أحلام يعرب (ليبية_منقولة)

الحلقة 38

#أحلام_يعرُب ((بين الحب والحرب))
#الحلقة_38((الفصل العشرون فبراير الحزين))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم بشرني بالخير كما بشرت يعقوب بيوسف، وبشرني بالفرح كما بشرت زكريا بيحيى، اللهم يا مؤنس كل غريب ويا صاحب كلّ وحيد ويا ملجأ كل خائف ويا كاشف كلّ كربة، أسألك لأن تقذف رجاءك في قلبي حتى لا يكون لي همُ ولا شغلُ غيرك وأسألك أن تجعل لي من أمري فرجاً ومخرجاً إنك على كل شيء قدير»
.
.
.
يوم الاحد  1 / 2 / 2015
.
.
تنهد وقمعز بطرف السرير  :  توا معادش ينفع اللي اديري فيه... لازم اتشدي حيلك وتقمعزي تدعي لولدك ربي يشوف في حاله ويشفيه ويقدر يتخطى كل هالمشاكل اللي عنده

رشفت خشمها  :  علاش ايصير فيا هادا كله.. ليش ماجبتش ولد بصحته واكويس زي باقي لنساوين... علاش ربي حتى في هادي فرحتي قعدت ناقصة ولازم عليا نصبر ونتحمل بروحي

زم فمه  :  استغفر الله.. شني لكلام هادا خيرك أنتي ..هذا نصيبنا وكل شي ليه حكمة وأسباب.. وربي كاتب علينا بيكون هذا ولدنا والمفروض نرضوا بيه زي ماهوا ونسلموا امرنا لله.. ومافيش في ايدينا غير الدعاء والصبر

تكلمت امها بحزن  :  راجلك معاه الحق يابنتي.. مافيش حد يختار صغاره او يختار كيف بيكونوا.. وأنتي هادا نصيبك من الدنيا ولازم ترضي بيه

زمت فمها ورشفت خشمها  :  نصيب خايب وحظ اغبر في كل شي.. من اول زواجي لعند اليوم وأني ماتهنيتش لحظة وحدة زي الناس وحياتي نكد في نكد

غمض اعيونه وتنهد بقل صبر وصبا  :  بلا دوة زايدة مش وقتها تربحي...وبدال ماتلومي في الناس على حظك لاغبر بري راجعي روحك من منو الغلط في كل شي من البداية

بلعت ريقها بالغصب.. وهيا فاهمة قصده لما قال من البداية

مشى لباب وتلفت عليها  :  غدوة الصبح بنرفعك انتي وخالتي باش اتشوفي ولدك وتطمني عليه

عتيقة رفعت ايديها  :  الله يرضى عليك ويريح بالك وقلبك ياولدي ويجبر بخاطركم ويعافي ولدكم وتروحوا بيه سالم معافى يارب

شاف لاخالته وطلع طول... ركب لفوق بيشوف خوه

اما عتيقة التفتت على بنتها  بعتاب  :  علاش كلامك زي السم مع راجلك... هادا شن يقولوا عليه توا.. أنتي ماتبيش تهني روحك وتفكك من تصرفاتك ولسانك اللي ينقط سم وعلقم

رفعت خشمها  :  كان عاجبه الافندي

فطيمة شافت لنجمة بعدم رضى وبعدين شافت لاختها اللي تكلمت بقهر  :  لا اكيد مش عاجبه.. انتي لعند امتى وانتي تجربي في حظك معاه... راهو الراجل ليه حد معين وبعدين بينفجر فيك مرة وحدة

نجمة بعصبية  :  ينفجر ماحد شاده...اساساً كله منه ماحد قاله

عتيقة  :  لا مش منه وانتي تعرفي اكويس مانبيش نتكلم في اللي فات... المفروض مادامك مش متحملة من الاول كنتي قعدتي وقمعزتي بحدايا وخلاص... الراجل قاعد متمسك بيك برغم كل عمايلك معاه.. ومايبيش يزعلك و واخد بخاطرك وحتى من ولده سماه بأسم بوك الله يرحمه عشان يرضيك وبس... لكن أنتي تبربشي في جرة حظك لعند تلقيه ملوحك علينا من جديد