#أحلام_يعرُب ((بين الحب والحرب))
#الحلقة_84((الفصل الرابع والاربعون _جبر ضرر))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم أرحني بعد التعب، وأسعدني بعد الحزن وكافئني بعد الصبر اللهم إني أعيذ قلبّي من وحشة الدنيا وكدرها اللهم ازح من قلبي كل خوف يسّكن وكل ضعف يكسرني وكل أمر يبكيني قويني يا الله ويسر أمري وأفتح لي أبواب الخير يا الله»
.
.
.
ركن سيارته.. طفى محركها... لقط تليفونه وفتح الباب ونزل... شاف ناحية سيارة صاحبه موقفة برا قدامه... تنهد واتجه لباب الحوش...
كان معورج دق ودفه.. وخش وهوا يكح : السلام عليكم
رفع اعيونه وشاف للمهدي.. والاخير تكلم من مكانه : وعليكم السلام... تعال يعرب خش
تقدم نحو الدار.. وقف بالباب يحول من رجله : شن اخباركم
عبيدة : الحمدالله بخير... شن الجو
قرب وقمعز مقابله : تمام والله... عطلت عليكم
عبيدة مبتسم : لاحتى انا كيف جيت توا
يعرب : مافيش جديد من الجماعة
عبيدة : بعد امس معاش حكيت مع حد
بلل شفته وسحب اوراق من قدام عبيدة : اكيد يراجوا في باقي الاسماء... خلينا نبدوا طول ونبعتولهم
قرب منه تربع وبدأ يساعد فيه... والمهدي تنهد وصبا : نمشي انطيب قهوة ونجيكم
رفع اعيونه فيه مبتسم : يعطيك الصحة
طلع المهدي... ويعرب نزل اعيونه كان عبيدة يشوفله... حس بتوتر... طبس على الاوراق... ويعرب تنهد وبدأ يشتغل معاه
.
.
.
************«روايات أم ناصر»
.
.
.
في حوش الحواتي... كان سيف مع العمال يفكوا في غرف النوم... دار نجمة فكوها ونزلوها تحت للكنتر... ودار أحلام فكوها ونقلوها لشقة يعرب
تحت كانت العيلة مجتمعة ويشربوا في قهوة العشية... وأحلام من امس ومش فاهمة شي ولا قادرة تسأل شن قصة الاثاث اللي قاعد يتبدل؟!!
كح ودخل عليهم وفي يده سفرة القهوة... نزلها قدامهم
فطيمة : كملوا يما خلاص؟
خذا مقروضة من سفرة البنات كلاها في لقمة وحدة وشاف لامه : خلاص معاش في هلبا... يشطبوا وطالعين
فطيمة : نهاري راك تغص ياولد... بالشويا
ابتسم سيف وطلع... واحلام تلفتت على صوت هناء تكلم فيها : هكي افضل... شقة يعرب واسعة وتامة بترتاحي فيها اكتر
عقدت حواجبها تحاول تستوعب كلامها... وخديجة كملت على كلام هناء : اي هكي افضل... حتى بعد تجيبي بسلامتك تكون شقتك جاهزة وكل شي من ذوقك أنتي
وجملة عروبة الاخيرة حطت النقاط على الحروف لما وجهت كلامها لاحلام : بصراحة عنده حق يعرب لما فكر يغير اتات الشقة... مش معقولة بتجي على اتات مراة تانية... لازم تمشي وتختاري بروحك وتجيبي على ذوقك... والا شن رايك أنتي
أنت تقرأ
أحلام يعرب (ليبية_منقولة)
Acción﮼أحلام،يعرب((بين الحب وااحرب)) للكاتبة: ﮼أم،ناصر🤎. 🔥قيد الكتابة🔥.
