أحلام يعرب (ليبية_منقولة)

الحلقة 107

#أحلام_يعرُب ((بين الحب والحرب))
#الحلقة_107(( الفصل الثاني والخمسون_مفترق طرق))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهُم خيرًا في كلّ اختيار، ونورًا في كل عتمة وتيسيرًا لِكل عسير، وواقعًا لِكل ما نتمنى، اللهم بحجم جمال جنتك أرني جمال القادم في حياتي وحقق لي ما أتمنى، واشرح لي صدري. اللهم الرضا الذي يجعل قلوبنا هادئة وهمومنا عابرة ومصائبنا هيّنة إنك على كل شيء قدير.»
.
.
.
تلفتت عليه وبلعت ريقها  ومش عارفة كيف بتقوله... ماتبيش الخبر ايجي منها... ماتبيش تزعله او تخيب ظنه... وكانت بتقول اي عذر وخلاص

أحلام بتوتر  :  خالد شوف أنا مان.....

سكتت على صوت الباب ايدق.. وخالد تلفت وراه  :  منو جاي توا

أحلام  :  مش عارفة... عدي شوف من... اكيد حد بيسلم عليك

تنهد وجفف ايديه بالفوطة وطلع للباب... وأحلام تنفست الصعداء... اللي جاء انقذها من الموقف و من سؤال خوها

رجعت تكمل في حوستها... وخالد طلع فتح الباب... كانوا اولاد عمه ومعاهم عمه علي وعمه الثاني... سلم عليهم بحرارة... واحلام تسمع فيهم مبتسمة... وبعدين خشوا معاه على فرج
.
.
كملت حوستها وطلقت بخور في الحوش... وخشت توضت وبدلت ملابسها ومشت تصلي في العشاء

بعد صلت مشت خشت للمطبخ وبدت اطيب في قهوة... وبدت الناس اطب عليهم... صبايا اعمامها وجارتهم... سعدة.. وبعد وقت جت يقين مع امها وبوها... والحوش تعبى ضيوف

مشت للمطبخ وصاحبتها شادة في ذراعها ومبتسمة  :  شن اخباره خالد

حطت السفرة وتلفتت عليها  :  بخير الحمدالله... متأثر واجد باللي صار معاه.. بس الحمدالله على كل حال... وين كنا و وين قعدنا

يقين مدمعة   :  الحمدالله يارب...تعرفي واقسم بالله.. اول ماتصلتي بيا وخبرتيني من الصدمة قعدت نبكي اتقول خويا أنا اللي روح وأمي قعدت تزغرد والحوش انقلب كله من الفرحة

ابتسمت بود  :  نجك ليا... عمتي سليمة الفرحة واضحة في اعيونها اصلاً

يقين  :  مش غير والله... كانت في كل صلاة تدعيله وديما شاغل بالها وتفكر فيه

حطت فناجين في السفرة... وتكلمت بتأثر  :  ربي ريح بالها وبالنا  والحمدالله... جية خالد كانت زي الحلم لنا... ابتسمت وغمت فمها... اتصدقي كل بعد شوي نمشي انشوفه نتأكد منه صح والا نحلم

ابتسمت يقين وقربت منها مسحت على كتفها  :  ربي يحفظه ويخليكم لبعضكم... وماعاد اتشوفي فيه سوء

غمضت اعيونها وتنهدت  :  يارب يايقين... ربي يخليه ويحميه... مازال صغير وشاف في عمره واجد...إن شاءالله ربي يعوضه خير يارب

يقين  :  إن شاءالله....قتلك انحط من هذا

شافتلها وهزت راسها  :  اها حطي منه