كُن بقربي فإن الروح هائمة

2

لمحةٌ من الماضي ...
بندر :وش بتسوي الحين ؟
عبدالعزيز :مدري احس حركه غبيه اني أعطي اختي تروح فيها الشرقيه وانا اعيش هنا وبنفس الوقت ماني قد المسؤوليه إني اربي بنت لحالي شعور داخلي غريب
ربت بندر على كتفه :تخاف
عبدالعزيز :من أيش ؟
بندر :قلت لي هيام هي الوحيده الي تذكرك بأمها ،ماودك تبعدها عنك ولا ودك ترعاها وتقصر عليها
ابتسم عبدالعزيز :فاهمني اكثر من نفسي ،مدري لأنك مجرب الابوه ولا...
قاطعه بندر بسخريه:لأني مخاوي واحد اهبل من الطفوله ربي ابتلاني فيك حتى نفسك ما تعرف تشرحها
ضحك عبدالعزيز :لا تنسى اني جبت فكره التجاره
بندر :بتذل امي عليها
تنهد عبدالعزيز :ان شاء الله تنجح لأني حرفيًا ولا ريال بجيبي
اخرج بندر من جيبه نقود دون أن يلحظ عبدالعزيز ووضعها في يده :ولا اسمع حرف خذها
حاول عبدالعزيز سحب يده :بندر يا ولد اللذين وش حركات المبزره ذي تعرفني ما احب اخذ من احد
بندر :خويك انا خذها
عبدالعزيز :ولو كنت ابوي
بندر:طيب اعتبرها دين
عبدالعزيز :ولا دين وش دراني اني حي لبكره ؟
بندر :بسامحك معليك
عبدالعزيز :بندر !
بندر :طيب اعتبرها هديه لبنتك
عبدالعزيز :ولله بزعل يا بندر وما عندي شي اخسره بنقل انا وبنتي الشرقيه ولا بتشوف وجهي
اعادها لجيبه بعد ان فقد الامل :طيب اعتبرها ربح مقدم
عبدالعزيز :ما اخذ الربح الا بوقته
بندر :متأكد ؟
عبدالعزيز :مثل اسمي
ربت على كتفه :لو تبي شي لا تتردد ولا تستحي
عبدالعزيز :ابي شي
نظر له بندر بحماس :تم وأبشر وآمر
عبدالعزيز :ابي من يأذن بأذن بنتي
بندر :وانت ...لا تقول معرف الاذان عيب عليك
عبدالعزيز :اعرف بس تجيني غصه وانا اقوله ما قدرت
بندر :خلاص بكره اجيك ان شاء الله
...
ابتهاج :ااء...بنات
جوانا :وش فيك ؟
ابتهاج :يبدو اني مسكت خط القصيم
نهى :لا مستحيل ما ابي اروح عند اعمامي
جوانا :نهى صحصحي وشو اعمامك احنا كانت نيتنا نروح المدرسه وفجأه طلعنا على خط القصيم
ابتهاج:بوقف هنا معد بتقدم اكثر
جوانا :وش نسوي
نهى :ما ابي اقابل عمي محمد بليز
ابتهاج:نهى انطمي واشربي قهوتك الخايسه خلينا نفكر حل
جوانا :لقيتها بدق على غيث
نهى :صح حبيبي غيث
نظرت لها ابتهاج وجوانا بصمت
نهى :بسم الله عليكم شفيكم ؟ انا احبه زي عمي تراه كبير عود عود وانا طفله مراهقه قاصر احب نفسي وبس
جوانا :اسكتي بس
تنحنحت :غيث
غيث :مو المفروض تكونين بالمدرسه قبل خمس دقايق؟
جوانا :الا بس ...
اخذت نهى الهاتف من يدها :غيث انت رجل المهمات الصعبه صح؟
غيث :اي
نهى :المهمات المستحيله ؟
غيث :مع خالك صقر اكيد
نهى :واهم شي حافظ الاسرار وكاتم ال...ال...عطوني مصطلح
غيث :كاتم الاخبار ؟
نهى :اي كاتم الاخبار صح ،طيب غيث حبيبي يعني عمي غيث احبك مثل عمي بس مو مثل عمي محمد يعني احبك مثل ما المفروض احب عمي
ابتهاج :نهى اخلصي علينا
نهى :خالي صقر حولك؟
غيث :لا دخل اجتماع قبل ٢٤ دقيقه واحتمال يطلع بعد ٥٣دقيقه لو سارت الصفقه بشكل رابح ولو خسرت رح يطلع بعد ٦٧ دقيقه
نهى :طيب اسمعني احنا سرقنا سياره جهاد وكنا رايحين المدرسه بس فجأه لقينا نفسنا على خط القصيم بليز انقذنا ما عندنا رخصه ولا شي
غيث :لازم خالك ص...
جوانا :لالالالالا خالي صقر مارح يدري
نهى :انفداك اخوك ماهو خالك
جوانا :الي هو بس الانسان الي اسمه صقر مارح يعرف شي ارجوك غيث ارجوك احبك حتى انا احبك مثل عمي وابتهاج تحبك مثل عمها شوف انت لو تزوجت كان عندك بنات بعمرنا ترضاها على بناتك يهاوشهم صقر المجنون ؟
غيث :عمري ٣٠ لو كنت بجيب بنات بأعماركم كان المفروض اتزوج وعمري ١٣
نهى :شفتوا قلت لكم عمره ثلاثين
ابتهاج :غيث الحين وش بتسوي؟
غيث :بشوف بس ارسلوا لي الموقع الي انتم فيه
جوانا :طيب الحين بقفل وبرسل لك
غيث :طيب
اغلقت الهاتف وارسلت له الموقع
ابتهاج :احس اني ببكي
جوانا :لا بليز ابتهاج امسكي نفسك لا تخربين الايلاينر الي جلست سنه اسويه لك امسكي نفسك
نهى :شوفي نفسك عمرك ١٧ وتبكين عيب عليك عيب
ابتهاج :ببكي
جوانا :شوفيه ارسل يقول ...
ابتهاج :وشو ؟
جوانا :ايووو راجح بيجي لنا
نهى :حرام عليكم ولله احبه راجح
جوانا :هاه نهى على بال ما يجي علمينا مين الي تحبينهم
نهى :اول شي خالي ثنيان بعدين خالي أوس هو كيوت بس بارد شوي بعدين راجح يضحكني بعدين غيث كذا احسه حنون وبعدين ...
ابتهاج :نهى خلاص تكفين سدي حلقك بأي شي
جوانا :خلاص خلونا نشغل شي وش تسمعون؟
ابتهاج :دعاء السفر
نهى :لالا شغلي المسلسل نكمل الحلقه
جوانا خلصتها
نهى :كلبه خلصتيها قبلي متى شفتيها؟
جوانا :البارح سهرت عليها
نهى :طيب عندك نت؟ افتحي لي اشوف
جوانا :طيب
بعد وقت
دق الزجاج من جهه ابتهاج ،ففزعت :ما ابي اشوف مين وراي ؟
نهى بأبتسامه:رجوحي
التفتت ابتهاج ورأته فتنهدت براحه
جوانا :افتحي النافذه
فتحت الزجاج :وش وصلكم هنا ؟
ابتهاج :مدري
نهى :حركات سكراب جديد
راجح :وش رايك بس؟
نهى :ولله حلو بس اللون لو افتح
راجح :لا راعي المحل يقول ناسبني ذا
نهى :بكم اشتريته؟
راجح :اربع ميه وخمسين كذا
نهى :ولله انه نصب عليك
جوانا :بسرعه ياخي ورانا مدارس بعدين سولفوا عن البلا شسمه ذا
راجح :اتوقع بدت الحصه الثانيه ،تقدرون تغيبون ؟
نهى:اي
ابتهاج :لا وش اي كيف نرجع البيت بعد ما يحسبونا قد عدنا ندرس ؟
جوانا :منجد
راجح :ولله انكم جيل سيء ما تحبون المخاطره ،بوديكم كوفي اليوم على حسابي والي بالمدرسه يحسبونكم بالبيت والي بالبيت يحسبونكم بالمدرسه والدنيا عال العال
نهى :الله راجح ولله انك جوي
ابتهاج :يا برودكم الحين بصير اشوف كل الرجال ابوي ولا جهاد من الخوف وانتم تبون تطلعون
ضمت جوانا حقيبتها :وانا اسوء منك اشوفهم صقر
راجح :انزلي ابتهاج انزلي
ابتهاج بذعر :وين بتنزلني هنا مقطعه
راجح :روحي ورا انا بسوق
جوانا :نهى ما ابي اجلس جنبه عادي إنت تجلسين؟
نهى :بالتأكيد انزلي بس
نزلت جوانا وابتهاج وصعدت نهى بالامام قبل أن يصعدوا هم :راجح وش رايك نسحب عليهم كذا شوي مقلب
سمعتها جوانا :عشان افلق راسك بذا الحجر
راجح :خلص روقوا خذوا نفس عميق انا مرشدكم السياحي صح ان لبسي لبس مسعف بس شوفوها من المنظور الايجابي انا اسعفتكم باللحظه الحرجه
نهى :كيف تخصص الاسعاف حلو ؟
راجح :حلو بس يبيله كرف
ابتهاج :يعني ما يناسبك
نهى :لا يناسبني وش يقول محمد عبده ؟ الصعب هّلا قلت يا صعب سهلا ،دامك تبيني فأنت يا صعب شوقي
جوانا :ولله خالد الفيصل قالها
نهى :اي هو كتبها ومحمد عبده غناها
ابتهاج :خلاص الي هو
راجح :ابتهاج مرره دس لايك ما تصلحين للطلعات خوافه بزياده ،الطلعه الجايه ما نبيك معانا
جوانا :حتى انا ما ابي معاكم
ابتهاج :لحد يلومني لحد يلومني ١٢ سنه ادرس ولا مره هربت ويوم باقي لي اخر سنه وعطبتوها علي
راجح :طيب الهرب من المدرسه ماله دخل بالمعدل ولا شي شوفيني مُسعف الحين وابوي كان يصفقني عشان نقصت بالرياضيات
البنات بنفس الوقت :النظام غير
راجح :كيف غير ،وبعدين تعالوا اشرحوا لي المسارات
نهى :سالفه طويله مالك فيها اذا تزوجت وجبت عيال وجو بيدخلون الثانوي نعلمك
راجح :الله يحينا لين ذاك الوقت
نهى :راجح ما تبي تتزوج؟
راجح :اولوياتي ذي الايام تقول لا
نهى :بالله مافيه وحده ببالك يعني تفكر فيها
راجح :لا
نهى:طيب خلاص ،تبي زواج من العائله ولا برا ؟
راجح :الي يجيبه ربي فيه خير
ابتهاج :محسسني ان الزواج ينام ويصحى ويلقى زوجته جنبه
راجح :وهو مو كذا ؟
جوانا :اوهو ،يا طوله طولاه اسأل ثنيان
راجح :عشان يحسبني بتزوج ويلزقني بجماعته
نهى :معليك انا بختار لك وحده كم تبي فارق العمر
راجح :مدري
نهى :كم عمرك ؟
راجح :٢٨
نهى :حلو ولله فيه خيارات متعدده
راجح :تبون ذا الكوفي؟
جوانا :اي شي
نهى :وي جوانا شوفي
جوانا :وشو؟
نهى :ابتهاج تعرفين ذيك احلام الي معانا؟
ابتهاج :اي وحده ؟
نهى :هذيك الطويله
ابتهاج :اي
نهى :تخيلي اليوم غايبه عشان خطبتها الحين
راجح :مين يخطب الصباح دجاج هم؟
نهى :مين يخطب بذا العمر عمرها اكثر شي ١٦
ابتهاج :اشوف
نهى :ودي اعرف خطيبها كيف عقليته
ابتهاج :يا متخلف عقلي او صغير بعمرها وغاصبينهم
جوانا :او يحبون بعض
نهى :منجد؟
جوانا :صدق فيه احتمال كذا يعني الي عمرها ١٦ ما تحب
راجح :هاه جوانا بالله عليك انتِ بنت آل محسن ممنوع تحبين ولا بتشنقك جدتي بغرفه بعدين بيطلعك صقر ويشنقك بالغرفه الثانيه وابوي بيمر وياكل قرصان ويضحك عليك بعدين عمي مساعد بيقطعك ويرميك للسمك طعم
جوانا :انا ما احب بس بكيفها هي
ابتهاج :باقي بزره احس غلط تقرر قرار كذا بذا العمر
نهى :هذا لو سمحوا لها تتزوج بذا العمر ممنوع زواج القاصرات
جوانا :عادي يجلسون خاطبين لين تصير ١٨ ويصير عادي
ابتهاج :توها صغيره على الزواج والمسؤوليه
نهى :بعدين مستقبلها ينعدم زي ماما شوفيها تزوجت وعمرها ١٧ وجابت سيف وعمرها ١٨ والحين بس قاعده بالبيت ما عندها شهاده جامعيه ولا تخصص ولا وظيفه
جوانا :وابوك يا حافظ وش يسوي راتبه ؟
نهى :لما تكونين تعتمدين على احد غيرك بكل صغيره وكبيره ذا صعب صح راجح ؟
راجح :وشو ؟
نهى :انك تعتمد على احد يصرف عليك عشان كل شي شعور مو حلو
راجح :اكيد وحتى لو كنتِ تعرفين انه مليونير رح تحسين انك عاله عليه
جوانا:ترا بس بغيت اوصل لكم الموضوع انه حريه شخصيه قمتوا فوقي
راجح :طيب اعتذر لك عنهم بس تفضلوا انزلوا
...
خرجت الى مزرعه الخيل للتتفقدها كما نوت البارحه ،كل شيء كما هو حتى مخبئها الصغير ،الذي أعاد لها تلك الذكرايات...
بندر :هيام هيام !
وجدها تختبئ في إسطبل مهره صغيره فأحتضنها بخوف :خوفتيني عليك كيف اختفيني كذا؟
هيام ببكاء صامت:ابي اجلس لحالي
ابتعد عنها وأخذ نفسًا عميقًا يستشعر به عظمة هذه الأمانه :رح اخليك بس أول شي خلينا نتكلم
هيام :عن أيش ؟
بندر :عن كل شيء
قامت:لا ابي أزور ابوي ...
قاطعها بحزن:عن أبوك
عادت وجلست بجانبه بصمت
بندر : أبوك كان يحب ذا المكان
هيام :طيب بزوره عشان أكلمه عنه
مسح عينيه واستجمع نفسه :تعرفين أني أعز صديق لأبوك صح ؟
هيام :اي
بندر :وأنه أبوك يعتبرني أخوه ؟
هيام :اي
بندر :هيام ،ابوك كان إنسان طيب والأرض ما تتحمل الطيبين عشان كذا ...أخذه الله عنده
هيام ببكاء :صرت وحيده
ضمها تحت جناحه وعيناه تدمع :ولله ما تصيرين وأنا خوي عبدالعزيز
بكت بحضنه طويلًا ثم أبتعدت عنه وقالت بصعوبه :متى مات؟
بندر :قبل ساعه
هيام ببكاء:كيف بعيش ؟
بندر :بتعيشين مثل بناتي بإذن الله ما افرق بينكم ،لكن إنتِ إن حسيتي إني قسيت عليك قولي لي لأني مسؤول عنك يوم القيامه ولا ودي إني أخيب أمل ابوك فيني ...
عادت لحاضرها مع تنهيدتها التي تُظهر مدى حزنها
:كيف دخلتي هنا ممنوع أحد يدخل ذا الاسطبل
مسحت دمعتها وقامت :مين قال ؟
:الأستاذ بندر ،كان هو بس يدخل ويجلس فيه
هيام :وش يسوي؟
:مين أنتِ أصلًا ؟
صقر :هذي هيام
نظر لها بحسره:تأخرتي
صقر :حسن روح شوف أسطبل الكحيله أظن تبي تتمشى طلعها
حسن :حاضر
خرج صقر يسير وبعده هيام مرت دقائق في مسيرهم بصمت فقالت هيام:معليش دخلت هنا ومحد يعرف
صقر :كان المفروض تبلغيني وأبلغ العمال
هيام :وش كان يسوي العم بندر هنا ؟
صقر :بالأسطبل ؟
هيام :أي
صقر :قبل يدخل المستشفى بأيام كان يجلس هنا ويبكي بالساعات محد يقاطعه وحرم على العمال والناس يدخلون ذا الاسطبل ،يقول تمحون ريحه عبدالعزيز وبنته نظرت له بحزن طويلًا ثم عادت لذات الاسطبل
لحقها صقر ودخل خلفها:هي...
قاطعته ببكاء :اكره نفسي ،أنا السبب بكل شي أنا اكبر ناكره للجميل والمعروف
ذُعر صقر لبكائها فهو لا يجيد المواساه :أصبري خليني استوعب
هيام :العم بندر رباني سنوات طويله دخلني بيته وعاملني مثل بناته ويمكن أحسن وأخرتها رحت قطعته وش كان رح يضرني لو اتصلت عليه دقيقتين ؟
جلس بجانبها وبينهم مسافه ،مسح عينيه واستجمع نفسه:اتمنى أنك ما تلومين نفسك على وفاته لأن وقتها رح أخذ نظره نهائيه عنك انك ما تعرفين بدينك شي
أنتبهت لنفس حركات والده وبلعت غصتها :لا ألوم نفسي على عذابه قبل يتوفى ،لو...
قاطعها:لو تفتح عمل الشيطان
أمسكت رأسها:استغفر الله ، بس ابي أقول إني اتمنى شوفته او حتى سعادته
صقر :ديري المزرعه بشكل كويس ورح تسعدينه
قام بعد صمت لثواني :وتحجبي
صرخت خلفه بغضب :اكرهك لو كان أوس مكانك كان يعرف يواسي
قامت وخرجت خلفه: بس أنا ما أحتاج رجل يواسيني أنا strong independent woman مستحيل أضعف قدام رجال أنا اقوى من كذا بكثير ،خاف مني ومن كرهي
صقر ببرود وهو يركب لجام الخيل :تمام
أخذت نفسًا عميقًا ونظرت للخيل :ذا حق مين ؟
صقر :حقي ،تراه strong independent horse لا تتقربين منه ولا ي...
بحركه سريعه منها أمتطت الخيل وفكت اللجام عنه وأنطلقت
صقر :أرجعي يالمجنونه بيطيحك
قامت ببعض الحركات حتى رضخ لها وهدئ :شطور شطور ...شسمه ؟
صقر :خيّال
نزلت عنه ومسحت على شعره بسخريه :لأنه يسوقك بدال ما تسوقه
صقر :هاهاها ،كلمي غيث يعلمك وقت فراغ بجدولي تذكريني أضحك
هيام :وش جابك الحين دام جدولك مزدحم
صقر :جاي أخذك للمحامي
هيام :ليش؟
صقر بغضب :نتكلم عن الورث الي انشغلنا فيها من سنتين نبي نحله معاك ونرتاح
هيام :خلاص ابي مزرعه الخيل وبديرها بالشكل الي ابغاه
صقر :بالشكل الي تبغينه بتخلين نفسك مديره بس على الورق والارباح الي تطلع تاخذينها وانتِ متكيه بميونخ
هيام :استقريت بالسعوديه
صقر :متى ؟
هيام :الحين قررت ذي اللحظه أستقر بالسعوديه وحتى بروح بيت أبوي اذا باقي موجود
صقر :براحتك انا يهمني الشغل تفضلي معاي عند المحامي
هيام :ليش مو هو يجي؟
صقر بغضب حاد :لا واضح عاجبك الوضع الجديد الناس يجيبونك ويودنك وتقولين انا strong independent woman
هيام:لأني انا كذا ما اروح عند الرجال هم يجون عندي
صقر :خلاص اعتبري المزرعه انباعت
هيام :طيب رح أجي
مرت من أمامه وحركت شعرها :ناس ما تتحمل المزح
صقر :شعرك لعد اشوفه ولا ب...
التفتت له :ولا ايش؟
صقر :بحلقه لك موس تعرفين الموس بحلق لك شعرك كذا
حركت شعرها أكثر وقالت بالالمانيه: Gut
شد على قبضته خلفها وأخذ نفسًا عميقًا :صبرٌ جميل صقر صبرٌ جميل
...
نرجس :اي جيران ؟
شروق :على اساس بتعرفينهم
نرجس :صدق زوجه عمي تعرف ناس من حيكم  بس مدري ،وين يعيشون؟
شروق :الي يمين بيتنا
نرجس :شكلهم هم
شروق :يمكن وصلها الخبر
نرجس :مدري بشوف اذا رجعت البيت
شروق :احس مو مستوعبه انكم تعيشون بنفس البيت
نرجس :اداوم الجامعه مو عشان ادرس بس عشان ابعد عن البيت وازعاجه
شروق :احنا بيتنا لطيف وهادي كله بنات
نرجس :احسدكم
ضحكت شروق بسخريه :ذا الي يشوفونه الناس بس بالواقع احنا اسوء من العيال بهوشاتنا
نرجس :على ايش تتهاوشون بالله ؟
شروق :ملابس ولا اشياء كذا بكل بيت
نرجس :احنا صار لنا سنتين اولاد عمي بندر الله يرحمه وجدتي وأمهم يتهاوشون على بنت يبغون يجيبونها بيتنا
شروق :بنت ؟
نرجس:بنت مدري شسالفتها رباها عمي بندر وكتب اسمها بالوصيه يبون يجيبونها ويعطونها نصيبها وجدتي وزوجه عمي ما يبونها تدخل البيت
شروق بضحك :وش يعني عمك بيطلع من قبره ويتزوجها ؟
نرجس :انا ادري عنهم ،احس مره مكبرين موضوعها
شروق :بس صدق الوصيه لو خالفوها حرام
نرجس:انا خليني اقنع ابوي يطلعني الخارج واقطعهم مثلها
شروق بسخريه:مستحيل يطلعك جتهم فويبا يطلعون البنات ويقطعونهم
نرجس :ولله وانا شعلي فيها هي قطعتهم انا ما بقطعهم بس باخذ استراحه محارب منهم
شروق :لو لقيوها وجت بيتكم وش بتسوين؟
نرجس :ولا شي
شروق :ما بتتعرفين عليها ولا شي؟
نرجس :عاد نشوف وقتها
شروق :يع جت الغثيثه
نرجس :مين؟
شروق :منال اهربي اهربي
نرجس :وين نهرب شافتنا خلاص
شروق:الله يعين
نرجس:بس اذا حسيت اني بصفقها بقرصك واسحبيني
شروق :بس لا تطلعين حرتك بقرصتك فيني
نرجس :معليك
شروق :نشوف
منال :السلام عليكم
نرجس :وعليكم السلام
شروق :وعليكم السلام
منال :شلونك نرجس
نرجس :تمام
منال :الحمدلله،شلون اهلك واخوانك
نرجس :تمام تمام كلو تمام حتى الملك الحمدلله تطمنت عليه الصباح تمام
منال بتصديق :ما توقعت علاقاتكم توصل لآل سعود
قرصت نرجس شروق فضحكت :مو لذي الدرجه عاد بس كذا قالتها ،نرجس اخوك برا صح؟
شدت نرجس قرصتها
منال :تدرون محد بيوصلني البيت اليوم اقدر اجي معاكم ؟
شروق وهي تحاول إخفاء الالم:لا تذكرت اخوك ما يوديك إنتِ معاك سياره
نرجس :اي ومره تعبانه مع السلامه
شروق:مع السلامه يا روحي
منال :شروق بسألك
شروق :هلا
منال :كيف تعرفين كل شي عن نرجس؟
شروق :صديقتها المقربه انا
امسكت ذراعها :كويس
شروق :معليش بس بروح الحمام
منال :بنتظرك
شروق :اوك
دخلت الحمام وامسكت يدها بألم :حسبي الله عليك يا نرجس
اتصلت عليها :سحبتي علي يالكلبه
نرجس :انا عند دانكن تعالي
شروق :ما بتروحين؟
نرجس :باقي لنا محاضره يالبقره
شروق :طيب كيف اطلع قلت لها بروح الحمام قالت بنتظرك
نرجس :فيه حل كسري الجدار واطلعي
شروق :مره يضحك ،بعدين ليش كذا متلزقه فيك بالخصوص يوم رحتي قالت لي كيف تعرفين نرجس بذا القرب
نرجس :يا الغبيه ما لاحظتي انها سألتني عن اخواني؟
شروق :الا بس قلت كذا ...
نرجس :لالا ماهو كذا ولا شي بس هي قصدها جهاد عرفت اننا شوي اغنياء وشافت جهاد يوم جابني ذاك الاسبوع وبتتلزق فيه
شروق :اها عرفت الي نظامهم كذا الله يخارجنا
نرجس :الله يخارجك انتِ أما انا قد عدت بطلب قهوه
نظرت شروق للنافذه :اسمعي نرجس اطلبي لي فلات وايت وانا جايتك الحين
نرجس:طيب
اغلقت هاتفها وصرخت :فيه احد هنا ؟
لم يرد أحد ففتحت النافذه ورمت حقيبتها ثم شمرت اكمامها :بسم الله
...
دخلت بحركه خفيفه ويداها خلف ظهرها
أوس دون أن يلتفت :وسن رجعي الفرشه الي خذتيها
ابتسمت واعادت الفرشه :حاسه الفنان
أوس :نعم أختي العزيزه الكاتبه وش جابك؟ أنقطع ألهامك وجيتي تستلهمين من لوحاتي؟
اقتربت من اللوحه التي يعمل عليها :لا يا أخي الفنان ،بس جيت بقول لك... اوه ذي اللوحه الي كنت ترسمها بالمعهد توك تكملها
توقف عن التلوين وتراجع للخلف ليتأمل تفاصيلها :لقيت الهامي فيها من جديد
وسن :الحين بفهم ليش لازم ترجع كذا بنص انكبابك بالرسم تقوم وترجع ورا انا لو اجلس اكتب بذا الاستكنان ولله ما اقوم لو أيش
تنهد أوس :شفتي لما ترجعين تقرين الي كتبتيه؟ ،نفس الشي بس اللهم الحركه نفسها كيف جايه
وسن :طيب ،قبل ما ندخل بموضوع ثاني انا جيت أقول لك امي نفسها تتمشى بمزرعه الخيل
نظر لها :ليش؟
وسن :مدري كذا قالت ودي اليوم اروح مزرعه الخيل ،ملاذ سيارتها بالورشه وصقر مشغول وثنيان بالمستشفى
أوس :تعرفين أني ما أرفض لأمي طلب بس وش رايكم تغيرون وجهتكم بعيد عن مزرعه الخيل مثلًا مثلًا مزرعه النخل
وسن :أوس أمي مره بالسنه تخرج وكلها بالحيله منا يوم هي اشتهت تطلع المكان الي تبيه بتغير وجهتها ؟
أوس :طيب بس بتصل أتصال وأرد لك خبر
وسن :طيب
أوس :ممكن تطلعين برا ؟
وسن :اتصال وممكن تطلعين برا ؟
وسن وهي خارجه :لو أني معرفك زين كان قلت أنك جايب بنت ومسكنها ببيت المزرعه
بلع ريقه من تحليلها الشبيه بالواقع وأتصل على صقر :الو
صقر :أتمنى أنك متصل لحاجه صدق
أوس :صدق الوضع طارئ وبستشيرك بشي
صقر بسخريه غاضبه :أختار اللون الاصفر ولا البرتقالي
أوس :لالا أمي تبي تطلع مزرعه الخيل ،جتني وسن تقول أنها هي قررت انها تطلع اليوم وتبي مزرعه الخيل كأنهم عارفين أن هيام فيها
صقر :ولله وش نسوي طلع أمي وجيبها المزرعه
أوس :وهيام ؟
صقر :بصرفها
أوس :طيب وشيك بيت المزرعه الي هي فيه لا يكون فيه شي يدل على وجود شخص فيه
صقر :اعرف
أوس :لو سكناها بفندق احسن
تنهد صقر:أنا اعرف وانت تعرف وكلنا نعرف أن جدتي تتابع حركه الحسابات البنكيه حقت البيت كله
أوس :معد باقي فيني عقل قفل بس
صقر :معليك ياخي ما بيلاحظون شي
أوس :ومتى نطلعها لهم مو معقوله بتشاركنا بالمزرعه بالسر
صقر :بمهد لهم الفكره بس وانت معليك خلاص انتهى دورك
أوس :طيب
أغلق الهاتف وذهب لها :قومي
هيام :نعم ؟
صقر :قومي لمي اغراضك من بيت المزرعه
هيام :يا سلام انا عرفت وحسيت ان فيك بلا
صقر :يا بنت الحلال قومي ما اطردك بس بنغير مكانك
هيام :ما ابي جاز لي ذا البيت
صقر :عشان ما يشوفونك اهلي
هيام :وش معنى ما تبونهم يشوفوني؟
صقر :بنمهد لهم الموضوع
هيام :يعني وجودي مو عاجبهم
صقر :اي
هيام :طيب
صقر :لا اشوا بديتي تعقلين
هيام بسخريه:اني أكون بعقليتك يعني اني عاقله ؟
صقر :اي
هيام :هذي قمه الجنون
صقر :قمه الجنون غبائك مسلمه وكاشفه ماشاء الله من يوم جيتي سويتي مليون نظره شرعيه على سكان السعوديه كلها
هيام :قمه الجنون انك تحسب الاسلام تدخلك بخصوصيات الناس
صقر :قمه الجنون انك تحسبين النصيحه تدخل في الخصوصيات
هيام :قمه الجنون انك تحسب الغصب نصيحه
صقر وهو ذاهب:قمه الجنون اني اتناقش معاك
هيام :لحظه
توقف صقر :نعم؟
مرت من أمامه وحركت شعرها
صقر :ياعطرك ذا !
نظرت له نظره استفهام؛شفيه؟
صقر :خايس
هيام :ذوقك الخايس
صقر :ذوقي خايس لو تزوجت وحده مثلك
هيام :اي وحده مثلي مارح تتزوج لأنها strong independent woman ما تعتمد على رجل بحياتها ،وانت مين بتقبل فيك اصلًا
صقر :الانسانه الواعيه المثقفه
هيام وهي ذاهبه :قصدك الغبيه المجنونه
...
أوس :مين باقي؟
ام ثنيان :جوانا
أوس :وينها ؟
ام ثنيان :راحت لها وسن
صعدت وسن :نايمه ما تبي
ام ثنيان :خلاص خليها
أوس :اجل توكلنا
ام ثنيان :وقف ذي مزنه طالعه بشوفها
فتح الزجاج من ناحيتها :مزنه
ام جهاد :هلا
ام ثنيان:نسيت اعلمك بروح لمزرعه تبين معاي
ام جهاد :لا ولله رايحه للعزا
ام ثنيان :عزا مين؟
ام جهاد :تعرفين عبير وخواتها؟
ام ثنيان :اي
ام جهاد :امهم توفت امس وبروح أعزيهم
ام ثنيان:الله يرحمها
تنهدت ام جهاد :اي ولله كانت طيبه
جهاد :يلا يمه
ام ثنيان :استودعتك الله
ام جهاد :مع السلامه
ام ثنيان :مشينا
ملاذ :وش رايكم نمر محلي؟
وسن :كل ما زانت الجلسه نمر محلك خلاص
أوس :متى تخلصينه؟
ملاذ :شهرين ثلاثه شهور احاول اخلصه على مهلي بدون ديون
أوس :اي ديون بعطيك انا فلوس وتخلصينه
ملاذ :أوس عيب عليك انا ابي اعتمد على نفسي لو بعتمد على فلوسكم كان قعدت بدون شغل وبالبيت اكل واشرب وخلاص ،بس انا ابي اشوف الحياه واعض الارض لين اوصل الهدف الي ببالي
وسن :واو ،الهام جديد غنيه تبي تعيش حياه الفقراء وتهرب من اهلها
ام ثنيان :فال الله ولا فالك محد بيهرب ان شاء الله
ضحك أوس :الله يهداك يمه محد بيهرب هذا خيال وسن مافيه انسان بيترك اهله وعزهم ويروح يدور حياه ثانيه
وسن :بالخيال كل شي ممكن والبشر توقع منهم اكثر من الخيال يعني ممكن تصير
التفتت ام ثنيان للخلف :ما بتهربون صح ؟
اقتربت ملاذ وقبلت خد امها :وين نهرب يمه مين يهرب من ذا الجمال
وسن بخيال:الغنيه الي تعاني من تشدد اهلها
أوس :وسن عيشي خيالك لحالك لو سمحتي محد فاضي هواجس وبعدين لو يسمعك صقر محد يفكك منه
ملاذ :صح معرف احلل شخصيات بس بحلل شخصيات صقر ،عديم شخصيه ويسوي نفسه قوي ومسيطر وهو خرطي وسبب ذي الشخصيه جدتي الي عطته اكبر من حجمه
ام ثنيان :تؤ،عيب ذا اخوك الكبير وجدتك محد مساندك بعد الله الا هم
ملاذ :انتِ سندي ما احتاجهم
وسن مستمره بالخيال :الغنيه الي اهلها متشددين الا امها وتبي تهرب بس حبها لأمها طاغي بالنهايه ...
ملاذ وهي تنظر لوسن:اللهم اني اعوذ بك من الجنون والجذام وسيء الاسقام
أوس :وصلنا
ام ثنيان :هذاك صقر ومين معاه؟
أوس :صقر ؟
ام ثنيان :اي
ارتدى نظارته ونظر جيدًا :صقر لحاله يمه
وسن :أم تهلوس ،ماذا لو استيقظت في يوم ووجدت ان كل حياتها كذبه ليست بأم ولا زوجه ...
ملاذ بحده :وسن ممكن تسكتين
وسن :طيب معليش
ملاذ بهمس :شكلك ناسيه ان أمي أصلًا تهلوس لا تجيبين الموضوع بمزح ولا غيره
أوس :صقر
ام ثنيان :ما يسمعك خلنا ننزل
أوس :لحظه بدق له بوري لا تنزلون
ملاذ :ليه شفيه؟
أوس :لحظات بس ما بيضركم شي
صقر :هلا
أوس بتلميح :وين الهوا؟
صقر :هوا؟ بكل مكان
أوس :الهوا يا صقر الهواء
صقر :اي الهوا متجه لأعماق الرياض وبيتغلغل فيها
وسن :حبيت المصطلحات الحلوه
أوس :تعرف مكانه ؟
صقر :اي اتابع الطقس انا
ملاذ:متى صرت تتابعه
صقر :هوايه جديده مالكم دخل فيها
ام ثنيان :هاه يمه أوس ننزل ؟
أوس :اي انزلوا انزلوا ،صقر خلك بكلمك
ملاذ :عن ايش؟
صقر بحده :عن الشغل
ملاذ وهي تذهب:طيب لا تصارخ ،وجع
أوس :وين وديتها ؟
صقر :مع غيث بتتمشى
أوس :واغراضها ؟
صقر :خليناها بالبيت وقفلته بالمفتاح وبقول لهم ضاع
أوس:كويس كويس ،اتمنى انهم ما بيطولون
صقر :وين جدتي ؟
أوس :مع عمتي بعرس
صقر :عرس المغرب ؟
أوس :عرس برا الرياض ،وقولك مرة عمي وين ؟
صقر :مو لازم نعرف
أوس :راحت عزا ،كلنا الثلاثه طالعين من نفس البيت وكل ناس بحياه ،ما تحس انه وقت ننفصل عن بعض؟
صقر بسخريه :ماني زوجتك عشان تنفصل
أوس :اقصد عيشتنا بنفس البيت
صقر وهو ذاهب:ولله مالي رأي بذا الموضوع جدتي هي الي تحكم
أوس :طيب
...
هيام :الحين وين رايحين؟
غيث :نتمشى
هيام :وين ؟
غيث :وين تبين؟
هيام:مدري
غيث :خلاص بنمشي كذا لين تحددين وين تبين
هيام :اسكت برد،نجد؟
نجد :سبرايز
هيام :وشو ؟
نجد :افتحي الكام يالغبيه
نظرت لهاتفها :انتِ بالمطار ؟
نجد :اي
هيام :وين طيب اي مطار ؟
نجد :مطار الرياض
هيام بسعاده:كذابه
نجد :ولله ،مقدر اعيش بدونك
هيام :جايتك الحين اشتقت لك ياخي
نجد :طلبت اوبر ...
هيام :لا انا جايتك كنسلي
نجد :طيب انتظرك
هيام:غيث ابي المطار
غيث :ممنوع تطلعين من الرياض
هيام :بروح استقبل صديقتي
غيث :طيب بكلم صقر
هيام بغضب:صقر صقر صقر خلاص مو لازم يعرف كل شي اكره ذا الانسان اكرهه
تجاهلها :الو صقر
صقر :نعم ؟ سوت شي؟
غيث :تبي المطار
صقر :لا والف لا سنتين ندور لها اخر شي بثانيه تختفي
غيث :تقول بتستقبل صديقتها
صقر :طيب بس خلك معاها
غيث :ابشر
هيام بسخريه :هاه وش يقول ولي امرنا؟
غيث :وافق
هيام :عساه بستين حريقه
غيث :استغفر الله
هيام :وانت شوي وتعبده يذلك ذل وتحبه
غيث :ما يذلني
هيام :مارح اناقشك طبيعي ما اناقشك عقلك مغسول بتفكير الحيوان الناطق
غيث :ممكن تهدين اعصابك ؟
هيام :كيف اهديها ؟ انا طول عمري ما جا احد يتأمر علي وفجأه طلع ذا يتحكم فيني بصفته مين ؟
غيث :صقر آل محسن
هيام :تشرفنا وانا هيام آل مبارك ،تدري ان صقر ما وصل لذا المكان الا بسبب ابوي ؟
غيث :ادري ادري القصه المعروفه عبدالعزيز آل مبارك كان صديق بندر آل محسن واشتغلوا مع بعض وتوفى ابوك قبل يوصلون لهدفهم وبندر آل محسن من طيبه وحبه لخويه بقي يقسم الارباح بينه وبين ابوك عشان يعطيها لبنته
بلعت غصتها :طيب
بعد وقت أنقضى بالصمت
غيث :وصلنا
هيام :طيب
نزلت ونزل خلفها :وين ؟
غيث :معاك
هيام :مو لازم
غيث :اعتبريني ظلك انا مو موجود
تنهدت :طيب
غيث :تعرفين من أي بوابه جت
هيام :اي ارسلت موقعها
غيث :كويس
دخلت المطار ومشت حتى موقع نجد الذي ارسلته :وينها ؟
غيث :لا تسأليني وانا معرفها
هيام :الو وينك يختي؟
نجد :وراك بالضبط
التفتت هيام :ما شفتك
احست بيد تلامس كتفها فألتفتت بسرعه :نجد
حضنتها نجد بشوق :اشتقت لك
هيام :وانا هِمتُ شوقًا اليك
ابتعدت نجد وهي مبتسمه :لعبه الاسماء
هيام :عاد ما عندك عذر أنك ما تقولين وانتِ الحين في نجد
نجد :طيب اصبري افكر
هيام :مثلًا تقدرين تقولين نورت نجد بنجدها الاجمل
حضنتها نجد مره اخرى :نورت نجد فينا
ابتعدت هيام وأمسكت يدها :يلا لا نتأخر
نجد :حركات اشوفك جهزتي جدول
هيام :بوديك مطعم امس رحته حلو
غيث بحرج :بخصوص مسكه يدكم
هيام بتعجب :ايش؟
غيث :الوضع مشكوك فيه بعض الشيء
هيام :ياخي انتم اغرب تفكير شفته على الارض ،ترا صديقات we're friends just friends
غيث :طيب معليش
نجد :هذا صقر ؟
بلع ريقه :لا انا غيث مدير صقر
ضحكت نجد :كيف مديره وش ذا الحوسه ؟
فك زر ثوبه الاول بتوتر :لا قصدي مدير اعماله
هيام :يلا بس امشوا لا نتأخر على حجز المطعم
نجد :يمه هيام انتِ لو درستي إرشاد سياحي احسن امس جيتي واليوم توديني مطاعم وتحجزين وتسوين
هيام :خلي الرياض تنتظرنا بنكتشفها كلها شبر شبر
نجد :قصدك نجد الاحباب
هيام :نكتشف نجد الاحباب خلصنا نجدنا الصغيره وحفظناها نروح لنجد الكبيره ما ورانا شي
تنهد غيث
نجد بهمس :اقولك ذا مدير اعماله شفيه كذا حزين ؟
هيام :معنف محد يلومه
نجد :مو تقولين انه يحبه وش صار ؟
هيام :جته لحظه ادراك ، معليك منه تراهم ناس يكرهونك بعيشتك بس قولي لي وش جابك ؟
نجد :اتصلت على ابوي وقلت له انك جيتي الرياض وانا صرت لحالي وهاوشني قال لازم تجين وما اخليك بالغربه لحالك وكنت مستأمن عليك عشان هيام عندك بس الحين لا ما تجلسين دقيقه
هيام :عيادتك ؟
نجد :اخذت اجازه
نظرت هيام لغيث طويلًا :لقيت لك شغل جديد
نجد :قلت لك اجازه مالي خلق اشتغل
هيام :اسمعيني
نجد :طيب وشو ؟
هيام :صديقتي العزيزه تقبلين تصيرين مديره اعمالي بمشوار مزرعه الخيل الي بتصير اعظم مزرعه خيل بالرياض ؟
نجد : are you crazy? of course yes
رفعت هيام يدها ويد نجد بسعاده:مشوار العظمه
...
اتصل عليها للمره الثالثه:يمه قلتي نص ساعه وش صار ؟
ام جهاد :عزموني على العشا معليش يا حبيبي اذا بترجع البيت
جهاد :طيب بس مين بيجي لك بعدين؟
ام جهاد :بشوف ابوك ولا سهيل
جهاد :سهيل ابو ١٦ سنه ؟
ام جهاد :وش فيه تراه يسوق وسياقته حلوه
جهاد :لا مافيه شي بالعكس بس لو يمسكه احد ويعطيه مخالفه على الرخصه انا مو مسؤول
ام جهاد :جهاد يا روحي ترا محد مدقق بشغله لذي الدرجه غيرك
جهاد :طيب يمه على طاري الشغل انا بتأخر مع السلامه
ام جهاد :استودعتك الله الذي عينه ما تنام
جهاد :مع السلامه
فتح اتصالًا اخر :الو خالد ،بتأخر انا شوي ...اكثر شي خمس دقايق ،اي اي طيب
اغلق هاتفه ووضعه جانبًا ثم شغل السياره ليتحرك لكنه لمح باب احد البيوت قد فُتح وخرج منه طفل صغير يبدو كأنه بالرابعه من عمره .نظر له جهاد نظره سريعه ثم رفع عينه للشارع ولمح سياره مسرعه تتجهه نحوه ،فتح باب السياره وخرج اليه يصرخ :يا ولد السياره
في نفس اللحظه خرجت شابه من المنزل يبدو انها تبحث عنه ،وهنالك شهدت مشهدًا لا تُحسد عليه تلك السياره تقترب من الطفل بسرعه كبيره ورجل يركض اليه على أمل إنقاذه،تصلبت قدميها ولم تخطو خطوه واحده لكنها صرخت وغطت وجهها بيديها ...بعد ثوانٍ أبعدت يديها ونظرت امامها بذعر :فهد
قام جهاد الذي كان يحتضن الطفل كأنه روحه ونفض الغبار عن ملابس الطفل:انت تمام ؟
صمت الطفل وكأنه لا يفهم حديث جهاد مما أثار استغرابه فحدثه بالانجليزيه لعله تربى عليها :?are you okay
وكان الصمت جواب الطفل مره أخرى
ركضت الشابه اليه وحضنته بخوف ثم أبتعدت واشارت له بلغه الاشاره :انت بخير صح ؟
هز رأسه بالايجاب فحضنته مره اخرى ودمعت عيناها
جهاد :معليش بس ...
ابتعدت عن فهد ونظرت له
جهاد :الولد ...
سهام:فهد
جهاد :فهد،فهد يتكلم بلغه الاشاره صح ؟
مسحت على خده وابتسمت :اي
اشار له جهاد بلغه الاشاره :اهلًا انا اسمي جهاد
ابتسم فهد واشار له أيضًا :انا فهد
مسح جهاد على شعره وابتسم :ماشاء الله
قامت ومسحت دموعها :مدري كيف اشكرك لو صار له شي ما الوم الا...
جهاد :الحمدلله ربي كتب وجودي بذي اللحظه ،ولو صار ما تلومين احد بالاخير هذا تقدير من الله
نظرت لوجهه :جبهتك انجرحت
مسح جبهته ونظر ليده :جرح بسيط
سهام:خلك هنا بجيب مطهر
جهاد :عادي خليه ،انا بروح متأخر على الدوام
سهام :ما بتروح لين اجيب المطهر
تركت يد فهد :وحتى خل فهد عندك لين اجي ضمانه على وجودك
ابتسم جهاد من اصرارها :بسرعه لا تأخريني
ذهبت ونظر جهاد لفهد واشار له :ثاني مره لا تطلع الشارع لحالك وتخوف امك عليك
فهد بنفس اللغه :هذي مو أمي هذي خالتي
جهاد :خلاص الي هو لا تخوف خالتك ولا اي احد يحبك عليك
فهد :انت وش تشتغل ؟
جهاد :شرطي
فهد :اتمنى اكون شرطي بس انا ما اقدر اتكلم لأني ما اسمع
جهاد :عادي تكون شرطي مميز ويعرفونك كل الناس ان شاء الله
خرجت وكانت ترتدي الحجاب عكس حالتها بالمره السابقه
نظر لها جهاد ومسح وجهه وهمس :الله يفشلك يا جهاد البنت محجبه
ذهبت اليه ومدت له قطنه بها مطهر ولصقه جروح عليها رسمات طفوليه
ابتسم جهاد بتعجب:اللصقه ؟
ابتسمت بحرج :ما لقيت الا هي من حقت فهد
جهاد :قلت لك مو لازم
سهام :عشان ما يتلوث
جهاد :طيب على الاقل وحده ذي ثنتين
سهام :عشان تبدلها
اشار فهد لخالته :خاله سهام ،الرجال شرطي بكون مثله
ابتسمت سهام واخذت فهد وهي تشير له :ان شاء الله
وضع جهاد القطنه على جبهته وسار حتى السياره ثم رماها جانبًا وصعد سيارته وتنهد :الحمدلله
نظر للاصقه وابتسم مره اخرى :اسمها سهام
نظر لهاتفه الذي كان يتصل ورد عليه :ايوه خالد
خالد :ياخوي مطول شكلك
جهاد :ولله صار حادث وابطيت
خالد :لك ؟
جهاد :لا ولد صغير طلع يلعب وبغت تصدمه سياره الحمدلله طلع منها سالم
خالد :الحمدلله اجل تعال
جهاد :الحين جاي مسافه الطريق
خالد :مع السلامه
...
هيام :الحين وين تبينا نروح ؟
نجد :نرجع البيت تعبت
هيام :نجد تبي ترجع البيت بدري مستحيل وش صار لك ؟
نظرت لغيث الذي كان يجلس على الطاوله المجاوره بصمت
هيام :غيث ممكن تروح تشغل السياره بنلحقك الحين
قام غيث :ابشري
هيام :هاه؟
نجد:امي مرضها زاد ...عشان كذا ابوي قال لي اجي
هيام :مو مستعده تقابلينها ؟
نجد :مو مستعده حتى افكر يعني ،انا لو اني مكان ابوي بقطع علاقتي فيها وش يبي فيها خلاص فوق ما انها أذته وطلقها جا زوجها الجديد ي...
اكملت بضعف :يارب
وضعت هيام يدها فوق يد نجد :مهما كان تبقى امك وأبوك أكثر انسان حريص عليك وعشان كذا ما منعك تتواصلين مع امك ،بالعكس يبي يقوي علاقتكم لأنه يعرف حاجه الانسان لأمه وما يبي يحسسك بالنقص من كل الجوانب
نجد :هيام اعرف ان ابوي مقصده طيب وانا اكثر من حافظه ابوي وتفكيره بس ما ابي اقابل اقذر انسان على وجه الارض تحت مسمى زوج امي
هيام :اجي معاك ؟
نجد :مدري احس ...
هيام :مافيها احس واشعر الموضوع بكل بساطه صديقتك العزيزه سمعت ان أمك تعبانه وتبي تزورها معاك مافيه احسن من علاقات الصديقات وأمهات صديقاتهم
ضحكت نجد بسخريه من حالهم :واحنا مختمين علاقات امهات الصديقات بكل تفاصيلها ماشاء الله علينا
تنهدت هيام بأبتسامه حزن :يمكن خيره لنا
نجد :وشو ؟
هيام :ربي ابتلانا كلنا بفقد الام بس كل وحده بشكل ،كلنا طلعنا الخارج ندرس وصدفه ربي كتب عيشنا بنفس غرفه السكن وصرنا اعز صديقات وامهات لبعضنا
حضنتها نجد :معرف وش كان رح يصير لي بدونك
ابتعدت هيام ونظرت لنجد وقالوا بنفس الوقت :تضيع نجد دون الهائمين بعشقها ويضيع الهيام لولا تراب نجدِ
دخل غيث ونظر لنجد التي كانت تمسح دموعها بأستغراب
هيام :هاه غيث؟
غيث :شسمه ...السياره من زمان شغاله
هيام :طيب الحين جايين
نجد :بس بروح الحمام
هيام بسخريه:مارح تبكين صح؟
ابتسمت نجد :لا هيام مارح ابكي معليك بس بعدل طرحتي
هيام :طيب بنتظرك هنا
دخلت للحمامات ووقفت أمام المرآه قليلًا فأنتبهت لربطه شعر يبدو انها لطفله صغيره ،تلفتت حولها ونادت :فيه احد هنا؟
لم يأتها الرد ،نظرت للربطه مره أخرى،مما أعاد لها تلك الذكرايات ...
نجد :يمه
معاذ :امك طلعت السوق وش تبين؟
نجد :لا خلاص مو مهم
معاذ :عيب عليك انا هنا عشانك وعشان امك
نجد :عندي مسأله بالرياضيات ماعرفت لها
معاذ :بساعدك انا تعالي الصاله
نجد :طيب
جلست وزوج أمها بجانبها :وش عندك ؟
نجد :ذا السؤال ما عرفت أحله
معاذ :صف كم انتِ؟
تنهدت :اول متوسط
وضع يده على ظهرها :سهل ذا الرياضيات بس يبي له تركيز
ابتعدت عنه قليلًا
معاذ :تعالي بشرح لك القاعده
بلعت ريقها ونظرت له بصمت
معاذ :نجد انا زي أبوك عادي ابوك يحضنك ويمسك ظهرك ولا يدك
نجد :ماله داعي
معاذ :عشان تتذكرين القاعده ذي متى فهمتها متى ؟ يوم معاذ شرحها لي بكل حنان
تنهدت وعادت لمكانها السابق وداخلها لم يقتنع بكلامه لكنها مجبره :شلون
وضع يده على ظهرها مره أخرى:اول شي عندك ذا السؤال مثال عليها انتِ كيف حالته ؟
نجد :مدري مع الاستاذه
ضحك وسحب ربطه شعرها فأنسدلت خصلاتها على أكتافها
التفتت ورائها لتبحث عن ربطه شعرها ظنًا منها أنها سقطت
معاذ :وش ؟
نجد :ربطتي
داعب شعرها :خليها مو لازم شعرك كذا حلو
أنزل يده لكتفها وأصبح يلمسه لمسات غريبه فقامت نجد :انت...
معاذ :وشو ؟
بلعت ريقها :لمساتك غلط هذي مو لمسات أب
معاذ :كيف تتهمين نيتي انا أعتبرك بنتي الوحيده؟
نجد :لا صدق أنا اعرف الابوه كل اسبوع وانا عند ابوي لمساتك ذي...
بلعت ريقها :تحرش
معاذ :لا لا ما اتحرش انا آسف
نجد بحده:ترا اكثر من مره تسوي كذا وتلمسني ذي اللمسات وكلمت استاذتي عنك قالت هذا تحرش
اقترب منها معاذ وقد نزع قناع اللطافه عن روحه :اي استاذه ؟ كيف تكلمتي؟
تراجعت للخلف :لا تقرب
معاذ بحده :كلمتي مين؟
دمعت عيناها بخوف :ما كلمت احد
اقترب منها حتى حصرها على الجدار وشد شعرها :اسمعيني لو أحد يعرف بذا الموضوع ما يحصل لك خير ،أمك تحبني مستحيل تصدقك وبتتهمك بالكذب وبتكرهك طول عمرها ،وأبوك ...أنسيه أبوك
سمع صوت الباب أنفتح فترك شعرها ومسح على رأسها بحنان بينما يهمس سمًا في أذنها :اسمعي الكلام
ابتعد عنها فذهبت للحمام ركضًا
ام نجد :وين نجد؟
معاذ :بالحمام شكلها
جلست بجانبه :السوق زحمه اليوم مدري وش المناسبه
معاذ :رمضان قرب أكيد بيروحون الناس ،وين الاغراض الحين ؟
ام نجد :مع السواق
خرجت نجد :يمه
رفع معاذ يده وكأنه يحك رأسه فظهرت ربطه شعرها على يده ،وكأنه يهددها بها
ام نجد :جبت لك اغراض بس خلي ابوك يجيبها
قام معاذ :وينه ابوها ؟
ابتسمت ام نجد :اقصدك
معاذ :اجل بروح اشوف
جلست وأصبحت تحك أبهامها الايسر كنايه عن توترها
ام نجد :شفيك يا يمه؟
نجد :بقول لك شي بس ...
ام نجد :وش ؟
سمعت صوت عودته وقامت :اذا نام تعالي غرفتي أبغا اكلمك بشي
ام نجد :طيب
دخلت غرفتها وأغلقت الباب بذعر
معاذ:ماشاء الله ذا كله وحاسبتي ب٢٠٠
ام نجد :شفيها نجد؟
شد على يده :وش فيها ؟
ام نجد :مدري كأنها متضايقه من شي
حك خلف رأسه بتوتر :ايه الواجب ما عرفت تحله جت عندي وانا بعد ما عرفت اذا بتشوفينه انتِ
قامت ام نجد :انا عاد باليالله اقرا واكتب
بعد ساعات وقد خلد معاذ إلى النوم ذهبت أم نجد لرؤيتها كما وعدتها :هاه يا أمي وش فيك؟
نجد :نام؟
ام نجد :مين؟
نجد :الي معاك
ام نجد :الي معاي له اسم معاذ
نجد :الي هو بس نام؟
ام نجد :اي
نجد :طيب قفلي الباب
اغلقت الباب وجلست بجانبها
نجد :يمه انتِ تصدقيني صح؟
ام نجد :صارت مشكله بالمدرسه ؟
نجد :لا بالبيت
ام نجد :بيت ابوك صح ؟ حسبي الله ...
قاطعتها نجد :هنا
ام نجد :وش صار انطقي
بكت نجد :اخاف من معاذ
تنهدت ام نجد بملل :وش يخوفك فيه ؟ اربع مدري خمس سنوات واحنا بنفس البيت لو نقول يضربك ماقد شفته ضربك بالعكس يحبك ويعتبرك مثل بنته
نجد :لالا ما يضربني بس ...
ام نجد :وش؟
نجد بتردد:يلمسني ...يعني يتحرش فيني
ام نجد بدفاعيه :وش ذا الكلام الفاضي انا ما اذكر اني معلمتك التحرش ولا تدرين وش هو اصلًا
نجد :الا اعرفه
ام نجد :هذي وساوس من ابوك معاذ ما يسوي شي كذا
نجد :لالا ابوي ما اكلمه عن ذي الاشياء ما يحب اجيب طاري معاذ اصلًا
ام نجد :شفتي اثبتي بنفسك انه من كلامه ،من اليوم ورايح روحه عند ابوك مافيه عشان تعرفين تفترين على زوجي
نجد :اذا هو زوجك انا بنتك
ام نجد :واذا انتِ بنتي أنا أمك والمفروض ما تتهميني اني ما أعرف اختيار الزوج
نجد بغصه :طيب
قامت واغلقت الانوار :الحين انخمدي لو رجعت وانتِ صاحيه بخليك تنامين بطريقتي
خرجت واغلقت الباب فأنهارت نجد باكيه ،هبت رياح الوحدة البارده على روحي بشده ،أمي ! أمي التي كُنت أطمئن بملامحها ،لم أكن أعلم أن وجهها سيصبح جارحًا لهذه الدرجه ،كنت أظنها ستكون ضمادًا لي فأتضح أنها ليست الا ملحًا على الجرح .
في صباح اليوم التالي استيقظت من النوم (هذا إن نامت اصلًا ) على صوت ضحكات عاليه خرجت دون أن تنظر اليهم ودخلت الحمام المجاور لغرفتها توضئت وعادت لتصلي الفجر،ثم تجهزت وخرجت
ام نجد :تعالي افطري
أخذت فطيره من الصحن :وش ذا ؟
ام نجد :معاذ مسويها
ضحك معاذ :صح محروق شوي بس عادي أول تجربه
أعادتها للصحن وارتدت عباءتها ما ابي
ام نجد :مارح تاكلين شي؟
نجد :متأخره ،بفطر بالمدرسه
معاذ :طيب تعالي خذي مصروف
نجد :ما ابي
ام نجد :كيف ما تبين وش بتفطرين ؟
نجد :اخذت من فلوسك
نظرت لمعاذ :على الاقل متأكده انها فلوس حلال
ابتسم معاذ :وفلوسي حلال أستاذ انا
نجد بسخريه:صدق ؟
ام نجد :اطلعي بسرعه اسمعي الباص جا
خرجت من البيت الذي صارت تعتبره أكثر الاماكن أختناقًا ،يختنق ذلك المنزل بالكذب والخداع وأقذر الافكار على وجه الارض .
عاشت ساعات الدوام وهي تتمنى أنها لا تنتهي ،ليس لحبها للدراسه ولكنها تخاف العوده للمنزل ،دق جرس انتهاء الحصه الاخيره فجمعت أغراضها ببطء وكأنها تحاول استعمال الوقت في صفها
المعلمه :بسرعه يا نجد
نجد :طيب
خرجت للساحه وسمعت صوت والدها يناديها :نجد مناف
ابتسمت من صوته وخرجت سريعًا ،رفعت يدها وصرخت:يبه
شعرت بيد تسحبها فألتفتت :يمه !
ام نجد :قلت لك مارح تشوفينه خلاص تحملي عواقب كذبك
نجد :ولله ما كنت اكذ...
ام نجد بحده :ولا صوت امشي قدامي ...
فُتح الباب فرجعت لحاضرها :فيه احد بالحمام؟
ابتعدت عن الطريق وبلعت غصتها:لا تفضلي
دخلت هيام وهي تمسح دموعها :نجد ...تبكين
نجد :لا
هيام :كذابه انا بموت من كذبك الغبي ذا
حضنتها وبكت :اخاف منه
هيام :انا بكون معاك مارح اسمح له حتى يشوفك
ابتعدت نجد عنها :انتبهي لنفسك تمام؟
هيام :نجد تعرفيني انتِ محد يقدر يسوي لي ولك شي الحين اغسلي وجهك وخلينا نطلع لا تبينين لغيث ولا لأي احد انك ضعيفه لأنهم مو موثوقين بذي المواضيع
تنهدت نجد :طيب
غسلت وجهها :معاك مناديل؟
فتحت حقيبتها :اي هاك
جففت وجهها:يلا
هيام :كحلك سال
مسحته بيدها :راح ؟
هيام :لا
نجد :المشكله الحمام غريب مافيه مرايا
هيام :تعالي بمسحه انا
اقتربت نجد فمسحت هيام تحت عينيها
خرجت الفتاة من الحمام ونظرت لهم بأستغراب
ابتعدت هيام عن المغسله وسحبت نجد :تفضلي
:شكرًا
غسلت يديها وخرجت فضحكت نجد:شكل غيث صادق وضعنا مشكوك فيه
ابتسمت هيام :الموقف ذا ممكن بس اننا نمسك يد بعض ونحضن بعض لا
نجد :هيام مدري وش كنت بسوي لو ...
هيام :خلاص خلاص مدري شفيك من يوم جينا السعوديه وانتِ حساسه
نجد:ذكرايات
هيام ذكرايات يعني شي انتهى الحمدلله
...
جوانا :وين كنتم ؟
ملاذ :بمزرعه الخيل
جوانا :خير تروحون وما تقولون لي؟هذا وانا اكثر وحده تحب المزرعه
وسن :صحيتك ما صحيتي
جوانا :كذابه اذا صحيتوني اصحى دايم ولا مره ما حسيت
ام ثنيان :كنتِ نايمه يأمك وما بغينا نصحيك بغيناك ترتاحين من الدوام
جوانا:طيب عادي اروح الحين ؟
ام ثنيان :لا
جوانا :ماما تكفين اول مره جدتي ما تكون هنا خليني اخذ حريتي شوي
ام ثنيان :ومين بيوديك ؟ أوس راح بينام وصقر بمكتبه ما يطلع ذا الوقت
جوانا :سيف
ام ثنيان :يا سيف ذا اشتغليه اكثر من اهله خليه مسكين
جوانا :خالته انا الي يسويه فيني من الاحسان للأقارب
ضحكت ام ثنيان :طيب خلاص
جوانا :عادي اخذ...
اكملت جملتها :ابتهاج ونهى
جوانا :اي
ام ثنيان :اذا اهلهم سمحوا عادي
جوانا :ولله البيت فله لما تكونين انتِ الأمره الناهيه يارب كذا دايم
ام ثنيان :استغفر الله تتفاولين على جدتك
ضحكت جوانا :يمه بسم الله ما تفاولت عليها انتِ تفكريك كذا صح ؟
ام ثنيان :كيف؟
جوانا :تبين جدتي تقضي اجلها ويخلى لك البيت
ام ثنيان :تؤ استغفر الله استغفر الله العظيم واتوب اليه روحي عن وجهي بس قبل ما اغير رأيي
قامت جوانا وهي تضحك :طيب
ام ثنيان :لعد اشوفك تقولين كذا
جوانا :ابشري يا سيده البيت
ام ثنيان بحده :جوانا !
جوانا :طيب طيب
صعدت للأعلى ودقت جناح عمها ففتح سهيل :نعم؟
جوانا :كل زق وابعد ابي اختك
سهيل :بنت بندر شايفه نفسها على ولا شي
جوانا:يكفيني اني بنت بندر
نظرت لعمها الذي كان يجلس خلف سهيل وقالت بسخريه :مو بنت مساعد الاصلع
ابو جهاد :اجل ما تدرين ان مساعد الاصلع يسواك ويسوى البزر الي معاك
سهيل :للمعلوميه انا ولدك وولدك الصغير بعد اخر العنقود
ابو جهاد :تعالي يا قاطعه الرحم سلمي
جوانا :احب صلعتك؟ مستحيل
ضحك ابو جهاد وقام وحضنها :شلونك
خرجت ابتهاج :خير بابا وش ذي الخيانات انا بنتك تسوي فيني كذا وتحضن جوانا من وراي
فتح حضنه لها :تعالي
ابتهاج :ما بجي
جوانا :مسويه راعيه كبرياء
ابتهاج :مو كبرياء لأنك دبه ما بيكفينا حضن واحد
نرجس :يبه فيه حكمه تقول اذا تهاوشوا عليك جوانا وابتهاج الي ما يتهاوشون على احد وقتها اعرف انك افضل انسان بالعالم
ابو جهاد بثقه :اعرف من زمان ما احتاج مراهقتين يثبتون لي ذا الشي
ابتهاج :تدري ليش قالت كذا ؟
ابو جهاد :تبي فلوس
نرجس :اخ يالقهر كشفتوا خطتي
جوانا :اسمعوني بما انكم هنا ابي اخذ ابتهاج ونروح مزرعه الخيل
ابو جهاد :اخوك سمح ؟
جوانا :اخوي يشتغل الحين بس بنروح شوي شوي ونرجع
ابو جهاد :ومين بيوديكم ؟
جوانا بسخريه :ابتهاج
ابتهاج بتوتر :ايش ؟ انا ؟ انا معرف اشغل السياره ولا اعرف امسك خط القصيم بالغلط
جوانا :امزح سيف بيودينا ماني خالته عالفاضي
ابو جهاد :تبين تروحين؟
ابتهاج :وش رايك انت
نرجس بسخريه :ابتهاج بابا ترا مو زواج هو عشان تقولين كذا
ابتهاج بأنفعال :بسم الله علي من الزواج
ابو جهاد :خلاص روحوا وخذوا نرجس معاكم
جوانا :لا ما اتفقنا كذا عمو الاصلع
ابو جهاد :نرجس تبين تروحين؟
نرجس :اكيد بروح عشان اضمن انهم ما بيسوون مصيبه وين مفتاحي بس
ابو جهاد :لا سيارتك لا بيوديكم سيف وانا بتصل عليه كل شوي اتطمن
نرجس :خلاص اجل ما بروح خير ولد بنت عمي البزر هو الي يوديني وانا قريبًا بصير أمرأه مستقله ؟
ابو جهاد :تراه اكبر منك
نرجس :ادري بس...
جوانا :بسرعه قرري
نرجس :ما ابي
ابو جهاد :خلاص روحوا
ابتهاج :اصبري خليني اجيب عبايتي
جوانا :انا تحت
ابتهاج :طيب
...
نهى :ماما
اشواق :هلا
نهى :ابي اغراض للمدرسه
اشواق :ما قلتي لأبوك قبل يطلع
نهى :ومتى بيرجع ؟
اشواق :عنده شغل الليله ما بيرجع شوفي سيف اذا بيجيب لك
عقدت نهى حاجبيها ففهمت اشواق أن بداخلها حديثًا :هاه؟
جلست نهى بجانب امها :لا تفهميني غلط بس ... بابا أمس اخذ منك فلوس واليوم يسهر برا البيت أحس الوضع غلط
بلعت اشواق ريقها :لا ماهو غلط ولا شي مصور لي بالدوام الحين
قامت نهى :خلاص خلاص ما قلت شي براحتكم أهم شي خليه يصور لك كل شوي
اشواق بحده :نهى ! تراه ماهو فاضي لذي الاشياء
نهى :طيب ،وش العشا ؟
اشواق :سويت سندوتشات كودو لأبوك ونسيها اذا تبينها
نهى:ابوي ينسى سندوتشات كودو والوضع طبيعي عنده مستحيله ذي
اشواق :خففي متابعه مسلسلات واستبدليها بالكتب توك مراهقه وكل شيء يأثر بتفكيرك
سيف:نهى البسي عبايتك وتعالي
نهى :بسم الله لا تاخذني للبر وتقتلني
سيف :مين قال كذا صديقاتك يبغون مزرعه الخيل وانا بوديكم
نهى :اروح ماما ؟
اشواق :روحي خليني اخذ نفس شوي
نهى :صح ،صح خذي نفس وسوي لنفسك جلسه استرخاء اهتمي بنفسك وحطي ماسكات وانسي كل شي قلته عيشي اليوم كأنه يومك بس مافيه أي احد انتِ عايشه عشانه غير نفسك
قبلت خدها :حبيبتي ماما
سيف :تبين شي نجيبه واحنا راجعين ؟
اشواق :لا سلامتكم
سيف :الله يسلمك
خرجت نهى مع سيف:وناسه وناسه مراهقتي صارت مغامرات
امسكها سيف من ذراعها :وش قصدك ؟
نهى :ولا شي
سيف :لا مو لا شي وش المغامرات الكثيره ذي؟
نهى :مالك دخل عندي خصوصيات
سيف :صارت مشكله بالمدرسه وانتِ معطيه المديره رقم محل بخاري بدال رقم ابوي ورقم البقاله بدال رقم امي ؟
نهى :لالا مو بالمدرسه انا مسالمه
سيف :اجل ؟
نهى :سيف وش ذا التحقيق
سيف :اشم ريحه شي بيودينا مصايب
نهى :قصدي الصباح يوم ابتهاج اخذت سياره اخوها بس
سيف :لا مو ذا قصدك ما كنتِ فرحانه كذا يوم اخذتها
نهى :طيب بقول لك بس اترك يدي كسرتها
سيف :يلا تكلمي
نهى :الصباح ...
سيف :ايوه
نهى :مسكنا ...
سيف :وش مسكتم ؟تكلمي بسرعه مو بالقطاره
نهى بسرعه:مسكنا خط القصيم بالغلط
سيف :تكلمي بشويش ما فهمت
نهى :وش رايك اجيب لك رموت تضبط سرعه كلامي زي ما تبي؟
سيف :تكلمي بشكل طبيعي لا تمطين الحروف ولا تبلعينها
نهى :طيب بس لا تعصب
سيف :وشو ؟
نهى :مسكنا خط القصيم بالغلط
سيف :ماشاء الله
نهى :سيف !
سيف :طيب طيب بس وشلون رجعتوا للمدرسه ؟
نهى :ما رجعنا
سيف :كملتوا للقصيم
نهى :لا ،كلمنا غيث وهو كلم راجح وجا لنا
صفق سيف بغضب :برافو صدق برافو ما كلمتوا الا غيث الي هو بس صديق العائله ولا هو محرم لكم وبعدين ما جا لكم الا راجح الي هو ولد عم امك لا اكثر ولا هو محرم لك ولا لجوانا ولا ابتهاج ووين وداكم بعدين ؟
نهى :وانت الحين مو محرم لأبتهاج ليه تطلع معانا ؟ولا لأنك تحبها انت عادي واحنا لا تفرقه هذي
سيف :الوضع يختلف انا محرمك ومحرم جوانا وعلى كذا انتم تعتبرون محرم لأبتهاج ،بس راجح ماهو محرم لوحده فيكم وبعدين انا لو اختلي بأبتهاج قولي تفرقه بس كذا مافيه اختلاء ،الحين جاوبي على سؤالي وين وداكم ؟
نهى :رحنا جلسنا بكوفي لين الساعه عشره ورجعنا البيت ما سوينا شي غلط واعتبر اننا طلعنا مع اوبر او مع السواق
سيف :اوبر ولا السواق يجلس معاكم بالكوفي ؟
نهى :لا بس ... تراه كبير يعني كبر اباءنا
سيف بحده :نهى انا بتجنن من تفكيركم ولو كان شايب كبر جدك الي توفى لا توثقين فيه من الاخر الرجال لا توثقين فيهم الرجال ماهم ثقه وش دراك ان غيث نيته طيبه فيكم وراجح بعد نيته طيبه ؟ لو فرضًا جا واخذكم للبر وسوا فيكم الي يبي وذبحكم ورماكم وش نسوي احنا واحنا نحسبكم بالمدرسه ؟
نهى بنفس الحده:سيف حرام عليك ترا امه متوفيه
سيف وهو يحرك السياره:واذا متوفيه ؟ يعني الي امه متوفيه مافيه احتمال يكون تفكيره وصخ ؟
نظرت للنافذه بحزن
سكت لدقائق ثم قال :كان دقيتي علي اقل شي ما كان عندي دوام
نهى بغصه :ما كان عندي رصيد
سيف :عطيني جوالك
نهى :وش تبي فيه ؟
سيف :عطيني وبس
اعطته الهاتف
سيف :كم رمزه ؟
نهى :هاتي انا بفتحه
فتحته ثم اعادته اليه :بتفتشه؟
سيف :بشحن لك رصيد عشان ثاني مره لو تكرر ذا الشي وانا اتمنى انه ما يتكرر اول اسم يجي ببالك سيف ،ماني اخوك عالفاضي
نهى :طيب
سيف :لا تزعلين
نهى :كيف ما ازعل وانت صرخت علي وشكيت فيني؟
سيف :صرخت عليك لأني خفت عليك بس الشك ما شكيت فيك قلت لك اشك بالرجال
نهى :طيب
سيف :تبين قهوه ؟
نهى :لا
سيف :شاهي
نهى :لا
اوقف السياره في مواقف المقهى :طيب
نهى :تعال ما ابي شي
تجاهلها ونزل
نهى :حيوان ...بس احبه
عاد بعد قليل ومعه اربعه اكواب ...امسكيها بحضنك لا تنكب
نهى :وش ذي ؟
سيف:هوت شوكلت وقهوه
نهى :اكيد القهوه لي
ضرب يدها :لا لي إنت هوت شوكلت
نهى :سيف !
سيف :ترا مالك حق تتكلمين بس لأني رحيم فيك شريت لك هوت شوكلت
نهى :طيب والباقيه ؟
سيف :لصديقاتك
نهى بسخريه :كان ما شريت لهم بالاخير منت محرمهم
سيف :نهى ! قلت لك مالك حق تتكلمين انتِ قلتِ شيء اكبر من الكلام العادي
نهى :طيب خلاص
سيف :وصلنا ،دقي عليهم
نهى :طيب ،وين رقم ابتهاج الي اخره **
غطى سيف اذنيه :استغفر الله
ابتسمت نهى :يا حبيبي المؤمن انت
سيف :نهى دقيقتين اذا ما دقيتي وطلعوا ارجع فيك البيت وتزعل جوانا محد يتحمل زعلها الا انتِ
نهى :طيب طيب ،الو احنا برا اطلعوا اسرع شي
...
غيث :ترا يمدينا نرجع المزرعه خلاص
هيام :اي خلاص نرجع
نجد :وش فيها المزرعه ؟
هيام :نسيت اقول لك اهلهم قرروا يطلعون المزرعه اليوم وهم ما يبونهم يشوفوني عشان كذا طلعت
نجد :سلامات!
هيام:قصه طويله بس مالي خلقها خليها بعدين
نجد :قوليها على بال ما نوصل
هيام بتعب :نجد ولله مالي خلق تعبت من كل شي الجو غريب والناس غريبين والحياه بكبرها غريبه
نجد برجاء:هيام
هيام بسخريه :اكيد مدير اعمال صقر يعرف ،ولا يا غيث ؟
غيث :وش ؟
هيام :سالفه المزرعه ،قولها لنجد
غيث :صقر وأوس و...ااء ...وثنيان كانوا اء ...يبون شسمه ...يبون يجيبون بنت اسمها...اسمها
هيام :شفيك كأنك متوتر ؟
غيث :اي صليت الوتر
ضحكت نجد :الله يتقبل
غيث :من الفايزين
تنهدت هيام :غيث وقف على جنب وخذلك نفس شوي مدري وش تغير بتركيبك
نجد :يمه بس لا يدخل فينا يسار على الناس ويوقف بنص الشارع
هيام :تعرف اليمين ؟
غيث :اعرف اعرف
هيام :خلاص وقف يمين
غيث :طيب
اوقف السياره ونزل يدخن سجارته
هيام بسخريه :هاه دكتورتنا وش رايك بحالته ؟
نجد :انا دكتوره عيون مو نفسيه
هيام مستمره:بس يقول لك اذا العيون تحدثت بلغاتها وقالت مقالًا لم يقله خطيب ،اكيد عيونه تقول شي
نظرت لوجهه :ما نقول شي اذا فيها انحراف حياه عيادتي اسوي له عمليه
ضحكت هيام :اخذتي الموضوع بجديه ترا امزح
نجد وهي لا تزال تنظر له :هاه ؟
هيام :الو وينك ؟
التفتت لها نجد :يدخن
هيام :يدخن رئته الي بتحرق مو احنا
نجد :كيف بشرته كذا صحيه وهو يدخن
هيام :بشرته ؟
نجد :اي شوفي كيف ولا حبه فيها ولا هالات
نظرت له هيام ايضًا :اي ولله اول مره الاحظ
نجد :احس ودي اسأله عن السر بس الموضوع غريب تفتحينه مع رجال
هيام :يا الله الجنه وصفاء بشرته
نجد :ماشاء الله بس
صعد السياره :نمشي؟
هيام :اي خلاص
نجد :ابي اروح بيت ابوي
هيام بسخريه :وش غلطت عليك فيه؟
نجد :بسم الله عليك من ثقاله الدم
هيام :اتوقع من الجو الغريب
غيث :طيب وين بيت ...بيت ...بيت
هيام :لالالا لا تجيك الحاله بيت نجد اسمها نجد
غيث :اي وينه بيتها؟
نجد :عندي الموقع بس...
غيث :ارسليه
شهقت هيام :قليل ادب يرقمك
غيث بتوتر :لالا ما ارقم
هيام :اجل كيف ترسله
غيث :بالغلط قلت
تنهدت نجد:خلاص بس ،ابوي طلع بالخرج اليوم
هيام :يعني بتنامين عندي؟
نجد :اي يقول لي لا تفارقين هيام
هيام :يخاف عليك
نجد :انا ما ينخاف علي
قرصت هيام خدها :وقلبوس انا الشجاع وقلبوس
ابعدت يدها بغضب :هيام ز...زهره الربيع
ضحكت هيام :ابو التصريفه ذي
همست نجد بحرج :احس عيب اقول كذا قدام الناس يعني اول كانوا ما يفهمون كلهم اجانب بس هنا ...
هيام :غيث كم تقيم نفسك بالسب ؟
غيث :صفر
هيام :كذاب مستحيله ذي
غيث :انا يالله اتكلم
نجد بهمس :شكل سر بشرته انه ما يسب
ضحكت هيام :شكله ،كم باقي ونوصل ؟
غيث :ست دقايق
...
سيف :اخيرًا تجمعتوا عندي اخيرًا
جوانا بسخريه :هاه يا روح خالتك وش فيك
سيف :بحاسبكم
جوانا :كم تبي؟
نهى :حساب عسير جوجو
ابتهاج :على وشو ؟
سيف :كم اعماركم بالله ؟
نهى :١٦ و١٧
سيف :نهى انتِ اسكتي ابغى الجواب من خالتك المراهقه العزيزه
نهى :طيب
جوانا :سيف اخلص
سيف :طيب دامكم تبونها كذا لا تزعلون
جوانا :كيف
نهى :الله يرحمنا
اخذ نفسًا عميقًا واستجمع كلامه ثم قال بهدوء:كيف تطلعون مع ولد عمكم الي مو محرم لكم
ابتهاج :متى ؟
سيف :لا تسوون نفسكم مجانين
نهى :عرف عن الي صار الصبح
جوانا :وي ترا زي لما نطلع مع اوبر
نهى :قلت له بس ...
سيف :لا مو نفسه اوبر مراقب من الشركه بس ذاك الي تسمينه ولد عمك ما تدرين وش نيته
جوانا :شهدت على شي منه ؟
سيف :لا بس ...
قاطعته جوانا :خلاص ما عندك دليل على سوء نيته ظن فيه خير
سيف :والنعم فيه والنعم اظن فيه خير بس انتم محد يظن فيكم خير
ابتهاج :استغفر الله العظيم واتوب اليه
جوانا بحده :كيف ما تظن فينا خير ،ترا مهما كبرت ولو كان عمرك خمسين وانا خمسه انا خالتك احترمني غصبًا عنك
سيف :جوانا لا تغيرين الموضوع اسلوبك بالدفاع غبي وكلنا نعرفه
نهى :جوانا الله يهديك ما تدرين انه طالب قانون
جوانا :ما فهمت قصدك ياخي وش غلطنا فيه ؟
سيف :وش غلطتوا ؟ سرقتوا سياره جهاد هذا واحد ،لو كان فيها ممنوعات ولا شي ومسكتكم نقطه ما نطلعكم الا من رعايه الاحداث
انفجرت ابتهاج بحده :ما اسمح لك تتبلى على اخوي انت مريض نفسي وعندك جنون عظمه وشك ماله داعي اتمنى تتعالج منه وبعدين تناقش الناس وتحاسبهم
سيف بحده اكبر منها :ما اتبلى احط احتمالات
ابتهاج :والي يحط احتمالات وش اسمه ؟ تبلي وافتراء المفروض احتمالاتك ذي تكون ايجابيه ما علموك التمس لأخيك المسلم سبعين عذرًا ؟
سيف :لا تعلمت بس الحرص واجب انا حريص على اختي وخالتي المراهقات وبنت عمهم الي تتبعهم
ابتهاج :انا اتبعهم ؟ يعني انا بدون شخصيه ،للمعلوميه انا صاحبه الفكره
سيف :الحمدلله اعترفتي اكبرهم اصغرهم عقلًا ...
اقتربت جوانا من نهى التي تجلس بالامام وهم مستمرون في شجارهم وهمست :اشبهم كذا كأنهم متزوجين من عشر سنوات
ضحكت نهى بهدوء :صدق ولا كأننا موجودين
جوانا :امسكي اخوك بس لا يطلع منه الرجل القيور ويخربط الحياه
نهى :كيف يخربطها
جوانا بتقليد لأسلوب سيف الذي تتوقعه :اخاف عليهم لأني أحبهم
قلدت نهى اسلوب ابتهاج :وانا طيب وش دخلني ولا مبدأك الشر يعم مثل تعميماتك وتوقعاتك الجاهله ؟
جوانا مستمره في التقليد :لا ما اعمم انا
نهى :اجل وش قصدك بذا الكلام لي مختارني معاهم ؟
جوانا :مالك دخل
نهى :ليه ؟ واضح انك كذاب
جوانا :خلاص قلت لك مالك دخل
نهى :لا ما بيخلص الموضوع لين اعرف
صرخت جوانا :لأني احبك ،ارتحتي ؟
توقف شجار سيف وابتهاج من صراخ جوانا فضحكت نهى بصوت عالي
سيف :شفيه ؟
جوانا :هاه ؟
سيف :وش القرف الي تقولينه ؟
نهى :نقلد مشهد بالمسلسل
سيف :اي ذا الي خرب عقولكم المسلسلات ،تحسبون الوحده لازم تحب وهي بزره
جوانا :سيف وش دخل ؟ شفيك كذا جاك متحور صقر
نهى :محتور بابا
جوانا :مكس متحور صقر وسعيد
سيف :لانكم تسوون اشياء غريبه وغلط بداعي الفله والمراهقه
جوانا :طيب تخطينا وش دخل موضوع الحب براجح ترا محد يحبه الا اختك
نظر لنهى بصمت
ابتسمت نهى بغباء :طالع بالطريق لا نموت
سيف :نهى !
نهى :هلا
سيف :مين سمح لك تحبينه ؟
نهى :ما احبه احبه زي ما احب غيث يعني احبهم زي اعمامي
ابتهاج :انت تفكيرك وصخ وتحسب كل الناس تفكيرهم زيك
سيف :وانتِ اساس المشاكل كلها لولاك ذولي الثنتين ما يعرفون الحياه وقاعدين ببيوتهم ما يسوون ذي المصايب
جوانا :طيب خلاص سيف طلعنا ورجعنا ما ذبحنا راجح ولا شي وبعدين تراه ولد عمي ،عمي هو الي رباه ورباه ببيتنا بعد
سيف :ونعم بالتربيه وكلنا اهلنا يربون زين الحمدلله بس فيه شي اسمه اصدقاء سوء يجون بيومين يخربون ابو تربيه اهلك الي لها سنين
ابتهاج :اذا كنت عديم شخصيه وشكاك وقتها يخربون
سيف :اذا كنت جاهل وقتها يخربون
ابتهاج :ما اتحمل ذي السياره وقفوا على جنب وبنزل
سيف :عشان تدورين لك واحد تركبين معاه ؟ لا جبتك من اهلك وارجعك لأهلك
ابتهاج :ياي سيف راعي المسؤوليات الواعي المثقف ،كل الناس غلطانين وكلهم صايعين وكلهم يعيشون مراهقه متأخره الا سيف الله يزوجني واحد مثله يارب ،هذا اذا فيه غيره طبعًا
سيف :الله لا يزوجكم ناس مثلي ولا يزوجني اياكم لأني تعبت تعبت منكم
صرخت ابتهاج :ما بتزوج ! ما بتزوج كذا قلتها بس على سبيل المبالغه بس انت فيك شوفه نفس مقرفه ،مانك مسؤول عني
سيف :مسؤول عن نهى وعن خالتي الصغيره
ابتهاج :وانا شدخلني تاخذني معاهم وتهزئ وانتِ اساس المشاكل
سيف :انتِ جيتي مو انا سحبتك بالغصب
ابتهاج :عرفت نوعك انت الي يقول لزوجته احذفي صديقاتك تراهم خراب بيوت يع
جوانا :خلاص ،وربي خلاص الواحد يندم انه قرر يطلع معاكم
اوقف سيف السياره بغضب :وصلنا انزلوا
ابتهاج :نهى قولي لأخوك يرجع البيت بيجي ياخذنا ابوي ما اتحمل اطلع معاه مره ثانيه
سيف :نهى قولي لصديقتك اني قاعد على قلبها
ابتهاج :قولي له ...
نهى :ما بقول شي بروح اشوف الخيل وبس وانتم تهاوشوا لين تموتون ان شاء الله
نزلت نهى وضربت بالباب
سيف :الباب يانهى !
نهى :الله ياخذ نهى وترتاح
جوانا :وياخذ جوانا
نزلت ابتهاج خلفها وضربت بالباب ايضًا فلم يقل سيف اي شيء
ابتهاج :انا بروح الحمام بغسل وجهي والحقكم صدعت
نهى :استغفر الله ياربي وش ذا الهوشه الغبيه وصلوها لموضوع ثاني غير الي كانوا يتناقشون فيه
جوانا :عصافير الحب كذا ينقرون بروس بعض وبعدين يعالجون بعض
نهى :لا سيف شكله صدق قصده اعجاب بعد ذي العصبيه مستحيل انه يحبها
جوانا :حبيبتي بنت اختي الغبيه ،كل ما عصب الرجال عليك وغار يعني يحبك اكثر
ضحكت نهى بسخريه :هذا اسمه تملك مو حب اساسًا مافيه حب بذا الزمن كله كذب بكذب بس المسلسلات والروايات
جوانا :لا ولله ...يمه !
نهى :وشو ؟
جوانا :شفت ذاك الباب يتحرك
نهى :يمكن ابتهاج
جوانا :نهى يا بقره مفتاح ذا البيت مع صقر وصقر ما يطلع من البيت من بعد الساعه ١٠
نهى :يمكن العمال ينظفونه انتِ مره خوافه
جوانا :مو خوافه خلينا نشوفه
ابتهاج :اي بعد ما اكلتم كل ذاك التهزيء بتروحون تغامرون
نهى :معليش بهجتي اكيد عنده ضغوط
ابتهاج :اسمي ابتهاج لعد تقولين بهجتي
نهى :لا صدق انتِ بهجتي اذا شفتك افرح
جوانا :امشوا ابي اشوف من بالبيت
سيف من خلفها :لا
امسكت ابتهاج يدها :امشي ما عليك منه
فتحت جوانا الباب :مفتوح
سيف :يمكن فيه احد خلونا نرجع لا يصير شي
ابتهاج :انت خواف بزياده
سيف :براحتكم بس انا هنا لو صار شي نادوني
جوانا :بسم الله
نهى :وش صار !
جوانا :اسمي ياخي
اسقطت ابتهاج علبه الماء ونزلت لتأخذها فلامست يدها الارض :الارض بارده كأن المكيف كان شغال هنا
نهى بسخريه :اكيد بارده بعز الشتا احنا
ابتهاج :لا بروده مكيف اعرف انا
جوانا وهي تسير لأحد الغرف:ياخي ليه ماخذين وضع المحققين بزياده ،كل الي بالموضوع بندخل شوي ونطلع
فتحت الباب وصرخت بخوف :يمه ...