أحلام يعرب (ليبية_منقولة)

الحلقة 1

#أحلام_يعرُب ((بين الحب والحرب))
#الحلقة_1 «الفصل الاول ليلة سقوط الصاعقة»
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
بنغازي _ بوعطني _يوم الثلاثاء  29 /7 /2014..ثاني ايام عيد الفطر المبارك...

((  هُتاف... وتكبيرات.. والعلم الاسود يرفرف فوق... إحتفال وهرج ومرج... وريحة الجو عبقت وأختلطت مابين ريحة الد. م والبارود... بقايا القواذف والصواريخ والرصاص الفارغ .. عبت ساحة المكان تخلطت مع جث. ث وأش. لاء الجنود ... فوق ساحة معسكر الصاعقة.. الساحة اللي كانت كراديس جنود الصاعقة تخبط وتزلزل في الارض تحت أقدامهم وهم في صوت واحد.. تضحية... فداء.. مجد... اليوم غابت اصواتهم ولا صوت يعلو فوق صوت الرصاص إحتفالاً بسقوط الصاعقة))

كان يوم كئيب.. يوم حزين.. يوم مؤلم.. عايش في ذاكرة الشارع البنغازي.. وعند كل الليبين... ولما كان طبيعي أحداث زي هكي تأثر على حياة ناس بنغازي.. ماكانش حد متوقع أنه حدث في بنغازي بيأثر في حياة ناس ويغير كل شي في حياتهم.. في اقصى الشرق الليبي _ وسط غابات الجبل الاخضر _ وفي وسط شوراع وأحياء مدينة البيضاء..وين ماكانوا عايشين ابطال قصتنا...
.
.
.
**********(( روايات أم ناصر))
.
.
.
البيضاء _وسط لبلاد _يوم السبت _28 /6 / 2014
اول أيام شهر رمضان المبارك.. قبل الكارثة بحوالي شهر ⬇️
.
.
((مدي ايدك انحنيها نواسيها.... صغيرة ونفرح بيها))

شافت لاصوابعها ونقش الحنة عليهم ودندن بصوت مغموم اممممم... ورجعت تغني من جديد

((مدي ايدك انحنيها نطرفها... اصغيرة وباش تعرفها))

حطت من الزيت اخرى وتدهن في إيديها.. ودندن بالشويا

(( ومزين الحنة الحمراء في ايديها...

رفعت اعيونها شافت لزوجها في انعكاس صورته على مراية الزيانة قدامها .. أبتسمت بفرح وغنت بالشويا ⬇️
وأجعل السعد يجيها))

كانت اعيونها تفيض بسعادة وهيا دندن بالشويا باش مايسمعهاش عريسها اللي كان راقد وغارق في النوم

تنهدت براحة.. وقفت تمسح في ايديها في بعض.. وبعدين شمتهم بعمق..ريحة الحنة مع زيت الشيح عبت خشمها.. تنهدت.. ومشت بالشويا خذت وشاح وغطت رأسها.. وطلعت من دار نومهم.. عبرت الصالة للمطبخ.. دخلت وكان في صواني جاهزة ومغلفة.. نوع حلو ونوع مالح.. رفعتهم وطلعت من المطبخ متوجهة لباب الشقة.. فتحت بالشويا وصكرت الباب وراها ونزلت لحوش أهل دارها.. الحوش اللي قبل شهر بس من اليوم  كان حوش خالتها فقط
.
.
.
حوش المرحوم خيري الحواتي
((الحواتي))  لقب جدهم الاول.. واللي استمده من حرفته لما كان حوات.. او زي مانقولوا توا صياد.. واللقب مشى مع العيلة جيل وراء جيل
عند عيلة الحواتي.. الروائح المنبثقة من المطبخ اتجيبك من وين لوين.. ريحة المبطن والشربة والمحاشي والبوريك  فاحت... وفاحت معاهم ريحة شهر رمضان.... رمضان الخير والبركة ♥