كُن بقربي فإن الروح هائمة

7

٧

لمحةٌ من الماضي ...
بندر :ادخلوا
صقر :السلام عليكم انت طلبتنا
بندر وهو يصف بعض الاوراق:أي بكلمكم بشي
أوس :آمر
بندر :ما يآمر عليك عدو ،كم أعماركم؟
أوس :١٣
صقر :١٦
بندر  بغصه:تعرفون أن عبدالعزيز توفى
صقر وأوس بهمس :الله يرحمه
بندر :وبنته أمانه عندي ،صغيره عمرها عشر سنوات ،الحين هي تلعب مع خواتكم بس بقول لكم أني بخليها تعيش معانا ،وانتوا ماشاء الله بلغتوا وصرتوا رجال برسلكم للخارج عند ثنيان
صقر :عشان بنت الناس ترسلنا ؟
ابتسم وهو يلعب بخاتمه وخاتم عبدالعزيز الذي كان يجاور خاتمه على نفس اليد :ماهي بنت الناس بنت عبدالعزيز  بنت الانسان الي اعتبرته جزء من روحي ،اذا ما تبوني أعتبرها بنتي خلوني أعتبرها كفالة يتيم أكسب الاجر
أشار بأصبعيه كما في حديث الرسول عليه الصلاة والسلام عن كفالة اليتيم :وأصير بذي المنزله مع الرسول عليه الصلاة والسلام ،وش قولكم بالموضوع ؟
أوس :ما عندي مشكله
صقر :أنا عندي مشكله ما أبي اطلع واترك امي واهلي
قام بندر وأمسك صقر من كتفيه :تشوف قدامك بندر آل محسن شايل كل العايله على ظهره شايل زوجتي وعيالي وأخواني وأمي ،لو رحت من ذي الدنيا محد بيقدر يشيل الي شلته ولا ودي أحمل واحد بس من عيالي ذي المسؤوليه ،كلكم الثلاثه بتاخذون مكاني اذا رحت، بتاخذون تعليم عالي لأنكم رجال البيت بتشيلون اسم كل الي بالبيت ،عالم الاعمال والحياه بشكل عام مافيها طاعه لهوى النفس ،ما تقول مقدر افارق اهلي لأني أحبهم طيب أثبت حبك اشتغل عشانهم وابعد عنهم فتره وجيزه بس عشان ترجع وتعيشهم العز عمر 
أخفض صقر رأسه :ان شاء الله
بندر :أرفع راسك أنت مسلم سعودي رايح بدرب علم ماهو شي يخليك تنزل راسك
دقت هاله الباب ودخلت :تأخرت شوي وش كنت بتقول ؟
بندر :أتفقت مع العيال أنهم بيطلعون للدراسه عند ثنيان
هاله :باقي صغار
بندر :ماهم صغار رجال هذولي
هاله :طيب صقر ممكن تشوفه رجال بس أوس باقي توه ما بلغ
بندر :وبنت عبدالعزيز كيف تاخذ راحتها ؟
أمسكت رأسها وقالت :مره ثانيه بنت عبدالعزيز ،مره ثانيه هيام كل شي يكون فيه ضرر لعيالي وبيتي تطلع هي وراه
بندر :صقر وأوس أطلعوا واحنا بنتكلم
هاله :منت صاحي تطلع عيالك لبلد ما تعرفها بس عشان بنت عمرها عشر سنوات تاخذ راحتها منت صاحي أبد
بندر :تخيلي معاي لو أخليهم يعيشون بنفس البيت وينامون بغرفه وحده وياكلون بصحن واحد وش تتوقعين بيصير بعد عشر سنوات من الآن؟ وش بينتج من عيش بنت غريبه معاهم غير الحب ؟ خلاص أنا بخليهم اذا تبين بس بعدين اذا جا واحد من عيالك قال أحب هيام وأبي اتزوجها لا تلوميني ،هذا اصلًا اذا فكروا بالزواج ممكن الشيطان يباغتهم بلحظه ويفكرون يسوون فيها حرام
هاله وهي تقاوم غصتها :طيب عالاقل خل أوس لين يكبر شوي عادي ود صقر ما عليه خوف بس أوس باقي صغير ما يتحمل الغربه
بندر :ما ودي أكسر بخاطرك بس...
قاطعته وهي تمسك يده بترجي :تكفى بندر طلبتك بس هالطلب وأوعدك أصبر على وجودها عندي وما أقول ولا كلمه
بندر :خلاص يصير خير
هاله :بتخليه ؟
بندر :بخليه بس أول ما يدخل ١٦ بيروح مع أخوانه
هاله :عادي عادي ما عندي مشكله
خلف ذلك الباب كانت هناك أذنان تنصت لذلك الحديث الذي من المفترض أن يصل لهم بشكل محسن
صقر :مو من العدل أني أروح وأنت لا
أوس :يزعل الموضوع أنهم يشوفوني صغير
صقر :مو كثر ما يشوفونك كبير ويعتبرونك فار تجارب
أوس :تخيل لو نتبدل الاجسام مثل الفلم الي شفناه وانا أروح وأنت تجلس
صقر :محد بيعرف أننا شفنا فلم سمعت؟
أوس :طيب ما قلت لأحد، أساسًا أنا تبت بعد المشهد الوصخ ذاك
صقر :تستاهل قلت لك غمض عيونك
أوس :أنت ما غمضت
صقر وهو ذاهب:لأنه مالك دخل !
...
ذهبت هيام لبيت الشعر وبحثت عن الاعواد فلم تجدها في المقابل وجدت عدة اوراق ،ترددت لتقرأها لكنها لمحت اسم والدها عليها فغلبها الفضول واخذتها تتصفحها سريعًا .سمعت صوت باب الحمام يُفتح فتصنمت مكانها
:وش تسوين هنا
التفتت خلفها فوجدت صقر ونصف جسمه العلوي عاريٍ  اما النصف الأخر فكان مستورًا ،أعطته ظهرها وغطت عينيها:يعع وش تسوي
صقر :انتِ وش تسوين هنا حتى وانا اتروش تلحقيني!
هيام :وش حادك تتروش هنا والقصر به بكل جناح تقريبًا حمامين
صقر وهو يرتدي ما يستر اعلاه:مالك خص القصر قصري وبيت الشعر حقي
اقترب منها واخذ الاوراق من يدها :انتِ وش الي جابك هنا وتقرين اوراقي بعد
هيام :شفت اسم ابوي
صقر :واذا شفتيه ؟ تفتشين الورق عادي ولا كأنه فيه خصوصيه ؟
هيام :اي شي يخص ابوي المفروض انا اعرفه
صقر :تعرفين كل شي
هيام بغصه:ما كنت اعرف انه كافل ايتام
صقر :توه صار ذا الموضوع
هيام :مين مسويه ؟
صقر :مالك دخل
هيام :مين مسويه ! الموضوع هنا عمل خير لأبوي ،ابي اسم الي سواه بس
صقر :خليه مستور
هيام :انت صح؟
صقر :تتوقعينها مني؟
غطت وجهها بكفيها:ما ادري ...ما ادري ما اعرف اي شي ،كأني كنت أراقب بحر ساكن وفجأه هاج موجه علي
مد لها الورق وتنهد ثم تحدث بهدوء كما لم يتحدث قط:انا مسويه ،قلت الارباح الي تطلعينها من المزرعه وأخذها انا بحكم الشراكه تروح للأيتام بأسم أبوك وأبوي وصدقه عنهم
نظرت لوجهه وهي تبعد شعرها عن رقبتها تأهبًا للبكاء ،ثم أخذت الاوراق وقرأتها :كنت بتقول لي؟
صقر :لا ،كان المفروض محد يعرف الا أنا
هيام :بسألك شي وأبي تجاوب بصراحه
صقر :وش ؟
هيام :وش تعرف عن أبوي كل شي تعرفه عنه
صقر :وش تبين توصلين له ؟
هيام :ما أعرف يمكن تفاصيل بحياته فاتتني
صرخت ملاذ من الخارج :وينك هيام
مسحت وجهها وأخذت نفسًا عميقًا :بعدين تقول لي
صقر :ليش جيتي؟
هيام :بغيت الاعواد حقت المارشميلو
أخرجها صقر من احد الرفوف :هذي هي
أخذتها وخرجت :جيت
ملاذ :تأخرتي
هيام :بالغصب لقيتها
ملاذ :وش فيك ؟
هيام :وش فيني؟
ملاذ :مدري وجهك متغير
هيام :كانت الاعواد بالرف الي فوق المشب ويوم بغيت اطوله مشيت بالرماد ودخل بعيوني
حاوطت ملاذ رقبتها :ترا اعرف كل شي
هيام :وش ؟
ملاذ :انك بكل زاويه تلقين ذكرى وتبكين ،حتى انا كذا
هيام:الله يرحمهم بس
ملاذ:بعد سنتين من وفاة ابوي عشت كل يوم فيها بحزن ،أكتشفت أنه الحزن ما ينفعهم أبدًا أبدًا ما نفع ابوي ولا بذره مقدر انكر حزني بس ما يصلح أحبس نفسي فيه ،طلعت منه والحين احاول اعيش حياتي
هيام :يعني حتى وأهلك موجودين نفس مشاعري
ملاذ :وش مشاعرك؟
هيام :أحس إني وحيده جايه على الدنيا بالغلط حتى تصرفاتي مستعجله كأني بخلص حياتي بسرعه وارتاح
ملاذ :هيام عبدالعزيز ماهي وحيده
أمسكت رأسها ولفته نحو جلسة البنات :كل ذولي الناس يحبونها ،حتى الي ما تعرفوا عليها زين قاعدين يحبونها ويبون وجودها بجلستنا ،تقبلي خلاص اوثقي فيه ناس يحبونك مارح يروحون
هيام :ملاذ ما اقدر اتعلق اخاف
ملاذ :لا تتعلقين بس لا تحرمين نفسك الحياه وتصيرين متشائمه
هيام :بروح البيت احس...
قاطعتها ملاذ :اليوم بتنامين عندنا مافيه نقاش
هيام :بس ...
ملاذ :مافيه بس عيشي اليوم كأنك مو هيام خلاص انسي كل جروح السنين بس ذي الليله وبكره اذا صحيتي الصبح ارجعي اكتئبي وموتي بالاكتئاب ان بغيتي انا ما ابي منك الا هذي الليله تجربين
تنهدت :طيب
ملاذ :يلا امشي قد عادوا بيخلصون المارشميلو
تنهدت هيام :يخلصونها
ضحكت ملاذ بسخريه :يا كثر تنهيداتك
هيام بنفس السخريه الحزينه :من كثرة الهموم
ملاذ :الساعه كم تنامين؟
هيام :اذا جاني النوم
ملاذ:الليله ابي اسهر معاك ابي اسمع كل همومك بكره بترجعين هيام جديده
هيام :يعني تشوفيني مثل ما انا من يوم رحت ؟
ملاذ :اي بنفس الغباء
هيام :انتِ تغيرتي كثير
ملاذ :كيف؟
هيام :مدري كأنك تشوفين لذه بكل شي ،وقبل كنتِ اكثر من ينكد علينا
ابتسمت ملاذ :قررت احط لمساتي على الحياه
هيام :لمساتي كأنها لمسات ملك الموت
عبست ملاذ :انا باخذ عود من ذي والمس فيه قلبك عشان تعرفين لمسات ملك الموت
جوانا :جت القطوه
هيام :شكلك اشتقتي لي
جوانا :حيل اشتقت لك لدرجه ودي اطلع كل غضبي فيك
هيام :بذي اللحظه وذي الكلمة انتِ الي تشبهين صقر مب انا
جوانا :معد بناقشك يالقطوه
هيام بسخريه :ميو
امسكت جوانا هاتفها وصورت جلستهم ورفعتها في قصتها تحت عنوان عطوني ميوزك تصلح لذي الجلسه
نهى :يمه احترق كله !
جوانا :ولله ما تعرفين له عطيني
اشواق :جوانا اربطي شعرك لا يحترق
وسن :اربطيه اربطيه لا يصير له مثل شعري
هيام:حرقتي شعرك !
وسن :مدري كيف نزل فجأه اخخ يا قهري عليه
ملاذ :كذابه انتِ اصلًا تبينها فرصه من الله تقصينه
وسن :اسكتي خليني اكمل المسرحيه لين بكره واقول لأمي
جوانا بسخريه :نحرق لك الباقي؟
وسن :واحرق راسك كله
غاده :بنات ودي نلعب لعبة الصراحه تبون ؟
ملاذ :لا
نرجس :انهت مشروعك قبل تبدينه
غاده :طيب بس...
ملاذ :ما ابي خلاص
جوانا :حتى انا ما ابي
نهى :ليه وش مخبيه؟
جوانا :ولا شي بس ما ابي لعبه تافهه مره
غاده :ولله انكم نفسيات
ابتهاج :معاي اونو تبون اجيبها ونلعب ؟
نجد :ما نقول لا ،تراني محترفه فيها
هيام :كذابه تخبي الورق تحتها
نجد :حسبي الله على ابليسك
انتبهت جوانا لهاتفها الذي كان فيه أشعار أن وليد قد رد على قصتها ففتحته دون أي تردد وكان قد أرسل لها رابط أحد الاغاني التي تصف الحب ،بلعت ريقها واخذت نفسًا عميقًا ثم أغلقت الهاتف
اشواق :شفيك قمطتي بسم الله عليك
جوانا:لا احس حر
نهى :داخله بالنار وتقولين حر
اشواق :لعد تقولين نار ترا النار يعني جهنم قولي شبة الضو
نهى :ماما ماني عجوز اقول شبة الضو
ملاذ :اشواق بنتك قاعده تستفزني من يوم ولدت جيل غريب مره ما تعرف حتى بسكوت ابو ولد
نهى :وشو ذا ؟
نجد :يوه يا قدمي طلعتوا تعرفونه
ملاذ :اي كان ابوي يجيبه بالكراتين وناكله على قهوه عربيه كذا طعمه حنون
جوانا :اي منجد يجنن
غاده :شوفي بالله الفين وسبعه وتتكلم
جوانا :ترا اذكره ولله
نهى :خير ترا كنت بالقصيم ما اعرفكم
نرجس :احسن كنا مرتاحين من الدلع
نهى :اقسم بالله انا اوريكم الدلع
نرجس :وش بتسوين ؟
اخذت أحد الحطب النصف مشتعل وذهبت به نحو نرجس :أحرقك
اشواق :لا يا نهى
نهى :ينرفزوني يا ماما ينرفزون
هربت نرجس فلحقتها حتى قفزت بالمسبح :اتحداك تلحقيني الحين
قفزت نهى للمسبح دون تردد والحطب في يدها
نجد:بغيناها جلسة شتاء خلوها جلسة صيف
نهى :جوانا المويا حلو تعالي
جوانا :لحظه وقفوا لي
وسن :يا اغبياء وسختوا المسبح وتسبحون فيه
خرجت نرجس من المسبح وأختبئت خلف أحد الاشجار
غاده :وش ناويه عليه ؟
نجد :من توقعي بتسحب اختها للمسبح
خرجت ابتهاج من القصر بحماس فأستقبلتها نرجس وسحبتها للمسبح :المسبح للمراهقين ورئيستهم مب موجوده عيب ولله عيب
صرخت ابتهاج :يا غبيه بلوزتي شفافه
نهى :لابسه شي تحتها ؟
ابتهاج :اي بس ...
نهى وهي تغوص:خلاص استمتعي
اشواق :يا نهى لا تغوصين شوفيني ما تكلمت على دخولك للمسبح بس الغوص ممنوع محنا ناقصين مشاكل
نهى :طيب ماما
ملاذ :قولي ابشري ولا اشرقك بهالمويا ما عندي مانع
انتبهت هيام لهاتف جوانا الذي كان بجانبها ويرن بأسم وليد ،نظرت للهاتف قليلًا ثم أغلقته
ملاذ :اطلعوا اطلعوا امي شافتكم من غرفتها واتصلت علي
جوانا :طيب جيبوا مناشف
وسن :اطلعوا وانا بجيبها بسرعه
نجد :الحين كيف نظام بيتكم ؟
غاده :نظام بيتنا يذبح بس بنفس الوقت حلو عايشين كلنا مع اعمامي وجدتي بنفس القصر ذا كل ناس لهم كم جناح كذا
وسن :هو اصلًا كان بيتنا لحالنا واعمامي بيوتهم قريبه بس فجأه ابوي قال يبي يجمعهم بنفس البيت وجدتي وافقته والحين جدتي مستحيل مستحيل تخلي احد يطلع
نجد :كلكم نفس الاثاث ؟ احس الاذواق تختلف
غاده:لا فيه الصاله الي تحت الكبيره شفتيها ؟ الي كانت بالعزيمه
نجد :لا ما جيت اصلًا
غاده :ليه ؟
نجد :كنت مشغوله
غاده :المهم فيه الصاله الكبيره الي تحت من كبرها قاعدين نفكر نجيب سيارة قولف تنقلنا فيها
ملاذ :لا تبالغين مب لذي الدرجه ،شوفي عرض القصر كله الدور الي تحت صالتين وحده من قدام للنساء ووحده من ورا للرجال مع حمامات الله يكرمك ومطبخ وغرف الشغالات بالنص بينهم
نجد :ولله حلو
هيام :اتحدى اذا فهمت
نجد :لا فهمت
هيام :اشوف وجهك ؟
نجد :ما فهمت
ملاذ :خلاص سوي لها سكب بس الدور الاول ما نعيش فيه ،بعدين نجي للدور الثاني برضو مقسوم نصين واحد لنا احنا وجدتي وواحد لثنيان وزوجته وبعدين الدور الثالث لأعمامي عمي ابو راجح وعمي ابو جهاد الي هو ابو غاده
غاده :عمي ابو راجح ما عنده الا ولد واحد فجناحهم على قدهم
نجد :طيب ما جاوبتوا على سؤالي كيف مأثثين ؟
ملاذ:البيت كله نفس الاثاث بس غرفتك سوي الي تبين فيها انتِ حره
نجد :ولله نظام حلو
هيام :مو جوي احس وين حق سيدة البيت تأثث مجلسها وصالتها زي ما تبي
ملاذ :لا تسوين نفسك ما تدرين غرف النوم كبيره مره لو تبي تحط فيها صاله كامله
حضرت جوانا بعد ان غيرت ملابسها :وين جوالي
اشواق :ادخلوا داخل تمرضون
جوانا :بس ابي جوالي
هيام :هاك ،انتبهي
جوانا :من أيش؟
همست هيام :أخر اتصال
نظرت لهاتفها وكان هناك اشعار ان وليد قد اتصل فبلعت ريقها:ما تعلميني عن حياتي
ملاذ :جوانا ادخلي قبل ما اسري عليك
جوانا :طيب
نجد :الساعه صارت ١٢ انا بنام اليوم عند ابوي بتجين معاي؟
ملاذ :بتنام عندنا ،وانتِ اذا بعد تبين نامي عندنا عادي
نجد :لا بروح ابوي ينتظرني ،مع السلامه
غاده :قريب بعزمكم كلكم على كوفي
ملاذ :وش المناسبه؟
غاده :مدري كذا وناسه
انتهت تلك الليله وخلد الجميع للنوم الا ملاذ وهيام بيقتا في تلك الجلسه ثالثهم الصمت الذي ساد لدقائق فكسرته هيام قائله : تتوقعين انك تفهميني واحنا ظروفنا غير ؟
ملاذ :كيف غير ؟
هيام :عندك أهل فقدتي بس شخص واحد منهم ،انا من يوم عرفت الدنيا وانا فاقدتهم ،يعني عندك مين يعاونك وسن وجوانا وأمك كلهم معاك
ملاذ :لا يغرك أن امي جالسه بيننا تراني فاقده روحها الاوله من يوم مات ابوي لا تغرك وسن انها هاديه ومتقبله تراها تفرغ حزنها بالكتابه ،جوانا تفرغ نفسها على الناس ،انا افرغ بالكيك ،بس انتِ كيف تفرغين ؟بالوحده حبس النفس منع النفس من التعبير وهذا انتِ ما تعيشين مثل الاحياء ولا تموتين مثل الاموات
هيام :وكيف افرغ ؟ واصلًا وش افرغ وش أخلي سنين وانا كاتمه
ملاذ :بأي شي تحبينه
هيام :كنت افرغه بالشغل بألمانيا وأجلس لأخر الليل بالمكتب بس الحي...
ملاذ :لا هذا جلد ذات ،انك تفرغين غير ،مثلًا انا أبوي كان يحب كيك الاناناس لو تذكرته أسويه ،يعني تسوين شي يكون هوايتك مو شي واجب عليك
هيام :ما عندي هوايات
ملاذ :اكيد ؟
هيام :اي
ملاذ :طيب شي تعرفين تسوينه وغيرك ما يعرف
هيام :اتحمل اخوك
ضحكت ملاذ :لا صقر كلنا نتحمله شي ثاني
هيام :اركب الخيل
ملاذ :خلاص فرغي فيها حزنك وعيشي طبيعي لا تكتمين
هيام :بشارك بكاس الفرسان
ملاذ :منجد ؟
هيام :اي ،اليوم قررت
ملاذ :ولله حلو يارب تفوزين
هيام :سبقت صقر من أول تدريب
ملاذ :هذي ولله البلشه ،اشجع مين وأخلي مين
هيام :الي يفوز ،يعني انا
ملاذ :نشوف عاد يوم السباق
...
بقيت تستمع للأغنيه لمرات عديده وكأنها بكل مره تجد بها معنى جديد ،أغلقتها بعد أن تعبت وقالت بتذمر :وش يعني وش يقصد ،ما يقصد شي بس ارسلها تصلح للجو وبعدين يالكلبه يا جوانا وش هالمشاعر الي بتجي من اسبوع ...اسبوع نسولف فيه ليل نهار ،مافيه مشاعر وش ابي بالمشاعر ...يمكن هو عنده
ارسلت لصديقتها الجديده أحلام :صاحيه ؟
أحلام :أي
جوانا :بسألك سؤال فضول كذا
أحلام :وش ؟
جوانا :هو كان يرسل لك أغاني ؟
أحلام :مين ؟
جوانا :خطيبك
أحلام :وش الطاري ؟
جوانا :شفت فيديو بتيك توك وحده يقال أنها مسويه صداقه مع ولد بس بدا يرسل لها اغاني وماهي فاهمه وش يقصد
أحلام :الأغاني أعترافات مبطنه ،حتى خطيبي بالبدايه كان يرسل اغاني ويقول ذي عجبتني وذي عجبتني وهو اصلًا يقصدني فيها
جوانا :تمام ،تصبحين على خير
أحلام :وانت بخير
دخلت لمحادثتها معه وبقيت تقلب فيها وتتمعن بالكلام فأنتبهت لوجوده بنفس المحادثه وتوترت :يا جوانا يا جوانا ليتك راقده
أرسل لها :دقيت عليك وما رديتي ،عساك بخير ؟
فكرت قليلًا ثم ردت :أي بخير بس كنت مشغوله شوي
وليد :طيب عادي أدق الحين
جوانا وهي تحدث نفسها:لا لا لا أرجوك
وليد :اذا فاضيه يعني
جوانا :انت ما عندك حياه ؟
أرسل رساله وحذفها بسرعه لكن جوانا تمكنت من قرائتها وكانت محتواها :انتِ حياتي
جوانا :يارب عندي ضعف نظر يارب
أرسلت له :طيب دق
وليد :الو
جوانا :نعم؟
وليد :بسألك يعني سؤال فضول
جوانا :وش ؟
وليد :كل من يدق عليك تردين عليه بنعم ولا أنا بس
جوانا :أنت بس
وليد :كويس يعني أنا مميز عندك بشي
بلعت ريقها وأصبح وجهها تتبدل ألوانه فقال وليد :سمعتي الاغنيه
جوانا :أي
وليد بتردد :طيب ...بقول لك شي يعني هو شي مو مهم بس لازم أقوله
جوانا :وش ؟
وليد :الاغنيه فيها بعض الشي من م...مشاعري لك
جوانا :تتوقع مني أصدقك ؟
وليد :وليه ما تصدقيني ؟
جوانا بمحاولة مكابره:مشاعر بأسبوع؟ هذا مجرد أعجاب وما الومك عاد جوانا آل محسن الكل معجب فيها
وليد :جوانا فكري بالمنطق ليه أنا ناشب لك بستين حساب وهمي كل ما تبلكين واحد أرجع لك بالثاني ؟
جوانا برجفة غريبه:مو لأنك كنت تكرهني ؟
وليد:ما أكرهك ،كنت أحاول أوصل لك ما لقيت الا ذي الطريقه ،أنا مهووس فيك من زمان ،بس ما قدرت أقرب منك كأنك بأعلى السما وأنا بأدنى الارض
جوانا :ومن وين عرفتني عشان تنهوس؟
وليد :أعرف ولد أختك سيف ،وقد شفتك مرتين أو ثلاث معاه
جوانا :وليد ...الموضوع تافه
وليد :كيف تافه ؟ هذي مشاعري لك يعلم الله أنها كلها صادقه
جوانا :طيب بفكر
وليد :خذي وقتك بس أرجوك لا تتغير نظرتك عني للأسوء
أغلقت بوجهه ورمت هاتفها بجانبها :وش صار قبل شوي
خرجت من غرفتها لتشرب الماء فوجدت هيام بالمطبخ أيضًا :باقي صاحيه؟
جوانا :ما قدرت أنام
هيام :ليه ؟
بلعت ريقها :ما بتقولين لأحد
هيام :وش؟
جوانا :الي شفتيه
هيام :ما بقول لأحد لأني لو كنت بموقفك ما كنت ابي أحد يعرف ،بس لو كنت بموقفك بعد كنت بنهي كل شي قبل ما يفتح علي مصايب
جوانا :ما يفتح مصايب
ابتسمت هيام :كيف ما يفتح ؟ ابحثي عن قضايا الابتزاز وشوفي كيف
جوانا :بس ما ارسل صوري
هيام :ترا مجرد كلمه ياخذها منك يقدر يبتزك فيها مو بس صوره ،وبما أنك من عائله الله منعم عليهم بالحلال ما أستبعد نسبة ٩٩٪؜ أنه مصلحه وبيبتزك
جوانا :وش معنى احنا ما نحب ؟
هيام بتعجب :وفيه حب بعد !
جوانا بتوتر :لا مافيه
هيام :ما جبتي طاريه الا هو فيه
جوانا :كيف احبه بأسبوع !
هيام :توكم بالبدايه، بلكيه وأرتاحي هذي الاشياء ماهي لعمرك ولا لعمري ولا لأي عمر حرام أحنا مسلمين الي بقلبه حب يجي يخطب مو من ورا الشاشات
جوانا :طيب انا باقي صغيره ما ابي اتزوج
هيام :وليه تدخلين بعلاقه دامك ما تبين تتزوجين ؟
جوانا وهذي ذاهبه :عندي دوافعي الشخصيه
هيام :بالاول والاخير علاقه محرمه مهما كانت دوافعك
جوانا وهي تحدث نفسها :مسويه تعلمني بديني وهي أكبر متبرجه
...
رتيل :بسم الله !
ثنيان :وش فيك؟
رتيل :خرعتني قاعد تمشي بالظلمه وش مصحيك هالحزه ؟
نظرت للساعه بهاتفها :تونا خمسه الفجر رحلتنا الساعه عشره
ثنيان :عندي انسان لازم ازعجه
رتيل :مين؟
ثنيان :ابو نسب الغبي كيف متحمل ينام الليل وزوجته مو عنده انا لو اني مكانه وزعلتك بنام عند باب بيتكم واسهر مع القطاوه
ابتسمت رتيل وتثاءبت :مو كل الناس يحبون مثلك
ثنيان :الو
سعيد :نعم؟
ثنيان :شكلك نسيت انك متزوج
ابعد مشاعل من حضنه جلس بذعر :هاه ؟
ثنيان :نسيت زوجتك يا سبك ،يا تراضيها وترجعها ولا تطلقها مافيه ثالث لذي
سعيد :ما بطلقها
ثنيان :انا اليوم عندي رحله ما بسافر لين اشوف لكم نهايه ،يا ترجعها وانت مراضيها برضاوه مثل غلاتها ولا تطلقها ومالك عندنا لا زوجه ولا عيال
سعيد :طيب براضيها
ثنيان :ركز رضاوه مثل غلاتها ،مو اي كلام
سعيد :ان شاء الله
ثنيان :عساك نمت البارح؟
نظر لمشاعل :لا ولله ما نمت الا قبل شوي
ثنيان :ليه ؟
سعيد :افكر بكل شي غلطت فيه
ثنيان :الحمدلله
سعيد :ممكن تقفل الحين؟
ثنيان :ما اقفل لين انا ابي اقفل
سعيد :طيب خلص الحكي صح؟
ثنيان :اي خلص بس ابي الجوال مفتوح كذا مزاج
سعيد :طيب انا بقوم افكر كيف اراضي اختك يعني لازم اقفل عشان ما اخرب المفاجأه
ثنيان :مافيه بسمع كل شي
رتيل بهمس :ثنيان خلاص
ثنيان :ابشري ،خلاص بقفل
سعيد :مع السلامه
التفت لمشاعل :قومي
مشاعل :شوي بنام
سعيد :قومي مافيه وقت للنوم
مشاعل :لا فيه وقت النهار للنوم
سعيد :لا حول ولا قوة الا بالله ،قومي صلي وفكري معاي
جلست ومسحت عينيها :نعم؟
سعيد :هالحيوان دق علي يقول اليوم يا تراضي اشواق ولا تطلقها
مشاعل :وش رايك تطلقها وانا بتكفل بعيشتك ؟
سعيد على اساس راتبك أكثر من راتبي
مشاعل :ادبر الفلوس بطريقه ثانيه ،ترا للحين عندي فيديو المدير يوم كان سكران
سعيد :لا مافيه
مشاعل :ليه؟
سعيد :مالي خلق مشاكل ابتزاز ،قومي بس وخلينا نعين من الله خير
مشاعل بسخريه :ما تعين خير وانت مع *** زيي
قامت ومططت يديها :أخذت راحتي انا بعد ،كأنه بيتي
عقد حاجبيه بتفكير :بيتك؟
مشاعل :شدعوه ماهو بيتي هالخياس ذا
سعيد :بيتك الحل !
مشاعل :وش ناوي عليه ؟
سعيد وهو خارج :صلي واطلعي لي بكلمك بالي ناوي عليه
مشاعل :مسوي فيها التقي
بعد قليل خرجت اليه :وش فكرتك؟
سعيد :وش رايك ...
...
أستيقظت على رسالته :اذا تبين تشاركين بالسباق لازم نتدرب من الصباح
ردت عليه :ابي نتكلم
صقر :ما عندي وقت للكلام
هيام :عندك بس تتهرب
قرأ رسالتها ولم يرد فتأففت بغضب :أمس صدته بس راح علي
دخلت وسن :صباح الخير
هيام :صباح النور
وسن :صليتي ؟
هيام :أي
وسن :نطلع نفطر ؟
هيام:بفطر هنا ...
وسن :معليك أمي وجدتي يصحون قبل الديك قد امداهم فطروا ،الحين راحوا مدرسة جوانا عندهم أجتماع امهات
هيام بأستغراب :حتى جدتك؟
وسن :أي أشواق ما قدرت تروح راحت هي بدالها
هيام :ليه شفيها ؟
وسن :نفسيتها تعبانه
هيام :الله يعينها
بالان :فطور جاهز وملاذ قعد ياكل
وسن :طيب الحين جايين
جلسوا حول طاولة الطعام الكبيره التي لم يكن بها أي أحد سواهم
وسن بروح الكاتبه :المكان موحش كطاولة عائلة كبيره لا يجتمعون عليها أبدًا
دخل ثنيان وخلفه رتيل :الله الله على روح كاتبتنا الحلوه
ملاذ :أطلع !
ثنيان بغير استيعاب :ليه
ملاذ :البنت جالسه هنا
تمعن ثنيان بها من بعيد :ذي هيام
نظرت له رتيل ثم خرجت قبله :لا نتأخر على الطياره
وسن :الحق زوجتك
خرج اليها ثنيان :رتيلي
رتيل :نعم ؟
ثنيان :زعلتي يا بعد روحي ؟
رتيل :لا ما زعلت
ثنيان :أكيد
ابتسمت رتيل وأمسكت أذنه:ما زعلت بس تذكر أتلك من هالاذن وباقي السيناريو تعرفه
ثنيان :تفداك هالاذن
في الداخل
هيام وهي ترمش كثيرًا :الحين بيتهاوشون صح؟ بسببي
ملاذ :معليك ثنيان ما يشوف الا رتيل وهي تدري بذا الشي وهم متفاهمين
هيام :مدري احس بيصير شي لأنها طلعت بسرعه
ملاذ :تدرين ان جدتي تزن ليل نهار عليه يتزوج عليها ؟وتوصف له البنات بأحسن أوصاف ولله لو تزن ذاك الزن على حجر كان قام وطاوعها وتزوج ،معليك ولله ما بيصير شي
تنهدت هيام :بنات ترا ودي أتحجب بس فيه شي داخلي يمنعني
وسن :حاربيه ،هذا هو الدين مجاهدة النفس والصبر
هيام :قد جربت البسه يومين واشلحه حتى نجد شاهده علي مقدر استغفر الله
ملاذ :أجل ما عليك الا الدعاء الزميه قولي بكل لحظه يخطر ببالك يارب أني اسألك الستر والعفو والعافيه
وسن :طبعًا مو من أول لحظه تدعين بيتحقق اصبري لو تجلسين بالسنوات لحد ما تحسين رغبه قويه بقلبك للحجاب
ملاذ:الحين خلينا نفطر ونطلع السوق
هيام :ليه ؟
ملاذ :خطبة ولد عمي اليوم لازم تجين
هيام :لا احس عيب ،الخطوبه بس أهل ،الزواج ان شاء الله احضر
ملاذ :هيام كم مره بقول انك من الاهل
وسن :ملاذ تراك تضغطين عليها خلاص خليها براحتها
هيام :يلا انا بطلع ،وراي شغل كثير ،بروح اكلم المحامي عن بيت ابوي بعدين بتدرب للسباق واجهز المزرعه لمشروعي فيها
ملاذ :موفقه
خرجت هيام فواجهت أوس بطريقها
أوس :هيام
هيام :هلا
أوس :تذكرت شي بكلمك عنه
نظرت لساعتها :طيب ،يمديني
أوس :تجين للمرسم ؟
هيام :ممكن
أوس :تعالي من هنا
دخل بها مرسمه فأخذت نظرة سريعه لكل لوحاته وقالت بإنبهار :هذا معرض فني مو مرسم عادي
أبتسم أوس :الهدف أني أسوي معرض
هيام:طيب وش تنتظر؟
كشف لها اللوحه التي يعمل عليها :انتظر القصه تكمل
هيام :قصة أيش ؟
أوس :وقلبك موطن الازهار ...
أكملت هيام :وانا الي يعشق الازهار ،اتوقع الظل او الشكل ذا يمثل الشخص وداخله القلب الي هو عباره عن أزهار الي هو يعشقها ،مكتمله أحسها
هز رأسه بالرفض وهو يقول :باقي النهايه ، وغيري يقطف أحساسه ،ولا أنا الي بقطف أحساسه
تنهدت هيام :تقصد نفسك صح ؟
أوس :لا
هيام :طيب ليه ما تكملها ؟
غطاها أوس مرة أخرى :الشغف يحكمني
هيام :متشوقه للنهايه ،اذا كملتها قول لي
أبتسم أوس :ان شاء الله
هيام :الحين قول لي وش لقيت ؟
أخرج لها ورقه :هي ما تعتبر طرف خيط بس ...أكيد تبين تقرينها
اخذتها هيام :وش ذي؟
أوس :أبوي كاتبها ،مثل الخاطره أو شي كذا
بلعت ريقها وبدأت تقرأها بصمت : أجلس على البحر وأشهد الغروب كما أعتدت كل يوم من حياتي منذ عمر السابعه حتى اليوم وأنا أبن الاثنين وخمسون عامًا ،وأود أن أقول أني شمسٌ عاشت الكثير في يومها ،فعند أشراقي صادفت نجمًا ساطعًا وعندما بلغت كبد السماء فقدت ذلك النجم عشت نهارًا طويلًا عانيت فيه شدة الفقد وحرارة الحزن ،والآن أنا على وشك الغروب وإني أرى شفق رفيقي يقترب ،أمنيتي الأخيرة أن لا أشرق على الدنيا ثانيه أخرى .
ما إن أنهت القراءه حتى أنهمرت الدموع من عينيها :النجم الي كتب عنه يقصد أبوي صح ؟
هز رأسه بالايجاب وقال بهدوء حزين:قريناها أنا ووسن قبل ،وقالت لي أنه يوم قال كبد السماء يقصد عز شبابه والغروب يقصد فيه الموت ،والشفق الطيف
هيام:بكل لحظه أندم أني ما ودعتهم
أوس :وفيه ذي بعد
هيام :أيش؟
أوس :خواتم كانوا مطقمين فيها
هيام :أحجار كريمه ؟
أوس :لا يقول أبوي أنه أول مره أعتمروا هو وأبوك راحوا للمدينه ومن هناك أشتروها ،خواتم عاديه بس تعني لهم كثير
هيام :عادي أخذ حق أبوي ؟
مده لها :طبعًا
هيام :أي واحد هو
أبتسم أوس بحزن :كلهم كانوا نفس الشخص ما تفرق
أخذت أحد الخواتم وأرتدته رغم حجمه الكبير وتنهدت :يا مرارة الفقد
أوس :معليش فتحت المواجع بس ،حسيت أنك لازم تشوفينها
هيام :مين قال أنها تقفلت عشان تنفتح
قامت هيام :شكرًا أنك فكرت فيني بهالشكل
أوس :ما سويت الا الواجب
خرجت هيام فقام هو الى لوحته وأبعد عنها القماش ثم لمس القلب بيده وهو مبتسم بخفاء :أنا الي يقطف أحساسه
...
هيفاء :صباح الخير عروستنا ،اليوم خطوبتك وانتِ ما تدرين وش تلبسين ما تدرين كيف بتسوين شعرك ولا بتسوين ميكبك ولا شي لو اني مكانك انجلط هنا
سهام :كلي تبن
هيفاء :قومي شوفي فهودي تعلم كلمه جديده
جلست سهام ونظرت له بعين واحده وكان يشير لها بلغة الاشاره بجملة :خالتي صارت عروسه
سهام :خالتي صارت أيش؟
هيفاء :عروسه
سهام بهمس :ولله ما صرت الا بسببك
هيفاء :ايش؟
سهام :اقول أنك انتِ علمتيه
اشار فهد لأمه :تقول صارت عروسه بسببي
هيفاء :كيف؟ سهام فسري ذا الشي
سهام :وش افسر ؟
هيفاء :فهودي قرا شفايفك تقولين صرتي عروسه بسببه
سهام :قصدي أني ما حسيت أني عروسه الا يوم هو قال بس ما عرف يقرا شفايفي صح
هز فهد رأسه بالرفض ثم أشار :قريتها صح
هيفاء :سهام ولدي يقرا صح ماقد غلط
سهام :هو قرا صح بس انا غلطت بأنتقاء الكلمات
هيفاء :سهام
قامت سهام :بروح الحمام وانتِ اختاري لي شي البسه بعدين
وقفت هيفاء امامها ودفعتها:مارح تهربين لين تقولين كل شي،شروق تعالي
شروق:هلا
هيفاء :اختك الحلوه مخبيه شي بس ما بتقوله
شروق:اعرف لها انا ،تبين أوريك صوره جهاد بدون ملابس؟
هيفاء:لا يع وش هالقرف !
شروق:بدون تيشيرت يعني شوفيه يسبح بالمالديف كان بالاجازه هو ونرجس
هيفاء :ومسوي تان بعد ولله انه ما يتفوت سهام شوفيه
سهام :لا
شروق:اجل قولي وش مخبيه
سهام :ولا شي
هيفاء :كذابه تقول لولدي انا ما صرت عروسه الا بسببك
شروق :سهله هيفاء ما يبي لها كل هالتحقيق
اشارت شروق لفهد :قد شفت ذا الرجال
هيفاء :مين؟
وضعت الهاتف امامه فأشار :اي
شروق :حلو حلو ،متى ؟
هزت سهام رأسها بالرفض
فهد :يوم ماما مسافره طلعت للشارع بالليل وكانت بتصدمني سياره ...
شهقت هيفاء :ليه محد قال لي
شروق:اصبري خليه يكمل
فهد :وجا ذا الرجال أنقذني ،كان لابس لبس الشرطه بعدين طلعت خاله سهام بدون عبايه
شروق :بدون عبايه !
سهام :لا بعبايه بس ما مداني البس الطرحه
شروق طيب
فهد :وعطته لصقة جروح عشانه انجرح ورجعنا للبيت
هيفاء :انا مدري اصفقك عشانك طلعت الشارع ولا احب راسك لأنك جمعت راسين بالحلال ولا اهاوش خالتك الزفت لأنها خبت عني ،كيف لو صار له شي سهام !
سهام :ما به الا العافيه
شروق:معلينا من ولدك ،شوفي الرومنسيه كيف قابلها مره وحده وعطته لصقة جروح وبعدين جلس يدور لها لين لقاها يا بنتي الرجال اكيد مات من الحب دامه يدور لك من ذاك اليوم لليوم
قامت سهام :ما يهمني
دفعتها شروق :لازم يهمك
هيفاء :سهام تحبينه؟
سهام :لا طبعًا
هيفاء:وليه وافقتي؟
شروق :لأنها تدري انه هو ميت فيها
هيفاء :مدري تصرفاتك سهام توحي انك تعرفينه من زمان كأنه حبيبك وزعلتي منه وجا يخطبك يراضيك
شروق :صح ممكن ولله
شهقت سهام :توقعوها من الكل الا مني
شروق :اتوقعها منك
سهام :خذي جوالي فتشيه مافيه الا صورته الزفت الي ارسلتيها
شروق :طيب صدقتك
هيفاء :يلا روحي الحمام وصلي الفجر بعدين خلينا نشوف لك فستان تجربينه
سهام :مب لازم
شروق :قولي بطلع بالعبايه واصفقك
سهام :عادي بطلع فيها
شروق:سهام ترا خطوبه مو شارع البسي فستان ساتر واطلعي لهم
هيفاء بهمس لشروق :هذي كيف نصارحها عن الي ورا ذا كله
شروق :خليها بعدين بتعرف
سهام :تراني عارفه كل شي ماني بزر
شروق :الحمدلله اجل تفضلي
سهام :خلاص لا تضغطون علي
هيفاء :خلاص امشي صدق خليها
...
دخل جهاد :السلام عليكم
ام جهاد :وعليكم السلام ،تعال
جهاد :ولله تعبان بنام
ام جهاد :بقول لك شي بس
جهاد :سمي
ام جهاد:اليوم ابيك تقوم بدري
جهاد :يعني متى؟
ام جهاد :الساعه ثلاثه العصر
جهاد :توني بنام كيف اصحى ثلاثه ؟
ام جهاد :وراك شغل
جهاد :ادري شغلي بالليل
ام جهاد :ماهو ذا الله يصلحك بنروح نخطب البنت رسمي العصر نروح انا وياك السوق ان شاء الله نجيب الدبل ونجيب لها هديه كذا سلسال ولا سواره ناعمه يعني
جهاد :أيش؟
ام جهاد :نروح السوق
جهاد :وافقت؟
ام جهاد :يقال انها وافقت يقال
قفز على امه وعانقها بقوه :انفداك يمه انفداك
ام جهاد :وخر وبعدين افداني
ابتعد عنها وقبل رأسها :من دعوة ذاك الشايب الله يذكره بالخير
ام جهاد :اي شايب؟
جهاد :واحد امس قلت له ابيك تدعي لي يتحقق الي ببالي
ام جهاد :الحمدلله ،الحمدلله الحين رح نام وريح والعصر قوم
جهاد :ما بنام خلينا نروح الحين يمدينا صح ؟
ام جهاد :روح نام ياشيخ تبي تروح تخطب وانت سهران عيونك حمرا بيقولون ذا متعاطي
جهاد :طيب بس بسأل سؤال
ام جهاد :وش؟
جهاد :وش ممكن نشتري لها هديه؟
ام جهاد :قلت لك سواره ولا سلسال
جهاد :اي اي ماركه سواروفسكي ولا كارتييه ولا فان كلييف؟
ام جهاد :نشوف بعدين
جهاد :كيف نشوف يمه لازم نختار شي يناسبها ،اصلًا انا كيف ما راح عن بالي اسوي لها تصميم خاص ؟
ام جهاد :خله للعقد التصميم الخاص الحين بنروح بشي محترم دبله وسلسال بسيط
جهاد :بسيط كيف يعني كم قيمته اكثر شي؟
ام جهاد :اكثر شي اكثر شي خمسه الاف
جهاد :يمه وش خمسه الاف عيب عيب
ام جهاد :هديه يا يمه هديه شي بسيط ما بنتكلف هي بس خطوبه بسيطه بعد العقد لو تبي تشتري بميه الف ما علي منك
جهاد :لا ولله هذي جمالها ما يليق فيه خمسه الاف بشتري لها انا بعشره الاف ولا عشرين الف من جيبي وعلى ذوقي
ام جهاد :لا حول ولا قوة الا بالله
جهاد :هيا نروح الحين احسن
ام جهاد :ارقد وما عليك بنروح
جهاد :مافيني نوم
ام جهاد :رح غير ملابسك بس وحط راسك على المخده ولله تنام
غاده :السلام عليكم عندي خبر حلو
جهاد :مو احسن من خبري الي كنت انتظره
غاده :عمي ابو راجح كلمني قال فيه مستشفى حق خويه وبعد اسبوع بيفتحون مجال التقديم وانا بقدم
جهاد :جيبي وثيقتك اول
غاده :بروح لها الحين
ام جهاد :الله يوفقك
غاده :تبين شي اجيب لك معاي؟
ام جهاد :سلامتك
جهاد :يمه تكفين
ام جهاد :رح ارقد بس وريحنا ليتني ما علمتك
جهاد :قوميني الساعه ثلاثه لا تنسين لا يروح عن بالك ابد ابد ابد
ام جهاد :مره ابشر ،خلني اكلم راجح يسوي الهديه
جهاد :ايش تكلمين مين وانا موجود؟
ام جهاد :ما اكلم احد اقول راجح مدري كيف حاله
جهاد :بخير بخير ،اذا بغيتي شي قولي لي
ام جهاد :ان شاء الله بس الحين ما ابي منك الا النوم
جهاد :صحيني العصر
ام جهاد :جهاد ولله لو ما تنام بتشوف وجه ثاني
جهاد :وجه سهام؟
ضحكت بغضب :استغفر الله رح بس رح
ذهب جهاد فأتصلت على راجح من خلفه فورًا :السلام عليكم
راجح :هلا وعليكم السلام ،شلونك يا خاله
ام جهاد :الحمدلله بأحسن حال انت شلونك ؟
راجح :الحمدلله تمام تمام
ام جهاد :عساك مب مشغول الحين ؟ بغيت منك طلب
راجح :طالع مع العيال لكن سمي وش بغيتي
ام جهاد:لا خلاص دامك طالع استانس وانا بدور لي احد ثاني
راجح :حلفت عليك انك تقولين
ام جهاد :برسل لك صورة هديه نبي نسويها لليوم للخطوبه ،بس بدال الاسم الي مكتوب بالصوره خله سهام آل ملهم
راجح :أبشري
ام جهاد :الله يبشرك بالجنه ويحفظك ويبعد عنك عيال وبنات الحرام
ابتسم راجح :آمين
ام جهاد :يلا مع السلامه
راجح :مع السلامه
التفت ليزيد :تعرف محل هدايا حلو ؟
يزيد :وش الطاري؟
راجح :بيخطبون لولد عمي ويبوني اسوي هديه
يزيد :يجرحون قلبك الصغير
راجح :يقال اني متشفق على الزواج
يزيد :شف هذا المحل شكله زين
راجح :زين زين ادخل له
يزيد :عاد حظك بالموقف الي قدام الباب
اوقف السياره ونزل للمحل :السلام عليكم
منسق الهدايا :وعليكم السلام كيف اقدر اخدمك
راجح :ولا عليك امر أبي نفس ذي الهديه
منسق الهدايا :وين العقد الي بتحطه؟
راجح:هاه؟
يزيد :الصوره فيها علبه عقد وسط الورد وين العقد
راجح :مافيه سوها بدون
منسق الهدايا :كذا هي ما بتصير هديه
راجح :طيب اصبر بكلم احد
منسق الهدايا :خذ راحتك
راجح :الو ،يا خاله يقول لازم نجيب العقد الي بنحطه بالنص
ام جهاد :لا ما يحتاج قول له يبدا يجهزها ويخليها عنده والعصر بنجيب العقد يركبه واحنا عنده
راجح :طيب ،تقول لك سو الورد والاسم ذا والعصر بتجي هي وتركب العقد
منسق الهدايا :بس لازم اعرف المقاس عشان احط على اساسه
راجح :سو على مقاسات الصوره وخل شوي فيه فراغ زياده
منسق الهدايا :تمام ابشر ،الاسم الي على اللوحه نفسه؟
راجح :لا لا غيره شسمه ياربي ...اي يبون سهام آل ملهم
يزيد :آل ملهم ؟
راجح :أي
منسق الهدايا :تمام بس ادفع عربون
راجح :كم
منسق الهدايا :خمسين ريال
راجح :سم
منسق الهدايا :التكلفه كلها ميه وعشرين ريال
راجح :ان شاء الله نشوف بعدين ،اذا جتك وحده قالت انا ام جهاد هي الي بتعطيها الهديه
منسق الهدايا :ان شاء الله
خرج راجح مع يزيد الذي كان يفكر :كني قد سمعت ذا الاسم
راجح :آل ملهم ؟ تجار أقمشه أظن يعني شوي معروفين
يزيد :لالا يا شيخ سمعته بشي ثاني ...اي صح زوجة أخوي أسمها آل ملهم
راجح :أسمها !
يزيد :يعني عايلتها ،أبوها أسمه حمدان أظن
راجح :تصدق شكل هم الي بيخطب عندهم جهاد
يزيد :ياذي الصدف !
راجح :كيفهم كويسين؟
يزيد :ليه تبي تتزوج من عندهم؟
راجح :وش ابي فيهم بس اسأل كذا لأنهم بيصيرون نسايبنا يعني بكل عزيمه لازم ندعيهم
يزيد :ما فيه الا أبوهم حمدان ما عنده عيال يعني رجال كبير ما يسوي شي مسكين على نياته ،وفيه اخوي خلف يعتبره زي ولده ياخذه معه بكل مكان
راجح :على كذا حتى انت قط معهم وتعال لعزايمنا
يزيد :وش ابي بعزايم الاغنياء
راجح :ولله مافيها شي غريب عزيمه هي عزيمه قهوجي ناس يسولفون وبعدين عشا ويقول راعي العشا ليه سواه وعلى شرف مين وخلاص
يزيد :ما تسولفون بالاسهم والحوسه ذي ؟
راجح :لو يسولفون فيها كان انا هربت قبلك
يزيد :نشوف عاد
راجح :ترا انا من زمان ادعيك لكل شي بس تتعذر ذي المره لو عزمنا تعال
ابتسم يزيد :ان شاء الله
...
هيام :للحين ما بديت
صقر :قد خلصت
هيام :ما انتظرتني !
رمى خوذته عليها :ما عندي وقت للتفاهات
اعترضت طريقه :أنا تفاهه؟
صقر :أكبر تفاهه بحياتي ،دايم ناشبه لي بدون فايده وجودك مثل عدمك
نظرت لوجهه طويلًا وكأنها تحلل نواياه ثم قالت وهي تعيد له خوذته:عرفت ذا الاسلوب
تكتفت :لأني أبيك تصارحني بشي قاعد تتهرب ومسوي راعي شخصيه
صقر أعاد لها الخوذه:لا هذا أنا هذا هو صقر آل محسن الي ما تعرفينه
هيام:وأنت ما عرفت هيام آل مبارك ،الي أبي أعرفه أعرفه والي أبي أجيبه أجيبه
أعادت له الخوذه وقالت وهي ذاهبه :أسأل عني
صرخ من خلفها :وش ناويه عليه ؟
هيام :أعرف الماضي كله
تنهد وهو يقلب بهاتفه:لا حول ولا قوة الا بالله،الو مصلح عرفت شي هي ؟
مصلح :مين ؟
صقر :هيام
مصلح :لا ما طلعت ولا معلومه
صقر :طيب مين يعرف غيري وغيرك وغير أبوي ...وجدتي ،جدتي لحظه بعدين اكلمك
اتصل على جدته فورًا :يا جده
الجده وضحه :هلا
صقر :بسألك شي
الجده وضحه :وشو ؟سريع تراني مشغوله
صقر :كلمتي هيام عن الموضوع ؟
الجده وضحه :لا
صقر :اجل وش الي تدور له ؟ تكفين جد...
قاطعته :أنا بقفل حيل مشغوله
صقر :جده الله يخليك
مرت هيام من جانبه مبتسمه
صقر :نعم؟
هيام وهي تفك سرج الخيل:أول مره أشوفك تترجى أحد
صقر :أنتِ أول مره تشوفيني بحياتك ،بعدين السرج لا تفكينه
هيام:الخيال الي يسوس الخيل بلا سرج وبلا لجام
صقر وهو يركبه:بالسباق لازم سرج ولجام بلا فلسفه زايده
هيام :مالك داعي
صقر :خلاص فكيه بكل الحالتين بتخسرين
هيام :محد بيخسر الا انت
أوس :تأخرت صح ؟
صقر :حيل ،قد خلصت
هيام :وش تسوي هنا ؟
أوس :المفروض أني اتابع تدريبات صقر بس الوقت ماهو بصفي
هيام :مو مشكله تابع تدريباتي توني ببدا
أوس :ما عندي مانع بس بدون سرج ولجام؟
وضع صقر السرج بيده وقال وهو ذاهب:تفاهم أنت معاها
هيام :تراني محترفه معليك
نزع نظارته وأعطاها ثم شرع في تركيبه:ولو وصلتي قمة الاحتراف ،الجام مهم عشان تسيطرين بشكل أفضل ،والسرج عشان توزعين وزنك على الخيل بكل راحه
سرحت هيام بشكله المريح لعينها وعين كل من يعرف أوس ،خصلاته التي تداعبها نسمات الريح دليل على صبره فمن من بني آدم سيصبر ليصبح شعره بهذا الطول ،صوته الهادئ يبعث السكينه ويدل عليها في نفسه أما طريقته بالكلام مهذبه حتى وإن كان يعاتب ،وحمرة ملامحه القليله تظهر خجله من الناس بعض الشيء
مد يده ليأخذ نظارته وقال :صحتك وصحة خيلك أهم من أي شي بالسباق
خرجت من تأملها :هاه؟
أبتسم أوس :سمعتي الي قلته ولا كنت أكلم نفسي ؟
هيام :لا سمعت
أرتدى نظارته :طيب وش قلت ؟
هيام :قلت ...قلت صحتك وصحة خيلك أهم من أي شي بالسباق
أوس :بالضبط عشان كذا لا تفكين السرج واللجام
هيام :ان شاء الله
جلس على الكرسي وأخرج دفتره :يلا أبدي
هيام :وش بتسوي بتكتب ملاحظات؟
أوس :لا برسم
أبتمست هيام :وش بترسم؟
قام من الكرسي وذهب اليها:خلينا نتفق اتفاق
هيام :وش ؟
فتح أحدى الصفحات :هذا سكتش لصقر وهو على الخيل
هيام :اي ؟
أوس :وبرسم لك نفس السكتش الي يفوز أحول سكتشه لرسمه على اللوحه واهديه له
ركبت على الخيل وقالت بتفاخر :جهز الوانك وارسمني ،انا بفوز
أبتسم أوس من ثقتها :واذا خسرتي؟
هيام :برضو أرسمني ،يمكن تكون حياتي أفضل لو كنت مجرد رسمه
أوس :فيه ناس حياتهم بتصير أسوء ،بيحبون مجرد رسمه هذا نوع من الجنون صح؟
هيام :إنسانه مثلي ما تنحب لأني ما أقدر الحب ولا المشاعر
أوس :حبك بندر آل محسن وش أبعد من كذا
هيام :هذا أكبر دليل لكلامي ،ما عندي غير نجد صديقتي وباقي ما ذاقت خيانتي عشان تكرهني مثل الباقين
أوس :ماعندي شك أن فيه ناس دخلتي حياتهم وغيرتيها وخنتيهم مثل ما تزعمين ولا زالوا يحبونك
أوقفت الخيل ونظرت له بإستفهام :تعرفهم شخصيًا ؟
أوس :لا
عادت للتدريب :خلاص ما عندك دليل قاطع ،أنا مو قد الحب فلو شفت شخص يحبني أمنعه
تنهد من كلامها وجلس يرسم وبداخله يجول حديث نفس ؛ كيف يمنع من يحبها وهو أولهم ؟لم يستطع منع نفسه رغم كل شي ،رغم كل أختلاف بينهم ورغم أعوامٍ قد مضت ،رغم المسافات الكبرى الحائله بينهم لا زال يُكنّ لها خفايا المشاعر ولكن لا يقوى على الاعتراف ...
أقتربت منه وقالت بتعب :لو خسرنا كلنا وش بتسوي؟
قال بسخريه :أجمعكم برسمه وحده وأعلقها هنا كل من مر شاف خسارتكم وأعتبر فيها
ضحكت هيام :شماته يعني
أوس :عشان تتعلمون تعيشون بدون ثقه زايده
هيام :ثقتي دايم بمحلها
أوس :نشوف ان شاء الله بالسباق
...
مشاعل :سعيد مستحيل أوافق على شي كذا
سعيد :أنزلي بس وأوعدك ولله شوفيني أوعدك اجيب لك بيت أحسن منه
مشاعل :ما أبيه بتجيبه بفلوس زوجتك ،انا شاريه ذا من شغلي وتعبي
سعيد :شاريته بالحرام ابتزاز وشغل زي كذا
مشاعل :مسوي راعي حرام وحلال وانت بتسكن زوجتك وعيالها ببيت حبيبتك
سعيد :ما عندي غير ذا الحل وش أسوي
فتحت الباب ودخلت تتأفف
سعيد من خلفها :لمي أغراضك بس ولا تخلين حتى منديل
مشاعل :كيف يطاوعك قلبك تنومها على فراشي ؟
سعيد :مثل ما نومتك على فراشها
ابتسمت مشاعل :مقرف بس أحبك
سعيد :يلا شيلي كل شي
مشاعل :ساعدني ،يمكن تلقى لك شي يعجبك والبسه لك يوم
سعيد:مستغله للفرص حتى وانتِ بتنقلين
مشاعل :أضبط وضعي بس
أخرج هاتفه من جيبه ونظر للأسم :وانا أحتاج لي من يضبط وضعي مع هذا الانسان
مشاعل :اخوها ؟
سعيد:الو
ثنيان :ما جاني منك خبر وانا قد عدت بالمطار
تنهد سعيد :ولله شوف ،كنت ابيها مفاجأه بس أنت ضغطت علي
ثنيان :وش؟
سعيد :شريت بيت جديد لنا ،عشان كذا متغير عليها أخر فتره
ثنيان :ماشاء الله ،لا يكون البيت الجديد مسكن فيه زوجتك الثانيه ؟
سعيد :لالا بيت جديد محد قد دخله بس بغيت أثثه أثاث كامل وننقل فيه مره وحده
ثنيان :ومتى بتراضيها ان شاء الله
سعيد :بكره الصبح باخذها له
ثنيان :ان شاء الله ،وتراها بتاخذ معاها شغاله من بيتنا
سعيد :ليه ؟ انا رافض فكرة الشغالات
ثنيان :ولله أختي ما تقدر تشيل البيت لحالها قلنا لها تاخذ شغاله ،بعدين شغالاتنا موثوقات كلهم مسلمين ويخافون ربهم
سعيد :يصير خير
ثنيان :ان شاء الله
أغلق الهاتف وتنهد :انا كل ما أخرج من بلوه يجيبون لي غيرها
مشاعل :وش مسوين ؟
سعيد :بيجيبون شغاله ،متأكد بتراقبني وتقول لأشواق كل شي
مشاعل :عادي خلك حذر أكثر ،وعاد مع فرحة البيت الجديد بتنسى كل شي ترا معليك
أقتربت منه وأمسكت ياقته :بس يا ويلك تشوف الشغاله بنظره ثانيه
سعيد :نظره كيف؟
مشاعل :فيه ناس يخونون زوجاتهم مع شغالات
سعيد :وانا اخونها مع زميلتي بالشغل
مشاعل وهي تخرج الدخان من جيبه:ما تخونها لأنك ما تحبها اصلًا ،ين الولاعه
سعيد :ماهي معاك؟
مشاعل :لا ،شكلها ببيتك
سعيد :مشاعل
ضحكت واخرجتها من حقيبتها :امزح معاي
سعيد :عطيني وحده
...
اشواق :هاه يمه وش شريتي؟
ام ثنيان :راحت هذيك؟
اشواق :مين؟
ام ثنيان :العار الي مدخلينها اخوانك البيت
اشواق :اي طلعت
ام ثنيان :لقيت هذا بمحل Lv
اشواق :لويس فيتون؟
ام ثنيان :اي هذا هو لقيت فيه هالفستان بالغصب ،مدري وش مفهم الناس ان الموضه بالتعري كلها مفتوحه وقصيره
اشواق :هذا حلو طيب
ام ثنيان :اي الحمدلله،وين ام جهاد؟
اشواق :راحت تجيب الهديه وترا الهير ستايلر جت
ام ثنيان :ايش؟
اشواق :مصففة الشعر
ام ثنيان :الكوفيرا اي اي ،ضيفتيها؟
اشواق :اي
ام ثنيان :بأي حلا؟
اشواق :هذاك الصحن الي من آني وداني
ام ثنيان :لا الله يهديك انا طالبه من باتشي
اشواق :احسبك تبغين تروحين فيه
ام ثنيان :ما يخالف ،الحين احد عندها؟
اشواق :اي عمتي ساره
ام ثنيان :وانتِ ما بتحضرين؟
اشواق :لا ما ودي
ام ثنيان :ليه ؟
اشواق :يمكن سعيد يجي بالليل
ام ثنيان :هو كلمك؟
اشواق :لا بس احس
ام ثنيان:دامه ما كلمك تعالي استانسي بعدين خطوبه كلها ساعه ساعتين ونرجع البيت
اشواق :ما ودي ما تجهزت
ام ثنيان :الدواليب مليانه ومن كل ماركه والمكياج مع اخواتك
اشواق :ما ابي
ام ثنيان :براحتك
ساره :شرايكم؟
اشواق :اي كذا احلى من قبل
ساره :كويس ،هاله ترينها فاضيه روحي سوي شعرك
ام ثنيان :بروح بروح بس بغسل يدي ،اشواق شوفي الفستان اذا يحتاج كوي قولي للشغاله تكويه وعلقوه بغرفتي
اشواق :ابشري
دخلت غاده وهي تبكي :اشواق اشواق الحقيني
ساره :شفيك ؟
غاده :لبست العدسه مقلوبه عيوني احترقت
ساره :خرعتيني احسب احد صار له شي الله لا يقولها
غاده :عيني بيصير لها شي لو بقيت ذي العدسه فيها طلعيها اشواق
اشواق :يدي مو نظيفه لمست اكياس السوق
غاده :طيب انتِ يا عمه طلعيها يدك نظيفه
ساره :مين عمتك ؟
غاده :انتِ عمتي انتِ وعندي الاثباتات بس تكفين طلعيها ما اشوف شي
اخرجت العدسه ووضعتها بيدها :ما يحتاج عدسات لون عيونك الاصلي حلو
دخلت نهى :ماما شوفي جوانا عيت تعطيني كعبها الحلو
جوانا خلفها :ما بعطيك أنتِ ما تعرفين تمشين فيه
نهى :لا أعرف بس عطيني
أشواق :اصبروا لا تتهاوشون نتفاهم
صرخت ملاذ :لا
اشواق :وش صار!
ملاذ :ظفري أنكسر بأهم يوم وش اسوي
جلست أشواق وهي تمسك رأسها :صدعت منكم
ساره :لو انك قمتي وتجهزتي كان محد نشب لك كذا
اشواق :ما ابي ياخي خلاص ماهو غصب بعدين شكلكم يفشل كل العايله بتروح عشان خطوبه صغيره وش دراكم انها ما بترفض اخر شي ؟
غاده :لا معليك ترينها وافقت
اشواق :بس مع ذلك شكلكم يفشل ترا قاعدين تعطون نظره للبنت واهلها انكم بتناشبونها بعيشتها لو على الاقل بس الكبار يروحون أمي وخالتي مزنه وعمتي ساره وجدتي بس ذولا يكفون واذا مره مره اخوات العريس وحتى مو كلهم يروحون ما تعرفون بالادب شكلكم وبعدين الملكه إن شاء الله نروح كل ابونا
وسن :وهذا هو الواقع ليش نمثل؟
اشواق :من وين طلعتي انتِ؟
وسن :كنت واقفه هنا من أول
نهى :ماما انتِ قلتي لي روحي
اشواق :بعد ما الناس كلهم قاموا يتجهزون امي قالت حرام خلي بنتك تجي
نهى :يعني ما تبيني اروح؟
اشواق :لا روحي خلاص تجهزتي روحي
نهى :طيب ابي كعب جوانا
جوانا :كلي زق والبسي اي كعب غير ذاك شريته للعيد
نهى :باقي العيد مطول بلبسه انا
جوانا :لا حبيبتي تذكرين يوم ثنيان راح المزاد الي بروسيا ؟ شراه من هناك
ملاذ :كذابه شاريته من برادا الي بجده يوم جايين من المطار ولا مستحيل ثنيان يشتري شي من مزاد ويعطيك
جوانا :كان بيعطيني بس بنفس اللحظه طيحت مزهريه بغرفتهم وقال ما تصلح لك ذي الامانات
ملاذ :صدق ما تصلح لك
نهى :طيب انا وش اسوي ابي كعب شفاف كذا مين معاه
اشواق :حقك بالبيت
نهى :حقي انقطع ،ابتهاج معاها ؟
نرجس :اتوقع اي تبين اجيبه لك؟
اشواق :لا فكينا من شرك تروحين تسرقينه وتجيبينه وتتهاوشون فوق راسي بسألها انا بعدين يلا روحي البسي عشان ما تتأخرين
نهى :طيب ،لا تنسين ارسلي لها ولا دقي عليها ولا كسري راسها
اشواق :طيب
...
نجد :السلام عليكم ،جبت لك حلا
ابو نجد :انتِ مسويته؟
نجد :من الأخر لا
ابو نجد بسخريه :ما طلعتي لأبوك بالطبخ
نجد :ما مداني اتعلم
ابو نجد :انا اعلمك
نجد :تقول راكان جا صح؟
ابو نجد :أي نايم
نجد :وش جابه ؟
تنهد ابو نجد :الله المستعان
نجد :تهاوش مع زوجته وطردته؟
ابو نجد :طلقها ذي المره
نجد :ليه وش صار ؟
ابو نجد :الله يهديهم ان شاء الله البنت بغت تطلع محجبه وقال لها ان طلعتي محجبه بس انتِ طالق وهي شكلها مسكينه ما تدري انه نذر وانه يتحقق النذر إن طلعت وطلعت والحين مطلقها وموديها عند اهلها فتره ويرسل لها ورقة الطلاق
نجد :الله الله طيب انا محجبه وحجابي ساتر وهو يدري وش جاه عليها مسكينه ؟
ابو نجد :عماتك غاسلين مخه ولا هو عادي عنده
نجد :معليك خله عندي شهرين اعطيه مناعه ضد سمومهم
ضحك ابو نجد :بعد ايش
دخل راكان على حديثهم :لا تتعبين نفسك قد طلقتها وعطيتها حقوقها
نجد :راكاني صدق ما تبيها؟
راكان :ما ابيها دامها كسرت كلمتي ما ابيها
نجد :راكان يمكن ما كانت تدري انه نذر
بلع ريقه:انا ادري انه نذر وانا ادري انه تحقق وبرغبتي بعد
نجد :تبي نطلع اليوم انا وياك نتكلم ؟
راكان :معد ابي اتكلم انتهى كل شي
تكتفت نجد :وبنتك مريضة قلب مسكينه ما تخافون تتعب ؟ ترا الطلاق ماهو كذا بلحظه المفروض تجلسون وتتكلمون وتتفقون
راكان :معاها ،كل شهر ارسل لها نفقه وخلاص
ابو نجد :وخلاص؟ بنتك ياخي اتق الله فيها قطعه من روحك وكذا تبيعها بس ترسل لها نفقه وخلاص 
راكان :امها تبيها هي قالت معد ابيك تشوفها ولا شي وش اسوي انا ؟
ضربت نجد كفيها بغضب :انت وياها حمار وبغله تجمعوا وتزوجوا ،المفروض تفكرون ببنتكم بدون انانيه زايده ترا تو عمرها سنه ونص وش بلاكم تبون تعقدونها بطلاقكم؟
راكان :محد اناني الا هي  كيف تحرم ابو من بنته؟
ابو نجد :وانت صدقتها ؟ انا وامكم يوم تطلقنا قالت لي ما بخليك تشوفهم ومع التفاهم هذاكم عندي
راكان :قد كبرنا الحين
نجد :راكان لا تخليني اهفك بذي الصينيه ابوي اخذك من قبلي ما تذكر ؟
راكان :انا جيت معاه بإرادتي يوم المحكمه قلت ابي مع ابوي وانتِ اخترتي امي
ابو نجد :راكان انتوا كنتوا كبار وينأخذ منكم القول والخيار لكن بنتك عمرها توه سنه ماهو بيدها القرار وبتكبر وهي فيها الفين عقده
راكان :ما بيجيها شي اذا امها ما تزوجت بعدي
بلعت نجد ريقها خوفًا من أن يصيب أبنه اخيها ما اصابها :لا ما بتتزوج مها تحبك وانت تحبها والبنت بحاجتكم
راكان :ما احبها ما احبها خلاص تطلقنا وش فيك ما تستوعبين!
ابو نجد :مافيها شي لو تطلقتوا شرع ربي بس اقل شي اتفقوا على البنت
نجد :اقلها تشوفها اذا جت تراجع بالرياض
راكان وهو خارج :الواحد توه يصحى من نومه تنكدون عليه بذا الطاري
نجد :انت نكدت علي قهوة المغرب بتفكيرك الغبي
ابو نجد :جيبي جهاز الضغط احس انه ارتفع
نجد :بسبب راكان الحيوان ذا ما كان كذا الا يوم سكن عند عماتي
ابو نجد :عماتك انا شارد منهم
نجد :حسبي الله عليهم بس ،خربوا بيت راكان وش حلاته هو مها متفاهمين ومافيه زيهم الا يوم نقلوه للخرج وراح عندهم خربوا كل شي بينهم ،اكيد انها تبيه وهو يبيها بس يكابر
ابو نجد :اتصلي عليها وتطمني
نجد :ولله مالي وجه ادق عليها
ابو نجد :قولي لها سمعت بالي صار وبتطمن عليك عاد هي صديقتك من قبل ياخذها هالدلخ
نجد :طيب بدق
بحثت عن رقم مها طويلًا حتى وجدته :يارب يارب ما تكون كسرت قلبها يالحمار ،الو مهاوي
مها وفي صوتها يوجد اثر للبكاء:هلا
نجد :سمعت باللي صار ،وحبيت اتطمن عليك شلونك؟
مها :بأحسن حال
نجد :بأحسن حال وتبكين؟
مها :من الفرح ،معليش يعني هو أخوك بس انه كلب...
نجد :وين رحتي؟
ركزت بصوتها فسمعت شهقاتها بعيدة عن الهاتف :مها
عادت وتنحنحت :هلا
نجد :وش كنتِ تقولين؟
مها :اخوك كلب ما فكر حتى يتفاهم معاي على طول شافني قال لو طلعتي انتِ طالق
نجد :طيب ليه تطلعين ؟كان جلستي وتفاهمتوا
مها :لأني زهقت من الوضع خلاص ،من يوم نقلنا للخرج وعماته ببيتنا كل حزه يوسوسون له ،ما تستاهل شنبك لو خليت زوجتك تطلع كاشفه ما تستاهل شنبك لو بنتك لبست شورت ،البنت صغيره نجد عمرها سنه ونص ما يبونها تلبس شورت! ما قدرت اتحمل وطلعت
نجد :شوفي كلمنا راكان انا وابوي وراسه يابس ،انتِ رغم انك اصغر منه الا انك عاقله اكثر منه ،اهدوا شوي وتفاهموا
مها :مافيه فايده خلاص
نجد :لا فيه فايده ،لببنت لميلاف اقل شي مسكينه هي تعبانه ما بتتحمل كل ذا ابوها بين الرياض والخرج وامها بالهفوف وش بتعيش ووين بتعيش؟
مها :معاي بعوضها عن كل شي
نجد :مها لا تلعبين علي انا اعرف ،ما تقدرين تلعبين دور الاب والام وحدك ولا هو يقدر
مها :ليه هو الي راسه يابس وانا اركض وراه عشان التفاهم ؟ دايم انا الي اجره واكلمه واذبح روحي عشان اقنعه خلاص مافينا خير و زواجنا مافيه خير
نجد :منه خير ،طلع منه بنوته جميله عندها كيرليات تجنن هذا بكبره خير
ابتسمت مها :هذا الشي الوحيد الي كنت حابته
نجد :مهاوي لا تكذبين علي مو كنتِ تحبين شكل راكان بالثوب اكثر من الرياضيه وتقنعينه دايم يلبس ثوب؟
مها :ذاك زمان
ابو نجد :عطيني اكلمها
نجد :طيب ،مهاوي ابوي يبي يكلمك
مها :عطيني
ابو نجد :السلام عليكم
مها :وعليكم السلام شلونك؟
ابو نجد :بخير الحمدلله،يا بنيتي إن كان ولدي اخطأ عليك وزعلك فأنا أعتذر عنه ،والطلاق شرع الله إن كان فيه الخير لكم لكن لا تنسين عشرتكم بالمعروف والخير ولا تنكرين حبك له ما ظنتي الحب انتهى بكلمه ولا ظنتي انه اثنين ما يحبون بعضهم بيجيبون بنت
مها :فيه كثير جابو عيال وهم ما يحبون بعض
ابو نجد :انتم متزوجين من ثلاث سنوات توكم جبتوا هالبنت لو انكم مو متفاهمين كان من اول تطلقتوا ،بلاكم ان العذال دخلوا بينكم وعاشوا حياتكم وانتوا ما عشتوها
مها :كان قلت لنا ذا اول الحين خلاص
ابو نجد :هذا قراركم وحنا ما بنتدخل ونزيد الطين بله لكن فكروا ببنتكم بعدين بأنفسكم بعدين ببعضكم ،فكري بميلاف وش بتعيش إن تطلقتوا بعدين فكري بنفسك وش بتعيشين وبعدين فكري براكان وش حاله من بعدك
تنهدت :ان شاء الله
ابو نجد :الحين وشلون بسيس؟
نجد :يبه ذا لقبي شلون قدرت تقوله لغيري؟
ابو نجد :انتِ بسيس الكبيره وهي بسيس الصغيره
مها :الحمدلله نايمه الحين
ابو نجد :متى مراجعتها الجايه؟
مها :بعد شهرين ،لو نلقى لها متبرع بالقلب رح نقدر نسوي لها العمليه وتكمل نموها بشكل طبيعي
ابو نجد :ولله صعب تلقون متبرعين بالقلب لكن الله معاكم
مها :انا بقفل يا عم شكلها صحيت
ابو نجد :استودعتكم الله
مها :مع السلامه
نجد :شفيهم؟
ابو نجد :ما قال لك راكان؟
نجد :وش؟
ابو نجد :قالوا ان الثقب الي بقلبها بيأثر على نموها ولو يلقون لها متبرع بالقلب ويسوون العمليه رح تكمل نمو بشكل طبيعي مثل الي بعمرها
نجد :اقدر اتبرع ؟
ضحك ابو نجد :قلبك يا بسيس قلبك يعني بتموتين
نجد :راح عن بالي
ابو نجد :خلينا نتقهوى الحين والله متكفل فيهم بإذنه
نجد :انسدت نفسي عن القهوه
...
غيث :هذا هو البيت صح؟
بلعت ريقها :اي
أوقف السياره فنزلت لمنزلها الذي بقي ينتظر كل تلك السنين ،فتحت الباب ودخلت ووجدت كل شي كما تركوه وكأنه البارحه ،حتى تلك الدميه التي اعادت لها بعض الذكرايات أخذتها وهي تسترجع ما دار من أحداث بحضورها ...
عبدالعزيز :هيام وينك؟
هيام :هنا
عبدالعزيز :ذاكرتي ؟
هيام :أي وخلصت
عبدالعزيز :رتبتي غرفتك ؟
هيام :اي خلاص سويت كل شي قلته لي
عبدالعزيز :أجل الحين بنطلع
هيام :وين؟
عبدالعزيز :عند وملاذ ووسن العبي معهم وانا بروح عندي شغل شوي وأرجع
هيام :طيب أنا جاهزه
عبدالعزيز وهو يدخل غرفته:خلاص البسي حذيانك وانتظريني
هيام :يبه عادي اخذ لعبتي؟
عبدالعزيز :لا تتهاوشون عليها زي ذيك المره
لحقته حتى غرفته وكان يقف عند الخزانه ويختار شماغًا :عادي بنلعب بالدور
عبدالعزيز :لو انها هوشه عاديه بخليك بس انك تعضينهم
هيام :طيب خلاص ،كيف تختار شماغ وهم كلهم نفس الشي
عبدالعزيز :نظري ثاقب
هيام :وش يعني؟
عبدالعزيز :يعني قوي
هيام :طيب الناس يعرفون انه تختلف؟
عبدالعزيز :مدري
هيام :اذا ما يعرفون انها تختلف يعني خلاص البس اي شي
وضع الشماغ على السرير وجلس على ركبتيه على مستواها :مو كل شي نسويه عشان الناس حطي نفسك والي تحبينهم بالمرتبه الاولى بعدين باقي الناس
هيام :والي اكرههم؟
عبدالعزيز :ما تعطين لهم ولا قيمه
قام وأغلق خزانته ومد يده لها :يلا نطلع
أمسكت يده :طيب عادي نشتري اسكريم لي ولهم؟
عبدالعزيز :لا ملاذ عندها لوز
هيام :طيب حلاو
عبدالعزيز :شكلك جوعانه صح؟
هيام :انت جوعان؟
عبدالعزيز :لا
هيام :اذا أنت صرت جوعان أنا أجوع
نظر لها قليلًا بصمت ثم ضحك ليحاول قهر حزنه بالضحك :حتى بالكلام تشبهين لها
هيام :مين ؟
عبدالعزيز وهو يمسح عينيه :امك
هيام :آسفه ذكرتك فيها
حملها عبدالعزيز وضمها بقوه :ليه تعتذرين وهذا مرادي
هيام :ما فهمت
ابعدها عنه وداعب شعرها :انا افرح اذا ذكرتيني فيها
ضمها مرة اخرى وشم رائحتها:لولاك كان نسيت ريحتها
هيام :الي يموتون ننسى ريحتهم ؟
عبدالعزيز :أي
عادت لشاطئ الواقع بعد أن كانت تبحر في الذكرايات الجميله وهي تقف أمام نفس الخزانه .كما دائمًا تقودها قدماها لتحيي الآم الماضي ،فتحت الخزانه ففاحت رائحته التي قد نسيتها من سنين طوال أخذت نفسًا عميقًا ونقلت بصرها على ملابسه ثم مدت يدها برجفه لتسحب أحد الاشمغه وتضمه لصدرها كأنها قد لقيت والدها أخيرًا جلست على الارض وهي تجهش بالبكاء من يراها يظن انها تلقت خبر وفاته للتو ،رددت بكلمات متقطعه :نسيت ريحتك ومحد يذكرني فيها...أشتقت لك ...اشتقت لك حيل ،اشتقت لك حيل
دخل غيث عندما سمع بكاءها :هيام
لم تكن هيام تسمعه فهي في عالم آخر "الفقد" حيث كل يوم نقيم الف عزاء على روح لم تعد بيننا منذ وقت طويل كل يوم وبكل لمحه نذكر تلك الروح ،وإن هدأت العيون أحيانًا فالقلب يبكي دائمًا ولا محل به للسعاده
كرر غيث لعلها تسمعه :هيام
لم يكن هناك أي جدوى من فعله فأتصل على نجد التي ردت بغضب :نعم انت بعد؟  الواحد ما يتهنى بقهوه المغرب ابد
غيث بتلعثمه المعتاد :هيام تب...بكي تبكي
نجد :ايش؟
غيث :رحت معها بيتهي ...ولقيت اغراض ابوها وبكت
نجد :وين رحتوا ؟
غيث :بيتهي
نجد :غيث تكفى تكلم وين رحتوا حاول مره وحده ما تتلعثم
غيث :بيت...بيت...بيتهي...بيتهي
نجد :طيب الي هو ارسل الموقع بس
غيث :أروح اخذك؟
نجد :لا تروح ولا تجي خلك معاها
غيث :ابشري
نجد :اخيرًا قلت كلمه صح
غيث :انا اتكلم صح بس يطلع لغط...طلغ...غلط
نجد :اي اي مع السلامه ارسل الموقع
قامت نجد تنادي :يبه
ابو نجد :هلا ؟
نجد :انا بطلع هيام راحت لبيتهم القديم وقاعده تبكي
ابو نجد :اي زين خليك معاها
نجد :باخذ سيارتك
ابو نجد :خذيها المفتاح بالصاله
خرجت نجد في طريقها لهيام واستغرقت من الوقت ما استغرقت حتى وصلت للموقع المنشود ودقت الباب ففتح لها غيث :باقي تبكي؟
هز رأسه بالرفض :بس جالسه بالارض من سنه
نجد :ايش؟
غيث :من ساعه من يوم اتصلتك هي جالسه
نجد وهي تبعده عن الباب:اتصلت علي مو اتصلتني
دخلت الى هيام :هيام
نظرت لها بعينين تحمل حزن العالم بأسره :نجد أبوي مات ...
عادت للبكاء :أبوي مات ،معد هو موجود
جلست نجد بجانبها وحضنتها :خلاص خلاص
هيام :محد قال لي انه مات
ابعدتها نجد عنها ومسحت دموعها :إلا قالوا لك ،انتِ أول وحده عرفت بذا الشي
حضنتها هيام مرة أخرى:توني أحس كأن مشاعري توها ترجع
نجد :تبغينا نطلع من البيت ؟
هيام :ماني قادره رجولي ما تشيلني
نجد :بساعدك قومي
قامت نجد وساعدت هيام على النهوض فذهبت للخزانه :خليني أقفلها عشان ما تروح ريحته منها
دمعت عينا نجد من قلة حيلتها ،لا شيء بيدها سوى أن تقاسمها حزنها :تمام
هيام:غيث باقي برا؟
نجد :اي ؟
خرجن إلى السيارة حيث كان ينتظر غيث :وين أوديكم؟
نجد :مدري ،هيام تبين نروح مكان معين؟
هيام :المزرعه
غيث :ان شاء الله
تنهدت بغصه وقالت :تدرين من زمان نسيت ريحة ابوي شريت نفس عطره بس ما كان نفس ريحته ،كانت كأنها ريحه طالعه من قلبه
أبتسمت بضيق :الحين تذكرتها لقيت كل شي بنفس الريحه كل شي بنفس الشكل كأن الزمن وقف على لحظه ما طلعنا من البيت على أمل نرجع
مسحت انفها واكملت :اليوم أنا رجعت وحدي ...وهو مو معاي
غطت وجهها بيديها وسندت رأسها على كتف نجد لتستكمل بكاءها ،بينما تأففت نجد من دموعها التي كانت تخرج دون رغبتها :عطني مناديل
مد لها غيث المناديل فأخذت وأحد،ا وأصبحت تمسح دموعها القليله التي لا تعتبر شيئًا أمام دموع هيام ،تنحنحت وقالت بغصه :هيام خلاص
أبتعدت عن كتفها وقالت بتوعد :أعرف أنه خلاص وأنه مات مقدر أرجعه بس أبي أعرف كيف مات بعرف ذا الشي وبيرتاح قلبي يمكن حتى أوقف أبكي وأنسى كل شي وأبدا حياه جديده
كح غيث عندما سمعها فالتفتت له هيام :ادري أنك سمعت وروح قول لسيدك صقر أني بعرف كل شي عن ماضي أبوي ولا أنت ولا هو ولا أي أحد بيوقف بطريقي
غيث :ما بقول لأحد بس ...
هيام :ما فيها بس
غيث :طيب
نجد :غيث وش رايك توقف عند ذي الحديقه وننزل نمشي شوي ونشم هوا ؟
...
شروق :جو جو تعالوا شوفوا
هيفاء :ماشاء الله شكل كل القبيله جايين
سهام :بنات احس بستفرغ
هيفاء :ماهو وقت هوسك الغريب
سهام :مو هوس اذا حسيت أني أستحيت وتوترت احس بستف...
ركضت للحمام قبل أن تكمل كلامها
شروق :واضح حالتها صعبه ومهرها بدال ما تدبش فيه تروح عياده نفسيه
هيفاء :هو باقي ما جا
عادت سهام :ياربي انا مدري كيف بعدي ذي الليله
شروق :ذي الليله حبيبتي اسهل شي فيه اصعب
هيفاء :شروق !
شروق :شوفوه هذا هو صح ؟
هيفاء :اي
كان جهاد بالاسفل يمسك ساعته بتوتر فأسقطها خطأً ثم نزل ليأخذها وسقط شماغه
ضحكت شروق :يمه لايقين على بعض كلكم تستحون
سهام وهي تقوم بنفس حركته وتلعب بسوارها :هاه؟
انتبهت هيفاء ليدها :الدليل قدامك
سهام :بنات مقدر ادخل بالصينيه خلوني كذا انا زين ادخل بروحي واطلع وانا قطعه وحده
هيفاء :اي منجد خلاص لعد تاخذينها
ام هيفاء :يلا انزلوا الضيوف جو
سهام :طيب طيب جيت
ام هيفاء :وين حبيبتي ؟
سهام :هاه؟
ام هيفاء :اجلسي هنا أول تنزلين للرجال وتقولين لهم رأيك وبعدين تجين عندنا
سهام :محد قال لي
ام هيفاء :هذانا نقول لك
سهام :تجهزت أوفر أحسب أني بقابل البنات أول
هيفاء :وش اوفره انتِ؟ انعم ميكب بالارض حاطته
شروق :اسمعي احنا بننزل لو جينا ولقينا تغير بشكلك شعره شعره وحده بس كانت هنا وخليتيها هنا ولله ما يصير لك خير
سهام :انا أصلًا ما يصير لي خير الحين
ام هيفاء :لا يصير لك كل خير ،بتكملين الناحيه العاطفيه عندك وتكونين بيت واسره
سهام :يمه رجعت لي حالتي القديمه توني طلعت من الحمام كنت استفرغ
جلست ام هيفاء بجانبها ومسحت على رأسها :توترتي اليوم من الصباح قمنا مشغولين ونجهز
سهام :طيب أخاف يصير لي كذا معاه وش اقول له
ام هيفاء :صارحيه قولي له أنه تجيك ذي الحاله من يومك صغيره وهو أكيد بيتفهم
سهام :بشوف
ام هيفاء :الحين هدي نفسك سوي اي شي ينسيك ارسمي فستان عرسك مثلًا وبإذن الله الامور سهالات
سهام :ان شاء الله
في الاسفل كانت الجده وضحه تتحدث وهي تشير على شروق:هذي العروس؟
نرجس :لا مو هي الله يهديك
شروق :العروس فوق
ام جهاد:وينها نشوفها ؟
هيفاء :معليش بس عاداتنا اول شي تدخل تقول رأيها عند الرجال يعني بالنظره وبعدين تجي عند الحريم وتكمل معاهم
ملاذ بصوت منخفض :النساء
ام جهاد :ماشاء الله حتى عاداتكم مرتبه
غاده بهمس :يمه مدحتك جايه غلط
ام جهاد :معرف وش اقول يعني
غاده :ايه شلونكم؟
هيفاء :الحمدلله بخير وانتم شلونكم ؟
ساره :بأحسن حال والحمدلله ،كلنا طايرين من الفرحه وجايين
ضحكت بحرج هيفاء :اي ماشاء الله
ام جهاد :عسى ما نثقل عليكم بس
دخلت ام هيفاء :لا مافيها ثقل البيت بيتكم حياكم وان ما وسعكم البيت ياسعكم القلب والعين
في مجلس أخر دخل جهاد بربكة بعد أن عدل شماغه من جديد فأنصدم من وجود ذات الرجل في المجلس :انت؟
ابو جهاد :رح سلم على عمك حمدان
ضحك أبو هيفاء :تعال تعال سلم ،أمس لقيته بالنقطه وعرفته من الاسم
ارتبك جهاد اكثر عندما سلم عليه:ما كنت اعرف انه انت سامحني
ابو هيفاء:على وش اسامحك؟
جهاد :مدري
ابو راجح:اجلس خلاص
جلس جهاد بين والده وعمه :وينها ؟
ابو هيفاء :ايش؟
قرص ابو راجح فخذه :القهوه
جهاد :اي القهوه
ابو هيفاء :الحين نجيبها
التفت لوالده وهمس :يبه كلمه
قرصه ابو راجح مرة اخرى فالتفت له :شفيك يا عم؟
ابو راجح :كل ما تستعجل بتاخذ قرصه اصبر كل شي على وقته
ابو جهاد :الا يبو هيفاء
ابو هيفاء :سم
ابو جهاد :انت وين درست الثانوي؟
ابو هيفاء :ولله ما درستها بالرياض انا ،كنا بالديره
ابو جهاد :***؟
ابو هيفاء :اي ،انت كنت هناك؟
ابو جهاد :اي دفعه انت؟
ابو هيفاء :اظن واحد ثمانين مدري اثنين وثمانين
ابو جهاد :انت كنت تلعب مع فريق الكوره؟
ابو هيفاء :اي
ابو راجح :عساك حمدان الاشعث؟
ضحك ابو هيفاء :يا وجه الله ظنيت ان الناس نسيوا ذا اللقب اثركم تذكرونه
ابو جهاد :كيف ننساه وانت كنت مكتسح الديره بسمعتك
ابو راجح :وش صار لك وتركت اللعب؟
ابو هيفاء :تزوجت ،ونقلت للرياض والحمدلله ربي رزقني بثلاث بنات وصرت ابو البنات وإن كان البعض يحسب انها عيره ياعيرني فيها فهو مخطي ولله ،البنات بركه البيت وسكينته
ابو جهاد :انشهد ،انا معاي ثلاث بنات وولدين لكن قلبي يفضل بناتي عليهم
جهاد :وش هالاعتراف الجارح بالمكان الغلط
تنحنح ابو جهاد :مقصد جيتنا الحين ...
قاطعه جهاد بفرح :الحمدلله!
ابو هيفاء :شفيك؟
جهاد :الهلال سجل هدف
ابو هيفاء :طلعت هلالي
جهاد :اي وانت؟
ابو هيفاء :هلالي قديم
جهاد :اي شكل ابوي يبي يقول شي تفضل يبه
ابو جهاد :مقصد جيتنا اليوم خير بإذن الله ودنا اننا نوفق راسين بالحلال ونطلب بنتك سهام على سنة الله ورسوله لولدي جهاد
ابو هيفاء :قد تكلمنا بالموضوع قبل وبغيت اسأل عن ولدك لكن أمس صار لي موقف معاه
جهاد :معليش ما عرفتك امس
ابو هيفاء :الافضل انك ما عرفتني ،المهم الموقف الي امس خلاني اعرفه زين وبأذن الله هو خير رجال لبنتي
قاطعه جهاد :العقد بعد شهر
ابو هيفاء :ايش؟
جهاد:لا اقول عقد المعيوف بينتهي بعد شهر ،ولا شي كملوا
ابو هيفاء :ومثل ما تعرفون رأي البنت أهم شي ،أن كان ودكم نقوم أنا وجهاد للمجلس الثاني وتجي للنظره الشرعيه وناخذ رأيها
جهاد :اي اي طبعًا
ابو هيفاء :على ايش مستعجل؟
تنهد جهاد فعرف ابو راجح ما سيقوله وسبقه:وراه شغل مسكين شفته ليلي
ابو هيفاء :بغينا نعشيكم
ابو جهاذ :كان ما تكلفتوا محنا مطولين
ابو هيفاء :مافيها كلافه
قام واكمل:قم وبعد النظره ان شاء الله نحط العشا بيمديك تلحق على دوامك
قام جهاد خلفه وأثناء مسيره كان يريد أن يفتح حديثًا :كم عمر بنتك؟
ابو هيفاء :بنظري عمرها خمس سنوات
جهاد :هاه؟
التفت له ابو هيفاء :عين الاب غير إن كنت تبي الصدق اسألها
جهاد :ان شاء الله
فتح له الباب :تفضل
جهاد :من بعدك
دخل أبو هيفاء وخلفه جهاد الذي جلس مقابله
ابو هيفاء:اي جيبيها اي تكلمنا وان شاء الله خير
في الجهه الاخرى
دخلت ام هيفاء على سهام التي كانت تشغل نفسها بالرسم :ابوك اتصل الرجال تحت ينتظرك بتجين
قامت من مكتبها وبيدها قلم :اي بجي
ام هيفاء :بخصوص القلم
اعادته سهام :اي صح
ام هيفاء :تعالي
سهام :يمه لبسي مكشوف صح؟
تمعنت بشكلها :لا ماهو كاشف حتى رقبتك ما تتنفس
سهام :باخذ طرحتي احس احسن
ام هيفاء :سهام الله يهديك معد بتصير نظره ،أدري أنك تستحين بس عادي كلها دقيقتين وتطلعين وابوك معاك
سهام :طيب أمسكي يدي لين عند الباب
ضحكت وامسكت يدها :يلا توكلنا على الله
أخذتها حتى باب المجلس فتوقفت :لحظه باخذ نفس
ام هيفاء :حتى داخل فيه اكسجين
سهام :طيب
نادت ام هيفاء :يابو هيفاء
ابو هيفاء :هلا هلا جيت
فتح الباب وأستقبل سهام بالتراحيب :يا مرحبا واهلا بشيخه البنات ادخلي
سهام بهمس :يبه امسك يدي
ابتسم ابو هيفاء وأمسك يدها ثم دخل بها :حياك يا زينة البيت حياك
نظر لها جهاد قليلًا بإرتباك ثم قام وأدى التحية العسكريه
أنفجر أبو هيفاء ضاحكًا من الموقف :استرح استرح
جلس ابو هيفاء وبجانبها سهام التي لا تزال متشبثةً بيده :هذا جهاد الي طلبك إن كان عندك فضول عنه اسأليه هذا هو قدامك
همست سهام لوالدها :لا مافيه
ابو هيفاء :متأكده؟ ما بتسألين عن البيت عن الدوام عن الراتب تراه من حقك
جهاد :دوامي ذي الفتره الشفت ليلي لكن بعد ثلاث ايام عندي اجازه اسبوعين وبعدها اقدر اغيره والراتب على قد حالي ثمانيه الاف لكني ورثت من عمي ثلاثه مليون والبيت...
ابو هيفاء :شفيه البيت؟
جهاد :بنفس البيت مع اهلي فتره وان شاء الله ننقل
ابو هيفاء :ما تقدر توفر لها بيت لحالها قبل الزواج؟
جهاد :أقدر لكن افضل هي تختار البيت الي تبيه ان شاء الله
التفت ابو هيفاء لها وأبعد شعرها الذي من الواضح انها وضعته على وجهها متعمده :هاه شرايك؟
سهام :مدري
ابو هيفاء وهو مستمر بالمسح على شعرها :اذا منتي راضيه عن موضوع البيت بكيفك
سهام :الا راضيه
ابو هيفاء :يعني موافقه؟
جهاد :انا عندي سؤال...ين...ثلاثه يمكن
ابو هيفاء :تفضل
جهاد :كم عمرك؟
سهام :٩٨
جهاد :ايش؟
ابو هيفاء:هي مواليد ٩٨
جهاد :اها طيب انتِ موظفه ؟ ترا عادي بخليك تشتغلين
سهام :أي مصممه فساتين
جهاد :اها حلو حلو
ابو هيفاء :هاه موافقه؟
بلعت ريقها :أي
قام ابو هيفاء :أجل على بركة الله
قام جهاد خلفهم :على بركة الله
ابو هيفاء :وين ؟
جهاد :معاكم قلنا على بركة الله
ابو هيفاء :لا يالخوي مو الحين اقعد اقعد وشوي وارجع لك
جهاد :أعرف مأذون انكحه كويس ادق عليه على بال ما تجي؟
ابو هيفاء :لا مره مستعجل الله يهديك اقعد اقعد بس
جهاد :طيب
ما إن خرج ابو هيفاء وسهام حتى بدأ جهاد يحدث نفسه :كفو يا جهاد كفو ولله اغريتها ووافقت عليك
قلد حركة سالم الدوسري :اخلط ابو الحب والمشاعر اخلط
دخل ابو هيفاء على منظره الغريب :وش تسوي؟
جهاد :ولا شي
دخلت سهام خلفه فبلع ريقه :وش فيكم؟
ابو هيفاء :البنات دقوا يقولون بيجون يبونكم تلبسون خواتم وبيصورون
جهاد :طيب طيب
ام هيفاء :اذا بتطلع البنات بيجون
جهاد :انا؟
ام هيفاء :لا ماهو انت
خرج ابو هيفاء فدخلت غاده ونرجس وشروق وقد كانت ترتدي عباءتها
غاده :ماشاء الله تبارك الله  perfect couple
شروق تهمس لنرجس :احس احلام العصر
ضحكت نرجس :اختك جالسه جنب اخوي
غاده :يلا حبايبي لبسوا بعض خواتم واحنا بنصور
تكلمت سهام بعد صمتها الطويل :ما اتفقنا انه فيه لمس
مسح جهاد على وجهه وهو يهمس :يا زين هالحس
شروق :احنا اتفقنا انتوا مو لازم يلا قوموا
قامت سهام ووقفت خلف شروق
شروق :تعالي هنا جنب خطيبك
تنهد جهاد عندما سمع قولها عنه
اقتربت منه نرجس لتعدل شكله وهمست بأذنه :اشوف القلب قد مال
جهاد بنفس الهمس :القلب قد انحرف مو بس مال
ضحكت نرجس وتراجعت للخلف :يلا خذ الخاتم الذهبي ولبسها
غاده :لحظه سهام خليك كذا وجهك لجهاد
سهام :وين ؟اخش فيه؟
همس جهاد : الود ودّي في ضلوعي أخبّيك     لا حي يدريبك ولا حي يلقاك
لكن اتضح ان همسه كان أعلى من مجرد همس حين قالت غاده :كنك فجرتها جهاد
لاحظت شروق ان سهام كانت تنفر منه وتبتعد عنه بهدوء فدفعتها :أرجعي مكانك لو يقول لك اعذب الاشعار ما تهربين كذا خلونا نخلص تصوير ونخلصكم علاقه طرديه نصور بسرعه تطلعون بسرعه
تنهدت سهام واغمضت عينيها :بسرعه طيب
غاده :يلا لبسها
مدت كلتا يديها فتنهد جهاد :لا اله الا الله كنك تخيريني بين الجنه والجنه
نرجس :ما تخيرك ولا قالها الله لا تسوي فيها العاشق الولهان سهام عطيه يمينك
سهام :اي وحده ؟
شروق :خلي يدك الي فيها الشامه ورا ظهرك اليسار وبقي اليمين قدام
همست لها نرجس بسخريه :كاننا نعاملهم معاملة اطفال ؟
ضحت شروق :صدق
البسها الخاتم فتراجعت بسرعه :خلاص خلصنا
غاده :وين وين ؟ تعالي باقي انتِ لبسيه
سهام :يمكن ما يحب الخواتم
جهاد :الا احبها واحب الي يلبسني اياها
نرجس :جهاد سد حلقك البنت بتتفالخ عظامها من التوتر وانت تغازل زي الزق
شروق :لحظه من وين تعلم المغازله؟
نرجس :سجله نظيف بس انه يحب الشعر ويغازل صقره فيه معليكم
البسته سهام الخاتم وتراجعت مره اخرى :الحين خلصنا
غاده :باقي الكيك
سهام بتذمر:وش ذا كان خليتوه عقد قران احسن!
وضع جهاد يده بجيبه :اعرف مأذون أنكحه كويس ادق عليه؟
غاده :لا انت سد حلقك ونفذ الاوامر زي ما نقول
جهاد :طيب
شروق :يلا سهام حبيبتي اعرف انك متوتره بس تقطعون الكيك وبعدها اسمح لك تطلعين حتى شوفي فتحت الباب
تنهدت سهام :اخر مره
جهاد :لا ان شاء الله طول العمر
نرجس بغير صبر :سد حلقك
جهاد :طيب
غاده :شوفوا الكميرا بتطفى شحن بسرعه خلصوا
قطعوا الكعك وخرجت سهام فورًا تلتقط أنفاسها فلحقتها شروق :سهام شدعوه مكبره الموضوع
سهام :معد صارت نظره شرعيه
شروق :نبي نصور زي الناس !
سهام :ما علمتوني عن شي زي الناس
شروق :لأنك كنتِ بترفضين فسوينا من وراك
سهام :احس جتني فوبيا منه
شروق :ليه ؟ وهو مسكين يحبك ويخاف عليك والود ودة بضلوعه يخبيك لا حي يدري بك ولا حي يلقاك
سهام :لعد تقولينها تكفين احتاج فتره عشان اتخطى
شروق :بتتخطين بس قلبك ما بيتخطى
سهام التي تود انهاء الحديث :اوكي
بعد العشاء كان جهاد يصف مشاعره وهو يقود السيارة بحماس :ياخي انا محد قال لي انه فيه اشياء حلوه كذا بعالمنا
نرجس بغرور :مو كفايه احنا قدامك
جهاد :لا هي غير هي غير عيونها ناعسه آخخ من العيون الناعسه بس،ويدها ناعمه قسمًا بالله جاني شك اني امسك الكيك مو يدها
غاده بحالميه :تتوقعون هادي كذا وصفني يوم خطوبتنا ؟
ابتهاج :لا قال ما توقعت ان غاده ام الشعافل صارت كذا
غاده :كلي تبن
جهاد :معلينا منك ومن خطيبك الغبي ،انا اعيش اجمل لحظات حياتي انا شفت شي ماقد شافه مخلوق من الجمال هذي كيف تمسي معانا عالارض كيف !
نهى :طبيعي تشوفها شي غريب وانت كل يوم بالدوام مقابل المخالفات والوجيه المسوده من سواد عيشتها
جهاد بغير تصديق :الحين صدق انا وياها بنعيش بنفس البيت
نرجس:وتنامون على نفس الفراش وتاكلون نفس الاكل
جهاد :يا زين عطرها ياخي احسها هي منبع العطور ،بس بغيت اسألكم شي قالت هي مواليد ٩٨يعني كم عمرها؟
نرجس :٢٥
جهاد :اصغر مني بسنتين شوفوا التوافق كيف
جوانا:طيب عطنا بيت شعر فيها يالشاعر
تنهد جهاد :يقول لك خالد الفيصل :
كتبت من الشّعر في كل معْنَى
ولكن وصف زينك ما بلغنا
أنا وش لون أوصّف زين روحك
وذاتك حسْنها ماقد شهدنا
أشوف الصّبح في طلعتك باسم
وبك خجلة غروب الشّمْس شفنا
تجي مثل الكَرَى سلْطة حضورك
وما تبغيه من حلمٍ حلمنا
نشيت بعالمي منشا سحابه
يسابق نبتنا فيها زهرنا
أحبّك حب...