أحلام يعرب (ليبية_منقولة)

الحلقة 79

#أحلام_يعرُب ((بين الحب والحرب))
#الحلقة_79 (( الفصل الواحد والاربعون أمر واقع 2))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«لمن أدعو وأنت الحي القيوم الذي لا تغفل ولا تنام.. أسألك بكل اسم هو لك أن ترزقني السعادة والصبر والسكينة التي لا تنتهي أبدًا، وأن تعاونني على أداء طاعاتك وعباداتك على الوجه الذي يرضيك عني يا ذا الجلال والإكرام والطول والإنعام»
.
.
.
غاب صوته وللحظه حست انها كانت تحكي مع نفسها
تكلمت بعقدة حواجب  :  يعرب... الو تسمع فيا

حط يده مقبوضة على فمه وتنحنح  :  اي نسمع فيك.. معاك

أحلام  :  أنا قلت كلام واجد وحاولت نشرحلك وجهة نظري وموقفي وإن شالله اتكون فهمتني

بلل شفافه  :  أحلام اني فاهم عليك ومقدر موقفك... لكن علاش حاس أنك سلمتي بكري.. ورضيتي طول ومافيش اي مقاومة او حتى محاولة منك... قصدي أني انحاول اندير كل شي نقدر عليه لكن نبيك توقفي معاي اشوي

ضمت شفافها لداخل وتحرك في صبعها على البطانية  :  باهي انا معاك ومستعدة نوعدك اني نساعدك ونوقف معاك ونقمعز مع بوي وتكلم معاه ونحاول نقنعه على الاقل يخليني نروح لحوشي معاك لما يسافر لمصر ولما يروح ساهل... لكن نبيك توعدني حتى انتا

رفع حاجبه وضيق اعيونه  :  بشني؟!

أحلام  :  نبيك توعدني لو حكيت مع بوي وحاولت نقنعه ونغير رايه وفشلت معاش تفرض عليا شي وتصبر عليا لعند يسافر ويتعالج ويقعد اكويس وبعدين كل شي ساهل وربي يفرجها من عنده

يعرب  :  احلام اني مانفرضش عليك في شي مش من حقي.. أنتي مرتي والطبيعي والمفروض انك اتكوني في حوشي لو بوك مهناش... علاش نساير في بوك وندير في شي اني مش مقتنع بيه

أحلام  :  وأنا معاك وقتلك عندك حق من الاول... وبعدين انتا ليش تحكم على الموضوع من قبل يصير... خليني نحكي معاه ونشوف رده وبعدين ساهل

فرك جبينه  :  ماهو لاني متوقع رده ومتاكد بيرفض تولي لحوشك معايا

أحلام بترجي  :  باهي ماتقدرش تصبر عليا اشوية...أنا عارفة ان الشي هذا غلط ومش طبيعي...لكن يعرب راهو والله تعبت وقلبي مقسوم بينكم ومعاش عرفت انرضي من ونزعل من... وأنا والله وربي شاهد عليا مانبيش نزعلك مني ولا تاخذ على خاطرك ولكن كل ضغط منك عليا في مقابل رفض بوي وتصكير راسه وهوا مريض هكي وتعبان.. مش في صالحنا ومش في صالحك أنتا بالذات

عض شفته اللي تحت... ويحرك في يده على رقبته من الخلف  :  قصدك لو قعدتي في خيار بين انك تنفصلي عني وبين رضا بوك عليك.. بتختاري رضا بوك وتنفصلي عني عادي

بلعت ريقها وغمضت اعيونها  :  لا مش عادي... وإن شالله المشكلة ماتوصلش بينا للمرحلة هذه... هذا ليش انقولك اصبر عليا اشوي وماتضغطش عليا وتحاصرني لاني والله مافي يدي شي وقاعدة انحاول اندير كل شي عشان مانخسركش وحياتنا تستمر مع بعضنا