أحلام يعرب (ليبية_منقولة)

الحلقة 100

#أحلام_يعرُب ((بين الحب والحرب))
#الحلقة_100((الفصل التاسع والأربعون_ ذات يومٍ أتٍ))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«ربّ إني أسألك أن تريح قلبي وفكري، وأن تصرف عنّي شتات العقل والتفكير، ربّ إنّ في قلبي أمورًا لا يعرفها سواك فحققها لي يا رحيم، ربّ كن معي في أصعب الظروف وأرني عجائب قدرتك في أصعب الأيام... اللهم إني أسألك الصبر عند القضاء، ومنازل الشهداء، وعيش السعداء، والنصر على الأعداء، ومرافقة الأنبياء، يا رب العالمين»
.
.
.
مقمعزة على طرف السرير.. وتشوفله بحب وهوا يلبس... ساوى تيشرته وقرب من المراية خذا المشط وقعد يمشط في شعره

اخر شي ساواه بيديه وبعدين بخ عطر ولقط مفتاحه وتليفونه

وقفت وقربت منه  :  مطول

يعرب  :  لامش معطل... بنمشي انمر على حوش خالي ونشوف أمي وبعدين بنجيك طول

أحلام  :  بتكلموها عشان موضوع سيف

تنهد ويهذب في لحيته  :  اي... اليوم خوالي بيتكلموا معاها ويحاولوا يقنعوها وبنكون حاضر معاهم

قربت منه وتمسح على كتفه  :  إن شالله خير  ... ربي يهديها وتوافق

يعرب  :  إن شاء الله... المهم انتي خليك جاهزة مع الظهر نخطم عليك ونمشوا لحوش خالك

ابتسمت بود  :  باذن الله... ربي يعطيك الصحة

طلع وأحلام تمشي وراه لعند باب الشقة... وقف يلبس في رجله وبعدين فتح الباب وشافلها قبل يطلع  :  صكري اكويس وماتفتحيش لاي حد مهما كان

ابتسمت وقربت من الباب  :  إن شاء الله... في أمان الله رد بالك من روحك

شافلها وابتسم وبعدين نزل واحلام تنهدت وصكرت الباب ومشت اتضم في حوسة الفطور
.
.
.
************«روايات أم ناصر»
.
.
.
في حوش سمعة بن ساسي... كانوا خلاص الضيوف كلهم روحوا للحوشهم ماعادا عمتهم واولادها... الخيم وكل مظاهر الفرح حولت والوضع شبه رجع طبيعي في الحوش

فطيمة اليوم فطرت مع اخواتها وخوته وقمعزت تهدرز معاهم في المربوعة

جمال وصدام كانوا معاها... اما سيف كان واخذ وجهه برا مع كريم وقاعد على اعصابه ومتوتر... من زمان يستنى في اليوم هذا وخايف من موقف امه ورفضها

وصل يعرب غادي خش سلم عليهم وكانوا في البداية يهدرزوا عادي وتكلموا عن عزومة عثمان ليهم... وبعدين سمعة فتح الموضوع متاع سيف مع اخته

وهي شي طبيعي كانت رافضة وعصبت شوي  :  أني عارفة انكم تبوا توقف مع سيف.؟ لكن الموضوع هادا اني صكرته ومعادش نبي نتكلم فيه

يعرب  :  وعلاش يما بس... الولد يبي البنت ومصكر راسه عليها... والبنت اكويسة ومافيها اي عيب