أحلام يعرب (ليبية_منقولة)

الحلقة 87

#أحلام_يعرُب ((بين الحب والحرب))
#الحلقة_87((الفصل الخامس والاربعون  عروس البحر))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم بحرا من التسخير وبحرا من التوفيق وبحرا من السعادة والطمأنينة وراحة البال والرضا.
اللهم غيث من السعادة يسقي الفؤاد فيزهر سعادة وطمأنينة اللهم السلام لقلوبنا أينما حلت. اللهم راحة البال والطمأنينة لقلوبنا»
.
.
.
الخميس 28 / 5 / 2015 بالليل

في وحدة من حوايز تاجورة... كان الرعب مسيطر على اهل الحوش اللي انفجعوا من صوت السيارات والسلاح اللي قطع هدوء الليل

غبرة عجل السيارات مازالت طايرة في الهواء والشارع رجع للسكون فجاة ومافيش الا صوت سمعة وجاره في الحوازة اللي جنبه يتكلم معاه

سمعة داهش  :  لاولاد طلعوا وراهم طول واني مالحقتش نشدهم

ضرب ايديه في بعض  :  لا حول ولاقوة الا بالله... إن شالله خير.. ماتخافش باذن الله بيروحوا طيبين

يتصل بتليفونه بقلق  :  الخير من وين بيجي مع اولاد الحرام هادم... رعشونا وركبونا الهم الله يرعش فرايسهم... وين بنمشي اني توا.. منو بينا في هالليلة الحرفة

قرب منه جاره  :  وسع بالك واستهدي بالله... توا بنمشي لحوشي عندي رقم نسيبي بنكلمه باك يقدر ايدير حل معاهم

الخط يفصل وسمعة ايزيد يتوتر ويعصب  :  الله يلعن الشيطان... وهادم خيرهم مايردوش عليا الفروخ

مشى جاره شور الحوش  :  خليك هنايا نمشي نتصل ونشوف الراجل وتوا انجيك

تباعد متجه لحوشه... وسمعة يحاول يتصل بواحد من اولاده اللي طلعوا في جرة السيارات المسلحة اللي كانت ادور حول الحوش وتطلق في رصاص

ولكن من غير فائدة مافيش رد وقلبه يغلي عليهم

فتحت باب الحوش بالشويا وشافت لبرا  :  حاج... ياحاج

تلفت عليها وقرب معصب  :  خيرك يامراة.. مش قلت مانبيش حد يطلع من فم الباب بكل... خشي داخل

عويشة ترعش وتبكي :  الاولاد وين... صغاري وين ياحاج جيبهملي الله يخليك

رفع يده بعصبية  :  خشي داخل وصكري الباب.. صغارك توا ايجوك ماتخافيش عليهم .. خشي داخل

كلمته الاخيرة قالها بتفنيصة خلتها طبقت الباب بسرعة... وبنتها اللي حاضنة ولدها بخوف وراءها... كانت ترجف وتبكي... وحاسة بالذنب.. واختها الاصغر منها واقفة وخايفة اتشوفلهم

شافت لامها بخوف  :  شن قالك بوي

عويشة بتوتر وعصبية :  ماقال شي شن بيقول... قاعد يكشخ ويعارك...نحي هكي نحي ترا

خشت لوسط الحوش وقلبها يغلي رفعت ايديها لفوق  :   ياربي صغاري يارب...يارب استودعتك اولادي احفظهم ليا بحفظك التام... يارب ماليش غيرك.. استرها معانا وفوت الليلة هادي على خير يارب