كُن بقربي فإن الروح هائمة

4

لمحةٌ من الماضي...
رد على هاتفه :هلا بندر ،عسى ما شر ؟
بندر بغصه :عبدالعزيز
عبدالعزيز :سم
بندر :ابيك معاي
عبدالعزيز :معاك انا وين تبي؟
بندر :المقبره ،صلاه الجنازه
انقلبت ملامحة :ابشر جيتك انا بس وين ؟
بندر :بالمستشفى ،زوجتي سقطت ولدي مات
عبدالعزيز :إنا لله وإنا اليه راجعون جايك جايك
وصل للمستشفى بعد وقت ودخل ينادي :بندر
بندر :هنا
عبدالعزيز :زوجتك بخير صح ؟
بندر :اي الحمدلله على كل حال ،لكن ولدي...
عبدالعزيز :الله يرحمه طير من طيور الجنه ان شاء الله
:استاذ بندر ؟
بندر :اي هلا
:تعال استلم الجثمان
سانده عبدالعزيز حتى قام ودخل ثلاجه الموتى ،أخذ طفله الذي توفى قبل أن يكمل الشهر السابع حتى وخرج به في كفن صغير
ذهب للمقبره وعبدالعزيز ملازم له حتى دفن ابنه وجلس بجانب القبر :آه يا قلبي عليه ،أخذه الموت وهو بكبر يدي
عبدالعزيز :أجله يا بندر ماله نصيب بذا الدنيا
مد يده لعبدالعزيز :قومني
أقامه عبدالعزيز ونفض له ثوبه :الحين خلك رجال ورح لزوجتك ولا تبين لها ضعفك زي ما شفته هنا
بندر :عبدالعزيز
رفع عبدالعزيز رأسه :هلا
عانقه بندر بحزن فقال:أصبر
بندر :أبصبر على الدنيا دام لي خوي مثلك ،تراني سميته عبدالعزيز لعله يشفع لي ولك ...
...
دخل غيث :السلام عليكم
صقر :استأذن وأدخل خمسين مره قلت لك
غيث :ولله الامر عاجل شف الاخبار
صقر :أي اخبار
مد له الجهاز اللوحي :بالسوشال ميديا صور أوس وهيام بميونخ و...
صقر :و؟
بلع ريقه :كان ماسكها وكاتبين أنه تزوجها
قاطعه صقر بحده :منهو ناشر ذا الكلام
الجده وضحه :صقر !
جلس صقر مره أخرى بهدوء :وش صار ؟
الجده وضحه :غيث رح شوف لي كل الكلام الي ارسلوه
صقر :وش بتسوين فيه ؟ نطبعه ونعلقه بالمكتب أحسن
الجده وضحه بسخريه :دق على زوجة أخوك وأخوك يجون
صقر بغضب :ماهي زوجته
الجده وضحه :ذا الي يبونه الناس صقر يعصب يمسكون عليه زله ويروح فيها أقعد هنا ودق على الزفت ذيك
تنهد صقر :كيف يمسكها كذا ذا الحمار
الجده وضحه :اصبر يمكن شوفوب
صقر :أيش؟
الجده وضحه:الي شرحتها لي يركبون صور
صقر :فوتشوب
اتصل على أوس :الو
أوس :هلا؟
صقر :وينك ؟
أوس :مشغول
صقر :ما شفت الأخبار ؟
أوس :لا وش صار؟
صقر :صرت متزوج مبروك
أوس :أيش؟
صقر :لأنك حمار وما تمسك نفسك وشهوت...
قاطعته الجده وضحه بحده :صقر !
تنحنح :لأنك حمار ومدري وش سويت ولصقت بالبنت نشروا صورك معاها وانك متزوجها
أوس :كيف كذا ؟
صقر :تعال بس ونتفاهم
أوس :طيب جاي
صقر:لحد يشوفك أنتبه
أغلق الأتصال وأتصل على هيام :الو
هيام :نعم ؟
الجده وضحه :افتح الصوت خلني اسمعها
فتح المكبر :شفتي الاخبار ؟
هيام :اي اخبار ؟ بتجي عاصفه تشلك ؟ الحمدلله
نظر لجدته ليتأكد من رده فعلها ثم قال :لالا شوفي بالسوشال ميديا ابحثي اسم أوس وشوفي
هيام :خبر خاص يعني اخلص علي مشغوله الحين
صقر :عاصفه شلتك أنتِ وأوس
هيام :كيف ؟ ما فهمت
صقر :اشاعات اشاعات صوروكم بميونخ وكتبوا زوجه أوس آل محسن
هيام :كذاب
صقر :ولله ذا الي ...
هيام بدافعيه :اكيد انت ناشرها تبي تفضحني
اخذت الجده الهاتف من يده :تعالي المكتب بس بكلمك
بلعت ريقها من صوتها المألوف :ان شاء الله
دخل أوس بذعر :صقر...
صقر :أقعد
أوس :ما كان قصدي كان فيه مويا وكانت بتمشي فيه مسكتها بس ثانيتين بس
الجده وضحه :الناس يشوفونه قصدك
بعد وقت دخلت هيام بنفس الذعر :خير ؟
تنحنح صقر ونظر لجدته
بلعت ريقها :معليش،السلام عليكم
الجده وضحه :وعليكم السلام ،معد باقي احد صح؟
صقر :اي
الجده وضحه :كيف بتعدلون غلطكم؟
هيام :ماهو غلطنا
صقر :كيف تعدلونه ؟
الجده وضحه :أنا أقول تزوجها وعطهم الي يبونه ...،مع أني ما أشجع تتزوجون بنات مجهولين الأصل بس تزوجها فتره وطلقها
هيام بأستفزاز :منجد ؟
الجده وضحه :ذا الحل الوحيد ترا ولا ماني متشفقه أزوج ولدي عليك
ضربت هيام الطاوله بغضب :حركات الروايات والمسلسلات الي يتزوجها عشان ينقذها ماهي علي ،لو ما حليتها بدون طرقكم الفاشله ذي ماني بنت عبدالعزيز
صقر :صوتك لا يرتفع
هيام وهي خارجه :قد أرتفع وخلص
...
غاده :اخيرًا كلنا مجتمعين بمكان واحد ووقت واحد
سهيل :ولله ما ظنتي جهاد بالعالم الموازي
غاده :جهاد ،جهاد الو جهاد
جهاد :اخلصي بنام
غاده :عائلتي العزيزه جمعتكم اليوم عشان أبي اقول لكم حفل تخرجي بكره عطيتكم انا دعوات متفرقه كل شوي اقول لواحد بس الحين ابي كلمتكم النهائيه
ابو جهاد :انا وأمك بنحضر أكيد
نرجس :كنت بطلع مع صديقاتي بس...
جهاد :وين تطلعين ؟
نرجس :معد بطلع بروح حفل غاده
صفقت غاده :طيب رجال البيت بيحضرون ؟
ابتهاج :أنوثتي ومناكيري ما اثبتت لك اني بنت ؟
غاده :ادري بك بتحضرين بس ابي اشوف سهيل وجهاد
جهاد :الليل مقدر
غاده :جهاد جهاد جهاد أرجوك خل أي احد يمسك عنك هذا يوم بالعمر مارح اتخرج مره ثانيه
قام جهاد :بشوف
غاده :وين ؟
جهاد :بنام بنخمد برقد من البارح صاحي
غاده :ابي كلمتك النهائيه
جهاد :كلمتي النهائيه بجيبها لك بكره الفجر
غاده :طيب سهيل؟
سهيل :مع تؤامي انا
ابتهاج :يا بابا أنا مو تؤامك أنا ثالث ثانوي وانت توك ثاني
سهيل :المهم انا معاك
غاده :كلكم بتحضرون الله ،طيب الحين استشاره ثانيه
ابو جهاد :غاده حبيبي وش رايك تخلين الاجتماع بالواتس؟
غاده:لا ولله يبه معليش ارسل دايم محد يرد
ام جهاد :مشاغيل
غاده:بس استشاره وحده
ابتهاج :نسمعك
غاده :من وين اشتري فستاني
ابو جهاد :مو الحفل بيحضرون فيه العوايل ؟ وش تبين بفستان وانتِ بتلبسين عبايه
غاده :يبه قلت لك امس بعد الحفل بنروح انا وبنات عمي شاليه قلت لي طيب
ابو جهاد :وينه ذا الشاليه ؟
غاده :برسل لك الموقع بعدين
ابو جهاد :يبعد أكثر من عشرين كيلو لا
غاده :بعدين نتناقش عن الشاليه يابعدي الحين من وين اشتري فستان شيكت على كولكشن زارا الجديد ما عجبني شفت رباعيات ما عجبني لفيت كل السوق ما عجبني شي بس شريت شنطه من ديور حلوه لونها أسود تصلح على كل شي
ابو جهاد :هذا موضوع تناقشين فيه خواتك انا طالع
غاده :طيب ابوي انسحب وش رايكم
نرجس :فيه محل اخت صديقتي أمس فتحته هي مصممه فساتينها حلوه مره لا تفوتك
غاده :صدق؟أبي اشوف شي من تصميمها
نرجس :برسل لك حساب متجرها انستا ...يمه
غاده:وش
نرجس :الاخبار
ابتهاج :وش فيها ؟
نرجس:أوس بميونخ مع وحده كاتبين أنها زوجته
ابتهاج :اشوف
غاده :يمه حلوه البنت ماشاء الله
نرجس :واضح سعوديه
ابتهاج :الصدق ...
غاده :وش؟
ابتهاج :اعرفها ،شفتها بالمزرعه امس
نرجس :اي مزرعه ؟
ابتهاج :بمزرعه الخيل ،رحنا هناك ولقينا البيت مفتوح ودخلنا كانت موجوده هي ووحده معاها وبعد شوي جا صقر معصب اننا دخلنا المزرعه وشفناهم
غاده :يارب ما يكون الموضوع مقرف
نرجس :انا أقول ما نتدخل لأن جدتي ما بتقصر
ابتهاج :لا تقولون لأحد أني قلت لكم
...
رتيل :مو معقول تفكيرهم !
ثنيان :كفار وش تتوقعين منهم
رتيل :اي كفار ما قلنا شي حسابهم على ربهم بس كذا على طول ننصحكم بالأم البديله ؟ هم مستشفى ليش اصلًا ؟
ثنيان :معليك منهم تبين نتغدا؟
رتيل :اي جعت
ثنيان :اي مطعم تبين؟
رتيل :اي مطعم؟
ثنيان :اي
ابتسمت:الي رحنا له أول يوم بشهر العسل
ثنيان :لا رتيل
رتيل :ثنيان
ثنيان :ما احبه
رتيل :ولله حلو
ثنيان :بس الذكرايات ماهي ذاك الزود
رتيل :ترا سامحتك
ثنيان :مو على سامحتيني الموضوع يفشل رحت جلست عند البنت أحسبها انت لو عيونها مو خضر كان رجعت معاها البيت
رتيل :صدفه كنا لابسين نفس الشي الحين مستحيل يتكرر نفس الغلط ،ولو تكرر بزعل منك لأنك ما تعرفني للحين
ثنيان :عشان كذا ما ابي اروح ما ابيك تزعلين مني
رتيل :طيب حبيبي الموقف مو مرتبط بذاك المطعم بس يمكن يتكرر بمطعم ثاني
ثنيان :رتيل تكفين
رتيل :يلا اصلًا هو أقرب شي منا
تنهد ثنيان:طيب
رتيل :فديته يسمع الكلام
ثنيان :لأنه ما ودي الحوار يطول ولا انا أقدر أكسر كلمتك
امسكت رتيل ذراعه :اي اي معليك تفتتها تفتيت
ثنيان :يدك بارده
رتيل :احسب الجو مو مره برد ما أخذت القلفز
امسك يدها ووضعها في جيبه :ثاني مره خذيها معاك حتى لو كانت الشمس حارقه
ابتسمت رتيل :أن شاء الله
بعد وقت في المطعم
ثنيان :تأخروا شرايك نطلع
نظر لها وكانت تسرح بالشارع :رتيل
رتيل :هلا
ثنيان :شفيك؟
رتيل :عاجبني الجو
تمعن بوجهها :مو الجو
تنهدت رتيل :قبل ست سنوات كنا هنا بشهر العسل ما نعرف المعاناه الي كنا بنعيشها واليوم رجعنا عشان علاج الموضوع غريب
ثنيان :لو كنتِ تعرفين أننا بنعيش ذا كله كنتِ بتتزوجيني؟
رتيل :ما قد فكرت كذا ،ثنيان صح أني أتكلم بذا الموضوع كثير وقد أيش يضايقني بس ولا مره تخيلت نفسي مع غيرك
ثنيان :مو قصدي كذا قصدي أنه جهلنا بالغيب من صالحنا أي أنسان يقولون له ترا الشخص الي بتتزوجه مارح ينجب طبيعي رح يرفض الزواج
رتيل :بس المشكله مو فيك أو فيني سوينا تحاليل كثيره مافينا أي أمراض
ثنيان :اي الحمدلله
سكت قليلًا ثم أكمل :بس ذي المره أحس السنه الجايه رح نجي هنا ومعنا طفلنا ،شعور قوي داخلي يقول بتصير أب قريب
أبتسمت رتيل :أن شاء الله
اخرج هاتفه من جيبه :هلا؟
أوس :تقدر تجي؟
ثنيان :ولله باقي لنا مراجعه بكره وبنجي
أوس :طيب خلاص
ثنيان :ليه؟
أوس :بس شغل ،أقدر أسويه انا
ثنيان :ماهو شغل صار شي صح؟
أوس:طلعت أشاعات أني متزوج هيام
ثنيان :كيف أصلًا عرفوها؟
أوس :صورونا بميونخ
ثنيان :الله المستعان ،طيب وش بتسوون ؟
أوس :ولله مدري هي قالت بتحلها وانا لي ساعتين أعصر مخي عصر ما عرفت
ثنيان :خلاص بس شوفها هي كيف بتحلها وأنا بفكر اذا لقيت شي دقيت عليك
أوس :ان شاء الله
ثنيان :لا تتضايق ياخي دامك انت تعرف أنه كذب خلاص مو لازم كل الناس يعرفون
أوس :طيب،مع السلامه
ثنيان :الله يسلمك
رتيل :وش صار ؟
ثنيان :طلعوا اشاعات زي دايم يعني
رتيل :مين ذي المره ؟
ثنيان:أوس
...
نزلت من السياره عند المزرعه وهي تتذمر قائله :زواج بيحلونها بالزواج لو يقولون واحد بيموت بمرض خطير لا معليك الحل زواج عقول فارغه ،نجد وينك؟
نجد :هاه ؟
هيام :وش كنا بنسمي المزرعه لو خليناها نادي فروسيه ؟
نجد :أرسان
هيام :خلاص بنطلق المشروع
نجد :كيف ؟ ما جهزنا شي
هيام :أحتاج أطلقه الحين
نجد :هيام !
هيام :مو وقتك ،دوري حساب أي شخص يسوي شعار للنادي
نجد:معرف أحد بس ...
هيام :ما أبي بس ساعديني نجد تكفين مطلعين عني اشاعات أني متزوجه أوس
نجد :أيش؟
هيام :بشرح لك بس خلينا نجيب عمال يصبغون الاسطبلات
نجد :هيام تدرين ذا ياخذ وقت وين بنودي الخيل عشان نصبغ ؟
هيام بغضب :جهنم
نجد :اهدي بحل كل شي بحله خلاص
اخذت نفسًا عميقًا :صدعت
نجد :اكيد بتصدعين من حركتك ذي
هيام :وش ؟
نجد :ترمشين كثير
هيام :ماله دخل
نجد :احسك تتعبين عيونك يجيها أيرور
هيام :مو بيدي اذا توترت اسويها
نجد :الحين تبين شعار للنادي ونصبغ الاسطبلات كيف ؟
هيام :الجدران أبيض والظلل أزرق ستايل يوناني
نجد :تبين اشجار ورديه ؟
هيام :اي واضاءات معلقه لونها أصفر كذا شوي هاديه أكيد فاهمه علي
نجد :خلاص ازهليها أنا معرف شي بالرياض بس أعرف شخص يساعدني
هيام :الي هو أبي أخلصه أقل شي بيومين ،أنا بروح أخلص الاجراءات النظاميه يارب ما تاخذ وقت
نجد :صارت الكترونيه
هيام :اي أدري بس معرف وش المفروض اسوي
نجد بسخريه:خلي زوجك يساعدك
هيام بغضب :نجد!
ضحكت نجد :أمزح
هيام وهي ذاهبه :على أساس أني فاضيه لمزحك
نجد :معليك بتتذكرينها بعديك وتضحكين ...الو
غيث :الو
نجد :أحتاج مساعدتك بشي تقدر ؟
غيث :ساعديني عادي
نجد :أنت تساعدني
غيث :أي عادي
نجد :خلاص كويس أبي عمال يصبغون الاسطبلات ستايل يوناني
غيث :زبادي يوناني ؟ كيف نصبغ الاسطبلات بزبادي
ضحكت نجد :غيث أنت متصدر قائمه الاشياء الي تضحكني ذي الفتره ركز معاي ،أبي بس عمال يصبغون
غيث :طيب وأيش بعد ؟
نجد :وأبي موقع أو حساب يسوي شعار لنادي فروسيه أسمه أرسان
غيث :مسلسل أرسلان حتى أنا أتابعه حلو
نجد :أرسان أرسان مو أرسلان
غيث :طيب ،وش رايك أنا أجي وأخذك لأني مو فاهم شي
نجد :خلاص كويس أنا بمزرعه الخيل ،لو تقدر جيب معاك مترجم لأن واضح تواصلنا صعب
غيث :طيب
...
أوس :جوانا
جوانا :هاه
أوس :أمي وينها ؟
جوانا :شفتها تصلي الضحى وشكلها بتروح تنام
أوس :كويس ،أنا بروح غرفتي لحد يزعجني تمام ؟
أم ثنيان :مو من عوايدك تقعد بغرفتك الصباح
بلع ريقه والتفت لها :تعبان
أم ثنيان :اي الكذب على الأهل يتعب
أوس :ما كذبت
أم ثنيان :معليش الغلط مني ما كذبت أنت كسرت كلمتي وكلمة جدتك وفوق ذا تزوجتها
جوانا :حرام عليك يمه أوس ما يسوي...
أم ثنيان :جوانا على غرفتك سريع الي بيني وبين أخوك بنتفاهم فيه أحنا
نظرت جوانا لأوس بحزن ثم دخلت غرفتها
أم ثنيان وهي ذاهبه :تعال مكتب أبوك
أوس :بعدي...
التفتت له :الحين
أوس :أن شاء الله
دخلت المكتب وجلست على الكرسي الذي كانت تهتم بنظافته وكأن صاحبة سيعود :بفهم شي واحد
أوس :تفضلي
أم ثنيان :ليه ذي البنت ؟ متى مداك تعرفها و...
أوس :ما تزوجتها
أم ثنيان :أجل ؟ وش ذيك الصور
أوس :يمه أنتِ مع أبوي من يوم بدا مشواره لين ربي أخذ روحه معقوله ما تعلمتي تصدقين أهلك وتكذبين الناس ؟
أم ثنيان :ماني مع أبوكم من زمان ،أخذه صديقه مني وبعده بنته ...
أوس :معليش يمه أول مره أتكلم كذا لكن أبوي كان عادل بين أهله وصاحبه بس أنتِ ما قدرتي حبه لصاحبه ولا ...
قاطعته أم ثنيان بعدم مبالاة :ولا ودي أكرر غلطي وأخلي ذا البنت تاخذ عيالي
أوس :موب ذنبها ترا ...
قالت بحده يبدو أنها مكبوتة منذ زمن:ولا هو ذنبي زوجي يموت حزن على ناس ما قدروه مو ذنبي إن ...إن ذيك البنت تذبح ولدي وهو ببطني
أوس بصدمه :يمه ،أنتِ تاخذين علاجك صح ؟
نظرت للجهه الأخرى وبلعت ريقه :أي أخذها
أوس :مو أتفقنا أنه مالها علاقه بموت عبدالعزيز؟
أم ثنيان :اسمه عبدالله مو عبدالعزيز ،وكيف اتفقنا ؟ هي طيحتني من الدرج كنت بالشهر السابع وتمسكت برجولي على الدرج وطحت
أوس :كانت مولوده وقتها
أم ثنيان :أنا متأكده كانت كبيره ...
قاطعها أوس :من متى ما تاخذينه ؟
أم ثنيان :ما أحتاجه أنا سليمه
أمسك يدها :أي يمه يا روح روحي سليمه بس عشان تكونين أفضل أعرف أنك تقدرين تتعايشين مع الوضع بس الأفضل والأريح لك تاخذين العلاجات ،لأنك أطيب انسانه بالعالم ولا تبين تأذين أحد أعرفك أنا
سحبت يدها :الأفضل لي أشوف ورقه طلاقك
قام أوس بحزن :هذا إذا كنت متزوج أصلًا
أم ثنيان :خلاص مو متزوج مصدقتك بس أبيها ترجع من المكان الي جت منه ،ما اتحمل خسارات زياده بسببها
تنهد أوس:إذا خذتي علاجك نرجع نتناقش
خرج من المكتب وواجه ملاذ بطريقه
ملاذ :تعال
أوس :هاه ؟
ملاذ :وش قالت أمي ؟
أوس :ملاذ تكفين ولله ماني ناقص
ملاذ :بس بتأكد
أوس :معد تاخذ علاجاتها
ملاذ :منجد؟
أوس :أي رجعت تفكر مثل قبل
ملاذ :كله غلطي أهملتها أخر فتره
أوس :عادي تصير
ملاذ :طيب ...وش سالفة الصور ؟
أوس :تذكرين هيام ؟
ملاذ :اي
أوس :هذي هي
ملاذ :وليه ماسكها بذي الطريقه
أوس:بالغلط ولله بالغلط كانت بتمشي بمويا مسكتها ببعدها عنه بس تبين أجيب لكم كميرات المحلات عشان تشوفين ؟
ملاذ :لا أوس ماني قاصده بس ...
أوس :كميرات المحلات!
ملاذ :أوس ...
قاطعها أوس مره اخرى وهو يبحث في هاتفه:كميرات المحلات صح كيف ما فكرت فيها كميرات المحلات !،الو
هيام :الو
أوس :معليش على كل الي صار ما قدرت أكلمك أول بس الحين عندي فكره
هيام : كلنا مظلومين هنا ،وش فكرتك لأن عندي شغل
أوس :محلك كان قريب من المكان الي صورونا فيه صح ؟
هيام :أظن
أوس :الكميرات صورتنا تقدرين تاخذينها ونخلص كل شي
هيام :كميرات محلي ؟ ما عندي محل
أوس :الي لك أسهم فيه ما تقدرين تاخذين التسجيل
هيام :الا صح ! ،بشوفه الحين وأنا رحت أفكر أكثر من كذا ،إدارة الازمات بالحفلات ومدري أيش
أوس :وش قصدك ؟
هيام :كنت بفتح المزرعه على اساس انها نادي فروسيه وبحفل الافتتاح أصرح أنه مافيه شي بس ذي الفكره ،أسهل
أوس :خلاص كلميهم وأنا بكلم واحد أعطيه الفيديو ينشره
هيام :بس أنا ما أحب السهل !
أوس : مو وقت التحديات
هيام :العمال جو مع السلامه
اغلقت بوجهه فأتصل عليها مره أخرى وردت :مشغوله بعدين نتكلم
أوس :طيب بس أسمعيني
اعادت نفس الفعل واغلقت بوجهه :مو وقتك ما تردين مو وقتك
صقر :مين ؟
أوس بسخريه :زوجتي
صقر :وش تبي فيها مو كفايه الفضيحه ؟
أوس :لقيت الحل عندها هي مطعم بميونخ يوم صورونا كنا قريبين منه تقدر تجيب تسجيل الكميرات ونعطي واحد ينشره كأننا ما ندري وخلاص
صقر:وليه ما تتكلم من أول ولا عاجبك الوضع تحسبنا بنزوجك
أوس :صقر ترا توني طالع من عند أمي أعطتني كلام أسم من سم العقرب وفوق ذا معد تاخذ علاجاتها ماني فايق للزواج والحوسه ذي
رفع صقر هاتفه :الحين اعرف لها ذي الهيام
أوس :خلاص بعدين
صقر :ترا مو عشانك مالي خلق الاشاعات والصحافه وحوستهم ،الو
هيام :اتمنى تفهمون إني مشغوله بإنقاذ سمعة عايلتكم لحد يزعجني بالاتصا...
قاطعتها صقر :ترا حجزنا موعد عند مأذون الانكحه ،تعالي الحين نسوي لكم تحاليل
هيام :أيش !
صقر :بتتزوجون تعالي
هيام :مستحيل أجي
صقر :كيف مستحيل ؟ ترا أهم عنصر بالعرس العروس
هيام :على أي أساس قررتوا ؟
صقر :ما تدرين أن قرار جدتي وضحه يمشي علينا كلنا مهما كان ؟
هيام :ما يمشي علي كلام هذيك العجوز
صقر :حدك عاد ذي جدة زوجك المستقبلي
هيام بحده :ما بتزوج مستحيل اتزوج
صقر :خلاص طيب تعالي وتفاهمي مع جدتي أقنعيها إن قدرتي
هيام :وينكم ؟ الحين بجي بس لعد تقررون قرار زياده
صقر :ببيتنا تعرفين طريقه صح ؟
هيام :طيب
صقر :استعجلي
اغلقت المكالمه فضحك صقر :بتجيك طيران
أوس :عصبتها ترا
جلس صقر على الكنبه بأنتصار :استمتع بعصبيتها
أوس :استغفر الله
أتصلت مره أخرى فأبتسم صقر :أرد ولا أخليها ؟
أوس :مو وقت روقانك الغريب رد عليها
صقر :طيب ،الو
هيام :بغيت أطلب أوبر بياخذ عشرين دقيقه على بال ما يوصل
صقر :ولله الله يعينك أمشي خمس ميه متر وتطلعين للشارع العام هناك أشري وبيجيك تاكسي
هيام :خمس ميه متر يعني نص كيلو
صقر :أي عادي مسافه قصيره
هيام :لا تسوون أي شي لين أجي وحتى لا تفكرون بغباء
صقر :أي معليك معليك بس قاعد أتقهوى مع زوجك ومأذون الانكحه
تنهدت هيام :يارب أنا بس أسألك الصبر
صقر :طبعًا الحياه الزوجيه يبي لها صبر
أغلقت بوجهه فضحك بنشوة :اتوقع أني أكتشفت هوايتي
نظر له أوس بأستفهام
صقر :الشماته
في موقع أخر كانت هيام تتذمر :خمس ميه متر حسبي الله عليك وعلى الرياض حسبي الله عليكم
سمعت صوت كلب خلفها فالتفتت :نعم أنت ؟
نبح الكلب بحده فصرخت فيه هيام :لا تنبح بوجهي
توقف الكلب عن النباح وكأنه يفهمها :قلة أدب صراحه حتى الكلاب متربيه أحسن منه
بعد وقت وصلت للشارع العام أخيرًا ووقفت على الرصيف تبحث عن مبتغاها ،وقف بجانبها رجل عجوز تظهر عليه ملامح الجنون وكان يتغنى بقولٍ غريب فكان يقول :حسبته مقدر وأثره مدبر ،حسبته مقدر وأثره مدبر
نظرت له هيام بإستغراب ثم ركبت سيارة الاجره التي توقفت :حي ***
السائق :ان شاء الله
...
نجد:نحتاج ذيك الشجره الي باليونان الي لونها وردي
البائع :أحنا بالسعوديه من وين أجيبها لك ؟
نجد :شفتها امس بالمطعم
البائع :اجل أسأليهم
غيث :قصدها الجهنميه
البائع :اها اي عندنا
كم شتله تبون ؟
نجد :عشر
البائع :ان شاء الله
نظرت نجد حولها :الله طلع فيه ياسمين ،ياسمين صح؟
غيث :أي
نجد :ما كنت أحسبه يزرع بالسعوديه
غيث :أجل وين يزرع ؟
نجد :أحسبه بس بهاواي لما بافلام الكرتون يروحون عطله لهاواي ويلقون بنت حاطته بشعرها
البائع :هذي هي عشر شتلات
نجد :صغيره مره !
البائع :هاه تبينها أطول منك ؟
غيث:بكره بنفتح المحل ما يمدي تزرع بيوم ؟
البائع :ولله ذي حتى بالمزرعه السعيده ما صارت
ضحكت نجد ثم كتمت ضحكتها :خلاص يصير خير جيبها بس
مد لها أول شتله فأمسكتها هي وغيث في نفس الوقت ثم تركوها فسقطت :معليش
البائع :ضيعتوا شتله عالفاضي ! ما تعرفون تمسكون
غيث بتوتر :لا هي جهنميه يعني ...يعني حاره جهنم حاره أكيد بطيحها
ابتسمت نجد ثم قالت :خلاص ولا يهمك بندفع سعرها
البائع :ضيعتوا شتله عالفاضي مستوعبين؟
نجد :اي طاحت وأنكسرت وش حارك يا خوي بالاخير بنزرعها أحنا
البائع :ذي معد تنزرع تعرضت لصدمه نفسيه ما تقدر تثمر
نجد :انت دكتور نفسي من ورانا صح ؟
البائع :ترا النبات مثل الانسان لو تعرض لصدمات بطفولته يكون عنده نقص اذا كبر
نجد :ياخوي أنا بالعه كل صدمات الحياه ومابي إلا العافيه ذي الزرعه ما تحس بس الي تسويه تنتج اكسجين
البائع :كيف تتجرأين تهينين النبات ببيتهم !
وضع يديه على الشتلات كأنه يغطي أذانهم :خلاص لا تسمعون لا تسمعون
نظر لهم :محلي يتعذركم
نجد وهي خارجه :واحنا ما نشتري من عند مهووس
خرج غيث خلفها :صدق جرحتي زرعه
نجد بغضب :تراه مهووس بزياده يعني مدري وش كان يبينا نسوي
نظرت لوجه غيث فضحكت :جرحت زرعه ؟
غيث :هو يضحك بس ليه نضحك يعني هو قال كذا مو أنا ،أنا ما اضحك أنا اتكلم كويس واسمع كويس
نجد وهي تضحك :لا لا بس الموقف غريب يعني شخصيته غريبه مدري ليه عصبت
غيث :صدق ودي بمعصوب
نظرت له نجد وزاد ضحكها :وانت بعد
غيث :تبين بعسل ولا بدون ؟
نجد :الله يخسك غيث تراني متوتره واضحك ابي مويا
غيث :ولله ما عندنا بير جدي كان يدور يومه صغير بس ما لقى حفر ستين حفره واخر شي طاح فيهم
نجد بسخريه:اكيد بيطيح من حفر حفرةً لأخيه وقع فيها
غيث :لا هو حفر يبي ...
نجد :خلاص غيث جيب لي مويا قاروره علبه مو من بيركم
غيث :ان شاء الله
...
وصلت عند البيت أخيرًا ذلك البيت الذي أحتضنها بكثير من الحب وأكثر منه كرهًا وحقدًا مدسوسًا بين أسواره وفي قلوب أصحابة ،دخلت الفناء ثم أقتربت من الباب ففُتح لها :السلام عليكم
الشغاله :وعليكم السلام بابا صقر يبغاك في مكتب
هيام :مكتب العم بندر ؟
الشغاله :لا مكتب حق هوه تعال معاي انا وديك
هيام :طيب
سارت بها حتى احد الابواب وتوقفت :انتظرني هنا دقايق
هيام :ان شاء الله
انتظرتها حتى ذهبت ثم أخذت نفسًا عميقًا وضربت الباب بقوه :نعم تبون تزوجوني بدون رضاي ! مين سمح لكم بذا الشي ؟
وسن :يارب عفوك يارب صبر أيوب ،نعم تدخلين غرفتي كذا وانا بعز الهامي ؟
هيام :اوه ،معليش
وسن :صار لي اسبوعين ابني الاحداث توني قررت اكتب وجيتي خربتي
هيام :احسبها غرفة صقر
اغلقت الحاسوب وتنهدت :خلاص معليش بس بسألك شي
هيام :وش جابني هنا ؟
وسن :لا أحس أني أعرفك
بلعت ريقها :أي تعرفيني أنا هيام
وسن بصدمه :اما ! إنتِ الي بالصوره هيام ؟ واو أوس أحسنت الأختيار
هيام :مافيه شي ترا الصوره كلها كذب
الشغاله:انت هنا ،معليش وسن هذا ضيف بابا صقر ،رحت اجيب مويا بس هوه دخل
وسن :لا عادي عادي ،اذا خلصت ضيافه صقر ابي اضيفك
ابتسمت هيام :خلصتي القصه ؟
وسن :أي من زمان كنت أنتظرك تجين وأوريك
هيام :رح أجي
خرجت مع الخادمه وذهبت بها إلى مكتب صقر :هذا مكتب هوه دق باب بعدين يدخل ولا صقر يعصب حيل
هيام :لا معليك
قالت وهي ذاهبه :Good luck
ابتسمت هيام بوجهها حتى ذهبت ثم أعادت نفس الحركه التي فعلتها بغرفه وسن :نعم تبون تزوجوني بدون رضاي ! مين سمح لكم بذا الشي ؟
ابتسم صقر وأنزل ساقيه من على الكنبه :وجت عروستنا أتمنى أنك اخترتي الفستان
هيام :ما أخترت فستان بس أخترت لك الكفن الي بكفنك فيه
صقر بعدم مبالاة :اذا شايله هم المهر عادي ترا بعطيك شيك مفتوح
هيام :ماني عبدة فلوس أنا وأبيع روحي عشانها
صقر :خليني انادي عريسك وتفاهموا
هيام :طيب بس بقول لك ميزه فيني
صقر :حلو حلو طلع لك ميزات وانا احسبك بس سلبيه
هيام :لو أبي أقتل أنسان أقدر أقتله بأبسط أداة مثلًا ورقه
صقر :حلو حلو خلاص يعني ما يحتاج حرس شخصي
هيام :أحتاج حارس عقلي
دخل أوس :السلام عليكم
هيام :جابك الله أقنع أخوك المجنون الي قرر يشتغل خطاب على غير سنع يغير رأيه
وقف صقر وعاد لملامحة الحاده :شفتي يوم تتحركين من بالك كذا بيصير لك
سار حتى كرسي مكتبه وجلس عليه :يوم أوس يجيب لك الحل الاسهل تروحين تسوين فكرتك الي أصلًا ما وافقت عليها ماهو عندي
هيام وهي خارجه:ومقالبك الخايسه مو عندي
صقر :تعالي ما تكلمنا باقي
التفتت له :بتندم يا صقر مو على اليوم الي شفتني فيه بتندم على أنك ولدت بتقول يا سواد الليله الي ولدت فيها ويا شينها
صقر :ندمت صراحه تمنيت اني اختنقت ومت ولا اعيش الحياه الخايسه ذي دامك فيها
أوس :سب الدهر حرا...
هيام وصقر بنفس الوقت :اعرف
دخلت الشغاله وبيدها فنجان قهوه :وقت قهوه صح ؟
صقر :جيبيها خليني احاول اروق
أخذتها هيام من يدها وتذوقتها :اسبريسو
صقر :لا حول ولا قوة الا بالله
اقتربت منه هيام وسكبتها على مكتبه وأوراقه :فكر كيف بتندم من الحين
صقر :يا بنت اللذين !
أوس :الحين وش استفدت يوم ناديتها وبس تهاوشتوا ؟
صقر :أرد لها نذالتها ما تصدق تلقى فرصه عشان تطبق أفكار...تصدق؟
أوس :وش ؟
صقر :هي الي نشرت الصور
أوس :بالعقل صقر ما بتنشر صوره تشوه سمعة نفسها فيها
صقر :بس عندها خطه تحسن سمعتها فيها على حساب مين ؟ حساب آل محسن
أوس :جنون العظمه الزايد ودي اعرف من وين وارثينه ؟ تحسبون نفسكم آل سعود ترا زينا زي باقي الناس بس الفرق عندنا فلوس زياده خل اروح اتصدق فيها كلها وخلاص ترتاحون
صقر :هاه أوس ماهو ذنبنا اذا الناس نيتهم كذا
أوس :وش دراك أن نيتها كذا ؟
صقر :إحساس
أوس :أنا أوثق بالاحاسيس بكل شي الا بنيات الناس مافيه شي يقول لك نيتها كذا ليش ؟ حسيت مافيه مافيه نيه على الاحساس أن لو تشوف الذنب بعينك أعذر سبعين عذر مو بس عذر واحد أجل كيف لو إحساس ؟
صقر :طيب شفيك شادها ؟ أنا قلت توقعي بس
أوس :لأنك لما تقول توقعاتك ما تجرب تحط نفسك مكان الناس جرب حط نفسك مكان هيام ولدت بنفس اليوم الي أمها توفت فيه أبوها مات بحادث وهي بنت عشر سنوات وعمتها قررت انها ما تبيها ومحد اخذها الا ابوي
دخلت الجده وضحه على كلامه :أسمعني أنت وياه ذا الموضوع يتقفل قبل ما يفتح علينا مصايب ! لو عرفت إن البنت شكت بس شكت بخصوص ذا الموضوع أقسم بالله ما تشوفون خير أنتم الأثنين هيام ما بتعرف عن الماضي ولا شي غير الي عرفته
صقر :ان شاء الله
أوس :لقينا الي تخوفك
صقر :ما أخاف احترمها لازم تحترم الي أكبر منك وبما فيهم انا
أوس :أحترم أمي أول بعدين بحترمك
صقر :محترمها من قبل ما تولد
أوس :ترا محد يغمز رجولها الا أنا
صقر :الاحترام يختلف من شخص لشخص
أوس :وش تسوي مثلًا ؟
صقر :أجيب أدويتها قبل تخلص
خلع أوس نظارته ونظفها :تراها معد تاخذ الأدويه
صقر :من متى ؟
أوس :اليوم كلمتني ورجعت لنفس الفكره تقول هي دفتني قلت لها تاخذين علاجك قالت ما أحتاجه
أمسك صقر رأسه :ذا الي ناقص بعد
في جهه أخرى
دقت الباب وفتحته :فاضيه ؟
ابتسمت وسن :أنتظرك
جلست هيام بجانبها :ترا اخر فتره صايره اقرا كتب اجنبيه عشان كذا مقدر اقيم الادب العربي
مدت لها الدفتر:لا تقيمينها بس اقريها
اخذت الدفتر وقرأت ثم تخطت الصفحه سريعًا
وسن :مسرع قريتي
هيام :قد شفتها ذي
وسن :كنت مخبيتها كيف شفتيها؟
ابتسمت هيام بأسلوبي الخاص
وسن :طيب خلاص كملي ما بقول شي
اخذت وقتًا في القراءة ثم أغلقت الدفتر وتنهدت بينما الدموع بعيناها تظهر
وسن :شفيك ؟
حضنتها هيام :أشتقت لذيك الايام ما كانت عندنا هموم ولا مشاكل
ملاذ :يوم كنت اسوي لكم كيك أخر الليل ؟
التفتت كلٌ من هيام ووسن بتعجب من دخولها
وسن :ما حسيت فيك
ملاذ :هيام بدري الرجعه
هيام :ما رجعت واخذتني الحياة رايح جاي
قرصتها ملاذ :قلت لك الي يبعد عن أهله بتلعب فيه الحياة
نظرت لهم هيام بحزن :باقي تعتبروني من أهلكم؟
ملاذ :شوفي الغبيه ذي كيف تفكر أجل وش نعتبرك زوجه اخونا الوهميه ؟
وسن بسخريه :على حسب الاخبار تعتبر زوجه اخونا
مسحت هيام عينيها ثم ابعدت شعرها عن رقبتها
وسن :هاه بتبكي
هيام :لا ما ببكي
ملاذ :ترا نعرف حركاتك اذا جيتي بتصيحين تبعدين شعرك عن رقبتك
هيام :اي بصيح لأنكم ما نسيتوني
ملاذ :كملي ضيافه ثلاثه ايام واصفقك اقولك احنا اهل اهل family ان كنتِ ما تفهمين عربي كيف بننساك ؟
وسن :هيام ترا أعرف انه امي وجدتي تصرفاتهم كانت توهمك أننا نمثل عليك الحب بس ترانا صادقين أكثر ناس مشاعرهم لك صادقه انا وملاذ
هيام :اعرف بس ...
ملاذ:وربي انها باقي غبيه انا فرحت يوم قالت بدرس بالخارج قلت الحمدلله الحين تفكيرها يتطور بس انها باقي على غبائها
هيام :ياخي اعرف بس كل الناس استقبلوني بمشاعر سلبيه وضغط الا انتوا
ملاذ :منهو الي استقبلك بمشاعر سلبيه انهي كل مشاعره من ذي الحياه
هيام :ترا الغلط علي انا قطعت الناس الي اعتبروني جزء منهم
وسن :مو غلطك ياخي اكيد فيها خيره
هيام :كيف خيره فهموني كيف خيره
ملاذ :يمكن حققتي احلامك صح ؟ درستي ادارة اعمال ؟
هيام :اي
وسن:وش انجزتي خلال ثمان سنوات
هيام :مساهمه بمطعم الماني بنسبة ٢٣٪؜ وقريبًا ببدا مشروع بمزرعه الخيل
ملاذ :حقتنا ؟
هيام :اي
وسن :شفتي انجزتي كثير فكري لو كنتِ ما قطعتينا بتسوين كل ذا؟
تنهدت هيام :واكثر
ملاذ :من الآخر ترا ابوي ما كان رح يخليك تسوين شي كان رح يعطيك وحده من الشركات وخلاص لا استفدتي من الي درستيه ولا شي
وسن :صدق
هيام :بس ...
ملاذ :كلي تبن تراك قويه شخصيه ليه تجين تتضعفين عندنا انا ووسن ما تدرين اني ما احب الضعف ؟
وسن :شدعوه ملاذ اكيد ارتاحت لنا وفضفضت ثمان سنوات ما تفضفضين صح ؟
هيام :لا معليكم عندي صديقه
ملاذ :اجنبيه ؟
هيام :سعوديه ومن الرياض بعد اسمها نجد
وسن :الله شلون جمعكم القدر
قامت هيام :بعدين بعرفكم عليها الحين بقوم
دفعتها ملاذ على الكرسي :وين ؟
هيام :عندي شغل
ملاذ بسخريه:ولا بتسألين عن حالنا يا محور الكون ؟
تنهدت هيام :وش مسوين ؟
ملاذ :ان...
قاطعتها وسن :هذي سحبت من الجامعه
نظرت لها هيام بصدمه :ليش ؟
ملاذ :ما كان فيها شغفي سحبت منها وبديت اجهز مشروعي الخاص محل كيك
نظرت لهاتفها الذي يرن :يلا انا طالعه ولله وراي شغل كثير بعدين نتقابل تمام ؟
ملاذ :يا ويلك تنسين اسحبك من شوشتك
ابتسمت هيام :معليك ما بنسى
وسن :وين رايحه وانتِ كذا ترا اخواني بالبيت ؟
هيام :كيف كذا ؟
وسن :شعرك
هيام :انا كذا
ملاذ برجاء:هيام ،ترا شفت صورتك بس ما صدقت انه انتِ عشان شعرك باين ليش ؟
ابتسمت بحزن :بس ادعي لي بالهدايه
خرجت الغرفه فقابلت صقر بوجهها :وش بتسوين الحين ؟
تنهدت بملل :خلاص لا تصيح بكلم الي بالمطعم يرسلون التسجيل
صقر :بس ...
قاطعته هيام :بس بسوي الفكره الي ببالي لكن بشتغل بدقه اكثر
صقر :ما رح تسوينه لين تاخذين موافقتي
هيام وهي خارجه :ما احتاج موافقتك وهو حلالي
صقر بغضب :انا ودي مره وحده توقفين وتكملين الكلام زي الاوادم مو تقاطعيني وتروحين
عادت إليه :اذا صرت آدمي وقتها اكلمك بذي الطريقه
صقر :ما اسمح لك تهينيني ببيتي
حركت شعرها أمامه بعدم مبالاه وخرجت
اخذ نفسًا عميقًا وأطلقه بغضب ثم التفتت وإذ بوسن وملاذ يراقبون ما حدث:نعم ؟
وسن :من الحين أقولك ...
صقر :ما تقولين شي
ابتسمت وسن ودخلت غرفتها
صقر :وانتِ بعد وش تسوين ؟
ملاذ :ولا شي،صقر
صقر :هاه؟
ملاذ :أمي معد تاخذ العلاج
تنهد :أدري أوس قال لي ،متى وقته هو ؟
ملاذ :بعد المغرب
صقر :يعني الحين ،بروح اشوفها
ذهب لغرفة والدته ودخل :السلام عليكم
ام ثنيان :وعليكم السلام ،زين جيت بغيت اكلمك
صقر :أنا بكلمك بشي
ام ثنيان :شفت كيف نكبت أخوك مع ذي البنت ؟
صقر :خلاص حليناها ،بس فيه مشكله ثانيه
ام ثنيان :انا قايله لكم قايله لأبوك من زمان ذي البنت ما وراها إلا المشاكل
صقر بحده:مو هي ،انتِ المشكله
ام ثنيان بصدمه :أمك مشكله ...
صقر :لا مو قصدي كذا يمه ...علاجاتك المشكله
ام ثنيان :اعرف عشان كذا معد اخذها
صقر :لا لازم تاخذينها
ام ثنيان :مو لازم انا سليمه
صقر برجاء :يمه
ام ثنيان :خلاص اطلع بنام
صقر:ماهو من عوايدك تنامين المغرب
ام ثنيان :صار من عوايدي
صقر :طيب بس خلصي العلبه ذي واوعدك معد تاخذينها
ام ثنيان :ولا حبه باخذ
دخل ثنيان ببهجته المعتاده :السلام عليكم أميمتي
ابتسمت ام ثنيان :وعليكم السلام والرحمه الحمدلله عالسلامه
قبل رأسها وجلس عند قدميها :الله يسلمك يالغاليه شلونك بعدي ؟
ام ثنيان :ولله ماني بخير
ثنيان :افا يالعلم ليه ؟
صقر:ما تاخذ علاجاتها
ام ثنيان :وش رايك بعد تعلن بالاخبار ؟ هاله ما تاخذ علاجاتها
ابتسم ثنيان وامسك يد أمه :يا أميمتي ما يصلح
ام ثنيان :أنا أحس روحي بخير بدونها
ثنيان :توك تقولين ماني بخير
ام ثنيان :ذا شي وذاك شي
ثنيان :طيب وش رايتس أنا اعطيتس ،شوفيني مسكت اللهجه عشان تقتنعين
ام ثنيان :ولله لو تتحكى اسباني ما اخذتها
صقر :انا طالع عندي شغل
ام ثنيان لثنيان:قله أستودعتك الله
ابتسم صقر من حنانها رغم زعلها عليهم وخرج
ثنيان :خليني ادق على رتيل تجي تسلم عليك
ام ثنيان :خلها يمكن تعبانه
ثنيان :هي قالت لي اذا طلع اخوك دق علي تبي تشوفك ،ايوه رتيلي تعالي
امسك سوارها واصبح يلعب به ويتحدث :زوجتي تغليك مثل أمها
ام ثنيان :وانا اشوفها مثل بناتي
ثنيان :أجل ما ودك تزعلينها صح ؟
ام ثنيان :ومن وده يزعل بناته؟
ثنيان :اجل خذي علاجاتك
ام ثنيان :لا
ثنيان :مو عشان خاطري عشان رتيل ولله عشان خاطر رتيل ترا الدكاتره قالوا تتأثر باللي حولها لو عرفت أنك ما تاخذين علاجك بتزعل عليك وتتأثر
ام ثنيان :إنا لله ثنيا...
قام ثنيان يبحث عن الادويه :يلا قبل تجي سريع
جلس بجانبها ومد لها الحبه :بسم الله خذيها
ام ثنيان :ياولدي ولله ...
ثنيان :بدون اعتراض يمه ولا ترا اصك خشمك وادخلها بحلقك مثل ما تسوين فيني وانا صغير تراني ادور للأنتقام
ضحكت ام ثنيان دون أرادتها وأخذتها
تنهد ثنيان وهو مبتسم :ياجعلني أفدا ذا الضحكه
شربت الماء ثم أخذ الكوب من يدها :اشوف افتحي فمك
ام ثنيان :وش تبي بفمي
ثنيان :بتأكد بلعتيها ولا لا
ام ثنيان بضحك :بلعتها بلعتها يا مال العافيه
دقت رتيل الباب ثم دخلت :السلام عليكم يمه
ام ثنيان :وعليكم السلام ورحمة الله وبركاته حيها نور هالبيت
ثنيان :انا ما رحبتي فيني كذا
ام ثنيان :رتيل غير
ابتسمت رتيل وقبلت رأسها :شلونك ؟
ام ثنيان :بخير وصحه وعافيه شلونك انتِ ؟
رتيل :الحمدلله
...
نهى :اقولك خلود قالت لي
جوانا :كتبت أسمي أنا بباب الحمام ؟
نهى :أي اسمك واسم ابوك مكتوب جوانا بندر طالعه لأبوها كلبة فلوس
ابتهاج :الله ياخذهم وش قلة الادب ذي
جوانا :حسبي الله عليها ذي ولله ماني مخليتها
نهى :بكره نروح نعلم المديره
جوانا :لا ولله ما بعلم احد بشوف الخط اذا عرفته رحت شديتها من شوشتها كلبة الحمامات ذي
إبتهاج :جوانا بلا غباء لو تسوين مشكله رح تطلعين انتِ اساس المصيبه بس اذا كلمتي المديره بتحلها
جوانا بغصه:ترا يقهر تسب أبوي وهو ...حسبي الله عليها
إبتهاج :وي بتبكين صبر الحين بجيك
نزلت إبتهاج ودخلت على جوانا:بنت
امالت فمها لكي تكتم حزنها :ما ببكي
إبتهاج :لا بتبكين هذا إنتِ تميلين فمك لا بغيتي تبكين تسوين كذا
جوانا :قفلي الباب
اغلقت الباب والتفتت لها فكانت تغطي وجهها بكفيها
جلست إبتهاج بجانبها وأخذت تمسح على شعرها :خلاص خلاص
جوانا :كان أطيب إنسان بالكون كيف قدرت تقول كذا عنه
إبتهاج :ما تعرف شي بالأدب والاخلاق
مسحت جوانا دموعها :تدرين لو كان حي وقلت له السالفه كان رح يقول لي سامحيها
إبتهاج :طيب سوي الشي الي كان بيفرحه
جوانا :وقهري أنا وين يروح ؟ قسمًا بالله ما أسامحها هالوصخه لين أشوفها بأردى حال
إبتهاج :جوانا الحقد...
قاطعتها جوانا :اي حاقده هذا وانا ما اعرفها اجل كيف لو عرفتها
نهى على الهاتف :الو
جوانا :بعدين بكلمك
اغلقت بوجهها وقامت
ابتهاج :وين ؟
جوانا :بروح اكلم عمي عبدالملك
ابتهاج :عمي عبدالملك ؟
جوانا :كذا أفضفض له وأرتاح
ابتهاج :طيب
خرجت جوانا وذهبت لغرفه عمها ودخلت دون مقدمات
ابو راجح :عسى ما شر جوجو زعلانه
جوانا :اكبر شر بالحياه
ابو راجح :اجلسي
جلست جوانا :فيه وحده حيوانه بنت ستين كلب راحت الحمامات بالمدرسه وكتبت على باب الحمام ...
تنحنحت :كتبت جوانا كلبة فلوس زي أبوها
ابو راجح :وش يعني ؟
جوانا :يعني ابوي كلب فلوس ذا الي تقصده
ابو راجح :بس هي تكلمت عنك
جوانا :شوف يا عم هي لو قالت جوانا كلبة فلوس كنت بضحك واطنش بس سبت أبوي سبت أبوي! بموت قهر من الموضوع
مد لها كأس الشاي :ووش ناويه عليه ؟
جوانا :اكسر براسها
ابو راجح :تدرين ؟
التفتت له :وش ؟
ابو راجح :حتى أنا ودي ذا الشي بس...
قاطعته جوانا :الحمدلله اخيرًا أحد يوافقني الرأي
ابو راجح :قلت بس
تنهدت :هاه ؟
ابو راجح :من أطاع نفسه زاحت به عن الحق
جوانا :بس ذا حقي
ابو راجح :لا تقررين بلحظه غضب اربعه وعشرين ساعه فكري
جوانا :وقتي ثمين ما بضيعه افكر فيها بحلها وهي طازه وارتاح
ابو راجح :وانا ما قلت خليها تبرد بس اربعه وعشرين ساعه
جوانا :طيب ١٢ ساعه ؟
ابو راجح :اربعه وعشرين ساعه ،تبين تغيبين بكره ؟
جوانا :ومين يرفض الغياب
ابو راجح :خلاص انا بكلم اخوانك
جوانا :لا تعلمهم عن السالفه ما ابي احد يزعل ،ملاذ لو عرفت هي بتجي للمدرسه
ابتسم ابو راجح :ولا يهمك بس عطيني رأيك بالشاهي
جوانا :بطل
ضحك ابو راجح :ماهو علي ما ذقتيه باقي
جوانا :مب جوي الشاهي
ابو راجح :بس ذوقيه رشفه وحده
جوانا :لعيونك بس
ابو راجح بسخريه :وبعد اسبوعين تعالي قولي ادمنت الشاهي لعيونك
جوانا بنفس السخريه :ليه حاط فيه شبو ؟
تنهد ابو راجح :الشبو الشبو صح لا انتِ ولا إبتهاج ولا بنت اشواق شسمها
جوانا :نهى
ابو راجح :نهى ،لا تاخذون اي شي مع أي أحد حلاو هديه عصير ولا شي أبدًا
جوانا :خلاص اكتملت النصيحه كل الناس نصحوها حتى أنا استغربت انك تأخرت قلت مب معقوله عمي عبدالملك يترك الجماعه
ابتسم ابو راجح :انا مسلط الجماعه عليكم
جوانا :جندي خفي
ابو راجح :بالضبط
...
دخلت البيت وربطت شعرها :يوم متعب وكله مشاكل
نجد :جدًا ،كسرت شتله بمحل الشتلات وراعي المحل عصب وتهاوشنا وما دفعت سعرها
هيام :هذا هو هذا هو أكتمل يومي
نجد :هو مهووس يا بنتي مدري كيف يفكر
هيام :طيب لو انه مجنون عادي ادفعوا ترا حقه
نجد :بكره بروح له
هيام :صح النوم بابا بكره يصحيك تم القبض
نجد :شدعوه ترا موضوع بسيط كلها خمسين ريال بكره ادفعها وادفع له ميه زياده عليها
هيام :حقوق الناس ماهي بسيطه
نجد :الزبده الحين ابوي يعزمنا على العشا انا وانتِ قومي خلينا نروح
هيام :طلبت بيتزا
نجد :كنسلي
هيام :طيب
نجد :واطلبي بداله اوبر
هيام :طفشت من اوبر وتاكسي اوبر وتاكسي خلاص ابي اسوق ابي اخلص مشاويري بنفسي
نجد :اليوم اسألي ابوي عن الرخصه الالمانيه فيه السعوديه
هيام :ترا استحي انتِ قولي له
نجد بسخريه :مقطعك الحيا
هيام :استحي من ابوك لأن فضايحك عندي بنته الي ضيعت تربيته بشوارع المانيا
نجد :شدعوه بس عشان طردت هذاك المريض المجنون ؟كان يبي يخرب آلة القهوه وطلع اخر شي صدق سكران وعيونه ما بها الا العافيه ضيع وقتي بالعياده عالفاضي
ضحكت هيام :يابنتي امزح امزح ،معليك اليوم شهادتي فيك مجروحه عند أبوك
نجد :يعني تسبيني؟
هيام :لا
نجد :وش مجروحه اجل ؟ مجروحه يعني جرح يعني كلام سلبي
هيام :لا كلام ايجابي بس مدري وش معناها ذي الكلمه بس سمعت الناس يقولونها
نجد :لعد تقولينها احسها إهانه
هيام :ابشري
نجد :وش فيك مروقه ما كنه صار شي
هيام :حليناها دقيت على الي بالمطعم يرسلون لي تسجيل الكميرات ذاك اليوم وننشرها وخلاص
نجد :ما اشوفه شي يروق هيام العظيمه
هيام :روقني اني شفت صديقات طفولتي
نجد :اي هم روقان وانا بلا ومشاكل
هيام :لا ولله بس اكتشفت اني ظنيت فيهم سوء وهم باقي يحبوني
نجد :اجل مين ما يحبك ياخي ؟
هيام :جدتهم المخرفه
نجد :لحظه مين هم صديقات طفولتك ؟
هيام :خوات صقر الحيوان الناطق طلع فقد حس الانسانيه والاحترام لأن خواته هم خلصوها عليه
نجد :اي طبيعي البنات حنونين
هيام :حنونين بس ترا الرجال بشر يعني عندهم اسلوب حوار عندهم ذوق واحترام بشكل بسيط بس ذا اوفر قلة ادبه مبالغ فيها !
نجد :اوبر وصل يلا نطلع
هيام :ما مداني اشرب مويا توني جيت
نجد :يلا بعدين بعدين
هيام :بموت ظما
نجد :بروفه على رمضان تراه قرب
هيام :منجد كم باقي؟
نجد :شهر وشوي
هيام :ولله قرب
نجد :اجل خلينا نطلع
في بيت ابو نجد
نجد :سلام
ضمها والدها :يا مرحبا يا مرحبا بكل عمري يا هلا ببسيس
نجد:شلونك ؟
ابو نجد :على ما تركتيني عليه امس
نجد :نسيت اعرفك هذي جنديتك المخفيه هيام
ابتسمت هيام :شلونك يا عم
ابو نجد :بخير الحمدلله وبشوفتك صرت ازين
نجد :يبه ترا ما قد سمعتك تغازل احد الا انا لا تخليني اغار
ضحك ابو نجد :مافيه مثل نجد لو الف هالعالم
نجد بسخريه :تقصدني انا ولا تقصد نجد الارض؟
ابو نجد :يا ليل ذا التدقيق،تفضلوا بس على العشا
نجد :وش مسوي ؟
ابو نجد :مقلوبه
نجد :وش دراك اني مشتهيه مقلوبه ؟
ابو نجد :حدس الاب
جلست نجد وهيام على المائده بينما ذهب ابو نجد ليحضر الطعام
نجد :شفيك ؟
هيام :وش فيني ؟
نجد :مستحيه
هيام :طبيعي استحي وش تنتظرين مني ؟
نجد :سوالف
هيام :اصبري قاعده ارتب كلامي
وضع الصحن بينهم :مو لازم ترتبين كلامك
جلس بجانب نجد :قاعده رقم واحد بذا البيت الي بقلبك على لسانك
نظرت هيام لنجد وابتسمت :واضح نتايج ذي القاعده
ضحكت نجد :استري على ما واجهتي
...
جوانا :بسرعه ابتهاج
ابتهاج :طيب بلبس حلقي واجي
جوانا :ابي اداوم بسرعه
ابتهاج :لا حول ولا قوة الا بالله ترا ادري وش ناويه عليه
جوانا :خلاص لا تتأخرين
ابتهاج :جوانا فكري بمنطقيه!
جوانا :فكرت امس حتى ما نمت
نظرت لها ابتهاج :صدق؟
جوانا :اي يلا امشي
ابتهاج :طيب جيت
جوانا :أقسم بالله ذي البنت الي مسويه نفسها مجهوله ولله لا أطلعها وافضحها قدام المدرسه كلها
ابتهاج :وش بتسوين
فصلت هاتفها من الشاحن :بفضحها فضيحه اكبر
ابتهاج :جوانا !
جوانا :بطلعها من بين سبع ميه طالبه واجيبها للحمام واخليها تنظف الي كتبته واصورها
ابتهاج :وبعدين اذا صورتيها وش بتسوين ؟ بتنشرينه بالسوشال ميديا وتكشفين البنت وتسببين لها مشاكل مع اهلها
جوانا :لا بحطه بالطابور
ابتهاج :يعني كذا ما بيسوون لك شي ويقولون اوه جوانا معاها حق
جوانا:الحمدلله على نعمه فلاتر الصوت
اخذت الهاتف من يدها:جوانا ولله ما تفكرين حتى
اخذته منها جوانا :لا بفكر وبسوي حتى خليها تقل ادبها على ابوي
امسكت ابتهاج يدها التي بها الهاتف :ترا حياتنا مب فلم عشان كل شي يمر سهالات
جوانا :ادري عشان كذا ما بمشي وصاختها
اخذت الهاتف من يد جوانا مرة اخرى ووقفت فوق الكنبه :قربي مني ولله لأرميه بالارض اخليه يتهشم تهشيم
جوانا :عادي اقدر اجيب مليون جوال غيره بس قلبي مقدر اغيره
ضحكت ابتهاج بغرابه :يا اختي وش ذا الحوار الغريب
اقتربت جوانا:ماهو اغرب من الي تسوينه
رفعت ابتهاج الهاتف :ولله لأكسره ولا اتردد
جوانا :ابتهاج !
نظرت ابتهاج خلفها وإذ الشغاله تمر :ليا ليا تعالي بسرعه
اقتربت منها :نعم
اعطتها الهاتف :اعطي صقر وقولي له يخبيه
جوانا :ابتهاج ولله ما اسامحك ،ليا تعالي
ابتهاج :ليا روحي
التفتت ليا بذعر :انا روح ولا يجي ما يعرف وش سوي؟
ابتهاج :روحي روحي معليك منها
جوانا :ابتهاج قلت لك ولله ما اسامحك مستعده اقابلك على السراط يوم الدين
ابتهاج :بتقابليني وتشكريني
جوانا :تصدقين شكلك تعرفين الي كتبت بس تبين تغطين عليها ،من صديقاتك صح ؟
ابتهاج :لا معرف احد وصديقاتي ما يعرفونك ،بعدين بالعقل بغطي على وحده تسب عمي وبنته ؟ ولله لأشتكيها
جوانا :وانا ما ابي اشتكي انا ابي اخذ حقي بنفسي
ابتهاج :خلاص خذي حقك بنفسك وبعدين يخسفون بنسبتك بالثانوي وودعي احلامك يا بابا عشان وحده غبيه تكتب عنك بالحمام
جوانا :اذكرك مو عني عن ابوي
رفعت ابتهاج يديها تدعو:يارب احتاج اكسترا صبر اليوم ولا بهف ذي البنت
جوانا :انا الي بهفك تحسبين نفسك قويه ومتحكمه ولله لأهفك واكسر راسك تكسير بعد
ابتهاج :امشي بس وانتِ ساكته
جلست جوانا ورمت حقيبتها بالارض :ما بداوم الا وجوالي معاي
نظرت لها ابتهاج ثم لفت ظهرها لتذهب :براحتك
مشت خطوتين ثم لحقت بها جوانا وقفزت على ظهرها :بركب على ظهرك كذا يوم القيامه
ابتهاج بغضب :يا بنت الحلال ظهري بينكسر خليني اتخرج من الثانوي سليمه
جوانا :بنزل اذا وعدتيني ما تمنعيني اسوي شي
ابتهاج :طيب اوعدك اوعدك بس انزلي
نزلت جوانا عن ظهرها :شعرك ريحته حلوه
ابتهاج :انقلعي بس
خرجتا للسياره
سيف :سنه ننتظركم
ابتهاج :جوانا معاها مصيبه
غطت جوانا على فمها ما معاي ولا مصيبه
نهى :اي سيف تبي تتهاوش مع وحده
ابتهاج :ليتها تبي تتهاوش بس
جوانا :وش رابكم تنطمون ؟
سيف :جوانا وش ناويه عليه ؟
ابتهاج :تبي تاخذ جوالها للمدرسه وتصور البنت الي كتبت الكلام وهي تمسحه وتحط الفيديو في الطابور
نهى :كيف ؟ اصلًا ما تعرفها
سيف :انتِ تدرين كم قضيه على هذي؟
جوانا :لا
سيف :اول شي قضيه تشهير ثاني شي دخلتي بجوالك المدرسه وهو ممنوع ثالث شي اذا طلعت مو هي البنت ...
جوانا :ما يهمني ابدًا
نهى :جوانا بلا تفاهه
جوانا :مو تفاهه تدري سيف وش كتبت البنت عن ابوي؟
سيف :وش كتبت ؟
جوانا :كلب فلوس
سيف :واذا كتبت ؟
جوانا :يقهر الموضوع ترا ولله ما اخليها لين تبرد حرتي فيها
نهى :انا اقترح ننزلك واليوم تغيبين
جوانا :مابغيب اول مره يجيني شغف للدوام كذا
سيف :خلاص خلوها تداوم بس انتبهوا لها كل وحده تمسكها من يد
جوانا بحده :ماني كلبه تمسكوني كذا !
نهى :مو كلبه بس انسانه بتحرق المدرسه
ابتهاج :اسكتي اسكتي تعطينها فكره
جوانا بغضب :لا تحسسوني اني مجنونه لا تحسسوني اني مجنونه !
سيف :خلاص اسكتوا صدق
جوانا :سيف محد يفهمني تكفى قول انك فاهمني
سيف :افهمك انا بس غلط انك تسوين شي زي كذا
جوانا :ياربي
سيف :جوانا ترا الحياه مو لعبه مو كل شي يعصبك تروحين تنتقمين منه ،تعلمي شي اسمه صبر
جوانا بحزن :حتى انت مو فاهمني
سيف :اسمعي كلامي بس جربي قولي للمديره بس هي اذا ما سمعت لك كلمي امك عادي
تنهدت :طيب
سيف :يلا انزلوا
...
نرجس :هذا هو المحل تعديتيه
غاده :طيب اصبري ادور لفه أدخل
ملاذ :من زمان ما نطلع كذا مع بعض وش الطاري؟
غاده :الطاري تخرجي تخرجي للحين ما لقيت فستان
ملاذ :اما ما لقيتي فستان للحين احسبك ما حجزتي الشاليه الا يوم لقيتي
غاده :مامداني كنت مشغوله بس ان شاء الله اخر الاشغال
وسن :تحسبين أنك خلصتي من العذاب ؟ هذي بدايه جديده
نرجس :وسن اكبر محطمه
غاده :وصلنا يلا انزلوا انتشروا واختاروا لي وانا بقيم
ملاذ :وانتِ ؟
غاده :حتى انا معاكم بختار
وسن:يا شيخه لو انه فستان زواجك
ملاذ :لا صح ترا التخرج فرحه اكبر من الزواج من حقها لو تبي نحجز لها قاعه ونسوي عرس عادي
غاده :ولله استحق صراحه
نرجس :يا شيخه من صعوبه تخصصك كله مساج
غاده :عساك بمساج يكسر عظامك علاج فيزيائي هو عباره عن غثاثة الفيزياء مع صعوبه الطب ويجونك ناس صارت لهم حوادث ونعالجهم وكبار سن صارت لهم جلطات ونعالجهم وبزران عندهم صعوبه بالمشي ونعالجهم
نرجس :يلا بس انزلوا البنت تنتظر اكيد
غاده :قلتي لها ؟
نرجس وهي تنزل :قلت لأختها اليوم بنجي
صرخت شروق :سبرايز
حضنتها نرجس :بسم الله الله ياخذك
ملاذ :نرجس شوضعك
وسن :طبيعي البش...
غطت ملاذ فمها :خلاص بليز خلاص
نرجس :حيوانه ما توقعتك تجين
شروق :لا لازم اجي استقبال لكم تفضلوا على الضيافه
غاده :اتمنى ما سويتوا شي اوفر
شروق :ما يغلى عليكم شي خوات صديقتي
ملاذ :حنا بنات عمها
شروق :واختك وينها هذيك المراهقه؟
نرجس :بالمدرسه
شروق :يلا بعدين قولي لي الحين خلونا ندخل عند مصممتنا الحلوه
وسن :صح ! مصممه كيف ما فكرت فيها ؟
نرجس :تعرفينها؟
وسن :لا بس أكتب قصه وابي اخلي البطله عندها وظيفه مميزه بس ما لقيت
شروق :ايش ؟
نرجس :معليك هذي كاتبه شخصيتها غريبه
دخلوا المحل فنظرت غاده حولها :ماشاء الله ،السلام عليكم
سهام :وعليكم السلام ورحمة الله نورتوا محلي كأول زباين
غاده :حبيبي ولله
ملاذ :جوي فساتين ساتره ،اغلب المصممات الحين يسوون موديلات مو ساتره تعجبني بس مقدر البسها أحس عيب
سهام :بالضبط ،ذا الي احاول اتميز فيه حبيت تركيزك
غاده :اسمعي سهام اسمك سهام صح ؟
سهام :اي
غاده :اختاري اجمل اجمل فستان بنظرك يناسب لحفلة تخرج بشاليه بعيدًا عن انه يناسبني او لا
ضحكت سهام :ولله مقدر كلها الفساتين زي عيالي
غاده :اي شي اي شي خاطرك فيه
دارت سهام بالمحل قليلًا ثم أختارت فستان :ذا لونه حلو والقماش خفيف
اخذته غاده من يدها :اشوف
سهام :فيه مقاسات
قربته غاده من سهام :يجي عليك؟
سهام :ماله دخل
غاده :لا له دخل روحي جربيه وتعالي ابيك تحضرين الحفله
ابتسمت سهام :تسلمين حبيبتي بس...
غاده :بدون اعذار عيب ما اعزم صديقه اختي واختها حتى شروق معزومه ،تراه اجمل يوم بحياتي ودي اعزم كل الناس
اخذت سهام الفستان :بحضر عشان ما اكسر بخاطرك
شروق تهمس لنرجس :تشوفين الي اشوفه
نرجس بإبتسامه :قلت لك غاده اجتماعيه وخطتنا بتنجح
شروق :بس سهام انطوائيه مستحيل بسرعه توافق
نرجس :تأثير غاده
شروق :اخواتنا بيصيرون صديقات بعدين امهاتنا بعدين اباءنا بعدين نصير عادي ننام عند بعض ونسافر مع بعض،كفك
ضربت نرجس كفها :وربي اننا كفو
ضحكت ملاذ :كل شي طلع تخطيط
نرجس :استري على ما واجهتي
ملاذ :سياسة المكان
تنهدت نرجس :كم تبين؟
ملاذ :لا ولله ما ابي فلوس بس يمكن بعدين اطلب خدمه ثانيه احفظيها عندك
نرجس :طيب
نادت سهام:تعالوا شوفوا
ملاذ :ماشاء الله تبارك الله مره حلو
وسن :وهنا كان سحر الاميره
سهام :ما فهمت
ملاذ :تمدحك بس بطريقه ادبيه
سهام :تسلمين
غاده :ولله حلو سوي شعرك ويفي وتعالي ارجوك ارجوك ارجوك الليله الحفل
سهام :طيب بجي
حضنتها غاده :اقسم بالله بتنورين
ابتعدت عنها وتنحنحت :معليش بس وربي اليوم فرحانه
سهام :طيب الموقع وين ؟
غاده :عطيني رقمك وبرسل لك الموقع
سهام :خذيه مع شروق وانا بروح اغير
غاده :شروق عطيني رقم اختك
شروق :ابشري ابشري كم اخت صديقه عندي
ملاذ :ثنتين
شروق :هاه؟
ملاذ :بالمعنى الحرفي اخوات صديقتك ثنتين
شروق :اها
خرجت سهام :ترا للحين ما اخترتوا شي لأنفسكم
وسن :انا اخترت
ملاذ :انا من اول شريت لو ادري انه بنجي ذا المحل كان ما شريت الا منه لكن بالجايات ان شاء الله
غاده :باقي انا احس يخوف ما اخترت للحين
ملاذ :خذي راحتك مو تتوترين كذا
نرجس :شدعوه ترا كله فستان
غاده :انتِ ودي اهبدك اليوم بس خلي الليله تعدي بخير
سهام :شوفي ذا يمكن يعجبك
غاده :اشوف
...
نهى :وين رايحه
جوانا :بروح للمديره
ابتهاج :الحمدلله بس روحي قبل يجي ابوي قال انه بالطريق واول ما يوصل بركب واروح ما اتحمل دقيقه زياده
ضحكت نهى :اللهم لا شماته شكلك اول مره تجلسين للحصه السادسه معانا
ابتهاج :اول مره وعساها اخر مره
نهى :عساها دوم يارب
في مرفق اخر دخلت جوانا غرفه المديره :السلام عليكم
المديره :وعليكم السلام ورحمه الله وبركاته
جوانا :عادي اجي ؟
المديره :اي تفضلي اسمعك
جوانا :في الحمامات فيه و...الله يكرمك فيه وحده كتبت كلام مُهين لي
رفعت عينها عن الاوراق :وش كتبت ؟
جوانا بتردد :كاتبه...كتبت جوانا كلبه فلوس مثل ابوها
المديره :تعرفينها ؟
جوانا :لا
المديره :طيب عندك اي عداوات مع احد؟
جوانا :لا ولله
المديره :وكيف حكمتي إن الكلام لك خصيصًا
جوانا :مافيه احد اسمه جوانا غيري
المديره :المدرسه فيها سبع ميه طالبه يمكن فيه ؟
بحثت بالحاسوب ثم قالت :فيه ثلاث بنات بذا الاسم غيرك
جوانا :بس بصف اول مافيه الا انا وذا الكلام ما صار الا ذي السنه بنت عمي بثالث ثانوي وما قد شافته
المديره :عادي ممكن وحده اسمها جوانا من ثاني ولا ثالث توها تصير لها مشكله ،ترا مو انتِ محور الكون
جوانا :بس ما ارضى اي اهانه خصوصًا لو كانت على ابوي الله يرحمه تراه كان مكتوب جوانا بندر بالاسم يعني
المديره :الله يرحمه بس انا مديره سياستي ما احب تكبير المواضيع خلاص الموضوع عندك اقفلي عليه مو عاجبك جيبي طامس واطمسيه
جوانا :طيب
المديره :تقدرين تتفضلين
خرجت جوانا فتلقتاها نهى وابتهاج :وش صار ؟
جوانا :كريهه ذي المديره حق من يذبحها
نهى :وش قالت ؟
جوانا تقلد نبرتها :انا سياستي ما احب تكبير المواضيع خلاص الموضوع عندك اقفلي عليه مو عاجبك جيبي طامس واطمسيه ،كان ودي اقول لها خلاص خلي المشرفات يجونك ويشوفون كيف وصاخه مدرستك
ابتهاج :وربي انها بغله
الحارس :ابتهاج مساعد
ابتهاج :نداء الفرج يلا يلا بموت نوم
نهى :يلا الله يعوضك
جوانا :حسبي الله عليهم
نهى :كلمي جده هاله اكيد بتسمعلك
جوانا :الحين بكلمها اول ما ارجع
بعد وقت في المنزل
دخلت المطبخ :يمه
ام ثنيان :هلا
جوانا :بقول لك شي
ام ثنيان :قولي
جوانا :اليوم بالمدرسه رحت الحمامات ولقيت مكتوب عني كلام...
ام ثنيان :تعالي قلبي البصل
تنهدت جوانا :طيب
ام ثنيان :بعدين حطي معجون طماطم انا بروح حزه وارجع
جوانا :ابشري
نظرت للبصل وهي تقلبه :ليتني بصل وانطبخ وارتاح
ابتسمت من فكرتها الغريبه فأخذت هاتفها وصورت القدر ونشرته بتعليق يقول :وش أكثر شي تمنيتوا تصيرونه ،انا بصل
وصلها رد في نفس الثواني :اصير بقلبك مثل ما انتِ بقلبي
جوانا :يع
ردت عليه :مين انت؟
:شخص يحب يستفزك
جوانا :وانا احب ابلك الي يستفزوني
:تدرين ان كل شخص استفزك وبلكتيه كان انا
جوانا :وش الهوس الزايد ذا مين مسلطك علي ؟
:الطفش
جوانا :ماني ناقصتك هموم الدنيا براسي
:افا يالعلم وش مزعل اميرتنا
جوانا :كل زق وش ذا الميانه تقول اميرتنا ؟
:معليش ترا تقدرين تفضفضين انا انسان مريت بكل انواع الضغوطات اكيد بعرف وش الي انتِ تمرين فيه
جوانا :ولله لو انك طبيب نفسي
ارسل لها صوره كتب علم نفس :انا طالب طب نفس
جوانا :يعني بتطبق علي انقلع بس
:خليني اجرب نفسي وبعدين وش دراك يمكن تكونين اول وحده تعالجت عند اشهر طبيب نفسي ب٢٠٣٠ وليد محمد
جوانا :اسمك خايس
وليد:شكرًا شعور متبادل
جوانا :بعدين انا مو مريضه نفسيه عشان تقول اول وحده تعالجت بس امر بضغوط وبتخطاها
وليد :انك تتخطينها مع طبيب نفسي افضل بكثير
جوانا :بس تسوي نفسك ما سمعت ولا شفت
وليد :معليك سرك بأمان
كتبت جوانا كل ما مرت به ثم ترددت لترسله فدخلت امها :البصل احترق وانتِ لاهيه بهالجوال!
اغلقت هاتفها :مسرع احترق
ام ثنيان :الله يهديك بس
جوانا :ماركزت فيني نوم
ام ثنيان :بتتغدين معانا ولا بتنامين ؟
جوانا :بنام
ام ثنيان :خلاص اطلعي وانا بسويه
ذهبت لغرفتها وفتحت هاتفها وارسلت الرساله فورًا
بعد وقت استغرقه وليد بالقراءه رد عليها :هم صادقين سامحي بس غلطانين انهم يقولون لك بذي الطريقه يعني توه الموضوع جديد وأكيد مأثر عليك كثير انا فاهمك بالمدرسه قالوا عني ولد الاعرج لأن ابوي كان يعرج بشكل بسيط
جوانا :طيب كيف تخطيت الموضوع ؟
وليد :تذكري ابوك كيف هو انسان طيب وكيف هو بيزعل لو عرف الي تفكرين فيه
جوانا :مقدر كل ما اتذكر طيبته احس لازم انتقم
وليد :انا بكون معاك اي نصيحه تحتاجينها بساعدك
جوانا :تمام
في المساء
غاده :الحين احنا بنروح الحفل بالجامعه وانتم بتروحون الشاليه تسوون نفسك تفاجؤني طيب؟
ملاذ :طيب
غاده :مع السلامه
صعدت السياره مع والديها واخوانها :يمه جهاد بيجي؟
ام جهاد :ولله وانا امك ما ادري
غاده :يلا ان شاء الله يجي هناك ويسوي لي مفاجأه
وصلت لمقر الحفل وهناك عاشت أجمل ساعات حياتها واخيرًا ستتلقى تبريكات عائلتها لمحت شبيهًا لأخيها جهاد وركضت اليه فحضنته :انت أول شخص يحضني بعد ما صرت رسميًا خريجه ،اتمنى انك شفتني وانا اقول القسم
ابعدها عنه ونظر لوجهها بغرابه:شفتك وانتِ تقولين القسم وشفتك وانتِ تركضين من بعيد كنك باتمان
انصدمت من كونه شخصًا أخر وليست صدمتها اكثر من حرجها منه :م...معليش
ابعدت يديها عنه ونظرت حولها لتتأكد من أن لا أحد رأى ما حصل
:الا بسألك شفتي وحده قصيره شوي وعلى قبوعها مكتوب Dr.nora ؟
اشارت غاده خلفها :اي هناك
ثم اشارت يمينها :مدري هناك ،مدري وين
:خلاص ما يحتاج
اقتربت منها نرجس :وش صار ؟
غاده :ايش وش صار ؟
نرجس :مدري شفته يكلمك قلت يمكن صار شي
غاده :يسأل عن وحده مدري هي أخته ولا ...زوجته
همست بداخلها :يارب مو زوجته يارب ما حضنت واحد متزوج ،يارب انا اعرف ان كلها ذنب بس اني احضن واحد سنقل احسن من واحد متزوج ،وفوق ذا انا مخطوبه ياراسي
قاطع هواجسها صوت والدتها تبارك بأعلى صوتها وتحتضنها :الله يوفقك ويفتح لك ابواب الرزق يا بنيتي ويا عسى تعبك هالسنين كلها ما يضيع ونشوفك احسن دكتوره ان شاء الله
ابتسمت غاده :الله يخليك لي ولله ان سبب توفيقي بعد الله هو هالدعاوي الله لا يحرمني منها
ابو جهاد :وانا مالي حق بذا النجاح ؟
ضحكت غاده وحضنت والدها :انت صبري بذي الدنيا
اشار ابو جهاد لسهيل وين العقد ؟
غاده :عقد ؟
البسها سهيل عقد النقود :هذي مني انا وابوي وجدتي
حضنته :ياعمري اخر العنقود كبر وصار يهدي
الجده وضحه :تستاهلينها وانا جدتك
حضنت جدتها :يازين هالريحه تقل ريحة الجنه
ابتهاج :باقي انا هديتي بالشاليه
غاده :تعالي بحضنك معليك من الهدايا
نرجس :انا الوسطانيه المنبوذه اول وحده جيتك ولا حضنتيني
ضحكت غاده فحضنتها ثم ابتعدت وقالت بصوت عالي :احضاني اليوم تكفي كل الناس
في نفس لحظه قولها وقعت عينها بعين الشاب الذي احتضنته سابقًا فأبعدت نظرها عنه :جهاد ما جا؟
ابو جهاد :لا ما يقدر عنده ضغط اليوم
غاده :تمنيت يجي
...
جوانا :مين ؟
جهاد :انا افتحوا لي درب ابدخل الشاليه وبفاجئ غاده
جوانا :طيب لحظه بس باخذ عباتي وافتح لك
جهاد :طيب
عادت بعد قليل وفتحت له الباب :ادخل
جهاد :معليش بضغط عليكم بغرفه حبتين بس عشان افرح غاده
جوانا :لا عادي اصلًا ذي حياتنا دايم
دخل جهاد وجلس بالفناء ينتظر وصول غاده ،دق الباب فقام وفتحه بحماس وكانت فتاه تغطي وجهها بالهديه نظر لها بتمعن لثواني فأبعدت الهديه وصرخت :مفاجأ...انت
جهاد :سلام
سهام :ذي حفله غيداء صح؟
جهاد:هاه؟
سهام :اقصد غاده
جهاد :اي بس هي باقي بالجامعه وانا انتظرها هنا
سهام :مين انت ؟
جهاد :انا جهاد
سهام :لا يعني بالنسبه لها
جهاد :اها اخوها
سهام :طيب اختي هنا جت قبلي وش اسوي
ابتعد عن الباب :ادخلي هم بذيك الغرفه
سهام :لحظه بس
اخرجت هاتفها واتصل على شروق :الو وانتوا وين ؟
شروق :قاعده اشوفك من النافذه انا بذي الغرفه تعالي
نظرت للنافذه :طيب جايه
دخلت سهام فتعثرت بعتبه الباب وكادت أن تُسقط هديتها فأخذها جهاد من يدها :انتبهي
توترت وارادت ان تأخذ الهديه من يده لكنها اخذت هاتفه :لا عادي
سارت خطوتين ثم نظرت ليدها وعادت لترده له:ذا جوالك
اخذه من يدها :اي نسيته
اشارت على الهديه :وهذي هديتي ...يعني هديه غاده بس انا جبتها
جهاد :اي حلوه نفس ذوقها
غاده :قلت بأي غرفه ؟
جهاد :بذيك
دخلت الغرفه وبقي جهاد الذي اخذ نفسًا عميقًا وهو يدور :يا صغرك يا الرياض
شروق :شفيك بغيتي تقربعين
سهام :يا بنتي خفت اول ما فتح الباب جا ببالي كل القصص الي عن بنات طلعوا لشاليه يحسبونه بس بنات ولقيوا فيه عيال وخطف وفوضى
ضحكت ملاذ :ياروحي انتِ راح عن بالنا نعلمك
سهام :فحمت مافيه مويا ؟
جوانا :مين ذي ؟
شروق :اختي سهام
جوانا :المصممه؟ تكفين على قد ما البنات مدحوا تصميماتك تمنيت اني رحت
سهام :حبيبتي تسلمين ولله اتمنى تتخطون المدح لأني معرف ارد عليه
ملاذ :سوي زي ذيك الي بمحل العبايات تقول انتِ ولا كلمه
ضحكت سهام :اي شفتها مت ضحك اخر شي يوم تقول عندك خيارين تشترين ولا اقفل على رجولك
شروق :المشكله العبايات الي صوروها صدق حلوه
بعد وقت دق الباب مره اخرى فذهب وفتحه فصرخت غاده بصدمه وسعاده :جهاد !
ضحك جهاد وفتح يديه فحضنته :كنت احسبك ما بتحضر بس جيت هنا
جهاد :قلت اسوي لك مفاجأه
غاده :احلى مفاجأه وربي
جهاد :يلا انا طالع هديتك هناك
غاده :اجلس بس شوي !
جهاد :تأخرت عشانك
غاده :طيب ابقي لك كيك؟
جهاد :اذا بالفنيليا اي
غاده :ابشر
دخلت غاده ونادت :وينكم بنات
ملاذ :هنا
غاده :شدعوه قلت فاجؤني بخرج الحين وانتم فاجؤني مره ثانيه
ملاذ :ولله اخوك خرب مخططاتنا
غاده :فديته جهاد حبيبي
شروق :لحظه نرجس مو هذا اخوك الي عجب منا...
غطت نرجس فمها :ولا شي كملوا من حيث توقفتم
غاده :يلا انا بطلع وعيدوا كل شي
ابتهاج :اطلعي
خرجت غاده وعادت بعد قليل لتمثل انها متفاجئه :ياخي انتم احسن بنات عم وش ذي المفاجئات الحلوه مين راعيه الفكره ؟
نهى :انتِ
ابتهاج :عطوها على جوها ،احنا احنا
غاده :كلكم ؟
ملاذ :اي
غاده :ياخي تجننون الحمدلله عليكم
وسن :اي صح نهى امك ما بتجي ؟
نهى :لا مشغوله
همست ملاذ لوسن :اكيد سعيد الحيوان ما سمح لها تجي
غاده :يلا نقطع الكيك
بعد وقت انقضى بالاحتفال اتصلت نهى على سيف :الو سيف صاحي ؟
سيف :اي
نهى :طيب تعال لي
سيف :روحي مع خالاتي ما تبين تنامين عندهم ؟
نهى :الا بس ...بكره دوام بقوم اتجهز ما عندي مريول ولا شي
سيف :خذي مع جوانا
نهى :سيف ! ترا بس عشرين دقيقه الا انت عندي تكفى
قام سيف وتنهد :طيب
نهى :ترا بقيت لك كيك وحلا
سيف :كويس
اغلق هاتفه وخرج من الغرفه فسمع صوت والده يتحدث بالهاتف :زوجتي نايمه بجيك الحين ...