عثرات

٭ العَـثره الاولـى ٭

2023/6/27
٭
" هـديه الأسـدي "
٭
٭
اعرف تمامًا معنى ان يكون المرء وحيدًا، لا يعني انه
سيكون في غرفة معتِمةٍ ولا يتحدث الى احدٍ، بل انه غريبًا لا ينتمي الى محيطه الذي هو فيه.

~~~~~~~~~~~~~~~~★~~~~~~~~~~~~~~~

مسحت وجهي بعد نوبة بكاء ماعرف شگد استغرقت من وقتي ، تمتمت لنفسي بكلمات احاول اقوي نفسي والملم شتات روحي الي تبعثرت بسبب العثرات الي واجهتها من ذاك ليوم المشؤم الي خسرت نفسي وعقلي وكل شي يوحي انو انا انتمي للبشر .

دلهم : انتِ قوية محد راح يكسرج كلشي حـ ينتهي وراح يصير سوالف لتخافين الله وياچ الله ويا المظلومين

نفضت ملابسي وتحركت من على الارض اخذت نظره خاطفة على غرفتي او ممكن نگول سجني الي ماگدر اخلص منه لان ماعندي غير هذا سجن ، غرفه صغيره كنتور متهالك بس مو اكثر من روحي احد الابواب مكسوره والباب الخ حتى لو ينسد يبقى يكشف عن الي موجود بداخلة ، گلوب ضوه مالتة خااافت اصفر ، فراش مليان تراب وكل ما اغسلة تحسه يتوصخ اكثر ، حايط متأكل من الرطوبة باقيلة شويه ويوگع ويكسر كلشي جوا ومحتمي بي .

عدلت حجابي وملابسي وطلعت من الغرفة الي موجوده بداخل حديقة چبييره كلش وتحتوي بداخلة انواع من اشجار الفواكة والسدر الي ريحتهاا ترد الروح ، مشيت متجه لذاك البيت الي اقل مايقال عنه انو قصر واجهة البيت ملكية النافوره الي تتوسط حديقتة والطيور تتراقص على صوت المي النازل من النافوره ،اشعة الشمس وخيوطها الذهبية ، نسمة الهوا الهادئه الي تلفح بوجهي شي يسر الاعين  .
توجهت للمطبخ اشوف شغلي المعتاد ، بلشت احضر بالريوگ ، كملت كلشي ورتبتة على طاولة الطعام البيض والزعتر ، الجبن ،الزيتون ، الطماطه المحروگة ، الچليفرايي ، والجايي واكيد ماننسة الخبز الحار ، اخذت نظره ثانيه على طاولة اتأكد منسيت شي .

تحركت حتى اگعدهم يتريگون تحركت على پايات الدرج ، توجهة اول شي لغرفة الشيخ وزوجته دگيت الباب

زوجة الشيخ (سهاد) : نعم
دلهم : خالة الريوگ جاهز نزلوا تريگوا
سهاد : تمام نازلين روحي گعدي الباقين
دلهم : أن شاء الله

توجهة لغرفة بنت الشيخ الچبيره دگيت لباب سمعت صوتها تعيطط منو ، 'اف شهالنفسية من الصبح '

دلهم : رندا الريوگ جاهز والشيخة گالت اگعدچ
رندا : خوش ولي

'اللهم الصبر' ، توجهة الغرفة بنت الشيخ الثانية الي تختلف تماماً عن اختها ، دگيت لباب ودخلت بدون ما اسمع ردها

دلهم : نور يلا گعدي راح تتأخرين على دوامچ يلا
نور : بس خمس دقايق حبابة
دلهم : دگومي يا خمس دقايق تحركي ساعه بـ 7

رَفعت البطانية وطلعت الكفشة وعيونها مورمه من النوم والبوز مادتة متر شكلها يضحك .

عفتها وتوجهة لغرفة ابنهم اخطو خطوة ليگدام وارجع عشره ليورا ، تراجعت وردت انزل وذكرت من أخر مرا مگعدتة شلون حصلت رزالة غسل ولبس
سميت بأسم الله ورحت ادگ لباب
زياد : ادخل
فتحت لباب شوية وبقيت واگفة بالباب
دلهم : صباح الخير ، الشيخة دگول خل ينزل يتريگ