أحلام يعرب (ليبية_منقولة)

الحلقة 67

#أحلام_يعرُب ((بين الحب والحرب))
#الحلقة_67((الفصل الرابع والثلاثون رصاصة أخترقت قلبي))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللّهم اغفِر لي خَطِيئَتي وجهْلي، وإسرَافي في أَمري، وما أَنْتَ أَعلَم بِهِ مِنِّي، اللّهم اغفِرْ لي جِدِّي وَهَزْلي، وَخَطَئي وَعمْدِي، وَكلُّ ذلِكَ عِنْدِي، اللّهُم اغْفِرْ لي مَا قَدَّمْتُ وَمَا أَخرْتُ، وَما أَسْررت وَمَا أَعلَنت، وَمَا أَنتَ أَعلَمُ بِهِ مِنِّي، أَنت المقَدّم، وَأَنتَ المُؤخر، وَأَنْتَ عَلى كلِّ شَيْءٍ قَدِيرٌ»
.
.
.
لا أنت بعيد فأنتظرك..
ولا أنت قريب فألقاك،
ولا أنت لي فيطمئن قلبي..
ولا أنا محرومٌ منك لأنساك..
« أنت في منتصف كل شيء»
.
.
حاطة رأسها على الروشن وتسمع في عمها يهدرز  :  نحنا والله مانجيبوا منه علم انه في حوشه لعند اتصل بينا جاركم علي وقالها لنا

رشفت خشمها  :  من أمتى في حوشه ياعمي

اجويدة «اختصار للاسم»  :  تقريباً ليه يومين هكي

عقدت حواجبها  :  وليش ماحد كلمني ولا قالي

اجويدة  :  ماهو ماعرفناش كيف نوصلوا فيك لاعندنا رقمك ولا عنوان حوشك وبعدين فتشت في تليفون بوك والقيت رقمك واتصلت بيك

مسحت دموعها وسألت بتردد  :  باهي باتي شن وضعه بالضبط مريض بكل والا شن حالته

زم فمه ورفع حواجبه  :  نشهد بالله حالته بالهون بكل... إن شالله خير وخلاص

عضت فمها وغمضت أعيونها ودموعها فاضت بحرقة.. وقعدت تردد بصوت خافت  :  يارب.. يارب.. يارب

تليفونها بدأ يرن.. فتحت شنطة اليد وطلعاته.. شافت لشاشة... حست بخوف في الاول.. ولكن غضبها والجرح في قلبها كانوا اكبر... حطت تليفونها على الصامت ورجعاته لشنطتها

تلفت عليها  :  من يتصل بيك

هزت راسها  وصكرت الشنطة  :  مش مهم... توا نشوفه بعدين

اجويدة  :  الحوش مصقع بكل في الليل.. مافيش دفاية والا شنو في حوشكم

احلام  :  كانوا فيه دفايات.. بس مش عارفة جازية وين دستهم.. ساهل توا نشوفهم بعد نوصل غادي

أجويدة  :  ننقانها طلعت ولية عطيبة لعند التراب... أيام وهو بصحته حطاته تحت بطها وماتبيش حد يتواصل معاه وقاطعته حتى عن خوته.. واليوم كي طاحت بيه وخانته صحته وحلت فيه وخلاته بروحه وخذت وجهها

وجعها الكلام عن بوها... بس ماتقدرش اترد او دافع عنه لانه كلام حقيقي فعلاً... زمطت عبرتها وسكتت وتراجي في الطريق امتى تكمل باش تشوف بوها وتطمن عليه... وقعدت تحس بتليفونها يضرب في شنطتها وماردتش عليه تعرف انه راجلها يتصل بيها

والاخير بعد فصل الخط لثاني مرة.. زفر بعصبية ونزل التليفون

عقدت حواجبها  :  ماردتش عليك