# وطحت بحبك يا ام العيون السود ..!!!

البا( 15 )رت

يوم جديد جدا ...
في الصباح تحديدا الساعة 5 <
فزت من نومها على صوت طرق باب قوي .
وقفت و قربت من الباب و قالت : مين ؟
سارة بصراخ : يا حمير لي ساعة اطرق الباب يلا اصحوا و انزلوا تحت ترانا جالسين نفطر اذا ما جيتوا خلال دقيقة مافيه فطور .
لطيفة : طيب طيب اصحي البنات و اجيتس .
بعد ما راحت سارة ...
ناظرت للبنات المتسدحين و تسدحت معاهم .

صحت من النوم على صوت شخير فزت و صارت تقرأ المعوذات نزلت من الجانب الثاني للسرير و هي ناوية تفتح الشبابيك بس تجمدت في مكانها من حست ان رجلها لمست جسم احد نزلت رأسها و ناظرت و لقته نايم و يشخر خافت من انه سمع كلامها بس فكرت انه بعد ما نامت جاء و نام .
اخذت مخدتها و رمتها بوجه آسر بس ما تحرك و لا كأن صاير شيء زفرت بعصبية و ناظرت لوجهه و عبست من تذكرت الي صار البارح ...

اول ما دخلوا الشقة ....
آسر ناظرها من فوق لتحت و قال : غيري لبستس و نامي .
نجلاء ناظرته بحقد و هي تقول : و كأني ما بنام إلا بأذنك .
آسر صد عنها و صار يتكلم بالجوال .
نجلاء صدت بقهر و دخلت الحمام تبدل .
خرجت بعد ساعة و نص و هي لابسة بيجامه مالقته نايم على السرير ابتسمت و نطت فوق السرير و هي تضحك و تقول : و اخيرا تزوجتك يا آسر من زمان و انا انتظر هذا اليوم " سكتت شوي و قالت و نظراتها حقد " بس انت مسوي مدري مين و الله لأطيحك بحبي و بتشوف .
اكملتها بضحكة طويلة .
فزت لما سمعت صوت حمحمة احد صارت تلف برأسها و تناظر اذا في احد بس مالقت احد تعوذت من إبليس و نامت .

كانوا يفطرون مع الشياب ...
خلصوا فطورهم و راحوا يلعبون ...
مطلق و هو جالس على الأرض : طفش ياليتني بنت انام ألين ما اصحى بنفسي .
متعب : جد البنات عايشين بنعمة .
مشعل : اقول وين غرفتهم ابغى اشوت الكوره في الشباك عسى يصحوا .
فهد : أنا اعرفها الحقوني .
الكل لحقه و من بينهم مشعل اللي شايل الكوره بيده .
و صلوا لعند احد من شبابيك غرفة البنات و مشعل جهز نفسه و شات الكوره بكل قوته و الكوره صقعت بالشباك و طلعت صوت قوي يكفي انه يصحي كل البنات .
العيال كانوا يضحكون و بعدها انحاشوا قبل لا احد من البنات تشوفهم .

صحوا و هم منخرعين من الصوت الغريب ناظروا لبعض و ضحكوا على أشكالهم تغسلوا و لبسوا و تجهزوا و نزلوا تحت عشان يفطرون .
شادن : غريبة محد يفطر بالصالة .
هيله : يمكن غيروا المكان .
الكل هز رأسه برضى و دخلوا المطبخ .
لطيفة : يممممممهههه وش تسوين .
فاطمه : اغسل المواعين بالله يعني وش اسوي .
جميلة : و الفطور وينه .
فاطمه : افطرنا كلنا .
زينه : مافيه بقايا .
فاطمه : إلا زاد كثير بعدنا بس سارة اخذته للحلال .
الكل ضرب جبهته بقهر و نزلوا الحوش و كل وحده حاطه شيلتها على كتوفها إلا صيته و صبحيه لابسينها و لابسين النقاب .
شادن : اقول زينه و لا هيله وحده منكم تصورنا صورة جماعيه .
هيله : أنا أنا يلا اصطفوا سوا .
اصطفوا البنات و هيله صورتهم صورة جماعية و بعدها صورت سيلفي عشان تظهر معاهم بالصورة جلسوا البنات بعيد وراء الشجر و كل وحده و بطنها يطلع صوت .
صيته بصراخ : الله يأخذ دجاج اخوي .
البنات رفعوا يدينهم للسماء : آمين .
و لطيفة همست و هي تقول : و يأخذ عبد العزيز معهم .
سمعوا أصوات احد جاي من وراء الشجر الكل تغطى و ناظروا يبون يشوفوا مين جاي .
شافوا العيال جايين و هم يضحكون .
صهيب : و الله اني سامع احد قايل الله يأخذ دجاج اخوي .
و ناظر لصيته بحقد .
مشعل خزه و هو يقول : شعليك من البنت خلها تدعي ألين تبرد حرتها .
مطلق : مين هي اختك ؟
صهيب : اختي اختك يا ورع .
مطلق هز رأسه برضى و ناظر للبنات و دقت عينه بعين بنت تناظره ابتسم و هو شايل بباله انها خاقة عليه .
ماهي إلا لحظات و يشوفها تصد بقرف .
حرك رأسه بعدم رضى تام و ناظر للعيال .