أحلام يعرب (ليبية_منقولة)

الحلقة 40

#أحلام_يعرُب ((بين الحب والحرب))
#الحلقة_40((الفصل الواحد والعشرون سقوط جماعي _فبراير الحزين))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم اقسم لنا من خشيتك ما تحُول به وبين معصيتك، ومن طاعتك ما تُبلّغنا به جنّتك، ومن اليقين ما تُهوّن به علينا مصائب الدّنيا»
.
.
.
الخميس  5  / 2  / 2015  الظهر ⬇️

عتيقة اتصلي في الظهر هيا وفطيمة في الصالة
وبنتها متكية على سريرها في الدار.. وسارحة في افكارها

افكارها المشوشة واللي تضغط عليها وهيا اساساً متوترة وعندها شعور بالخوف من كل شي

تنهدت وحطت يدها على خدها  :  هادي ماباش ياتر فيها شي اللصقة.. وهيا كل مصيبة انحطها فيها نلقاها طالعة منها ولا كأنه صار شي معاها

نفخت بملل  :  اوووفه تي حتى الدواء اللي حطيتولها ماغير فيها شي ولا صارلها شي هالزفتة... والا زعما مش حامل اصلاً

قلبت شفتها  :  اي احتمال مش حامل بالاساس والا كان هادا راهو قالت ليعرب وللعيلة كلها باش اتزيد اتبت روحها اكتر

رفعت حاجبها  :  اي اكيد مش حامل.. لو حامل راهو يعرب عنده العلم ورانا كلنا سمعنا بيه.. هيا ملصقة بالغصب وكان عندها حمل راه استغلت الشي هادا لروحها

زمت فمها وتنهدت  :  هوا هاداك مش داس حبه ليها قدامنا كلنا وديما واقف في صفها ولو يعرفها حامل راهو شالها فوق رأسه شيل وماخلاها اتقيم شي معانا

قمعزت وساوت قعدتها  :  أني لازم نتصرف بروحي وبسرعة قبل مايعرب يعرف اي شي داسته عنه... هوا اصلاً سكت الفترة هادي على كل شي عرفه عني لاني نافس وبس.. واكيد غير يراجي في ولده يطلع وبعد انشد حيلي مليون في المية بيحاسبني على كل شي درته في احلام وفيه

تنهدت  :  معادش قدامي غير جازية وهاديك لعزوزة اللي خبرتنا عنها... اي عادي شن فيها.. ماهو راوية الباين مشتلها وقاعد واضح حال صدام معاها كيف تغير للافضل وحتى من الحمل طلعت حامل بسرعة

هزت راسها بحزم  :  اي معادش في قدامي غير هكي وأنا بالاساس مانبيش شي صعب.. نبيها بس اتخلي يعرب يحبني ويهبل عليا ومعادش يشبح لاي مراة تانية غيري

انقطع حبل افكارها على صوت عتيقة خشت عليها  بعد كملت صلاة   :  اللهم لك الحمد والشكر على العافية والصحة.. ربي يدوم علينا صحيحتنا ويبعد علينا الهم والغم

قمعزت بتعب  :  اااه ياركابي... وتمسح في وجهها بيديها

رفعت راسها لروشن  :  ماشالله ماشالله.. الله يبارك.. اللهم اعطينا خيرها واكفينا شرها يارب

عقدت حواجبها  :  شن قلتي يأم

ابتسمت عتيقة واشرت بيدها  :  نتكلم عن المطرة ماشالله من بكري ماوقفتش صلاة النبي ربي يزيد ويبارك