أحلام يعرب (ليبية_منقولة)

الحلقة 41

#أحلام_يعرُب ((بين الحب والحرب))
#الحلقة_41((الفصل الواحد والعشرون سقوط جماعي_فبراير الحزين))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم عليك توكلت فارزقني واكفني، وبك لذت فنجني مما يؤذيني، أنت حسبي ونعم الوكيل، اللهم أرضني بقضائك، وقنعني بعطائك، واجعلني من أوليائك»
.
.
.
الجمعة 6 / 2 / 2015 
بعد صلاة الجنازة.. والدفن لخالد على الظهر
بعد الغدى واللي حضروه اعمامهم والجيران.. كان يعرب مقمعز مع جمال وصدام في المربوعة بعد طلعوا الضيوف
.
.
طفى السبسي متاعه في الطافية.. ومسح وجهه وتنهد.. وبعدين شاف لخوه مقمعز بعيد عنهم اشوي ويقلب في قنوات التليفزيون

مال ناحية خوه الاخر وتكلم بالشويا  :  حال خوك مش عاجبني.. لازم نشقوا بيه بسرعة

جمال  :  اي حتى اني ملاحظ.. ديما سارح وعايش في عالم بروحه  والا طايح ورقد وخلاص

يعرب  :  كلمت الشيخ وقالي توا انشوفه.. لكن مايفضاش الا السبت

عقد حواجبه  :  غدوة قصدك؟!

هز راسه  :  اي بأذن الله... لكن يبيه في مكان فاضي وبعيد عن الدوشة وانتا شايف وضع الحوش من امس واحد خاش و واحد طالع ومافيش فضوة بكل

جمال ساوى قعدته  :  كيف بدير باه

يعرب  :  قبل ناوي ناخده بروحي للاستراحة ونتم معاه غادي لعند يشوفه الشيخ ويقرر لو عنده سحر او لا.. بس هاك شايف الوضع بروحك ومانقدرش انخلي الحوش توا وكل اشويا في ناس جاية تسأل وتعزي

تنهد وشاف لخوه وبعدين رجع وشاف ليعرب  :  امالا شن بدير

يعرب  :  انتا غدوة الصبح بتاخده وتمشي للاستراحة وبدير احسابك بتقعد غادي معاه يوم والا اتنين لعند انشوفوا وضعه كيف بالزبط

نفخ وفرك رقبته  :  اي مش مشكلة.. قبل عندي خدمة اليومين هادم بس عادي توا نوخرها كم يوم.. ساهل مش قصة

عقد حواجبه  :  خدمة شني.... إن شالله خير

حرك اعيونه وتكلم بتوتر  :  اااا ماهو خديت شقة وقاعد انجهز فيها

يعرب  :  شريتها امالا؟!

هز رأسه  :  اي.. قلت نبدا من توا قبل يقرب العرس ونلقى روحي في زحمة وقصص ومعاش نعرف على شنو انركز

يعرب  :  مبارك إن شالله وين خديتها

جمال اشر بيده  :  اهنايا في العمارات الجدد في مدخل لبلاد... خديتها عظم وقلت انكملها بالمهل وعلى ذوقي

يعرب  :  عتبة خير إن شالله.. ربي يهنيك بيها

جمال  :  تسلم.. إن شالله

عقد حواجبه  :  وعلاش مازال تروح على فندق.. ليش ماتقعد في حوشنا وتوفر عليك المصاريف الزايدة