أحلام يعرب (ليبية_منقولة)

الحلقة 102

#أحلام_يعرُب ((بين الحب والحرب))
#الحلقة_102((الفصل التاسع والأربعون_ذات يومٍ أتٍ 3))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم أعطنا أمل الرجاء وفوق الأمل يا من هو بفضله لفضله نسأل نسألك اللهم العجل الهي الإجابة يا من أجاب نوحاً في قومه ويا من نصر إبراهيم على أعدائه ويا من رد يوسف على يعقوب ويا من كشف الضر عن أيوب بأن تجيب لنا هذه الدعوات وأن تتقبل منا ما به دعوناك وأن تعطنا ما به سألناك، انجز لنا وعدك الذي وعدته لعبادك المؤمنين النصر والظفر والفتح المبين» (لا إله إلا أنت سبحانك أني كنت من الظالمين)
.
.
.
مقمعزات قبال بعضهم والاثنين يبكوا وقلوبهم نار على اولادهم

مسرة وفطيمة... البنت وعمتها... كانوا في حالة اشر من بعض وهما مش عارفين اي شي عن صدام ومحمد

قلوبهم في حالة... ومسرة بالذات كانت بطير من النار اللي في صدرها... وقعدت تتخيل وتفكر في افكار غريبة وخايفة وليد يحرمها من ولدها طول العمر

ومع كل فكرة سوداوية تخطر عليها... تزيد تبكي وتعيط   :  نبي ولدي جيبوهولي... ياربي.. ياربي... بالله عليكم نبي ولدي... ورحمة ولديكم نبي ولدي يأمي قولي لبوي ايجيبه

عويشة تبكي وتهدي في بنتها وقلبها متقطع عليها... وفطيمة تبكي وكل ماتشوف مسرة تعيط.. تزيد تبكي على ولدها اللي ماحد يعرف وين اراضيه
.
.
برا كان سمعة وصلاح مع نضال... اللي قاعد يحاول يبحث عنهم في كل مكان

نضال  :  لو مازال في طرابلس... بيطيح بين ايدين ماعنداش وين يمشي ماتخافش

سمعة بتوتر  :  كيف يعني... قصدك مرات يطلع من طرابلس

زم فمه بأسف  :  والله كل شي متوقع... احني توا انقولوا إن شاءالله غير يقعد في ليبيا ومايهربش برا

زاد خوفه  :  غبارة كان خطف الولد وسافر بيه برا البلاد

حط يده على كتفه  :  وسع بالك ياحاج... باذن الله بندير كل جهدي باش نلقاه ونرجعه ليكم... قدمت فيه بلغ وحطيت اسمه على نقاط التفتيش والحدود... وإن شاءالله بنطبوه قبل يهرب

سمعة بحزن  :  إن شاءالله ياولدي... الصغير مريض وعنده كسر  وامه في حالة وخايفة عليه.... الله ينتقم منك ياملعون هديت حيلنا الله يهد حيلك

مع وصول سيارة موسى أخ سمعة... نزل وسلم عليهم... وقعدوا يهدرزوا مع بعضهم... ومن خلال حديثهم.. قدر نضال يفهم أن نجمة أنتحرت وأنهم كانوا في عزاها
.
.
.
************«روايات أم ناصر»
.
.
.
في الشرق ماحد عنده العلم بشي... سمعة قاللهم مانبيش كلمة تطلع منكم لعند نشوفوا شن يصير معانا قبل

احلام والبنات بدوا في حملة نظافة للحوش والمطبخ قبل رمضان زي العادة

وفي الوقت هذا... كان سيف مجهز حملة خيرية للشهر رمضان للناس المحتاجة... ومشى بروحه يسلم فيهم بضاعتهم وفلوسهم زي كل سنة