أحلام يعرب (ليبية_منقولة)

الحلقة 52

#أحلام_يعرُب ((بين الحب والحرب))
#الحلقة_52((الفصل الخامس والعشرون العودة 2))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم أحفظنا من كل شر وسوء وغدر بلطفك يا خفي الألطاف نجنا مما نخاف، اللهم قنا شر الأسوأ. ولا تجعلنا محلاً للبلوى. اللهم أبعد عنا من لا يخافك وأبعد عنا شر كل دابة أنت آخذ بناصيتها»
.
.
.
يوم الاثنين  2 / 3 / 2015
وفي جامعة عمر المختار.. كانت أحلام واقفة مقابلة جمال ويقين
وهوا الوحيد اللي مبينة عليه ملامح الدهشة وعدم والفهم وسطهم
عكس يقين اللي كان عندها راس خيط من الموضوع

مرر يده بشعره وهز راسه  :  فهميني بس راهو واقسم بالله معادش فهمت شي.. شنو يعني كنتي متوقعة حاجة زي هك.. في واحد ايهدد فيك والا شني

أحلام تجاهلت جمال وتلفتت على يقين  :  اسمعي انا بنروح معاه وأنتي روحي للحوش وتوا نكلمك بعدين

يقين نقلت اعيونها بينهم وبعدين هزت راسها  :  تمام ياقلبي

قربت من احلام شدت ايديها  :  بنمشي لكن راهو عقلي عندك.. لما تفضي اتصلي بيا وطمنيني عليك ماتنسينيش الله يربحك

ابتسمت بدون نية  :  ماتخافيش عليا إن شالله مافيش حاجة اخرى انتهت

شافت يقين لعيون صاحبتها بقلق.. وبعدين تلفتت على جمال كان واقف وراهم... حرك اعيونه عليها... رفع حاجبه اشويا... ويقين حست باحراج بسبب الموقف اللي صار بينهم الصبح.. شدت شنطتها بين ايديها بقوة ومشت  :  بالسلامة

طلعت يقين واحلام طلعت وراها وبجنبها جمال... نزلوا من دروج الجامعة... يقين مشت لسيارتها.. واعيون جمال اتبع فيها... وبعدين فتح سيارته.. وركبوا مع بعضهم هوا واحلام ورجعوا للحوش

بس كانت في اعيون اتابع فيهم من بعيد... او بالاحرى اتابع في حركة جمال

تلفت عليها  :  ماتبيش تدوي شن في بالضبط

بحتت فيه  :  نبي نحكي اكيد ياجمال.. بس خلينا نوصلوا للحوش قبل عشان في حاجات لازم انوريهم ليك باش تفهم عليا وتستوعب الموضوع

حط يده على فمه ورفع حاجبه ويشوف لطريق... ويهز في رجله دليل انه متوتر ومش قادر يصبر لعند يعرف شن صار مع احلام وشن تبي تحكيله بالضبط
.
.
.
************«روايات أم ناصر»
.
.
.
وصلوا للحوش.. نزلت احلام.. وجمال نزل بعدها... خشوا للحوش
وعند المدخل تلفتت عليه  :  تعالى معايا فوق

خشت وجمال عاقد حواجبه ركب وراها طول.... وصلت لباب الشقة فتحت وخشت... وجمال قعد واقف عند الباب

غابت ثواني ورجعت معاها شنطة ثانية بلون مختلف  .. رفعتهم قدام جمال  :  الشنطتين هذين كان فيهم دواء غريب

قرن حواجبه بعدم فهم  :  دواء شنو.. ومن وين جبتيه؟!!

أحلام  :  مش أنا اللي جبته.. ومش عارفة منو وين جاء.. وحتى القيته بالصدفة اصلاً