لمحةٌ من الماضي
بندر :يلا نشوفكم على خير ان شاء الله
ابو ناصر :وخلص العزا ،الله يرحم عبدالعزيز وجميع موتى المسلمين
تنهد بندر :الله يرحمه
ابو ناصر :بنته عند بناتك صح؟
بندر وكأن باله غير حاضر:اي
ابو ناصر :وش بلاك يا بندر ؟
بندر :بلاي أنه عبدالعزيز شهيد
ابو ناصر :كيف شهيد؟
بندر :مقتول مقتول
تلون وجهه بالرعب :كيف عرفت؟
بندر :كلمني قبل يموت ،وترا القاتل يقول ابلحق اهله كلهم واذبحهم ،يعني وده يلحق هالصغيره المسكينه وعمتها
ابو ناصر :ما مسكوه الشرطه؟
تنهد بندر:باقي يحققون ،لكن انا بخليها عندي وبربيها مع بناتي لين تكبر وياخذها ولد الحلال ووقتها برتاح
مسح وجهه وسند ظهره على الكرسي :ولو ياخذها واحد من عيالي افضل لها وأقر لعيني
ابو ناصر :بيحلها ربك يا بندر لا تحرم البنت من حياتها
بندر:انا يوم توفى ابوي ما حزنت كذا عبدالعزيز غير موته قهرني الله يرحمه
ابو ناصر :الله يرحمه
...
صقر :الو ،احنا محولين لك قبل شهر وش تبين أكثر ؟
:برجع ديرتي
صقر :كم تبين؟
:ما ابي شي برجع
صقر :ما تكفيك السعوديه زحمه زحمه الناس واقفين بنحور بعض لا تجين
:ترا ادري ان هيام جتكم ...بجي وبسكن بالشمال مو عندكم ولا بتدري بي اصلًا
صقر :طيب بس لما تجين نوقف تحويل خلاص
:لا ما اتفقنا كذا بندر موقع انه بيتكفل بعيشتنا بس ما حدد اذا رجعنا ولا لا
صقر :ان شاء الله
اغلق هاتفه وتنهد :يا طيبتك الزايده يا يبه
أوس :وش؟
صقر :مالك دخل
أوس : خاتم عمي ابو هيام عطيت هيام
صقر :وخاتم ابوي؟
أشار بيده :معاي
صقر بسخريه :اعتبره خاتم زواجكم الوهمي
أوس:ياخي انت لو تسد حلقك ابرك لك
صقر :قم شوف إيميلك بس عندك شغل
أوس :ترا بكره السباق
صقر :ادري ،مين تشجع؟
أوس :اشجع الي يفوز
صقر :جوك نايم
أوس:تبي الصراحه؟
صقر :اي
أوس :الصراحه اشجع الي يميل له قلبي
صقر :مين ؟
هيام :السلام عليكم آل محسن كويس انكم بقاعه الاجتماعات
أوس:وعليكم السلام والرحمه
صقر :وش جابك تعكرين يومي ؟
هيام :غيث
غيث :هنا انا لا تصرخين
هيام :عطيتك ايبادي يوم دخلت؟
غيث :لا
نجد :عندي ايبادك بس انك تركضين ركض
هيام:كيف اشبكه بالعرض مين يعرف
تحرك صقر بكرسيه نحوها فداس الكرسي قدمها فصرخت:حسبي الله ونعم الوكيل فيك!
صقر :شفيك !
هيام :رجلي رجلي جيبوا لي كرسي
سحبت لها نجد كرسي ووضعته خلفها :اجلسي
جلست على الكرسي ونظرت لحذائها الابيض الذي تلطخ بلون الدم :دم رجلي !
نجد :اشوف فصخي جزمتك
أوس :وش ذا الكرسي الي يجرح بذا الشكل
هيام :مو الكرسي ذا صقر
صقر :وش ذا الجرح الصغير دلوعه
نجد :مو دلوعه عندها فوبيا من الدم
غيث :فيه تساؤل ببالي بس ...خلاص
نجد :انت بعد اسكت وجيب الاسعافات الاوليه
غيث :طيب
صقر :مافيها شي بس جيب مقص اظافر تقص اظافرها تقل اظافر ساحره توم وجيري
هيام :اذا انا ساحرة توم وجيري انت الكلب حقهم
ضحك أوس فنظر له صقر ثم كتم ضحكته وتنحنح
غيث :جبت اسعافات
نجد :غيث ذي طفايه حريق
صقر :اي كويس عشان نطفي غيرة هيام من نجاحي
قامت هيام بغضب :انا ما اعرفك اصلًا عشان اغار منك
استند على الكرسي براحه :شفتوا دلوعه مافيها الا العافيه
هيام :استفزازك...
غيث :عندنا اجتماع بعد ساعتين لازم نخلص ذا الاجتماع الحين
هيام :طيب الحين
تنحنحت ورتبت شكلها:طيب شبكتوا العرض
صقر :اي ...انتِ وهالعبايه مسويه رسميه وحقت اجتماعات
هيام :كل تبن وبعد يدك عن خدك تنرفزني ذي الجلسه
صقر :انا اتأمل الاجتماعات كذا
هيام :ما علينا خلوني اشرح لكم مشروعي الي بتوافقون عليه رضًا وغصبًا
صقر :اختصري
نجد :كلامها ثمين لازم تسمعونه
هيام :هذا شعار المشروع
صقر :خايس ليتك ما سويتي
أوس :حلو بس يحتاج تعديل شوي
تنهدت هيام :يا سبحان الله فرق السما عن الارض،المهم هذا هو المشروع بيصير نادي فروسيه بإشتراك شهري أو سنوي أو vip أو تجربه واحده ويكون مبلغها رمزي،رح يكون فيه لكل الفئات العمريه مع مدربين مختلفين وفيه قسم مخصص للبنات لو ما يحبون يتدربون مع رجال أو يشوفهم رجال
أوس :حلو بس كيف بيكون تصميم المزرعه عشان يلائم هذي الفكره
هيام :وانا جايه هنا ابي مهندس يسويه
غيث :طيب بجيب قائمه مهندسين اشتغلنا معاهم
هيام :تمام مشكور
صقر :كملي كملي بسرعه
هيام :الاشتراك الشهري بيكون ٥٠٠ ريال
صقر :اي
هيام :٥٠٠ ضرب ١٢ بيصير سته الاف نخصم منه الفين لعيون المطفرين يصير اربعه الاف ،والاطفال الاشتراك الشهري ٢٠٠ والسنوي ١٠٠٠ ،التجربه او الزياره الوحده بتكون ٤٠ ريال للكبير وما دون ١٢ سنه ببلاش
صقر :يجيك واحد اطول مني ويقولون اهله هذا عمره عشره
أوس:طيب من وين بتجيبين مدربين ومن وين بتجيبين لهم راتب
هيام :انا بدرب البنات وانت تدرب الصغار وصقر يدرب الكبار
صقر :لا مستحيل
أوس :صح ما يجي أساسًا لازم يكون المدرب عنده شهادة خبره أحنا ما عندنا الا خبره فرديه ولاهي ذاك الزود بعد
نظرت لهم هيام بورطه :طيب وش اسوي
صقر :مصيبتك عاد تصرفي
أوس :لا بكره لو فزتي استغلي السباق وتكلمي عن المشروع وبعد فتره اعلني عن وظائف لمدربين بالشروط ويجونك صفوف
نظر له صقر :وانت واثق انها بتفوز
ابتسمت هيام :اي بفوز ان شاء الله
صقر :طيب تخطينا سالفه المدربين مع ان ما ظنتي تفوزين كم ميزانية المشروع
هيام :الميزانيه؟
صقر :اي
هيام :نجد
نجد :ما سوينا
ضحك صقر بسخريه :مشروع شكبره شعرضه بدون ميزانيه؟
هيام بصراخ :مستفز ،الميزانيه وظيفه المحاسب
صقر:ولله واضح انك حقت عروض ومشاريع
أوس :صقر بلا استنقاص كلنا نذكر يوم قدمت مشروع تأثيث مجلس واحد من التجار وعرضت له صور هيفاء وهبي بالغلط
نجد:اوووه كراش قوي جدًا
غيث :اي كان معجب فيها
صقر :غيث اسكت
ضحكت هيام وقالت بسخريه مقلدة لهيفاء وهبي:بطل يا ود انته شقاوه بقى ...
صقر :اخيس اجتماع بالحياه
هيام:معليش المره الجايه نبدا العرض بفيديو كليب هيفاء وهبي وبيعجبك ان شاء الله
صقر بصراخ:اطلعوا بسرعه انتهى الاجتماع
هيام وهي خارجه بنفس السخريه :بقربك خبيني اغمرني ودفيني انا من دونك انا برداني اح
نجد :هيام عيب
هيام :لقيت لي زله علي الحين اذل امه
نجد :عيب تسوين ذي الحركات قدام رجال
هيام :وش ؟
نجد :حركات هيفاء وهبي غنج ودلع حتى حرام مو عيب خليك محترمه بحركاتك كان ما بتتحجبين
هيام :اف نجد ليتك قرصتيني يوم شفتيني اسويها احس بذنب
نجد :الله يهديك
هيام :يارب سامحني استغفر الله استغفر الله ...لا تكلميني لين نوصل البيت بقعد استغفر واذا كلمتك انا قولي اسكتي واستغفري
نجد :ان شاء الله
هيام :استغفر الله العظيم واتوب اليه اي صح ...
نجد :اسكتي واستغفري
هيام :ربطه أوس
نجد :اسكتي واستغفري
هيام :صبر صبر بعطيه ،أوس
أوس :هلا
هيام :ربطتك معاي
أوس :خليها
هيام :لا تحتاجها
أوس :معاي غيرها عادي
هيام :يمكن تضيع دايم الربطات تضيع
أوس :طيب خلاص هاتي
تفحصت معصميها لكنها لم تجد الربطه :شكلي ربطت فيها شعري
أوس :خلاص أجل خليها
هيام :لا بفكه بفكه
أوس :خليه كذا حلو
أكمل وهو ذاهب :بالحجاب بتكونين أحلى
تنهدت هيام خلفه وعادت لنجد :دايم اتفشل معاه
نجد :لأنك متعوده على اسلوب الهواش صعب عليك تتواصلين مع أوس
هيام :صح ولله ،تبين نروح نتغدا في كينز؟
نجد :قدام
هيام :بعدها بروح اسوي رخصتي الحمدلله طلع سهل اغيرها واحولها لسعوديه
نجد :اخيرًا تعبت وانا سواقه
هيام :بس برضو بتصيرين معاي بمشاويري
نجد :عادي اهم شي ما اسوق انا
هيام :الله يا الدنيا يوم بلندن تقولين يارب يفتحون السواقه بالسعوديه والحين طفشتي
نجد :اي طفش امشي بس
...
ميلاف:ماما
مها :صباح الخير ،شلونك
ميلاف :دودو
مها :كيف اصارحك ان هالدودو بيقعد ثلاث شهور بيدك
الطبيب :السلام عليكم
مها :وعليكم السلام
الطبيب:كيفك ميلاف
ميلاف :دودو
الطبيب :تبين نحط عليه لصقه ؟
ميلاف :هاه؟
أخرج من جيبه لصق شكله طفولي :اختاري وحده
ضحكت ميلاف:واو ماما
ابتسمت مها :حلو خذي واحد
اشارت بسبابتها :واه
مها :اي واحد بس
اشارت على احد الرسومات فأخرجها ووضعها مكان الجرح :الله
الطبيب :حالتها كويسه لكن مارح نطلعها قبل ثلاث شهور نحتاج نتأكد من نمو العضو الجديد بشكل سليم وآمن ،ما ندري برا ممكن فيه دخانات او تلوث يأثر عليها
مها:اهم شي انها بخير
الطبيب :الحمدلله
ميلاف:بابا بابا
نظرت مها خلفها وكان راكان يغطي وجهه بلعبه فأبعدها :الدكتور هنا ،السلام عليكم
الطبيب :وعليكم السلام
راكان :كيف حالتها؟
الطبيب :توني كنت أكلم الأخت مها عنها عندي عمليه بعد ساعه بروح خلها هي تقول لك معليش
راكان :لا مافيه مشكله يعطيك العافيه
خرج الطبيب فجلس راكان بجانب ميلاف ومد لها اللعبه فرمتها جانبًا واشارت للاصق على صدرها :شوف الله
راكان :الله وش هذي؟
مها :الدكتور جابها
راكان :وش يقول عنها ...يا أخت مها
مها :يقول انها بخير بس بيخلونها ثلاث شهور عشان يراقبون نمو القلب بشكل افضل
راكان :الحمدلله ،نمتي ؟
مها :لا
راكان :ما امس صاحيه ؟
مها :بس غمضت شوي وخلاص
راكان :طيب انا بتنوم معاها اذا بترتاحين
مها :عادي بتحمل لين الليل وننام انا وياها
راكان :وين اهلك حجزوا فندق ؟
مها :لا راحوا يجيبون اغراضنا
راكان :كويس بعدين ...اذا بيسكنون معانا بالبيت
مها :لا بيحجزون فندق
راكان :لا يتكلفون عندنا البيت واسع
مها :بيتكم مافيه مره وحده تجلس مع امي بيصير الوضع غريب ،نجد امس سولفت معاها تقول انها مع صديقتها
راكان :انتِ معاها
مها :ماني زوجتك انا حالي من حالها
تنهد راكان :طيب وش السواة؟
مها :تراها ماهي معضله عادي يستأجرون بفندق واصلًا كلها اسبوع وبقنعهم يرجعون
راكان :وبتجلسين وحدك هنا؟
مها :اي عادي عشان ميلاف تهون كل مخاوفي
راكان :براحتك ،بس بتتحملين ان طليقك كل يوم بيقابلك لأني بجي اشوف ميلاف
قامت مها :اذا جيت انا بطلع امشي شوي وافكك رجولي
راكان:ترا بعد نقدر انتِ يوم معاها وانا يوم
مها وهي خارجه:ما ابي بجلس معاها كل يوم
نظر راكان لميلاف :ما عندك عذر اذا كبرتي ما تبرين فينا شوفي وش نسوي عشانك ،لا تجحدين فديتك
ميلاف وهي تشير للاصق:شوف
راكان :بدينا جحده من الحين جايب لك لعبه بكبرك وفرحانه بستيكر الدكتور ،من زينه عاد
ميلاف :الله
راكان :اي حلو حلو شوفي جبت لك دبدوب شوفي عينه وين عينك؟
ميلاف :لا
راكان :ولله يا بنت الحلال مشوارنا شكله طويل وش هالنكاده من الحين على الاقل انتظري لين تكبرين شوي وبعدين عقي فيني لين تشبعين
ميلاف :نونو؟
راكان :محد نونو الا انتِ
...
هيفاء :ياسهام يا شروق وينكم أخواتي الحلوات
شروق :مشغوله ما بمسك ولدك
هيفاء :ضروري ! وسالفه حيل قويه
شروق :وش؟
هيفاء :وين سهام بقول لكم مع بعض
سهام :هنا
هيفاء :صايره حلوه من يوم انخطبتي ماشاء الله
سهام :انطمي
هيفاء :المهم جايبه فهودي وبروح مع عمتي بنخطب ليزيد
شروق :ماهي سالفه قويه زي ما توقعت عادي كل الناس يخطبون اكبر دليل الهبله الي عندك مين كان يتوقع انها بتوافق
هيفاء :اصبري هو تورط مع وحده واهلها كشفوهم وبيتزوجه غصب
شهقت شروق :ما توقعت كذا !
هيفاء:بروح معاهم واشوف البنت ،على حسب كلام خلف الي أخذه من يزيد أنه هو والبنت مظلومين
سهام :يمكن منجدهم يحزنون
هيفاء :يلا يلا بتأخر ،اذا جاع مسويه له مكرونه تلقينها باللانش بوكس بالشنطه
شروق :وجايبه له لانش بوكس بعد لو دخلته المدرسه اصرف
سهام :يمه شروق يحزنون مساكين
شروق :احس وناسه زواج غصب
سهام :انا وهو زواج رضا احس اني بموت كيف هم
شروق :اخيرًا طلعت كلمه منك انك راضيه على ذا الزواج
سهام :بس احس اني بموت
شروق :بالحب
سهام :انقلعي
شروق :بس ملاحظه جهاد اخر يومين ما يدق كثير زي اول شفيه؟
سهام :مدري عنه أمس دق قبل أنام وقال إن شاء الله يومك كان حلو تصبحين على خير وقفل
شروق :so cute
سهام :احسه نايم كان
شروق :ياعمري وتعرفين نومه فديتكم بس
سهام :شروق ترا الموضوع بالعقل اي احد بيدق عليك بالليل ويقول لك كذا بتقولين شكله نايم ويهلوس
شروق :طيب خلاص خلاص تسولفون بالواتس؟
سهام :لا بس لأني مسويه السناب برقمي ضافني سناب ويسوي معاي ستريك
شروق :وش يرسل؟
سهام :يصور لبسه للدوام كل يوم ويكتب اوتفت اليوم وهو نفس اللبس عسكري
شروق :وانتِ وش ترسلين؟
سهام :شاشه سودا
شروق :وع ياسماجه فيكم،ارسلي له قهوتك نص عينك ملابسك رسمك اي شي مو شاشه سودا
سهام :ما ابي ادخله بحياتي الخاصه
شروق بضحك :حبيبتي هو بذاته وجلسته معاك والاشياء الي بتسوونها بتصير حياه خاصه حتى امي وابوي ما بيدرون فيها ولا بتسولفين فيها بينك وبين نفسك
بلعت ريقها :شروق توني بديت اشوفه روتين بحياتي واتعود خوفتيني
شروق :خلاص دامك بتتعودين انا بسكت وش يقول المثل؟ فلها وربك يحلها
تنهدت سهام :حسبي الله عليك
في خارج المنزل كانت هيفاء مع خلف في السياره :اصبر لا تحرك بحط العدسات
خلف :وشوله العدسات وهو زواج غصب ما بيطالعون فيك
هيفاء :عشان نفسي احط عدسات عشان نفسي واستانس
خلف :انا حتى شماغي ما كويته
هيفاء:مرتب مابه شي
خلف:ما تشوفين الي اشوفه
هيفاء:الي تشوفه انت بس تشوفه
خلف :الله ييسرها بس خاطري تنكد عن يزيد
هيفاء :وعسى ان تكرهوا شيئًا وهو خير لكم
خلف :انا خوفي بس ان السالفه صدق ولعب فيها
هيفاء:خلف وش الي خلاه غير عنك عشان يسوي ذا الشي كلكم متربين بنفس البيت ومع بعض ...ولا حتى انت كنت تلعب بالبنات؟
خلف :ما لعبت بأحد أنا مسكين تخرجت من الثانوي ما خذت نفس على طول على الجامعه ما خذت نفس على طول توظفت ما خذت نفس تزوجتك وتنفست اخيرًا
هيفاء :يا عمري يعني انا راحتك ،يلا حرك خلاص ،وصح بسألك كذا ابي اتذكر كيف كان اسلوبي معاك ايام الخطوبه؟
خلف :عادي مابه شي نفس الحين
هيفاء:طيب لو كنت استحي مره مره وكل ما دقيت اقفل بوجهك ويوم الخطوبه ما كنت ابي اكلمك واهمس لأبوي الكلام الي ابيك تسمعه وش بتسوي ؟ من فطرتك كذا كرجل
خلف :وش الطاري؟
هيفاء :اخلص علي
خلف :ولله من وجهه نظري بشوفك معقده
شهقت هيفاء :اجل راحت اختنا علينا
خلف :وش؟
هيفاء:الي قلته كله توني بأختي سهام ما ترد على خطيبها وان ردت تقول طيب مع السلامه مشغوله
خلف :شوفي انا قلت وجهه نظري مو كل الرجال مثلي يمكن فيه رجال يشوفونه حياء ويعجبهم انها تخجل منهم ويتطمنون انها ما تقدر تكلم غيرهم
هيفاء :وش درانا احنا عن جهاد ! سهام مجنونه مجنونه بتذبحني
خلف :وش عليك منهم يحلونها بينهم بين
هيفاء :زي ما تخاف على اخوك انا اخاف على اختي ابي لها حياه زوجيه سعيده
خلف :ولله شوفي وصلني العلم بس سكتت
هيفاء:اي علم؟
خلف :يزيد يجلس مع خويه الي يقرب لجهاد
هيفاء:اي اعرفه
خلف :المهم جهاد جلس معاهم يوم وكلمهم عن انه يبي يملك عليها بعد العيد
هيفاء:صدق؟
خلف :ذا هو يعني رغبه من قلبه مدري كلم اهله ولا كلم ابوك مدري ما سمعت شي انا
هيفاء :عادي عادي اهم شي اعرف عن نظرته لها
خلف :افتحي جوالي شوفي ارسلوا الموقع
هيفاء بسعاده:ما اعرف رمزك
خلف :ولا بعلمك حتى بأحلامك، حطيه قدام وجهي يفتح
هيفاء :ياربي من الغثاثه ،من زين هالوجه عاد اكيد محد بيكلمك من قبح وجهك
ضحك خلف طبعًا :ما نوصل لزين ام الفهد
هيفاء :منهي ذي؟
خلف :انتِ
هيفاء :تصدق اني تعودت على اني اقول له فهودي وتناسيت ان اسمه فهد ،لو انه يسمع كان حسب اسمه فهودي
خلف :الاسبوع الجاي بتطلع السماعه والدكتور كلمته عن الكلام وكذا قال لازم نكلمه بشكل كويس عشان يقدر يتكلم بشكل كويس
هيفاء :يعني خلاص معد بقول له فهودي؟
خلف :اي ،الحين افتحي اشوف الموقع
هيفاء:يمه الموقع يخوف
خلف :وين؟
هيفاء :برا الرياض بعيد مره
خلف :هيفاء يمكن انتِ موديه نفسك هناك الموقع عليه نقطه زرقاء مدري حمرا
هيفاء:لا ولله خلف شوف برا الرياض
خلف :ولله وتورطنا ،وش هالخطوبه الي يقررونها بيوم واحد ولا يدرون عن اهل البنت ولا شي
هيفاء :الحمدلله وصلت طلبيتي امس
خلف :فستان العيد ذا صح؟
هيفاء:اي يعني لازم نروح السوق
خلف :لا حول ولا قوة الا بالله
هيفاء :عادي حبيبي ما بطول كل شي عندي بس ابي فستان وكعب يناسب الفستان واكسسوارات وعبايه
خلف :وهذي الاشياء بتتكاثر فجأه بلقاك تتقضين لفهد وبعدين تروحين تشترين شنطه بعدين تقولين جا روج هبه ابيه
هيفاء:وش عليك مني دامه من راتبي!
خلف :المشكله انك تخلصين راتبك وتحولين على راتبي
هيفاء:صح ،معليش حبيبي
خلف :بلا تمصلح
هيفاء :ولله ولله احبك وشوف اذا رجعنا البيت بسوي لك السلطه الي تحبها وبكره العصر بسوي لك عصيده تتقهوى عليها
خلف :قاعده تغريني بس باقي شي واحد بخاطري لو جبتيه بعطيك صرافتي واقول تصرفي
هيفاء :احط زعفران بالقهوه؟
خلف :لا باقي لك محاوله
هيفاء :غش المفروض ثلاث محاولات
خلف :طيب محاولتين باقي
هيفاء :لمح لي
خلف :السلطه مقبلات لازم اكل دسم وراها شي تسوينه واحبه دايم
هيفاء :كباب ؟
خلف :ماقد سوينا كباب بالبيت
هيفاء :مو كباب قصدي شورما
خلف :اي صح
هيفاء :يلا هاتي صرافتك
خلف :انا قلت كذا؟
هيفاء:اي
خلف :عندك شهود؟
هيفاء :حيوان
خلف :اذا سويتي لي كل ذا بسلمك الصرافه
هيفاء:لحظه لحظه بصور وانت عيد قول
خلف :اذا جبتي لي كل ذا بسلمك الصرافه
هيفاء :اذا جبت لك ايش؟
خلف :اليوم بالليل شورما وسلطه وبكره العصر عصيده
هيفاء :اي خلاص
خلف :ساند هيلب زوجتي تهددني
هيفاء :انقلع
خلف :اضافه لذلك كله بتعامليني بحنيه لين بكره
هيفاء بسخريه :تبي اطبق نصايح ياسمين عز ولا لا ؟
خلف :بكيفك اذا كانت ترضيني
هيفاء:يا استاذ للتفخيم خلف للتنعيم
خلف :لا ما عجبني
هيفاء:ياخي ماش وجهك ماهو وجه حنيه تعودت على المناقره
خلف :توقعت تتنمرين على كل الناس الا انا بس صارت من الصبح وانتِ تتنمرين علي ترا كله لحيه اسبوعين وترجع
هيفاء:من سبّك حبك
خلف:هذي حنيتك يعني؟
هيفاء بضحك :حنيه بلمسة هيفاء
خلف :الله يخلف علينا بس
...
ابو عمر :هاه وش صار ؟ لبست ولا باقي ؟
ام مهيار :لبست وتكحلت واستشورت وما بتسوي الا الي يسرك بس بطلبك طلب ولا تردني
ابو عمر :نرفضهم مافيه
ام مهيار :لا والي يعافيك ،بنتي الوحيده ذي وودي افرح بها وبعرسها ودي احجز لها قاعه والبسها فستان ابيض واجيب مصوره وافرح فيها لا تكسر بخاطري يابو عمر
ابو عمر :والمهر كله يروح وانا وش استفدت؟
ام مهيار :قول لهم ابي المهر كذا كذا وغير مصاريف الزواج عادي الناس يسوونها
ابو عمر :تقولينها ؟
ام مهيار :اي
ابو عمر :بفكر ،بس روحي شوفيها هالخبله حقتك يمكن تقوم تغير وتنام اقسم بالله لأسحبها من اذنها وهي ببجامتها لين عندهم
مهيار بغصه :جيت ما غيرت ولا شي
ابو عمر :اجلسي قدامي
جلست مقابله وصمتت لدقائق بينما هو ينظر لها :يا زينك وانتِ بلا حس ،حصني بنتك يا سميه
ام مهيار :بسم الله عليك ياحلوك بهالفستان ماشا...
قاطعتهم مهيار :يعني الحين بترضون بخاطري بهالكلمتين؟ طيب رضيت والاثار الي بجسمي وش ينسيني اياها؟
اشارت لها امها لتسكت لكنها تجاهلتها :ما اعرف انا وش اذنبت بحياتي عشان يبلاني ربي بأهل مثلكم
عض أبو عمر على اسنانه بغضب وقال :ابوك الي اذنب ! وانتِ الي بتتحملين ذنبه ،وش بلاك انا توني اقول يا زينك بلا حس
دق الباب فقام ونظر لها :ولله ان تكلمتي كذا قدامهم اني لأشلوطك بالحزام وازيدك على الاثار اثار غيرها
ذهب ليفتح الباب فغطت وجها بكفيها وبكت فأقتربت منها أمها :خلاص يا بنيتي خلاص
مهيار :وبعدين تقولون ليه تخربين اكلك وانتِ فيك سكر ،عشان اموت عشان اموت وارتاح وليتني مت يومها ولا اخذني هالغبي الي ...
دق الباب الاخر فقامت ام مهيار :خلاص امسحي دموعك عانيهم جو الحريم
ذهبت وفتحت لهم الباب :ام مهيار؟
ام مهيار :اي هلا حياكم
دخلوا الى المجلس فقامت مهيار
ام مهيار :سلمي عليهم
ام خلف :ذي مهيار؟
عبير تهمس لهيفاء:حلوه بس غريبه شوي
هيفاء :زواج غصب وش تبينها تسوي ،احس اني وقحه بذي الكشخه بروح الحمام افك العدسات واخفف شوي ...لو سمحتي
ام مهيار :هلا
هيفاء :وين الحمام ؟
ام مهيار :ذاك الباب
في جهه أخرى
ابتسم ابو عمر فور رؤيه يزيد وقال ساخرًا :ولله طلعت رجال توفي بوعدك
تنهد يزيد بضيق فربت خلف على فخذه
ابو عمر :ايه ما بتدخلون بالموضوع ؟
ابو خلف :الا يا بو ...
ابوعمر :ابو عمر
ابو خلف :يابو عمر ،بس بغيت اسألك عن حال البنت لأنه مجهول لنا
ابو عمر :ابد ولله ابوها اجرم بحق واحد وهارب للحين ما لقيناه وانا من حسن نيتي خذيت اختي وبنتها وخليتهم عندي،اصلًا ابوها من الاول نكره مدري كيف ابوي الله يرحمه زوجه اختي
ضحك يزيد وقال بسخريه :وسبحان الله العرق دساس
ابو عمر :يا شيخ ذي نكره مثل ابوها ازوجها اقرب واحد في الشارع ولا همي لكن اختي بنت الحسب والنسب مدري كيف صارت
تنهد ابو خلف بضيق :شوف ولله يابو عمر انت واضح انك اصغر مني وتوك بالشباب عسى عمرك طويل وكله بالطاعات ،لكن خذها من نصيحه من باب اخو لأخوه لو كانت البنت بنت زنى لا تستنقص منها ياخي هي مالها ذنب بالي سبقوها ولا شي بالعكس المفروض حنا نجي نسألك عنها وتتكلم بكل طيب ان كنت مره تبي لها هالزواج
ابو عمر :كلام معبر بس ما اقدر اعتبر ،بتزوجونهم ولا لا ؟
ابو خلف :نزوجهم والشكوى لله
ابو عمر :المهر ميه الف من غير مصاريف القاعه والزواج والملكه ابيها بعد يومين الحين بوديها تسوي التحليل وهو يروح يسوي وخلاص الله يبارك لهم
تنهد خلف وقام :عن اذنكم انا بطلع السياره احس اني مكتوم شوي
ابو عمر :اذنك معك ،ترا واضحه الحركه تبوني اناديها يشوفها؟
يزيد :لا ما نبي نطول و...
قام ابو عمر :الا الا بناديها يا مهيار ،يا بنت ،يا سميه جيبي بنتك
دخلت مهيار بعد قليل فضحك خالها :هاه هذي هي بنتنا وش رايك فيها ؟
كان كل تركيز يزيد على عينيها التي كانت تفيض دمعًا ، تلك العينان أثبتت له كيف للخير أن ينقلب شرًا وكيف أن الحياه عملة ذات وجهين نصلح حياة بمقابل إفساد أخرى .
ابو عمر :خلاص روحي،الحين تطلعون من عندنا تحللون ويتم كل شي ان شاء الله
ابو خلف :ان شاء الله
ابو عمر :ولا تنسون المهر
...
ام هادي:عروستنا هنا ،مساء الخير
غاده :مساء النور
ام هادي :وش تسوين؟
غاده :شاهي تبين؟
ام هادي :سوي لي معاك وخلينا نسولف
غاده :ما عندي سالفه افتحي انتِ موضوع
ام هادي :امس قفلتي بوجه هادي؟
التفتت غاده اليها :معليش خالتي ذا ولدك البكر واحب اولادك لك وشايل كل البيت فوق راسه بس انه استفزني كنت بقول له انقبلت واشاركه شي من حياتي بس انه قال ليه نسيتي امي ! قلت له خالتي لقيتها قبلي جت وما تأخرت قال طيب ليش توعدين وانتِ ما توفين معقد معقد مدري كيف هو ولدك عقلي ما يستوعب الفرق
ابتسمت ام هادي :هو كذا طبعه يكتب كل شي بورقه وما ينساه ويحسب الناس نفسه
غاده :وصراحه الحين استفزني اكثر لما عرفت انه كلمك عن الي صار ولا اعتذر مني
ام هادي :تبين اعلمه عن انك توظفتي ؟
غاده :لا خليه لا تعلمينه لين هو يدق علي ويعتذر ويسولف زي المخاليق
ام هادي :ولله من اسمه له نصيب ماله بالسوالف واجد
جلست غاده بجانبها وصبت لها الكأس :طيب قد تكلم عني ؟
ام هادي :هو ما تكلم الا عنك
غاده :وش قال ؟ ما تحترم الوعود وتخون ومدري ايش
ام هادي :روحها حلوه عساها تقدر تحيي روحي
غاده :استنزفت روحي وروحه حتى نفس ما اخذت
ام هادي :معليك الا الصبر وخليك على حالك ،اهم شي انه هو وده فيك وقاعد يحاول عشانك
غاده :ما سوى شي خالتي بس يرسل هدايا ما ابيها ولله ما ابي لا جوال جديد ولا ورد ولا خواتم ولا شي ...بس ابيه يحبني مثل ما انه حبيته
ام هادي :طريقته بالتعبير عن حبه غير ،حتى انا تعبني معاه يوم ولدته وجيت برضعه رفض يرضع مني ثلاث ايام وانا احاول فيه وبالغصب رضي ويوم كمل سنتين وجيت بفطمه بالغصب انفطم
تلفتت حولها ثم امسكت يد غاده وهمست :كمل سنتين وست شهور وانفطم
ابتسمت غاده :يعني بالغصب يدخل شي جديد لروتينه واذا دخله بالغصب يتخلى عنه
ام هادي :بالضبط
تنهدت غاده براحه :خالتي انا شلت هم واجد انه الغلط مني بالعلاقه واستشرت كل الناس امي وخواتي واخواني وبنات عمي ،بس الي كنت احتاجه جيتك واستشارتك
ام هادي :كنتِ تتنظرين جيتي بس ؟ رقمي عندك لو يزعلك هادي بكلمه دقي علي وانا اوريك فيه العجب العجاب
ضحكت غاده :ما تقصرين
ام هادي :واعطيك سر ؟
غاده :وش
ام هادي :يحب انك تفهمينه
غاده :ما فهمت عنه شي
ام هادي :بفهمك انا ،خلينا نشغل كيد النساء إن شفته متضايق بقول لك ودقي عليه قولي احسك متضايق وان شفته فرحان قولي احسك فرحان بيشوف نفسه فيك ويتعلق بك
غاده:خلاص تمام انا معاك
ام هادي :هذا هو يدق ؟
نظرت لهاتفها وتنهدت :لا صديقتي
ام هادي :ردي عليها وتونسي معليك من هادي تراه خاتم بأصبعك
غاده :ما اترك خالتي سمحة الوجه وارد عليهم خليهم ،بسولف معاك دامك عندي
ضحكت ام هادي :براحتك
...
هيام :سبقتك
صقر :لأنك بنت دخلوك بسرعه
هيام :ماله دخل فيه بنتين غيري بالسباق يارب نفوز انا الاولى وهم الثانيه والثالثه
صقر بسخريه :بعدين تشلغون البنات البنات الطف الكائنات
هيام بنفس السخريه:وانت اذا فزت بتشغل هيفاء وهبي ،ترا ما نسيت بعد السباق لو فزت بتساعدني
صقر:وانا ما انسى
هيام:تبي ماي ؟
صقر :ما اخذ من العدو شي
ابتسمت هيام بإستهزاء :ترا بس برد لك حقت ميونخ ما ودي يكون بيننا دين
صقر :خليها بعد السباق عشان اضمن سلامتي
هيام :براحتك ...أوس
صقر :وينه ؟
اشارت له بيدها وصرخت :احنا هنا
انزل يدها :لا تصرخين
هيام :وش عليك مني !
صقر :تجمعين الصحافه علي
هيام :ياي من صغار الشخصيات
الصحفي :هل صحيح انك زوجه أوس آل محسن ؟
الصحفي الاخر:بما انك متواجده مع صقر بنفس المكان وشفنا بينكم تلامس يد وايضًا تتشاركون بنفس الهوايه هذا يعني ان بينكم شي
نظرت ليدها التي كانت بيد صقر وسحبتها :ما بيننا أي شي ولا عندي أي علاقه مع أحد لكن عندي مشروع
الصحفي :مشروع من أي نوع ؟
صقر :بنصرح عنه بعد السباق لأنه الان باقي ربع ساعه ونبدا
هيام :ما خليتني اتكلم !
صقر :انتِ جايه تتكلمين ولا تسابقين؟
هيام :مالك دخل
صقر :يلا بس روحي عني خليني اركز
هيام وهي ذاهبه:ليتك تفوز على ذا التركيز
بعد وقت بدأ السباق وكان سجالًا بين صقر وهيام الذان كانا لا يريان أحدًا غيرهم ،هي تسابق من أجل الحقيقه أما هو فسابق ليخفيها .ثوانٍ بسيطه تفصلهم عن الفوز ولذلك سيراجع الحكام الفارق الزمني ثم يعلنون الفائز .نزلت من فوق خيلها مرهقه ونزعت الخوذه ليتنفس شعرها فمد لها صقر ماءًا :ولله طلعتي منتي بهينيه
هيام :قلت لك ،سبقتك وبفوز وبتدور معاي الحقيقه
صقر :ثقتك تضحك ؟أجل وش بتسوين بالجائزه الماليه ؟
هيام :بتبرع فيها للأيتام الي كفلتهم
أوس :شوي ويعلنون
هيام :من وجهه نظر فنان مين فاز ؟
ابتسم أوس:ولله ماهو واضح
صقر :لا واضح مثل وضوح الشمس انا الفايز
نجد :انا من وجهه نظري هيام الفايزه
الحكم :الفائز بالمركز الاول وبفارق ثانيتان ونصف هو...
صقر :قال هو يعني انا
الحكم :او هي ...
هيام :هي يعني انا
الحكم :عفوًا هناك خطأ من الفريق،الفارق المذكور قبل قليل كان بين المركز الثاني والثالث
صقر :طيب كيف !
الحكم :معجزه غريبه ! لا يوجد فارق ولا جزء من الثانيه بين المركز الاول والثاني
هيام وصقر بنفس الوقت :ايش!
الحكم :وش نسوي فيكم اعجزتوا الحكام
هيام :طيب انت قلت الاول والثاني كيف السواه مين الاول والثاني ؟
الحكم :اقترحوا اننا نعيد جوله خاصه فيكم
صقر :اي؟
الحكم :بس اغلب الحكام رفضوا وبيحتسبون الفوز بالنسبه للي انطلق اول بما انكم بالنهايه متعادلين
هيام :يعني غيرنا ؟
الحكم :لا انتوا
صقر :طيب مين؟
الحكم :الاخت هيام الفائزه بالمركز الاول أما الصقر المركز الثاني
صرخت هيام وعانقت نجد :فزت
نجد :قلت لك بتفوزين
صقر :لحظه فيه غلط اكيد فيه واسطات اطالب بمحاكمه طاقم التحكيم وش ذا ال...
الحكم :هاردلك
أوس :خلاص صقر مو لازم كل شي على كيفك
صقر :وانت عاجبك صح ؟ فازت هيامك وفرحان فيها مبروك
أوس :قلت لك انا مع الي يفوز
صقر :ماني راضي بالنتيجه
هيام بسخريه :بلا حركات الدوافير خلاص انا فزت وانا دايم الاولى كان لازم تعرف من زمان
تجاهلها صقر وذهب فصرخت خلفه :طعم الخساره مر
التفت لها ولوح بيده :مو امر من نشبه الصحافه
أوس :معليك ما يسمحون لهم يجون الا بعد شوي،مبروك
ابتسمت بإتساع :الله يبارك فيك ،لا تنسى ترسمني
أوس :ابشري
نجد :احس اني بطير فيك أمري اليوم والي تبينه يصير
هيام :احس من عندك انتِ فكري وسوي وخططي وكذا
نجد :احتفال يعني ؟
هيام :افهميها مثل ما تبين
...
شروق:وبس يعني كذا صارت خطوبتك اسرع شي ،اسرع حتى من مكالمة سهام وجهاد
نرجس :جهاد ذبحني وده كل دقيقه يكلمها
شروق :هو ما يدري انها ما تتكلم الا ساعه في اليوم
نرجس بإستغراب :ساعه تجلس تتكلم بعدين تسكت!
شروق :لا يعني مجموع وقت كلامها باليوم كله ساعه
نرجس :اها ،حتى جهاد كان يتكلم بالقطاره الحين مدري وش جاه
شروق :اصابت سهام الحب فؤاده
نرجس :اصدق شي ...لحظه
شروق :وش ؟
نرجس :وش قلتي اسمها خطيبة يزيد ؟
شروق :مهيار
نرجس :جتني لحظه ادراك ،هذيك مهيار الي بكلية المحاسبه
شروق :صح ! وعندها سكر بعد
نرجس :متى محاضرتنا ؟
شروق :بعد خمسين دقيقه
نرجس :نروح نشيك عليها ؟
شروق :يارب نلقاها
نرجس :هذي حسنة اننا نتعرف على كل الناس
شروق :اي وربي
نرجس :المشوار قريب ماشاء الله يعني كلية المحاسبه عيال عمنا
شروق :يمكن عليها محاضره؟
نرجس :اصبري تونا دخلنا
شروق :هذي هي !
نرجس :لا هذي تسنيم
شروق :صح
نرجس :شوفيها بس لا تشوفين
شروق :وين ؟
نرجس :هناك عند الباب تتكلم مع فاطمه
شروق :اي ولله ،بس مدري هي خطيبه يزيد ولا لا
نرجس :خلينا نمر من عندهم نسمع كلامهم يمكن تتكلم عن الخطوبه
شروق :اي يلا
مهيار :هذا الي المفروض تسوينه
فاطمه :يعطيك العافيه
مهيار :الله يعافيك
نرجس بهمس :ما لحقنا على الحوار
شروق :قهر ،بس شكلهم ما كانوا يتكلمون بالخطوبه
نرجس :امشي بس نطلع ويجينا العلم اذا تزوجوا
شروق: اي ولله قسمهم كئيب
نرجس:وقفي جوالي يدق صح؟
شروق :مدري عنك
نرجس :اي جهاد ،الو
جهاد بجديه :اسمعيني نرجس وينك ؟
نرجس :بالدوام
جهاد :طيب ابيك تطلعين برا فيه سياره بيضا تنتظرك لوحتها ****
نرجس بخوف :ليه؟
جهاد :بقول لك بس لا تنفعلين طيب؟
نرجس :وش فيه؟
جهاد :فيه واحد هارب للجامعه عندكم وما يدرون معاه سلاح ولا قنبله
نرجس :طيب والبنات !
جهاد :كلموا إدارة الجامعه بيلغون المحاضرات بدون ما يحسون انتِ اطلعي ولا تعلمين أحد
نرجس :طيب باخذ سيارتي
جهاد :نرجس مب وقت سيارتك اطلعي مع السياره الي قلت لك عليها
نرجس :طيب
جهاد :بسرعه ،اذا وصلتي كلميني
نرجس :ان شاء الله ،يلا بنطلع
شروق :ليه والمحاضرات؟
نرجس :بقول لك برا
شروق :طيب
خرجتا وبقيت تبحث عن السياره حتى رأتها :هذي هي ،لو سمحت
خالد :أخت جهاد؟
بلعت ريقها :اي
شروق :وصلنا ممكن تعلميني السالفه
نرجس :واحد دخل الجامعه
شهقت شروق :طيب وش بنسوي!
خالد :بوديكم بيتكم و...
نرجس :طيب وين جهاد؟
خالد :بالشغل
شروق :انت؟
خالد :باخذكم واروح لهم
شروق :لحظه فيه وحده باخذها معانا
خالد :مين؟
شروق :خطيبه اخو زوج اختي
نرجس :شروق ماهو وقتك يمكن ماهي هي اصلًا
شروق :طيب خلاص
نرجس :نسيت اكلم جهاد،الو جهاد
جهاد :وصلتوا؟
نرجس :اي
جهاد :تأكدي من الي طلعتي معاه ؟
نرجس :اي ،مدري
جهاد :وش اسمه ؟
نرجس :وش اسمك؟
خالد :خالد
نرجس :اسمه خالد
جهاد :طيب عطيه الجوال بكلمه
نرجس :طيب ،هاك يبي يكلمك
خالد :هلا ؟
جهاد :ودهم للبيت وتعال
خالد:طيب
جهاد :استعجل تمام للحين ما يدرون انك مب موجود
خالد :اذا قفلت انت بستعجل
جهاد :مع السلامه
مد لها الهاتف :هاك
شروق :نرجس خاتمي طاح تحت دوريه معاي
اخفضتا رأسيهما للبحث عن الخاتم فتكسر الزجاج الخلفي تبعًا لصوت طقلة رصاص ،وصرختا برعب بينما تدارك خالد الموقف وحرك والسياره بسرعه حتى أبتعد عن الموقع والتفت لهم :جاكم شي؟
شروق :لا نرجس ،نرجس
نرجس :احس ... احس بيغمى علي
ابعدت شروق النقاب عن وجهها بذعر :بسم الله عليك !
التفت خالد ليطمئن عليهم فأخذت نرجس نقابها من يد شروق :مو لذي الدرجه الحمدلله ،عطيني نقابي ...ممكن نمر نشتري ماي؟
خالد :اي بس ...لا تعلمون احد عن الي صار اليوم ما ودنا الخبر ينتشر
شروق :اي ولله نرجس جدتك بتهاوش لا تعلمينها
نرجس :اي اكيد اكيد
خالد :نحرك؟
نرجس :اي
بعد وقت توقف عند مقهى وطلب الماء ثم التفت لهم :تبون شي؟
شروق :ما ابي
نرجس :لا يعطيك العافيه
شروق :للحين مو مستوعبه السالفه
خالد :واحد مطلوب مسكوه بالنقطه وهرب واقرب مكان طب عليه جامعتكم
نرجس :والحين قاعدين نمشي والقزاز مكسور زي الافلام
ابتسمت شروق :منجد
...
وسن :جيت
ابو راجح :حياك ما لديك اليوم ؟
وسن :خلصت الفصل الاول ابيك تقراه بس ...
ابو راجح :وش ؟
وسن :هو فيه اشياء حب مو يعني احب ترا بس خيال
ابو راجح :والخيال على اي اساس صار كذا ؟
وسن :الخيال واسع مو لازم يعتمد على شي
ابو راجح :بقراه
وسن :الحين
ابو راجح :الحين مالي خلق
وسن :لازم الحين ابغا اخذ التقييم بسرعه
ابو راجح :عطيني فقرات اقراها ودك تسمعين تقيمي مره فيها
وسن :اول شي البدايه كلها صفحه ونص تتكلم البنت عن نفسها
ابو راجح :حلو صبي لك شاهي على بال ما اقرا
وسن بضحك :ما يخلصك شاهيك ماشاء الله
ابو راجح :افكر اجيب لي روبوت يسوي لي شاهي وانا قاعد
وسن :وبكذا تصير معد تتحرك رسميًا
ابو راجح:شدعوه ترا كل يوم اطلع امشي العصر
وسن :منجد؟ بطلع معاك
ابو راجح :اطلعي دامك ساحبه من الجامعه اطلعي تونسي
وسن :كلكم تحسبوني انا تراني اداوم وما سحبت وأدرس أدب بعد الي سحبت ملاذ
ابو راجح :القرار ذا المفروض يطلع من أصغر وحده بالبيت
وسن :بس انا مو أصغر وحده
ابو راجح :صح حجه فاشله ،أعتذر يا كاتبتنا العزيزه
تنهدت وسن :عمي ودي اتزوج واحد مثلك
ضحك بإستغراب :واحد مثلي!
وسن :مو نفس عمرك يعني نفس تفكيرك ،أنا كاتبه وأديبه حرام أتزوج واحد غبي وما يعرف يسولف
ابو راجح :يعني ادور لك عريس ولا وشو؟
وسن :لا يعني ودي لو جاني أحد يخطب تتأكد أنه قارئ عشان تضمن لي الحياه السعيده
ابو راجح :نشوف إن جاك نصيب ان شاء الله
وسن :بعد عمرٍ طويل
ضحك ابو راجح :حددي تبين ولا ما تبين
وسن :اذا شفت عمري مناسب وجاني النصيب ابي
ابو راجح :حلو طيب خليني أقرا
أنفتح الباب فصرخ أبو راجح :يا راجح بنت عمك عندي لا تجي
وسن :انا بروح خلاص أقراها وقول لي بعدين
ابو راجح :تمام إذا بغيتي بكره تمشين معاي موعدنا الساعه اربعه
وسن :ان شاء الله
خرجت فدخل راجح بعد خروجها بدقائق وبقي يتردد للجلوس بجانب والده فأنتبه له وقال وعينه على الدفتر:تعال وش فيك؟
راجح :وش قالت لك؟
ابو راجح :جابت الي تكتبه تبيني اقراه
راجح :لا اخر شي سمعتها تقول بتزوج مدري ايش
رفع عينه عن الدفتر وأغلقه ثم نظر لراجح :وش يهمك بذا الموضوع إن شاء الله ؟
راجح :كذا بس سمعتكم
ابو راجح :وليه تسمعنا ؟
تنهد راجح :وش قالت يبه علمني
ابو راجح :تقول أبي اتزوج قارئ حرام أكون كاتبه وأديبه ويتزوجني واحد ما يعرف شي
بلع ريقه :تمام
ابو راجح :تبيها صح؟
راجح :هاه؟
ابو راجح :حاط عينك عليها انت
راجح :لا ما شفتها بالمطبخ الاسبوع الي راح
ابو راجح :وش؟
راجح :بروح الجم
ابو راجح :تعال بنتكلم
راجح :ما ابي
ابو راجح :اقعد ياولد بكلمك بس ما باكلك
جلس مقابله وشابك يديه بتوتر :عن وش بنتكلم؟
ابو راجح :حاط عينك على وسن؟
راجح وهو يحرك أبهاميه :الصراحه أي
ابو راجح :من متى ؟
راجح :من يومنا صغار
ابو راجح:لين متى ؟
راجح :كيف؟
ابو راجح :لين متى بتقعد ساكت؟ لين يجي واحد يخطبها وتسوي دراما علينا ؟
راجح :لا كنت أنتظرها تخلص دراسه يعني ما بخطبها واحنا بنفس البيت وتصير محرجه مني ،اساسًا إذا صادفتها بالغلط اسوي نفسي ما عرفتها عشان ما تنحرج
تنهد وأكمل :وانا ماني قارئ زي ما تبي مارح توافق
ابو راجح:نخليك قارئ وش ورانا
راجح :ما احب يعني ...
ابو راجح :تحبها ؟
راجح :اي
ابو راجح :خلاص صير قارئ عشانها
راجح :الصراحه أقرا الي هي تكتبه وتجيبه لك
ابو راجح:خلاص كويس هذي نقطه بصفك وكأنك تقول لها حتى بالكتب ما لقيت لك بديل
راجح :طيب متى تتخرج ؟
ابو راجح :هذي أخر سنه لها
ابتسم :كنت افكر وش اهديها اذا تخرجت لكن بهديها ولدي
راجح :ادري انك تحب التلميحات بس لا تعلمها ولا تلمح لها طلبتك دامه ذي اخر سنه لها خل الي كتمته من عشرين سنه ينكتم سنه وحده زياده ما بيضرك شي
ابو راجح :ان شاء الله
...
هيام :صباح الخير
صقر :وش جابك ؟
هيام :مرسوله
صقر :من مين؟
هيام بسخريه :هيفاء وهبي
قام وذهب لأحد الرفوف :صدق وش جابك تراني مب مزاجي
هيام :انا مزاجي عال العال
اقتربت منه وحركت شعرها لتغيضه :لأني فايزه
اغمض عينيه وزفر بغضب :ياعطرك ذا
هيام :وش فيه؟
صقر :خايس خايس مين يعطر شعره ؟ هاه
هيام :انا وكل الناس ،الزبده اسمعني ليه جيت
صقر :ليه ؟
هيام :امس تكلمت عن الوظائف الي بتيحها وقلت لهم انه ان شاء الله بنخلص ...
صقر :شفتها المقابله لا تشرحينها
ابتسمت :شفتها وانت تبكي؟
صقر :مالك دخل بحالي وليه جيتي؟
هيام :بستأجر غرفه بمكتبك عشان المقابله الشخصيه
صقر :لا
هيام :ما عندي مكان بعدين شوف قلت لك بستأجر وانت قرر بكم بتأجرني
نظر لخاتم والدها الذي بيدها وقال بسخريه :روحي عند زوجك يدبر لك مكان
هيام :مين زوجي؟
صقر :أوس ،مطلعين عنكم كلام انكم متزوجين والحين لابسين نفس الخاتم كملت
هيام:ما اقرف تفكيرك! أنا لبسته لأنه حق أبوي وهو لبسه لأنه حق أبوه
صقر وهو يبحث بالملفات:وانا شدخلني فيكم؟
هيام :يمكن لأنك تغار منه لأني أعامله بأحترام
ابتسم بسخريه :يعني بس الي ناقصني بحياتي تعاملك المحترم ،أنا لو أحرك اصبعي بس بيجوني أجمل البنات ما وقفت عليك الحياه واغار
هيام :طيب ابي غرفه بمكتبك
صقر :لا
هيام :لا تخليني اترجاك وتخرب برستيجي!
صقر :صراحه حتى انا ما اتخيلك تترجيني لأنه منظر يقلب المعده
هيام :بمشيها ذي المره ،وش تدور ؟
صقر :ملف رقمه ٨٣٧
هيام :حاط الملفات بمكتبك كنه ارشيف!
صقر :ذي الي أشتغل عليها وأراجعها
هيام :اصلًا كل شي صار الكتروني
صقر :طيب أنا قاعد اخليها الكترونيه
هيام :طيب لو طلعته لك خلال دقيقه بتعطيني الغرفه وبلاش بعد
صقر :صايره تحبين تراهنين
هيام :لأنه ما يمشيك الا المراهنات
صقر :يلا بحسب لك دقيقه
هيام :شوف خلنا نتفق اتفاق اول
تراجع وتكتف :وش ؟
هيام :اذا شفته ينحسب اني لقيته
ابتسم صقر :لا ولله ؟ وش ذي القوانين البايخه تلقينه يعني تاخذينه بيدك
هيام :لا القاه اشوفه
صقر :طيب طيب يلا
هيام :شغل الوقت اذا قلت لك
صقر:طيب لحظه خلي وجهك جهتي عشان ما تشوفينه قبل الوقت
هيام :من زين وجهك عاد
صقر :أزين من وجهك مين يلصق خرز بعينه !
هيام :موضه شعرفك أنت
صقر :يلا يلا بس واحد اثنين ثلاثه
التفتت لرفوف وأصبحت تبحث عن الملف حتى رأته بالاعلى :هذا هو هذا هو
صقر :جيبيه ترا باقي عشر ثواني
سحبت كرسيه ووقفت عليه فصرخ :الكرسي توسخينه
أخذت الملف ورمته عليه :لقيته لقيته لقيته خلاص
صقر :وجع خشمي
هيام :عن اول امس يوم دعست رجلي
صقر :حقد البعير
هيام :وش البعير
صقر :بنت ميونخ ما تعرف البعير
هيام :صدق وش البعير
صقر :الابل أو الجمل
هيام :طيب الحين أخذ الغرفه مجانًا
صقر :أي غرفه ؟
هيام :هذيك الي هناك
صقر :طيب بس أول شي انزلي عن الكرسي لأن منظرك وانتِ أعلى مني ينرفز
ابتسمت هيام وحركت شعرها:دايم انا أعلى منك
صقر :وبرضو لأنك ممكن تطيحين
قفزت من فوق الكرسي :ما طحت
صقر :ماشاء الله هذا وانا قاص اصبعك اول امس
هيام :يعني انت متعمد؟
صقر :أي
هيام :طيب بتغاضى عن ذا برضو
صقر :وراك بلوه
هيام :متى بتساعدني يلا
صقر :كيف اساعدك يعني ؟
هيام :مدري نسافر نسأل عنه
صقر :هذا أيام ابن بطوطه الحين عندنا تقنيه الحمدلله
هيام :طيب وش بتسوي؟
صقر :اليوم ولا شي
هيام :طيب فاضي بالليل؟
صقر :ليه وش تبين ؟
هيام :بروح ازور الايتام وبجيب لهم هدايا
صقر:بشوف إلى الان ما أعتبر فاضي
هيام :تمام أنا بكون هناك الساعه سبعه
صقر :كويس خلص الكلام ممكن تطلعين ؟
هيام :بطلع من غير ما تقول لي
صقر :طيب للحين ما طلعتي
نظرت له قليلًا وزفرت بغضب:بطلع وقت ما ابي
صقر :مجنونه
هيام وهي خارجه:انت المجنون
...
ام مهيار :قومي طلعت نتيجة التحليل
مهيار :توني جيت خلوني انام
ام مهيار :خالك بيجي قومي
قامت بتذمر :عساهم يقولون فيك سبعين مرض
ام مهيار :مافيك الا العافيه الحين بنروح السوق نشتري لك فستان
مهيار:قولي آمين
ام مهيار :ليه؟
مهيار :يارب السوق ينهد فوق روسنا ونموت معد يلقون لنا اثر
ام مهيار :الله يهديك يا بنيتي الزواج ماهو نهاية العالم وتدعين علينا وعليك بذي الدعاوي
ابو عمر:باقي ما قامت ؟
ام مهيار :الا قامت وبتروح تلبس الحين ونطلع
ابوعمر:انا بالسياره انتظركم
ام مهيار:ما بنطول حنا الحين بنجي ،يلا قومي
مهيار :طيب
بعد وقت خرجتا للسياره حيث كان ينتظر ابو عمر الذي تعمد إجراء هذا الاتصال بوجودهم :السلام عليكم ابو محمد ...بخير واحسن حال وعندنا فرح ودنا انك انت الي تعقد فيه ،اي بنت اختي بكره ولله مستعجلين بعد العصر خلاص يلا مع السلامه اشوفك على خير بإذن الله
تنهدت مهيار ومسحت دموعها التي اعتادتها منذ الصغر
ابو عمر :لا تطولون بالسوق انا بروح اطلع ثيابي واشوف القاعه واجي
ام مهيار :انت حاجز القاعه؟
ابو عمر :لا هم بس بشيك عليه
ام مهيار :تمام
ابو عمر :اي سوق ودكم
ام مهيار :مدري ولله وين اسواق فساتين الاعراس ،مهيار تعرفين؟
مهيار :لا
ام مهيار :طيب اسألي صديقاتك هذيك الي تزوجت قبل شهرين
مهيار :طيب
ابو عمر :كلميهم مكالمه اسرع
مهيار :طيب
ابو عمر :ولله لو اني مب رايق كان هبدت بك بذا الدركسون عشان تعرفين طيب لكن ما ودي اشوه وجهك خلينا نزفك للناس سالمه
مهيار بغصه :الو ثريا
ثريا :هلا يا عيوني شفيك؟
تنحنحت :ما فيني شي،بس ...بسألك عن فستان عرسك من وين شريتيه يعني وين محلات فساتين الاعراس
ثريا :ليه مين بيتزوج؟
بلعت ريقها وتحشرج صوتها اكثر :أنا
ثريا :ما علمتينا !
مهيار:ثريا بعدين بكلمك زياده بس الحين قولي لي المحلات
ثريا :برسل لك اسماء المحلات الي اذكرها
مهيار :تمام شكرًا
ثريا :العفو يا عمري اذا تحتاجين اي مساعده بالتجهيز انا موجوده وبساعدك من عيوني الثنتين
مهيار :يعطيك العافيه مع السلامه
ثريا :مع السلامه
ابو عمر :شف كيف تخلي لسانها عسل لو تبي حيه ذي البنت حيه
ام مهيار :هاه وينها المحلات ؟
مهيار :ارسلتها
ابو عمر :طيب وش اسمها احنا نبي اسمها !
مهيار:برسلها لك بالواتس
ابو عمر :يلا سريع
وفي بيت أخر كان العريس أيضًا ليس بارضٍ عن هذا الزواج ،كان يزيد يناقش موضوع المنزل مع والديه :عندكم افضل
ام خلف :ياولدي اخوك كل يوم يجينا بيننا وبينه باب والبيت صغير ما بتاخذ راحتها
يزيد :طيب ما عندي مكان وش اسوي!
ابو خلف :ابو جهاد مو عنده شقق يبي يبيعها ؟
يزيد :اشتري شقه عشانها !
ابو خلف :كلمه انه يأجرك وبيوافق
يزيد :ولله انه عيب الي بنسويه
ابو خلف :كلم خويك ولد اخوه خله يكلمه
يزيد :ان شاء الله بشوف
خرج للفناء واتصل على راجح :الو
راجح :وينك يالقاطع اجازه عندك ومره لا حس ولا خبر
بلع ريقه و ضيق عينيه ليرتب كلامه :عمك الي كلمتني عنه قلت انه بيبيع الشقق
راجح :اي فيه احد بيشتري؟
يزيد :لا فيه واحد يبي يستأجر
راجح :قلنا بيع مو تأجير
يزيد :اسمعني راجح ،انا ابي استأجرها
راجح :ليه وش معاك؟
يزيد :بتزوج
راجح :ايش!
يزيد :سالفه طويله مختصرها اني انقذت بنت من واجبي الانساني ولزقوني فيها بتزوجها غصب وبكره الملكه
راجح وومتى كنت بتعلمني؟
يزيد :ماهو وقت شرهات ،كلم عمك تكفى
راجح :طيب طيب بكلمه اذا رجعت من الجم
يزيد :تمام ،ولله ما ودي لكن تراك معزوم بكره ملكه وعرس
راجح:ما ودك اني اجي؟
يزيد :ما ودي بذا الزواج ما ودي بشي احس الدنيا صايره مظلمه
راجح :هو فعليًا الدنيا مظلمه يقولون يمكن تمطر
يزيد :يارب فرج علي
راجح :معليك ان شاء الله مع العيال تحبون بعض
يزيد :راجح ترا ذي اكبر كذبه بتاريخ البشريه
راجح :تمام معليش ،يلا انا بقفل خلصت الكارديو ببدا بالحديد
يزيد :تمام
راجح :مع السلامه
يزيد :مع السلامه
وضع هاتفه بجيبه وجلس ينظر للأفق ولم يحس بجلوس خلف بجانبه :يخوف صح؟
يزيد :وش ؟
خلف :الزواج
يزيد :انا مدري وش مخليني اقومها يعني الكوفي كان مليان ناس ليش بس انا رحت لها
خلف :لأنه مقدر ومكتوب
يزيد :عندي أمل بالله أنه ما بيضيع أجري بس ...
خلف :خلاص أملك بالله وأجرك ما بيضيعون
يزيد :ما علينا لقيت البشت؟
خلف :اي ما جابه لك فهد؟
يزيد :لا
انتبه خلف لفهد وهو يخرج من بيت اجداده مرتديًا البشت وخلفه عبير تضحك :ايوه ايوه عاشو ،عاش عريسنا عاش
خلف :تعالوا
اشارت عبير لفهد كي يلتفت لوالده فالتفت له وذهب اليه
اشار خلف :ما قلت لك عط عمك يزيد ؟
اشار فهد ايضًا :عادي انا البسه ؟
ابتسم يزيد بضيق وتنهد :لو انك بتاخذ دوري عادي
خلف :عطني البشت ورح لأمك مسويه لك اكل
عبير :شدعوه يزيد ان شاء الله خيره
يزيد :انتِ بالذات بتسكتين خليني اجيب لك اقرب واحد بالشارع والزقه فيك وازوجكم ما تدرين عن اصله ولا يدري عن اصلك
خلف :بإذن الله انها بنت طيبه وإن كان خالها مستفز بعض الشيء بس احسها طيبه
عبير :كل تبن ما بتتزوج على هيوف
خلف:وانا ما قلت بتزوج عليها قاعد اواسي اخوك
يزيد :خلاص بس خلوه يمر بهدوء ما ودي احد يتكلم بذا العالم اليوم
عبير :غريب
خلف :خلاص اسكتي
...
دخل الغرفه ووجدها تجلس بالارض :وش تسوين؟
رتيل:شوف وش جا
ثنيان :وش ؟
رتيل :جلابية رمضان
ثنيان :طيب افتحيها
رتيل :وش تتوقع لونها
وضع شماغه على الطاوله وجلس بجانبها :على الف ؟
رتيل :على الف
ثنيان :احمر
رتيل :لا ذيك السنه كان احمر
ثنيان :طيب عجبني الاحمر عليك
رتيل :عندك محاولتين
ثنيان :لمحي
رتيل :هو ماله علاقه باللون بس انه لبس اماراتي
ثنيان :دشداشه؟
ضحكت رتيل :ثنيان الدشداشه حقت الرجال ،مخور
ثنيان :طيب احس اللون وردي
رتيل :لا مره بعيد
ثنيان :اصفر؟
رتيل وهي تفتح الصندوق: غلط اخضر
ثنيان :طيب الاخضر قريب من الاصفر ليه تقولين بعيد
رتيل :قلت بعيد على الوردي
ثنيان:طيب ما يهم روحي جربيها بشوفها
رتيل :لا
ثنيان :وش ذي القسوه رتيل ؟
رتيل :ترا كلها يومين على رمضان تشوفها اول يوم
ثنيان :طيب جربيها يمكن واسعه ولا طويله ولا شي نوديها الخياط
رتيل :متأكده من القياسات
ثنيان :طيب وين الحلا حقي؟
رتيل :شوف ...
ثنيان :وش؟
رتيل :الحين الانسان رأيه يتغير دايم أنا رأيي تغير الصباح واكلتها
ثنيان :يا سلام عليك
رتيل :عادي ارسلت للمحل يجيبون لك نفسها مع حقت العيد
ثنيان :وانتِ وامي لو مسوين معمول حتى حبه وحده ما تخلوني اخذ
رتيل :معليش حبيبي
ثنيان :طلبتي لي غيرها ؟
رتيل :اي
ثنيان:طيب خلاص
رتيل :ما زعلت ؟
ثنيان :لا ولله ما زعلت اذبح نفسي ولا ازعل منك
دقت ملاذ الباب ودخلت :امي سوت الحنا تعالي رتيل
رتيل :طيب الحين بجي
ثنيام :مين يتحنى الظهر
ملاذ :احنا
ثنيان :اجل رتيلي شغلي المكيف وطفي اللمبه خليني انام للعصر
رتيل :ترا العصر بروح السوق
ثنيان :مع مين؟
رتيل :مع اختي
ثنيان :معاك فلوس؟
رتيل :اي
ثنيان :قبل ما تطلعين صحيني
رتيل :ان شاء الله
...
بقيت واقفه أمام دار الايتام للحظات تخاف أن تدخل وتجد الكثير من الاطفال يعيشون احداث قصتها وبأشكال عده ،سمعت صوته من خلفها :تحسبيني ما بجي
التفتت له وكان يحمل بيده الهدايا :اي
صقر:وش تسوين هنا؟
هيام :توني جيت ما انتظر من زمان
ابتسم وتجرأ بالدخول فلحقته :وش فيك تركض ركض
صقر :رايح للأجر
هيام :طيب اول شي نكلم المدير
صقر :كلمته من البيت
هيام :يعني خلاص ندخل عليهم عادي؟
فتح احد الابواب ودخل :اي
دخلت هيام خلفه فصرخ الاطفال بسعاده :عمي صقر
هيام بصدمه:يعرفونك من اول
صقر :اي
هيام :كيف وانت تقول توك كافلهم؟
صقر :بقول لك اذا طلعنا
هيام :وعد؟
صقر :وعد
بعد وقت جميل ادخل السرور بقلبيهما خرجا من الدار فتنهدت هيام :فرحتهم حلوه
صقر :يحسسونك أن الحياه ما فيها أي هموم
هيام :طيب ممكن تقول لي من متى يعرفونك لدرجه يقولون لك عم؟
صقر :من يوم توفى أبوي وصرنا ندور عليك قلت بجرب أزور دار أيتام واشوف تفكيرهم يمكن تفكيرك يكون مقارب لهم بحكم عيشكم نفس الطفوله تقريبًا ،وكان عيب اني ادخل عليهم ويدي فاضيه وبعد فتره نذرت على نفسي انه لو لقيناك بكفلهم عن أبوي وأبوك
ابعدت شعرها عن رقبتها فقال صقر :هاه بتبكين يالقويه ؟
استجمعت قوتها وقالت :لا بس بسألك ،صار لي شهر تقريبًا من يوم جيت ،وقفت تزورهم؟
صقر :للأسف أنشغلت
هيام :خلاص خلهم لي انا بزورهم
صقر :شفتي بكل موقف تبينين لي انك تغارين مني
هيام :على ايش بغار منك؟
صقر :على كل شي كامل والكمال لله
هيام :ولله ما فيه يعني كل انسان فيه مميزات وعيوب انت سبحان الله كل ما افكر فيك القى عيوب لا نهائيه
صقر :لو طالعتي بالمرايه بتشوفين اكثر انسانه فيها عيوب بذي الحياه
هيام :لا ذي بس مرايتك انت
صقر :ولله لو اني ساحرة بياض الثلج
هيام :يعني انا بياض الثلج
صقر:انتِ ساحرة توم وجيري نسيتي؟
هيام :وانت كلبهم نسيت؟
صقر:ممكن تروحين لأنك بديتي تستفزيني
هيام :انا ما يستفزني فيك شي الحمدلله
صقر :وش رايك تتحجبين؟
هيام :مالك دخل
صقر :استفزيتك
هيام :بالاحلام
...
أنت تقرأ
كُن بقربي فإن الروح هائمة
Romanceبعد سنوات من الغربه وسنوات ضاعت في الهروب من الأحزان،نعود لنفس الديار ظنًا منا أننا سنبدأ بدايه جديده ،أمل جديد،حياة جديده،أحباب جدد...ولكن ! يالعثرات الماضي تلاحقنا بكل درب ،وتهزمنا في كل كرب ،وتخيفنا مما هو مجهول ... ٢٠٢٣/٢/٢٦
