كُن بقربي فإن الروح هائمة

6

لمحةٌ من الماضي ،في خاطرة أحدهم...
لا زلت عالقًا بتلك اللحظه التي دخلت بها عُمري كان الحُزن يملأك ويفيض منك ،ودت لو أصب حزنك في صدري وأحمله عنك كما حملت حقيبتك كل يوم ،ودت لو تسكبينه في أي مكان أو على أي أحد لكنك كُنتِ دقيقة جدًا ولم يسكب من كأس حُزنك قطره .الآن لقد كبرنا ولا زال وجهك يحفظ نقوش الحزن ويذكرها للناس تاريخًا بأن تلك الجميلة قد ذاقت حزنًا مُر المشاعر قاسي التفاصيل ويخبر العالم بأن الجميلات سيئات حظ .
...
هيام :اي ،ولا عليك امر أحتاج مساعدتك بموضوع بس لا تعلم أحد
أوس :تفضلي
هيام :ممكن نتقابل بمكان ونتكلم ؟
أوس :أفضل أجي للمزرعه حفاظًا على نفسي
ابتسمت هيام :اي ممكن
أوس :نص ساعه وانا عندك
هيام :تمام ،مع السلامه
أوس :مع السلامه
هيام :قومي بسرعه
نجد :هاه؟لا يكون بتطرديني من البيت
هيام :روحي السوبر ماركت جيبي اي شي ضيافه
نجد :ما يحتاج
هيام :عيب نجد عيب وش يقولون عني ؟ اخذت المزرعه وهي بقره ما تعرف شي بالضيافه واخلاق العرب وين كرامة الخيل واخلاق خياله
نجد :اقولك ما يحتاج قهوه وتمر وش يحبون الرجال غير كذا ؟
هيام :طيب انتِ اساسًا معاك قهوه وتمر ؟
نجد :حسن معاه
هيام :طيب روحي جيبي
نجد :وانتِ؟
هيام :اذا تبيني اطلع بشمس الظهر وانا مواصله من امس واموت ممكن
نجد :اذا خلص اجتماعك الغريب مع أوس تنامين ولا اصفقك اخليك تنامين من الوجع
هيام :نشوف وقتها
بعد وقت عادت نجد :جبت لك القهوه بدون ما اطبخها
هيام :ليه ؟
نجد :ما قصرت الشمس على بال ما وصلت طبختها لين صارت تغلي من نفسها
هيام :خرعتيني على ذبتك الخايسه
نجد :ليه ؟
هيام :الغاز مخلص بالمطبخ ذكريني بعدين اعبيه
نجد :اسلمي ،اتخيلك وانتِ تشيلين الاسطوانه
هيام وهي ترتب شعرها:ترا اسويها لا تتحديني
نجد :قويه كالحرب ناعمة كالسلام
هيام :واسمها هيام
نجد :كأن الباب يدق
هيام :بروح افتح
نجد :مري شغلي المكيف معاك نسيت اشغله
هيام :بارد الجو ما يحتاج
فتحت الباب فأبتسم أوس :تحبين السوشي ؟
هيام :هاه؟
أوس :جبت غدا سوشي
هيام :اها سوشي اي عادي تفضل
أوس :مسوين قهوه ،ما كنت ادري
هيام :لا لا انا ونجد كنا نشربها وديها للمطبخ
قامت نجد :صحيح هذا رح يكون اجتماع سوشي وليس اجتماع قهوه
أبتسم أوس من وضوح كذبهم :اجتماع سوشي
هيام :جايب مشروب عليه ولا اجيب؟
أوس :جايب ببسي بس لو عندك ثلج
هيام :بجيب الحين
ذهبت للمطبخ وكانت نجد ستخرج :نجد
نجد :نعم ؟
هيام :وش فينا غبيات مين يتقهوى الظهر ؟
نجد :مدري عنك هذا طلبك انتِ
هيام :انتِ تطاوعيني؟ انا من امس مواصله ما ادري وش اقول ووش اسوي انا حتى ما اصدق نفسي بذا الوقت
نجد :اجل على كذا خلاص لا تفتحين الموضوع وخليه بعدين
هيام وهي تخرج الثلج:لا معليك كل شي اغلط فيه الا ذا الموضوع
نجد :اكثر موضوع بتغلطين فيه هو ذا
هيام :جيبي دفتر وقلم والحقيني
نجد :ليه وش بتسوين؟
هيام :انتِ مديره اعمالي اي كلام تحسينه فيه شي يساعد اكتبيه
نجد :طيب ابي اكل سوشي ،مدري كيف عارف نقطة ضعفي
هيام :كلي بعد الاكل بنتكلم محد يبي يغص بلقمته بسبب ناس قليلة ادب تخبي علي اسرار
نجد :واذا طلع هو يعرف ومخبي عليك
هيام :وقتها ما بيطلع من ذا البيت الا جثه
نجد :بتسممينه !
هيام :انا قايله لك لا تصدقيني سهرانه مواصله تجيني هواجس غريبه
نجد :امشي بس لطعتيه مسكين يمكن جوعان
خرجت هيام اليه :جبت الثل...كان بيدي كيف
أوس :وش ؟
هيام :جبت الثلج بيدي بس اختفى
نجد :هذا هو
هيام :اي هذا هو هذا هو
أوس :كأنك تعبانه صح؟
هيام :لا بخير الحمدلله انت تعبان شكلك
همست نجد :سهرانه من امس
أوس وهو يفتح اعواد الطعام:طيب وش الموضوع الي تبين اساعدك فيه
هيام :ابوي
أوس :الله يرحمه
هيام :كيف مات ؟
أوس :حادث ،واتوقع شهادة الوفاه معاك صح؟
هيام :اي معاي بس ...بقلبي شك
أوس :١٦ سنه مرت وكلنا نعرف انه حادث وش تغير ؟
طعنت الطعام بالاعواد كما قد يطعن الانسان :فيه ناس يكذبون علي
أوس :ما أظن لأنه أبوي هو الي كان مهتم بكل شي بجنازة ووفاة ابوك
هيام :حتى هو مكذبين عليه ،مثلًا ليش عمتي تركتني ؟
أوس :ماله علاقه بأبوك
هيام :لا له علاقه قويه كأنها تعرف شي وما تبيني اعرفه
أوس :هيام مين معبي راسك بهالكلام ؟
هيام :انت تعرف شي ؟
أوس :اعرف الي تعرفينه أبوك توفى بحادث على الشارع العام الي قريب من المزرعه ذي وبشكل دقيق جلس بالمستشفى يومين بس وبعدين توفى
هيام :يكذبون علي احس واعرف ذا الشي
أوس :طيب وش رايك نأجل ذا الموضوع لبعدين ؟ اذا نمتي وصحيتي وقتها نتكلم بشكل افضل صح ؟
هيام بغصه :ما طلبت شي بس أبيك تساعدني اتأكد ما قلت لك نحط التهمه على أحد أبي ارتاح نفسيًا بس
نظر لها أوس قليلًا ثم تنهد :بسوي الي أقدر عليه
هيام:بس لا تعلم أحد ولا حتى اقرب الناس لك
أوس :إن شاء الله
...
صرخت شروق ونرجس بنفس الوقت :بنصير نسايب
نرجس :ياخي ماني مستوعبه احس اخخ يالشعور انا بصير العمه وانتِ الخاله
شروق :فعلي وضعيه الرقص لأني بالعرس برقص للأبد
نرجس :اكيد اكيد ،بس متى العرس؟
شروق :باقي مشوار لين سهام توافق
نرجس :تتوقعين توافق؟
شروق :هي الحين مسويه زعلانه انه محد علمها بس احس نسبه ٩٩٪؜ بتوافق اذا كلمها ابوي بتستحي منه وتوافق
نرجس :اهم شي شافت صورته
شروق :اي وريتها دخلته بعينها وارسلته لها
نرجس :كفو
شروق :نرجس ،الله يزوجك واحد زي اخوك
نرجس :آمين
شروق :اي اشوا ،كذا اتأكد انه كويس
نرجس بسخريه :شدعوه كيف ما بيكون كويس وانا اخته ،بس للأمانه تراه انسان فاشل بالتعبير عن المشاعر،لكن يرقعها بالشعر
شروق :معليك سهام افشل منه بيتفاهمون بلغتهم الخاصه
نرجس :احس ودي اشوفهم بالشوفه الشرعيه
شروق :طيب تعالي معاه وبوريك مكان نتخبى فيه ونشوفهم
نرجس :احس اني بصيد نقطة ضعف لجهاد
منال :السلام عليكم
نرجس بسعاده :وعليكم السلام ،اول المعازيم لعرس جهاد
منال :بيتزوج ؟
شروق :اخوها بيتزوج اختي بس ما حددنا موعد الزواج
منال :الله يوفقهم ،يعني بتصيرون اكثر من صديقات
نرجس :طبعًا طبعًا
منال :انا بروح لدانكن تبون شي ؟
شروق :سلامتك
نرجس :وكذا تخلصنا من عله يبقى لنا علتين
شروق :مين ؟
نرجس :الدكاتره الي حاطه موادي عندهم قسمًا بالله اخر مره احط مادتي عند هالدكتوره الهنديه...
شروق :اي الاكل الهندي حلو
نرجس :وش دخل ياخي !
شروق بهمس :يا زفت مرت من وراك
نرجس :على اساس تفهم عربي
شروق :تفهم المره لها عشر سنوات هنا شكلك بتحملين الماده عندها لين التخرج
نرجس :طيب لو امسك عيالها ؟
شروق :راحت عليك
نرجس :لساني اتمنى ابلعه يوم واسكت
شروق :خليه تحتاجينه باقي اذا شفت ماله داعي بلعتك اياه
نرجس:بأيش احتاجه ؟
شروق :تغنين بعرس سهام وجهاد
نرجس :لا ما بغني
شروق :تكفين بس اغنبه وحتى حتى بارت واحد بس غني جيتني مثل الشروق الي محى عتم الليالي
نرجس :طيب خلي العرس يجي ووقتها اقرر
شروق :الحين خليني اسرب لك تصاميم سهام اذا عجبك شي نفصله للعرس
ضحكت نرجس :اموت على ثقتنا انه العرس قريب
شروق :وليه ما بيصير قريب ؟ وش ننتظر
نرجس :ولا شي
...
جهاد :وش يقولون ؟
ابو جهاد :ماهم موافقين
جهاد :لا اكيد مقلب
ابو جهاد :مب مقلب فاضي انا امقلب؟
جهاد :تكفى يبه نروح نكلمهم وجه لوجه اكيد بيوافقون
ابو جهاد :امزح عليك
جهاد :قلبي بيوقف من مزحكم انت وامي ،يعني موافقين؟
ابو جهاد :بيسألون عنك هالله هالله بالعلوم الزينه
جهاد :أبد ولله سيرتي نظيفه بس بريح راسي واتجهز للنظره
ابو جهاد :يمكن يلقون شي ما يناسبهم فينا بشكل عام
جهاد :وش قصدك؟
ابو جهاد :مدري شي بعايلتنا
جهاد :قتلنا احد ولا ظلمنا احد يقرب لهم صح؟
ابو جهاد :لا الله لا يقولها
جهاد :نعيش بنفس البيت صح؟
ابو جهاد :احتمال ٩٨٪؜ ما تقبل عشان ذا السبب
جهاد :ياربي وانتِ ربي انه يجيني نقل لأقصى الجنوب ولا اقصى الشمال
ابو جهاد :هنا تقل النسبه وتصير ٩٠٪؜
جهاد :يبه تكفى !
ابو جهاد :ماهو بيدي
جهاد :طيب بيد مين ؟
ابو جهاد :جدتك
جهاد :الساعه كم ؟
ابو جهاد :ثلاثه العصر
جهاد وهو خارج :يارب الحقهم
ابو جهاد :مين ؟
جهاد :بعدين بقول لك
ذهب لغرفه جدته ووجد ثنيان يقف عند الباب :قد دخلت ؟
ثنيان :لا
جهاد :ابشرك صرت معاك بنفس المشكله
ثنيان :البيت؟
ابتسم جهاد :اي خطبت وحده واحتمال كبير ما توافق عشان البيت
ثنيان :طيب انت ادخل قبلي
جهاد :واذا طردتني؟ انت اول
اخذ ثنيان نفسًا عميقًا ودق الباب
الجده وضحه :ادخل
دخل ثنيان وخلفه جهاد
الجده وضحه :جايب فريق دعم
جهاد :انا عندي نفس المشكله
الجده وضحه :زوجتك ما تحمل ؟
جهاد :لا باقي ما تزوجت بس اقصد مشكله البيت
الجده وضحه :ماشاء الله تفضلوا يلا مين بسمع اول
جهاد :انا لأن ثنيان واضح نقاشه طويل
الجده وضحه :طيب اسمعك
جهاد :انا تقدمت لسهام وباقي يفكرون يعني بيسألون
الجده وضحه :اي
جهاد :ما ظنتي يقبلون عشان البيت يعني اكيد بنت الناس تبي ببيت لحالها
الجده وضحه :انت دواك عندي
تلفت جهاد حوله :وينها ؟
الجده وضحه :ايش؟
جهاد :لا ولا شي بس وش الحل
الجده وضحه :نقول لهم انها بس بتجلس معنا فتره مؤقته وبعدين انت وياها تدورون البيت سوا
جهاد :صدق ندوره سوا ؟
الجده وضحه :لا هي بعدين بترضى بالعيشه هنا لا شافت لها جناح خاص وشغاله خاصه بترضى
جهاد :بس ما بترضى انها...
الجده وضحه :جايه من بيت اقل من بيتنا بترضى بذا القصر لو تعيش بحمام
جهاد :واذا ما رضيت فيه ؟
الجده وضحه :انت بتتزوج بنت ولا مقاول ؟
جهاد:بنت بس...
الجده وضحه :كل ما تفتح الموضوع جيب لها هديه وخلاص ترا البنات ينخدعون حتى لو بكلمه ،اتوقع حلينا مشكلتك صح؟
جهاد بغير رضا :اي
الجده وضحه :اجل تفضل
خرج من الغرفه وبقي ثنيان عندها فالتفتت له :وش بلاك انت ؟
ثنيان :عيشه بهالبيت ماعاد ابي
الجده وضحه :ليه ؟
ثنيان :رتيل كل يوم تبكي من كلامكم كل يوم
الجده وضحه :هي معبيه راسك
ثنيان :لا ولله ماهي جايبه ذا الطاري ابد حتى الحين قبل اجيك كانت تترجاني اني اعتذر منك
الجده وضحه :طيب اعتذر
سكت ثنيان قليلًا ثم قال :ما اعتذر على طلبي لحقي ابي انفرد بزوجتي ببيت لحالنا
الجده وضحه :وش ناقصك وانت ماخذ من اكبر جناحات القصر ؟
ثنيان :ناقصني الطمأنينه كل ما نزلت الا انتم جايبين طاريها بكل شر
الجده وضحه :لأنها مافيها الا الشر ما جابت لك شي
ثنيان :ذا الموضوع خلصنا منه من زمان بس ابي بيت اطلع فيه ما ابي كل يوم تسمع كلامكم عنها لأنه يأذيني حتى انا
الجده وضحه :تزوج غيرها ترتاح
ثنيان :مالي غير رتيل
الجده وضحه :اجل طلقها واقعد اعزب لأنه مافيه فرق بينك وبين الاعزب
ثنيان :شفيكم هبيتوا بطاري الطلاق فجأه
ابتسمت الجده :مين جابه ؟
ثنيان :ام رتيل طالعه فيها لين جناحنا وتقول لها لمي اغراضك بخلعك من زوجك ،كانت بتاخذها من بيتها غصب
الجده وضحه :تاخذها محد ماسك فيها
ثنيان :انا ماسك ومتعلق وساكن فيها
الجده وضحه :يومين وتنساها لو اعرض لك وحده من البنات الي اعرفهم تنسى طوايف هالرتيل
ثنيان بغصه :يا جده ولله اني تعبت وانا افهمكم رتيل ما انساها ما ابي انساها ولا ابي غيرها شيبت وانا اعيد بذا الشي لساني طلع له شعر من كثر ما قلتها ليه تتكلمين كأني بقتنع ؟
الجده وضحه :لأنه نهاية كل فكره الاقتناع ،انا بعرض عليك عرض يكون هو نهاية حوارنا
ثنيان :وش؟
الجده وضحه :ازوجك الثانيه وهي تعيش بذا القصر ورتيل تعوضها ببيت لها لحالها
قام ثنيان :تعرفين كيف تستغلين كل شي بطرفك ،ما بدخل بهالبيت غير رتيل تحت مسمى زوجة ثنيان
الجده وضحه بسخريه :طيب زوجة ابو بندر
ثنيان وهو خارج:احنا بنجلس بالخارج فتره نريح راسنا منكم
الجده وضحه :تمام بس خذ أرين معاك
عاد ثنيان :قلت منكم ما ابي شي ،لا تحسبيني ما ادري ان شغالتك ذي تنقل لك الكلام
خرج وضرب بالباب فأبتسمت الجده وضحه :بزران ويحسبون انهم صاحين للنقاش
...
فتح الباب فأغلقت هاتفها :وجع
صقر :ليه تقفلين الجوال ؟
جوانا :لأنك خوفتني ياخي
صقر :تكلمين عيال صح ؟
جوانا بتكبر:انا جوانا بنت بندر تتوقع مني انزل لمستوى عيال الشوارع واكلمهم ؟ وين يروح اسمي انا
صقر :غريبه صاحيه بهالوقت ؟
جوانا :لأني غبت اليوم فما نمت الظهر
صقر :ماشاء الله مين سمح لك تغيبين ؟
جوانا :مامي ،عشاني امس تعبت بالعزيمه قالت خلاص غيبي
قلد نبرتها بسخريه :مامي ،خلي العزيمه بعدين تنفعك بالاختبارات
جوانا :عادي اخذ التحديد من البنات
صقر:بكيفك عاد انا موب ولي امرك
جوانا :كل هالتحقيق والتحكم وموب ولي امري ؟ اجل مين ولي امري
صقر :ثنيان
انتبهت جوانا لثنيان يمر من خلف صقر فنادته :ثنيان
عاد اليها :هلا
انتبهت لمعالم وجهه :شفيك ؟
مسح وجهه وتنهد :مافيني شي
ابتسمت جوانا:شكلك تبي حضن
ثنيان :يمكن
عانقته جوانا واطالت العناق :معليه معليه يمر الانسان بفترات نفسيه صعبه
ابتعدت عنه ومسحت على كتفه :بس انت لا تتعب نفسك وتضغط عليها خل كل شي يمر سهالات
صقر :وش هالاسلوب الجديد؟
جوانا :هاه؟
صقر :مدري ماقد سمعتك تتكلمين كذا
قبل ثنيان يدها :صرتي مثقفه
ابتسمت جوانا :قريت بالنت
صقر :الله يكثر ذي القرايات دامها بتخليني ارضى عنك كذا
جوانا :واذا رضيت وش تسوي؟
صقر :ارضى
جوانا :تبي حضن ؟
صقر :لا ابعدي
عانقته رغمًا عنه :الا تحتاج حضن تحتاج
استسلم لها صقر حتى ابتعدت فضحك ثنيان :شوفي وجهه كيف احمر واضح عنده نقص حنان
جوانا :تبي نزوجك؟
صقر :لا ولله ماني فاضي للزواج ولا شي
جوانا :خير ابتهاج تزوج اخوها وانا لا
صقر :اي اخو ؟
ثنيان :جهاد
صقر :قد زوجتي ثنيان انتِ خلاص
جوانا :زوجت ثنيان وانا عمري عشر سنوات دبه وابي فستان منفش الحين ابي اكشخ
ثنيان :اكشخي بعرس جهاد
جوانا :اوريك الفساتين الي اخترتهم ؟
ثنيان بسخريه :وريني عشان اسرق منها لرتيل
امسكت هاتفها وارسلت :بعدين اكلمك
جوانا :ما بتعجبها كلها حقت مراهقات ،شوف ذا لونه بينك اذا بطلبه بسوي تان
صقر :لا يجيك سرطان الجلد
جوانا :صقر ،انت مو ولي أمري اذا وافق ثنيان انت مالك داعي
ثنيان :صدق ماله داعي التان شكلك كذا احلى
جوانا :لا انتوا ما تعرفون
صقر :لا نعرف ،انتِ الي ما تعرفين اذا احترقتي من الشمس قبل العرس وقتها بتعرفين
جوانا :تكفون بس شوي كذا بس خمس دقايق اساسًا شمس الرياض ما بتقصر
ثنيان :تراه يطول مو بس تكشخين فيه بالعرس وخلاص
جوانا :اعرف
ثنيان :خلاص نفكر بعدين
ابتسمت جوانا بإنتصار :وفيه ذا الفستان ابي اخذ عليه عقد الماس من حقت امي
صقر :لا ،تضيعينه
جوانا :صقر انت لسانك متعود على كلمه لا شكل هي اول كلمه قلتها يوم ولدت
ابتسم ثنيان :كان مطنقر يوم ولد عندي صورته النسخه الاولى
صقر :يازفت ما قلت لك اتلف ذيك الصور
جوانا :بعدين ورني ،الحين اي فستان احلى ؟
ثنيان :ولله مدري كلهم بيطلعون حلوين عليك
صقر :اشوف انا
جوانا :يا ذا مع تان او ذا مع عقد الماس لو يكون هديه من احد افضل
صقر :كلهم خايسين وعريانين
جوانا :لا مو عريانين انت لو تشوف البنات بالاعراس تشوف الي نلبسه احنا ولا شي من التعري الي يسوونه
صقر :وانتِ عاجبك صح ؟ ودك انك مثلهم
جوانا:يارب انا طفشت منكم عديمين ذوق بروح لأوس هو داخله فنان بيعرف يختار لي
صقر :انتِ جايه تستشيرينا كأن ما عندك خوات
جوانا :انت بالخصوص لو ما وريتك ذي الفساتين بتقول ليه ما تاخذين رأيي وابي اعرف وش تلبس اختي الصغيره ومدري ايش
أوس :شفيكم بغرفه جوانا ؟
جوانا :جابك الله كنت اوريهم فساتين بس ما عندهم ذوق اختار لي انت
أوس :اشوف
جوانا :هذا لونه وردي بسوي معاه تان والثاني لونه رصاصي كذا احسه مره ناعم وسيمبل ويصلح معاه عقد الماس
أوس :طيب وش رايك بالوردي مع تان وعقد الماس وقلفز ستايل فخم ؟
جوانا :تقولها ؟
أوس :اي بيصلح عليك ستايل راقي مثلك
صقر :شوف ذا النسونجي شوف يعرف الستايلات
جوانا :ما اسمح لك تسب أوس
صقر :عاد ليته اسم على مسمى لكنه ما يمد للذيابه بأي صله
ثنيان :هو ذيب واخوانه ذيابه
جوانا بسخريه :وخواته غزلان
ضحك أوس :شدعوه حديقة حيوانات حنا ؟
جوانا :وش رايكم نلعب كيرم ؟
ثنيان :يا قدمي اخر مره لعبنا بالحجر
جوانا :يلا شوفوا احنا ربعه نلعب
صقر :ما ابي
جوانا :خايف تخسر
صقر :انا اخسر ؟ اكسر روسكم هنا
ثنيان :انا بطلع فوق وبجيبه معاي
صعد لرتيل التي كانت تنتظره بفارغ الصبر :طولت علي ،وش صار ؟
ثنيان :مافيه طلعه من هالبيت
ابتسم بضيق :قاالت موافقه تطلعون بس ازوجك الثانيه وهي تعيش هنا
رتيل :خلاص اجل مو لازم نطلع قلت لك من أول
ثنيان:وين الكيرم ؟
رتيل :مدري
ثنيان :اخر مره احنا لعبنا فيه صح ؟
رتيل :اي بس أخذته الشغاله يوم رتبت الغرفه
ثنيان :اي شغاله ؟
رتيل :بالان
في الاسفل
جوانا :انا وثنيان فريق وانت وأوس فريق
صقر :اهم شي ما اكون معاك
جوانا :اذا فزت اشتروا لي غزال
صقر :وش تبين فيه ؟
جوانا :كيوت كذا صغير وعيونه حلوه مثلي
أوس :الغزلان بتنقرض وش تبين فيه
جوانا :بربيه ما بخليه ينقرض ،وبعدين احمدوا ربكم كنت بطلب اسد بس قلت لا خلاص خل ما اصدمهم واطلب غزال اهون
أوس :اذا فزتي نشوف
صقر :وكيف بتربينه ؟
جوانا :بصوره
صقر :عرفت عشان التصوير بس زي وحده الله يستر عليها ازعجتنا تبي سياره كلاسيكيه اخرتها طلعت عشان التصوير ولا كل يومين وهي خربانه
جوانا :ترا ملاذ قاعده كل مره تصلح بالسياره يعني قطعها نادره عشان كذا كل فتره تصلحها
صقر :وليه تسوقها وهي باقي مو جاهزه للسواقه ؟
جوانا :لأنها ما عندها الا هي
أوس :عندها الجي كلاس مصفوطه بالحوش محد خذها بعد ما سافر السواق
جوانا:اشتقت له سواقي العزيز يوديني ويجيبني متى يرجع ؟
صقر :ترا رحلته نهائي
جوانا :ليه ؟
صقر :خلاص ما تحتاجونه وملاذ تسوق
جوانا :طيب عمتي ام جهاد وعمتي ساره مين يوديهم
صقر :عندك غاده ونرجس كلهم يسوقون
جوانا :بس ماهم فاضين طول الوقت السواق وظيفته سواق
صقر :سفرته نهائي ولا ابي سواق عشان الصياعه الي تجي من وراي ما تصير
جوانا :من الاخر ترانا نصيع مع سيف
صقر :سيف دواه عندي بس خليني اقنع امه
جوانا :وش بتسوي ؟
صقر بسخريه :بسجله عسكريه
جوانا :حرام الولد عنده طموح واحلام يبي يصير محامي لشركاتكم عشان محد يسرقها
صقر :ما نحتاج عندنا محامي من عهد ابوي
جوانا :بيتقاعد ،لا توديه العسكريه ياخي خله يعيش حياته
أوس :ما بيوديه العسكريه يبي يطلعه الخارج
جوانا :انا ابي اروح ليه ما تطلعني
صقر :لازم معاك محرم
جوانا:امي
صقر :محرم رجل بالغ عاقل مسلم
جوانا :طيب انتم
أوس :مشاغيل
جوانا :اجل زوجوني
صقر :أيش تسمع اذني ؟
جوانا :زوجوني عشان يصير عندي محرم واطلع ادرس
صقر :يا ويلك ويا سواد ليلك تعلقين حياتك واحلامك برجال
ثنيان :مين الي بتعلق حياتها برجال ؟
أوس:جوانا تقول زوجوني عشان يصير عندي محرم واطلع ادرس بالخارج
ضربها ثنيان بخفه :ما يصلح ما يصلح
جوانا :ما عرفت لكم !
أوس :ما فهمتي منطقنا ،عادي تعلقين احلامك فينا لأننا اهلك بس رجال غير لا
جوانا :طيب ابي ادرس بالخارج مين يجي معاي ؟
ثنيان :دوري لك احد فاضي يجي معاك
جوانا :عمي ابو راجح
صقر :هو خليه بالأول يطلع برا البيت وقتها ممكن اقتنع انه يطلع للخارج
جوانا :انا بقنعه معليكم بس وافقوا
ثنيان :اذا اقنعتيه تعالي كلمينا الحين خلونا نلعب
جوانا :ولا ما يحتاج اقنعه
أوس :ليه ؟
جوانا :انت تبي تطلع سيف للخارج خلاص هو محرمي هو ولد اختي
صقر :انا بالغصب ماسككم بالسعوديه تبون اخليكم لحالكم بالخارج ؟ لا ولله ما تسوونها حتى على جثتي
جوانا :بنكون مؤدبين بنخاف
صقر :الي تنزل لحالها دزني لاند واحنا نايمين ما ظنتي تخاف
جوانا :كان خاطري باللعبه ذيك الي لقينا عليها زحمه
صقر :خلاص بعدين اشربي خمر وقولي ولله كان خاطري فيه
جوانا :استغفر الله ،ترا بكبر يعني باقي ثلاث سنوات واتخرج من الثانوي بتغير
ثنيان :خلاص اقول العبوا بس
...
نجد :شدعوه وش هالنومه بس لين العصر قصرتي
هيام :برجع انام بالليل معليك
نجد :طيب بقول لك شي
هيام :وش ؟
نجد :صقر برا قاعد يتدرب وشكله بيشارك بسباق الخيل
هيام :كأس الملك ؟
نجد :اي
هيام :ابي اشارك
نجد :بس...
هيام وهي تخرج:بشارك
لحقتها نجد :ياربي
ذهبت لصقر الذي كاد ان ينتهي من تدريباته وصرخت :صقر
صقر :ما اسمعك بيننا اختلاف طبقات واسع
هيام :اي انت بالسما وانا بالارض
نجد تغني بهمس :الرد ممكن ينقصك وانت في زود
صقر :ايش؟
هيام:ولا شي ،انزل ابي اكلمك
صقر :اخبر انك ما تتكلمين معاي
هيام :انزل ولا انزلك بطريقتي
اوقف الخيل ونزل اليها :نعم ؟ شوفي عندك دقيقتين ولا وقتي بيضيع
هيام :ابي اشارك بسباق الخيل
ضحك صقر بشده لم يضحكها من قبل
هيام :وش يضحك يالحيوان الناطق ؟
صقر :انتِ بسباق الخيل ؟
هيام :اي أنا
صقر :كاس الملك
هيام :اي عارفه كل شي بس ابي اشارك
صقر :تتوقعين انك بتفوزين علي؟
هيام :انت هدف سهل لي انا انافس عبدالرحمن الراجحي
صقر :ان سبقتيني هنا وقتها افكر
هيام :ما ابيك تفكر انا بس بعطيك خبر
صقر :نكته حلوه منك اليوم الله يسعدك عطيتيني طاقه للتدريب
هيام :بسبقك عشان اثبت لك اني جاده
رمى لها خوذه من المعلقه بجانبه وذهب :نشوف
نظرت هيام للخوذه ثم صرخت عليه من بعيد :ترا راسي مب كبير زي راسك تعطيني خوذه هالكبر
صقر من بعيد بنفس الصراخ :ما عندنا خوذ لصغار العقول
عضت شفتها السفليه غضبًا ورمت الخوذه ارضًا ثم أمتطت أحد الخيول الذي اعتاد عليها وذهبت لصقر :وش تسوين ؟
هيام وهي تحرك شعرها بفخر :بسبقك بدون خوذه
ضحك صقر :بتسبقيني للقبر
هيام :عرض مغري ،مين بيعطينا اشارة البدء
صقر بسخريه :ملك الموت
هيام :استغفر الله العظيم
صقر :حسن بيجي الحين
صفر حسن بالصفاره فأنطلق هيام وصقر يتسابقون وبينهم المنافسه قويه فمرة تسبق هيام ومرة صقر حتى انتهى السباق بفوز هيام التي صرخت فور وصولها لخط النهايه :فزت عليك
صقر بتعب :ماهو عدل جايتني وطاقتي منتهيه تسابقين
هيام بسخريه وهي تدور حوله بخيلها:ياروح ماما ،خلاص بكره نسابق مره ثانيه
صقر:ما بضيع وقتي عليك بتدرب
هيام :تخاف مسكين ،قلت لك انا انافس عبدالرحمن الراجحي
صقر :ولا اقول ،باخذك هدف للتدريب كل يوم اتدرب عليك
هيام:وبتلقاني قبلك بسباق كاس الملك
صقر :ما بتفوزين على ضمانتي بس شفقة مني عليك بشاركك بالجائزه
هيام :انا بفوز فيها ما يحتاج تفكر
صقر :انتِ تحتاجين تفكرين عشان تستنتجين انك تسوين شي غلط
هيام:الغلط اني ما اشارك بالسباق
صقر :نشوف يوم السباق
هيام :نشوف
...
اشواق :وين كنت؟
سعيد :كنت امشي اسوي رياضه
اشواق :فتحت سيارتك ولقيت فيها ذا
سعيد:وشو ذا ؟
اشواق :روج
سعيد:حقك؟
اشواق :لا
سعيد :اجل من وين جا ؟
اشواق :هذا السؤال الي اسألك إياه من وين جا ؟
سعيد :يمكن حقك ولا حق نهى؟
اشواق :ارواجي وارواج بنتي معروفه وكلها ماركات مب هذا الرخيص من وين طلع هالروج سعيد؟
سعيد :مدري
اشواق :مين مركب بالسياره غيري؟
سعيد:محد
اشواق :كيف محد من وين جا هالروج ؟
سعيد :وش تفكرين يعني؟انا بخونك وبركب وحده غيرك السياره ؟
اشواق :لو على ثقتي فيك لا لكن انا لقيت روج اول مره اشوفه بحياتي وفوق ذا مستخدم يعني فيه وحده حطته بسيارتك
سعيد :هذي ثقتك شوفي كيف بسرعه راحت اهنيك على الثقه الي تكونك خلال عشرين سنه
اشواق :سعيد الموقف مافيه ثقه الموقف لقيت غرض بنت بسيارتك ،انت تحط روج لا سمح الله ؟
سعيد بحده :مالك دخل انا احطه ولا ...
قاطعته اشواق:اذا مالي دخل انا مالي قعده بهالبيت
سعيد :لحظه بفهمك ما سمعتيني
اشواق :ما ابي اسمعك ما ابي ،سيف يا سيف
سعيد :لا تدخلين العيال خلينا نتفاهم احنا الموضوع بسيط
اشواق :وش يسوي الروج بسيارتك ؟ سيف
سعيد :اشواق اسمعيني
خرج سيف من غرفته على المشهد الذي كان يخاف حدوثه ،تشتت تلك العائله وضياعها ضياع اكثر من عشرون سنه بسبب تهور والده ،بلع ريقه وقال:وش صار؟
سعيد :طيب خلاص لا تسمعيني وحتى روحي بيت اهلك بس فكري ،فكري فتره وتعالي نتفاهم وأمنتك بالله الواحد الاحد انك ما تدخلينهم بالموضوع ما ودي انه يكبر
اشواق :سيف جهز السياره وصح اختك
سعيد :خلي العيال عندي روحي لحالك
اشواق :ما بخليهم عند ابوهم الخاين
سعيد :اشواق ماني خاين ماتشوف عيني الا انتِ ولا قد عجبتني بنت بهالكون الا انت
ابتسم سيف بضيق وخفاء من الكذب الذي يسمعه
اشواق :ما ارجع لهالبيت انا وعيالي لين تقول لي كل شي
سعيد :وش كل شي ؟ بس فيه روج بالسياره
اشواق :من قبل الروج والسياره وانت متغير علي طلعاتك كثرت ما يعجبك اي شي اسويه ،تبي حلا تبي قهوه تبي نطلع كل شي لامالي خلق ،تعبان، بنام كأنك تجي البيت فندق بس تنام وتطلع ،حتى عيالك متى اخر مره شفتهم ؟ متى اخر مره وصلت نهى للمدرسه وطلعت مع سيف للملعب ؟متى يوم جلسنا وتغدينا مع بعض متى ؟
سعيد :نسيت بس قريب
اشواق :نسيت ؟ ليه تنسى ؟ لأنه بعيد حيل بعيد
نهى بخوف:ماما
ذهب سيف اليها وعانقها :تعالي الغرفه
نهى :وش صار فجأه
سيف :عادي تصير بكل بيت
نهى :بس ما قد صارت ببيتنا فيه شي كبير صح؟
سيف :معليك انتِ لا تشيلين هم ،بيتفاهمون بينهم وبيرجع كل شي مثل قبل واحسن
دخلت اشواق :لموا اغراضكم بنروح بيت جدتكم
نهى :ماما ...
اشواق :ما ابي ولا كلمه لموا اغراضكم وانت شغل السياره بنطلع الحين
سيف :ابشري
نهى :سيف
سيف :معليك لحظه غضب بتمر مافيه شي كبير ،لا تخافين بس اجمعي اغراضك كأنه بنروح ننام عند امي هاله زي العيد
نهى :طيب
سيف :اذا حسيتي نفسك متضايقه تعالي كلميني تمام؟
عانقته نهى :تمام
ابتعد عنها وخرج فأمسكت هاتفها واتصلت بجوانا التي لم ترد عليها
اشواق :باقي ما خلصتي؟ بسرعه
نهى :طيب وش اخذ؟
اشواق :كل شي مهم
نهى :طيب
في السيارة
سيف :يا يمه لا تبكين ولله اني محتار وش اسوي واوقف هالدموع
اشواق :خلك بطريقك بس
سيف :طيب ليه تبكين ؟ تبين البيت ولا زعلانه على ابوي ولا ايش؟
اشواق :خلاص سيف خلك بالطريق
تنهد سيف :وصلنا هذا هو القصر
أوقف السياره ينتظر فتح البوابه له وبقي ينظر لها :تبين شي؟
اشواق :جيب شنطتي بعدين
سيف :ابشري
نهى :علمتي خالاتي انك بتجين؟
اشواق :لا لازم اعلمهم ؟ بيت ابوي ذا
نهى :صح بس المشكله...
فتح الحارس البوابه واشار لسيف بالدخول ،فتوقف امام الباب وانزلهم :بوقف السياره
اشواق :طيب
اقتربت من الباب وفتحت لها أرين كما هي العاده :شفيك اشواق !
بكت اشواق فور رؤيتها وعانقتها بحكم علاقتهم المديده
مرت ملاذ على ذلك المشهد :شفيكم !أرين شفيها ؟
أرين :ما أدري دخلت على طول يبكي and hugged me
ابعدتها ملاذ عن أرين ونظرت لوجهها :اشواق شفيك
لم ترد عليها اشواق وبقيت تبكي وتمسح دموعها
التفتت لنهى :شفيها امك ؟
نهى :مدري فجأه صحيت هي وابوي يتهاوشون وقالت لمي اغراضك
ملاذ:اشواق
اشواق :وين امي
ملاذ :بغرفه جدتي
اشواق :بروح الحمام واطلع لهم
ملاذ :طيب ،نهى ما سمعتي شي من الهوشه؟
نهى :لا انا للحين مخروشه مدري كيف رسبنا هنا
دخل سيف :فيه احد؟
ملاذ :لا مافيه تعال
سيف :هاه؟
ملاذ :وش صار ؟
سيف :لقيت بسيارة ابوي روج تقول انه مو حقها
ملاذ :دامها تقول فهو صدق مو حقها
سيف :وانا ما قلت شي
ملاذ :كأنك تدافع عن ابوك ؟
سيف :ما ادافع عن احد
ملاذ :ليه ما تدافع عن امك؟
سيف :ما يمدي يعني عقوق بكل الحالتين
ملاذ :والسكوت مو عقوق؟
سيف :سويت الي أمرتني فيه واسوي الي تآمر بعد
ملاذ :اي وش صار ووش قالوا جابوا طاري طلاق؟
سيف :لا ما قالوا بس قال لها روحي عند اهلك وفكري
ملاذ :هاو وش تفكر به بعد ،مين راعية الروج ولا كيف مكياجها يوم حطته
نهى :خلاص ترا الموضوع ينرفز
ملاذ :طيب خلاص خلاص ،روحي عند جوانا وتونسي ما كأنه صار شي
نهى :كأنه ما صار شي !
ملاذ :اكيد مو كأنه ما صار شي بس حاولي تنسين
في الاعلى
ام ثنيان :اشواق ،شجابك هالحزة ؟
الجده وضحه :بيت ابوها تجي حزة ما بغت
ام ثنيان :شفيك؟
اشواق ببكاء:سعيد ،تهاوشنا
ام ثنيان :عسى ما مد يده عليك
اشواق :لا بس ...
اخرجت أحمر الشفاه من حقيبتها :لقيت هذا بسيارته مستعمل يعني مركب وحده السياره استعملته وحطته بالدرج
الجده وضحه :يمكن انه حقك طيحتيه
اشواق :لا ولله ماهو حقي شوفيه يا جده كيف رخيص انا ما قد شريت شي كذا بهالرخص ،اكيد راعيته رخيصه زيه
ام ثنيان :طيب هو وش قال ؟
اشواق :قلت له قال مالك دخل ،فيه شي يخبيه علي
الجده وضحه :لا تكبرين الموضوع
اشواق :وشلون ما اكبره ؟ زوجي ثلاثه وعشرين سنه راح لغيري كذا بكل سهوله
الجده وضحه :يمكن قصرتي معاه بشي
نظرت لها اشواق بإستغراب ثم انهارت باكيه :ما قصرت بشي ما قصرت اهلكت روحي عشانه وعشان العيال
الجده وضحه :ونسيتي نفسك ما تتزينين له
اشواق :لا ولله ما خليت شي ما سويته لبست كل شي كل يوم لبس جديد وشكل جديد
الجده وضحه :يمكن لأنك ما تبين تحملين خلاص ؟
اشواق :وش بعقله يعني ؟ يقدر يكلمني ويقول لي اشواق ابي عيال مو يسوي كذا ،واصلًا مو بيدي اني ما ابي احمل يوم نهى كان حملي خطير ما بخاطر مره ثانيه
حضنتها ام ثنيان :خلاص يا بنيتي خلاص
ثم التفتت للجده :خلاص يمه لا تضغطين عليها
دخل ثنيان :وينها ،وش مبكيك ياروح اخوك؟
عانقته وبكت بشده وهي تردد :ثنيان ،راح لغيري ...راح لغيري
ثنيان وهو يمسح على شعرها :ما يستاهلك وانتِ بنت بندر ما يستاهلك ،بس عسى ما ضربك ؟
اشواق :لا ما ضربني؟
ثنيان :رفع صوته عليك
ابتعدت عنه وهزت رأسها إيجابًا وهي تمسح وجهها
ثنيان :لا حشا ولله جعل صوته القطع ان كان يرفعه عليك
مسح على كتوفها :خليك هنا وانا اوريك فيه هالسعيد
ثنيان وهو خارج :معد هو ذايق السعاده بعد هالليله
لحقته الجده وضحه :ثنيان
ثنيان :تراني مستعجل
الجده وضحه :وين رايح؟
ثنيان :ما كان ودي اعلمك لأنه عمل ليس للقلوب الضعيفه بس بروح اكسر راسه
الجده وضحه :ليه ؟ يمكن الغلط على اختك
ثنيان :بالله ؟ هي الي خانته ولا هو ؟
الجده وضحه :بنات حوا متسرعات اصبر شوي ويدق عليها ويعتذر ولله انها ترضى وترجع له لا تخرب بيت اختك وتهدمه
ثنيان :اي عشان يجي بباله انه اشواق راحت لبيت اهلها وما سوو لي شي يعني ما وراها اهل ويتمادى
الجده وضحه :وين عقلك انت ؟ من البارح وانت موب صاحي ولا مجنون
ثنيان وهو ذاهب:عقلي يدور له بيت غير هالبيت
الجده وضحه :لا حول ولا قوة الا بالله
...
سعيد :قايل لك انا شيلي كل اغراضك من السياره ليه تحطينه بالدرج
مشاعل :نسيته طيب كان ببالي باخذه
سعيد :الحين وشلون ارجعها ؟
مشاعل :خلها طلقها دامها جات لك فرصه طلقها
سعيد :ماني مطلق يا بنت الحلال ماني مطلق
مشاعل :وكيف تبينا سوا ؟
سعيد :ولا ابيها
مشاعل :اجل وش حادك عليها ؟ كل ما قلت لك طلق قلت ما بطلق ولا ابيها وش حادك ؟
سعيد :الي حداني فلوس اهلها ولا هي مامنها فايده
مشاعل بسخريه :بقره تدر عليك الفلوس
ضحك سعيد :بالضبط
مشاعل :وش رايك اليوم انا اجيك
سعيد :صاحيه تجيني
مشاعل :اي بجيك زوجتك مستحيل تجي ،وخل اراضيك انا دام هي ما تبي تراضي
سعيد :تعالي ما بقول لا
مشاعل :مسافة الطريق وانا عندك
سعيد :مع السلامه
اغلق هاتفه وتنهد بسعاده فسمع دق الباب:وش هالسرعه ماشاء الله
قام وفتحه فوجد ثنيان متكئًا على الجدار :فاضي؟
سعيد :اي
دخل ثنيان ودفعه :كويس
جلس ثنيان وجلس سعيد مقابله :ما بتضيفني شي؟
سعيد :تشرب شي؟
ثنيان :لا ،مارح الومك لأنه واضح انك ما تعرف بالادب
سعيد :وش سبب زيارتك ؟
ثنيان :قلة ادبك الي مسويها مع اختي
سعيد :انا مأمنها ما تقول شي
ثنيان :عشان ينفجر لها شريان من القهر ،لو تعض الارض وانت تترجاها تخبي عنا شي يقهرها ما تسويها لأنها بنت بندر
سعيد :والنعم
ثنيان :ترفع صوتك على اختي وانا حي لا ولله ماني ثنيان
ضحك سعيد بسخريه :تونا نقول والنعم شفيها خافت بنت بندر ؟
ثنيان :ما تخاف لكنها تكره نباح الكلاب
سعيد :هذا كلامها ؟
ثنيان :كلامي ،الحين انا جايك ابي اعرف الموضوع كله
سعيد :رحت السوق ابي اجيب لها هديه
ابتسم ثنيان :سوق رخيص لغاليه بنت غالي
سعيد :لا هو سوق فيه كل الماركات الغاليه والرخيصه ،هذاك سيفورا
ثنيان :اي كمل
سعيد :ومريت من جنب الروج حق التجريب وطيحته والي بالمحل قالت لي تشتريه غصب وشريته ورميته بالدرج على اساس بعدين برميه ونسيته
ثنيان :بحاول اصدق بحاول
اقترب من سعيد وامسك كتفه :لكن ان عرفت انه السالفه غير كذا ما يحصل لك خير ،اليوم انا جايك لحالي ومحترم نفسي ولا ابي اهدم بيت اختي لكن المره الجايه ...
انزل يده للكبك الذي عرف أنه الذي اهداه لسيف من تفاصيله :بندر مات لكن عياله ما ماتوا قلوبهم حيه على بعضهم ولا يرضون لخواتهم شكة الشوك ،المره الجايه بجيك بصقر وذيبان
قام ثنيان وذهب للباب ليخرج وعندما فتح الباب وجد مشاعل أمامه فنظر لها بنظرات شك:مين تبين ؟
هابت مشاعل نظراته ودب صوته الرعب في قلبها فقالت بتوتر :ابي جارتي
ثنيان :ماهي هنا ،وش اسمك واوصل لها خبر
مشاعل :اسمي ...ما تعرفتي هي انا جارتهم الجديده وابي اتعرف
ثنيان :يوم ثاني ان شاء الله
اغلق الباب وخرج :ولعد تجين بدون موعد البيوت عورات
مشاعل :ان شاء الله
مثلت انها ذاهبه حتى تأكدت من ذهابه ثم دقت على سعيد الباب ففتح لها :احسبك هو
مشاعل :هذا اخوها ؟
تنهد سعيد :اي
مشاعل :ماشاء الله رزه، متزوج ؟
جلس ونظر لها :على اساس فرقت عندك متزوج ولا لا
مشاعل :ان كان عنده فلوس ما فرقت
سعيد :وش تبين بالفلوس؟
مشاعل :سياره
سعيد :بشتري لك
جلست بجانبه وقالت بسخريه :مو انت زوجتك تشتريها
سعيد :حق مهرها ميتين الف طلعتهم من ظهري
مشاعل :ميتين الف وش هالرخص
سعيد :هذا بتخفيض بحجه انه ابوي وابوها زملاء
مشاعل :اجل كم كانت ؟
سعيد :خمس ميه
ابتسمت مشاعل :باقي رخيصه
امسك يدها :ليتك طلعتي لي يوم اجمع مهرها
امسكت وجهه :كان ما احتجت تجمع مهرها
انزلت يدها لأزرار ثوبه وهي تقول:انا اكفيك عنها وعن مهرها
أبتسم سعيد :انشهد
...
ام ثنيان :وين رحت؟
ثنيان :رحت لقليل الادب ذاك وعلمته
ام ثنيان :ما قلت لي الله يهديك
ثنيان :لا قلت يوم كنت عندكم بغرفة جدتي
ام ثنيان :عساك بس ما قلت كلام يهدم بيت اختك
جلس براحه واخذ من المعمول الذي على الطاوله :معليك بس قلت له بنت بندر ما ينرفع فوق صوتها صوت والحين جيتك لحالي بس المره الجايه بجيك بصقر وذيبان
ام ثنيان :طيب ما سألته عن الروج؟
ثنيان :سألته بس لا تتوقعين مني اصدقه
ام ثنيان :ووش قال ؟
ثنيان :قال رحت السوق بشتري لأشواق هديه وطيحت عينه التجربه وخلوني اشتريها
ام ثنيان :طيب يمكن منجده
ثنيان :انا مو مرتاح له اخر فتره خلي اشواق عندنا
ام ثنيان :بتطلق اختك بعد ٢٣ سنه ؟ وش بلاك
ثنيان :ما بطلقها بس بتأكد من الموضوع
ام ثنيان :وشلون بتتأكد بتسوي تحليل DNA للروج؟
اخذ قطعه اخرى من المعمول:فكره حلوه بس لا ،بخلي احد يراقبه
ضربت يده بخفه :حبه وحده تكفيك ،وبعدين وشو تراقبه صاحي انت؟
ثنيان :اي صاحي الحمدلله بس الناس صاروا مجانين هالايام
ام ثنيان :محد بيخون عشره ٢٣ سنه وش تبي بالمشاكل فوق راسك
ثنيان :لا يخونون انا اعرفهم يخونون حتى خمسين سنه
ام ثنيان :لا حول ولا قوة الا بالله
مد يده للصحن :لا تاخذ خلاص
ثنيان :ليه احد بيجيك؟
ام ثنيان :لا بس عشان تتعشى لو اكلته بيشبعك عن العشا ،وتراني مو موافقه على سالفة المراقبه
ثنيان :ليه؟
ام ثنيان :عيب
ثنيان:ولله العيب الي يسويه بأختي ويحسبنا اغبياء
ام ثنيان :بوافق بس بشرط
ثنيان :سمي
ام ثنيان :لو جا هو وراضى اختك تخليه ياخذها
ثنيان :اي بالعكس تحلى المراقبه كذا يرجع لوضعه الطبيعي ويرتاح
ام ثنيان :طيب قلت لها عن الي قاله؟
ثنيان :لا
ام ثنيان :البنت قطعت روحها هناك وانت هنا تسولف روح علمها
ثنيان :طيب
ام ثنيان :يلا قوم
ثنيان :يمه مو كأن درج الذهب مفتوح ؟
نظرت خلفها لتتأكد فأخذ قطعتين من المعمول وخرج
ام ثنيان :الله يهديك تكبر وعقلك يصغر
خرج من الغرفه ضاحكًا فواجه ملاذ أمامه :هذا انت هنا !
ثنيان :اي هنا
ملاذ :وتاكل معمول بعد ،وش قال لك ؟
ثنيان :يقول انه راح السوق
ملاذ :طيب وش رايك تجي تتفضل معاي وتقول الكلام قدام اشواق ؟
ثنيان :طيب انا كنت جاي
ذهب خلفها ودخل للغرفه التي تجلس بها اشواق :بعدك تبكين
اشواق :كيف يقدر ،هو أول وجه واول انسان تعرفت عليه برا هالبيت
ضمها اليه وقال :تراني رحت له وسألته عن كل شي
نظرت له بترقب :وش قال ؟
ثنيان :يقول انه راح يشتري لك هديه و...
قاطعته اشواق :هديه رخيصه ومستعمله ؟
ثنيان :قلت له يقول انه راح سيفورا وهو فيه ماركات اظن ،ومر بعينة التجربه وطيحها وخلوه يشتريها وحطها بالدرج ونسى منها
اشواق :هو قال كذا ؟
ثنيان :اي هو
اشواق :طيب ليه ما يقول لي ليه يقول مالك دخل
مسح على شعرها :أكيد توتر ،عادي ترا هالنقاشات تصير بكل بيت وانتِ خابره ذا الشي اكثر مني لك ثلاث وعشرين سنه متزوجه
اشواق :بس ما قد صار كذا ماقد شفت عنده اشياء كذا
ثنيان :عادي تصير يا اشواق لو ما صارت ما يعتبر زواج ،الحين وش تحسين ووش خاطرك فيه
مسحت دموعها :احس اني ابي اصدقه ،بس ابيه هو يجي ويعتذر ويقول لي نفس الكلام
ثنيان :خلاص اجل البيت بيتك لين يجي ويعتذر
امسك يدها بحنان :الحين وش رايك نطلع انا وياك لحالنا ،زي زمان
اشواق :ورتيل ؟
ثنيان :بقول لها وبتتفهم الوضع عادي ،اساسًا أحنا بكره بنسافر أكيد تبي تجهز
اشواق :اذا بتسافر ما ودي اتعبك وبكره وراك تعب
شمّر كمه و كشف عن الوحمه المشتركه بينهم وقربها من وحمتها :وين التعب بسعادة تؤامي
اشواق :وعيالي
ثنيان :خليهم خليهم نهى تطلع عند رتيل هي تحبها وسيف يتفرج برسمات أوس فكري مره وحده بنفسك صح نهى ؟
نهى :اي ماما معليك ،أهم شي انتِ تستانسين أحنا ما علينا شي
اشواق :تمام نطلع بس ما نطول
ثنيان :أجل يلا انتِ تجهزي وانا بروح أدور مطعم نحجز فيه لعشاء تؤام رومنسي
خرج ثنيان فبقيت أشواق مع نهى :بتسامحين بابا ؟
اشواق :بسامحه ،لكن خليني أتغلى شوي ،وانتِ يا عمري عسى ما أثر فيك هالموقف ؟
ابتسمت نهى :بس بالبدايه خفت ويوم قال خالو ثنيان السالفه ارتحت
نظرت لأمها طويلًا ثم حضنتها :خفت نتفرق
اشواق :الله لا يقولها
داعبت أنفها وقالت بسخريه :إن شاء الله ما نتفرق الا اذا زوجتك
نهى :ماما ! لو قلتي اذا رحتي تدرسين بالخارج أو أي شي مو كل شي زواج زواج
ابتسمت اشواق :أمزح معاك ،أبي بنتي أن شاء الله توصل لأعلى المراتب
في جناح ثنيان
رتيل :هاه بشر وش صار؟
ثنيان :ما صار الا كل خير وطلع سوء فهم
رتيل :كيف سوء فهم يعني وش السالفه ؟
استلقى على الكنبه :راح بيشتري لها هديه وخم عينة التجربه معه وخلوه يشتريها وهو نساها بالسياره
تنهدت براحه :الحمدلله يا رب ولله شلت هم أنه صدق يخونها
ثنيان :مو كثري ولله كنت مستعد أتله من سكسوكته وأرمي به بالشارع وأجمع عليه الصحافه وأخليهم يكتبون عنوان لو جاكم هالكلب يطلب الزواج أرجموه
رتيل :أي يستحق ويستحق أكثر مين الي بترضى يخونها زوجها
ثنيان بسخريه :جدتي
ضحكت رتيل :هي حاله نادره من النساء
جلس ثنيان واقترب منها ووضع يده خلفها :لو أنا أخونك وش بتسوين؟
توقفت عن الضحك وأنقلبت ملامحها إلى الجديه :وش ؟
ثنيان :ما أخونك أنا بس لو سويتها وخنتك وش بتكون ردة فعلك ،بتروحين لأهلك ولا وش بتسوين ؟
أمسكت أذنه بقوه :بتلك من هالاذن وأحذف بك من البلكونه وأجلس فيها وأتقهوى على منظرك المكسر الجميل بكل راحه واخلي أوس يرسمك لي واعلقها بالصاله
ابتسم ثنيان :إن كنت من ذيك الزاويه بشوف ابتسامتك فأنا راضي
رتيل :ليه أنت الحين تخونني ؟
ثنيان :إن بغيت درب للخيانه ما لقيت كيف أبلقى الي يغنيني عنك ولله ما دريت
ابتسمت رتيل :وش هذا شعر ولا أيش ؟
ثنيان :هي عبارة بس إن بغيتيها شعر أخليها شعر فداك
رتيل :أجل الحمدلله أنها مو شعر
ثنيان :أفا يالعلم تحطمين روحي الرومنسيه ،انسي أني أدلعك وأدللك دامه ما يعجبك كلامي ما بتسمعين كلمه وحده
رتيل :ثنيان
ثنيان :لبيه يا بعدي آمري
رتيل :قعدت أفكر كذا ،أحس الجو حلو نطلع مخيم
ثنيان :أبشري نطلع مخيم ،خليني بس اكلم العمال الي فيه...نسيت
رتيل :وش ؟
ثنيان :قلت لأشواق بطلعها لمطعم وقلت لها تجهزي وانا بحجز ،كنت بجي أعلمك بس نسيت
رتيل :حجزت ؟
ثنيان :لا
رتيل :شاطر ولله
ثنيان :أبك عيونك نستني وش بغيت
رتيل بسخريه:أبك صرت عتيبي وانا مدري
ثنيان :تأثير واحد بالاستراحه
رتيل :يلا قوم أحجز لها وأطلعوا واستانسوا
ثنيان :ما زعلتي ؟
رتيل :مجنونه أنا أزعل من طلعتك مع أختك؟
ثنيان :يا بعد كبدي ولله يا...
قبل خدها بقوه:بعد كبدي
مسحت خدها مكان قبلته:قوم خلاص البنت تنتظر
قام ثنيان وهو يتحدث بصوت عالي :انا حظي الجميل بهالدنيا رتيلي هذا الخير الي اخذته منها وبس ،هيا بالله وين ابلقى زوجه متفهمه كذا وين !أكيد أنك من الحور العين نازل معنا عالارض
ابتسمت رتيل خلفه :استغفر الله العظيم
عاد اليها ومد لها هاتفه :تسوين فيني خير لو تكلمين مطعم حلو وتحجزين بأسمي وأنا بدخل أتروش
أخذت الهاتف :من عيوني
ثنيان بنفس النبره :يا بعد كبدي يا...
أقترب ليقبل خدها مرة أخرى فوضعت يدها أمامه :لا ابعد ابعد خلاص
ثنيان :أفا زوجتي ما تبيني أبوسها
رتيل :خلاص هذيك تكفي للحين وجهي يوجعني
ثنيان :يابعد روحي معلي...
قاطعته رتيل :خلاص ثنيان رح تروش وخلص شغلك تواعد الناس بشي وتنشغل عنه
بعد وقت خرج من الحمام :حجزتي ؟
رتيل :أي
ثنيان :أي مطعم ؟
رتيل :*** ،وبعدين تعال
ثنيان :تبين أجيب لك عشا ؟
رتيل :لا باكل من البيت بس خاتمك نسيته
مد يده لها :لبسيني
البسته الخاتم فقال بسخريه :نعم أقبل الزواج منك
رتيل بضحك :سخيف
ثنيان :اهم شي ضحكتك يا حلو هالضحكه
...
جهاد :خالد
خالد بسخريه:ما قلت لك ما أبي أشوف وجهك الا بالنقطه؟ حتى التوقيع أنت بجهه وأنا بجهه
جهاد :بكلمك لموضوع ضروري
خالد :سم
جهاد :فيه مجال أبدل الموقع مع قصي ؟
خالد :مو انت من أول ما بغيت تاخذ موقعه ؟
جهاد :الا بس ...
خالد:وش صار بالدنيا
جهاد :الموقع قريب من محل العين والقلب
خالد بحماس :أسلم ،عطتك هديه عقد بس أخذت قلبك يا ولد مساعد
جهاد بحرج :الحين خلصني ببدل معاه ولا لا ؟
خالد :لو توسطت لك الحين بعدها يبغى لي من يتوسط لي عشان ما انفصل
جهاد :طيب ابي انقل انت مستوعب انها كل يوم تمر من ذيك النقطه بسيارتها وانا مو موجود ! انت مستوعب ان قصي يشوفها مو انا؟
خالد :اي مستوعب وانت لازم تستوعب ان قصي ما يدري عنها ولا يعرفها اصلًا
جهاد :اتحدى اذا ما تهمه اتحدى
خالد :يا ولد الرجال خاطب وش يبي فيها
جهاد :يا ولد انت ما شفتها زين ذي الملحد لو يشوفها يسلم ،يسلم ويصير شيخ بالحرم من قو الجمال
خالد :اشوفك قلبت نايف حمدان بالوصف
جهاد :شفت الي يوصفهم نايف حمدان ؟ ذي احسن منهم بمليون مره
خالد :يا رجال خل عنك ولله انها عاديه
جهاد :لا ولله ماقد مشى مثلها على الارض مخلوق ما العادي الا وجهك
خالد :ما الومك تشوفها مختلفه انت بعالم مختلف انت كل يوم تقابل مهربين وناس وجيههم مغبره من عام الفيل اكيد لو شفت كائن رقيق كذا تشوفه شي عجيب
جهاد :انا كل يوم مقابل اخواتي وبنات عمي بس ذي ما مثلها
خالد بسخريه :طبيعي ما يعجبونك كلهم نفس وجهك
جهاد :اسمع كل تبن والحمدلله انك ما شفتها نفس ما اشوفها عشان ما افقع عيونك
خالد :خف علينا يالرجل الشرقي الغيور وامش خلنا نروح للشفت قبل ما يسرون علينا الليله معد يبقون فيك ولا حيل للغيره
جهاد :انا وش حادني عليك ؟ وش الي مخليني اقول لا ولله ابي شفتي مع خالد ليه يا أنا ليه
خالد :يلا بس امش
في النقطه
خالد :اقولك جا بلاغ سياره سيدان رصاصيه
جهاد :وش فيها ؟
خالد :مشتبه فيها تهريب ممنوعات ووقفت لي واحد بنفس المواصفات وفوق ذا ما عنده رخصه
جهاد :طيب ابلع لقمتي واجيك
خالد :الرجال شايب مسكين ويقول انها سيارة بنته
مسح يديه :طيب بغسل واجيك ،وانت عطه مويا وريحه
خالد :طيب
خرج بعد قليل إليه :السلام عليكم يا عم
ابو هيفاء :وعليكم السلام
جهاد :ولله معليش يا عم اذا تسمح نفتش سيارتك
ابو هيفاء بتوتر:ولله يا ولدي انها مب سيارتي ذي سيارة بنتي والرخصه بسيارتي بالصناعيه توني موديها وطلعت مع تاكسي للبيت ونسيت اخذ الرخصه الله يسامحني
جهاد :ابد استرح يا عم ولا تتوتر حنا بنفتش بشكل سريع ولا رح نمس خصوصياتكم بس عشان الواجب
خالد :يا جهاد
أرتدى أبو هيفاء نظارته ونظر لأسم جهاد المعلق بصدره :أنت ولد مساعد آل محسن؟
جهاد :الله الله ،أنت تعرف أبوي؟
أبو هيفاء :أي أعرفه وأعرفك بعد لكن الظاهر أنك ما عرفتني
جهاد :ولله يا عم معارفنا واجد لا تاخذ بخاطرك لكني ما عرفتك
أبو هيفاء :زين زين بكره تعرفني ان شاء الله
خالد :مافيها شي السياره لقينا السياره المشتبهه تعال ،معليش يا عم تعبناك
أبو هيفاء :لا ما بها تعب خدمة الوطن
صافح جهاد :الله ينفع بكم إن شاء الله لولا الله ثم أنتم كان حنا مب هالامان
جهاد :اطلب منك طلب يا عم
أبو هيفاء :أبد آمر
جهاد :ولله إني شفت بوجهك السماحه ولعلك أقرب لي من الله ،ودي أنك تدعي لي يتحقق الي ببالي
أبتسم أبو هيفاء :الله يحقق أمنيتك أن شاء الله وأماني جميع الي مثلك سواء بهالنقطه ولا على الحدود ولا بأقصى بقاع هالدوله
أبتسم جهاد وهم ليقبل رأسه لكنه منعه :أبد حلفت الليله ما تحب راسي
جهاد :الله يسامحك
أبو هيفاء :يلا رح لشغلك وخلك كذا دوم ماشاء الله عليك
جهاد :أبروح لكن أنت قلي محتاج لشي يا عم ؟
أبو هيفاء :لا ولله الحمدلله
جهاد :الحمدلله
خالد :ولله أنه رجال طيب كيف توقعتها منه
جهاد :طلع يعرفني ويعرف أبوي
خالد :أنت عرفته ؟
جهاد :لا
خالد :أنت ما تعرف أحد
أبتسم جهاد وهو ذاهب :معرف إلا سهام
...
دخل أبو هيفاء للمنزل :السلام عليكم
ام هيفاء :وعليكم السلام اصب لك شاهي ؟
ابو هيفاء :جاهز ؟
ام هيفاء :اي الحين بتجيبه سهام
ابتسم ابو هيفاء بسخريه :على الطلب ماشاء الله شاهي وسهام
اقبلت سهام بالشاي مبتسمه:طالبني ؟
ابو هيفاء :صبي لي الكاس واقعدي احاكيك لين يبرد
سهام :سم ،اصب لك يمه ؟
ام هيفاء :اي صبي
جلست سهام ونظرت لوالدها الذي أخذ نفسًا عميقًا وتكلم :توني اخذت سيارتك وطلعت فيها المهم وقفوني بنقطه وقالوا ان السياره مشتبه فيها
سهام :عطونك مخالفه ؟ فداك انا بدفعها
ابتسم ابو هيفاء :لا مب مخالفه صدفه سبحان الله الي وقفني كان جهاد ،الولد الي يبيك
بلعت ريقها وتغيرت ملامحها للخجل :اي
ام هيفاء :تعرفت عليه ؟
ابو هيفاء :ولله انه ما قصر يوم درا ان صاحب السياره رجال كبير جاب لي مويا واعتذر مني لين طلعت للسياره
امسك يد سهام التي كانت تنظر للحائط :انا تعرفت عليه واقول انه رجال كويس وان كنتِ بتوافقين عليه أنا موافق
ام هيفاء :هاه سهام وش رايك ؟
ابو هيفاء :يوم بروح قال لي انت رجال وجهك سمح ودي أنك تتدعيلي يتحقق الي ببالي ،واضح انه شاريك ويبيك بالحلال ولا ما خلى رجال غريب يدعي له
بلعت ريقها :يمكن ما يقصدني
ام هيفاء :وش ما يقصدك الله يهداك ،الرجال كل الي يتمناه عنده الي ياكله قدامه والي ما ياكله وراه ماهو ناقصه الا انتِ ولاهو يتحرى شي هالفتره الا موافقتك
ابو هيفاء:إن بغيتي تفكرين وتاخذين وقتك براحتك ماني ضاغطٍ عليك ولا أمك ضاغطه
سهام :مدري احس ... يمه وش رايك
ام هيفاء :رأيي أنت تقررين هذا عمرك وانتِ تختارين مع من تعيشينه
سهام :يمكن يدخن طيب ولا يشيش ؟ ما احب ذي الاشياء اتحسس
ابو هيفاء :ما يدخن يده صافحت يدي وبغى يحب راسي ما شميت منه ريحه نكره ،الا بالعكس ريحته عود وبخور وطيب
تنهدت سهام :هل انا مستعده للزواج؟
ابو هيفاء :انتِ قرري مب احنا ما ودنا ندخلك حياتك الجديده وانتِ مب راضيه
سهام :كيف الزواج يعني وش بيصير كيف بعيش حياتي
نظر والداها لبعضهم قليلًا وضحكوا
ام هيفاء:تبينه من وجهه نظر الحرمه هذا هو رأيي
أمسكت يدها الاخرى :الزواج حب وموده يكملك الله مو بالي يشبهك بالي يقدرك ويتنازل عشانك تمرون بفترات تحسبونها بتنتهي بس تحيونها من جديد انتِ تحيينها مره وهو يحيها مره انتِ تغلطين مره وهو يغلط مره وإن رزقك الله بالحمل بيقربكم لبعض اكثر بتكونون كلكم مسؤلين عن نفس الشي تتعلمون منه الاهتمام ويمضي العمر وانتم على هالحال بأذن الله ،لكن اذا كان الزواج موفق
سهام :يبه وش رايك
ابو هيفاء بسخريه لتلطيف الجو:ولله انا اقول ان امك لخصت الزواج بأحسن صوره احس ودي اتزوج مره ثانيه من وصفها
ام هيفاء بصدمه :وش !
ابو هيفاء :أمزح معاك يالغرام وش اسوي بعد هالعمر بوحده ثانيه
ضحكت ام هيفاء :مزحك ذا من ثلاثين سنه ما تتركه وبعدين وشو الغرام وشو
بادلها ابو هيفاء الضحك :وانتِ من ثلاثين سنه تصدقينه
نظرت سهام لضحكاتهم والحب المتبادل في نظراتهم وتنهدت بأبتسامه :يبه
ابو هيفاء :سمي
سهام :احس ...موافقه
ابتسم أبو هيفاء وقبل رأسها :الله يجعل فيه كل خير ويرزقك الذريه الصالحه بأذن الله
زغرطت أم هيفاء فخرجت شروق مستفهمه :وش صار ؟ وافقت
أبو هيفاء:بزوج تالي بناتي ،الدور جايك يا شروق
ضحكت شروق :الله بصير اخت العروس للمره الثانيه
قامت سهام من بينهم بخجل ودخلت غرفتها لتغطي وجهها المحمر :احس اني مسويه شي حرام ،سهام صحصحي تراه شي طبيعي بتتزوجين مثل هيفاء بس مثل هيفاء ،حياه جديده
ابعدت يديها ونظرت للحائط بتصنم:حياتي الجديده
ارتمت على السرير وأخذت هاتفها لتفتح صورته التي ارسلتها شروق وتنظر لها :هذا الانسان بيصير ...بيصير زو... مب قادره اقول الكلمه
رفعت الهاتف ونظرت لوجهه طويلًا :كأنه يراقبني وش هالنظرات
دخلت شروق وسط تأملها فسقط الهاتف على وجهها :شروق يالزفت
شروق :سهام غيري مكان سريرك مب عاجبني
سهام :وش دخلك
شروق بإستفزاز:بتصير غرفتي ،بتتزوجين جهاد تصيرين سهام زوجة جهاد
بلعت ريقها وجلست :مهما صار ببقى سهام بنت حمدان
شروق :بنت حمدان وزوجة جهاد
سهام :بنام اطلعي
شروق وهي تشير لهاتف سهام بعينها:اي بتنامين احلام سعيده مع صورة جهاد الاولى بحياتك
نظرت سهام للهاتف :بالغلط دخلتها
شروق :ترا عندي له صوره وهو بدون فنيله وقاعد يسبح بالمالديف بس حبه حبه بعطيك ما ابيك تموتين
سهام :وش تبين فيها يع
شروق :اي صح وش ابي فيها برسلها لك واحذفها من عندي
سهام :لا شروق تكفين
شروق وهي تبحث بالهاتف:معليك جسمه حلو ماشاء الله يلعب حديد
سهام :شروق ما ابي اشوفه اخاف
شروق :انتِ الي تشوفينه مب هو يشوفك
سهام :على الاقل خلي الشوفه تعدي ما ابي اذا دخلت المجلس اتذكر صورته ذيك
نظرت لها قليلًا بتفكير :صح وجهه نظر ،وانتِ بوسط النظره كذا جوالك عندنا برسل لك الصوره اول ما ترجعين تشوفينها
سهام:ما بشوفها ببلك رقمك من الحين
شروق :لا تخليني ارسلها الحين
سهام :طيب خلاص
شروق :لو تبلكين بطبعها واعلقها بجدار غرفتك تقومين على صورته ،وقريبًا ان شاء الله على الواقع تشوفينه
سهام :يارب صبرني
شروق :اي الحياه الزوجيه يبيلها شوية صبر
سهام :شروق اطلعي خلاص
شروق وهي خارجه :احلام العوافي مع جهاد حبيب النفس
...
نرجس :جايتكم بالعلم والاخبار الزينه
قلد ابو جهاد نبرتها :بلاك بينك بيجون السعوديه وابي احضر ،لا
نرجس :لا يبه وين ،شروق ارسلت لي تسريبات
ابو جهاد :من شروق؟
ام جهاد :اخت البنت الي خطبناها لجهاد ،وش قالت ؟
نرجس :تقول اختها وافقت وشوي وابوها يكل...
رن هاتف ابو جهاد قبل ان تكلم جملتها
نرجس :او حتى اتصل
ابو جهاد :خلاص اص ،هلا ابو هيفاء وعليكم السلام والرحمه لا مافيه ازعاج احنا صاحين
ابو هيفاء :انا ما مداني اسأل عن ولدك لكن سبحان الله صار لي موقف بالنقطه الي هو مرابط فيها وهالموقف اثبت لي انه رجال وانا موافق ،ان بغيتوا خلو الشوفه بكره ووقتها البنت تقول رأيها
ابو جهاد :الله يجزاك خير ،بأذن الله ان جهاد فيك الخير لبنتكم وبنتكم فيها الخير لجهاد وبكره ان شاء الله نجيكم للشوفه
ابتسمت ام جهاد بأتساع وهمست :الحمدلله
ابو جهاد :يلا بالخير ان شاء الله بكره الموعد اي بعد صلاة العشا ،بجيبهم كلهم معليك اي اي مع السلامه
التفت لنرجس بعبوس :ما وافقت انتِ تقولين وافقت
ام جهاد :والشوفه اجل وش ؟
ابو جهاد :يقول بكره بتقول رأيها
نرجس :يبه انت ما تعرف
ام جهاد :هو كذا العادات ما يقولون البنت وافقت قبل الشوفه عشان ما تصير مشفوحه
ابو جهاد :الله يهديك يا نرجس قلتي لنا كان سترتي عليها
نرجس :ولله ما قدرت من الفرحه
ام جهاد :اجل خلني اتصل على جهاد ابشره
ابو جهاد :خليه خليه الحين معد يبقى له بال بالشغل
ام جهاد :افرحه بس
ابو جهاد :خليه هذا الحمار ولله لو يمرون قدامه ناس مسلحين بيضحك لهم ويعديهم
نرجس :صدق يمه خليه نعلمه الصبح ،وحتى مو الصبح خليه يروح ينام زي الخلق واذا صحي نقول له
غاده :تقولون لمين ايش؟
ام جهاد :البنت وافقت وبكره الشوفه
غاده :العب يالفعاليات ،من الحين عندي لكم القاعه
ابو جهاد :وانتِ خطيبك معد له حس ولا خبر
غاده :توني تخرجت اصبروا علينا
رن هاتفها فذهبت لغرفتها وابتسمت :الو
هادي:معليش ما اتصلت ابارك لك بالتخرج ،اتوقع انا اخر واحد بس ...مبروك ومنها للأعلى ان شاء الله
غاده بسخريه :شي احسن من لا شي
هادي :عاد مستحيل أعدي مناسبه كذا بدون هديه
غاده :ووينها الهديه ؟
هادي :عطيت الشغاله ما جتك؟
غاده :لا
في نفس اللحظه دق باب غرفتها :او شكلها جت
فتحت الباب واخذت الهديه :كلفت على نفسك
هادي :تستاهلينها واكثر ،انا بقفل عندي شغل وانتِ سلمي لي على خالتي
غاده :هادي
هادي :هلا
غاده :كيف الجو بالشرقيه ؟
هادي :لا بأس به ،لكن اكيد مب زي جو الرياض الحبيبه
ابتسمت غاده :ما بتجون بالاجازه ؟
هادي :لا ولله ما يمدي امي نوت لكن ماهو مكتوب لنا
غاده :ليه ؟
هادي :نقلنا البيت تعرفين وانشغلنا مع النقل ،الحين قاعد مع العمال ينزلون الكنب
غاده :احنا كنا نفكر نجيكم بس جهاد خطب وحده والحين مشغولين مع الخطوبه
هادي :ماشاء الله ،ما قلتي لي
غاده :انت ما تتصل ولا تسأل
هادي :اعتذر ولله لكن اوعدك بالعوض القريب
غاده :يلا انا بقفل وانت خلص اشغالك
هادي :مع السلامه
غاده :مع السلامه
اغلقت الهاتف وتنهدت وهي تنظر للهديه فدخلت نرجس وامها :ولد خالتك صح ؟
غاده :اي ،يسلم عليك
ام جهاد :الله يسلمه،قلتي له يسلملي على امه ؟
غاده :لا نسيت
ام جهاد :وشلون تنسين عيب ذي خالتك
غاده :انتِ وياها كل يوم تكلمون بعض ماشاء الله
نرجس :وش جاب لك هديه ؟
غاده :جوال
نرجس :غير الي جابه ابوي
غاده :اي صرت غنية جوالات مدري وين اوديها
نرجس :عطيني واحد سهله
غاده :لا ما بعطيك واحد من ابوي وواحد من خطيبي كلهم غاليين
نرجس :من زينه عاد ،خلي ايفون ١٥ ينزل بشتريه اول وحده
غاده :اسمعي ارسلي لبنات عمي خلينا نتجمع عندي شي ابي احلله
نرجس :قلت لهم هادي دق على غاده وجاب هديه وقد عادوا بالحوش ومعاهم صديقتهم
غاده :مين ؟
نرجس :هذيك الي طلعت مع اوس بالصوره
غاده :اي نسيتها
نرجس :يلا بس انا بنزل وانتِ جيبي الهديه والحقيني
غاده :طيب جايه
في الفناء الكبير الذي يشبه حديقة أكثر مما هو فناء منزل كانت البنات يجلسن في جلسه عن يمين القصر تطل على المسبح وتتوسط جلستهم شبّة النار
ملاذ :ترا ذي الجلسه ما تصلح للمراهقين روحوا هناك العبوا كوره ولا اي شي
نهى :ماما !
قلدت ملاذ نبرتها بسخريه:ماما
جوانا :انا مولعة لك النار اخرتها تطرديني ولله ما اقوم وترا نعرف اشياء اكثر منكم
وسن :وش بنتناقش فيه ؟
جوانا :شوفي ذي ما تدري وين الله حاطها واعتبرينا مكانها
هيام :لو تروحون تقرون كتب اصرف لكم
جوانا :يا سبحان الله نسخه صقر بس انثى
هيام :انا !
جوانا :اي
نجد بهمس :اسحبي كلامك تكفين ولا معد تسكت علينا
هيام :انا تشبهيني بذاك الحيوان الناطق مع احترامي الكبير لكم
جوانا :اي انتِ
نجد :لا انا مو انتِ ما تقصدك قالت نجد صح؟
جوانا :لا قلت هيام
هيام :ولله حبيبتي مافيه كلمه اقولها غير اين الثرى من الثريا
جوانا :كلكم ثرى سبحان الله
ملاذ :جوانا سدي حلقك ولا اسده لك بجمره
هيام :الحين وش حارق رزك علي يالصغيره ؟
جوانا :مدري سبحان الله من اول يوم شفتك مافيه قبول
نهى :انا اول ما شفت نجد ارتحت لها كل الي بحرف النون مريحين
اشواق :متى شفتيها ؟
نهى :الحين ولا ما قابلتها قبل ولا اخذت سنابها
اشواق :ماشاء الله عليك تبغين تخليني افتش جوالك غصب
نهى :ماما !
غاده :جيت
ابتهاج :اخيرًا جيتي
غاده :اشوف فيه ناس جدد
نجد :انا نجد ،ماني جديده موجوده منذ الازل
غاده :حبيت خفة دمك
نهى :حتى انا احسها ذكرتني بغيث
نظرت هيام لنجد التي توترت :لا شدعوه
هيام بحده :لا ما تشبه له
غاده :موضوعنا مو غاده موضوعنا هادي ،للناس الجدد هادي ولد خالتي وخطيبي بنفس الوقت ،كل ما دق علي نحلل وش يقول
ضحكت نجد :الله يعينه
غاده :ترا هو يتكلم كلام مبطن عشان كذا نحلل كلامه
هيام :اكره الي يتكلمون كلام مبطن
غاده :حتى انا بس مدري ليه وافقت عليه
نرجس :حب الطفوله وكذا
نجد :الله طلع فيه صدق حب الطفوله
غاده :المهم ذي المره هو قال لي كلمه حيل حيل قويه
ملاذ :وش قال ؟
غاده :قلت له انت معد تدق علي قال اوعدك بالعوض القريب
وسن :قال اوعدك ولا ما قال لأنه تفرق
غاده :لا قال
رتيل :العوض القريب ،طيب وش الهديه
غاده :جوال هذي هي قدامك
رتيل :الورد اصفر
غاده :لأني احب هاللون
ابتهاج :ورد اصفر وجوال ،هذا يعتبرك صديقته
هيام :اجل ليه خاطبها ؟
غاده :لا مستحيل بس عشاني احب اللون
اشواق :شوفي لو كان ورد احمر ممكن نقول انه يلمح لشي بس اصفر احس كلامه عشوائي
رتيل :لا حبايبي قال اوعدك بالعوض القريب مابيوعد وهو ما يعرف وش يسوي اكيد يبي يحجز قاعه العرس واختار اللون الاصفر للورد بقصد انه يعرف ان غاده بتسوي ديكورها اصفر
ابتسمت غاده :تقولينها ؟
رتيل :اي اقولها
ملاذ :للأسف حبيبتي رتيل مو كلهم مثل ثنيان يوعد وهو يعرف وش يبي
غاده :يعني ما يقصد ؟
ملاذ :اي من قولي ما يقصد
جوانا :شوفوا احسه حمار لأنه ما تذكرك الا بعد تخرج بيومين متخيله يومين !
نجد :يا ولد الكلب المفروض اول ما تصحين الصباح بيوم التخرج يرسل لك
غاده :مشغول قاعدين ينقلون بيتهم
ابتسمت هيام :وانتِ صدقتيه ؟ حفل تخرجك كان الجمعه صح؟
غاده :اي
هيام :ما اظن فيه عمال يشتغلون صباح الجمعه ولا ؟
رتيل :اي صح
نهى :طيب يمكن نام يوم الجمعه ترا حتى انا اتعب من كل الاسبوع وانام
ملاذ :استغفر الله حتى سورة الكهف ما تقرين ؟
نهى :اذا صحيت الظهر اقراها
ملاذ :راح صباح الجمعه بجماله ،اشواق الجمعه خلي بنتك تجي عندنا اعلمها كيف اجواء الجمعه بعيد عن النوم
اشواق :معليك بجيبها
جوانا :لا خليها تنام عندنا من الليل
نهى :اي صح
ملاذ :خلاص كل خميس تنام نهى عندنا نسوي لها معسكر تدريبي على صباح الجمعه
غاده :الموضوع هنا انا الموضوع حياه او موت ،هل هادي يتجاهلني ولا صدق مشغول
هيام :ولله طفشت من هالموضوع اصبري له فتره اذا باقي على نفس الحال اكيد يتجاهلك واذا مشغول بينتهي شغله ،قلتوا بنجلس على شبة الضو وجبت معاي مارشملو ابي اشوي تبون ؟
وسن :الله اي بروح اسوي لكم عليها قهوه
نهى :خالتو وسن ابي هوت شوكلت عشان انام
اشواق :مسويه مؤدبه الحين ولا لو ماني موجوده كان شربتي قهوه صح ؟
نهى :لا ماما
ضحكت اشواق :بالعافيه حبيبي
جوانا :انا بروح اسويه
هيام :بس ما لقيت هذيك العيدان الي ندخلها فيها عندكم ؟
ملاذ :اي ببيت الشعر موجوده ،بروح اجيبها
هيام :انتِ جيبي صحن وانا بجيبها
رتيل :انا بروح انام بكره وراي سفر
غاده :توصلون بالسلامه حبيبتي
رتيل :الله يسلمك
جوانا :رتوله عاد لا اوصيك بالفلوقات فصفصي ابو لوكسمبورج تفصيص احس ودي اروح لها
رتيل :معليك ما بنقصر ان شاء الله كأنك معانا بالسفره
ذهبت هيام لبيت الشعر وبحثت عن الاعواد فلم تجدها في المقابل وجدت عدة اوراق ،ترددت لتقرأها لكنها لمحت اسم والدها عليها فغلبها الفضول واخذتها تتصفحها سريعًا .سمعت صوت باب الحمام يُفتح فتصنمت مكانها
:وش تسوين هنا ...