أحلام يعرب (ليبية_منقولة)

الحلقة 46

#أحلام_يعرُب ((بين الحب والحرب))
#الحلقة_46((الفصل الثاني والعشرون إنتكاسة 3))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم ارحَمني  وَارحَم جَميعَ المُسلِمينَ، إنَّكَ عَلَى كُلِّ شَيءٍ قَدير.
اللَّهُمَّ استَجِب لَنا كَما استَجَبت لَهُم، بِرحمَتِكَ عَجِّل عَلَينا بِفَرَجٍ مِن عِندِكَ، بِجودِكَ وَكَرَمِكَ، وَارتِفاعِكَ في عُلُوِّ سَمائِكَ، يا أرحَمَ الراحمين»
.
.
.
الدموع غطت جميع الوجوه
الصغار قبل الكبار
عبدالمعز وعبد المهيمن يبكوا بحذا أمهم اللي كانت ضامتهم وتبكي بحرقة على خوها
بجنبها عروبة شدات فيها بيسان وبسنت ويرعشوا من الخوف والثلاثة يبكوا بفزع واعيونهم مليانة دموع
هناء واقفة وفي حضنها أحمد يبكي مخلوع من صوت بكاهم وتهز بيه عشان يسكت
أما أحلام مقمعزة بروحها وضامة نفسها وتبكي.. وتشوف لفطيمة اللي كانت تموي وتبكي بالعبرة على كبدها

رفعت ايديها بحرة ومسحت وجهها ومشت بيهم للخلف لعند طاحت محرمتها ونزلتهم على افاخذها بتحسيف  :  ياربي غير لمني خليتني ياولدي لمني... كيف بنديروا من دونك ياحبيبي

غمض اعيونه وهوا واقف وتلفت على امه ويحكي ويحرك في ايديه  :  يأم بالله عليك بالله عليك معادش تقولي هكي.. تي خيرك تتفاولي عليه الولد مازال حي ومحتاج دعواتكم مش هكي خيركم الزفت

فطيمة رفعت يدها وتحرك فيها على الموجودين  :  ربي ينجيه ويحافظه... لكن أني خايفة عليه هلبا.. منو بينا كان يعرب صار فيه شي... وهادم منو بيهم لايتام كان يعرب فارقهم وغاب عليهم

هناء تبكي وتلفتت على بناتها بخوف وضمت أحمد زين

فطيمة بفزع  :  الحوش هادا ماينفعش من غيره... يعرب كان عمود الحوش هادا  وقايم بيه وبيكم كلكم ولو صار فيه شي معادش بتشبحوا خير من بعده

أحلام تسمع في كلام عمتها ودموعها تنزل زي الجمر وتحرق في خدودها.. وتفكر بفزع شن ممكن ايصير فيها لو فارقها يعرب فعلاً 💔

نفخ بعصبية وخوف ولوح بيده :  اوووف منكم وخلاص.. الواحد معادش عرف شن يقوللكم ويفهكم... اني ماشي للمستشفى وقاعد غادي

فطيمة تبي تصبي  :  ارجى خودني معاك تربح.. الله يرضى عليك نبي نشوفه والله مانقدر نصبر في الحوش

زم فمه وتلفت على امه بيأس  :  مانقدرش يأم والله مانقدر.. المستشفى زاحم وبالبوني والزيارة ممنوعة.. واصلاً مشيتك زي بلاش ماتقدريش اتخشيله بكل الليلة... خليك توا وأني ماشي وقاعد بحداه ومش مروح لعند نطمن عليه.. وبادن الله بنجيك وانجيب لبشارة اللي تفرح قلبك معاي

قربت منه تبكي  :  باهي خليني نمشي معاك وانشوفه حتى دقيقة تربح اوليدي راهو قلبي قريب يوقف عليه من الخوف

تنهد وقرب منها شد ايديها  :  يأم وتربة بوي ورحمة محمد ريحيني وخليك هنايا لعند يهدا الوضع بس ونشوفوا شن ايصير مع يعرب.. العناية في الدور الفوقي وأنتي ماتقدريش تركبي فوق وحتى لو قدرتي تركبي مش حاتستفادي من شي  لانهم مصكرين القسم وممنوع اي حد غير الدكاترة يخشوله.. وبتقعدي لشحط غادي وتتبهدلي وخلاص