أحلام يعرب (ليبية_منقولة)

الحلقة 48

#أحلام_يعرُب ((بين الحب والحرب))
#الحلقة_48((الفصل الثالث والعشرون حوائي 2))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم يا موتى أنبياءك الصبر، ويا من جعل لتحمل البلاء أجر، ويا من بيده تدبير كل أمر، اكتب لي النجاة من كل عسر، واجعل لي من فراق أحبتي شفاء ويسر»
.
.
.
رفعت التليفون بيد ترعش.. كان عندها شعور بالخوف الشديد
مش عارفة شن يبي منها بالضبط
شن اللي مخوفها منه وليش خايفة تسمع صوته
هل هي العادة والتعود...هل هي كمية الالم والمعاناة اللي كانت عيشتهم معاه طول السنوات اللي فاتت
في الغالب لما البنت اتشوف رقم بوها يتصل بيها تفرح وتحس بالقوة والانتماء
اتحس بأن ليها ظهر وسند ومش بروحها في الدنيا
وخاصةً لو هي مكسورة وضعيفة ومحتاجة حضنه.. محتاجة ليده تشدها لفوق وتساعدها وتسندها باش تقدر اتكمل الطريق بكل قوتها

بس أحلام للاسف اليد اللي المفروض تنمدلها بالمساعدة.. هي نفسها اليد اللي تكسر فيها وتزيد في ضعفها وخيبة املها

انفتح الخط بينهم.. والمجهول اللي كانت خايفة منه.. اصبح حقيقة وهي تسمع في صوت فرج الحاد  :  الو.. أحلام

بلعت ريقها وردت بصوت يرجف  :  نعم ياباتي

فرج  :  الحمدالله على السلامة ياحنة.. عايشة يعني وماعند حالك سوء

قمعزت وشدت طرف الصالون بيدها ترعش  :  الحمدالله.. شن اخباركم وكيف حال خوتي

تكلم بغضب وصوت مرتفع  :  وعندك عين تسألي علينا بعد اللي داره فينا راجلك ياكلبة.. لكن والله نعطبه على خشمك وخشمه مغير انشوفكم

غمضت اعيونها وبدت ترجف  :  غير اسمعني بس.. يعرب والله العظيم ماشوره شي وراهو ااا...

قاطعها بعصبية  :  كيف ماشوره شي وهو اللي مبلغ فينا... ماهو كله من تحت راسه وراسك... نحنا على اخر الوقت يقعدوا يكركروا فينا لمراكز الشرطة والامن الداخلي... هذي عقابها يابنت اوريدة.. تخلي بوك يركرك في الحبوس وتفضحي بينا وسط المنطقة لكن والله انوريك عليها ياوسخة

دموعها نزلوا وانفجعت... تكلمت بخوف  :  والله مش منا والله.. غير اسمعني بس انفهمك... يعرب كان يبي يحل القصة بينه وبينهم بالهدوء ومن غير ماحد يعلم.. لكن في واحد مقدم بلاغ علي صبايا ثانيات معاكم والامن سبقه على المكان غادي

فرج  :  اااها الامن سبقه غادي صار.. علي من تكذبي انتي على من اها... نا بوك ونعرفك اكويس ونعرف انك ماتقبلي جازية بكل ولا تبيلها الخير من قديم الزمان

أحلام بحدة  :  اي خير وهي ماشية تبي تسحرني وتسحر راجلي.. جازية مادارتش فيا اشويا من اول ماعرفتها وحتى بعد تزوجت مازلت اتخرب في حياتي ومش مريحتني

تكلم بعصبية  :  صكري فمك ياكلبة.. السحر ماتعرفيه الا أنتي وامك.. وراجلك اللي مكبرة راسك بيه والله انخليه يطلقك ياحيوانة ونشعفه علي داره فينا كله