أحلام يعرب (ليبية_منقولة)

الحلقة 28/29

#أحلام_يعرُب ((بين الحب والحرب))
#الحلقة_28 (( الفصل السابع عشر استراتيجية ناعمة))
((دراما واقعية مقتبسة من أحداث حقيقية))
.
.
.
لايك قبل ماتقري ♥ عاودت نزلت الحلقة للبنات اللي ماقروهاش
.
.
.
"اللهم أصلح لي ديني الذي هو عصمة أمري، وأصلح لي دنياي التي فيها معاشي، وأصلح لي آخرتي التي فيها معادي، واجعل الحياة زيادة لي في كل خير، واجعل الموت راحة لي من كل شر"
.
.
.
صكرت الباب متاع الشقة.. وحطت ايديها على وجهها بتعب وخوف
شعور بايخ مسيطر عليها... حاسة بذنب كبير... وقلبها وعقلها مش مطاوعينها على تصرفاتها
بس اللي كان كاسر ظهرها فعلاً هما خوتها الصغار اللي مالهمش ذنب في شي
شعور الجوع والصقع والعازة هيا اكثر وحدة تعرفهم ومجربتهم وماعمرها اتحب اتشوف او تعرف أن خوتها الصغار واحد منهم جيعان او قاعد في الصقع وهيا في يدها الحل وتمنعه عنهم

حتى لو الحل هذا بيجيب المشاكل ليها... ولكن عشان خطر خوتها وحتى بوها مستعدة تتحمل في نفسها

فتحت الوشاح وحولته بتعب.... وخشت لغرفة نومها... فتحت عباتها وحولتها... وهيا حاسة بلية خفيفة اسفل بطنها

مشت للحمام عشان تغسل وتتوضى لظهر... بس كان وقت دورتها... واللية اللي عندها مش بس سببها الخوف والتوتر

تنهدت وغسلت وغيرت ملابسها... ومشت بدير شي تشربه ساخن باش يريحها ويهدي الالم الدورة

دارت كباية يانسون... وخشت لسريرها.. اتكت واتصلت بقين تطمن عليها

ردت  :  نعم

أحلام  :  ها ياقلبي.. شن صار معاك توا؟

تنهدت براحة وحطت يدها على قلبها :  لا الحمدالله ياربي... لولد طلع اكويس ومافيه شي غير خدوش من طيحته.. خلوه ساعتين تحت الملاحظة احتياط.. وبعدين بيطلعوه

ابتسمت  :  باهي ماشالله... إن شالله يروح لاهله طيب ويريح قلبك عليه... تعرفي اقسم بالله برغم كل شي صار معايا اليوم ولكن قلبي كان عندك وانفكر فيك

يقين  :  نجك ليا ياقلبي والله صار فيا يوم مستحيل ننساه بكل.. عشت في رعب وقلبي قريب وقف من الخوف

أحلام  :  ربي كريم ولطف بحالك وحال العيل وهله

يقين  :  لا الحمدالله... وحتى بات العيل كان متفهم معانا.. وقال ديما يجري ويقص في الطريق ومش اول مرة تضربه سيارة

أحلام  :  ربي يحفظهم الصغار مش عارفة ليش ديما مستعجلين ويجروا من غير تركيز ياخية يذهبوا في شيرة الناس معاهم

تنهدت ومسحت جبينها  :  ربي يهديهم فعلاً... قريب ركبني السكر من الفجعة واقسم بالله

أحلام  :  بعيد السوء عليك

عقدت حواجبها  :  تعالي هنا بعد خطرها قوليلي... شن صار عندك أنتي... جاك عمي فرج

زمت فمها بزعل  :  اسكتي بالله عليك ماتخطريش عليا احداث اليوم... وحق ربي اهناك اللي بخته عطيب وماعنداش حظ بكل مهما دار.. ولكن مانقول غير الحمدالله وخلاص