أحلام يعرب (ليبية_منقولة)

الحلقة 54

#أحلام_يعرُب ((بين الحب والحرب))
#الحلقة_54((الفصل السابع والعشرون أشواك ناعمة))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم يا حنان يا منان يا من لا تغفل ولا تنام.. أسألك أن ترزقني الصبر الذي لا نهاية له، وأن توفقني في الحياة الدنيا لما تحب وترضى.. إنك على كل شيء قدير»
.
.
.
كان ايشوف لعيونها وينتظر في جوابها وقلبه يدق بقوة وسرعة

رفعت وجهها وتكلمت اخيراً  :  لا

تكلم بتساؤل  :  لا شني؟!!

برغم رعشة جسمها بس تحاول تتكلم بثقة  :  لا مانبيكش اطلقني

رفع حاجبه  :  شن غير رائك

بلعت ريقها  :  لاني انحبك ونبي انكمل حياتي معاك

ابتسم بتهكم ودور وجهه 

تكلمت بحدة  :  ليش تضحك يعرب.. نحكي جد أنا

ضغط على معصمها ويتكلم بعصبية  :  من أمتى اتحبيني اها... ماهو من شهرين بس ماكنتيش اتحبيني ولا تبي اتعيشي معايا وتبيني انطلقك  بسرعة... شن تغير توا

احلام  :  كل وقت وليه ظروفه.. أنتا في وقتها كنت ااا

قاطعها  :  اني في وقتها كانت صحتي باهية وقادر نمشي وندير كل شي بروحي.. عشان هكي ماقدرتيش اتحبيني.. اما توا قاعد عاجز وحالي يسخف هادا علاش حبيتني.. صح والا لا

احلام بحدة وسحبت يدها منه  :  لا مش صح واعطيني فرصة نحكي.. ومعاش تحلل وتقرر من راسك وتحكم عليا بدون ماتسمع

تكلم بغضب  :  لاني سمعتك هلبا احلام وفي كل مرة مايتغير شي.. ونرجعوا لنقطة الصفر... وأنتي ديما اعذارك مش مقنعة

احلام  :  خليك من الماضي توا وخلينا في وقتنا هذا... أنا قاعدة انقولك اني انحبك ونبي نعيش معاك شنو اللي مش مقنع في كلامي

ابتسم وتكلم متهكم  :  مافيش حد يحب واحد تاني في غيابه... قصدي لما كنت بحداك وديما في جنبك.. ماحبيتينيش وتوا لما غبت عنك وكنت بعيد قعدتي اتحبيني هكي فجاة.. قولي كلام يخش لدماغ تربحي

بلعت ريقها وعيونها مدمعة وتشد في اصابعها بتوتر :  لاني في غيابك عرفت قيمتك في حياتي... عرفت اني مانعرفش انكمل من دونك...في غيابك غابت ضحكتي وفرحتي.. غاب النوم والراحة..... في غيبتك حسيت روحي ماعندي حد.. ولا ليا سند غيرك

رفعت اعيونها ودموعها نزلوا  :  يعرب بالله عليك صدقني.. والله والله أنحبك ومانبيش من الدنيا غيرك واقسم بالله

يسمع فيها وخاطره يصدق كل كلمة اتقول فيها... بلل شفافه.. وتكلم بهدوء معبى لوم وعتاب  :  بالله عليك انتي صدقيني.. اللي قاعدة اتحسي بيه توا مش حب... عمره الحب مايجي فجاة هكي...مافيش حب  يتغير بتغير الظروف والاوقات.. الحب شي كبير وبعيد كل البعد عن كل التناقضات اللي معبية كلامك وحياتك... الانسان لما يحب بجديات معادش تفرق معاه اي ظروف والا اي كلام تاني.. اللي قاعدة اتحسي بيه توا.. مجرد شفقة وكسرة خاطر عليا وتحاولي اتعوضيني عن خسارتي وتوقفي بحدايا لانك حاسة ان هادا هوا الصح والمفروض عليك وغير هكي كلام فاضي