كُن بقربي فإن الروح هائمة

3

لمحةٌ من الماضي ...
الجده وضحه :هذا هو جا قومي افتحي له الباب وبشريه
قامت هاله (ام ثنيان )مبتسمه :ابشري
فتحت الباب :بندر بقو...
وإذ ببندر بيده طفله صغيره :مين ذا ؟
وضعها بيدها :امسكي بس لين ادخل
نظرت لها بتمعن :ذي بنت من وين جبتها ؟
نزع حذائه واخذها من يديها وهو مبتسم :بسم الله ...بنت عبدالعزيز ذي
هاله بتذمر:مره ثانيه عبدالعزيز ،مدري انا زوجتك ولا هو
بندر :انتِ زوجتي وام عيالي وهو اخوي الي ما جابته امي
انتبهت للفرحه بيعينه،حتى الفرحة التي أود أن أعطيك إياها سبقني إليها عبدالعزيز ،تنهدت وقالت بإنكسار :طيب
دخلت الصاله قبله بوجه عبوس
الجده وضحه :شفيك ؟
هاله :جايب بنت
قامت بإستغراب :كيف بنت ؟
هاله وهي تمسح دموعها :مولوده ،يقول بنت عبدالعزيز
تنهدت الجده وخرجت :بندر
بندر :هلا يمه
الجده وضحه :جايب بنت عبدالعزيز
بندر :اي
الجده وضحه :وين اهلها ؟
بندر :ابوها تعبان اليوم واخذتها انا عندي
الجده وضحه بسخريه:شرايك بعد تجيبه وتدخله ذي الغرفه تتطمن عليه كل شوي؟
بندر :قلت له تعال حتى انت لكنه عزيز نفس بزياده ما يبي
الجده وضحه :بندر ! ما تلاحظ ان اغلب مشاكلك مع زوجتك بسبب عبدالعزيز ؟
بندر :عبدالعزيز خويي من يومني بزر بقطعه بيومين عشان زوجتي الي ما عرفتها الا قبل ١٣ سنه
الجده وضحه :انت بتجنني ١٣ سنه مو قليل
بندر :وصداقه ثلاثين سنه مو قليل
الجده وضحه :انا ما اخاف الا عليك معلق روحك فيه لو غدر...
قاطعها بحده :عبدالعزيز ما يغدر ،وبعدين هالصغيره المسكينه ماهي مسويه لكم شي مولوده توها بتشرب رضاعه وتغير وتنام بس ما عليكم منها شي انا بسوي كل شي
ضحكت بسخريه غاضبه :وعيالك ثنيان وأشواق صقر وأوس ما قد شفتك غيرت لهم ولا سويت لهم رضاعه
بندر :عندهم ام تسوي لهم لكن هيام ما عندها أم وابوها مريض
الجده وضحه بغضب :طيب تدري ليه هاله استقبلتك عند الباب ؟
بندر :ليه ؟
الجده وضحه :تبي تقول لك انها حامل
نظر لها بسعاده :منجد ؟
نظرت لهيام :لكن واضح اكتفيت
وضع هيام بيدها :امسكي امسكي بروح اشوفها
نظرت لوجه هيام بتقزز :يا وجه البلا
دخل الصاله :هاله ...اشواق وين امك ؟
اشواق:راحت بتنوم أوس
بندر :فوق ؟
اشواق :اي
صعد للغرفه :هاله
خرجت من الغرفه :اسكت الولد نام
بندر :انتِ حامل ؟
هاله :لا مين مكذب عليك
بندر :امي قالت لي أمي ما تكذب
هاله :مالك دخل بالي ببطني خلك مع ذيك البنت
بندر بحده:هاله !
هاله :هاه ؟
بندر :البنت يتيمه وابوها مريض الليله ما يقدر يرعاها اخذتها بس اخفف عليه
هاله :طيب هل يوم من الايام شفتني مريضه وسهرت مع العيال بدالي ؟
بندر:لا بس...
قاطعته:مافيها بس ،احيانًا أحس أنه كل شي كذب وان عبدالعزيز بس حجه عشان تخفي شي عنا
بندر:وش اخفي عنك يا هاله ؟ ما قد حطيت راسي على الوساده الا وانا قايل لك كل شي بقلبي
هاله وهي تبكي:وش دراني انك مو متزوج علي وذي بنتك ؟
مسح وجهه بغير تصديق :لا حول ولا قوه الا بالله ،وش اسوي عشان اثبت لك ؟
هاله :رجعها لأبوها
بندر :ماني مرجعها قلت له ووعدته هيام زي بنتي
هاله :شفت تحبها مثل بنتك واكثر ،واضح لها صله ثانيه غير انها بنت عبدالعزيز
جلس بجانبها :هيام بنت عبدالعزيز
امسك بطنها :الي ببطنك ولدي
ابعدت يده :ماهو ولدك لين ترجع البنت لأهلها
قام من عندها :خلاص بكيفك ،اعتبري اليوم اني ما عرفت أنك حامل وبكره بجي اخذ الخبر
هاله :ولا حتى بتحاول تراضيني ؟
بندر :كيف اراضيك وانتِ ما تحطين نفسك بموقفي ؟
هاله :موقفك واضح تحب خويك اكثر من اهلك
بندر وهو خارج:موقفي ان خويي يحتاجني ولبيته وانتم مكبرين الموضوع
...
صقر :يمه
ام ثنيان :هلا
صقر :وين جوانا ؟
بلعت ريقها :بغرفتها يمكن ؟
صقر :ماهي بغرفتها
ام ثنيان :اجل يمكن طلعت عند ابتهاج
صقر:شوفي لهم ارسلي لهم
ام ثنيان :ليه وش تبي فيها ؟
صقر :عندي لها هديه
ابتسمت ام ثنيان :قلت لهم ولدي حنون من داخل بس محد يصدقني بشوف لها الحين
صقر بحرج :شوفي لها بسرعه
ام ثنيان :ولله راحت المزرعه
صقر :كيف ؟
ام ثنيان :صحيت وزعلت اننا رحنا وخليناها ودقت على ولد اختك يوديها
صقر بحده :وتقولون ليه ما تدلعها ،هذي حقت دلع ؟ شوفيها تروح للمصايب بنفسها
ام ثنيان :اي مصايب ؟
صقر:مدري
ام ثنيان :صقر !
صقر وهو خارج :اذا جيت قلت لك
ام ثنيان :يارب استر علينا
...
جوانا وهي تسير لأحد الغرف:ياخي ليه ماخذين وضع المحققين بزياده ،كل الي بالموضوع بندخل شوي ونطلع
فتحت الباب وصرخت بخوف :يمه ...
صرخت هيام ونجد بنفس الوقت فصرخت جوانا لصراخهم
نهى :شفيه ؟
ابتهاج :ابعدوا بشوف
قامت هيام بدفاعيه :مين انتم ؟
جوانا :مين انتم بالاصل ؟ ذا بيتنا
هيام :من آل محسن انتِ ؟
جوانا :اي جوانا بندر آل محسن انتِ مين وش جابك ذا البيت ؟
هيام :انا مديره المزرعه الجديده
جوانا :ما تحتاج مديره وفيها حسن !
هيام :لا تحتاج ،بديرها بشكل مختلف
جلست نهى بجانب نجد :احس ارتحت لك ومتأكده اي شي تديره بنت يصير مره حلو وش فكرتك للمزرعه
نجد :يا حلوك
نهى :حبيبتي انتِ
ابتهاج :نهى وش ذي الراحه ؟
نجد :لا ارتاحوا ولله احنا ناس طيبين
جوانا :ما فهمت السالفه كيف
هيام :هذا نصيبي بالورث واخذته
جوانا :نصيبك !لا يكون ابوي متزوج على امي وانتِ وذي بناته ؟
نجد :شدعوه لذي الدرجه نشبه بعض
نهى :يعني مو مره
هيام :لا ابوي متوفي من زمان بس اعرف ابوك
ابتهاج :بس ،عرفت عرفت امها متزوجه ابوك وهي بنت زوجه ابوك
نجد :لا يالحبيب ذي قصتي لا تحرقين الاحداث
جوانا :صبر ! ابوي مين متزوج واحنا ما ندري ؟
هيام :مو متزوج الا امك انا بنت خويه بس ذي السالفه بكل ما فيها
جوانا :لحظه عرفت ،بنت عبدالعزيز صح؟
هيام :اي
نهى :هذي جدي الله يرحمه كان يحبها ؟
جوانا :اي
نجد :كيف جدك يعني ذي عمتك ؟
نهى :لا جوانا خالتي وابتهاج بنت عمها بس يخسون ما احترمهم لو يحبون الارض
ضحكت نجد :وربي انك جوي شوفي كيف القدر رماك جنبي
نهى :عندك سناب ؟
نجد :اي بعطيك
ابتهاج :نهى ! وش درانا انهم ما يكذبون ؟
هيام :انتم ! تراكم بزرات وش دخلكم بذي المواضيع ؟
جوانا :صدق دفاعها بذي الطريقه يوضح كذبها
اخذت هاتفها :انا بوريكم الكذب...الو
صقر :نعم ؟
هيام :تعال فيه ثلاثه قطاوه جايين بيتي خذهم قبل ما اطردهم بطريقتي
صقر :دخلوا عندكم ! انا جاي بالطريق
نهى :خير انا قطوه ؟
نجد :يعني كيوت معليك
جوانا :يامامي الخوافه اتصلتي على مين ؟
هيام :أخوك
بلعت جوانا ريقها :اي واحد؟
هيام :أ...
نهى :أوس معليك
هيام :لالا ث...
ابتهاج :ثنيان الحمدلله
هيام :ص...أ...صقر
جوانا :وش السواة؟
نهى :السواة الحقوني
نجد :اصبري ما ضفتك
نهى :بعدين الحين لازم نهرب
ضحكت نجد :سندريلا يعني؟
نهى :مع السلامه
خرجت نهى وخلفها البنات ركضًا
سيف :هاه ؟
نهى:سيفي شغل السياره بسرعه خالو صقر جاي نبي نهرب ننكر الجريمه
سيف :مين عمك ؟
نهى بغضب :سيف مب وقتك ابد ابد مب وقتك
:بس شكله وقتي
فزت نهى على سيف بخوف :اعوذ بالله
صقر :وش جايبكم هنا ؟
جوانا :الطفش
اخذ نفسًا عميقًا :كلكم قدامي بسرعه
ابتهاج :ابشر
سيف :احنا بنرجع بيت...
صقر بحده :كلكم قدامي
سيف :ان شاء الله
فتح الباب الخلفي :اطلعوا
ركبت البنات وبقي سيف واقفًا
صقر :هاه استاذ سيف تنتظر دعوه بالاسم ولا كف حنون ؟
سيف :وش؟
صقر :اركب
سيف :مع البنات ؟
صقر :على اساس مو جايبهم معاك يعني ؟
سيف:بس بقعد جنب ابتهاج
صقر بتذمر :حتى بالسياره مو مرتبين مو مرتبين ابد ،ابتهاج انزلي واطلعي من الجهه الثانيه وجوانا ونهى بالنص وسيف عند الباب الثاني بس ذي الخطه ما عطيتكم مخطط رؤيه ٢٠٣٠ عشان تدوخون كذا
جوانا :طيب لا تصرخ
صقر :مالك دخل اصرخ ولا ازغرط بكيفي
جوانا :طيب وين رايح الحين؟
صقر :جهنم
سيف :انتم نكبات ،تدرون ولا ما تدرون ؟
نهى :وش تتوقعون يسوي؟
جوانا :اسوء شي تتوقعين يسويه هو اقل شي
ابتهاج :دفوا شوي
نهى :وربي زحمه جوانا وسعي
جوانا :بوسع بس اخوك مرتاح وممدد رجوله
نظرت له نهى وقرصت فخذه :ضم رجولك
سيف :وجع ،نهى انتِ أكثر وحده مالك حق تسوين ذي الحركه
في جهه أخر
دق باب هيام ففتحت :نعم ؟
صقر :ذا اسلوب تفتحين فيه؟
هيام :اخلص بسرعه احنا تخطينا مرحله الاسلوب من زمان وأيقنت انك حيوان ناطق
صقر :وش قلتي لهم ؟
هيام :قلت لهم كلام
صقر بحده :بنت ،لا تستفزيني بسرعه !
هيام :مالك دخل
صقر :اقسم بالله ...
هيام :اقسم بالله ادفن راسك هناك خل عنك الاسترجال الزايد
اخذ نفسًا عميقًا وقال بأتزان :وش قلتي لهم ؟
ابتسمت هيام :قلت لهم انا وريثه المزرعه بس
شد على قبضته :اجل بكره تجهزي بتجين بيتنا
هيام :شفيك انت ؟
صقر :شفيني ؟
هيام :محسسني اني زوجتك مسيار وربي قرف الوضع خلاص من التحكم الزايد مارح يصير شي لو عرفوا
صقر :بكيفك عاد انا حطيتك بحمايتي بس ما تبينها بكيفك واجهيهم لحالك
هيام :انا اعرف لنفسي
صقر وهو ذاهب :اي واضح
ذهب للسياره ووجدهم يتشاجرون :هاه ؟
جوانا :نهى واخوها مو احنا
صقر :الغلط عليك المفروض تجلسين بينهم
جوانا :انا جالسه بينهم اصلًا الغلط بتربيه اختك
سيف :كلي تبن انتِ الي مختمه التربيه
صقر بحده :ولد !
سيف :معليش
شغل السياره ولم يتحرك
جوانا :وش ننتظر لو سمحت؟
صقر وهو يتصفح هاتفه :صبر بوريك شي ...اي ذي
جوانا :وش
صقر :قربي شوفي
جوانا :تذكره حفل عبدالعزيز المعنى بعد اسبوع ؟
صقر :اربع تذاكر
نهى :هي خالو حبيبي احنا ثلاث
صقر :الرابعه لمحرمكم
سيف :انا محرم؟ انا ورع حالي حال نفسي خلني ما بروح اسمع لذاك النشاز
ضربته جوانا بأقوى ما لديها :انت النشار يالكلب عيب عليك تقول عن مغني خالتك المفضل نشاز
سيف :خالتي الي اصغر مني
صقر :ما كملت كلامي ،لحد يقاطعني !
نهى :ولك ليش قتلتني بأحسانك خالو صقر
جوانا :ارسل لي الرابط ابيها
صقر :اربع تذاكر كنت بعطيكم اياها هديه بس ...
جوانا :وش ؟
ابتهاج :جبتم العيد ومعد بنروح ارتاحوا وريحوا ضميركم النايم
صقر :لالا بعطيكم بعطيكم بس ...
نهى بحده:قول
صقر :لا تصرخين علي
اقتربت من الامام وقبلت خده :اسفه
ابعدها ومسح خده :وخري ،ما احب ذي الحركات
نهى :وش تحب؟
صقر :اذا جا يوم الحفل يعني بعد اسبوع وانتوا جلستوا ببيوتكم بدون مصيبه وقتها ممكن ،ممكن افكر اعطيكم
نهى :سيف ابي البيت ،انا انسانه انطوائيه ما اتحمل اخرج بس ابي اجلس بالبيت
جوانا :اشتقت لغرفتي مقدر اطلع منها
ابتهاج :مكيف غرفتي حلو
صقر :كذا تمام
سيف :انا احب ادوج بالشوارع
صقر :انت رايح رايح لو تنام بالشارع
بعد وقت انقضى بصمت في السياره مهابةً لصقر توقف عند بيت أشواق :وش شفتوا اليوم ؟
نهى :بنت ببيت المزرعه
صقر :خلاص ودعوا تذاكركم
نهى :امزح ما شفت شي انا عميا اصلًا
صقر :يلا انزلي
نهى :تدري انك اكثر خال احبه ؟
صقر :ادري انك كذابه
نهى :لا ولله صدق احب...
صقر :خلاص بس ادخلي
نهى :تصبح على خير خالو الجميل
صقر بحده :قولي خالي خليك فصيحه عربيه فصيحه
نهى :اوكي خالو
صقر :استغفر الله العظيم واتوب اليه
جوانا :صقر
صقر :نعم؟
جوانا :بس بعرف فضول ما بسوي شي
صقر :لا
جوانا :طيب ما سمعتني
صقر :لا
جوانا :بس بعرف مين ذيك البنت بس اسمها اسمها
صقر :تعرفين اذا جا الوقت المناسب
جوانا:متى ؟
صقر :بالوقت المناسب
جوانا :طيب متى ؟
صقر :جوانا ! اعتبري ان تذكرتك راحت
جوانا :طيب خلاص
صقر :يعني الواحد ما يقدر يتحكم فيكم الا بتذاكر ؟ وش ذا الجيل
جوانا :ترا هذا استغلال ،تستغل رغباتنا بأننا نرضيك
صقر :مو عاجبك بكيفك لا تطيعيني وضيعي على نفسك الفرصه ذي
جوانا :بس انا احب الاستغلال
ابتهاج :طيب ليه تناقشين من البدايه ؟
صقر :احسن شي ابتهاج من اول ما تكلمت وهي ساكته هي الي تستحق التذكره وبجداره
جوانا :طيب صقر سكتنا وطلعنا وخلاص انتهى الحفل وش بيصير ؟ بنرجع نفس اول
صقر :وقتها ندور شي ثاني معليك
جوانا :طيب
صقر بسخريه:هاه بتزعل دلوعه البيت؟
جوانا :لا
صقر :شوفي خليك تمام معاي انا بصير تمام ابتداًء من الليله جربي وشوفي
جوانا :نشوف،بس لما يصير شي غلط وفجأه تقلب علي اعتبر الغلط منك
صقر :انصحك بصفتي اخوك الكبير انصحك
جوانا :امم تنصح بالصراخ
صقر :انصحك بأسلوب الحياه ترا الحياه ما تعاملك بدلع بالعكس تصفقك وتصرخ عليك ،اني انا اصرخ عليك بصالحك ولما يجي يوم تسوي فيك الحياه كذا تقولين اوه قد شفت ذا الاسلوب عند اخوي واعرف اتعامل معاه وتحلين مشاكلك بشكل كويس صح ابتهاج ؟
ابتهاج :هاه؟
صقر :سمعتي الي قلته ولا اعيد؟
ابتهاج :اي اي صح اتفق وبقوه
صقر :شفتي خذي الخبرات من الي اكبر منك ولا تحطين ببالك أنه ربي منعم عليك بالحلال طول الوقت ممكن بلحظه ياخذ ربي منك ذي النعمه فخلي عندك نعمه العقل اكبر من الفلوس
جوانا :قصدك ما عندي عقل؟
صقر :قصدي فكري بكل الاحتمالات بالحياه ،ولا تشوفين الفلوس هي كل شي خلي الناس لو عرفتك تعرفك انك جوانا الي سوت كذا وكذا وكذا وخدمت اهلها كذا ووطنها كذا مو جوانا الي عندها مدري كم مليون وكلها وارثتها ورث ما تعرف كيف تطلع ريال
جوانا :طيب بفكر
صقر :صدق جوانا شوفيني اول مره اتكلم كذا بذا الشكل معاك اتمنى تركزين بكلامي وتحفظينه وعلى اساسه تكملين حياتك
تنهدت جوانا:ان شاء الله
...
في الصباح
هيفاء :وين فهد ؟
شروق :نايم بحضن امه
هيفاء :انا أمه ترا
شروق :سهام عايشه الدور بزياده
هيفاء :وينهم؟
شروق:بغرفتها
دخلت هيفاء الغرفه ففتحت سهام عينيها:جيتي ؟
هيفاء :اي جيت ولا تبين تخطفين ولدي
سهام :تكفين خليه نايم
هيفاء :متى نام امس ؟
سهام :الساعه ٢
هيفاء :ليه شفيه ؟
تثاءبت سهام :جاه زكام وانكتم
جلست بجانبه هيفاء ومسحت على رأسه :يا حبيبي هو ،كان اخذتي جهاز البخار حق ابوي وسويتي له
سهام :اي سويت له ،معلينا كيف اجازتك ؟
ابتسمت هيفاء :ولله ايام حلوه احس اني توني عروس
سهام :كنتِ تحتاجينها مره ضاغطه على نفسك
هيفاء :كله عشان فهد
سهام :ترا المستشفى ارسلوا لأبوي موعد تصميم السماعه
هيفاء :ابوي ؟ وش دخله
سهام :انتِ من بقارتك يوم رحتي تسجلين البيانات المفروض تحطين رقم زوجك عند ولي الامر بس حطيتي رقم ابوك
هيفاء :طيب ولي امري ابوي
سهام :ولي امر ولدك
هيفاء :اي صح صح نسيت ،متى الموعد ؟
سهام :بعد بكره الساعه ثمانيه الصباح
هيفاء :ذكريني اعلم ابوه
سهام :شدعوه هيفاء صرت انا اهتم ببيتك اكثر منك
هيفاء:معليش ولله للحين مفعله وضع الاجازه
سهام :اتمنى ينتهي ذا التفعيل قبل بالليل
هيفاء :ليه شفيه الليل ؟
سهام :هيفاء! عيب عليك ولله اليوم بفتتح محلي اخيرًا
هيفاء :اها ،بتجيبين مشاهير وتغطيه وحركات ولا افتتاح بسيط ؟
سهام :لا بس فاتحه حساب للمحل وقد وظفت وحده عليه ماشاء الله مبدعه بالتصوير هي بتغطي المحل وبتلحق الترندات وكذا
هيفاء :ابي اضيفه واكون اول الداعمين عطيني اسمه
سهام :غمام
هيفاء :حبيت السجع غمام سهام
سهام :طبعًا اول كولكشن مستوحى من اسم المحل
هيفاء :حبيت اكثر
ابو هيفاء :سلام عليكم
قامت هيفاء وقبلت رأسه :وعليكم السلام اشتقت لك
ابو هيفاء :واضح الشوق جايه لغرفه اختك على طول
ضحكت هيفاء :ابي اشوف ولدي ،يقولون تعبان
ابو هيفاء :لا مو مره تعبان انفلونزا عاديه
هيفاء:ارسلوا لك موعد السماعه ؟
ابو هيفاء :اي بعد بكره
سهام :يبه هيفاء جاها زهايمر قلت لها توني
هيفاء :الا ادري بس اتأكد من المعلومه وافتح سالفه وكذا
ابو هيفاء :ولله السالفه امكم زعلانه مني
سهام :ليش؟
ابو هيفاء :امس يوم جبت لحم وطبختوه وتغدينا
سهام :اي
ابو هيفاء :قلت لها لحم بقر
سهام :وهو أيش؟
ابو هيفاء :ضب
سهام بتذمر :يبه
ضحكت هيفاء :ياربي تحزنون
سهام :حسيت طعمه غريب ما لومها تزعل منك
شروق :مين زعل من مين ؟
سهام :انا وانتِ وامي زعلانين من ابوي
حضنت شروق والدها :لا حبيبي ابوي ما ازعل منه
سهام :امس مغدينا لحم ضب
ابتعدت شروق عن والدها :يبه وش ذا المقلب الخايس ؟
هيفاء :انا للحين بصف أبوي
سهام :لأنك مو معانا
هيفاء :بالعكس شفيه لحم الضب لحم حلال
ابو هيفاء :خلاص قولي لزوجك اذا فضى يجي معاي ونصيد لكم ضب طيب وتطبخينه
بلعت هيفاء ريقها :الحين اطبخه كذا احطه بجلده براسه ؟
سهام :ما شفتيه جابه مقطع كأنه لحم بقر وانا طبخته مع أمي كان طبيعي مره
شروق :طيب يبه الذيل ما يطبخونه صح ؟
ابو هيفاء :لا يطبخونه وامس أكلتيه انتِ وعجبك
شروق :لا ما عجبني
ضحك ابو هيفاء :قد عاد بالامعاء الغليضه وما عجبك؟
شروق :عجبني بناءًا على أنه لحم بقر بس بعد ما صار ضب معد يعجبني
هيفاء :الحين صدق زعلتوا ؟ ولله انكم دلوعات
سهام :ابي ازعل بس بأجل الزعل لين بعد الافتتاح
شروق :لا انا زعلانه مهما يكون عندي كبرياء ترا
سهام :ولله كبريائي يقتل فرحه ان ابوي وامي معاي بلحظه افتتاح حلمي
اقترب والدها ليحضنها :ياحبي لك
ابتعدت :لا لا بس لحظه الافتتاح
شروق :حتى زعلك معقد
ابو هيفاء :لأنها عبقريه
شروق :شدخل يبه حتى انا عبقريه
هيفاء:يلا حبايبي خلف يدق ،مين بتشيل لي شنطة فهد لين الحوش وانا بشيله
حمل والدها الحقيبه :امشي
هيفاء :لا يبه لا تثقل على نفسك خل البنات يشيلونها
ابو هيفاء :معليك ماهي ثقيله
هيفاء :حتى لا تتعب نفسك تطلع حتى لو مو ثقيله خلها تكفى
ابو هيفاء :امشي بس بكلم زوجك بعد
هيفاء :طيب،سلموا لي على أمي
سهام :ان شاء الله
شروق :ليه وينها امي؟
سهام :بسم الله عدوى الزهايمر تنتشر أمي بالمدرسه
شروق :تصدقين احسب اليوم جمعه
سهام :قولي بعد عليك محاضرات وفاتتك
شروق :لالا عندي أوف واحسبه جمعه
سهام :اشوا
...
نجد بهمس :يارب ما القاه عندها يارب يكون بالدوام
هيام بنفس الهمس  :نجد ذا اللقاء لازم يصير عشان تتخطين مخاوفك
ابتسمت نجد بضيق :تعرفين اني ما أحب خرافات تطوير الذات
هيام :لا صدق مو خرافات كيف تعودتي على المدرسه وانتِ صغيره ؟ كل يوم داومتي غصب عنك لين حبيتيها
نجد :مستحيل احبه
هيام بحده:اكيد ما بتحبينه هذا متحرش ...
نجد :اشش
اكملت هيام بهدوء :بس تتخطين خوفك منه وتثبتين له أنك قويه
تنهدت :بشوف
غيث :وصلنا
بلع ريقه واكمل تبوني انزل معاكم؟
هيام :لا مشكور اذا عندك شغل تقدر تروح
غيث :طيب
نجد :كله بسببك سمعك يوم قلتي تحرش ويبي يشوف
هيام :لا ما سمعني ولا شي بس انه يتبع أوامر صقر يراقبني بكل مكان لأني محور الكون
نجد :هيام بطلي سوء الظن
هيام :مو سوء ظن هذا الي واضح تخيلي حتى راتبي تحروا عنه
نجد :طيب خلاص
هيام :ذا الرسيبشن صح؟
نجد :اي
هيام :يلا كلميهم
نجد :تمزحين ؟ انتِ كلميهم
هيام :لا نجد إنتِ
نجد :لا أنا عديمه شخصيه
هيام :وكيف صايره دكتوره ؟
نجد :مدري
هيام :انا عديمه شخصيه أكثر منك تقدمي انتِ
نجد :إنتِ أكبر مني وتعتبرين أمي روحي كلميهم
هيام:لا الاصغر أكثر جرأه معروف هذا
نجد :لو خلينا غيث يجي معانا يمكن يعرف يتكلم
هيام :ياشيخه ذاك يسمع غلط تبينه يكلم ريسبشن مستشفى ؟
:السلام عليكم
هيام :وع...وعليكم السلام
:شفتكم مترددين أقدر أخدمكم بشي؟
نجد :اي...
قاطعتها هيام :لا ما تقدر أحنا بنخدم انفسنا
:تمام ،معليش
قرصتها نجد :ولله انك بقره
هيام :ليش ؟لأني strong independent woman وما أبي رجل يخدمني
نجد :strong independent woman ؟يلا وريني شطارتك يلا روحي تكلمي
هيام :استحي
نجد :خلاص اجل على بقارتك ذي خلينا نجلس هنا نتكي لا احد يساعدنا ولا أحنا نساعد انفسنا ونتواصل معاهم بالتخاطر نقول لهم نبي نزور أميره محمد بأي غرفه
ألتفت رجل لها :أنتِ نجد؟
تمعنت نجد بوجهه وخافت :أي
همست هيام :هو ؟
هزت نجد رأسها بالأيجاب
هيام :أي نجد ،جينا بنزور أمها
معاذ :ومين انتِ ؟
هيام :صديقتها
نظر لهيام بنظرات مقرفه
هيام :استغفر الله من غضب الله حتى بالمستشفيات يذنبون الناس يعني اعتبر بالي حولك روح قسم الطواري وشوف الحوادث والناس المكسرين كيف مسوي فيهم ربي روح ثلاجه الموتى وشوف مصيرك
معاذ:تقصديني؟
هيام :لا ما اقصدك أتكلم بشكل عام كذا موعظه للناس
معاذ :الله يهديهم
توقف عند باب أحد الغرف :انتظروني هنا
نجد :طيب
دخل الغرفه وبقيتا هما خارجًا
هيام :هاه نجد شفيك ركدتي؟
نجد :أحس الاحداث تتكرر
هيام :بس بوجود مين ؟ بوجود البطله هيام
نجد :صايره عندك نرجسيه زايده
هيام :للمعلوميه ذي الشخصيات يخافون من الشخصيه النرجسيه
نجد :ولله المعلومه من...
هيام :من وين؟
نجد :من مكان ثاني غير عقلك
معاذ :تعالي
سارت نجد وخلفها هيام
معاذ :تبي بنتها بس
هيام :لا كذا ما يصح أحنا سوا الروح بالروح لو علينا دخلنا الحمام سوا
معاذ :حتى انا بجلس برا
هيام :بتروحين لحالك ؟
نجد :بروح
هيام :تمام بنتظرك هنا
دخلت نجد وبقي معاذ وهيام بالخارج ينتظرون بصمت
هيام :انت معلم؟
معاذ :اي
هيام :سبحان الله مو واضح بشكلك
معاذ :وش فيه شكلي؟
هيام :مدري كذا كأنك بياع
معاذ :استغفر الله
تنهدت هيام بسخريه:اي الله يغفر ذنوبنا كلها ان شاء الله ولا يجعلنا نظلم احد
في جهه أخرى
قبلت رأس والدتها وجلست على الكرسي وهي تغص بحزنها :شلونك؟
ام نجد :بخير يوم شفتك ،شلونك يا يمه ؟
نجد:بخير بخير
ام نجد :الحمدلله
بلعت ريقها وبقيت تجلس بصمت خشيه أن تنفجر بكاءً
ام نجد :بسألك
نجد :هلا
ام نجد :جيتي لأن ابوك قال لك ولا ...
نجد :لالا جيت من محبتي لك من نفسي ،بس ما دريت بمرضك الا من أبوي ولا كان جيت من أول
ام نجد :بعدك تحبيني؟
دمعت عيناها :أنتِ أمي يمه كيف بكرهك؟
ام نجد :اجل وش صار بعلاقتنا ؟
نجد :ام وبنتها
ام نجد :نجد !
نجد :بس صرت ...معد أوثق
ام نجد :ولا في قلبك زعل علي ؟
نجد :لا ولله أن قلبي صافي لك
ام نجد :الحمدلله ،ولله أني شلت هم أموت وانتِ...
نجد :لا وش ذا الكلام
ام نجد :الحق ذا ،المرض أكل جسمي وروحي
نجد :بتشفين أن شاء الله
استعدلت بجلستها فساعدتها نجد :تدرين أخر مره طحت فيها وش جا ببالي ؟
نجد :وش؟
ام نجد :بنتي الي ظلمتها وروحها غلبت من الهم أنا الحين ربي بيعاقبني فيها بياكل المرض روحي
نجد:يمه كلمتك كثير ما قد تكلمتي كذا وش صار ؟
ام نجد :المرض زاد يا يمه ولاني مطوله بذي الفانيه
بلعت غصتها :لا مستحيل أخر مره كان يخف وشلون رجع ؟
ام نجد :أراده الله
دخلت الممرضه لتغير المغذيه فأغمضت أم نجد عينيها
نجد بذعر :وش صار ؟ يمه...
الممرضه :لاتخافين ما صار شي بس العلاج تأثيره يكون أفضل لو نامت
تنهدت بضعف :يارب
الممرضه :مارح تصحى الا بعد ست ساعات تقدرين تطلعين
نجد :بجلس معاها
الممرضه :باقي تقريبًا خمس دقايق ويخلص وقت الزياره بعد ما يخلص محد يقدر يجلس عندها الا المرافق
نجد :طيب انا برافق عادي
الممرضه :زوجها مرافق وقد وقع اوراق المرافقه حقت اليوم ،اتفقي معاه لو كنتِ بترافقين بكره
نجد :ان شاء الله
خرجت فأستقبلتها هيام وامسكت يديها :وش صار
انهارت نجد باكيه
هيام :شفيك نجد
نجد :خفت
هيام:انا معاك قلت لك
نجد :كانت الممرضه تحط المغذيه بعدين غمضت عيونها...
حضنتها هيام بحزن فأكملت نجد :حسبتها ماتت خفت ثواني بس ...وبعدها قالت ...قالت العلاج لازم تنام عشانه
هيام :يعني منوم؟
نجد :اي ...خفت حيل ما ابي اعيش الشعور مره ثانيه
ابعدتها هيام ونظرت لوجهها بأبتسامه مواساه :لا معليك ان شاء الله عمرها طويل وبتشوف عيالك وعيال عيالك والمرض ماهو الا عقبه بحياتكم
نجد :بكره برافق معاها
هيام :كويس تفرحينها وترفعين معنوياتها
نجد :حتى كل يوم
التفتت لمعاذ وكسرت خوفها فتحدثت اليه :برافق مع امي كل يوم
معاذ :مقدر اتركها
نجد :انا بنتها
معاذ :انتِ تركتيها محد كان جنبها الا انا
بلعت ريقها لتتذكر تلك الاحداث ...
شهران مرت منذ تلك الحادثه ولم ترى والدها بعدها ،تقاسي الأيام تحت تهديد زوج أمها وغضب أمها عليها ،وكما اعتادت مهربها الوحيد هو المدرسه ،حضورها للمدرسه منتظم ولكن عقلها منشغل قاطع إنشغالها دخول المرشده الطلابيه قائله:معليش يا أستاذه قاطعت درسك بس برا بدت تمطر وعداد المدرسه انفجر
صرخت الطالبات برعب
المرشده :لابناتي لا تخافون اتصلنا على اولياء أموركم بيجون الحين ،نزلي الطالبات طابور وتأكدي بالكشف أنه كلهم نزلوا
المعلمه :ان شاء الله،يلا حبيباتي نكمل درسنا بعدين ان شاء الله لموا اغراضكم وصفوا طابور
بعد أن تمت جميع الاجراءات جلست الطالبات في الاسفل حتى اقتربت معلمه تنادي :نجد مُناف
نجد :هلا
المعلمه :ابوك برا ينتظرك
نجد :ابوي؟
المعلمه :اي ابوك
حملت حقيبتها بسعاده وخرجت اليه فأحضنته وهي تبكي :يبه
ابو نجد :عيوني لك ،خلاص ماصار شي ان شاء الله بس عداد صغير
نجد :اشتقت لك
ابو نجد :وانا اكثر ،بس الافضل تجلسين عند امك وتشدين حيلك بالدراسه
نجد :مين قال ؟
ابو نجد :خلينا نطلع السياره واقول لك
فتح لها الباب فصعدت وهو أيضًا ثم قال :امك تقول مستواك بالمدرسه نزل لأنك مشتته بين عندي وبين عندها بتخليك بس تجيني بالاجازات
نجد :لا تكذب تراها
ابو نجد :اعرف انك تشدين حيلك يا بابا بس لازم اكثر المتوسط مو زي الابتدائي
نجد :لالا تكذب مو عشان الدراسه
ابو نجد :عشان ايش؟
نجد :عشان ...ما اقدر اقول
ابو نجد :تخافين من أحد ؟
نجد :منك
اوقف السياره جانبًا ونظر لها :مزعلك بشي ؟
نجد :لا
ابو نجد :اجل
بكت :اخاف ما تصدقني زي امي
ابو نجد :اصدق بأيش ،تصير لك مشاكل بالمدرسه ؟
نجد :لا
ابو نجد :يا بابا مصدقك ولله مصدقك بس قولي انتِ اغلى شي في دنياي وشلون اكذبك؟
نجد :معاذ ...
ابو نجد :يضربك؟
نجد :لا يلمسني كثير بدون ما ارضى قلت لأمي قالت انتِ كذابه وذي أفكار ابوك وهو يكره معاذ ،وصارت تمنعني اشوفك بسبب أنها تحسبك انت تقول لي ذا الكلام
حضنها والدها بصدمه وقبل رأسها :يصير خير يا يبه يصير خير
نجد :مصدقني؟
ابعدها عنه ومسح عينيها :طبعًا مصدقك ،وأمك اكيد بتصدق، بس يمكن فهمت الموضوع غلط خلينا نشرحه لها
نجد : ما ابي ارجع ،طول اليوم اجلس بغرفتي ولو طلعت القاه ينتظرني ما ابي
ابو نجد :طيب امك بتخاف عليك
نجد :دق عليها وقول لها اني عندك اليوم اخاف منه يبه كل يوم اتمنى انك تجي وتاخذني عندك ما ابي اعيش هناك
ابو نجد :بنت مناف تتمنى ومناف يقول ابشري
نجد :بعيش عندك ؟
ابو نجد :اي ،بالطيب ولا بالغصب محد يلمس شعره من بنتي
حضنته وبكت مره اخرى فطبطب عليها ...
عادت لحاضرها ونظرت له وخديها يغرقان بالدموع
هيام بحده :هربت بسببك وبسبب وصاختك
معاذ :مالك خص بالماضي
هيام :صح ماضي نسيناه وشي طبيعي كلنا ازواج امهاتنا تحرشوا فينا وعايشين طبيعي محد جته عقده من الموضوع لانه طبيعي
معاذ :وطي صوتك احنا بمستشفى
هيام :اليوم احنا بمستشفى وكل يوم احنا تحت رقابه الله ما خفت يرجع فيك هالبلا ؟ ما خفت تجيب بنات ويرجع فيهم قرفك
معاذ :بنت !
هيام :هاه ؟خفت قلبك ارتعد ؟،وابيك تخاف اكثر يوم تعرف انك ظالم حط راسك على الوساده وتذكر ظالم ابحث كم آيه بالقرآن نزلت بالظالمين وشوف نهايتك كيف
نجد :هيام خلا...
هيام :هاه نجد ؟ نجد الحنونه الي حتى الي تحرش فيها تحن عليه هاه ؟
نجد :لا تسوين شوشره ما ودي يكبر الموضوع ويرجع من أول وجديد
هيام وهي ذاهبه :حسيبك الله انا غاسله يدي ولو انه بقلبي كلام كثير بس غسلت يدي
معاذ :لا حول ولا قوه الا بالله
هيام :فعلًا لا حول ولا ...
قاطعتها نجد :هيام خلاص ورانا شغل كثير
هيام :طيب خلاص
نجد :امشي
خرجت هيام خلفها :استغفر الله بس
...
ملاذ :عمتو وش تسوين
ساره :وش اسوي يعني ؟ افكر بمستقبلي الي ضيعته
ملاذ :عشانك ما كملتي الدراسه؟
ساره :عشاني تطلقت
ملاذ بأنفعال :لا ما اتفقنا كذا وش تبين برجال ياعمه وش تبين بالعكس الطلاق فكه
ساره :ادري ادري بس افكر اروح الميدل بيست
ملاذ :لا عمه استغفر الله
ساره :ابي استانس واعيش شبابي
ملاذ :واحنا انخلقنا ليش؟ عشان نعبد الله الميدل بيست كله ذنوب وش تبين فيه
ساره :بروح بأحترام وارجع بأحترام
ملاذ :عمه !
ساره :نعم ؟ تراه حقي اني اطلع واتمشى
ملاذ :بس ما لقيتي الا الميدل بيست ؟ شوفي البوليفارد
ساره:طفشت من البوليفارد
ملاذ :طيب اطلعي سافري الخارج روحي لندن روحي المالديف
ساره :المالديف من كثر ما رحتها طفشت
ملاذ :خلاص يا عمري ختمتي ابو الوناسه معد باقي شي الميدل بيست مستحيل اسمح لك تروحين
ساره :بصفتك ايش ؟
ملاذ :بنت اخوك الي تبي لك الخير
ساره :بالعكس تبين الشر من اعماق قلبك وتقصدين بكلامك اني عجوز ومو حقي اتمشى
ملاذ :انا ما اتحمل
غاده :صباحو ،وش ما تتحملينه؟
ملاذ :عمتي تبي تروح الميدل بيست
غاده :لا ولله عمتي شفتي الذنوب فيه كيف ما يصلح لك انسانه كبيره وعاقله
ساره :وش به عمري ؟
ملاذ :عاقله عمرك عاقل ما يصلح له ذي الاماكن
غاده :يمكن عشانك طفشانه شوفي بدعيك لحفل تخرجي بعد ثلاثه ايام شرايك تحضرين ؟
ساره :مو جوي الحفلات الرسميه
غاده :خلاص بكيفك خسرتي كثير
جهاد :السلام عليكم
غاده :جهاد فاضي يوم الخميس ؟ حفل تخرجي ابيك تحضر
جهاد :متى ؟
غاده :بالليل
جهاد :مرابطتي بالليل
غاده :جهاد ابيكم كلكم تحضرون
جهاد :بشوف
غاده :ارجوك احضر ارجوك
جهاد :طيب بشوف
ساره :جهاد
جهاد :هلا
ساره :ليش جيت وانت تعرف ان بنات عمك يجون عندي؟
جهاد :ليه كان فيه احد هنا ؟
ساره :اي ملاذ ،ولا تبيها انت صح؟
جهاد :لالالا فكيني من شركم مابي لا ملاذ ولا هم يحزنون ما كنت ادري انه في احد هنا
غاده :معليك يا عمه بضبطه انا
ساره :اي ابي نسوي عرس قريب فعاليه
جهاد :شفيها ؟
غاده بهمس:ازمة منتصف العمر
ساره :وش فيني ؟ ادور حياتي
جهاد :الله يكتب لك الي فيه الخير
ساره :شوفوا كيف جهاد عاقل مو زيك وزي ملاذ يدعي لي
غاده :ما قلنا شي ما قلنا شي الله يوفقك ومع السلامه
جهاد :وين ؟
غاده :بروح اسوي اظافري عرس صديقتي بالليل
جهاد :والصلاه ؟
غاده :بسوي كل شي واخر شي الاظافر
جهاد :من الصباح لليل بالمشغل ؟
غاده :لا بروح كوفي وكذا اتمشى شوي استمتع بحياتي كخريجه
جهاد :خريجه وراها فاينل
غاده :جهاد كل تبن تخرب روقاني
جهاد :ابشري
غاده :واحضر حفل تخرجي
جهاد :ان شاء الله
...
نهى :شوفي احلام كيف شافت نفسها
جوانا :احسها طبيعيه
نهى :وش الطبيعه الي فيها سوالفها كلها عن خطيبها
جوانا :اجل يمكن تحبه
نهى :ولا مخدوعه فيه
قامت جوانا :الحين بنعرف
نهى :وين؟
جوانا :بروح اسولف معاها
نهى :طيب اصبري
جوانا :قومي بسرعه
جلست جوانا بجانب احلام :سلام
احلام :وعليكم السلام
جوانا :شلونك؟
احلام :بخير الحمدلله انتِ شلونك؟
جوانا :تمام تمام ،مبروك على الخطوبه
احلام :الله يبارك فيك يا روحي
جوانا :زواج اقارب ولا ...
ضحكت احلام :لا عن حب
جوانا:عن حب ؟
احلام :اي صار لنا سنه نسولف وامس خطبنا
جوانا :هو بنفس عمرك؟
احلام :لالا موظف تقريبًا عمره ٢٥
نهى :فرق العمر كبير
احلام :ما يهم فرق العمر
نهى :لا ولله احس التوافق الفكري مهم
احلام :على حسب السنه الي قضيناها بيننا توافق فكري
نهى :سنه ما تكفي
احلام :لسى رح نقضي كثير لين ما اتخرج من الثانوي ونتزوج ان شاء الله
جوانا :بتدعينا لزواجك صح ؟
احلام :اي اي كلكم مدعوين
دق جرس الفسحه
جوانا :اسمعي احلام وش رايك نمشي سوا اليوم
احلام:اي تمام
نهى :انا ماني معاكم
جوانا :ليه؟
نهى :مضيعه وقت ،بروح احل واجب الفيزيا احسن
جوانا :بعدين عطيني الحل
نهى :تخسين
احلام :ما علينا فيزيا اليوم
نهى :يا بابا كل يوم علينا فيزيا
احلام :الاستاذه طلعت شفتها
جوانا :الحمدلله
احلام :تبين مرايا؟
جوانا :لا واثقه من شكلي ،ولا فيه شي غلط؟
احلام :لا لا حلوه
اخرجت مرآه صغيره من حقيبتها
جوانا :مرايتك حلوه عليها حرفك صح؟
احلام :اي ،جابها لي ياسر
جوانا :مين ياسر ؟ الحارس
ضحكت احلام :لا خطيبي
جوانا :يعني طلبيه ذي ،اذا تعرفين الموقع عطيني ابي اطلب زيها
احلام :اعرف الموقع بس حلاتها تجي هديه من شخص تحبينه ،ذا الهودي مطقمين فيه انا وياه
جوانا بسخريه :ما بقيتوا شي ما طقمتوا فيه
احلام بنفس السخريه:جمعنا كل شي باقي بس البيت
في جهه اخرى
ابتهاج :وين جوانا
نهى :تمشي مع احلام
ابتهاج :المخطوبه ؟
نهى :اي جلست معاهم دقيقتين بس كل سوالفها عن خطيبها والحب ومدري ايش،بتخرب جوانا
ابتهاج :لا تسيئين الظن فيها
نهى :ما اسيء الظن بس احس جوانا معجبه بفكره خطوبتها
ابتهاج :اكيد مستغربه وبس
نهى :لا اعرفها جوانا تتأثر بأي احد تمشي معاه ،تذكرين يوم صارت تمشي مع ابرار وصارت مهمله الانقلش ونقصت فيه؟
ابتهاج :احس الشخصيات تختلف ابرار واحلام ،يعني فكره الخطوبه كبيره ما تقدر تأثر عليها بسرعه ولو أثرت من وين بتجيب لها خطيب؟
نهى :تدرين انها كانت تكلمه من سنه ؟ وهي اعترفت بذا الشي
ابتهاج :اكيد يقرب لها
نهى :لا متعرفه عليه ،ولله بتخرب جوانا وبتشوفين
ابتهاج :هي وحده واحنا ثنتين ما بتقدر
نهى :كأنك ما تعرفين جوانا
ابتهاج :نهى معليك منها خليها تمشي مع الي تبي بس اذا شفناها تأثرت نكلمها
نهى :الله يخارجنا بس
...
هيام :هاه حضرنا
نظر لنجد:قلت وحدك
هيام :وش رايكم اكتب على جبهتي عشان تفهمون انه احنا الروح بالروح ونمشي سوا ؟صديقتي ومديره اعمالي
ابتسم صقر بسخريه :تغارين مني عشان عندي مدير اعمال وقلدتيني
هيام :انا اقلد ذكر؟ مستحيل
صقر :ادخلوا بس
دخلت هيام وخلفها نجد وجلسوا على الطاوله
صقر :هذا مكان ثنيان
هيام :مكتوب فيه اسمه ؟ لا
صقر :هذا أوس ما جا بعد
أوس :السلام عليكم
ابتسمت هيام :وعليكم السلام
همست نجد لهيام :اشوف طاقه مغناطيسيه
هيام بنفس الهمس :كلي زق
أوس :ثنيان ما بيجي
صقر :على اي اساس؟
أوس :بيسافر هو زوجته للعلاج
هيام :لا تفهمون غلط بس شفيها ؟
صقر :ما يخص...
قاطعه أوس :يبون يجيبون ولد
هيام بأنفعال:ليه شفيهم البنات ؟ نعمه من الله وحجاب من النار ،توقعت ذي الفكره تنمحي بس للحين موجوده
أوس بحرج :معليش ،فهمتي الكلمه غلط مو يجيبون ولد ذكر بس يجيبون طفل بشكل عام
انحرجت هيام من أنفعالها :اوه ...معليش م...
نجد :عشان لها سنوات من السعوديه ما تفهم المفردات صح
دخل غيث :السلا...السلام عليكم
صقر :وعليكم السلام ،شفيك؟
غيث :ولا ...ولا شي ولا شي بس ...
صقر :خلاص بس اجلس
غيث:مكا...مكاني
صقر بسخريه :هاه غيث حبيبي مين اخذ مكانك بالفصل يا روح ابوك؟
غيث :لا خلاص بجلس
همست هيام لنجد :شكلك اخذتي مكانه
نجد :غلطك ذا انتِ جلستي وجلست جنبك
هيام :ايه وش سبب الاجتماع اليوم ؟
صقر:ولا شي بس نوقع اوراق انك اخذتي المزرعه وتعطينا خطتك وش بتسوين فيها
هيام :خير ما قلتوا لي واجهز عرض؟
أوس :خذي راحتك وجهزي...
قاطعه صقر :اليوم قولي افكارك المبدئيه بكره تجيبين العرض ونوقع
هيام :ما احب اقول افكار مبدئيه احب اعطي الي بنفذه
صقر:ما عندي ذا الكلام
هيام :ومين انت؟
صقر :مديرك
هيام :الله ،على اي اساس ؟
صقر :على اساس اني املك اكثر منك
هيام :تملك اكثر مني بكل شي الا بالعقل سبحان الله
ضحكت نجد ثم كتمت ضحكتها
تنحنح أوس :احنا هنا بعلاقه عمل احترافيه اتمنى ما تطلع العلاقات خارج اطار الزماله
التفت له صقر :علم نفسك ذا الشي
هيام :صح اتفق مع أوس واطلب منك بكل احترافيه انك ما تعتبر نفسك مديري وانكم تعتبرون الافكار الي بقولها اليوم هوامش وتعطوني يومين ارتب افكاري واجهز العرض
أوس :فكره حلوه
صقر :بس انا اقرر هنا
نجد :وش رايكم نخليه تصويت ؟
هيام :حلو تصويت الي عجبته فكرتي يرفع يده
رفع أوس ونجد أيديهم :اثنين بصفي
صقر :هين يا أوس ،الي يوافق رأيي يرفع يده
رفع صقر يده بينما غيث ينظر بصمت
صقر :غيث ،وش رايك ؟
غيث :انا ؟
صقر:فيه غيث غيرك ؟
نظر لنجد ثم لصقر وبلع ريقه :أقدر امرر التصويت ؟
صقر :وقتها كأنك مصوت لهيام
نجد :اساسًا تصويتك لنفسك غلط يعني حتى لو صوت لك خسرت
هيام :يعني فكرتي فازت وانتهى النقاش
صقر :طيب عطينا افكارك المبدئيه
هيام :دفتري معاك ؟
نجد :تكتبين كل شي بالملاحظات
هيام :صح
فتحت هاتفها ونظرت للملاحظات :نستثمر فيها كمشروع ترفيهي...
صقر بأعتراض :لا لا لا الخيل مو للترفيه مستحيل اخلي الاطفال يقابلونها
هيام :لو سمحت لا تقاطع ،هذي فكره مبدئيه يا أما تكون مشروع ترفيهي ولا نظرًا لمساحتها الكبيره نخليها ساحه تدريب للخيول الي رح تشارك بالسباقات
أوس :فكره حلوه
هيام :او نادي فروسيه ويشترك الناس فيه بشكل شهري
صقر :الاولى احذفيها
هيام :الاولى اكثر ما ارجح اني اسويه
صقر:اقنعيني
قامت هيام :بالعرض بقنعك
صقر :ما انتهى الاجتماع !
هيام وهي خارجه:بما أن الافكار انتهت يعني انتهى
ابتسم أوس خلفها :عرفت لك
صقر :خلها تعرف لنفسها أول صديقتها محجبه وهي كاشفه مدري شوضعها
قام أوس وتنهد :انت تموت لو ما تفتح هالموضوع
صقر :بفتحه لين أشوفها تتحجب ولا اموت
أوس :حبه حبه بننصحها
خرج أوس وبقي صقر وغيث
صقر :اجل ما تصوت لي هاه ؟
قام غيث بذعر وجمع اغراضه :بروح اشوف جدول الاعمال حق بعد يومين عشان ارتب الاجتماع تبي شي؟
صقر :لا سلامتك
بلع ريقه :الله يوصلك بالسلامه
صقر :استغفر الله وش تهبد
غيث :ولا شي
...
اشواق :سعيد
سعيد :هلا
اشواق :وش رايك نطلع اليوم ؟ الجو حلو
سعيد :العيال عندهم مدارس
اشواق :نطلع العصر بس ونرجع مارح نطول
سعيد :ولله ودي لكن واحد عازمني عنده
اشواق :عزيمه العصر ؟
سعيد :اي نتقهوى
اشواق :طيب
سعيد :هاه شفيك؟
اشواق :خلاص روح
سعيد :زعلتي؟
اشواق :صاير تهملني كثير ذي الايام
سعيد :اعرف ولله اعرف اني مهمل ومقصر بس...
اشواق :واذا عرفت وش تسوي؟ تسلم بالأمر الواقع وخلاص ما كأن لي وجود؟
سعيد :طيب وش اسوي وارضيك؟
اشواق :عطني من وقتك شوي ولا عطني حريه اخذ وقت لنفسي
سعيد :سواقه وطلعات مافيه
اشواق :ووش ناقصني عن البنات؟اتعلم واسوق واطلع واعتمد على نفسي
سعيد :اخاف عليك
اشواق :من ايش ؟ مافيا تلاحقني ولا ايش فيه ؟
سعيد :الرياض كبيره والحوادث كل يوم اشوفها ولله ان قلبي يخاف عليك وعلى العيال كل يوم اسألي سيف كم مره ادق عليه واتأكد انه وصل الجامعه سالم
اشواق :طيب خلاص ما بسوق ولا باخذ لنفسي وقت عطني اهتمام يعوض رفضك لذا الشي
نظر لها طويلًا ثم تنهد :طيب تجهزي وانا بتعذر من الرجال
قامت لتتجهز بينما هو اتصل ليلغي موعده :الو
:ما بتجي؟
سعيد :بطلع مع اهلي
:من زمان مواعدني على ذا اليوم ما لقيت تطلع معهم الا الحين؟
سعيد :طيب بالليل وش رايك؟
:بالليل عندي شغل ما اقدر اتفرغ لك طول الوقت
سعيد :طيب يوم ثاني
:بكره بس ما تتخلف عن الموعد
سعيد :ان شاء الله
:ما ابي ان شاء الله ابي كلام ثابت
ابتسم سعيد :طيب ولله كلامي ثابت بكره جايك بنفس هالوقت
:مع السلامه
سعيد :مع السلامه
اشواق :تجهزت
سعيد :وش هالوجه ؟
اشواق :وش فيه وجهي؟
سعيد :كأنك باقي زعلانه
اشواق :مدري عنك
سعيد :امشي بس اشغل لك اهداء الحين يرضيك
اشواق :لا صدق انت استخفيت
سعيد :بسم الله عليك يا قلبي وش جاك؟
اشواق :منت معطيني قيمه تحسب بس اغنيه تراضيني
سعيد :وكيف اراضيك طيب عطيني طريقه ؟
اشواق :ولله مدري المفروض انت تعرف ذا الشي
بلع ريقه :وش دراك اني اعرف ؟
اشواق :الشي ذا المفروض الرجال يعرفونه
تنهد :بشوف
...
نرجس :جهاد جيت
جهاد :اي من الصباح جيت تبين صامولي؟
نرجس :لا بالعافيه عليك بس احسك ما تقعد معانا كثير الحين تفطر وتجلس شوي وترجع الدوام
جهاد :كم التاريخ اليوم ؟
نرجس :١٦
حسب على يده قليلًا :باقي ثمانيه ايام ويعطوني اجازه اسبوعين بتطفشون مني
نرجس :وش ذي اللصقه بجبهتك ؟
لمس جبهته :لصقه جروح
نرجس :بس احس ...مو لازم خلاص
جهاد :وش ؟
نرجس :مدري كذا ما تصلح حق واحد عسكري
جهاد :عشان الرسمات ؟
نرجس :اي بس عادي لو كان اهتمامك يعني لو كنت تحب ذي الاشكال عادي الناس يختلفون
جهاد :لالا انجرحت وما لقيت الا هي
ابتسم واكمل :ماهي اهتمامي ذي الاشكال
نرجس :اهتمام صديقتي
جهاد بتوتر :وش خصني انا بصديقتك؟
نرجس :ما خصك شي بس من وين شريته بشتري لها هديه بمعنى اني اداوي جروحها وكذا
توتر اكثر :مدري واحد جابها لي
نرجس :جهاد التوتر ذا وراه شي
سيطر على توتره :ما وراه الا الدوام
نرجس :اسمع
جهاد :هلا
نرجس :امي تبيك اليوم بعد توديها العزا الي امس
جهاد :ابشري نفس الوقت
نرجس:غريبه ما سألت زي دايم ليه بترجع 
جهاد :ليه بترجع ؟
نرجس :اخت المتوفيه كانت مسافره وامس ما جت واليوم جت تبي تروح وتعزيها خصيصًا
جهاد :تمام
بعد وقت
ام جهاد:هاه بتوديني؟
تنهد جهاد وهو يتحدث بهاتفه:طيب بشوف ،يمه
ام جهاد :ما تقدر ؟ خلاص بشوف السواق مع اني ما احب اطلع معاه بس بشوف
جهاد :شوفي ابوي ولا اي احد اذا ما تبين مع السواق
ام جهاد :معليك انت بس روح شغلك الله يوفقك ويسدد خطاك ولا يضيع لك تعب
ابتسم وقبل يدي امه :الله لا يحرمني من ذا الدعاء
ام جهاد :استودعتك الله
...
سهام:وزعتوا التوزيعات ؟
شروق :اي بس باقي ثنتين
سهام :كل الناس اخذوا ؟
شروق :اي
نظرت للشرطي الواقف بعيدًا عنهم :وعطيتوا العسكر ؟
شروق بأستغراب :لا ليش؟
اخذت الصينيه:نعطيهم ليش لا
شروق :سها...
تجاهلتها سهام وذهبت اليه :السلام ...عليكم
التفت جهاد :انتِ؟
بلعت سهام ريقها :جبت ذي
جهاد :معليش،وعليكم السلام
سهام :وين الي معاك كان ؟
جهاد :راح وشوي وبيرجع
سهام :جبت ذي لكم
جهاد :يعطيك العافيه خليها للحضور
سهام :لا كلهم الا انتم
جهاد :ايش؟
سهام :اقصد كلهم اخذوا الا انتم
ابتسم واخذها :يعطيك العافيه
سهام :خذ الثانيه لخويك
اخذها :تشتغلين مع فريق التنظيم؟
سهام :لا انا صاحبه المحل
جهاد :ماشاء الله ،الله يوفقك ان شاء الله
سهام :آمين وياك
نظر للتوزيعات ثم لها :ذي حقت بنات
سهام :ايش؟
جهاد :سلسال
سهام :سلسال ؟
جهاد :اي مكتوب أحلى من العقد لباسه  ...
اخذتها من يده :اشوف
نظرت اليها وكان مكتوبًا :أحلى من العقد لباسه ،ويزهى بها فستان من متجرنا
بلعت ريقها وانحرجت لكنها اعادتها اليه :الهديه ما ترد عطوا خواتكم ولا اي احد
ابتسم جهاد :طيب
عادت لشروق التي كانت تضحك :وش صار ؟
سهام :ما قلتي لي انه العقود كنت احسبه اكل
شروق :كنت بقول لك بس ركضتي ركض ماشاء الله عليك
سهام :عرفت انا ما اكمل يومي بدون فشلات حتى انا استغربت اني افتتحت محلي بدون ما اتفشل ما اقدر اعيش بدون فشلات
شروق :وشلون رقعتيها ؟
سهام :قلت له عطوا اخواتكم
شروق بضحك:وربي يضحك
سهام :ولا اسمح لك تضحكين
نظرت له من بعيد وهمست :بعدين مافيه الا انت بذا الديره
شروق :يلا سهام خلينا نرجع البيت
سهام :طيب
في الجهه الاخرى
خالد :المطعم زحمه بس الحمدلله على نعمه السلطه قدموني عليهم
جهاد :غبي انت تستغل وظيفتك بذا الشكل
خالد :مو انا هم شافوني دخلت ودخلوني اول شي،وش ذي ؟
جهاد :وحده لك ووحده لي
قرأ خالد النص بتلحين :واحلى من العقد لباسه ويزهى بها...لا ياخي خربوا القافيه خذها ما ابيها
جهاد :هديه منهم
خالد :وش ابي فيها انا ؟عسكري واخرتها البس عقد؟
جهاد :لأهلك
خالد :اهلي بالجنوب ،خذها انت لأهلك لا يتهاوشون
جهاد :طيب
خالد :انت طلبت شورما بمخلل كثير ؟
جهاد :ياخي انت قلت لك بدون مخلل بدون مخلل
خالد :امزح امزح هاك
جلسوا يأكلون بالسياره بصمت لدقائق ثم كسره جهاد قائلًا :الرياض كم كبرها ؟
خالد : ١٩٧٠كليو تقريبًا
جهاد :على ذا الكبر فيه صدف تحسبها الاولى والاخيره بس تتكرر كثير
خالد :مين صادفت ؟
جهاد :كذا اتكلم بس بشكل عام
خالد :يا شيخ ولله مب علي انت انسان ما يتكلم الا لفايده طول يومك ساكت الا اذا شفت انك تحتاج تتكلم تكلمت حتى صوتك فخم
جهاد :اتكلم بشكل عام كذا حكمه
خالد :جهاد وتبن مين قابلت ؟
جهاد :خالد وتبنين ما قابلت احد عطني الببسي بس
خالد :ما جبت لك
نظر له جهاد بصمت
خالد :امزح بس ما بعطيك لين تقول لي
جهاد :بلا حركات مبزره هات
خالد :قول
جهاد :امس يوم قلت ولد صار له حادث
خالد :اي
جهاد :كانت وراه خالته مدري امه مدري شسالفتها واليوم طلعت هي راعيه المحل بس
ابتسم خالد :وولدنا ذاب من لقائين
جهاد :محد ذايب ومايع الا انت عطني الببسي
خالد :هاك هاك الله لا يبلانا بسوء الخُلق بس
...
ابتهاج:شلونك مع صديقتك الجديده ؟
جوانا :اي صديقه ؟
ابتهاج :احلام ،قالت لي نهى
جوانا :ولله تمام وحياتها طبيعيه تدرس وتعيش بس الفرق انها عارفه مصيرها وعمرها بتقضيه مع مين
ابتهاج :كلها نعرف مصيرنا ترا
جوانا :اي مصير ؟
ابتهاج :الموت
جوانا :يا حبكم للتنكيد
ابتهاج :صدق ترا
جوانا :ولله ترا حياتها حلوه كل فتره يهديها هدايا واذا نجحت يهديها واذا زعلت يهديها
ابتهاج :يعني من الاخر شوقر دادي
جوانا :لا علاقتهم اعمق من كذا ولا اذا هو شوقر دادي انا اشقر منه
ابتهاج :اشقر ؟
جوانا :يعني اغنى
ابتهاج :ولله مدري وين العمق وهم بس لهم سنه
جوانا :العمق مو بالوقت
ابتهاج :يلا بس انخمدي قبل ما تجي جدتي
جوانا :شرايك تنامين عندي اليوم ؟
ابتهاج :ليه العنا وسريري فوق وش زينه
جوانا :كذا بس
ابتهاج بسخريه :ولا صديقتك الجديده قالت لك قصص تخوف وما تقدرين تنامين
جوانا :هاهاها يلا بس انقلعي
خرجت وبقيت جوانا تقلب بهاتفها دخلت تطبيق الانستقرام اخيرًا وفتحت قصتها لتشاهد الردود على الصندوق الذي وضعته بأسم "بكل مصداقيه مشاعركم لي"،وكانت الردود طبيعيه من صديقاتها الا حساب غريب كتب لها :اكرهك
جوانا بسخريه :تكرهيني ؟ عساك بجنوبيه تدعي عليك
من باب الفضول دخلت الحساب وكان حساب ولد بقيت تقلب بمنشوراته ،ودون قصد وضعت له إعجابًا :الله يفشلني الله يفشلني
دخلت الرسائل وكان هناك طلب وحيد جديد دخلت اليه وكان من نفس حساب الولد كتب لها :يا رخصك تحطين لي لايك وانا اكرهك
اخذت نفسًا عميقًا وردت عليه :وانت يا هوسك فيني تراقبني وانت "تكرهني"
:انا مهووس فيك؟مين انتِ؟
جوانا :مالك دخل مين انا ابلع بلوك وانقلع
اغلقت هاتفها وخلدت للنوم بعد لذه الأنتصار
...
هيام :حسن
حسن :هلا
هيام :اذا بترجع بيتك خلاص انا هنا
حسن :شوي بس بحط الماي
هيام :معليك انا بحطه انت روح عادي
حسن :يعطيك العافيه
هيام :الله يعافيك
فتحت صنبور الماء لتعبئ الحوض وسمعت صوت ضحكات ليست بغريبه عليها تبعت الصوت حتى توقفت عند مصدره :يبه
عبدالعزيز:هيام ،يا بعد حيي تعالي سلمي على عمك بندر تونا كنا نتكلم عنك
تجمدت مكانها وبلعت ريقها :انتوا هنا ؟
عبدالعزيز:اي احنا هنا تعالي عطي عمك بندر علومك يقول من زمان عنك
دمعت عينيها :اشتقت لكم
بندر :ياعيوني احنا بخير ،وانتِ شلونك؟
هيام ببكاء :لا مو بخير اخذتني الدنيا وودتني وجابتني وانتم مب حولي اشتقت لكم حيل اشتقت لكم
عبدالعزيز :ترا الخير مكتوب لك لا تجزعين ولا تستعجلين عليه اصبري
اقتربت لتحضن والدها لكنهم لم يكونوا سوى أطياف موتى ،فقط أطياف موتى زارتها في المنام ،فتحت عينيها وهي لا تتمنى النهوض من ذلك السرير فدخلت نجد :هيام
هيام :طفي المكيف
نجد :اليوم صحيت قبلك احتسبها نقطه بصفي
جلست هيام ومسحت وجهها الذي ترتسم به ملامح الحزن
نجد :شفيك بسم الله عليك
ضمت قدميها وتحدثت براحه لنجد :حلمت فيهم
نجد :مين؟
هيام:ابوي وعمي بندر ،كانوا جالسين بجلسه المزرعه ويضحكون سمعت صوتهم من بعيد ورحت لهم لقيتهم جالسين قلت لهم :اشتقت لكم ،قالوا :احنا بخير
نظرت لنجد وابتسمت بينما عيناها تدمع :وجوههم كانت سعيده وابوي قال لي :ترا الخير مكتوب لك ،كانوا يبشروني بشيء حلو
ابتسمت نجد ومسحت على ظهرها :اكيد هم بخير دامهم قالوا لك كذا
هزت هيام رأسها بالايجاب :يمكن اروح لهم قريب
عبست نجد بصدمه :وش ذا الكلام هيام ؟
هيام :مدري فكري فيها وش فيه شي حلو بذي الدنيا ؟ مافيه شي كلها هم ونكد ولا لي فيها احباب ولا شي بس اني اروح لهم واقابلهم هذا خير
نجد :وربي انتِ مجنونه كيف مالك احباب؟ وانا
هيام :اقصد مالي اهل
نجد :مو قلنا احنا نعتبر أهل لبعض ؟
قامت نجد وخرجت :تشفقك على الموت ذا ما ابي اسمعه
لحقتها هيام وتنهدت :نجد معليش ترا ما كنتِ ببالي يوم قلت كذا ولا انتِ عندي غاليه
نجد :طيب
هيام :وش حركات المتزوجين ذي ولله انا بدونك ولا شي لا تزعلين
التفتت لها نجد :ترا مو حلو مره مو حلو
انتبهت هيام لعيناها الدامعه :تبكين؟
نجد بغصه:اي ابكي كل الي احبهم يستبشرون بالموت وكأني مو موجوده وكأني ما بحزن عليهم
هيام :نجد ! ما كان قصدي محد يعرف يومه الا ربي
حضنتها :آسفه ولله ما كان قصدي ابد
نجد :ولله صرت أخاف أفقدكم خلاص
ابتعدت عنها هيام ونظرت لوجهها :معليك مارح تفقديني ولا رح ترتاحين مني مناشبتك انا ،لأننا قلنا :تضيع نجد دون الهائمين بعشقها ويضيع الهيام لولا تراب نجد
مسحت نجد دموعها :طيب خلاص ،الحين بنروح عند ابوي جا من الخرج
هيام :ما تلاحظين من يوم جينا نخلص مشاويرك بس انا مشاويري مسوين لها توقيف؟
نجد :انا مشاويري قصيره الامد بس انتِ بنطول
هيام :طيب يلا بسرعه اذا رجعنا اناقشك بأفكار المزرعه
نجد :الاولى عجبتني بس ما اظن تعجب صقر
هيام :مو لازم تعجبه انا يوم شفته رفضها جاني شغف اكثر انفذها
نجد :خلاص نشوف اذا رجعنا
هيام :اطلبي اوبر لين اتجهز
نجد :وغيث؟
هيام :لو لاحظتي قال مدير اعمال مو سواق
نجد :تراه واقف برا
هيام :قولي له يروح
نجد :ماهو سواق عشان نقول له كذا نروح معاه عادي وبعدين نقول له خلاص لا عاد  تتعب نفسك معانا
هيام :طيب خلاص اطلعي وقولي له شوي وأجي
نجد :لا تتأخرين
...
أوس :صقر
صقر :ما قلت لا تدخل المكتب بدون ...
قاطعه أوس :مو وقتك جدتي جت وواضح معصبه تبي تكلمك
صقر :خلها تجي
دخلت الجده وضحه :انا جايه بدون ما تسمح لي
صقر :ما قلنا شي كله حلالك تفضلي
الجده وضحه :وش مسوي ذي الايام ؟
صقر :الحمدلله ربي موفقني والشغل ماشي تمام
الجده وضحه :اقصد البنت
صقر :البنت؟
الجده وضحه :جبتها صح؟
نظر لها بصمت طويلًا ثم نطق :اي جبتها
الجده وضحه بحده :انا مو قلت حرام تدخل بيتي؟
صقر :مو ببيتنا
الجده وضحه :بالمزرعه بمزرعتي
صقر :حقها ذاك
الجده وضحه :مالها حق ستين مره قلت لكم
صقر :لا حقها ونص
الجده وضحه:تراددني؟
صقر :اذا على الحق براددك هذا إنتِ معلمتني إياه
الجده وضحه:ماهو حق أنا اعرف اشياء انت ما تعرفها
صقر :مثل أيش؟
الجده وضحه :ماهو لازم تعرف
صقر :مثلًا كيف مات ابوها ؟
الجده وضحه :كيف مات ؟ حادث
نظر حوله ثم لها :تراني أدري انه قتل
الجده وضحه :وهي ما تدري راحت عاشت حياتها ونست كل شي ورجعتوها عشان تدري ؟
صقر :لو انا محلها بتمنى أني أعرف ،خصوصًا أنه القاتل للحين مجهول
الجده وضحه :لا تحط نفسك مكانها وانت وين وهي وين
دخل غيث :السلام عليكم
صقر :استأذن وأدخل خمسين مره قلت لك
غيث :ولله الامر عاجل شف الاخبار
صقر :أي اخبار ...