أحلام يعرب (ليبية_منقولة)

الحلقة 51

#أحلام_يعرُب ((بين الحب والحرب))
#الحلقة_51(( الفصل الخامس والعشرون _العودة 1))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم لا تجعل ابتلائي في جسدي، ولا في مالي، ولا في أهَلْي، وسهّل علي ما استثقلته نفسي.
اللهم إني توكلت عليك فأعنّي، ووفقني، واجبر خاطري، جبرا أنت وليّه»
.
.
.
مقمعزة على الصالون وضامة رجليها لصدرها ولف ايديها حول رجليها والدمعة واقفة على جفونها

شافتلها ثواني وقلبها موجوع عليها وبعدين تنهدت وتكلمت   :  ماعليش ياحلوما.. حصل خير حبيبتي نوضي اغسلي وجهك واستهدي بالله المشاكل ديما اتصير وفي كل مكان.. مافيش حد عايش من غير مشاكل

رشفت خشمها ومسحت ادموعها  :  نعرف والله.. بس انا تعبت واجد وفي مشاكل مش وقتهن بكل.. قصدي ابروحي حايسة وقاعدة انفكر في يعرب وخايفة عليه مش ناقصني مشاكل توا

ابتسمت بود  :  غير بوك كان متغشش اشويا وحرقة الدم جت فيك.. تعرفي الناس توا من ضيق الحال والهموم وحال البلاد ماحد متحمل حد والرجالة بالذات خلوقهم في شيشة مساكين

احلام شافتلها وتكلمت بحزن  :  ماقلتش شي.. وهذا بوي مهما دار ماعندي مانقول غير الله يسامحه ويهديه

هناء بتتكلم بس سمعت صوت جمال كح ويدور عليهم

نادت من مكانها  :  هني ياجمال.. تعالى

تنحنح من بعيد وخش عليهم في دار الضيوف  :  سلام

هناء ردت  :  اهلين

اما احلام رفعت اعيونها فيه وهيا تتسأل شن صار معاه  :  باتي وين؟

خش وقف بجنب طاولة التلفزيون واتكى على طرفها  :  بوك مشي ماتخافيش

بلعت ريقها  :  عدى متعصب واجد صاح

مسح وجهه بيده  :  اي.. بس ماتخافيش توا لما بيقعد على كراسي عقله بيهدا ويعرف انه تسرع معاك وينسى

ساوت وشاحها وهي مش مقتنع بكلام جمال  :  إن شالله

تكلم بتوتر وهوا يلعب بمفتاحه على الطاولة  :  اسمعي بالله عليك ماتزعليش مني لاني كشخت عليك قدام بوك بس معادش عرفت شن بندير غير هكي

ابتسمت والدمعة في عيونها  :  مش مشكلة عادي.. فاهمة عليك.. انا بس ماكنتش نبي اي موقف بينك وبين باتي لانه عصبي ومرات يقولك اي شي عادي

جمال  :  لااا ماصارش بينا شي اطمني.. وبعدين اني ماقدرتش نسكت ونخليك تمشي معاه ويعرب موصيني عليك اكتر شي .. تعرفيه بيروح يفتح فمه عليا

انحرجت وطبست اتشد في طرف وشاحها  :  حصل خير مش مشكلة

رفعت وجهها وسألت بتردد  :  شن قالك قبل يمشي

جمال  :  ماقال شي.. اني اساساً معادش تكلمت معاه بعد خشيتي وهوا طلع والع ويعارك..  بس عادي فوتي ومادوريش شي