أحلام يعرب (ليبية_منقولة)

الحلقة 60

#أحلام_يعرُب ((بين الحب والحرب))
#الحلقة_60 ((الفصل الثلاثون وا معتصماه))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«رب أعني ولا تَعّن عليّ ، و انصرني ولا تنصر عليّ و امكر لي ولا تمكر عليّ و اهدني و يسر الهدي إليّ ، و انصرني على من بغى عليّ رب اجعلني لك شاكرا لك ذكاراً لك رهَاباَ ، لك مطواعاً إليك مخبتاَ أوّاهاً منيباَ ، رب تقبل توبتي ، و اغسل حوبتي و أجب دعوتي و ثبت حُجتي و أهد قلبي ، و سدد لساني ، و أسْلُلْ سخيمة قلبي»
.
.
.
#فلاش_باك ⬇️
.
.
قربت من باب الشقة وين جت بدق كان الباب مفتوح... استغربت في الاول.. وبعدين قعدت ادق عادي
مرة واثنين وثلاثة.. ولما مافيش صوت او حد رد عليها.. دخلت بالشويا لشقة وتنادي  :  اعميمة عروبة... اعميمة عروبة

كانت تنادي ولما دخلت اشوي من المدخل بانت عليها عروبة طايحة في وسط الصالة متاع التوزيع لباقي الشقة

جت قربت منها منصدمة وخايفة... نادت عليها كم مرة من بعيد ولما مافيش أستجابة منها... طلعت بسرعة من عندها وركبت لامها تجري وتعيط

خشت على امها مفجوعة وقالتلها عن جارتها اللي مغمى عليها في شقتها بروحها

جارة عروبة لابست عباتها ونزلت بسرعة لعند شقة عروبة.. وخشت عليها لاقتها طايحة وتئن من الالم

الموقف كان مفزع لجارة و واضح ان عروبة متعرضة لضرب من وجهها وشعرها

نزلت عليها ترفع فيها وتحاول توعيها.. ولما تأكدت انها مازلت حية مشت تجري وطلعت لشقة المقابلة وكلمت جارتها لاخرى عشان تساعدها وتكون معاها

والجارة الاولى اتصلت براجلها عشان يجي معاهن ويعرف كيف يتصرف في موقف زي هذا

الراجل طلب منهم يشوف تليفونها ويتصلوا باي حد من هلها عشان ايكونوا معاها... والجارة قعدت ادور عن تليفون عروبة.. وكان طايح في جنبها

خذاته وقعدت ادور عن اي رقم لواحد من هلها... وكان رقم سيف في سجل المكالمات الواردة عندها... وكان اول اسم تتذكره جارتها من كلام عروبة عن هلها مع جاراتها

اعطت الرقم لراجلها وهوا اتصل بيه طول
.
.
سيف وقتها كان في المحل مع جمال وصدام... في البداية لما رد كان مقمعز معاهم عادي... ولما حكى مع الراجل وحس الموضوع فيه قصة مع عروبة... مشى بعيد عنهم وتكلم معاه لعند فهم القصة منه

وعشان مايبيش يعرب يعلم بشي قبل مايفهم القصة بالكامل... سحب جمال بروحه على جنب وبلغه وبعدين طلعوا من المحل مع بعضهم من غير مايقولوا لصدام اي شي

صكر جمال بابه وتلفت على خوه اللي شيط السيارة  :  شن قالك الراجل بالضبط

سيف متوتر ويجري بالسيارة  :  والله مافهمت منه شي... قال أختك لاقوها طايحة في شقتها ومغمى عليها بروحها