفسيه؟
ابتسم وقال بسخريه :ولا شكلها نفسية الوحام
تجهم وجهها ورمت العلبه عليه ثم قالت بغضب غير مسبوق أثناء خروجها:خذ حلاوتك الزفت ذي وانقلع ،خسيس !
خرج خلفها :خلاص مهيار لا تكبرين الموضوع
مهيار :مالك دخل تمام؟
التفتت له وكان يأكل :وبعدين وش هالوقاحه تاكل قدامي! أنا بطلع أخذ نقاهه من وجهك
يزيد :ممنوع
مهيار :على أي أساس؟
يزيد:على عدة أسس ،واحد متضايقه ،اثنين إذا إنتِ متضايقه تخربين نظامك الغذائي ثلاثه إذا خربتي نظامك الغذائي تتعبين أربعه وأهم شي لازم أكون معاك عشان ما يصير كل ذا بس الحين ما أقدر
مهيار :أي وبالليل بتقدر تروح عند حنان بكل راحه
يزيد :أي أقدر
مهيار :طيب ليه ما تجي معاي الحين !
يزيد :ما أقدر
مهيار :طيب ودني عند أمي
يزيد :ما أقدر
مهيار :يزيد أبي أمي بس بشوفها وش دخلك أنت !
يزيد :ما أقدر
مهيار :لا تستفزني كذا قول أي شي لا تستفزني لا تستفزني
يزيد :ما أقدر
مهيار :طيب ما بروح بس يرحم امك لا تقول كذا خلاص
يزيد :الي حسيتيه الحين نفس الي أحسه إذا قلتي وش دخلك
مهيار :وش دخلك وش دخلك وش دخلك وش دخلك
يزيد :ما أقدر ما أقدر ما أقدر ما أقدر ما أقدر
عبير :متى بتخلصون يالبزران؟
يزيد :وش جابك؟
عبير :أخذت مفتاحك أخر مره والحين طفشت قلت أجي
مهيار :جابك الله وش رايك نطلع بس أحنا البنات ونخلي ذا الحيوان يقعد هنا ياخذ علاجاته بروحه ولا يموت ولا بكيفه أنا ما عاد لي يد فيه
عبير :صلوا عالنبي وش صار
يزيد :تبي تخرب أكلها وهي مريضة سكر ممنوع تطلع لين ينتهي زعلها وتهتم بأكلها ولا أنا أطلع معاها بس...
نظر لها :ما أقدر
مهيار :عبير معاي أنت وش دخلك
يزيد :ترا عارف عقلك عارف كل شي بتسوين شي وتقنعينها توديك عند أمك ولا تنزلك بمكان أنا ما أسمح لك تطلعين لين ينتهي زعلك
عبير :كيوت كيف بتراضيها ؟
مهيار :إذا ما تدخل بحياتي أنا برضى
عبير :لا مهيّر أنتِ بذمة يزيد وحياتكم حياه وحده وبينكم بزر لازم يهتم فيك
يزيد :وش هالدلع الخايس لا تدلعين أحد اسكتي !
مهيار :عبير تراني مو حامل ولا تغير شي بيني وبين يزيد أنا على حطتكم مغير كرهته زياده
عبير :معليك ترا قريت عن الحمل الحامل ممكن تكره زوجها عادي
مهيار :أنا مو حامل عبير شوفي الجمله كيف جايه أنا ضمير راجع علي يعود إلي أنا المتحدثه عن نفسي مو نفي بس بالعاميه نفي يعني لا أنا لست حامل
يزيد :صدق عبير ماهي حامل
عبير :عز الله رحتوا فيها أمي نشرت الخبر
مهيار بغصه:شفت قلت لك بيكبر الموضوع
دخلت غرفتها وضربت بالباب ،فتنهد يزيد :ليتك ساكته
عبير :وش قلت !
يزيد:هي زعلانه من أول بسبب ذا الموضوع وجايه أنتِ زدتيها الأمور كانت تمام وعطبتيها يا عبير
عبير :كيف تمام ؟
يزيد بنبرة مقتبسه من مهيار:مالك دخل
ابتسمت عبير :تمام يعني بديت تتقرب منها صح؟
يزيد :أنا ! وش ابي اتقرب منها
عبير :يزيد حبوبي ترا كلنا شفنا نظراتك لها بالمستشفى
يزيد :وش فيها نظراتي عيون تطالع مافيه شي
عبير :لا مو عيون قلوب تحب من بعيد وخايفه تقرب وتنكسر ،والله ما أبالغ كنه مشهد من مسلسل أنت تطالع فيها وهي ما تدري وإذا طالعت فيك تسوي نفسك ما تشوفها
يزيد :مستحيل عبير مستحيل أنا لازم أزوجك بأسرع وقت أول واحد بالشارع واخليك تجلسين معاه شهرين واقول أكيد بديتي تحبينه وكنكم مسلسل
عبير :طيب خلاص معليش
يزيد :يلا توكلي بنام
عبير :مستحيل تنام وحبيبة روحك زعلانه
عض على أسنانه بغضب :عبير خمس ثواني لا أشوفك قدامي ولا ما يصير لك خير ،عطيني المفتاح وتفضلي
رمت المفتاح عليه وقالت وهي خارجه :اساسًا نسخته المفتاح ما يحتاج
يزيد :بغير الأقفال
دخل غرفتها فغطت نفسها باللحاف :اطلع
يزيد :مهيار
مهيار :ما ابي اشوفك اطلع خلاص
جلس بجانبها :قومي
مهيار :ما ابي خلاص !
يزيد :بخليك تاكلين أي شي تبينه بس قومي لعد تزعلين كذا
مهيار:ما ابي اكلك ولا ابي منك شي
يزيد :طيب انا ابي اسمعك وش فيك ؟
مهيار :وش ما فيني؟
يزيد :اطلعي من اللحاف وبسمعك حتى لو جلسنا لين بكره
اخرجت رأسها وجلست ثم مسحت دموعها وضمت قدميها :مافيني شي خلاص ارتاح
يزيد :توك تقولين وش ما فيني ،ما بطلع لين تتكلمين مهيار
مهيار :ابي الحلاو
ابتسم بسخريه :بزر انتِ تبكين على حلاو ؟ فيه سبب اكبر علميني عشان سالفة الحمل ؟ وش يضايقك فيها
مهيار :مو سالفة الحمل بالخصوص حياتي كلها ما قد اخترت ولا شي بقراري الشخصي كله ضغط الناس علي ،مرات كثير تمنيت اغير الواقع وما قدرت كل ما احس اني قربت لحريتي الشخصيه أكتشف انها باقي بعيده
يزيد :وش الي تتمنينه بذي اللحظه الآن وانحرمتي منه ؟
سكتت قليلًا وعينيها التي تحير بها الدموع تنظر له
يزيد :وش تبين مهيار؟
مهيار :أبي أروح لأمي
يزيد :اجل قومي غسلي وجهك وتجهزي بوديك
مهيار :مو سالفة انت توديني ولا لا لو أبي بطلب أوبر وأروح بس خالي هناك أكره وجوده أخر مره شفت أمي كانت بالعيد وكله بسببه معد أروح
يزيد :يضربك؟
مهيار :اسوء من الضرب ،يتكلم علي طول الجلسه ما يبقي شي إلا ويقوله فيني وفيك
يزيد :وين جوالك ؟
اشارت على الطاوله بصمت فأخذه ومده لها :افتحيه
مهيار :وش بتسوي؟
يزيد :افتحيه
فتحته ومدته له فأتصل على أمها :الو السلام عليكم
ام مهيار :وعليكم السلام وين مهيار ؟
بيده الأخرى مسح دموعها :بخير الحمدلله،بس يا عمه الليله عندنا عزيمه ببيتنا اذا تقدرين تجين
اشار لمهيار بعينيه لتذهب :مهيار قاعده تتجهز وقالت لي اعلمك انا
ام مهيار :أن شاء الله بجي
يزيد :يلا نشوفك بعدين ان شاء الله
مهيار :وش سويت؟
يزيد :يلا قومي تجهزي عندك عزيمه
مهيار:عزيمة وش؟
يزيد :على سلامتي ،قومي شوفي وش ناقصك وبجيبه
مهيار :طيب أنت بتجلس ولا بتروح لحنان؟
يزيد بتردد:بروح...هم عازميني من قبل
مهيار :طيب
يزيد :بكلم أمي وخواتي يجون بعد
...
صقر :غيث تعال الله جابك ،اذا جت هيام قول لي وصرفها دقت قالت بتجي
غيث :اساسًا أنا جيت لأنها جت
صقر :طيب وش تنتظر صرف...
دخلت هيام :السلام عليكم
تنهد صقر بإستسلام :وعليكم السلام
هيام :كلمت أوس بس شكله ما جاء
صقر :ليه وش فيه؟
هيام :اذا جاء بقول
صقر :طيب
هيام :ما بتضيفن...
قاطعها كما قاطعته بالمره السابقه :ابي اعرف وش بتقولين
هيام :لازم تنتظر ،تعلم الصبر
دخل أوس :السلام عليكم
هيام :جيت نقدر نبدا
أوس :وش؟
هيام :بعطيكم خبر وابي منكم خدمه
أوس :سمي
هيام :خلاص خلصت كل شي بالمزرعه تقريبًا باقي بس اسبوع وتكمل التشطيبات ،ببدا المقابلات هنا وابي اسوي اعلان...
قاطعها صقر :أعرف كل شي عارفه و اشتغلت على ذا الموضوع شركة التسويق بتبدا من بكره تسوق لك
نظر له أوس بإستغراب ،فأنتبه لنظراته :هاه وش فيه ؟ ترا انا دايم استبق الاحداث لو كنت تداوم قبل كذا كان عرفت
أوس :طيب ما قلنا شي
هيام :طيب أنا فيه فكره ببالي ما أخذت رأيي
صقر بسخريه :وش بتسوين بتجيبين جورجينا ؟
هيام :لا وع ما أحب الهبات مع الناس ابي شي مميز
صقر :لقطاتك بالسباق كفيله أنها تكون إعلان
ابتسمت هيام :يعني تعترف إني أحسن منك؟
صقر :لا ما أعترف بذا الشي بس الناس اغبياء ما يعرفون الخيال من اللعوب
أوس :هيام خياله والدليل فوزها
صقر:يا شيخ من ذا الفوز الي ازعجتوا أمنا فيه والله لو أنه أيش كله سباق بسيط مال امه داعي وانا من البدايه داخله تسليه
هيام :طيب خلاص لا تصيح ،ابي اشوف شغل شركة الاعلان
صقر :بكره
هيام :أبي الحين !
صقر :بكره خلاص
هيام :بكره بقابل المقدمين
أوس :أنا بقابلهم عنك لو تبين
هيام :تمام شكرًا بس فيه وظيفه خلاص مشغوله
أوس :وش؟
هيام :مدربات النساء كنت ابي ثلاث فيه وحده عندي
صقر :لا تقولين أنه أنتِ ترا قلنا قبل شهادة معتمده
هيام :لالا وحده جتني
صقر :من وين جت؟
هيام :من الخارج
شك بالموضوع وحك حاجبه الأيسر :وش أسمها ؟
هيام :طلبت الخصوصيه
صقر :أحنا نشتغل مع بعض لازم نعرفها
هيام :بسألها اذا وافقت
صقر :بدت تداوم ولا لا ؟
هيام :اي
أوس :متى ؟ الصباح ماقد شفتها وانا دايم اجي
هيام :بالليل
صقر :بالليل ! جنيه ذي
ابتسمت هيام :اذا جنيه يطلعون الجن أحن من بعض البشر
صقر بمقصد مبطن :وش الحنيه غير مسح الدموع ؟
أوس :الحنيه بكل شي
هيام :صح انه ما يسمح لك تبكي من الاساس
تنهد صقر :انتهى الاجتماع
قامت هيام وخرجت وخلفها أوس فرفع صقر هاتفه :مصلح فيه وضع شككني
مصلح :وش؟
صقر :فيه وحده تشتغل مع هيام بس بالليل ما رضيت تعلمني اسمها وتقول طلبت خصوصيه الموضوع فيه شي
مصلح :اشوف لها ؟
صقر :المشكله هيام تعرفك
مصلح :طيب كيف؟
صقر :مدري انا داق عليك نفكر
مصلح :خل البنات يروحون
صقر :وشلون اخذ منهم الكلام
مصلح :جوانا ما بتقصر
صقر :بكلم الصغيرات بس هم يجمعون الكلام
مصلح :براحتك
صقر :وش صار على أخر موضوع ؟
مصلح :قاعد افرز المعلومات بكره إن شاء الله يجيك العلم
صقر :ما تقصر
...
جوانا :الغدا اليوم مرقوق ؟
ام ثنيان :اي
جوانا :يمه احبك كيف حسيتي إني مشتهيته ،اودي السفره؟
ام ثنيان :اصبري لين يجي اخوك
جوانا :ثنيان؟
ام ثنيان :لا صقر ثنيان قال بيتغدى عند اشواق ما يحب المرقوق
جوانا :يمه صقر بيجي الساعه اثنين وانا بموت جوع خلينا نبقي له
ام ثنيان :توه دق قال بجي
جوانا :غريبه ليه؟
ام ثنيان :خلص شغله وبيجي
جوانا :طيب نحط السفره على بال ما يجي
ام ثنيان :تعرفينه اخوك ما يحب الاكل بارد اذا جا حطينا السفره ،الحين صليتي؟
جوانا :اي صليت بس تدرين ملاذ سرقت جلالي قلت لها من اول اننا بنطلب جلال كذا عيت قالت ما ابي والحين تسرق حقي اطلبي لها
ضحكت ام ثنيان :وش السرقه الغريبه ذي ما تدرين هي تخاف ربها ولا ما تخافه
ملاذ :مين ؟
جوانا :جت على طاريها ،امي تقول لعد تسرقين جلالي
ملاذ :بسم الله علي ما سرقته ولا شي ! مخلوقك الغريب ذاك جابه لغرفتي
جوانا :جمانة ؟ مستحيل طلعتها عند عمي الصبح يوم بداوم
ملاذ :ونزلت
جوانا :يا عمري تعرف غرفتي
ام ثنيان :يلا شيلي السفره صقر جا
جوانا :وش دراك؟
ام ثنيان :سمعت الباب
جوانا :ماشاء الله
ام ثنيان :روحي نادي أوس و وسن
ذهبت لتناديهم ثم عادت للمطبخ فتوقفت قبل أن تدخل لتسمع ذلك الحوار بين جدتها وامها ...
الجده وضحه :توني القاك وحدك الحين بغيت اكلمك بموضوع
ام ثنيان :عسى ما شر ؟
الجده وضحه :خير واكبر خير بعد ،لكن عيالك معميين عنه
ام ثنيان :وشو ؟
الجده وضحه :كلمتهم امس الفجر ابي اخطب وسن لراجح لكنهم رفضوا ،وش احسن للبنت من ولد عمها !
ام ثنيان :ما علموني بالموضوع الله يهديهم
الجده وضحه :خليه بيني وبينك وهم لا ندخلهم الا يوم يصير كل شي رسمي
ام ثنيان :اي والله
اتسعت عينينها فذهبت لأخواتها سريعًا :اسمعوا بقول شي مهم
وسن :اصبري خليها تكمل تشرح المسلسل
جوانا :حياتك المسلسل ! بسرعه بقول قبل تجي امي ولا جدتي
ملاذ :هاه وش؟
جوانا :سمعت جدتي وامي بالمطبخ يخططون يزوجون وسن
كحت وتنحنحت :الذبانه دخلت بحلقي
وسن بذعر :يزوجوني مين؟
جوانا :راجح
فتحت فمها بصدمه وبقيت تنظر لجوانا بصمت
ملاذ :ذبحتيها معد تتنفس
جوانا :بنت تنفسي
ملاذ :تنفسي تنفسي
جوانا:خذي نفس شهيق نهيق
وسن :زفير مب نهيق
ملاذ :الحمدلله بغت تموت علينا
وسن :قلتِ مين؟
ملاذ :راجح ،كيف يعني الموضوع جاي؟
جوانا :اصبروا ما سمعتوا الباقي جدتي تقول امس الفجر كلمت اخواني وهم رفضوا وجت هي وامي يبون يزوجونكم بالدس
ملاذ :شدعوه جوانا ماحنا مسلسل بس قصدها هم بيتكلمون بالموضوع اول بعدين يعلنونه
جوانا :قالت اخواني رفضوا !
وسن :يحسبني نهى !
ملاذ :ايش ؟
وسن :هو راجح كل ما يشوفني يحسبني بنت اشواق يشوفني بزر
ملاذ :اين الشبه ؟
جوانا :حتى هو ما يدري ذيك المره قلنا له تبي تتزوج قال لا محد يدري وخطط وفكر بذا الموضوع الا جدتي
ملاذ :والله الموضوع قوي يبي له اجتماع
جوانا :بس البنات مسافرين
ملاذ :بيجون بيجون بس راحوا للمصممه صديقة امهم وبيرجعون العصر الا هم عندك خلوا الاجتماع بالليل
صقر :اجتماع وش ؟
وسن :خير يب...
قاطعتها ملاذ :موضوع خاص بالعرس بنجتمع بالحوش ونتكلم
جوانا:وسن فيه فستان بيغصبونها عليه وزعلانه
صقر :لذي الدرجه ما عندها رأي ؟ يغصبونها على فستان مره وحده !
ملاذ :لا عندها رأي وبتفرضه عليهم لو يبون
صقر :مين الي بيغصبها ؟
جوانا :جدتي
صقر :اكيد اخترتي فستان عريان وهي تبي لك الستر
جوانا :للمعلوميه ترا زواج عائلي الحضور محددين خمسين لنا وخمسين لهم
صقر :هذا كله عائلي!
ملاذ:كل وحده من العائله بتعزم صديقاتها
صقر :ماهو عائلي ذا يشوفونكم الناس يقولون والله بنات آل محسن يلبسون عريان شكلهم مطفرين وما كفت الاقمشه يكملون فساتينهم
جوانا:انت لو تشوفهم يلبسون لين الفخوذ ويطلعون الظهر واليدين كلها والصد...
قاطعتها ملاذ :حرام توصفين بنات الناس لأخوك انطمي
جوانا :يعني انت لبسنا الي تشوفه عريان مقارنه فيهم ساتر
صقر :حلو خلوكم على الطريق الصحيح لو كل الناس راحوا
جوانا :لين متى طيب بنقعد كذا ؟
صقر :لين تموتين
جوانا :طيب انا ابي البس مثلهم
صقر :اذا تبين تخاوينهم بالذنوب البسي مثلهم
جوانا :طيب انت تلبس شورت عورتك تطلع !
صقر :البس شورت تحت الركبه
جوانا :طيب عورة المرأه للمرأه من السره للركبه والي فوق السره احنا نغطيه حياءً يعني عادي اطلع اكتافي للنسوان
صقر :وش تبين توصلين له ؟
جوانا :فستاني مكشوف الاكتاف وفيه فتحه
صقر :البسيه بس قفلي الفتحه لين تحت الركبه
جوانا :وبسوي تان
صقر :مافيه
جوانا :العريس بكبره مسوي تان ليه ما اسوي؟
صقر :العريس هو كذا قلب لونه من ايام الدوره ما يمدي نرجعه
جوانا :لا بسوي بعد الغدا الشمس حلوه للتان بطلع عند المسبح اسوي
صقر :بسمح لك مقابل شي
جوانا :وش؟
دخلت الجده قبل ان يتحدث فهمس :بعد الغدا بعلمك
جوانا :وش ذابحني الفضول!
صقر :خلاص بعدين !
الجده وضحه :وشو بعدين؟
صقر : تبي فلوس
الجده وضحه :قال لك بعدين خلاص بعدين
تنهدت جوانا :طيب
دخل أوس وجلس بجانب صقر :وسن شفيك؟
ملاذ :نفسيتها شوي تعبانه
تنهدت وسن ووضعت الملعقه من يدها :عادي أطلع عند عمي عبدالملك؟
ام ثنيان :يمكن يتغد...
قاطعتها الجده وضحه :الا اطلعي إن بغيتي
ام ثنيان :نبقي لك ؟
وسن :لا
ام ثنيان :الله يصلحك راجعه من الدوام تعبانه ما تتغدين ببقي لك شوي إذا جعتي كليها
وسن :طيب
صعدت لجناح عمها والهم يغمر ملامحها
ابو راجح :عسى ما شر مين مزعل كاتبتنا؟
وسن :راجح هنا ؟
ابو راجح :لا بالشغل
وسن :تدري وش تسوي جدتي؟
أحس معرفتها لكنه أستمر بالنكران وتمثيل الجهل :وش ؟
تنهدت:تبي تزوجني راجح
ابو راجح :كلمتك؟
وسن ودموعها تغالبها:لا كلمت اخواني ورفضوا والحين كلمت امي وشكله عجبها الموضوع
ابو راجح :وانتِ موافقه؟
انهارت باكيه :يعني هو ولدك وكويس بس ...
مد لها المناديل :خذي راحتك فضفضي
دخل راجح للجناح فسمع بكاءً ...وليس أي بكاء ،أنثى قلبه تبكي والأهم أن حديثها الباكي يدور عنه ! جمد الفضول قدميه فوقف يتنصت لباقي الحديث...
وسن :هو ولدك وفيه الخير بس شعور إني أعيش مع شخص ما عنده نفس أهتماماتي يقتل ما أبي أعيش كذا ! يعني بالله وش اسوي أنا مع الي ما يقرأ ؟
حمل نفسه إلى غرفته بثقل رفض حبه القديم ،وبخيبة من يحب...كل الخيبات تكون عاديه إلا خيبة المحبوب تترك أثرًا بشعًا حتى بالملامح
تنهد ومسح وجهه :ليتك ساكت يا راجح
استلقى على السرير وبقي ينظر للسقف لمدة من الوقت
فتح والده الباب ودخل :وش فيك؟
راجح :مافيني شي
ابو راجح :سمعتك جيت يوم كنا نتكلم
راجح :مافيني شي جيت تعبان بتروش وانام
ابو راجح :سمعتك ترا تكلم نفسك
راجح :مافيني شي خلاص
ابو راجح :ترا بجلدك وبخلي فيك كل شي
راجح :سمعتها
ابو راجح :واذا سمعتها؟
جلس مقابل والده :أول شي وش وصل الموضوع لها ثاني شي كنت حاس انها بترفض وليتني سكتت احسن
ابو راجح :بسألك سؤال
راجح :سم
ابو راجح :البنت تزوجت ولا ماتت ؟
راجح :لا
ابو راجح :خلاص فيه فرصه يالغبي
راجح :قالتها بالحرف الواحد ولدك ما ابيه وش اسوي اغصبها ؟
ابو راجح :خلك ذكي واستغل السبب الي رفضتك عشانه
راجح :كيف؟
ابو راجح :قول لها صح ما أقرا كتب بس أقرا عيونك
ابتسم بضيق :تراها ذكيه ما ينلعب عليها بكلمتين
ابو راجح :اجل اقعد بحسرتك
راجح :بتزوج خلاص بشوف من بنات خالاتي
ابو راجح :بكيفك
راجح :بكلم خالتي مزنه تخطب لي من خالاتي الباقين
ابو راجح :مره مره بكيفك انا مالي دخل انا بس متفرج
راجح :وبنقل شغلي منطقه ثانيه مارح أجي الا بالعيد
ابو راجح :حياتك كلها وقلبك انت ومشاعرك انت انا لن يضرني شيء
حرك شعره بعشوائية تشبه أفكاره:مدري وش اسوي !
ابو راجح وهو خارج :استغل سبب رفضك وغيره
راجح بغضب :وش اسوي يعني وش اسوي ؟ اكتب شعر !...شعر
في الاسفل
صقر :اليوم بالليل فاضيه؟
جوانا:لا انام
صقر :خساره بغيتك تروحين المزرعه
جوانا :بس صرت انام متأخر
صقر :هيام مجهزه المزرعه تعرفين بتسوي مشروعها الخايس وعيت تخلينا نشوف شي ،روحي انتِ وعلميني بكل شي
جوانا :بس؟
صقر :بعطيك الي تبين
ابتسمت :طيب لحظه ،بجيب ورقه توقع
صقر :بلا ورقه شوفني أحلف ،أقسم بالله إني أجيب لك الي تبينه والله على ما أقول شهيد وتعرفين حرمة الحلف عندي كيف
جوانا :بس عندنا أجتماع بالليل !
صقر :اسحبي عليه
جوانا :أنا المخبره حقتهم
صقر :بيمديك تروحين وترجعين وتلحقين واقولك شي؟ خذي البنات معاك عشان يتأخر الاجتماع وتلحقين بس لا تعلمينهم شي
جوانا :طيب
...
غاده :امسكي امسكي جوالي يدق
نرجس :حطيها بالأرض مالي خلق شي
غاده :هادي يدق ! بروح مكان مافيه ازعاج واكلم خليك هنا
نرجس :طيب ،انا لو جلست مع امي عند المره احسن لي
جلست على كرسي موجود في زاوية المحل فلمحت طفلين يتشاجران وراقبتهما بإبتسامه حتى صاح أحدهما على الأخر :خالد !
عبست وتأففت :ياشين هالاسم حتى بالأمارات لاحقني هالجنوبي يع
عادت غاده بعد قليل :جيت
نرجس :الشي الوحيد الي استفدناه من قصر مكالمات هادي انه ما بعطل اشغالنا
غاده :تدرين وش يبي؟
نرجس :وش؟
غاده :قال لي وش تسوين قلت بالسوق بالامارات قال عشان عرس اخوك قلت اي قال طيب اذا رجعتي دقي علي ،يبي يكلمني نرجس بيكلمني اخيرًا !
نرجس :وش تبين فيه ليه تحبينه كيف تحبون الرجال ؟ يعني حب ابوي واخواني فطره بس ليه احب واحد غريب وفوق ذا يتكلم بالشين بعد يع
غاده :بس هادي ما يتكلم بالشين !
نرجس :قصدي بالجيم بعض اهل الدمام يتكلمون بالجيم شلونج وكذا
غاده :نرجس هادي ما نقلوا هو وأهله إلا قريب يتكلم زينا
نرجس :أنا أكره الرجال كلهم أمشي بس
غاده :طيب شفيك معصبه؟ عشان الكعب؟
نرجس :لا خلاص هي قالت بتشوف بأي فرع موجود فيه وترسله لنا وعطيتها موقع المصممه خوية أمي ترسله مع الفساتين مره وحده
غاده :طيب ،خلينا نطلع المطار أمي وابتهاج بيقابلونا هناك ونرجع السعوديه
نرجس :طيب
سارتا قليلًا فتنهدت نرجس :غاده قد شفنا كثير بالمسلسلات وحده تحب واحد متزوج وتطلع هي الشريره
غاده :طبعًا شريره خصوصًا لو تدري انه متزوج وتنشب له والرجال إذا كان دلخ بيلحق أي وحده تأشر بأصبعها
نرجس :طيب ليه ما نشوفه من جهه ثانيه ؟ أنه ذي الي تحب متزوج مسكينه وتحارب نفسها عشان ما تحبه ؟
غاده :كيف قدرت تحبه وهي تعرف انه لوحده ثانيه ؟ أنا بس لو أتخيل هادي مع وحده ثانيه يضايقني الموضوع كيف لو أعرف مستحيل أكون حابته وانا عارفه أنه لغيري ،ماهو مبرر أبدًا ومن طبع بنات حواء يبون الرجال لهم لحالهم يعني الغلط يرجع عليها وعلى الرجال ومحد فيهم مسكين
نرجس :وفوق ذا يغارون عليهم من زوجاتهم
غاده :لا معليش ذا لفل عالي واتوقع انه مرض نفسي إن كنتي ضرتها اوكيه غاري بس حبيبته السريه ولا تحبينه من طرف وتغارين ! الله يشفي الي تفكيرهم كذا
نرجس :آمين
غاده :وش طاري هالموضوع الغريب؟
نرجس :كذا افكر شفت اعلان فيلم بالشاشه يوم رحتي
غاده :والي يتهاوشون وش صار فيهم؟
نرجس :مين؟
غاده :اثنين منخشين بالزاويه ويتهاوشون شفتيهم؟
نرجس :اها خالد واخوه ،شكل امهم فرعت بينهم
غاده :ماشاء الله تعرفتي عليهم
نرجس :سمعته يصرخ
غاده :تصدقين اسم خالد حلو وفخم أحس لو جاني ولد بسميه خالد ،خالد هادي
نظرت لها نرجس بغرابه :ولا تفكرين حتى اسم خايس وراعيه شخصيته تبن مليون بالميه
غاده :والله ظلم السوشال ميديا ولا الاسم حلو
نرجس :لا والله السوشال ميديا ناقلين الصدق والدليل البزران ذوليك شفتيه صفق اخوه لين صاح فيه
غاده :طيب وش دراك انه الي يصفقه هو خالد ؟ يمكن ينادي واحد ثاني يستنجد فيه يعني خالد فزعه
نرجس :عز الله راح فيها بيسحب عليه ويقول ...
قلدت نبرة خالد بسخريه :عشان مصلحتك وتتعلم مره ثانيه ما تحارش اخوك
غاده :شفيك مره مشخصنتها ؟ الموضوع بسيط خلاص هديها
نرجس :فيني طاقه سلبيه
غاده :لو فيه وقت وديتك المطعم الي تكسرين الصحون
نرجس :بروح الكوفي الي زيه بالسعوديه معليك
غاده :تدرين اني برجع على الدوام على طول ؟ والله فل دوخه
نرجس :غريبه
غاده :ياختي هذيك الي تجي من المدينه لمياء من زمان حجزت موعدها على اليوم وهم يفضون يومهم في المدينه عشان يسافرون ويجون حرام يلغونه
نرجس :انتِ غبيه كان قلتي لهم قبل انك اليوم بتكونين مشغوله
غاده :الله ما كنت أدري أنه جهاد مخطط على كل شي !
نرجس :شوفيه هو الحين راقد واحنا نركض بالاسواق
غاده :تتوقعين بكون زيه إذا جا عرسي؟
نرجس:مدري عنك
غاده :وش ذا الاسلوب ؟
نرجس :تراها زاقه معاي من أمس
غاده :طيب سوري
...
مر بجانب غرفتها وكان الباب مفتوحًا فقاده شعورٌ يجهله للدخول، دخل وتسند على الحائط ونظر لها بهدوء وكيف لا يهدئ المرء عند تأمل حُسن خلق الله ؟
كانت ترتدي فستانًا ذو أكمام طويله لونه من لون السماء و تزينه ورود بيضاء متنثارة بشكل عشوائي .كانت مخفضةً رأسها وتحرك شعرها لتعطيه بعض الحيويه ،رفعت رأسها أخيرًا وأبعدت شعرها عن وجهها وهنالك ظهر لُب الجمال وجله ،أنتبهت لإنعكاسه خلفها وألتفتت :متى جيت؟
أخفض رأسه وقلدها بسخريه :لما كنتِ تسوين كذا
أعطته ظهرها مرة أخرى وأتجهت لترتدي أكسسواراتها :بتروح؟
يزيد :اي
حاولت أرتداء قلادتها:وش جابك عندي وش تبي؟
انتبه لمحاولاتها الفاشله وأقترب منها ثم أبعد شعرها عن ظهرها:بساعدك
التفتت له :ابعد ،أنا بسويه
قلبت القفل فأصبح بالامام وأقفلته:تحسب بيصير نفس المسلسلات
تراجع للخلف وأبتسم :لا بس كنت بساعدك من باب الانسانيه
أرجعت شعرها للخلف :وفر إنسانيتك لنفسك
تكتف ووقف بجانبها مستأنفًا تأمله
مهيار :ما بتروح؟
يزيد :بشوفك وانتِ تتجهزين
عم الصمت بينهم ولم يكن يُسمع سوى صوت التلفاز بالغرفة المجاوره :ليه صوت التلفزيون عالي؟
يزيد :كنت اتفرج
نظرت لوجهها بالمرآه :فيه شي ناقص أحس
يزيد بتردد :لا مافيه ...كذا حلوه
نظرت له بنظرة خاطفه ثم صرفت بصرها عنه فعاد الصمت بينهم وكان يُعرض جزءٌ من قصيدة لمحمود درويش بالتلفاز: