أحلام يعرب (ليبية_منقولة)

الحلقة 35

#أحلام_يعرُب ((بين الحب والحرب))
#الحلقة_35((الفصل العشرون فبراير الحزين))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اسالك اللهم بقدرتك التي حفظت بها يونس في بطن الحوت،  ورحمتك التي شفيت بها أيوب بعد الإبتلاء، أن لا تبق لي هماً ولا حزناً ولا ضيقاً ولا سقماً إلا فرجته، وإن أصبحت بحزن فأمسيني بفرح وإن نمت على ضيق فايقظني على فرج، وإن كنت بحاجه فلا تكلني إلى سواك، وأن تحفظني لمن يحبني وتحفظ لي أحبتي»
.
.
.
الاحد  25  / 1  / 2015  الصبح الساعة 11 ونص

بالرجوع بالوقت اشويا وقبل كم ساعة من طلعت أحلام مع يعرب من الجامعة
كان يعرب واقف ويشوف بشي من القلق والحزن والمشاعر الغريبة اللي اول مرة ايحس بيها.. وهوا يشوف لولده.. الصغير والضعيف واللي لا ليه حول ولا قوة... والاجهزة والخيوط موصوله فيه من كل جسمه

حط يده على زجاج الحضانة اللي فيها ولده.. غمض اعيونه ويهمس بهدوء  :  اللهم أنبته نباتاً حسناً، واجعله قرة عين لوالديه، واحفظه وبارك لنا فيه واجعله من أهَلْ الصلاح والتقوى.
بسم الله أرقيك من كل شيء يؤذيك، من شر كل نفس وعين حاسد، بسم الله أرقيك والله يشفيك
اللهم اجعله من الصالحين المصلحين البارين بوالديهم.
اللهم فرح به نبيك المختار، واهده لما تعبد يا غفار.
أعيذك بكلمات الله التامة، من كل شيطان وهامة ومن كل عين لامة.

فتح اعيونه ويمسح في وجهه ولحيته.. تنهد وبلع ريقه ... شافله زين.. وبعدين طلع من الغرفة.. والممرضة صكرت الباب.. ويعرب توجه لقسم النساء
.
.
قربت منه ونزلت كيس المخدة والبطانية وكيس ثاني فيها دبش نجمة وحاجات اخرى

خديجة  :  نزل هادم لسيارة توا.. ونجمة مازلت اشويا لعند يتموا ورقة الخروج قبل

يعرب  :  شن وضعها اليوم

خديجة  :  لا الحمدالله اليوم اكويسة... جهزتها وكل شي تمام.. بس قالت بتمشي اتشوف ولدها قبل تطلع

طبس ولقط لاكياس  :  اي تمام.. خليك امعاها واني نازل تحت.. لما يديرولكم خروج كلميني طول

خديجة  :  باذن الله

رجعت خديجة لعند نجمة... و يعرب نزل لسيارة وحط الحاجات.. وركب قمعز في سيارته... طلع دخان بيدخان لانه متوتر اشوي

وبعدين غير رايه.. وطلع مصحف صغير من درج السيارة.. وقعد يقرأ لعند تكمل نجمة ويطلعوا عليه يروح بيهم للحوش
.
.
.
************«روايات أم ناصر»
.
.
.
الساعة 12 و35 دقيقة... كانت سيارة يعرب تشق في طريقها وسط الزحمة مروح بيهم للحوش

مسحت ادموعها ورشفت خشمها... تلفت عليها  :  علاش تبكي توا

بلعت عبرتها  :  مانبيش نطلع ونخلي ولدي بروحه في المستشفى

يعرب  :  ماهو تعرفي وضعه ولازم يقعد في الحضانة فترة لعند يشد حيله ويقدر يتنفس بروحه وتتحسن صحته اكثر